.
_وشاء الحب_
( بقلم بسمة البياتي)
_البارت الثالث عشر _
شاهر دفع ايد قادر وفات جوة وهو يغلي من العصبية.
ركضنا اني وقادر وراه
ام غازي من شافت شاهر وجهه خبط ألوان معبالها موجود وراح يسمعها.
شاهر... يميني على يمينج تهاني اذا طلعت من عتبة هذا الباب مطلگة مني بالثلاث
ام غازي... مو هذا عشمي بيك مامتوقعتها منك
يمة احنا ما طلبنا شي صعب لو حرام هالشي من حگ العروس واني ام اريد اشوف بنيتي فرحانة
.. اليطلب شي مو بهالسلوب لو حاجية وياي بدال هذا الصياح اشلع عيوني واخليهن بيدج
مو اني الينلوي ذراعي واتهدد تريدين تاخذينها الله ومحمد وعلي وياكم
اصيل.. عمتها رادت تحجي ام تهاني سكتتها
.. وليدي اگصر الشر واخذها تصوروا لاتخلي الشيطان يخش بينا
... لا اني ولا اهلي بدينا بالمشكلة
واكفة بنص المعازيم تصيحين بنتي مو فصلية ولا ارملة
گوليلي بشنو قصرت وياكم من طلبناها گلتوا گبعوا واخذها بالهدوم العليها
بهاي گلمتكم كبرتوا بعيني
ومشيت وياكم حسب الشرع والأصول مابخلت عليها بشي وكل الطلبتوا اخذتوا وزيادة وهالشي واجبي وأصلا عيب احجي بي بس انتوا خليتوني افتح السيرة
ردتوا حنة سويتلها
والعرس عزيمة وزفة وطلعت من بيتكم معززة مكرمة
كل هذا وصرت اني الموزين وظالم بنتكم
... حششاك من التقصير والظلم لاتزعل مني اني بحسبة امك واحنا اهل
اصيل... ام تهاني غيرت كلامها ولا عبالك نفسها الجانت تزكح قبل شوية
طلع شاهر ورجعنا كملنا الحفلة
صبينا العشا تعشوا الناس وبعدها زفينا العرسان للغرفة
فيروز.. الگاعد يصير بية والاحساس الاحسو اكبر من طاقتي ويني وين الحب شجابني علية عليت گلبي بي
اتعس شي من تريدين تبجين وماتكدرين تخافين احد يشوفج ويحس بيج
انتظر الليل دقيقة وره دقيقة تا اخش جوة بطانيتي وأفرغ الهم البگلبي
جدة عينها تراقبني ظليت اتهرب من عيونها وما ادحج بوجها اخاف لاتقرأ الضيم البية
بعد ما خابرت نجوى ما اريد اعرف شي عن عرسوا
باليل عشيت جدة وانطيتها علاجها ونامت
وأخيراً دخلت لفراشي بجيت وبجيت وبجيت الحد ما انكطع نفسي
عضيت المخدة اكتم حسرتي وشهكتي
هاهي فيروز انسسي شاهر مايريدج اختار تهاني وصارت مرتة وام بيتة كافي افكر بيهم اطلعوا من راسي الخاطر الله
حسنة... وال فيروز
... ياربي شگعد جدة بالحزة ما اكدر ارد عليها من صوتي راح انفضح ظليت ساكتة وخاتلة جوة البطانية وخانگة روحي بالمخدة
... يولي ادري بيج گاعدة تعالي بسدي عندي سالفة وياج
... مسحت دموعي وبالگوة جريت النفس جاوبتها خير جدة محتاجة شي
...تعالي هين
... ما كدرت اعترض جيت يمها سوتلي مجال ومدتلي ايدها
انجضعت بسدها وخليت راسي على ايدها
.... شبيج يبعد جدتج منو الغاثج ومطير النوم من عينج
.. هااا مابية شي
اكو بالغرفة ضوا خفيف خفت تشوف الدموع المالية عيني ضميت رأسي بصدرها
لزمت راسي رفعتوا وخلت ايدها جوة عيني تتلمسوا
... اذا مابيج شي عليش هاي الدموع من خشيتي بفراشج عيني عليج تتگلبين جوة البطانية مثل السمجة المزوهرة
... شجاوبها حتى عيب احجي بالسالفة شگوللها حبيت الرجال الرباني والي بيوم من الايام سميتوا خالي سكتت ورجعن دموعي يجرن
لمتني الحضنها تلعب بشعري
... اذا مو حابة تحجين القاهرج وكاسر گلبج بلاها لاتحجين
دام مو نعسانين شنو رايج احجيلج قصة من قصص ايام زمان
.... رغم الحزن ابتسمت
ياريت تدرين بية من گبل احب القصص التسولفيهن الي
... عجل اسمعي هاي القصة
وماتحلى الحجاية غير، بذكر رسول الهداية
. اللهم صل على محمد وآل محمد
كان يا مكان بقديم الزمان
مدينة حلوة بيها من الخيرات الي يسر النظر ويسحر العين
قصورها عالية
وداير مدايرها حصن مايكدر العدو يخترقوا
ملكها عادل ويحب شعبوا
وزلم المدينة فرسان شجعان وخيالة
مايدخلون بمعركة وغزوة اذا مايكونون هما المنتصرين
بطراف المدينة بيت زغير
تسكنوا مرة ارملة ماغدها غير وليد وبنية عدهم ارض زغيرة عايشين من خيرها
اسم البنت حسناء عمرها عشر سنين
بيوم من الأيام فرسان المدينة تجهزوا
تايطلعون غزوة
والطريق اليفوتون منو الجيش من جدام بيت الأرملة
وكفت حسناء ادحج على الشباب وهما يفوتون من جدامها ومن بين الشباب فارس على حصان اسود
وسامة الشاب تذوب الگلب لابس زي المعركة والسيف بظهروا ابتسملها
فرحت حسناء ولمعت عيونها وبينن بياض سنونها
ركضت. الأمها ماما الفارس الحلو ضحكلي
الأم اكيد شاف هذا الحسن وضحك
من يومها حسناء صارت تگعد بنفس المكان تنتظر الشاب الحلو يرد من الحرب راحت ايام وجت ايام رجعوا الشباب والفخر والنصر ماليهم
حسناء عينها ادور على نفس الفارس ومن بعيد لمحتوا
من وصل يمها نزل من حصانوا ثنى رجلوا وصار بطولها سآلها عن اسمها
جاوبتوا ابراءة حسناء
انتي ليش جاعدة هين
اتتظرك
عجل دائماً ظلي انتظريني ومن تكبرين والسنة التجي ازوجج
فرحت الطفلة بكلاموا وصارت ويا الورد والعصافير تتمايل
مشت ايام واستعدوا الغزوة جديدة
ومن جة يمها كاللها نفس الكلام من ارجع ازوجج
رجعوا من الغزوة منتصرين
حسناء كبرت سنة شوكت تتزوجني
مو هالسنة السنة التجي
وظلت حسناء سنوات وهي تنتظر الفارس يوفي بوعدوا ويجوزها
صار احتفال بالمدينة وانعزموا كل الناس
كالوا الملك مكافئ
جنودوا ومسويلهم حفل زواج جماعي
اتجمعوا الناس بالساحة المزينة بالورد
وكفوا الناس ينتظرون شوكت يمرون الفرسان من نصهم ويا عرايسهم
جة الموكب وبدء التصفيق والهتافات للشجعان
من ركزت حسناء شافت حبيبها من بينهم وعروستوا بسدوا
خاب املها بجت انقهرت اتمرضت يأست من الحياة لان ظنت ما تكدر بيوم تنساه
بس صار العكس كلما يمر يوم الوجع يقل والحب يختفي و بيوم صبحت گلبها متشافي من حبوا
كبرت حسناء وصارت من اجمل بنات المدينة وحسنها ينضرب بي المثل
والخطاب طوابير على بابها
شافها ابن الملك وعشكها وجاب موكب جبير وخطبها
عرسها دام سبع ايام احتفلوا بي الناس من كل حدب وصوب وبيوم العرس شافها الفارس وانصدم بيها تحسر لان خسرها
ولوما تاركها ماجان صارت اميرة
.... انشديت ويا القصة ومركزة بكل كلمة بيها
حتى القهر نسيتوا
صفنت جدة عليش حجتلي هاي القصة بالذات
هجستها تعرف البداخلي
... عجبتج
.. هااا اي حلوة جثير
... مو مهم حلوة لو لا المهم العبرة البيها
الله من ياخذ منه شي نحبوا نتحسر ونبجي ونيأس ونكول خلص الدنيا الهين ووكفت
بس لو نفكر عدل نعرف الله ما يأخذ شي اذا ماينطي الشي الأحسن منو
كوليلي اكو شي بهاي الدنيا اعظم من الموت وفراك الأعزاز
.. لا ماكو
.. وحتى اليموت ينسي
بيوم الماتت امج گولت خلص هاهي لهين وگلبي معد يتحمل واكيد ما اظل عايشة
وهاي جدامج عشت صح تعذبت بس شوية شوية تعودت كلشي بالبداية يبدي جبير وبعدين يزغر
... هساع تأكدت جدة كاشفتني وتعرف البية وما حبت تحجي بصورة واضحة وتحرجني
سكتت وظليت نايمة بحضنها
قررت احارب نفسي وأنساه
شاهر من هاليلة رجع خالي وبس
نجوى...خلص العرس وصارت تهاني وحدة من اهل البيت
فقيرة وبحالها مدارية بابا وقايمة بواجباتوا وبابا هم صاينها ومحترمها
بدة الدوام صرت صف ثالث متوسط
باليل گبل لا انام بابا صاحني ومثل
كل يوم ظل يسالني عن احوالي والمدرسة وشمحتاجة وخما ضايجة
گبل اشكد جان يهتم بية هساع صار اهتماموا مضاعف مايريد يحسسني بفراغ وزاجوا غيروا
شاهر... هاج شوفي شجبتلج
... ناوشني كارتونة زغيرة مال موبايل استغربت ادري يتخبل بنية بعمري تشيل موبايل
.... هههه شبيج فهيتي وفتحي ثمج
ترى من جبتلجيا لان واثق منج وادري بنيتي ليرة ذهب
هذا حتى تحجين بي ويا فيروزة وماتظلين كل شوي طالبة تلفون امج
... بابا تغيرت ملامحوا وتحسر من ذكر فيروز
تهاني. بالعافية عليج حبيبتي
اكولج هي فيروز بعد ما ترجع هين
أصيل... طبعآ تجي من يرجع خالها وحرمتوا من السفر
.... هاا خوش
شاهر...مشتاگلها عبالك صارلي دهر مشايفها
اصيل... لاتذكرني والله غادية نار عليها
.
قادر... هاا يولي شو نصبتيها مناحة هي مصارلها اربع شهور اهناك لو تغيب سنة شتسوي
.. بلجي گلبي يطك والله
شاهر.. اخذتلها تلفون مثل تلفون نجوى باجر ان شاء الله طالع للرمادي اشوفها واشوف خالة حسنة وادويلها مصروف
نجوى... بابا ششبي عليش گاعد هيج يسوي صح فرأكها صعب بس شوفتوا الها بعد اصعب هي كل يوم تسآلني عن احوالو وعن علاقتوا بتهاني بعدها الهساع گلبها موجوع
قادر... لا أله الا الله شششحجينا
. خير بهاي هم تريد تدخل
.... موتدري عدنا شغل شسوي رايح
اصيل....خوية نافع دزلها مصرف بيد امنة وخالة حسنة من عارفة خابرتني متعصبة رزلتني اتكول دام هي هين محد يصرف عليها غيري
تهاني...اخذني وياك تا اتعرف على گرابتكم اهناك
... وين اخذج مارايح اتونس يوم بالجثير وارد
ورحمة الوالديكم لاتعرضولي رايح يعني رايح
لصيل...لوما الجهال مدارس جان جيت وياك
..عود غير نوبة روحوا
قادر.... شاهر گوم نفتر شوي اختنكت من البيت
.... قادر اخذا بابا وطلع
تهاني ضاجت وصعدت الغرفتها
شلت تلفوني وطبيت للغرفة
حايرة اكول الفيروز لو لا
دكيت عليها حجينا شوي ادري بيها ذكية حست عندي شي
... احجي من الأخير عليش مرتبكة
... عوذة هلكثر مكشوفة جدامج
... ههههه عجل شعبالج من ال الو التكوليلها اعرف البيج
اي احجي شنو حرمة ابوج حامل وخايفة تكوليلي
.... ههههههه فان حظج هاي وين راح تفكيرج
.... لان ادري بس السوالف التخص ابوج تخافين تحجيهن جدامي
....باجر بابا يجي للرمادي تا يشوفج
... عضيت شفتي بقوة ترى حرررررررام علية اني انهزمت منو وهو يريد يجي عليش مگاعد يقدر الأني بي گلبي بعدوا ماطيب عليييششش يلجم جروحي بشوفتوا
... يولي يگول مشتاگلها
.... ما اريد يشششششتاگلي اريد انسسسسساه
... لاتبجين قادر اخذوا وطلعوا بلجي يقنعوا ما يجي لان هو هم ضاج من موقف بابا
.... اختنكت ما كدرت اكمل حجي سديت الخط للصبح الوب اهجس شي نايم فوك گلبي من القهر
... اتصلت على نجوى كالت هساع هو بالطريق فد شوي يوصل
ماعندي غير جدة جيت يم رجلها ابجي
.... باسم الله شصاير يولي
... جدة خالي شاهر راح يجي ابوس ايدج ما اريد اشوفوا سساعديني
.. لا أله الا الله بنتي اهدي وسولفي تا افهم منج
شوكت راح يجي
... نجوى كالت مابقى شي راح يوصل جاي يريد يشوفني
... وانتي عليش ماتريدين تشوفينوا شاهر شمسويلج
.... مامسويلي شي بس ما اريد اشوفوا
.... مو على حسنة هالحجي ترى هالشعر النصبغ بالشيب من الحياة وتجاربها
عليش فرفحتي بيوم عرسوا تحبي مو
... بجيت قوووي ما اكدر اجاوب
.... شي واحد اريد اعرفوا شاهر شلون خان الأمانة شلون لعب بمشاعرج وانتي بعمر بنتوا
.... جدة فاهمة شاهر معشمني بالحب وتاركني
لا جدة فهمتي غلط شاهر معلية الصوج بية وبگلبي
... شلون فهميني
.... اني الما ادري شلون حبيتوا وبساعة غباء وطيش وكفت جداموا واعترفت بمشاعري
... اي وبعد شاهر شگال
... غدة نار تعصب وضربني وحتى انساه راح تزوج
...تدربن لوما مسوي هيج جان وگع من عيني
هذا هو شاهر الأعرفوا زلمة من ظهر زلمة
..... اعرف الغلط مني وهو حقوا بالسواه بس والله موبيدي حبيتوا وتورطت شسوي
... كافي لاتبجين ما اخلي يشوفج تركي ااسالفة علية
وره الظهر گاعدة وعيني على الباب.
وهناك وجان يجفل گلبي من سمعت حسو
جلبت بيد جدة
جة ششسوي هساع وين اروح وين اختل
.. يولي اهدي شبلاج راح تموتين امشي طبي الغير غرفة ومعليج بشي
.. طلعت اركض
صوتوا گاعد ويا خالي هادي بالأستقبال طلعت من المطبخ رحت وره البيت وگمبصت جوة شباك غرفة جدة
ثواني حسو بالغرفة يسلم عليها
.. هلا بسورها وبنورها شلونك يا ابو طول الحلو
.. يبعد عمري خالتي شلونج صحتك احوالج
... الحمدلله على كل حال
مبروك الزواج
الله يترس حضنك بالجهال ويجعلها جوازة الدهر
.. الله يسلمج بوجودج ان شاء الله
عجل فيروز وين شو ماكو هادي كال جاعدة بغرفة جدتها
...المسكينة مشلوع گلبها وياي وتعبانة يمكن نامت
خلي البنوات يگعدونها اريد اسلم عليها
. خما تزعل من خالتك اذا حاجتك بصراحة
.بستغراب
اكيد لا مستحيل ازعل منج احجي خالة ولاتخلين شي بگلبج
... بالأول اريدك تسامحني لان سئت الظن بيك وشلت غيبتك
... شلون
... الشيطان صورلي خنت الأمانة وما صنتها
... اهاا الظاهر فيروز حاجيتلج
... لا ما حجت اني عرفت من شفت حالها بيوم عرسك فيروز بعدها زغيرة ومراهقة وبهذا عمرها يكونون مفضوحين وما يگدرون يتحكمون بتصؤفاتهم
.... شي صار وراح بلجي هساع رجعت الوعيها
... وليدي لا تستهين بمشاعرها يمكن بنظرك طفلة بس يا ابني حتى الطفل عندوا احساس يحب ويكره ويزعل وينقهر
وحب فيروز بذرة انزعت من الطفولة
... بغلاتها وغلات نجوى مابيوم نظرتلها بنظرة مو حلوة مابيوم حسستها اني مو خالها
شنو الخلاها تفكر بغير طريقة ما ادري
. مو صوجك ولا صوجها. نعيمة وأصيل غلطن من حاولن يبعدنها عنك وزرعن هالفكرة برأسها
... فيروز ماتريد تشوفني مو.
...عوفها بين ماطيب جرحها وتنسى
... براحتها سلميلي عليها وگوليلها شما صار تبقين بغلات الروح تبقين نفسها ذيج الطفلة الشلتها بيدي وهي بالكماط
... تدري شاهر يمكن الراح احجي ما منطقي وبي شوي خبال ويمكن راح تكول هاي اكيد كبرت وخرفت.
... انتي الخير والبركة وام العقل الجبير وكل كلمة اتكوليها حكمة
.... تدري لو الك نفس بيها ورايدها جان اول وحدة اني الوكفت وياك واساعدك تاخذها
لان لو ادور الدنيا ما الكي احد يخاف عليها ويحميها ويحبها مثلك
.... اترخص وهاي الغراض انطيهن الها وسلميلي عليها
فيروز. اسمعهم واني مخلية ايدي على حلكي تا ما اطلع صوت وانفضح الدموع تنزل بغزارة
من راح جيت للغرفة حضنت جدة وبجيت من كل گلبي
الله يمسح على گلبج بنيتي
تصبح نار وتغدي رماد ماكو شي يظل على حالو وعمر الحزن مايدوم
... مسحت دموعي فتحت الغراض الجايبهن الي تلفون وملابس وحتى مصرف مخليلي
گلبت بالتلفون بي شريحة وخازن رقمو ورقم ماما ورقم نجوى
رج الموبايل بيدي رسالة منو كاتب
. (اذا متريدين تشوفيني يجرالج براحتج بنيتي
المهم عندي تكونين مرتاحة من اليوم بعد ما اوصل يمج ولا اخابر
بس ابقي متذكرة شاهر يظل دوم بظهرج واي وگت تحتاجي وتطلبي تلكيني جدامج. الأب شما تكبر بنتوا غلاتها تزيد ماتنقص وغلاتج انتي بالذات توسع الدنيا بكبرها وتزيد)
... هذا متقصد يأذيني شلون انساه وهذا كلاموا شلون اطلعوا من گلبي وهو نبضوا
بقيت اعيد بالكلام وابجي
نجوى... عرفت فيروز ما قابلة تشوف بابا
بنفس اليوم قرر يرجع ماقابل يبات
الوضع مازين والطريق يخوف
الكل من سمعوا راجع ظلوا بقلق ويحجون
الحد ما وصل بسلامة
نعيمة... مخبل عاقل اكو واحد يرجع بهيج وكت
.... هساع مو واكف جدامج مابية شي بعد عليش هالحجي
نافع.. يمعود الوضع يخوف ظل بالنة عليك بعد لا تجازف وتسويها
... الله كريم
اصيل... طمني خوية فيروزة شلونها
.... بنيتح بخير لاتشغلين بالج
... من رخصتكم تعبان رايح انام
...اكف اسويلك عشا
.. تسلمين خيتي مو جوعان
تصبحون على خير
نجوى. بابا مبين مقهور انكسر خاطري علية
تهاني مو هين يم اهلها ماتدري بابا رجع عبالها يبات
فيروز كل شوية تتصل تسال وصل لو بعدوا جاوبتها وطمنتها
مدري الصوج بيمن بي لو بيها لا هو راضي يتركها بعيد عنوا ولا هي تكدر ترجع مثل قبل وتعتبروا خالها
بهالفترة تهاني حملت جدة الفرحة ماساعتها وبابا مثل اي رجال اكيد فرح
فيروز... مرض جدة خلاني التهي وانسى شاهر
خوفي عليها طغى على وجع گلبي
الروماتيزم البرجلها دمرنها وصلت مرحلة ماتكدر تكف على رجلها نهائي
خالتي وزوجها قرروا ياخذها الدكتور بأربيل بلكي علاجوا يجيب نتيجة
ما اكدر اروح وياهم لان حمه خالتي وياهم
حسنة. شنو رايج اخلي اشرف يوديج السامرى تشوفين اهلج بين ما ارجع
... هااا والله ما ادري
... ادري بيج مشتاگتلهم خليج قوية بنيتي روحي شوفي اهلج
... ما اكدر ارفض لان روحي طاگة عليهم
جدة حجت ويا اشرف كال ميخالف
تهيرت تا الصبح اطلع محد يدري بجيتي سويتها الهم مفاجأة
طلعنا من الصبح وايدي على گلبي ما ادري شلون راح يكون اللقاء.....
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!