_وشاء الحب_
( بقلم بسمة البياتي)
_البارت الثاني عشر _
واني بهالوضع وصياحي وصياحها واصل السابع جار
سمعت صوت من قوتوا جفلت وبسرعة صديت علية
شعري على وجهي نازل اريد اركز بالشكل ما اكدر
... هساع اذا انعل والديكم احد يلومني من غضب الله على رؤوسكم حسكم واصل السابع جار اليسمعكم شيگول مربين بنوات بيت لو كاولية
سارة... اشرف والله اني ما سويت شي شوفها شلون جتلتني وگطعت شعري
... من گالت اسموا تذكرتوا أبن خالي معن كبران وشكلوا متغير ولا عرفتوا
بس ظلت تنگر بگلبي شلون يغلط على اهلي
بودي اروح املخوا
هدى... فان حظج شمسوية بيهن من انكسرت ايدج يارب
... الكسر بيدهن ان شاء الله مو بيدي مو فيروز اليندكن بيها وتسكت
مرة الأخرى اذا تجاوزن اخلي دمهن بطولهن
... مگصوفة العمر وبيج زود جاعد تردين دخلي يجي هادي اخلي يربيج من جديد الظاهر اهلج ماعارفين يعلموج الآدب والأحترام
.... اهلي مربيني احسن من تربية بناتج
عود خلي يربيهن مو يربيني
رادت تهد علية اشرف منعها
اشرف... اهدي ام وليد
هنا بينهن عليش تدخلين وتكبرين السالفة
... جت جدة بيدها العوجية وبالكوة تمشي
حسنة... بالحرام الحرم الي يمد ايدوا عليها افين خظوا واهجم البيت فوك راسو
هدى... عجل مادحجين وكاحتها وعرامتها احجي وياها كلمة ترد بعشرة
... گضبي بنواتج بالأول مو هادتهن اثنينهن عليها وبعدين مطلعتهن الفقيرات
... بهالأثناء جة خالي هادي
... خير ياربي شبلاكم حسكم واصل اليم الباب
.. تعال شوف بنت اختك فوك ما جتلت بناتي تطاول علية وتگولي خلي ابوهن يربيهن
هادي... بنت الكلب اني ما مربيهن
حسنة... ماكو چلب غيرك حرامات الشوارب التارسة وجهك من كلمة شيشتك على اليتيمة
... ييييييييمة لاتكفريني شنو جاهل جدامك
... وغمة فوك ما بنواتك جتلنها انتوا اهل الراهي
هدى... بناتي ما مجلوبات اكيد مسوية فاينة وتعاركن وياها
... هاااا سمعت يأبن بطني حرمتك بعظمة لسانها اعترفت وگالت هنا الهادات عليها
... لا عمة ما هذا قصدي عليش فريتي السالفة
... منو التفر السالفة مو اجي بالعوجية على صماخج
هادي.... هددددددى عجل شلون تگولين هي جتلتهن
... دشوف حالهن وانت احكم
حاعدة بيت ام علي جتني سرور تركض اتكلي لحكي سارة فيروز جتلتها
فيروز... ناس تمالخ ناس لعبت نفسي صديت على جدة
جدة خابري بابا يجي علي بعد ما اظل هين وانتي تعالي وياي اني مو خدامة عدهم
يوسخون ولازم اني انظف واذا ماشتغلت يگولون بيت اهلج وسخ
.... نگص لسانهن بيهن خير يلحگن نظافة امج مو زين مداريتني لو اظل عليهن اخيس
.... جدة اذا ما خابرتي هساع اروح البيت خالة امنة وهي تخابرلي
هادي... بنيتي لاتزعلين مني اني بحسبة ابوج وبنواتي مثل خواتج لو مفهمتني السالفة من الأول اكسر رؤوسهن وين تريدين تروحين وتعوفينا تعودنا على حسج بالبيت
هدى... صح كلام هادي لاتزعلين منا وهساع سارة وسرور يحبنج ويتعذرن
... ظليت صافنة عليهم شبسرعة غيروا كلامهم من سمعوا راح ارجع كل هذا حتى لايتحملون مسؤولية جدة ويظلون يفترون هين وهين براحتهم
جة خالي. وحرمتوا باسوا راسي
جدة ظلت تفر بيدها اشرف متكتف ويدحج بطرف عينوا اخذ جدة من ايدها وخشوا للغرفة
رحت غسلت وجيت للغرفة اشرف گاعد بسد جدة على الجرباية يسولف وياها
وكفت جدام المرآية الم شعري
اشرف...مايحتاجلوا تعديل ترى هنا النجتلن مو انتي
... صديت علية نعم؟! تحجي وياي
... عجل ويا خيالج
يمة لو شايفتها شلون گاضبة سارة وواكعتلها دك جتل وحسها يلعلع
..... هههههه عاشت ايدها حتى نوبة الاخرى مايندكن بيها
.... وال فيروز كبرانة ولا عرفتج
... عادي اني هم ما عرفتك
... صايرة زرافة
... جدة تسكتينوا لا أگلب البيت فوك راسو ترى لهساع ماناسية شلون غلط علية
... شنو هالوكاحة اشو ماعندج احترام عليش تخليني اغير اسلوبي وياج
حسنة... شششجاك يول عود انت العاقل ازعل منك اذا غثيتها
ول وشبي طولها جنها غزالة
... منو يشهد للعروسة غير جدتها
... جريت البطانية انجضعت وتغطيت ما اريد احجي ويا تذكرت شاهر من احد يگولي طويلة يگلهم طولها شطب ريحان من تكبر كل البنوات تحسدها على حسنها وطولها
اه يا شاهر كلشي يذكرني بيك مشتاكتلك شلون بية وبگلبي
ظليت نايمة راح اشرف
العصر گعدت سويت جاي الجدة وطلعتها للحديقة گعدنا سوة
حرمة خالي كالعادة اخذت بنواتها وطلعت
حسنة.. خما بعدج ضايجة منهن
... لا عادي نسيت
... يمة من يجي اشرف لاطولين لسان ويا مهما يكون اكبر منج وابن خالج ماحلوة لا بحگج ولا بحگوا الغلط والتجاوز
... وشعلية بي هو الله يسلموا مدري شبي وياي
... اشرف اخو خيتوا وياريت كل ولد ولدي مثلوا حنين ومابيوم تاركني علاجي والزايدة والناگصة هو ينگلهن الي. احسن من ولدي علية
.. ماشي جدة بعد ما علية بي الخاطرج
... غديت فدوة الهالوجة
... اسم الله عليج عساج سالمة يبعد عمري
اخذت التلفون حجيت ويا ماما ونجوى وبعدها سويت عشا جدة عشيتها انطيتها علاجها ونامت
الايام تمشي بنفس الروتين گاضيتهن بين مدارات جدة وبين خالة امنة وبنواتها الماتركوني ابد
نجوى وماما مايمر يوم بدون ما اسمع صوتهن
اشرف بين كل ثلاث اوربع ايام يجي يطمن على جدة ويجيب علاجها ويتسوك الأكل المناسب الها وصار من يجي يذكرني وياها يجيب لفات وحلويات
علاقتي تحسنت بي وما عدت اتعارك ويا
نجوى... البيت گاعد يأكلني بدون فيروزة كل ليلة گبل لا نام اشبع بجي عليها
بنات عماتي
نور ورنا وياي ماتركني يومية يمنا بس مستحيل وحدة بيهن تسد مكانها
بابا بالبداية ظل ايام متعصب ويزگح بالطالعة والنازلة بس هساع التهى بالشغل والعمال
خلص بناء البيت تهيرنا اني وماما وعماتي والبنوات تا نروح نغسلوا
من وصلنا تفاجئنا بي البناء يخبل
فتريت بالبيت مسوين استقبال وربعة ومطبخ وغرفتين وحمامات
وفوك صالة وثلاث غرف وحمامات
والمشتمل مطبخ زغير وصالة بالوسط وغرفة وحمامات وفوك غرفتين وحمام
اكو باب بين الصالة وبين طارمة يربط البيتين والباب الاخر على الحديقة
بابا ماقبل يصير سياج بالنص يفصلهن ظل تفس گبل باب واحد وحوش واحد
شاهر.... الوضع يظل مثل قبل الغدة والعشا سوة بس وكت النومة والراحة تجون هين ما اريد تنفصلون عنا
اصيل... تعبناك خوية والظاهر صرفت جثير البيت بنائو يخبل
... اذا عدتي هالكلمة بروح ابوي ازعل منج
يلا كملوا تنظيف تا باجر نجيب الغراض
نجوى... للمغرب يلا كملنا تمنيت فيروز ويانة ونختار سوة الغرفة التعجبنة
اخذت الغرفة الجوة يم غرفة جدة والطابق الفوك التهاني وبابا
ثاني يوم نقلنا الغراض
الشيلة تكسر الظهر اسبوع كامل واحنا نرتب بي
مظل شي للعطلة وتخلص وصار لأزم بابا يحدد موعد عرسوا
تمنيت مايجي هاليوم ادري بنفسي انانية
بس والله صعب ١٤ سنة وهو بس النة
وهساع لازم اتحمل واشوف التجي تاخذوا منه
نعيمة... حجيت ويا ام غازي وحددنا الخميس العرس
شلهر.... بلغتيهم العرس زفة بسيطة ما اريد هوسة انسوي غدة والعصر اجيبها واجي
... يمة اريد اسويلك عرس وافرح بيك وتهاني هذا اول بختها غير نسويلها زفة حلوة
.... گبل مو فرحتي بيه ويومين الفرقة ادك وال يرحم اهلج عوفيني براحتي
وتهاني ماحارمها من شي راح تلبس البدلة واطلعها بزفة بعد شرايدين اكثر
.. هذا هو لاتضوج
الله يسعدك وليدي بلغ الولد يعزمون گرابتنا على الغدة
.... ان شاء الله
... بابا ضايج اذا مايريدها عليش وافق يزوجها
حرت شلون ابلغ فيروز شلون بيها من تعرف الخميس عرسوا
عمة امنة درت واكيد هساع تكوللها
وجدة حتى گرابتنا الهناك عزمتهم
اووووف الله يعين گلبي وگلبج فيروز
اخذت تلفون ماما وخشيت للغرفة
اتصلت بسرعة جاوبتني
.... من عاب هالشكول وين مختفية اليوم دكيت عليكم ما رديتوا
... هاا ماسمعتوا ماما جانت بالسوك واني ملتهية بالشغل اخبارج يولو
.... نفسها گاعدة وساكتة
... هااا هم جتكم عمة امنة.
. لا صار، يومين مو مبينة
نجوى شبيج شو مو على بعضج وصوتج مخنوك بالگوة گاعد تحجين
.... من حجت هيج بجيت وشهكت دموعي وأكفات عارية
... كعدت الحيلي وزتيت الغطا نجوى شبيج خما صاير شي يولي احجي لاتخوفيني عليش تبجين
.. عرس بابا الخميس
... هجست انضربت بگلبي سكتت ما اعرف شجاوب صوتي طمس
الوووو احجي لاتسكتين لاتضيمن بگلبج
.... عضيت شفتي بحرگة وهمست شحجي
ماعاد للكلام فايدة الله يسعدوا
... راح تجين
... وين
.. للعرس ماما وصت عمة امنة تجيبج وياها
... بلكي اموت اذا جيت وشفتوا وياها وأيدوا بيدها
من تخيلت المنظر بجيت
ونجوى تبجي وياي
راح اسدوا خاف جدة تسمع صوتي
. عليج الله لاتنقهرين
... الله كريم
سديتوا منها ودفنت وجهي بالمخدة وغصيت بالبجي ياربي ساعدني شوكت انساه مو گاعد اتعذب ارحمني ياريي
ثاني يوم بالگوة شلت رأسي من المخدة لوما ريوك جدة فلا اكوم
حيلي مهدود وراسي يريد ينفجر من كثر البجي
حسنة.... بيج شي يبعد جدتج وجهج تعبان وذبلان خما مريضة
.... لا مابية شي شوية وجع راس وهساع اكيد يروح
....تعالي خلي راسج بحجري
.... خليت راسي على رجلها فركتوا غمضت عيني اهجس ارتاحيت
... رجعي نامي لاتعبين روحج هساع اخلي سارة تسوي الريوك
... لا مابية شي لاتخافين هذا وجع رأسي لان تاخرت بالنومة ظليت احجي ويا نجوى
.... يولي مو موصيتج لاتظلين سهرانة على هالتلفون البلوة مازين
.... صار تامرين بوستها ورحت حضرت الريوك وجبتوا الها كعدت اجاملها حتى لاتحجي اذا ماكلت شي
امنة.... صباح الخير
... صباح النور
... تعالي تريكي ويانة
... الف عافية سبقتكم
باجر ماشية السامراء شنو رايج خالة تجين ويانة تغيرين جو وهم تحضرين عرس شاهر
... يمة وين بية حيل للحمام بالگوة اروح وهادة حيل هالمسكينة ومتعبتها وياي
... جدة شنو هالحجي ترى والله ازعل قايل شمسوية
.... يمة غير جاعد احجي الحگ
امنة اخذي فيروز وياج اكيد اشتاكت الأهلها خليها تغير جو
.... گلبي عصرني لا ياربي شسوي
حجيت بسرعة لا ما اروح اظل هين يمج
امنة... يولي اصيل گلبها غادي نار عليج كل شوية وتوصيني اجيبج وياي
حسنة... روحي بنيتي ولاتخافين علية ماظل وحدي غصب عنهم يداروني
... سكتت مدري شلون اخلص من هالورطة
من طلعت خالة امنة لحكتها للباب
اكفي خالة
... ها يولي شبيج
... ما اكدر اجي وياج
.. عجل گبل شوي شحجينا
... ما كدرت احجي جدام جدة حتى لاتحس نفسها ثگيلة لان هذا كلامها
ما أكدر اعوفها ادري محد يداريها وصحتها بالنازل گبل يومين رجلها ماشالتها ووكعت بالحمام
... سودة علية عليش ماتحجين تا اجي اساعدج واسبحها وياج
... ادري بيها نفسها عزيزة وتنقهر
.... هساع شگول الأمج اذا سألتني
... كوليلها جديتها تعبانة واني هم راح احجي وياها وبعدين سمعت مو عرس جبيرة عليش مخبوصين ورايحين
... ماشي احجي ويا امج والله كريم
... رجعت جوة وره ربع ساعة دكت ماما
اصيل.... بس فهميني شنو من گلب الشايلتوا
ماتشتاگين ماتكولين هاي امي خطية گليها غادي نار علية اروح أشوفها
وابوج المسكين يحسب الأيام تا تجين ويشوفج
ونجوى بس واحد يذكرج جدامها الدموع تجري
.... والله العظيم مشتاگة اكثر منكم وروحي لايبة عليكم
بس يا ماما حدة تعودت على أيدي وكلشي اني اسويلهيا اذا اتركها منو يظل يمها
.. أسبوع ما يأثر خلي حرمة هادي اداريها
.... هي وينها مرة خالي اسمع حسج وما أسمع حسها حسرة تگعد بالبيت شوية
ووضع جدة مازين حتى الدكتور گال صحتها بالنازل
. ومنو اليگدر يغلبج بس هم حاولي بلجي تكدرين تجين
.. ان شاء الله عمري سلميلي على الكل
... يوصل بعد روحي ديربالج على نفسج بنيتي
... الحمد لله كدرت اخلص من سالفة الروحة
بس كلما يقرب موعد عرسوا نار تشب بية واذا جة الليل يبدي عذابي ودموعي تغرگ المخدة
اشرف... فيروز شبيج صارلج جم يوم مو على بعضج مريضة اخذج للطبيب
... لا مابية شي شسالفتكم انت وجدة مريضة ومريضة
لان اسهر ويا نجوى وبنات خالاتي اكعد متكسرة ومالي خلك
... عجل خوش هساع تطمنت من غردتي مثل البلبل
.... ههههه والله فقيرة مدري عليش ماخذين علية نظرة اني لسان
... اي صح وين اكو بفقرج والدليل سارة وسرور اذا فتي من يمهن مراكضهن يصير مالة والي
... هااا مو ارجع اگلب عليك
... لا عاد كلشي ولا تگلبين خلينا مثل ما احنة
... ابتسمت ماشي
نجوى... قبل العرس
بابا وقادر بالحوش يغسلون السيارات
صاحني اشغل الماطور واناوشوا الصوندة
شاهر.... هم تحجين ويا فيروز
.. اي گبل شوية جنا نحجي
...راحت تجي ويا امنة لولا
... لا ما تجي ماتگدر تترك جدة حسنة
قادر... عليش تسأل عليها لايكون تريدها تحضر وترگص بعرسك
.. اكرمني بسكوتك ولاتظل تجفص
... هساع قابل حاجي شي غلط اتركها بحالها لا دور ورأها
... وهساع شمسويلها شايفني گاضبلها التوثية ورايح جايبها من شعرها تا تحضر عرسي
... والله لو يطلع بيدك تسويها الميت ميتي واعرفوا شلون منبوشة صفحتوا
.... انجعمممممم لا بالحرام اشووووفك شي مايعجبك
نجوى...قادر سكت استغربت من اسلوبهم اهجس حجيهم كولو ألغاز
رجعت عصبية بابا يبتلي على عمروا اليحجي ويا كلمة
حتى جدة زعلت منو
نعيمة... اذا ما رايد تتجوز عليش ما رفضت من الآول مو احسن من الجاعد تسوي كلمة محد يكدر يحاجيك وتزكح على الرايح والجاي
الصوج بية لو عايفتك بدون حرمة احسن
ورطت نفسي وروطت بنت العالم وياي
...لاتزعلين مني وهذا راسج احبوا
مثبور بالشغل وودي وجيب راسي صاير شكبروا من كثر مامسطور
... بابا راضى جدة وطلع
شوية هدء حتى لاتزعل منو
گرابتنا مثل كل مرة من گبل يومين جو يمنا والبيت ماظل بي محط رجل بس الحلو
الكل يساعدنا بالشغل مايبقن گاعدات
اليوم الحنة بابا ماقبل يروح يحنيها كال العماتي وجدة انتوا روحوا
اصيل.. عليش بعدج مامبدلة راح تجي السيارة
.. ما اجي اظل هين
...جريتها الحضني ديرباالج تنقهرين انتي بنتي واني امج مفهوم
... بالگوة حبست دموعي حتى لاتضوج ابتسمت بوجها لا ماما عليش اضوج يكفي هذا حنانج المغرگني
.... الله لايحرمني منج ومن هذيج الكاطعة
.. ههههههه ولايحرمنا منج بعد عمري
راحوا يحنوها بس ظلن النسوان الكبار بالبيت.
خابرت فيروز صوتها مخنوك وبالكوة تحجي بسرعة سديتوا ما اريد تسمع الهوسة والافراح العدنا وتضوج بالزايد
كملوا الحنة وجوي
ثاني يوم جابوا طباخ ركب الاكل
ونصبوا جادر برا للزلم تا يتغدون
بابا ابد ماشفت الفرح بعينوا
كملنا الغدة وتهيرنا تانروح نجيبها
هالنوبة ماكو مفر لأزم اروح وياهم
صعدنا بالسيارات ورحنا البيتها نزلن النسوان يهوسن وجماعة بابا واولاد عمو حرگوا الجو بالطلقات
طبينا جوة تهاني بالبدلة البيضة حلوة طالعة كعدنا شوية واخذناها افترينا شوي ورجعنا للبيت
امها وخواتها وعماتها وجهن مايگصوا السيف اليگوللهن بز ينفجرن بوجهوا
بابا طلع يم جماعتوا برا
والبنوات شغلن الديجي وظلن يرگصن
قبل المغرب
حجت اختها الجبيرة
عجل المصور وينوا شو الساعوا ماجة ياخذلهم صور
احلام... ياخذون بالتلفون وبعدين يسحبونهن شاهر ما جاب مصور
.. خواتها من سمعن هيج خبصن البيت
شلون ما يآخذلها صور عجل عليش لبست بدلة وراحت صالون فوك ما رضينا بهاي الزفة حتى مصور ماكو
جدة وعماتي وگرابتنا يريدن يسكتنهن ماكو صوتهن يلعلع
اصيل... طلعت وكفت باب المطبخ خاف لا شاهر والزلم يسمعون الصوت
وعلى حظي شاهر والولد سمعوا
شاهر... شگاعد يصير جوة عليش حسهم عالي
.. هااا ماكو شي خوية نسوان بينهن تكاونن
ام تهاني صاحت بعلو حسها
..... شششنو احنا زاتين بنتنا وما رايدينها الفصلية مو مثلها انتوا مماخذين ارملة بنتي بنت بيت من حگها عرس ومصور وحفلة بالحرام الحرم
اذا ما جة شاهر اخذها يتصورن هساع اخذها. وارجع للبيت
شاهر واكف يسمع وعيونوا براسو غدن دم والوجة مايتفسر من العصبية
قادر.... امشي شاهر وين رايح
.شاهر...اليوم انعل سسسسساس اهلهم
... شاهر دفع ايد قادر وفات جوة وهو يغلي من العصبية..........
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!