_وشاء الحب_
( بقلم بسمة البياتي)
_البارت الواحد الأربعون _
واكفين مصدومين وعينا على الدكتور
هو شوية جبير بالعمر وگعلنا دك رزايل على اهمالنا ولومو ستر الله ومتلحگينو بالوكت المناسب جان خسرناه الله لايگولها
راح الدكتور
وكفت جدام شاهر
بيتنا مابي جهال أصغر وحدة جنة وتفتهم مو مال تسويها
أصيل... جنة نايمة يمي بالغرفة ماطلعت منها
.... السوتها معروفة ماكو غير المجرمة ايات
شاهر... خلوكم هين نص ساعة وارجع
اصيل... خوية وين رايح لاتتهور مو ناقصين مشاكل سلموها بيد الله هو يجازيها
... شاهر ماسمع من ماما تركنا وطلع
أصيل.... صخام لايروح يسويلها شي ويبتلي بيها
شلت التلفون دكيت على قادر
تا يتاني بالبيت
قادر گال لاتخافين هساع اروح اهناك
ظلينا يم سيف وضعو احسن من گبل شوي
الدكتور گال لازم يظل بالمستشفى اليوم
نجوى...فات بابا اعصابو ترجف تلاگه قادر من الباب مدري شجحة ويا
بابا ماهتم ترك قادر وصعد فوك
نعيمة... شاهر عليش مارد علية وفات گبل
يولي گلبي معلوگ على سيف اريد احد يطمني
.... خابرت فيروز گالت الحمدلله احسن لاتخافين
بابا مدري شبلاه شو صعد گبل فوك
حدر بيدو السلاح دفع باب غرفة ايات وفات
عطت بعلو حسسسي عززززززا بابا شايل السلاح راح يجتل أيات
جدة وعمة امنة راحن يم الباب مقفول مايگدرن يفوتن
طلعت أركض ادور القادر لگيتو اباب الحوش
يخابر
قادررر الحك بابا راح يجتل ايات
قادر... خرب لشتو عرفت ناوي على مصيبة
... طبينا نركض
جدة ادك الباب مايقبل يفتح وحس ايات تصرخ
الباب قوي بالگوة قادر كسرو
طب نركض بالگوة اخذ السلاح من ايد بابا
... بنت الكلب من يا ملا انتي الشيطان مو مثلج طلعتي مو بس ساقطة ومجرمة بعد
دخلي يصيب وليدي شي وحق الحق اصلبج هين بالباب واخليج تصيرين فرجة للعالم
اريد اخوتج الگوا.... يجي واحد يفتح ثمو تا انعل شرفكم
.. بابا گضب ايات من شعرها طلعها سحل للحوش فتح باب البرا ودفعها للشارع
حافية وبدون حجاب
وهي كلمة ماتنطق بس تبجي
عمة امنة نزعت حجابها ونعالها وزتتهن عليها
طبينا جوة وايات ركضت البيت عمها لان قريب مو بعيد
قادر... ادري تخبلت خما تخبلت ذولة ساسهم *** عليش تورط حالك وياهم
هساع يصيرون اصحاب الحگ والغلط يطلع بيك
منو يگول وليدك تخربط بسببها
.... لاتخبلنييييي عجل منو يسويها غيرها حاطة فلفل حار بثمو راد يموت لو مو ستر الله
نعيمة... عززززا بعينها وبعين ابوها حسبي الله ونعم الوكيل عليها
قادر... اكيد راح تنكر واتگول مو اني
... من طبيت عليها بيدي السلاح نكرت
سحبت الآقسام من خوفها ظلت تصرخ اتكول بس ردت اخوفكم علية موقصدي اجتلو
اعترررررفت بنت الكلب بعظمة لسانها اعترفت
امنة....دخيلك ربي شنو هاي
الغلط منكم شلون جنتو مأمنين بيها ومخليها سنوات هين وهي بهاي الأخلاق والأجرام
نعيمة... يمة نغشينا بيها الي يسمع سوالفها ويدحج على فقرها يگول ماكو منها لعبتها صح
منعولة الوالدين
شاهر... راجع للمستشفى واذا اجة احد من اهلها خابروني
قادر...اكف جاي وياك
... لا انت ظل هين لاتترك النسوان الحالهم
نجوى... راح بابا وصدك ورة شوي اجوي عمامها اثنين وأبن عمها هادين علينا شلون اطلعون بنتنا مفرعة للشارع ابوها واخوانها راح يجون ويسونها طلابة
قادر... هلا بيهم واحنا جاعدين نتانيهم والبيهم زود خلي يفتح ثمو بالحرام انمدو هين
نعيمة... بدربكم بلغوا حرمة ابوها هم تجي السالفة تخصها
بنتكم الشريفة رادت تجتل وليد شاهر واعترفت بفعلتها من غير السحر السوتو
مو انتوا الماراح تسكتون احنا المانسكت ونسويها دموم
نجوى... عمام ايات باگو طن هوا
گبل شوي جانوا هما اهل الراهي
من سمعو حجي جدة ظلو يمتمتون وسحبو حالهم من السالفة گالو يجون اهلها وتفاصلو وياهم احنا ماعلينا
جدة مدري بشنو تفكر، ظلت تأكد عليهم يجيبون حرمة ابو أيات وياهم
الثاني يوم محد منهم بين
الصبح طلعوا سيوفي من المستشفى
فيروز... من رجعنا للبيت اخذت سيف ورحت الذاك البيت
ما اريد ادحج على اي احد بيهم هما السبب بكلشي الف نوبة گوتلهم مامرتاحة الأيات محد سمع مني
للعصر وجوي أخوان ايات وأبوها وحرمتو باللداية جايين هداده
ابو ايات... ماجايين ندور طلايب نريد نحل السالفة بهدوء احجيلنا شنو البدر، من بنتنا تا اطلعها مفرعة وساحب عليها السلاح
اذا الغلط منها احنا نحاسبها
.. وكف شاهر بنص الأستقبال وزكح
ماكو تفاهم بينا تحملت بنتكم جثير احسن ما كل يوم والثاني جايين هداده گضبوها وربوها
اخوها هد على بابا وصارت هوسة وره شوية سكتو
اركان... العار مو علينا العار عليك طارد حرمتكم مفرعة بالشارع ودمها بظولها
.... منو حرمتي اني ماعندي حرمة غير أم سيف بنتكم لا عاقد عليها ولا اتشرف اخذها
... شجاعد تحجي لاتخليني اهد الديرة فوك رأسك ول ناقص شنو لعب جهال وجاعد تنكر زواجك منها
... اسأل ابوك الرجال المحترم وهو يجاوبكم
ابوك توسل بية اخليها هين وأكول جدام الناس هي حرمتي
.... يابة عليششش ساكت هذا شجاعد يحجي
ابو ايات... كافي شاهر ترى زودتها
... هه شنو خايف لو خجلان مو هذا جان طلبك او بالاحرى اقتراح بنتك وحرمتك وانت مثل الطلي نفذت
نجوى... حرمة ابوها وايات هم هين واكفات ويانة
ايات تبجي وتتوسل بجدة تسوي شي وتسكت بابا
وحرمة ابوها لساتها متر واكفة تتكاون ويانة
نعيمة... راح احجي الحق وابري ذمتي
ايات اعترفت جدامنا گالت انتي السوتي السحر وشتكوليلها تنفذ
يمة السالفة كلها انزتت برأسج
منال... صخام الصخمج بنت الكلب منو المسوي السحر ومخطط
ايات... لا جذب لاتصدكين جاعد يوگعون بيني وبينج
نعيمة... يولي منو الجذابة مو جدامنا گولتي
منال سوت السحر يم حرمة اسمها ام طالب بيتها بغداد وانتي ماتعرفين هذا سحر عبالج محبة
... منال ظلت تصرخ وتلطم طبت الأستقبال
تا اطلع نفسها براءة خرطت الأول والتالي
حجت كل سوالف ايات حتى بخطتها من فاتت للحمام
اخوان ايات كلمة مايكدرون ينطقون اخذو ايات سحل وطلعوا
والحمدلله انزاح كابوس ايات
ورة يومين سمعنا اخوها طاعنها بالسجين
وبالگوة متلحكينها وهساع هي بالمستشفى
خلصت الأمتحانات واجتي العطلة
باليل خابرني نزار حجينا شوية
گال
... حبيبتي شنو رأيج نسوي العرس هالأيام مجاعد اكدر اصبر أكثر
... لا نزار احنا شحجينا شنو نسيت عمة امنة
... شلون انسى بس اسمعيني بالأول
نسوي عزيمة وزفة بدون هوسات وحفلة
وبفلوس العرس أخذج للشمال
وظلت بكيفج اذا ماترضين عادي اصبر الخاطرج
.... سكتت اصلآ اخر همي الحفلة والهوسة
والزواج وراي وراي لشوكت قابل اظل أأجل بي هذا هو براحتك ماعندي اعتراض
... ول يابة هساع شسوي لو جدامي ابوسج من ثمج
... ههههه نصي حسك يمعود أهلك راح يگعدون
... من فرحتي من الصبح ان شاء الله احاجي اهلي تا يجون يحاجون خالي
.... ماشي ان شاء الله
سديتو منو ظليت اتگلب بالفراش
تالي مدري شلون نمت
ثاني يوم جوي بيت عمتي حجو ويا بابا وهو ماعترض
امنة.. أبتسام بروح الغوالي لاتحرمين وليدج من شي فرحي وافرحي بي ولاتفكرين بية
اذا سويتو العرس بعد سنة لو سنتين شراح يفرق عندي
قابل راح انسى الراحولي الحزن بالگلب خيتي
والراح مايرجع لا بالحداد والا بالأسود واللطم
... الله يبرد گلبج
والله هو مايرضى مايريد حفلة نسوي عزيمة وزفة بدون هوسة خليهم يروحون للشمال يتونسون على گولت اهلنا العرس والهوسة مايكبرن بخت البنية المهم ينسعدون بحياتهم ويتفاهمون
... الله يسعدهم ويترس حضنهم بالذرية الصالحة
فيروز... الأيام تمشي ماظل شي لعرس نجوى
بس وكت الي يطلع شاهر من البيت اروح يمهم اهناك اساعدهم
حاول اكثر من نوبة يحاجيني تا نتراضى قفلت ما اريدو روحي جازة منو وگلبي جافل
اليوم عرس نجوى
حبيبتي وصديقتي واختي لبست البدلة البيضة تشع عليها نجوى كلشي بيها حلو شكلها طبعها لسانها هنيالة نزار، عليها
اما قادر، اوووف يا قادر مجبور يحضر، وكل حسرة تطلع من گلبو شكبرها الله يبرد گلبو وينساها
صح عرسها بسيط بس فرحتنا جبيرة
راح يعز علية فراگها بس بالأول وبالأخير ما اتمنى شي غير سعادتها
نجوى.. كلشي صار بسرعة ما اعرف شلون الوكت خلص وصارت الزفة
گلبي يدك من الخوف
مختنكة مدري شبلاني
بابا حبيبي من الصبح ودعني ونطاني هديتي وطلع بعد ما أجة
صحيت من صفنتي من فات نزار للغرفة نفزعت ودموعي ظلن يجرن خايفة وموبيدي
الصار بية گبل لهساع مأذيني ومحفور بعقلي
نزار... اهدي حبيبتي عليش هالكثر خايفة ارتاحي واطمئني مايصير شي انتي، مو رايدتو
يلا بدلي وفوتي غسلي تا ترتاحين ونتعشى
... الحمدلله نزار اخذ ملابس وطلع
تنفست براحة بالگوة انزعت البدلة غسلت وجيت گعدت
رجع للغرفة طبعو حلو من شاف خوفي ما حب يزيد علية تركني براحتي
تعشينا وكملنا
أهلو واهلي محد اجة يم الغرفة مثل عوايدهم يمكن نزار، محاجيهم
نزار... تعالي بسدي ولاتخافين وعد ما أگرب منج اليوم بس ظلي قريبة مني
...جيت تقربت خلى ايدو ورة ظهري وقربني علية
....حبيبتي وصارت بحضني وبين ايدي اليوم من صدك انام مرتاح
... ماجاوبتو الخجل والخوف ماكلاتني
فيروز..تعبانة ونعسانة وهوسة رغد واسماء، ومها يم رأسي يلعبن ويا سيف
اخذتو منهن وبالگوة نيمتو
اندكت باب الغرفة رغد فتحتها
شاهر وكف درت راسي وتغطيت
سمعتو يحاجيهن طلب منهن يروحن ينامن بغرفة نجوى
هنا هم ما گالن باطل طلعن يتراكضن
حس الباب انقفل بقيت على نفس نومتي
اجة تمدد بسدي ماتحركت ولانداريت
.. صدي علية أريد احاجيج
... ماكو حجي بينا روح من هين ولاتعب حالك نعسانة وتعبانة أريد انام
.... محد تعبان غيري ول يابة لايصير گلبج أسود
بالحرام ما ادري شبلاني بوكتها ماجنت اشوفج انتي انعمى گلبي
... خوش بقي معمي وتركني بحالي
... مشتاگلج بنيتي مشتاگ الحضنج مشتاگ لسوالفج مشتاگ الكلشي بيج
طلبي مني اموت ولاتطلبين اتركج
... هه اي صح جثير تحبني وخنتني عجل لو ماتحبني شجان فينت
.... ما خنتج الله رحم حالي وما وگعت بالغلط والحرام
...هساع انت شرايد
.... لا تبقين زعلانة يبعد عمر شاهر
... تنفست قوي ودحجت علية
عادي ما زعلانة وبالأساس ما أكدر ازعل ادري محد يگف وياي والكل راح يساندك
والخاطر ابني مجبورة اتحمل
... بس الخاطر سيف
... اي بس هو واكف بعيني
... وهساع شنو نتراضى لو نظل هيج
... گوتلك مازعلانة واذا تريد ارجع الغرفتي هم. أرجع بس يكون بعلمك اني مو فيروز القديمة
هساع اني وحدة اخرى راح اقوم بواجباتي اتجاهك كاملة واصونك وأصون بيتك لان هذا واجبي اما گلبي يا شاهر معد الك مكان بي ولو شما تحاول وتسوي ما راح يرجع يحبك مثل گبل
.... هالكثر حاقدة علية
...وفوك ماتتصور
....ههههه ميخالف راضي بيت الله مايبتني بيوم
اصبر الحد ما اخليج تردين مثل گبل وازود
... هه اشكثر واثق من حالك عشم ابليس
... ميخالف انشوف
هساع صدي علية وتعالي الحضني مو گولتي اقوم بواجباتك لو سحبتيها
... دحجت بطرف عيني خما اليوم ترى تعبانة
اليوم عرس بنتك مو عرسك
.... وتاااااالي ويا لسانج
... يوووو شبلاك عليش تعصبت هساع شحجيت قابل گوتلك شگاعد يسوون
... فيروزززززززز
... من زكح خفت منو وسكتت
هو. هم ظل ساكت ورة شوي اخذني الحضنو
جنت مثل الصنم ماتجاوبت ويا متعجبة من حالي معقولة من صدك كرهتو
صايبني برود مو طبيعي
شاهر وخر مني وجر راسي على صدرو گال
ميخالف نتحمل ونشوف لشوكت يظل الجبل ثابت
للفجر اتگلب كلما أريد اوخر، منو مايخليني اختنكت موبيدي منظرهم لهساعو جدامي
گعد سيف انطيتو ممة
شبعان نوم يدور لعب اخذو شاهر يلعب ويا الحد ما رجع نام
الصبح حس الباب اكيد هاي ماما تريد سيف
لبست وكمت فتحت الباب من شافت شاهر رجعت خطوة ليورة و ابتسمت
اصيل... ناوشيني سيف والحليب ورجعي نامي
الله يهدي سركم ان شاء الله واشوفج سعيدة ومرتاحة
. . بعد عمري ماما بوجودج ان شاء الله
اخذت سيف وراحت
رجعت نمت
نجوى.... نزار گعدني من الصبح تا نروح الأربيل كمت بسرعة سبحت ورتبت حالي
حدرنا جوة ماما وعماتي هين
مستحية منهن بالگوة سلمت عليهن
تريگنا وطلعنا طريق طويل فتحت التلفون دكيت على فيروز العوبة حتى ما اجتي سلمت علية
خلصت الدكة وماكو
كتبتلها وينج يولي
ورة ربع ساعة يلا جاوبت
فيروز... عود انتي عروس شعندج مغبشة
... غير طلعنا الأربيل امداج عبالي تجين ويا ماما تا اسلم عليج
.... مشبعانة نوم وجه الصبح يلا نمت
سولفيلي شصار حمامة لو غراب
... بومة مثل حظي
.... هههههه بس لا منعتي يولي صارلكم سنة مخطوبين ونزار ومشعولين اجدادو وبيوم عرسو تمنعي يا ظالمة
...خايفة لا والله موبس خايفة مرعوبة وهو خطية گال عادي ارتاحي اليوم
...الخوف شي عادي كل بنية تخاف تگضي يمعودة لاتشغلين بالج
هو حتى ابوج البارحة عرس
.... ضحكت بحس عالي نزار صد علية وابتسم عززا والله فشلت
نزار... دوم الضحكة بعد گلبي واكيد ورة هاي ضحكتج فيروز
.... ههههههه شلون عرفت
... اعرف سوالفها
.... والله هي وجدة منطيات للبيت حس خو كوناتهن مسرحيات ههههههه
...راح ادعيلها بالخير لان خلتني اشوف هاي الضحكة الحلوة
.... خجلت ورتبكت رجعت اراسل فيروز تا يخف توتري
الله عليج بشريني تراضيتي ويا بابا
.... اي عادي يبقى رجلي وأبو ابني
...مامرتاحتلج وراج فاينة
.. لا ابد قابل شعندي
يلا اروح اشوف سيف من توصلين بسلامة دكي علية
... ان شاء الله بعد عمري
بعد تعب وطريق طويل وصلنا اربيل
صديق نزار عايش اهناك
مأجرلنا شقة نظل بيها عشر تيام
رحنا للشقة زغيرة ومرتبة ونظيفة تعبانين
يادوب سبحنا ونمنا اكل جنا ماكلين بالطريق
لورة المغرب يلا گعدت لگيت نزار رايح جايب عشا وجاي
تعشينا وكملنا
ما عندي عذر اذا رادني ما اكدر امنعو
وفعلاً اذا البارحة صبر اليوم ما گدر يصبر
نزار.... بعد عمري ما اريدج تخافين مني اني هساع زلمتج حياتنا نربطت سوة صرت اكملج وتكمليني واذا الله راد تصيرين ام جهالي
دوم اذكري هالكلمة الأمان تلكينو هين واشر على حضنو
.... كلامو حلو يحجي بحنان قويت حالي من نظرتي عرف مستعدة الهاي الليلة
تعوذت من ابليس وسميت بسم الله
دعيت انسى الصابني گبل
بالبداية تحسست من لمساتو من باسني بهدوء وحب اطمئنيت
تمت ليلتي وصرت حرمتو فعليا
نزار بي جثير صفات حلوة هادئ وصبور فاهم وواعي حتى عقليتو قريبة من عقليتي ونتشابه بجثير صفات
.... خما بيج شي حبيبتي عليش ساكتة
... هااا لامابية
عجل تعالي الحضني
... نمت بحضنو واهجس هاي اول ليلة انام بيها مرتاحة بدون كوابيس وخوف
ظلينا عشر ابام باربيل مابقى مكان ما اخذني الو تونست وصرت كل يوم اكتشف صفة جديدة بنزار وارتاح لان اختاريت اكمل حياتي ويا واوافق علية
فيروز... الكل فرحو برجعتي الشاهر
گالوا زين سويتي الخاطر سيف
صح شاهر غلط وماكو بشر مايغلط المهم الغلط ماينعاد
ماجاوبتهم
غرفة نومنا القديمة مبدلها جايب جديدة
ذيج السحر جان بيها وجودها صار يخنك
رجعت ونفذت كلامي عايشة ويا بجسمي وبس انصرف برود يحاجيني اجاوبوا على گد كلامو
ادري بي ضايج وروحو طافرة من تصرفاتي بس مايگدر يحجي شي
حاول وياي بكل الطرق تا يرجعني مثل گبل ماكدر
ورة الظهر مجضوعة بالفراش وشاهر بيدو الخاولي ينشف بشعرو
شاهر... كومي تهيري تا نطلع
.... لا مابية حيل راسي يوجع ومسطورة
... هاي من شوكت فيروز تسمع بالطلعة واتكول ما اريد
... والله العدها مثلك ومثل ابنك ينهد حيلها
... صرنا نهد الحيل خير ان شاء الله
يلا كومي ولاتصيرين عجوزية مو گبل يومين گولتي تريدين ملابس السيف اهدومو زغرانة علية خلي نطلع نشتري وانتي شوفي شمحتاجة
.... من سمعت هيج صار بية كل الحيل
ماگولت باطل گومت مثل الطلقة جهزت حالي وكشخت شاهر حدر قبلي
حدرت ورة
... تركي سيف يمهم مو مال ناخذو ويانة يتبهذل
... اخذني اشتريت ملابس السيف والي مابقيت شي ما اخذتو الورة المغرب واحنا نفتر
شاهر.. ول يابة كافي ماتعبتي اول واخر نوبة اطلع وياج هاي مالج خلك وهيج عجل لو بيج حيل شجان سويتي
.... ترى انت الطلبت مني نطلع مو اني لاتجي هساع وتحجي
.... عمي سكتت امري لله
... يلا كافي خلي نرجع اني هم تعبت
صعدنا بالسيارة
.... امشي نتعشى
.. لا ما اريد جثير تاخرنا بالي يم سيف
.. عجل احدر اجيب سفري
. براحتك وبدربك جيبلي موطا كاكاو وفانيلة گلبي حار
... صار تامرين
... تركني گاعدة بالسيارة راح جاب واجة
انطاني الموطا كعدت أكل
گبل لا نوصل للبيت وكف السيارة وطفاها
هااا شو وكفت خما عطلت
... ما جاوب شغل المسجل خلى على اغنية حن وانا احن مدري عليش كل نوبة يسمعها الي
شاهر غنى بحس عالي
جفنك جنح فراشة غَض .. وحجارة جفني وماغُمَض
يل تمشي بيَّه ويَّه النبض .. روحي إعله روحك تنسحِن
حن ,, بويه حِن
. ... اريذ احاجيج
... يمعود حبكت الا هين من نصل عود احجي هساع تعبانة
... تذكرين هاي الأغنية
..... ليش اكدر انساها من وراك حفظتها
... نوبتين سمعتها الج
نوبة جنت ضايج والدنيا طالعة من عيني عاشگ وما اكدر اطلع البگلبي،
والنوبة الأخرى
اسعد انسان بالدنيا بنيتي وحبيبتي صار من قسمتي
وهالنوبة ام ابني الي بسببها صرت بين ربعي ابو سيف مو شاهر مثل ما جانو يسموني گبل
هساع زعلانة مني واريد أراضيها
بنيتي لشوكت تظلين هيج
.
.. هم ردينا النفس السيرة ترى والله مامسوية شي مو گاعد اتصرف عادي
.... مقتنعة بكلامج جاوبيني بدون جذب صدك كرهتيني
... مكدرت ادحج بعينو اختنكت صديت راسي
رجع دارو علية
... جاوبي ولاتتهربين
.... عليش گاعد تفك الجروح خليني ناسية
... جرحتج اذيتج كسرت گلبج
موببدي و داعت وليدي الصار موبيدي عليش ماتصدگيني بالحرام من جنت ادحج عليج وجهج ينگلب جدامي وتصيرين بشعة اختنك وما اكدر اظل وياج
جنت احارب حالي تا ما اأذيج
... كمت ابجي بالأول والأخير أذيتني
اتمنى انسى منظرك.وياها بغرفتها مگاعد اگدر
تذكر بيوم. ولادتي جيتك متوجعة ما جنت رايدة شي غير حضنك
خايفة لا اموت مثل امي ردت تحسسني بالأمان وانت شسويت تركتني وطلعت
مو كلشي اكدر انسى بسهولة
ماكو سحر يخليك تكره بنيتك الربيتها
منو جاب ايات للبيت غيركم الف نوبة توسلت. وحجيت گوتلكم هاي حية خلي تروح محد بيكم سمع مني
گضب وجهي مسح دموعي وباسني من راسي
.... غلطان والغلط بية من ساسي الرأسي اتمنى يرجع بية الوكت لحظة ما اخليها تظل
فيروزتي ما رايد غير فرصة اخيرة تا اصلح بيها غلطي واخليج تنسين الفات
... واذا رجعت خذلتني واذيتني
....وكتها شتسوين محد يلومج
ول يابة اعشگج ورب العزة اعشگج
.... ابتسمت من بين دموعي اي تعشكني وكبستك بالغرفة وياها لوما ملحگة عليكم جان هساع هي حرمتك اخ منكم الزلم فلا تتأمنون
.... ههههههه على اساس قصرتي حتى ابوي الميت سبيتي
.... ههههههههههه خرب اصلآ مدري شلون هيج غلطت
احمد ربك ماجبت السجينة وخليتها بطنك
...روح شاهر ترخصلج
.... اسم الله عليك حبيبي
.. عديها صارلي جثير ماسامعها
.... حبيبي مو وكت هالسوالف امشي نرد هساع سيوفي خبص الدنيا
.... صار يبعد ابو سيوفي
.... رجعنا للببت رجعت فيروز العاشگة الحضن حبيبها شكثر گولت كرهتها وبعد مايرجع حبي الو مثل گبل طلعت غلطانة لان حب شاهر يجري ويا دمي
ثاني يوم گعدت ظهري وصفاحي يوجعن هم من ورة الطلعة وهم من وكاحة شاهر
حدرت گاضبة خاصرتي وشادة راسي
أصيل... بسم الله شبلاج شغادي حالج
.... تعبانة الوجع بكل مكان
امنة...يولي شگلج مال وحدة حبلة
.... فكيت عيني عززززا ما اجت هاي السالفة براسي صدك هي فايتتني
اصيل.... تريكني وامشي اخذج للمستوصف دام بعد وكت
.... ما اريد يا ريوك رايحة البس الصاية
طلعت ويا ماما ما كولت الشاهر
اذا اطلع ويا جدة وماما يگول مايحتاج تاخذين اذني
وصلنا سويت تحليل والنتيجة ايجابية ما اعرف افرح لو اضوج سيف بعدو ما عابر السنة وهاد حيلي
من رجعت وجدة عرفت طارت من الفرح
ماكدرت تصبر گضبت التلفون بلغت شاهر
من رجع فرحتو ماتقل عن فرحة جدة
نعيمة... اركحي شوي وديربالج على وليد شاهر لاتظلين تكمزين
.... اهوووو بدت الأوامر بعدين تعالي شمدريج وليد احد گايلج اني مكينة أجيب بس ولد
اريد بنية
نعبمة... مو لسان منشار وهاي فكيت زيجي يا فيروز يا بنت لمياء كون تجيج بنية وكحة وتأخذ شاهر منج وتصير هي الكل بالكل كولو امين
... عزززززا دحجت امك شلون تدعي علية
.... هههههه أستغفر الله انتي وياها تنجازون طلعوني من السالفة
.... اي كيفت تريدها من الله
نجوى... ترى خوش دعوة لاتغارين نبقى احنا بناتة الآصل
... هااا نجوى دورج مو عندج زلمة ولي الو لا انتي ولا اخوانج ما الكم فتفوتة بي
... ايباه لا عيني بناتو بتربعن بالگلب نفس الدم
مو صح بابا
شاهر. لاتورطوني وياها هي هم بنيتي الجبيرة
واول فرحتي
... خوش عليك حجي يفيدك بعد ديربالك تحاجيني
نجوى.... ههههههه جيت حضنتها
امداج والله گاعد اشاقيج لاتصيرين خبلة
.... اي قشمريني تدرين بية بسرعة اتأثر بكلامج
...ههههه اي ادري
... مشت الأشهر تعب الحمل وطفل زغير تبهذلت صارت ولادتي وجتني طيبة
الله استجاب دعوة نعيمة ههههههه
وصدوك من اول يوم طيرت عقل شاهر
اذا بجت يگول نفس بجيج من جنتي بعمرها
اذا سوت حركة گال نفس حركاتج تشبهج
نوبات اضوج اهجس حالي مفضوحة جدامو
نجوى.... اني ونزار متفاهمين وماكو احلى من حياتنا عمة وعمو يحبوني
ورة ماحبلت فيروز اني هم صار عندي حمل فرحنا بي
ولدت وصار عندي بنية فرحتي ماكملت اجت مريضة من يوم الولدتها اركض بيها بين الاطباء
ماطولت ثلاث أشهر وراحت مني تعبت انقهرت تاذيت
نزار نفس حالي هو واهلي وكفو وياي وساعدوني اتخطى الأزمة
قررنا هساع بعد مانريد والتفت الدراستي طلعت كلية ورحت تحليلات مرضية
شديت حيلي كدرت اكمل وتصيريلي شهادة افتخر بيها بعدها بمدة صار عندي مهند ترس علينا البيت
فيروز..... بعد ما ولادت طبية صارو جاهلين برگبتي زغار ويرادلهم حيل وتعب الكل وياي وماملحكين عليهم
طيبة اذا فكت حلكها وبجت تهرج البيت هرج
جنت اكول على سيف وكح والله طلع فقير يمها
ورة اربعين طيبة بحزة شكيت بحالي هم حبلة ومن تاكدت دكيت ولطمت وبجيت تعاركت
شاهر ضاج وزعل يومين مايحاجيني
اصيل.... ترى الجاعد تسوي بطر على نعمة الله ماتخافين يجون معوقين لو مرضى احمدي ربج على النعمة غيرج بحسرة الجاهل
.... ماما والله تعبانة وجهالي لهساع صغار جنت اكول الشاهر اخذ احتياطات مايقبل قشمرني يگول معليج مايصير
... وهساع صار لاتظلين تعترضين حرام يابنتي حرام
....خفت من حجي ماما رضيت وحمدت الله على النعمة
راضيت شاهر
شاهر...بس دحجي على سيف وطيبة اكو احلى من هيج عطية
فكري بية ولاتصيرين انانية اني موزغير اريد جهالي يملون البيت اريد الحك اكبرهم وافرح بيهم
... ان شاء الله تفرح بشوفة احفاد احفادهم لاتضوج مني والله لان تعبانة ضجت
.... الكل هين وياج وبساعدونج
.. ان شاء الله
ثاني يوم رحت الدكتورتي شبعتني رزايل
.... صدك كذب على شنو هلكد مستعجلة بعدج صغيرة الحياة گدامج ومصارلج فترة من ولدتي ليش اتعبين صحتج
انتي بس لا مضحوك عليج بسالفة الاطفال هما يربطون الرجال
... ترزل واني ساكتة مدري وين راح لساني
شسوي بالغلط صار، زلمتي مايقبل اخذ شي وگال لاتخافين ميصير وتالي صار
دزتني اسوي سونار، ام ااسونار، هالنوبة ماحجت شي گالت روحي الدكتورتج
من رجعت شو هاي ضحكت من كل گلبها
.... قبل شوية گلتي تعبانة واطفالج بعدهم صغار
بعد كم شهر يجوج بدال الواحد اثنين
عالية..... توأم
... اي
.... من الصدمة انبلع لساني
ما اعرف افرح لو شسوي حلو شعور يصيرلج جاهلين وبالمقابل تعب مضاعف واني منا عندي اثنين گبلهم
رجعنا للبيت ماخليت عالية تگوللهم ورة العشا جيت گعدت بسد شاهر
.... خير گعدتج هاي مو خالية بثمج سالفة
... كل خبر ان شاء الله گاعد افكر شطلب منك هدية تجيبها الي گبل الولادة ومن اولد ان شاء الله
... اذا على هدية سهلة مايردج غير لسانج
... ممممممم ماراح اطلب هديتين هي وحدة تدري بية نفسيتي تعبانة ومن اجيب من الواق ويق راح اتعب بالأكثر اريد تاخذني سياحة
.... هههههههه دخلي يكبرون الجهال شوي وتدلليين
... ايباه واني انتظر ليما يكبرون معلية ورة الولادة اذا الله راد تاخذني الجهال يظلون هين شكو عليهم
دحجهم متعلقين بماما وخالة امنة اكثر مني
.. بله سيف وطيبة يظلون هين الجاهل التجيبنو شلون
... شگولت عيد ماسمعت جاهل
لا حبيبي قصدك جاهلين
نعيمة. مصگوعة شنو جاهلين
.... اي نعومة افرحي راح يجون اثنين بدال واحد
الكل فكو عينهم اولهم شاهر جدام الكل حضني وباس راسي
... مو گايلج محد بهالدنيا يفرحني، غيرج
... من شفت الفرحة البعيونهم اني هم فرحت
هالنوبة حملي ثگيل تعبت وصار عندي فقر دم
وبيوم ولادتي وصلت للموت لان على الأربعين حبلت وجاهل فوك جاهل رحمي تعبت ونزفت
الله برحمتو طلعني سلامات
صار عندي يوسف و وسيم
شاهر، واهلي جانوا خايفين علية
ومن حزتها شاهر بطل يدور، جهال وهو يأكد علية تاخذ احتياطاتي
اربع جهال صغار اذا بجو يبجون سوة انحرمت من الراحة والنوم موكفين البيت على رجل وحدة الكل تعبانين وياهم
نوبات من كل عقلي اظل املخ بحالي وابجي
جنت منجعمة وگاعدة شجابني على الزواح وطلابتو
..شاهر...هساع صار الزواج مو حلو عجل منو الجتي وگالت احبك
... دحجت بطرف عيني مراهقة وغلطت لاتظل كل نوبة تذكرني بالسالفة
... ما اكدر انسى لان هذا احلى شي صار بحياتي لو ما جاية وحاجية ما جان هساع انتي حرمتي وام جهالي
.... خشيت بحضنو لو يرجع بية الزمن هم اكف جدامك واكولك احبك
حضني قوي
.... اوووووف يبعد العافية شكثر اعشگج
.... امووت عليك
........
اعرف قصة حبنا غريبة شلون حبيتة وهو الرباني
شلوني حبني وهو يشوفني مثل بنتة
خواتي وأخواني تذكروا احنا بشر، وما النة سلطة على قلبنا اذا نبض بالحب
ماسوينا الحرام هو يحل الي واني احل اله
بعد معاناة اتوج حبنا بالزواج
صعوبات ومطبات اتجاوزناها ونتج عن هذا الزواج اربع اطفال صار، هما كل حياتنا
الي يسألني هم تندمتي بيوم لان حبيتي وهو اكبر منج ٢٠ سنة
اتندم لو محابتة اتندم لو مصاير ابو بيتي واطفالي
اني مجاي اشجع الزواج الي بي فروقات عمرية لان كلمن وحضها ومانعرف شنو المكتوب النة لو الناخذة شنو طبعة
شاهر بعده الهذا اليوم يعاملني حالي حال اطفالي
مخليني اعيش حياتي وعمري بتفاصيلة مو لان اكبر مني لأزم افكر مثلة واصير نسخة منه
لا ابد عايشة مثل ما اني احب
صح تصير مشاكل وخلافات حالنة حال اي اسرة لكن نجاوزها والحمد لله
ماما اصيل الام الحنون الهسة هي وياي مساندتني وام ثانية الاطفالي
بابا حبيبي ماكو بحنانة ربي يحفظة
حسن كبر وان شاء الله عن قريب عريس وعروستة بنت خالة امنة
رغد انخطبت
جدة نعومة بركة البيت صح الكبر بين عليها لكن تبقى هي عمود بيتنا الله يطول عمرها
قادر.. اب الثلاث اطفال واعرف الحد هسة گلبه عند نجوى
نجوى اختي وحبيبتي صارت ام
تعبت هواي بحياتها لكن الله جازاها وعوضها بشهادة ترفع الراس بزوج محب وحنون عليها وعلى ابنة
ايات سمعت مزوجة على ضرة وصايرة خدامة حتى وظيفتها تركتها
الظلم مايدوم والظالم اله يوم
لان اكو رب عادل مايرضى بالأذية
............
لهنا وتنتهي وشاء الحب
وراح نطلع من بيت اهل فيروز ونجوى ونسد الباب
هذا البارت اختصار سبع سنوات من حياتهم بحلوها وبمرها
اعرف طولت عليكم اعذروني للضرورة احكام
اذا الله راد نلتقي بقصة ثانية وابطال وبطلات ثانين واحداث جديدة
وعدت هالمرة القصة خفيفة واعتقدت وفيت بوعدي
بالختام ادعولي براحة البال لان فعلا محتاجتها
تحياتي للجميع
دمتم في امان الله وحفظه
احبكم بسمة البياتي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!