_وشاء الحب_
( بقلم بسمة البياتي)
_البارت الأول _
__________
لماذا قلبي يخفق بقوة عند لقياك
لماذا تسكن مخيلتي ولاينطق لساني سوى أسمك
لماذا أدمنت قربك وبت اتنفس عطرك
لا أمل من النظر أليك
اتلعثم وتتوه الكلمات عند محادثتك
هل ياترى هذا هو الحب؟!
هل ياترى انا عاشقة!!
..........
أسير بطريق مليئ بالأشواك أبحث عن مخبى أحتمي به من ذالك الذئب الغادر
أبحث عن يد تنقذني تنتشلني من درب الضياع
انا هي تلك الفتاة البريئة صاحبة الطفولة المشوهة لم يكن لي ذنب سوة اني طفلة ساذجة
لاتعي
لاتفكر
لاتدرك
لاتعرف غدر البشر
كل أحلامها دمية جميلة وقالب حلوى...
... سامراء
الساعة ٣٠. ١ ليلاً
غمضت عيني تانام دغتني لمياء بعكس ايدها دحجت عليها ها يولي شنو ماناوية تنامين اليوم
... خايفة وگلبي يرجف
... من شنو خايفة مو جنتي فرحانة وكضيتي الحنة تهزين
... يولي كلام خواتي عن الزواج خوفني معبالي هجذان (هيج) لوما اخاف من اخواني ابطل واظل هين ما اتزوج
..... ههههه خبال الخبلج يمصگوعة ولو ما اعرف عليش هالكثر خايفة وشبي الزواج بس أكيد تتعودين نافع خوش زلمة ويحبج يلا نامي وراج كعدة من الصبح
... هي عيني ليش راضية تغمض
.. تعوذي من ابليس واقري أيات بلجي (بلكي) تنامين
.. ان شاء الله
... ثاني يوم كعدونة من الغبشة كل وحدة التهت تسوي شغلة عجن. وخبز وتركيب انهد حيلنا
المياء اخذنها خواتها للصالون للساعة ثلاثة الظهر رجعن
النسوان استقبلنها بالهلاهل
طالعة حلوة بس مبين عليها الخوف
جت كعدت اشرتلي اجي يمها
هااا يولي خما بعدج خايفة
...موبس خايفة ميتة خوف
اكلج عليش بعدج مامبدلة ولامرتبة وجهج
... هما ينطوني مفكة الشغل مايخلص ودي هاي وجيبي هاي
... امشي تهيري (تحضري) مظل شي راح تجي الزفة
... ماعندي شي هسع (هسه) بدقيقة ابدل تدرين بأمي ماتقبل اخلي شي الوجهي اذا اخط الكحلة اتكلي هااا تريد عريس مووو
... هههه والله خالتي عدها سوالف الحمدلله امي ارحم منها
... وين اكو مثل خالة حسنة
يلا رايحة ابدل ما اتأخر
بدلت وطلعت أجت الزفة فات نافع وأخوانو وگرابتو يهوسون ويدبجون
كعدوا شوية بعدين اخذوا لمياء وطلعوا
السيارات برا ردت اصعد انجريت من ايدي صديت امي كاضبتني
... وين تردين امشي فوتي جوة
... حتى ويا الزفة ماتريدين أروح حرام عليج
... حرمت عليج عيشتج شعندج رايحة هما يزفوها ويجون فوتي لا اكسر ضلوعج
... انجمعت الدموع بعيني دخلت جوة تلكتني خالة حسنة
... هاا يولي أصيل عليش رجعتي ما رحتي وياهم
... حجيت والعبرة خانكتني امي مارضت اتكول هما مايتأخرون شوية ويرجعون
... يولي نعيمة عليش ماخليتها تروح وياهم
من الصبح انكسر ظهرها بالشغل ووكت الزفة منعتيها
...خليها تلملم الهوسة الصارت من يجن البنوات تعبانات وين بيهن حيل يشتغلن
... عفتهن وطبيت أبدل لبست ملابس البيت وتشكلت اعزل واكنس
انقهرت على خالة حسنة الدموع تجري على لمياء حقها لمياء بزر الگعدة والمدلله موهين عليها فراكها
اصلا ما اعرف شاون قبلت تزوجها
لمياء اكبر مني بسنة عمرها ١٦ سنة اني وياها متربيات سوة اعز من الخوات كابلت خالة وظليت ابجي
خلص العرس رجعنا للبيت فراگ لمياء أثر بيه
جانت مونستني اروح يمها وتجي يمي
عندي ثلاث خوات أكبر مني مزوجات
اثنين منهن ماخذات ولد عمي عايشات بنفس المنطقة ويانة
والثالثة مأخذها أبن خالي بالرمادي
رشيت الحديقة ومديت الجودلية كعدت وتربعت صفنة تجيني وصفة توديني البيت يأكلني من الضوجة والكأبة
امي وخالة حسنة حدرن للسوك يجهزن العرس اخوي
شاهر أخوي الوحيد امي مفضلتوا علينا
تحير شسوي علمودو بعمر ١٨ سنة قررت تزوجوا
... ول بابة وين صافنة مو جاعد احجي وياج
... هلا خوية ههههه مانتبهت
... ول يرحم اهلج سويلي لگمة اكلها ميت جوع
... من عيني
.... عساهن سالمات
... ابتسمت ومشيت من يمو
شاهر من مات ابوية الله يرحمو شال مسؤولية البيت ولزم شغلوا
رغم دلال امي ماتغير زلمة حوك واخو خيتو وحنين علينا
گليت طماطة وبتيتة خليتهن بصينة ويا گلاص جاي اخذتهن الو
... لاتظلين واكفة شاركيني
...تربعت جدامو مديت ايدي اكل ويا
... من تطلع أمي خليها توصلج البيت احلام لاتظلين وحدج هين
... ان شاء الله
فاتن امي وخالة كمت تلكيتهن واخذت العلاليك من أيدهن
حسنة... بمه انهد حيلي رجليني غدن خيوط من التعب
شاهر... شكثر كلت الأمي انا اتسوك مو راضية الا هي تروح
نعيمة... كملنا كل النواقص مابقى شي اهتم بنفسك وليدي ما اريدك تتعب ماظل العرسك شي
... هههههه هما كل الي يعرسون لأزم يدللون
حسنة..والله خايفة تحبسك بالبيت منا اليوم العرس
قادر... العريس مرتاح واني افتر مثل المصراع ومشتعل شيب اهلي
نعيمة... اذا ماتتعب العرس خالك عجل المنو تتعب
... اي جدة هذا حبيب الگلب أكيد تسكتيني علمودو
... وشعندي غيرو هو هالوليد الطلعت بي من الدنيا
شاهر... يول مو گوتلك تعال وياي ارتاح انت مارضيت
... تربعت بسدو واهفي بيدي
لو ادري هالكثر ناس لأزم اعزم فلا اروح
ول اصيل بخير اهلج كلاص جاي
... ضحكت على منظروا طبيت للمطبخ صبيتلوا جاي رحت انطيتوا
اخذوا من ايدي وكعد يأكل
قادر ابن اختي احلام اصغر مني بسنة بس اليشوفوا يكول هو اكبر
صديق شاهر وذراعوا اليمين اليضيعهم يلگاهم سوة
قبل العرس بيومين بيتنا انترس خوالي وخالاتي وگرايب أمي كلهم اجوي من الرمادي البيت صار يروش بالنسوان والجهال عبالك كاعدين بمدرسة
وبيوم الحنة ماكو محط رجل شوكت تفض الهوسة ما ادري
أكثر شي فرحني جيت اختي أمنة ولمياء
التهيت وياهن وويا باقي البنوات
يولي لمياء خما تروحين اليوم
... لا راح اظل هين يولي بالگوة قنعت نافع يخليني ابات
.. هم زين تظلين من يوم عرسج مامفتهمة منج شي تجين البيت اهلج ساعتين وترجعين
... خما بيدي حكم القوي
امنة... شلونو الزواح وغمزتلها
.. ههههه ماعدها عقل الماتتزوج
.... طالعة عينج ههههههه
... عجل شعبالج
اصيل. يحجن بالمهامس مفهمت شي عفتهن وصعدت ويا البنوات للسطح نتفرج على الجوبي
امي حلفت تسوي عرسو ليلتين من الحنة تجيب الفرقة وبيوم العرس نفس الشي
الاجواء حلوة جثير تونسنا
لليل خلصت الحفلة. وبده الشغل والكراب الحد ماخلصنا غدينا جنايز من التعب
طبينا للغرفة تمددت بسد لمياء
.. اشتاگيت النافع تعودت على حضنو
... دحجت عليها حجي امنه صحيح طالعة عينج
... ههههه لا والله اصلا بوخة بس لسان
... عجل نامي يالبوخة ولادورين حضونة
...اكفي خلي اسولفلج شصار يوم عرسي
.... جفلت خليت أيدي على حلگها ظليت اتلفت لا احد يسمعها ويكول الامي دفعت ايدي من وجها
... فان حظج شبيج رجفتي
.. يولي شتسولفيلي استري عليه لاتسمع امي وتگصبني
... صگع الهل تفكير وين راح عقلج مو البالج يالثولة
... عجل شنو
.. بطلت ما احجي
.. لا الله عليج يلا سولفي
... موتدرين بيه بيومها شكثر جنت خايفة من طلعن خواتي وعافني وحدي بالغرفة ظليت ألوب لوبيدي اختل بالكنتور لو جوة الجرباية حتى مايلگاني
وشكو سالفة عوجة تذكرها بهالحظات
قبل لا انخطبت جنت سامعة اختي اتكول بيوم عرسها خربانة ( فاقدة الوعي) ورجلها من شايفها مكسور گلبه عليها عايفها مامسوي شي
حجيت بگلبي هسع اني مو خايفة عجل ليش ما أخرب يولي ظليت افتر مثل المصراع وكلما اسمع صوت احد قريب من الغرفة أجفل عبالي هو
مابيها مجال لأزم اتصرف
رحت وكفت جدام الحايط خليت ايدي عليه
... فتحت عيني فان خظج وشسوين يم الحايط
... اضرب رأسي بي بلجي (بلكي) ادوخ واتخربط وتخلص هاليلة
... هههههههه انعل يومج على هذا العقل ههههههه اي كملي ضربتي راسج بالحايط لو لا
... ضربتوا على كيف گلبي مانطاني أأذي روحي
يولي سمعي الصار ايدي الاثنين على الحايط ووجهي خشمي وحلكي وگصتي ملزوكات بي
جان ينفتح الباب ويطب نافع من الفشلة بقيت على نفس وكفتي ماتحركت من مكاني
وهو ظل جامد مصدوم
... هههههههههههه اخ بطني تخيلت منظرج وانتي حاضنة الحايط
.... قزلقرت لاتضحكين يولي بيومها فشلت فشلة بس الله يعلم بيها تمنيت الگاع تنشك وتبلعني
نافع كال يابة ترى اني رجلج مو الحايط الظاهر من دوخت العرس خربطتي وتيهتي
من القهر كعدت بالگاع ابجي اجة گومني وهو يضحك ويسأل شسوين يم الحايط
اريد اركعها واضيع الفشلة التفشلتها كتلوا شميت ريحة بالغرفة دورت ماكو وجيت اشم الحايط
اشو هذا ضحك بالزايد كال صادگة يابة
...يمه متت سوايتج محد مسويها قبل حگو يضحك هههههههه
... انجعمي ( انجبي) صوجي اني حجيتلج انام احسن
.. ثاني يوم الشغل والهوسة زادت
لوين يلا فضينا هوسة الغدة والمواعين
اخذت البنوات للغرفة تا نبدل ونتهير ( نتجهز) للزفة
امنة جايبتلي ثوب حلو لبستو وحطيت شوية كحلة وحمره خفيفة
نعيمة... يولي اصيل وينج تعالي شيلي السكاين من الكاع. الجهال لايكسروهن
... طلعت اركض طبيت للربعة النسوان كاعدات شلت الصينية تا اطلع وكفت امي جدامي شال البرجلها وضربتني
... يمگصوفة العمر شمفينة (شمسوية) بوجهج
... تمنيت اموت ولا هالموقف خالاتي والنسوان صاحن بيها مارضن على تصرفها
امنه اخذت الصينية من ايدي والبنوات طببني للغرفة
بجيت من كل گلبي
لمياء... كافي. يبعد عمري عليش تبجين
خالة شافتج طالعة حلوة خافت عليج من العين بروح الاعزاز لاتضوجين
.... ليش فشلتني جدامهم ترى ماعدت زغيرة
صفية... امسحي البوجهج ومن يروحون الناس اني اعلمج
احلام... كافي الخاطر الكعبة قابل شسوت وتضربيها جدام اليسوة والمايسوة
يعني احنا خلصنة من معاملتج القاسية انوب استلمتي اصيل
... هاا يولي كبرتي وصرتي توكفين جدام امج وترزليها
ابتسام.. عرس اخوها خليها تفرح حالها حال باقي البنوات عليش تكسرين فرحتها يمه اصيل فقيرة لاتظلين تعامليها بهاي القسوة
... حرامات تعبي بيجن يكولون البنات حنينات بس اني حظي فاين الله نطاني اريعة مامنهن لا نفع ولا دفع
... امي تكاونت (تعاركت) ويا احلام وابتسام
جت خالة صفية كادتها ( مشتها) من ايدها.وطلعت
احلام...لاتبقين تبجين قابل جديد عليج سوالف امي مو تعرفين بيها اذا ما تلكة أحد تتكاون ويا تتكاون ويا زياگها
امنة... تعالي اعدلج وجهج واطوخ كحلتج ومعليج بحجي امي
... لا ما اريد اغسل وجهي احسن
... انجعمي وبلا حجي زايد
... مسحت دموعي عدلت وجهي وطلعت ظليت مستحية من النسوان بس من طلعت الزفة ورحنا البيت العروس نسيت الزعل
عروسة شاهر من گرابتنا مو غريبة وبنفس المنطقة اخذناها افترينا بالسيارات ورحنا للمصور گصو (اخذوا) صور العرسان ورجعنا للبيت الفرقة برا ادك والشباب تلعب جوبي عرسو صار يخبل
صار المغرب وكت العشى صبينا والولد نگلو ( اخذوا) الأكل للزلم البرا
كملنا الصب
تعشوا المعازيم ورجعت الفرقة أدك
اقل من نص ساعة وسكت المطرب دحجنا (باوعنا) من شباك المطبخ الزلم نخبصوا يتراكضون مدري شبيهم صوتهم عالي
امي والنسوان طلعوا يشوفون شصاير
جت خالة صفية تصفك ايد بيد
وكفنا جدامها
سألنها خير شصاير وعليش هذا المراكض والهوسة
...زلمة من المعازيم تخربط وواكع لا حس ولانفس يكعدون بي مايكعد الشباب الشايفينو
يكولون يمكن مات
... كلنا لطمنا على خدنا من الخوف
احلام... وما عرفتي منو الزلمة من گرابتنا لو غريب
..جيرانكم من المنطقة
... هسع هو وينو
.. شالوا الزلم للمستشفى
... ان شاء الله مايصيرلو شي
... رجعنا نكمل شغل
الهوسة بعدها برا
شاهر نهى الحفلة وخلى الفرقة تروح
امي ضايجة لان عرس شاهر خلص من وكت جانت تريد الحفلة تظل للساعة ١٢ باليل
حسنة... عليش گاعدين ووجوهكم تتباجى
كومن العروس الغرفتها حتى انزف شاهر
... خوات اقبال اخذنها للغرفة ورها بشوية زفينا شاهر الغرفتوا
باليل رجعوا الزلم من المستشقى گالوا الزلمة حالتو خطرة دخلوا للأنعاش
هو مريض والدكتور، مانعو من اللحوم والأكل الدسم وهو الله يسلموا صارلو يومين يتغدا ويتعشى يمنا وتالي مامتحمل ومتخربط
گفينا الشغل ومن التعب نمنا جفي على وجهوهنة
الصبح جت ام آقبال وخواتها جابن الريوك وراحوا الغرفتها كعدوا وياها
وره الريوك خوالي وگرابتنا راجعوا للرمادي
بس ظلت خالة صفية وبنواتها
وامنة هم ظلت
قادر... العريس وينو شنو راح يظل بغرفتو
احلام.. بعدو بسم الله البارحة عرسو عوفو ياخذ راحتو معليك بي
... عجل واني شوكت تحنين عليه وتزوجيني
... توك طالغ من البيضة وأدور حرمة وزواج
.... لاتكملبن حافظ كلامج لو بيك خير انتبه الدراستك بس فالح بهالسوالف البگدك بعدهم يلعبون دعابل الشارع
... عجل اذا تعرف هالكلام انجعم واسكت
... سوولي ريوك اتزوهر بي لو هذا هم ممنوع
صفية... يولي احلام شبيج ويا ول قادر معليك بيها سراب الك ماتصير الغيرك
اصيل... خليت الصينية جدامو بعدو بأول لكمة من هجذان(هيج) حجت خالتي غص باللكمة ظليت اضرب على ظهرو هههههه
صفية.... من الفرحة اختنك
قادر... خالة بالحرام جنت اتشاقى ويا امي ويني وين الزواج على گولت امي بعدني هسه طالع من البيضة
... ولك خاف مو عاجبتك بنيتي ترى الف من يتمناها وخطابها جثيرين لوما احبك ما انطيها الك
احلام... خالة مايحتاج تسولفين قابل ماندري بيها وبجمالها .وندارتها
لوما ابو حاجزلو بنت عمو من باجر اخطبها الو
اصيل. خالة ضاجت طلعت من المطبخ ههههه
قادر... توبة اذا بعد دورت زواج رحمة الابوج يمه خلصتيني من هالسالفة
.... حتى بعد تبطل سوالفك التعبانة
. طب شاهر للمطبخ ضرب قادر على ظهروا
... ها يول شمفين ( شمسوي) وجاعد تترزل
... اسكت وخليها لوما ستر الله جان باجر عرسي على سراب
.... ههههههههه خوش قسمة وراها باسبوع نلگيك بمستشفى الكسور
.... هاي اذا لحكتوا عليه
اصيل. سراب عقلها مو تمام ومؤذية ساعات تشوفيها مثل الوردة وساعات تتخبل ششوف جدامها تكسروا وتضرب امها وخواتها الا يحبسونها بالغرفة يلا ترجع الوعيها جثير حاولوا يعالجوها ماكو فايدة
جت اقبال للمطبخ مستحية
امنة... هلا بعروستنا الحلوة يولي عليش مدنجة راسج ومستحية هذا صار مثل بيت اهلج واحنا مو غربة
... هااا لا مو مستحية
ابتسام... يولو عوفوها براحتها كل عروس اول ايام تظل خجلانة بين ماتتعود
... اقبال بعدها زغيرة ( صغيرة) عمرها ١٥ سنة حلوة ونازكة وفقيرة لايگة الشاهر فدوة العمرو
وره العرس بثلاث تيام ( أيام) طب زوج ابتسام كال
ابو توفيق اليوم الصبح انطاكم عمرو
حفز (كم بسرعة) شاهر من مكانو
... لا اله الا الله البارحة زرتو حالتو مستقرة
انا لله وانا اليه راجعون
...الفجر مدهورة حالتو ومسلم روحو
... عجل خلي نروح للدفنة
... بدل ولحكني رايح ابلغ عمامنة
... راحوا الزلم للدفنة وأمي وخالاتي واحلام راحن البيت ام توفيق
اني والبنوات فرشنة الجودليات بالحديقة وكعدنا اقل من ساعة
وطبوا عمامي وولدهم شكولهم مگلوبة مثل الجايين من كونة ( عركة)
فات شاهر ساندينو ولد عمي سابح بدمو وجهو. والدشداشة كلها دم
جفلنة من المنظر وحفزنة من مكانة
امي تملخ بروحها وتبجي نريد نفهم شكو محد يحجي
فاتوا للربعة
گضبنا احلام من ايدها
ابتسام.. يولي اكفي سولفينا شصاير وشبي شاهر
... اخو ابو توفيق ضربو بالتوثية على راسو الله يگصف عمرو
.. عليش ضربوا
.. يكول اخوي مات بسببكم مدري شنطيتوا وجتلتوا (قتلتوا) مجذب الجذبة ومصدگها گلب الأمة صياح وفشار ويتهادد يريد يضرب شاهر والزلم بالكوة گاضبين شاهر حتى لايهد عليه
... وتالي شصار
... هذا واحد زايعتوا الگاع يشتري المشاكل والكوان بفلوس الناس كلها تتجفى شرو زواج لهسع مامزوج محد ينطي مرة رغم عمرو الجبير
واخونو يخافون منو محد يكدر يحجي شي
كايل بس تخلص الفاتحة لمو زلمكم وشيخكم نسوي كعدة
. هااا بينت السالفة هذا يدور فصل
... دخلي يطير حتى اليسمع بالسالفة يضحك وين اكو هيج فصل فابل احنا جبرنا اخو
تايأكل
ولو صدك مخليلو شي جان المعازيم كلهم تسممو وجان بين بتقرير الطبيب هذا يناطح بگرون طين
باجر الولد يروحون للشيخ ويحجولو السالفة ويشوفون شيكول
... امي خبصت الدنيا باللطم والبجي اتكول اذا راد فصل انطوا اخاف يغدر وليدي هذا كلب ابن كلب وكلشي يطلع منو
وشاهر يكول لو يموت مايشوف دينار واحد واعلى مابخيلو خل يركبو
ثاني يوم راحوا للشيخ وهو يصير من گرابتنا حتى بيوم العرس جان موجود وشايف الزلمة من متخربط من سامع اخو يريد فصل ظال يضحك كال خلي يجون ويصير خير ان شاء الله
خلصت الفاتحة وتحددت يوم الكعدة عمامي والشيخ اجوي البيتنا
واخوان ابو توفيق وگرابتهم وشيخ عشيرتهم هم اجوي
ايدنا على گلبنا اجوي الولد اخذوا جاي وماي. سالناهم شصار كالوا بعد ماحاجين شي
وكفنا قريب من الأستقبال نسمعهم
بده شيخهم يحجي ويضرب امثال ويكول مانريد عداوات خلونا نحل السالفة وتتصافون انتوا ولد منطقة وحدة ومثل الأهل
الظاهر شيخهم هم خبل مثلهم
شيخنا وشاهر وعمامي ساكتين ويسمعونهم
مزهر اخو ابو توفيق كال احنا ماجيين ندور مشاكل وراح نعتبر السالفة قضاء الله وقدره وحتى فلوس مانريد
النريدو اناسبكم ونأخذ حرمة منكم............
يتبع
مساء العافية
ملاحظة صغيرة
ترى اعرف سامراء والأنبار وتكريت حجيهم عادي مثلنا
لكن اكو مناطق وعشائر لهجتهم تختلف
لهذا يابنات ياريت متشككون بمصداقية القصة
البارحة هواي دخلوا خاص وشفت تعليقات يكولون سامراء يحجون عادي
اني لو هسه انطيكم اسم عشيرتهم راح تتأكدون هاي لهجتهم
لو حجيهم عادي اصلا اسهلي اكتب بي
هاي لهجتهم والي ممصدك اوك براحتة
رجاءاُ ما اريد مغثة من بدايتها
تحياتي الكم احبكم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!