رواية ورود شائكة الفصل الثاني والعشرون 22 - بقلم همس ليل

لا تطمئن للايام...فلا تعلم باي لحظة تنقلب ضدك
بعد ان كانت لك زاهية...
همس ليل

شهور الحمل قربتني من احمد حيل..
شفت بيه حنية واهتمام ابيته...
بديت اتلهف لجيته للبيت...
افتقد صوته ...احب اكعد احجي وياه
بهالوقت كمنا نفتح الصالة وننجمع بيها بعد الغدة نسولف...
وبعد العشى هم من يرجع ...الجهال
يلعبون يمنا وهو يحجيلي عن يومه
حتى اهتمامي ابيتي اتغير...
كمت اسوي كلشي بطيب خاطر...
جنت اشتغل على كيفي من دخلت بالسابع
لان تقيء راح...والكانونة شلتها من ايدي
الصبح حتى عمر سجله روضة حتى يتعلم
احس البيت يفرغ علية
من يصير الظهر وينفتح الباب...
اتلكاهم يم باب الممر...
من يدخلون بهوستهم....احس بالفرح
ذولة صاروا دنيتي ...
رجعت انام بغرفتي وية احمد بعد ماهجرتها ست اشهر...
جنة كاعدين على الغدة
احمد...صفحتي حيل تأذيني
هاجر...اسم الله ليش
هو صفن على حجايتي شوية يلا جاوب
_غير اكو ناس مجلبة بظهري الليل كله
ما اكدر اندار
مافتهمت شقصد عبالي يتشاقة
ردت اسأله بس عياط نور قاطعنا
كام ابوها عليها...
_وج جعفوصة شبيج
جانت تمتمت على عمر
_هاي شدكول
كمت اريد اشوفهم...
هاجر...تريد سيارته
احمد...مو هاي  العابج شعليج بالولد
ترفع ايدها ادردم على ابوها
_بس لا يطلع لسانج طويل على بعض الناس
ويباوع علية
مديتله لساني...
ورجعت لمكاني...
اجى كعد مقابيلي
_انتي متأكدة بالسابع
_اي ليش
_شو ماعندج بطن بس كروش هم مو كرش
ضحكت....لا يكولون اخذه بطولي
_هاي شلون بلة
_والله ما اعرف...
_بيج حيل تنيميهم...
_لا والله...عمر ينام وحده من التعب...
بس هاي عرومة يرادلهة واحد ينيمه
رحت عليها نومتها...
ورجعت للغرفة شفته نايم...
نزعت دشداشتي ولبست دشداشة نص ردن وقصيرة
جان شتى بس من انام احتر
صعدت على الجرباية....شفت ظهره لي
عجبني اشبكه ...بس استحيت...
هستوني غفيت ...سمعت صوته...
_هاي شنو
فتحت عيني...جنت محشوكة بظهره
جاوبته والنومة بعيني
_شنو
_شي يرافس
ضحكت...حسيت بيه
_طبعا اذا محشوكة بظهري...
اكولج هالشي عادي ما يأذيج
استغربت سؤاله...شنو ما عاش هالوضع وية نور
نمت على ظهري ودفعت الغطى...
هو من اتحركت اندار علية ونام على صفحته الثاني
اخذت ايده وخليتها على بطني
مشيتها وية حركة الطفل...
حركات وجهه من يرفس الطفل ضحكتني
شوية يجفل....وشوية يبتسم
رفع راسه وسنده على ايده...
_يمكن لو اني بمكانج...وهيج اوصل للموت بالحمل
اكره الاطفال...
_من يجي للدنيا ويصير بحظني انسى كل الي مريت بيه...
جانت ايده بعده تتلمس ابطني...
باوعت على ملامحه...تحديد لحيته...
سماره...شواربه ورفعت نظري لعيونه جان يباوع علية
بس نظرته حنينة ..رفعت ايدي وتلمست وجهه
دنك وباس ركبتي ورجع رفع راسه وهمس قريب على وجهي
_بيج حيل...يعني ماتتأذين ولا يتأذى الطفل
_لا...ما عليه شي
جانت كلماتي ضوء اخضر له...
لمساته بدت تفتح طريقه لباقي جسمي...
وبوساته توزعت بكل مكان...
من ابتعد شوية عني ونام بصفي.....
_شلونج
_ مابيةشي لا تخاف..
ابتسم وجر شداشته لبسها وكام...
حسيت بتعب ردت انام....
لكن فزيت على ايدين انحشرت جواي ورفعتني
فتحت عيني
_شنو احمد
_اغسلي يلا تنامين
رفعني ...راسا جلبت بركبته
_لا عفية خاف اوكع
_مو هرقل شلون اوكعج
ضحكت بقوة....
_وين سمعتها...
_غير صوتج مرات يلعلع من تحجين..
دخلني لحمام جان فاتح المي حار ومدفي
من وكفت على رجلية استحيت اول مرة اوكف هيج كدامه... خلى شامبو على راسي وبدة يغسله
خليت راسي على صدره...
_اكعدي راحة خلي اغسلج واطلعي
فعلا غسلي ولبسني البرنس...
_لا تطلع باردة...اني اروح
عفته يغسل ورحت للغرفة انشف نفسي
من باوعت بالمراية...
صفنت شو ما داعرف نفسي...
مين اجتني هيج جراءة ...
وياه انسى نفسي واصير شخصية ثانية
ماجنت هيج وية خالد...
طاح حظج هو اكو وجه مقارنة...

مشت الحياة طبيعية بينا...شهرين جانت صعبة علية
كان المفروض امي تجي اول ما ادخل بالتاسع
لكن بيبتي تعرضت لوعكة قوية...
خلتها بحيرة...واحمد كال لها لا تشيلين هم احنة موجودين...
جان خوفي لا هم عملية...شسوي بوقتها وماعندي احد
بس اول اسبوع بالتاسع...وبيومها الليل كله
عندي لويات بس عبالي مغص للصبح
صارت حيل قوية...
هزيت احمد
_احمد...احمد
فتح عينه متفاجا...
_ها هاجر خير
_يمكن عندي ولادة
_شلون يعني
_هاي شبيك عندي ولادة
راسا كمز من مكانه...
_انتي مو عملية بعمر
_اي مو شرط
اجتني لوية قوية...صحت بعدين عضيت ايدي
احمد ارتبك حيل...
_لا تخاف يمعود...
خابر ام كرار تجي يم الجهال
كمت للحمام غسلت واسمعه يخابر...
من طلعت لبست ملابسي جانت اللويات تروح وترجع...
لكيت احمد مبدل وعينه علية...
سمعت صوت جرس الباب...
طلع يفتحه...دخل هو وام كرار
ام كرار...كوليلي شعندج احضرلج
هاجر...ماعندي شي محضرة جنطتي...
بس عينج على الجهال
التفت ام كرار على احمد...
_خابر امي لو ام سامر تجي تروح وياكم
لو اروح اني زوحدة تبقى يم الجهال
_لا...
اجى صوتي حاد...
_ما يحتاج...احمد وياي...
هز راسه واخذ جنطتي من ايدي...
بوستني ام كرار وهية تدعيلي...
ما اكول ما جنت خايفة...
لكن الاكثر حز بنفسي رايحة وحدي
بينما بعمر جانوا كل اهلي حولي
بس وصلنا الدكتورة دخلتني صالة الولادة
جانت لويات الوجع تختلط وية حسرات
الوحدة والغربة الي حسيتها ذيج اللحظة
دخلت ممرضة صاحت منو هاجر
جنة يمكن تلاثة بالغرفة بين وحدة وحدة ستارة
لان مستشفى اهلي
كتلها اني
اقتربت مني
_شنو حبيبتي انتي وحدج جاية
بس زوجج وياج
_اي
_ماعندج احد ام ..اخت... خالة
عبالك دازت على جرحي
بس هزيت راسي
_خطية...زوجج برة كلب الدنيا كل شوي يوصي احد
اذكرت ما سلمت على احمد من فتت
ولا وصيته على الجهال...
شفت الويل يلا جبت...
وبلحظتها شكد احتاجيت ايد امي وهية اطبطب علية وطمني ...
واخر لحظات رادت الدكتورة تحولني عملية...
بس الله سهل لي...
الممرضة الي سالتني خطية ما عافتني...
ظلت وياي لحد ما غسلت للطفل ودخلتني للحمام
غسلت لي وبدلت ملابسي...
كتله عفية كولي لزوجي جبت
_كتله حبيبتي اول ماجبتي...
بعد ما ارتاحيت خلتني بعربانة وبحظني الطفل
وطلعتني ...شفت احمد واكف ...اول ماشافنة
اجى سريع باتجاهي ونظرة عيونه
خليط بين الخوف والفرح
اول ما وصلني...ما اهتم بالناس دنك وباسني من كصتي
_حمد لله على سلامتج ام عمر
اللهفة الي بصوته وحجايته ام عمر
فرحتني حيل...
حسيت بلحظتها شكد احبه...
اي حبيته ...حبيت اعتنائه بيه
حبيت وكفته وياي...
حسيته صدك سند اكدر اتجي عليه وما اخاف
رغم تعبي بلحظتها...
بس ما نكرت شعوري...
شال الطفل أذن وكبر بأذنه ورجعه بحظني
اخذ العربانة من الممرضة واشكر منها
طلعنا برة يم السيارة ...
فتح الباب...واخذ الطفل من حظني...
تكدرين اتكومين...
هزيت راسي...وصعدت بالسيارة على كيفي
رجع خلى الطفل بحظني...
وصعد يسوق...
_تعبانة
_حيل
_سميته علي
_براحتك
رجعت راسي ليورة وغمضت لحد ما وصلنا
ما جان عندي قابلية للحجي
من وصلنا...نزل دك الجرس ورجع فتح بابي شال علي...
ونطاه لام كرار الي فتحت الباب وهية تصلي على النبي...
ورجع علية راد يشيلني
_لا احمد عيب منة الناس
_شنريد منهم
_اكدر امشي بس اسندني
صدك سندني...
عمر ونور جانو ملتمين حول عمتهم يباوعون على الضيف الجديد
كامت ام كرار بوستني
_حمد لله على سلامتج حبيبة...
يتربى بعزكم
_اشكرج تعبناج
دخلني احمد للغرفة...واول ما كعدت ورفعت رجلية
رجع باسني من كصتي
_خوفتيني عليج...
باوعت عليه...ليش
_كالت الدكتورة كلش تعسرتي...وطلعت تريد تاخذ توقيعي على العملية
_اي بس الممرضة الي دزيتها شاطرة...
كالت حرامات صار تلث ساعات اطلكين حاولي مرة اخيرة...
وربنا سهل ...
_والنعم بالله...
نامي ارتاحي...
غطاني وطلع...
سمعت ام كرار سألته
_نامت
_اي راح تنام
_خلي ترضعه
_رضعته هناك
_تاخرتوا كلش
_اصدكين ما خليت ما نخيت من اهل بيت
_خطية وحدها جانت
_هية قوية ما ينخاف عليها
نزلت دموعي...لو يدري شكد جنت اتمنى امي وياي
لو نور الي ماتركتني بولادتي الاولى
اليومين الاولى احمد بقى وياي...
وام كرار جانت تجي تغسل للطفل وتسوي غدة للجهال وتروح...
بعدين احمد داوم والجهال ياخذهم وياه
وظل نايمة للعشرة يلا اكعد...
تجي ام كرار تنظف وتطبخ ...
كلت لاحمد يجيب وحدة تنظف لحد ما اطلع السبعة
بس هية خطية ما قبلت...
كالت شعدكم قابل...
من تجي ام كرار...اكعد يمها بالمطبخ كمت ونتريك سوة...
رغم علاقتنا جانت زينة بس ابد ما طرقنا فد يوم لموضوع امها...
بس هالايام كام الموضوع يجيب نفسه بنفسه
ام كرار_ما سألتج امج شكالت من عرفت
_بالليل فتح احمد وياهة كاميرا وحولهة علية
وعلي بحظني...
كامت تبجي خطية....
انقهرت من اذكرت امي شلون كامت تشهك
وتسأل شلون جبت وماكو احد وياي
_تشتاقيلها
_حيل...ابد ما مفترقين...
هاي اول مرة
_ليش وبزواجج الاول...
سكتت شوية لان نحرجت
_عادي ترة ما اضوج من السؤال
بزواجي هنة شهرين ورجعت يمها
طول فترة حملي
_شايفتها لامج مبينة حنينة وفقيرة
مثل نور الله يرحمها
_نور كلش حنينة وفقيرة وماتحب تجرح
جانت...
كملت جملتي بجانت رغم ماتكسر گلبي هالحجاية
_اي جانت حيل متعلقة بيج...ودائما تحجي عنج
_مع ذلك امج ما حبتها...
_امي ما تعرفيها شوكت تحب وتكره هالانسان
وليش
وسكتت ما كملت حجيها...
بس بيوم ثاني اني فتحت الموضوع
_ام كرار...صدك امج ما تحجي وياج من يوم ما جيتي وية احمد
_اي
_يعني ماترحين لهم
_اروح...بس تتجاهلني
_حتى بعد هالوكت
راح يصير سنة ونص
_هاي امي من تأخذ موقف من احد خلص
_انتي بنتها
_امي قاسية نوعا ما...
صح صعبة اكولها...
بس اريد افضفض لاحد...
ما اكدر احجي هيج كدام زوجي
ما اريد ياخذ نظرة عنها
ولا عندي صديقة احجيلها
_اختج الجبيرة
_ملتهية بمشاكلها...
ماخذة ابن عمي مثل ماتعرفين...
وهية تقريبا نفس اسلوب امي
_بس اني داشوف ولدها يحاولون يرضوها
_اي...هية تميز الولد عن البنات...
والاكثر هم تفرق بينهم
_يعني شلون
_جان اخوية الجبير الله يرحمه كلش اتحبه
لان نسخة منها....
كل ماجانت تتمناه بأبوية زرعته بيه...
لذلك جان عدها النفس الي يصعد وينزل
_ليش شبيه ابوج...
_ابوية جان فقير كلش...
وامي كوية من ازوجت ...
اجت لعيالها...
حموينها صغار ...وابوية اكبرهم
والوضعية هوسة الي يجي كله يروح
مايعرفون يرتبون وضعهم
كامت هية لزمت رواتبهم وفلوس شغلهم
ورتبت وضعهم...
ولذلك سيطرت على البيت...
حتى عمامي هية زوجتهم على مرامها
وبقوا حتى من مات ابوية...
ياخذون رأيها بكلشي
_هالشي خلاها يمكن تحب السيطرة ومحد يخالفها
_اي...
جانت سيطرتها ضمن مصلحة الشخص مو ضده
بس من انكتل اخوية...
تغيرت الامور...كامت تريد تمشي رأيها صح جان لو غلط
_وليش توافقوها
_صحتها تعبت وحالتها اتدهورت...
كاموا يخافون عليها...ويعرفون موت علي
أذاها
_جان اسمه علي
_اي
عرفت ليش احمد سمى ابنا علي
لهنا توقف حديثنا ...
وافتهمت هواي عن حياتهم...
بيوم اخر من اجت رجعت فتحت الموضوع
بعد ما حجت عن بيتها وتريكنا ورضعت علاوي
وغسلتله
_فدوة يشبه ابوه...
تدرين امي من درت وخاصة مسميته علي بجت
_كلتي لها
_لا احمد كاللها
_بس تبقى رافضتني...
_حتى لو ...هذا ابن ابنها...
لا بد تحن عليه يوم
_جان حنت على نور الصغيرة مو بنت ابنها هم
سكتت ماجاوبت
_صدك ام كرار اريد اعرف ليش جانت رافضة نور
_هية بالبداية ما رفضتها...
خلي احجيلج الي صار...
احمد جان يسرني من التقى نور حجالي يريد
يخطبها...
بس بوقتها جنة خاطبين لاخوية حسين...
وعلي جان مزوج ...
وهو هستوة متعين ...والي جامعه من شغله ساعد بيه حسين...
بعد سنة يلا ازوج حسين...
كال لامي اريد اخطب...
رادته يأخذ بنت خالي...
احمد مثل ماتعرفين محد.يكدر يجبره
فبقى يحاول وياهة...
لحد مقبلت....بس كالت له انتظر كم شهر
حتى نكدر نجهزك....سوت من راتبه سلفة
للخطوبة...
بس وية نهاية السنة انكتل اخوية...
وهنا امي نكلبت شخص ثاني...
صارت ما تتحاجى واصلا البيت كله جان حزين
_جان شكد لهم من التقوا
_قصدج احمد ونور...سنتين وشوية
لحد مادارت السنة مال اخوية
اجو اهل مرته يريدون ياخذوها
لان صغيرة وعدها حموين مامزوجين
امي تخبلت شلون ولد علي يربون بعيد عنها
_كم طفل عنده
_ولد اثنين..
حسين مثل ماكتلج صارله سنتين من مزوج ومرته هسوتها حامل...
وابو سامر بعده بالكلية...بقى بس احمد
كالتله ازوج مرت اخوك
هو تخبل...كال شلون اخذها وطول عمري معتبرها مثل اختي
امي كالت له عبالك اخذلك السنية الي كتلوا اخوك لو تموت ما ازوجكياها
_احمد شكال
_كال مو ذنبها الي ينكتلون من الطرفين
مو شغلة مذهب...
وبعدين حرام صار تلث سنوات واني مواعدها وكل مرة يصير شي ونأجل
بس امي صممت مايزوج غير مرت علي
_شلون نحلت لعد
_حسين جان مامرتاح وية مرته...
راد يساعد احمد...
هو هم جان متعلق بجهال علي وقريب منه
كال اني ازوجها...
_ومرته
_زعلت وراحت لاهلها...
وهو كال بعدين اصالحها...
بس الطفل وكع...وماقبلت ترجع
_طلكها
_اي....بس استقر وية ام حسين
علي جان مسمي ابنه هم حسين
_وبعد ما ازوج عليها
_لا هية خوش بنية وحبابة...
وهم خلفت له ولد وبنية
_كاعدين وية امج
_لا طلعوا بيت وحدهم بس قريب من اهلي
_شلون اقتنعت تخطب نور
_بقى احمد يحاول وياهة...وخاصة مشى العمر
هو جان يكدر ياخذ صغيرة
بس يكول البنية عشمتها كل هالسنوات
مو مال اخلي بيها
بس شعجب ماتعرفين هاي التفاصيل
_احمد وعلاقته بنور جانت نقطة الخلاف الي بينا
_يلا خية الكعدة وياج حلوة...
بس لازم اروح
طلعت واني افكر بحجيها ...
شكد احترمت احمد لان التزم بحجايته ووعده لنور
بس بقى اريد اعرف وضعها بالبيت شلون جان
من سمعت صوت الباب ينفتح...
تناسيت الموضوع وتلكيته بأبتسامة
_الله يساعدك
_هلا بنوارة البيت...
شلونج اليوم
دنك باس كصتي...
من جبت لسة من يرجع نفس الحركة
_الحمد لله
_ذولة خبلوني..الصبح المكاتل وياهم ماينتهي
_باجر اني اكعد ابدللهم
_لا خطية داسمع علي طول الليل يبجي
_هاي عادي راح يبقى بهالشكل
باجر اقبط السبعة خلص كافي
_اي ام كرار هواي تعبناها
كلت بس لا راح يكول لهة بعد لا تجي
_اي صح بس هاليومين وبعدها ما احتاجها
خطية ابد ماقصرت
اريد تكمل الحجاية مو مال بعد ماتجي
ثاني يوم من اجت وغسلت لعلاوي
_تعبتج وياي صار اسبوع
_يا تعب..كسبت خية لي
_تسلمين...
ام كرار اريد اسالج سؤال وجاوبيني عليه
_كولي حبيبة
_اكيد احمد لح وجبر امج على نور...
شلون تعاملت وياهة
جنت احس نور مامرتاحة...
_ليش ما سالتها
_تعرفين زواجها صار قبل ولادتي بشهرين
وبعدها التهيت بطلاكي...
وكل ما سال اتكلي زينة ماتحجي
_باعي نور مامتعلمة على طبع امي
عبالها من تنفذ كل الي تريده راح تكسبها
لذلك جانت تحاول بكل وسيلة ترضيها
حتى لو حسابها...
اني جنت قريبة منهم ودائما اروح..
واشوف الوضع
_واحمد
_الوضع كدامه جان طبيعي ...
محد.يبين شي...
ومرات من اسأله يكول نور ماتشكي حتى من يسأله
ماتكوله...
جانت ولادتي بداية الصيف...
وتفاجأت من احمد اجاني بعد شهر من ولادتي
جنت دارضع علي بالليل بعد مانيمت الجهال
كعد يمي...
_هاجر...اريد اطهر علاوي
_براحتك..احنة عدنا الولد نطهره بالاسبوع الاول
_بس مو هنا نطهره
رفعت راسي له
_لعد وين
_ابيت اهلي
_شنو...عود ليش
_هو كل جهالنا بالبيت الجبير يصير طهورهم
خليت علي على جتفي حتى يتريع...
واني اطبطب على ظهره على كيف
احمد يتبع حركتي...
مجاوبته اريد وقت افكر...
شلت علي وخليته بكريكوته...
_شو ماجاوبتي
رجعت كعدت مقابيله
_اريد اسالك...هو منو من اهلك شفت غير ام كرار
زين امك تدري بهذا الحجي
_اي عادي
_شنو العادي...
العادي ما تجي واني صار شهر  من جبت
واحنة بنفس الشارع
لو العادي صار سنة ونص من ازوجنا وهية
ماتقبل نطب بيتها
_انتي شعليج بيها...
المهم اني
_واني لخاطرك مجاوزة كل هذا
بس ابني اطهره ابيتي
_هو هم ابني...
واريد اطهره ابيت اهلي
ولخاطري مشيها
_واني احمد شنو موقعي من الاعراب
ماعندي خاطر عندك
_خاطرج على عيني وراسي
قاطعته
_مو بس خاطري وكرامتي
_وشدخل كرامتج بنص...
ليش سابج لو جابرج على شي
_لعد شسميه هذا
مو تنزل من كرامتي من تجبرني
ادخل بيت ما راغبين لي
_الي يمسج بحجاية اني اوكفله
اول مرة اطلب منج
جريت نفس ...
صدك اول مرة يطلب مني
_الله كريم...
ثاني يوم خابرت امي...
وطبعا امي گلبها ماكو ابيض منه
كالت شكو بيها لخاطر رجلج...
وهو ممقصر وحتى ماتبقين حجة عليج
روحي وجربي...
كتله ثاني يوم من كعدنا على الغدة
ابتسم بوجهي....
_ما انسى موقفج هذا
هاي كلمته كفتني...طول هالمدة هو ينطي
خلي مرة انطيه اني...
بالليل جنت دارضع علي حسيت واحد باسني من ركبتي....
ابتسمت...
_بعدك ما نايم
_لا انتظرج
_مو كلنا بعد عشر ايام يلا
_هسة تصبيرات مو اكثر هم ممنوعة
ضحكت اشطلعت هالتصبيرة...
صار كم اسبوع عليها
_يلا ملازم..
دار ظهره ونام...
خليت علي بكريكوته...
ورحت تعطرت واجيت شبكته من ظهره
وبست خده واني امسد شعره
_اريد انام شدسوين
_اريد تصبيرة مو بس انتة
بلحظة نكلبت على ظهري وصار وجهه بوجهي
_اشتعلوا عشيرتي...
انتي كد حجايتج....
_لا بطلت جنت اشاقة
_مايفيد بعد...