رواية وشاء الحب الفصل الثالث والأربعون 43 - بقلم بسمة البياتي

_وشاء الحب_
( بقلم بسمة البياتي)
_البارت الأربعون   _

...اخر نوبة أكولج اطلعي من هين
... اعذريني حبيبتي ما أكدر اطلع بعد شوي شاهر يجيب الشيخ تا يعقدلنا..

أصيل.... رادت تفوت عتيتها من أيدها
أكفي وين مولية شجاعد تحجين شنو يعقدلكم
لا مومعقولة شاهر يأخذ كح.... مثلج

... ضبي لسانج الجاعد تحجين عنها بعد شوي تصير حرمة اخوج
ولو ميخالف معذورة اكيد گلبج معلوگ على بنيتج راح تجيها ضرة هههههه

امنة... مو فيروز التتقارنين بيها وتصيرين حالج من حالها يولي شجاب الجاب هم شايفة اكو مقارنة بين العاگول والورد

... ما اتعب حالي. وأرد عليكم يجي شاهر ويسكت أكبر ثم

أصيل... ردت اهد عليها امنة گضبتني الحية فاتت تركض للغرفة
شبيت وطفيت اكيد شاهر انجن رسمي
شسوي وشعمل بحالي ما ادري وبنيتي المسكينة اذا درت شراح يغدي حالها

... خلي عينج بعين الله ننتظر ونشوف
اذا صدك سواها اني وحدة من الناس أكولج لاتبقينها على ذمتو

.... گعدت وحطيت ايدي على خدي انتظر وأشوف ولو ادري السالفة ماتبشر بخير وماكو أمل دام گال يعقد معناتو صدك راح يزوجها حنى حجي أمي ما اثر بي

... گومي من الگاع لاتظلين جاعدة هيج الله كريم كلشي ينحل ان شاء الله

... أمين يارب
گمنا فتنا للربعة يم امي

نعيمة... گبل شوي اجة حس الحية بأذني
أمنة... اي هين فاتت للغرفة

..شجابها بنت القندرة كل المصايب لفتنا من طبت على هالبيت

.... أمي تهمهمت تا تگوم عليها گضبنا گعدي يمة
مو وكت كونة خلي يجي شاهر ونفهم منو عليش جاية

... ما اريدو يلجحها خلي تولي گبل لا يجي

... هو گايللها تعالي اصبري من يجي نفهم السالفة
امي ظلت تلوب ماگونالها على سالفة العقد تا ماتضوج. أكثر

نجوى...رجعت من الدوام الوجوه تتلاطم أكيد مصيبة جديدة مثل مصايب كل يوم
عمة گالت ايات هين  وابوج راح يعقد عليها
صفنت عليها يعني بابا سواها صدك ويريد يزوجها
بالحرام اذا اخذها وكسر گلب فيروز بحياتي معد احاجي

أصيل...شو الهساع محد بين منهم يومية گبل هيج وكت هما هين

امنة... اخاف عدهم شغل
.. لا ما اظن من يصير عدهم شغل جثير
نافع گبلها بيوم يگولي
وجاعد ادك علية مايجاوب
نجوى دكي على ابوج شوفيهم وين ظلو

.  اي هساع اتصل
دكيت التلفون مغلق

... هاا ما جاوب
... لا تلفونو مغلق

اصيل...گلبي لعب دكينا على قادر وهم مايجاوب
امي تلوب كل شوي اتكول دكو على شاهر عليش تأخر وهو مريض بالگوة واگف على  الحيلو

نعيمة... گلبي مامرتاح أكيد صاير شي يولو
وليدي بس لا صايبو شي

امنة... بيش طالبتو لاتفاولين علية أكيد مشغولين ما گدرو يجون يتغدون

.... عجل عليش مايردون على تلفوناتهم
السالفة بيها انة
ناوشوني عبايتي

.... يبووو وين رايدة تروحين بهالظرية قابل جهال وتايهين

... اروح الخواتج بلجي ولدهن يروحون يسألون

أصيل... ما وگع التلفون
من أيدي ادك وماكو
گبل لا تطلع أمي جاوبني نافع
صحت عليها يمة هيان نافع فتح خط لاتروحين

يمعود وينك مو نشفن گلوبنا من الخوف عليش محد بيكم يجاوب

.... لا يظل بالكم ماكو شي مشغولين شوي

.... نافع بروح أهلك احجي شصاير شو حسك مو عاجبني واكو هوسة يمك

... احنا بالمستشفى
... بدون وعي صحت بصوت ولطمت على صدري شششعدكم بالمستشفى

نعيمة... عززززا العزززاج نعيمة منو بالمستشفى يولي

نافع...شبيج گلبتي الدنيا يا عيني گولي العمتي لا تخاف

... يمة نافع يگول ماكو شي
هساع گولي شعدكم اهناك امي جرت التلفون من ايدي اني اجر وهي تجر تالي فتحت مكبر الصوت ادري بيها ماترتاح اذا ما تعرف

نافع....شلون سالفة هاي ادري ماراح تفگون ياخة مني

جنت بالمحل اجاني الصانع گال شاهر وقادر صوتهم عالي بذاك المحل طلعت دأشوف شكو لگيتهم متلاغين وشاهر صاير اعصاب

من حديثهم عرفت أخوج مخابر ايات ومحددين اليوم يعقدون ماتحملت تعاركت ويا وحلفت بيوم اليعقد عليها يطلگ فيروز
شاهر گلب الدنيا مايعرف شيريد من عصبيتة
ظل يرد من معدتة حتى دم ذب
وتالي وگع لا ايد ولارجل الولد التمو علية شالو شيل واخذوا للسيارة
وهسه احنا اهنا كومة فحوصات سوولة ومجاي يعرفون علتة شنو

نجوى... جدة رادت تگع گضبناها
دموعي تجري دخيلك ربي بابا القوي هيج يصير حالو ماما طلعت تحجي ويا بابا نافع برا

نعيمة.... گوتلكم گلبي مامرتاح حاسة وليدي تعبان  شسوي وشعمل وين انطي وجهي راح يروح من ايدي واني ما اعرف وين علاجو

امنة... گولي يا الله مو سمعتي بأذنج نافع گال
شاهر صحى ومابي شي اطمني أكيد ضغطو نزل لان معدتو فرغت

...لا مو هاي السالفة وليدي سالفتو مو يم الأطباء واذا مانلگيلو حل من صدك يضيع منه

نجوى... مگابلين جدة وگاعدات نجبي
ردنا نروح للمستشفى ماقبلو
اجني عمااتي والبنات البيت انخبص
ايدنا على گلبنا ننتظر خبر منهم

حاجيت نزار گال سولو مفراس الراسو
وفخوصات المعدتو وتحاليل  وكلشي مابين عدهم
وخالي حتى عينو بالگوة يفتحها
طبيب صديقي انطاني أسم دكتور بغداد گال اخذوا الو بلجي يگع على علتو

سديت الخط واني الدنيا طافرة من عيني
رحت يم فيروز گاعدة وماتحجي شي ادري بيها تعرف بابا بالمستشفى
بس ما انطت اي ردة فعل گلبها صاير من صخر علية

الدنيا مگلوبة والحية بالغرفة ماطلعت منها
يمكن لهساع گاعد اتاني بابا يجيب الشيخ ويعقد عليها

أحلام.... هاي الساقطة شعدها ظالة هين وشاهر حالتو بالضيم من عمايلها

أبتسام... مال اكوم اطلعها سحل من شعرها وازتها بالشارع

.... دكومي سويها الله ويدج فلا تنلامين بيها

نعيمة.. تركوها هاي الكح... دواها يمي

نجوى... كامت جدة طلعت للحوش اكو عودة مال ماسحة مكسورة جابتها واجتي رادت اطب الغرفة ايات الباب مقفولة
دكتة بهدوء
اني نعيمة افتحي الباب عندي سالفة وياج

ايات فتحت الباب وجها اصفر
جدة دفعتها وفاتت كلنا طببنا وراها

ايات... هاي شكو عليش ملمومات والله التگضب شعرة مني اشتكي عليها اني مو تايهتلكم

نعيمة...  كح.... مثلج كلشي منها نتوقع أكيد عندج عرف بالمركز

... خالة عيب انتي حرمة جبيرة لاتتهمين حظج وبختج

... بحظي وبختي انتي أكبر ساق... واليوم محد يفكج من أيدي كل تعب تعبو وليدي ومرض تمرضو راح اطلعو منج اضعاف

نجوى...  جدة وگعت دك الأيات بالعودة كسرتها تكسر صراخ ايات وصل للضالين
حتى الجيران جو دكو الباب عبالهم شوف شكو

عمة ابتسام طلعتلهم كالت ماكو شي گرابتنا هين وجاعد تطلگ
صدكو وراحو

جدة تعبت گعدن على الجرباية وآيات مگرفصة بالگاع حتى دم طلع من رأسها

نعيمة... يمة هدت حيلي هالساق.  والهساعو گلبي مابرد بيها
يلا سولفيلي گبل لا اقضي عليج يم منو سويتي سحر لوليدي

ايات.. بخوف شششنو ياسحر كافي تركوني شرايدين مني مامسوية شي لاترمون بلاكم علية
ولا عبالكم خايفة هساع اخابر ابوية يجي يهد البيت عليكم فوك ما ابنكم اجة نص الليل الغرفتي تريدون اطمطولو
وتسوني مسوية سحر  الو

.... هااا  يعني هاي جانت نيتج اذا تسحبينو الغرفتج
واذا ماقبل يعقد عليج تسويلو فضيحة

... ما سحبتو شنو جاهل واجيبو غصب هو اجة وگال احبج وأريدج وراح ازوجج

نجوى... سودة الله وجهج لوما بعيني شفتج من صعدتي تتوسلين بي وتغرينو وتالي اخذتي وحدرتي

... جذابة ماكو هيج حجي ادري بيج متفقة ويا فيروز هيج اتكولين تا اطلعوني اني الغلطانة
اكفولي اذا ماخليت اهلي وعمامي يگلبون الدنيا فوك رؤوسكم

نعيمة... يا گوات عينج يولي أيدي تعبت من جتلج ولسانج الهساع طزيل
عجل فكي اذنج واسمعيني عدل
اذا متباهية بحالج تعرفين تصيدين وتخططين
اني افرج فر بصبعي الزغيرر واخليج ماتندلين راسج من رجليج 
تريدين تخابرين ابوج العار مو يلا خابري ناوشوها تلفونها

... هاا يعني عادي عدكم الفضايح وأبنج يگع من عين الكل

.... لا والخلقج محد راح ينفضح غيرج
مايحتاج انتي تخابرين نجوى امشي جيبي تلفوني ودكيلي على اخوها الجبير

.. شتريدين اتكوليلو

.... يجمع اخوتج ويجون يأخذونج تايغسلون عارهم

... ششئئجاعد تحجين يا عار ترى ابنج الغلط مو اني والحمدلله  الهساع بنية محد يگدر يتهمني

.. ههههههه عجيب اذا بعدج بنية عجل شلون تريدين تفضحين وليدي
على العموم اني اليوم اريدهم يجون ياخذون بنتهم الي ابوها قشمر عليهم وخلاها هين بدون زواج مو بس هيج
راح اكلهم گضبناها ويا واحد تعالوا لموها
وبدال الشاهد اجيب عشرة واحنا كلنا هين نشهد

... ايات بدموع ولطم خافي الله مو عندج بنيات وعرض حرمة جبيرة شلون تجذبين

... من تصل السالفة لوليدي انزع ثوب المستحى  وعندي استعداد انزل الأنگس من مستواج الرخيص
يلا مو جاعد أكولكم دگولي عليهم

ايات. شششرايدة مني
شاهر لو يدري مايرضى بالجاعد تسوينو بية

... لاتجيبين اسم شاهر على لسانج احجي وين سويتي السحر وشلون انطيتهيا

... مامسسسيوية خما گوة

احلام... هاج يمة التلفون الظاهر الحجي مايجيب وياها نتيجة

.نجوى...جدة رادت تخابرهم ايات گامت تكمز
من خوفها حجت كلشي

ايات... موو اني السويتو حرمة ابوي تندل وحدة بغداد يسموها ام طالب  هي سوتو
واحد خليتو بالغرفة والثاني خليتو بماعون الحلاوة
هي گالت هذا محبة بيني وبينو مو سحر

.. جدة گامتلها بالعودة بالگوة عمة ابتسام وامنة جرنها منها ايات نامت بالگاع من الوجع

نعيمة.... بنت القندرو دخلي يصير شي بوليدي وكلام الله امحيج وامحي اهلج من الوجود
امشي عشاير سامراء والرمادي عليكم
وتدرين بيهم شكثر يحبون شاهر والي يرشو بالماي يرشونو بالدم

... بالگوة طلعنا جدة من الغرفة ابات بدلت وطلعت مهزومة تسحل بحالها مابيها حيل تمشي

احلام.... راح اخابر ابو قادر يحجي ويا السيد ويبلغوا الكلام السمعنا من ايات

.. اي زين تسوين

نجوى.. عمو ابو قادر مخابر السيد
گايلو العمل الي بالغرفة انفك بس باقي الي بمعدتو وماتتحس حالتو اذا ما يزتو

شبعت بجي علية ياربي احفظلي بابا وابعد عنو كل مكروه انحرمت من أمي واني زغيرة لاتحرمنا اني وسيف منو

للمغرب ومحد اجة منهم من نخابر يگولون وضعو مگاعد يتحسن فاصل عن العالم
جدة اخذت التلفون ودكت على  قادر

نعيمة...جيبو شاهر وتعالو لاتخلونو يظل بالمستشفى
اسمع الكلمة ولا تناقش كلنا ندري دوة وليدي مو عند الآطباء طلعو مناك گبل لا ينطونو شي
بالغلط انوب انطب بمصيبة نطلع بكارثة

احلام... يمة شجاعد تسوين خلي يظل اهناك احسن خاف يتخربط علينا باليل وين نحير بي

... محد يعرف مصلحتو بگدي يجيبو هين احسن ومن الصبح يجي السيد يقرأ علية

نجوى... جدة اصرت لأزم يجيبونو ويجون
سمعو كلامها ومطلعينو على مسؤوليتهم
من جابو سودة علية گايدينو من ايدو فاصل عن الدنيا الي يحاجي مايگدر يجاوب
نيمو بالربعة نزار شكلو مغذي وظل يراقب وضعو

فيروز.... گاعدة بالغرفة وكل شوي يجن مها ورغد يسولفلي الگاعد يصير اهناك
عرفت بي يريد يعقد عليها ولو ما متخربط جان هساع هي حرمتو
سمعت حسها من تصرخ الظاهر نعيمة قايمة بالواجب ومنطيتها هدية گبل العقد

اجذب اذا اكول ما خايفة علية لساني مابطل دعاء الو اريدو يگوم بسلامة الخاطر نجوى وسيف
صح كسر گلبي ودمرني بس ما اتمنى اذيتو
يبقى هو الرباني وعشت بسدو عمري الفات من يوم النولدت
اما علاقتي بي ما اظن ترجع مثل گبل الي يموت صعب يرجع يعيش

گالو طلع من المستشفى ظليت بمكاني
اجني عالية ورنا يمي

عالية... لاتبقين هين خالي محتاجج لاتتركي يولي وضعو يفطر الگلب

... بقيت او رحت ماكو شي راح يتغيير ادري بي مو طايقني ويمكن اذا لجحني يتأذى بالأكثر خليني هين احسن

رنا..مامعقولة گلبج مايرفرف علية ماتريدين تتطمئنين وتشوفينو بعينج

... لا ما اريد اتمنى يصير زين اي ادعيلو اي انقهر علية اي 
اما عن علاقتنا الزوجية للأسف انتهت لا اكف ويا ولا يگف وياي

.... يولي ما عرفتج هالكثر قاسية  معقولة هذا حجي فيروز الي تعشگ شاهر

.... الجدامج ما عادت فيروز القديمة الگلب من ينكسر ينكسر كلشي حلو ويا

... الله يهديكم ويبرد گلوبكم وترجعون مثل الأول واحسن الخاطر وليدكم

رنا. اللهم امين يارب

... تركوني وراحو رجعت الصفنتي والقهري

نجوى... كلما اطب  للربعة وادحح حال بابا اموت بگاعي اتمنى اشيل الوجع عنو
جدة گاعدة يم راسو تسبح كلما تگع منها دمعة  تمسحها بسرعة
ماتحملت طلعت أركض كعدت على باية الدرج
خليت ايدي على وجهي ابجي بحس مكتوم

حسيت احد گعد بسدي نزلت ايدي
نزار... عليش جاعدة تبجين حبيبتي خالي قوي لاتخافين علية بأذن الله  يگوم منها وتصير حجي وسوالف

..... معد اتحمل شوفتو هيج گلبي راح يطك فرضاً ماتحسن شسوي اني
بجيت قوي سخبني علية حضن راسي زدت بالبجي

... كافي عمري انتي لاتعذبيني بهالدموع
.... نزار ظل يحاجيني ويخفف عني سمعنا حس حمحمة وخرت راسي من حضنو
قادر واكف والحواجب مطابگة

قادر... ترى مو وكت غراميات والرجال هذا وضعو
عليش تاركو وجاعد هين

نزار... قابل جاعد بالمريخ خطوة بيني وبين الربعة
هساع نايم والكل ويا  عادي اذا تركتو شوي

نجوى.... قادر ماعجبو الحجي طلع برا
نزار تنفس بغضب بالكوة مسيطر على حالو خفت لايتكاونون مو وكتها ابد
مسح دموعي باسني من گصتي وفات للربعة

ظليت گاعدة بمكاني
رجع قادر گبل لايطب للربعة همس بحس ناصي
... الثگل حلو ابوج بيا حال وأنتي ادورين ختلات

.... انجنيت اريد اجاوبو تركني وطب اشتعلت بنار هذا من كل عقلو
ياختلة ليش احنا شمسوين ونزار زلمتي بينا عقدين محكمة وسيد
لا قادر أكيد تخبل وتصرفاتو ماعادت تنطاق

مدري شلون خلصت هاي الليلة بابا كل شوي يتخربط محد بينا نام
من الصبح اجة السيد واخو قرو علية ومثل كل نوبة ماتحمل تخبل جوة ايدهم
تركو يرتاح والعصر هم جوي
يومين وهما صبح وعصر يجون يقرون
وبابا من سئ للأسوء

ثالث يوم  مدري شخلو يشرب ورة دقايق ماتحمل ظل يرد من معدتو
جدة سولفت گالت اختنك راد يموت لو ما ستر الله
ذاب شعر  ومثل الخيسة من مكمل فاقد ونايم

السيد گال الحمدلله وأخيراً زتو من معدتو بس بعدوا تعبان ويحتاج رقية وتحصين
من كعد بابا جان جوعان بسرعة سوينالو اكل
اكل وهم رجع رد من معدتو

السيد من مخابرينو گايل عادي لاتخافون
رجع بابا يستعيد صحتو
عينو ادور الفيروز وادري بي ما يكدر يسأل عنها بعد العملو بيها

جابولو سيف اخذو يبوس بي
بعدو تعبان ماعندو طاقة يگعد شوي ويرجع ينام
لمدة اسبوع السيد يجي يقرأ
الى ان استعاد عافيتو والحمدلله
جيت گعدت بسدو خلى ايدو ورة ظهري وحضني

شاهر... شلونج بنيتي
... هساع صرت زينة من شفتك بخير
... خما ماخذة على خاطرج مني اعرف حتى انتي غثيتج جثير

.... ماكو بنية تزعل من ابوها والصار بيك مو ذنبك انسى ولاتظل تفكر بي

... فيروز شلونها ماتريد تشوفني مو

.... ادري بيها گلبها يمك بس تدري ببها شكثر عنودية

تحسر وگال الله كريم

فيروز...جدة ماما بابا خالاتي كلهن يريدن اروح اشوف شاهر واعذرو لان الصار غصب عنو
واني معاندة ابد مستحيل اسامح
لهساع نارهم بصدري ما اكدر انسى منظرهم جدامي

تعاركت وياهم وهددتهم اذا ظلو يلحون علية اهج من البيت خافو مني وتركوني

نعيمة... اريد اسوي عزيمة على سلامة وليدي واذبح الوجه الله قادر انت والولد اريدكم ترتبون كلشي وتجيبون المسواك

قادر... صار تدللين

.... واريد تتفق ويا المضمد وتجيبو

...شتسوين بالمضمد شنو ناوية تذبحين الطلي وترجعين اداوينو

... فان حظك على هذا العقل الشايلو

ابتسام... كلامو صح عليش يجيب مضمد

... اريد اخلي المصگوعة تطلع من ذاك البيت

قادر... غير نحجين عاد بالحرام دوختينا شنو بطلتي تذبحين الطلي نويتي تذبحينها

امنة... شو قافل على الطلي والذبح شبلاك هههه

.... من سوالف امج

نعيمة... اريد اضرب عصفورين بحجارة هم نسوي عزيمة على سلامتو وبنفس الوكت نطهر سيف
فيوزة خما گلبها ينطيها تترك وليدها اكيد غصب عنها تجي

قادر.... نوبات اشك بيج عايشة بسرائيل گبل لاتجين هين خططج صهيونية

... توخرووو من جدامي لا افين حظو

نجوى.... خرب والله محد يگدر الجدة
رحنا على فيروز

أصيل..هيري حالج باجر ان شاء الله طهور سيوفي

.... جفلت شششنو طهوريش لا عيني ماكو هيج حجي ما انطي هي مو عزيمة السلامة شاهر منين طلعتو بسالفة الطهور

... يولي لاتعاندين كلما من وكت يطهر احسن تا مايتاذى واحنا عازمين عازمين هلي نستغل مابينا حيل هوسة وخطار كل يوم والثاني

.... فرفحت اعترضت بجيت ماكو فايدة

ثاني يوم ظليت اهنا مارحت
جوي تا يخذون سيف اهجس گاعد ياخذون روحي مني ماتحملت ابقى هين رحت وياهم

النسوان كلهن اجني سلمن علية
اجة نزار اخذ سيف وفات يم الزلم متت بجي علية

نعيمة... يمة ترى جاعد يطهرون وليدج مو انتي خفي شوي سيف مابجى بكثر مابجيتي

... قابل اني عندي مثل گلبج القاسي معليج بية

...صار جم يوم هادئة عبالي عقلتي ولو ذيل الجلب شيعدلو

فيروز..  من ينعدل لسانج انعدي منج وانعدل

نجوى... خربانين ضحك عليهن والله حتى الكوناتهن اشتاگينة

بابا فات شايل سيف فيروز صارت جدامو وكف وعينو عليها هاي النظرة جنت دوم اتمنى الزلمة الأخذو ينظرلي مثلو

فيروز...صار شاهر جدامي اول نوبة ما اتآثر بي عبالك الواكف جدامي غريب
همست الماما تاخذ سيف من ايدو وتناوشنبا
شلتو  وصديت طبيت جوة

خلصت العزيمة وسيف بهذل احوالي مايسكت
اضطريت اظل بالربعة يمهم
فات شاهر راد يگعد بسدي وخرت بسرعة

شاهر... اكفي أريد احاجيج

.... ماكو حجي بينا
.... ادري غلطت بحقج وجثير مو شوي يولي بالحرام ما ادري شلون هيج سويت

... هه حجي يفيدك نصيحة لاتعب حالك وتبرر عمر الي انكسر مايتصلح
تركتو وكمت

نجوى... امتحانات اخير السنة بدت من رجعت من الامتحان لاكتني ايات بالباب لا هاي أكيد متخبلة
نترت شجابج

....ماجاية عليكم اريد احاجي شاهر
.. تركتني وفاتت
طبيت وراها بابا من شافها تخبل زكح بيها وطردها وهي تبجي ونتوسل

.... شاهر مو وعدتني تتزوجني والله احبك
لاتصدك حجيهم من الضرب خلوني اكول اشياء اني ما مسويتها

.... احمدي ربج انتي حرمة ومالي حق امد ايدي عليج ولا جان ماخليتج تطلعين عايشة من هين
روحي منين ماجيتي واستري على حالج

...حسبي الله عليكم رايحة الم ملابسي والعصر يوصل ابوي ويأخذني

نجوى... تعبانة صعدت انام

فيروز....عرفت الحية هين جيت للربعة كلهم نايمين بس جدة وحدها گاعدة وسيف يمها
گعدت العب ويا ولان بدون حفاظة غسلني غسل من فوك ليجوة جابها ترس بوجهي
لا بقى شعر لا ملابس
جدة مكيفة وتضحك

... وين رايحة
... عينج علية اروح اسبح يعني وين
.... فوتي للحمام الهين تا ماطولين

.. اووف من سوالفج رحت جبت ملابس وطبيت اسبح

نجوى. توني غفيت سمعت حس سيف يبجي اريدو يسكت ماكو يبووو. وينهن تايسكتنو

كمت نزلت لاكتني جدة طالعة من التواليت
طبينا للربعة سيف لونو ازرك ومن الصراخ حسو طمس شلنا نحيد نريد يسكت ويتنفس ماكو

.نعيمة. يبوووووووووو ولك شاهر الحك وليدك

فيروز.... من سمعت صراخ جدة شعري شامبو مالحكت اغسلو مدري شلون لبست الثوب وطلعت اركض

شاهر فات گبلي من طبيت سيف منتهي يسحب النفس مثل المكينة العطلانة

شاهر.  شبلاه شمنطينو

نعيمة... امو بالحمام واني فتت للتواليت جينا لگينا بهالحال

... شاهر شالو وطلع يركض طلعت وره
صاح جيبو السويج
اكف اجي وياك

.... وين جاية الخاطر ربج.

..والله ما اتركو ظليت اصرخ من الخوف
مدري منو خلة على جتافي عباية
ماما اجت ويانة
شاهر يسوق بكل سرعنو
سيف غدة جنازة وماعاد يگدر يتنفس
مدري شلون وصلنا للمستشفى تناوشو من ايدنا بسرعة

شاهر يروح ويجي واني گاعدة حيل مابية ابجي من كل گلبي
دخيلك ربي كلشي ولا وليدي اموت اذا صابو شي
زگحت بيهم گوتلكم لاطهرونو عاندتو سيف راح يروح مني

.اصيل....اسم الله علية ادعيلو بدل هذا الحجي

... اجة الدكتور مبين متعصب نتر بشاهر طفل بهذا العمر شلون تغفلون عنة خصوصا اذا عدكم اطفال بالبيت

.... ول يرحم واهلك  فهمني شصاير شبي وليدي محد غافل عنو والكل بالبيت عينهم علية

فيروز... الدكتور مد اصبعة گال لعد هاي شنو. ومنين أجتة؟!
نريد نركز شنو هاي الغباء صابنة
شاهر.. شنو هاي

..... متعرف شنو بذرة فلفل والظاهر فلفل حار نزلت ويا الرغوة من حلگة........

    يتبع