رواية وشاء الحب الفصل الرابع 4 - بقلم بسمة البياتي

_وشاء الحب_
( بقلم بسمة البياتي)
_البارت الثاني     _

مزهر... احنا ماجيين ندور مشاكل وراح نعتبر السالفة قضاء الله وقدره وحتى فلوس مانريد
النريدو اناسبكم ونأخذ حرمة منكم

.اصيل... جفلت گضبت ايد امنة بخوف امي وخالاتي لطمن على صدورهن

صار صوت مصايح امي دفعت الباب شوية
دحجنا شاهر كاضب مزهر من دشداشتو والزلم لازمينو بي يريدون يفكونو من ايدو

شيخهم.. هاي عيبة بحگنا كاعدين بيتكم وتتهجمون على زلمتنا

... شيخنا زگح بشاهر ارجع المكانك
الأمور ماتنحل بالمصايح والضرب

رجع شاهر المكانو وهو ينافخ
كمل الشيخ كلامو

نريد شي يثبت زلمتكم مات مجتول ( مقتول)

شيخهم كال ابو توفيق مات بالعرس بسبب الأكل النطيتوا  رجال صاحب حرمة وجهال بعدو بحيلو اكيد واحد يكرهوا حطلوا شي بالأكل وسممو

... الظاهر الجماعة مامفهميك السالفة عدل
الآكل مابي شي والماعون الأكل منو ابو توفيق الله يرحمو ابو سالم هم اكل من نفس الماعون ولزلمة جدامكم اسألو

احنا ماجبرنا يجي يأكل هين
انعزم حالو حال غيروا
وتكدر تتآكد من هذا الحجي من المستشفى والطبيب الجان يعالجوا

هو مريض وممنوع من  الدسم منيتو جابتوا للعرس خلصت خبزتو من الدنيا وراح يم ربو

احنا خما نظل نسأل المعازيم عن امراضهم. وشنو الأكل اليناسبهم
اكل الآعرس معروف والكل يطبخون نفسو

... شبخهم تفشل ظل يفر براسو مبين مجانوا حاجيلوا السبب مفهمينوا اخوهم مات متسمم

الشيخ اعتذر من شيخنا ومن شاهر
مزهر تخبل ظل يتحلف ويتوعد الشاهر

تالي اخوانو اخذوا وراحوا

الحمدلله هم وانزاح من گلبي خفت يضحون بيه وينطوني فصلية

امي من سمعت بتهديد مزهر خبصت البيت بالبواجي والنحيب

... من عززززا العزاج نعيمة راح اوليدج بالرجال

لك يمه شاهر عليش ماتفاهمت ويا وسديت حلگوا اني ربحي بيمن اذا صارلك شي

شاهر....لاتكفريني بعيشششتي يمه من كل عگلج ( عقلج) تريد تنطين بنتج فصلية والله على گص رگبتي انطيها

خواتي امانة ابوية الي اموت وما اخلي وحدة بيهن تتأذى

... ولك يمه قصدي تسكتوا بالفلوس مو تنطي اصيل يول ماعدنا غيرك والله اذا صارلك شي اموت بنفس الساعة

....جيت بسدها حبيت ( بست)  راسها
لاتخافين مايصير شي هذا واحد بوخة بس لسان كلشي مايكدر يسوي

حسنة... الله يحفظك وليدي ويديمك عزوة وسند الأمك وخواتك صدك زلمة من ظهر زلمة

... الله يطول بعمرج خالة
يلا رايح. ارتاح لاتخلون امي تبجي

... دموعي تجري اليوم شفت ابوية الماشبعت منو ومن حنانو بشاهر

احلام... كافي يمه شاهر زلمة سبع ماينخاف عليه

... گلبي لاعب ومامرتاح باجر اروح البيت ابو توفيق وانطيهم جم فلس ينطوهن المزهر
حالي ومالي وعمري فدوة لتراب رجلين شاهر

اصيل... الكل سكتوا عافوها تسوي التريدو بلجي ترتاح 

امنة وخالة صفية وبنواتها رجعن للرمادي
مر اسبوع الوضع هادي والسالفة انست

من صارت اقبال ويانة بالبيت ماعدت اضوج مثل گبل صرنا صديقات

بديت اهجس ( احس)  امي تفضل اقبال عليه لان حرمة الغالي اذا حدرت للسوك تحير شتجيبلها واني لو تذكرني بشي بسيط لو لا

خواتي شكثر يحجن عليها يگولن لاتفرقين بينهن هاي بنتج مو بنت ضرتج عليش هجذان ( هيج)   تعامليها بهذا تصرفج راح تزرعين الحقد والعداوة بينهن

امي ماترد عليهن وماتتغير
كل هذا وشاهر ماعندو علم
ادري اذا بسمع مايقبل على تصرفات امي  جدامو ماتحجي عليه ولاترزلني

مشت لأيام العلاقة بين اقبال وشاهر متكهربة
دوم مشاكل بينهم

اقبال بكلشي زينة الا حاجة وحدة الغيرة تغار عليه من الطير الطاير حتى من دلال امي الو
وهو يتخبل من هالشي

يجي تعبان تستلموا وين جنت منو شفت ويامن حجيت تگرع راسو تالي يتعارك وياها ويهج من البيت

وامي من تشوفوا يطلع زعلان تهد على اقبال
اتكولها اذا بقيتي على نفس طبعج ومهججة وليدي وساگمتو بعيشتو من باجر ازوجوا عليج

اقبال تكوم تكمز وتجي تحب ( تبوس)  بيد امي وتحلف بعد ماتضوجو
  تتغير يوم يومين بالجثير اسبوع وبعدها ترجع حليمة العدتها القديمة

باليل گاعدين نشرب جاي
شاهر دحج عليه  وحجة

.... اليوم عمي عثمان طلب اصيل الأبنو شامل

.... من الخجل خدودي غدن ( صارن) دم  نصيت راسي خجلانة

نعيمة.. اي شكو بيها ماتلگي احسن من ابن عمها

قادر... شنو الآحسن شامل عطال بطال ابو واخوانو يصرفون عليه

... من يتزوج وتصير مسؤولية برگبتوا يتغير

... بلجي ماتغير شراح يصير بأصيل

... ول قادر شو اخذك الواهس وجاعد تجادلني

شاهر... لان حجة الحگ صار يجادلج و تريدنو يسكت

.. هاا يول مبين عاجبك كلامو اذا ماتريد تنطيها عليش فتحت الموضوع

.... بيها وبلاها راح تعرفون باجر النسوان يجون يخطبوها فتحت الموضوع جدامها حتى انصحها
خاف انتي والنسوان تأثرون عليها وتقشمروها

.. خلف الله عليك وليدي طلعت اني اقشمرها

... وال يرحم اهلج يمه بلا هالحجي ادري بسوالف النسوان يظلن زن زن ويلعبن بعقلها

خيتي هاي جدام الكل شامل مايفيدج ولاتصدكين من يتزوج يشيل المسؤولية عمي واخوانو تعبوا ويا شكثر شغلوا يومين ويبطل انتي فقيرة ما اريد انطيج الواحد مايعرف فيمتج ويتعبج

... هذا هو خوية انت اعرف بمصلحتي التشوفوا مناسب الي سوي

...الله يرضى عليج خيتي ويرزقج بالقسمة الزينة

... امي مثل كل مرة ماعجبها الحجي عوجت حلگها  من اجن النسوان رادن يسمعن جوابي گولتلهم بعدني زغيرة ما افكر بالزواج

عمي زعل كال الشاهر شنو انت تمشي بكيفها  ابن عمها اولة بيها من الغريب غصب عنها توافق

شاهر.  العفو منك عمي اذا انت عادي تغصب بنواتك على الزواج اني ما اغصبها هاي عشرة مو يوم ولايومين اصيل بالذات ابوية موصيني عليها ما اكدر اظلمها

... هاا يابن اخوي يعني اذا جت البيت عمك تنظلم

... ماحجيت هجذان بيت عمي على عيني وراسي بس اذا غصبتها اكيد تنظلم

... عمي عايف شاهر وطالع زعلان

امي اتكول جت جتلتني بالمكناسة اتكول من وراج بامگصوفة العمر أخوج راح يتخارب ويا الكل

شبعتني ضرب بالمكناسة
اقبال جت وكفت جدامي وبعدت امي عني
طبيت للغرفة ابجي

غمضت عيني  تذكرت ابوي ودلالو الي جان يدري بمعاملة امي النه الهسبب مدللنة ماينام اذا وحدة بينا زعلانة  من يجي من الشغل اذا يشوفني ماتلگيتوا من الباب يعرف بية مجتولة وزعلانة

يطب للغرفة
بغنيلي
هيلا برمانة من هي الزعلانة
من هو يراضيها ابوها يراضيها
صايغ تراجيها محبس وگردانة

بجيت من كل گلبي وينك يابة عفتني من وگت ريت المرض الأخذك اخذني وياك

تدثرت جوة اللحاف ونمت
فتحت عيني شاهر جاعد بسدي وايدو على شعري

... ها يولي  عليش نايمة هالحزة
ادري امي جاتلتج اقبال حجتلي

... رجعت بجي واشهك گضبني من ايدي كومني واخذني الحضنو

... لاتبجي يبعد اخوج اذا امي بعد مدت ايدها عليج اخذج واترك البيت حجيت وياها حلفت بعد مالها شغل بيج

..... امي عليش ماتحبني اني مو بنتها شوف خالاتي شكثر يحبن بنواتهن

.. ول يابة شلون ماتحبج  امي هذا طبعها ماتببن مشاعرها 
كومي يلا نتعشى سوة
واخذي هالعلاگة بيها حلويات ألج

... ابتسمت الله لايحرمني منك

... ولايحرمني منكم يولو شعندي غيركم انتن اعز من الروح

... صدك الأخو الحنين سند الخواتو
شاهر الله زرع كل الحنية بگلبو حتى خواتي المزوجات ماينساهن ويومية يروح يسال عليهن ويشوفهن شمحتاجات
امنة يتعنالها للرمادي بسأل عن احوالها

الله لايحرمنا من وجودو بينا
انسدت سالفة أبن عمي

اليوم العصرية امي راحت البيت احلام اني واقبال
وحدنا كاعدات انكرز حب مانشوف غير لمياء واكفة جدامنا
كمت بفرح حضنتها صارلي جثير ماشايفتها

لمياء.. هههههه يبعد عمري شكثر مشتاگتلج

... مو بكثري والله

... سلمت على اقبال وكعدت بنصهن
شلونج ويا شاهر يولي

... بين وبين ساعة دهن ودبس وساعة ملاطخ

.... من غيرتج الكشرة عبالك الزلمة زير نسوان ويومية جاط ( طافر)  على وحدة

... موبيدي اغار عليه الغيرة راح تموتني

.. حگج يابة شكل وهيبة ورزانة

..هااا يولي جاعد تتغزلين بي جدامي لاتخليني اتخارب وياج

... فان حظج يالمحمحمة (مصخمة)  عندي زلمة ما ابدلو بكنوز الدنيا

اصيل... مو وگت هالسوالف احجيلنة شخبارج
صارلج شكثر، ماجاية

. .. نافع عندو شغل مايكدر يجيبني اذا اجي يتبهذل حرمة اخو كلاص ماي ماتناوشو ( تنطي)  بيوم الابات اهنا الجوع يجتلوا

اقبال... فان حظها مبينة مسمومة

...شحجي وشسولف مشوفتني الويل اني وياها امالاخ 

... مبروك الحمل خالتي قبل جم يوم گالت لمياء حبلة

... الله يباركلكم اي دخلت بالشهر الرابع
يوم الاقبال ان شاء الله
ا 

اقبال.... الله يسمع منج

اصيل. مبين الحمل معقلج وصايرة فقيرة

... شنو گبل ( قبل)  جنت مخبلة وما ادري بنفسي

... والله سوالفج تشهد بهالشي

... عجل خلي ابشرج بالحرام الحمل خبلني بالزايد

... ههههههه شمفينة (شمسوية) يولي اكيد بلاوي

.... خلي اسولفلكم
گبل جم يوم گولت النافع اشتاگيت الاهلي وللبنوات اخذني اشوفهم ماقبل كال ماعندي مجال ظليت ازن يم راسو ماكو فايدة
كتلوا بسيطة اني اروح وحدي  زعلت ونمت هو ضاج عاف الغرفة وراح كعد يم اخو

من سمعت خطواتو يم الباب ركضت ختلت ورة البرد قريب من الزاوية
البردة قديفة وثخينة مابين مني شي
طب للغرفة دحجت من زرف البردة جة تمدد
ورة شوية كام طلع دقيقة ورجع للغرفة مخبوص يدور بالكنتور وجوة الجرباية
خليت ايدي على حلگي حتى لا اضحك وافضح نفسي

يولي المصيبة طبو اخو ومرتو يدورون ويا
نافع يگوللهم رادت تروح الأهلها وماقبلت
يمكن راحت وحدها لان كالت اروح وحدي

... عزززا العزاج وشصار بعدين

    يعني شصار أكلت تبن بثنين ايدي  لا أكدر اطلع من وره البردة ولا اكدر اظل

طلعوا يدورون بالشارع من فرغت الغرفة ركضت  انجضعت ( تمددت)  بفراشي وغطيت راسي سويت روحي نايمة

سمعت حرمة اخو تكول بسم الله هاي منو النايمة لج لمياء هاي انتي
احمد امشي صيح ابوك وعمك

جتي كشفت راسي 
سويت روحي هسع كاعدة من النوم

... وين جنتي واحنا ندورلج

... طبو نافع واخو يسألون نفس السؤال كتلهم جنت بالحمام من طلعت جيت نمت

هما بحلفون دورنا الحمام ماكو واني اكلهم لا غلطانين ملو وعافوني

نافع المسكبن دمو ناشف كال ادري بسوالفج بس لو اعرف شوكت تعقلين مو راح تصيرين ام

.... هههههه يولي خطية الرجال راح يصير بي سكر من مصايبج

... هما مايتحملون الشقى شسويلهم

عجل سمعي هاي حرمة اخو من يوم التزوجت وعشت وياهم تعيب على حجيي

اتكول اووووي هاي شلون تحجين كولشي ما افهم منج
وكلما يجي خطار تعيد نفس الكلام جدامهم
نافع فقير ومايحب المشاكل حجة ويا اخو كالو گول الام احمد ماعليها بمرتي اني احبها وحجيها عاحبني

الحية مابطلت سوالفها نافع كال تحملي شنسويلها

... وعليش تعيب شبي حجيج قابل حاجية هندي

   شعرفني وحدة مسمومة شايفة نفسها

گبل جم يوم محد بالبيت لا رجلها ولا نافع
دنيا ظهر الجهال نايمين راحت  تسبح

مشيت على كيف رحت وره البيت من يم شباك الحمام اكو طشت شلتوا وبكل قوتي طريتو (ضربتة)  بالگاع  يولي عبالك صوت مدفع مو طشت

وما اسمعلج غير صرختها والطبة مالتها مبين وكعت رجعت الطشت المكانوا ومشيت بسرعة الغرفتي سويت نفسي نايمة
فاتت الغرفتي راسها كلو وغف الشامبو ومتلفلفة بالخاولي وتعرج

كالت لمياء سمعتي الصوت
كوتلها لا

كالت ولج بلي صوت طبة قوية وره البيت
سويت روحي مصدومة
مشيت الورة البيت كوتلها شوفي ماكو شي

ومن ساعتها هي خايفة عبالها البيت مسكون
للمغرب اخذت جهالها وراحت البيت اهلها

.... من اكول خبلة ماتصدكيني

.  يولي مو هين المشكلة  المصيبة اني صرت اخاف اظل وحدي واجفل من اقل صوت وامشي واتلفت صدكت اكو جن بالبيت

... هههههههههه فان حظج جذبتي الجذبة وصدكتيها

... اي بالحرام ههههه

... للمغرب راحت لمياء

... بعدها بجم شهر حبلت اقبال وامي طارت من الفرح نذرت اذا اجة ولد تذبح طليان اثنين

شاهر كاللها ماكو فرق شيجي من الله يامحلى المهم تمام الخلقة والعافية

امي ماقتنعت بهالكلام ليل ونهار تدعي تريدو ولد

لمياء فاتت الشهرها جت بقت بيت خالتي
يومية تجي يمي العصريات 

لمياء.  اليوم اهجس عندي وجع تعالي باتي يمي

..  خلي اكول الامي بلجي تقبل

.. معليج بخالة اني احجي وياها
... رحت ويا لمياء البيت خالتي باليل كاعدات نتعلل
لمياء عدها وجع بس قليل

... شوكت اجيب وارتاح اهجس صايرة مثل النفاخة

... هههههه اي والله مدعبلة
... انجعمي لاتضحكين حلوة بكل حالاتي

... هسع اني كايلة مو حلوة كولت مدعبلة هههههه

.  قزرقوط شغلي الراديو اليوم مبين السهرة صباحية

... شغلت الراديو كعدنا نسمع اغاني ونسولف ونضحك
طلعت اغنية فيروز سهر الليالي

لمياء .. اشكد احب هالأغنية علي الصوت يولي

  عليتوا ظلينا نغني ويا الأغنية
  .
لمياء
كان ان عندنا طاحون ع نبع المي
وقدامه ساحات مزروعة فيّ
وجدي كان يطحن للحي
قمح وسهريات

اصيل
ويبقوا الناس بهالساحات
شي معهن كياس شي عربيات
رايحين جايين ع طول الطريق
تهدر غنيات

... كملنا الأغنية سوه ونضحك بصوت عالي

غني اه غني اه غني على الطرقات
ياي ياي ياي يا سهر الليالي
ياي ياي ياي يا حلو على بالي
غني اه غني اه غني على الطرقات

ساعة وحدة ونص لزم لمياء وجع قوي ظلت تروح وتجي
وخالتي واختها وجناينهم جابلوها ( گابلوها)  وكعدوا

حسنة. علياء امشي كعدي محمد يروح بجيب الجدة لمياء عدها ولادة مو مال نبقيها للصبح

... لمياء تصرخ وتتلوه من الوجع بجيت على حالها

جت الجدة كالت عدها ولادة فاتت تجيبها خالة ماتحملت تبقى وياها وتشوفها تصرخ

اختها وحرمة اخوها طبن ويساعدن الجدة

رجل خالتي جاعد بسد خالتي ويدعي

كلما اسمع اصراخها اصم اذني والدموع تجري كرهت الزواج والتتزوج من الخوف

سمعنا صوت الجاهل فرحنا

حسنة.الف الحمدلله جابت اللهم صل على محمد وآل محمد

زوج خالتي... فوتي شوفي لمياء شلونها ماعدت اسمع صوتها

... هسع اروح
... خالتي كامت تريد تفوت طلعن الجدة وعلياء سابحات بالدم والوجوه مصوفرة

حسنة...شنو هذا الدم
.الجدة... تعسرت ولادتها لان بجر جاعد تنزف اخذوها للمستشفى بسرعة.......

يتبع