رواية وشاء الحب الفصل السادس 6 - بقلم بسمة البياتي

_وشاء الحب_
( بقلم بسمة البياتي)
_البارت الرابع     _

نص ساعة وطبت ابتسام تبجي نريد نفهم شبيها ماتحجي عبالنة متكاونة ويا رجلها

فاتت احلام وبنواتها نفس البجي والدموع

نعيمة.  احجوا  شصاير لا اشك ثوبي من الطول للطول

احلام..  اخوي شاهر

... امي صرخت بعلو حسها شششبي شاهر شبي وليدي

احلام... سايمة عليج الله ونبيو  أهدي حتى نگدر نفهمج  ماندري منو ضاربوا بالتوثية على رأسو والولد اخذوا للمستشفى

.... امي گلبت البيت بالصراخ وللطم الجيران كلهم اجو على حسها
نريد نزلمها ما نكدر هي بصفحة واقبال بصفة
تالي وكعت لا ايد ولا رجل تخبلنا

جت عمتي واحلام ونسوان من المنطقة لفلفوها بالعباية واخذوها للمستشفى

أمنة... ابنسام احجي شبي شاهر شو ماصدكت سالفة بس ضاربينو على رأسو

أبتسام... عمت عيني عليه يولي طاعنينو بالسجينة بظهروا

... لطمنا على وجوهنا ياربي دخيلك كلشي ولا شاهر ماعدنا غيروا هو ابونا. واخونة الحنين نضيع بدونوا

صدينا لكينا اقبال واكعة بالگوة صحيناها
البيت انترس ناس كل گرابتنا اجو

كعدنا جدام ابتسام تاتسولفلنة شصار ومنو الضاربوا

... مانعرف الولد كاعدين يتعللون بيت عمي خضير
زلمة داك الباب رايد شاهر
ابن عمي يگول رجال غريب مو من المنطقة وماشفت وجهو زين لان ظلمة
طالعلو شاهر

قادر طالع  يشوفوا ليش تأخر لاگي واكع جدام الباب وغرگان بدمو

... هاي الليلة عيونة ماغمضت ولاسكتت عن البجي كل وحدة بينا لأزمة القرآن نقرأ وندعيلو

محد جة منهم مانعرف وضعوا ميت لو عايش

الفجر جابوا امي من المستشفى ضغطها صاعد بالگوة منزلينو الهساع محد كايللها شاهر مطعون
گايليها مضروب براسو ومخيطينو  لآزم يبقى بالمستشفى يراقبون وضعوا

نعيمة...گلبي يگول وليدي بي شي ليش ماتحجون فهموني مو گلبي غدة نار
اذا جرحوا بسيط عليش باقي بالمستشفى

احلام... عليش جاعد تفاولين عليه گلنالج مابي شي لأزم يظل حتى يشوفون جرح راسو

... امي تون وتبجي ماي ماتقبل تخلي بحلكها والنسوان مجابلتها يصبرن بيها

نريد واحد من الولد يجي يطمنا ماكو

للظهر ظلينا على نفس حرگة الاعصاب حتى بجي مانكدر نبجي جدام أمي

وأخيراً جة عمر زوج امنة وعمامي تلگيانهم من الباب

عمر... لاتخافون الله  لطف بحالوا الطعنة بالجهة اليمنى بعيدة عن گلبوا وعن العمود الفقري
الاطباء گدروا يوكفون النزيف وهساع وضعوا احسن من لبارحة
بس لهساع نايم من يصحى يزول الخطر ادعولوا

... كلامو هم يطمن وهم يخوف
للمغرب گالوا شاهر صحى فرحتنا بهالخبر تساوي كنوز الدنيا

امنة... يولي سمعتي الخبر
.. خير ان شاء الله شنو هو

... شاهر من جاعد وجايين الشرطة سألينوا منو سوة بيك هجذان

گايل زلمة دك باب بيت عمي رادني طلعت اشوفوا
لكيتوا  واكف مسافة عن الباب رحت يمو اول ماشافني شال توثية وضربني براسي اخنل توازني قبل لا أكع زلمة ثاني طعني بظهري من وكعت عبالهم فاقد سمعت صوت مزهر يحجي ويا الزلمة الثاني  كايل هذا جزاء اليفضل عليه رجال ارمل وعندوا بنية
هساع الشرطة جت واخذتوا

..ظليت اتراجف من الخوف يعني الصار بشاهر من وراي

... انجعمي انتي شعليج خما تحبي ووعدتوا بشي هو واحد سكط وهساع راح يخيس بالحبوس

...استقرت حالت شاهر وطلع من المستشفى اخوان مزهر جو يعتذرون ويگولون احنا مانعرف بسوايتوا وخلي بالحبس بلجي يتأدب

الخطار رايحين جايين عمامي وامي كومة ذبحوا على سلامتوا

امي من عرفت بالسالفة تطب وتطلع تتفل عليه اتكول جان انهجم بيتي وراح عامودو من وراج بس يروحون الخطار اني اعلمج

خواتي تكاونن وياها وماكو فايدة
فيروز تبجي على شاهر تريدوا  ما اخليها تروحلوا خاف تلجم جرحوا

وره للمغرب من خف البيت من الهوسة والخطار رادها من شافتوا خشت بحضنوا وتبجي

جينا اني وخواتي سلمنا عليه
سودة عليه يحجي بصوت تعبان 

نعيمة... وخر هالمصگوعة من حضنو لاتلجموا

شاهر...عوفوها
وال يابة عليش تبجين يابعد عمر شاهر

نعيمة.. اسم الله على عمرك

.... وتالي يمه ترى تعبان مابية حيل اتجادل وياج
خليني اسولف ويا بنيتي

... نافع جاعد ويا زلم خواتي عينو على فيروز وشاهر يدحج عليهم ويتحسر لان فيروز الهالحزة ماتعرفوا وتستغرب منو

فك عينو من گالت الشاهر ابا هي دوم تكولوا هالكلمة عبالها هو ابوها وشاهر طاير بيها من الفرح

شاهر.. ها يروح ابوج اشتاگيتلي عجل يلا حبيني منا ويأشر على خدوا

فيروز لزكت ثمها ( حلگها)  بخدو وتكركر
شاهر انتبه النظرات نافع
گاللها فيروزتي الحلوة روحي حبي (بوسي) بابا واشر على نافع

تسمع كلاموا جت حبت نافع من فرحتوا اخذها الحضنوا

استغربت امي سكتت وبعد ما حجت عليه
اقبال گالت شاهر سامع بيها حاجية عليج
گلب الدنيا يگول اذا غثيتها اعوف البيت واطلع
اصيل خطار هين كلها جم يوم وتتزوج وتفارجنا لاتظلين تغثيها

امي ساكتة وماحاجية شي تخاف على صحتوا

شوية تحسنت صحت شاهر والوجع خف أهون من گبل

طلعت سنوية الغالية
نافع جة الشاهر طلب منو ياجل الزفة جم يم بين مايلگي بيت نعيش بي الظاهر علاقتوا موزبنة ويا اخو وبينهم مشاكل

شاهر. . شنو رأيك الگيلك مشتمل زغير هين بنفس المنطقة قريب منه
يشهد الله شايل هم شكبروا شلون راح اكدر افارج فيروز

.نافع... ياريت لان شغلي من الصبح للمغرب على الأقل انصير قريبين منكم ومن اطلع مايظل بالي عليهم

.... عجل اترك الموضوع عليه اني اشوفلك البيت

اصيل... فرحت بهالخبر
شاهر لكة بيت زغير غرفة وصالة من ضمنها المطبخ وبالطارمة الحمامات
خواتي الله ينطيهن العافية انطوني غراض المطبخ وشاهر بعد عمري جابلي ثلاجة ومبردة

نافع ماقبل كال اني على كيفي اجهز البيت وبالگوة شاهر قنعوا ياخذهن

قبل زفتي ببوم جت امي گالت

نعيمة.. اريدج تتنازلين الأخوج عن حصتج بالمحلات

....صفنت بوجها اول مرة أعرف عندي حصة بالمحلات

... هيييو مو جاعد احجي وياج
شاهر واخواتج ماقصروا وياج وجهزولج البيت وانتي صار عندج زلمة بصرف عليج من يجي شاهر كوليلو اريد اتنازل عن حصتي

... ما اعرف شي ولا افهم بهالموضوع گوتلها ماشي

من جة شاهر كوتلوا اريد اتنازل

شاهر.. ادري ببج فقيرة وماتعرفين بهالسوالف هذا كلام امي مووو

.نعيمة.  ياطلابة امك شيصير وگلت امي

... احجي اصيل امي گالتلج تنازلي

... احتاريت شجاوب عيني عليه وعلى امي سكتت

.... فهمت السالفة مابحتاج تردين
سمعي يمه اصيل حالها حال خواتي مثل ما انطيتهم حگهم هي هم تأخذ حگها باي وگت التطلبوا

نعيمة.. اني شعلية أنت عاجبك اتزت تعبك منا ومنا

.... اي الحمدلله من حجيتي هالحجاية تعبي واصرفوا بالشي اليعجبني 

اليوم زفتي من گعدت من النوم روحي لايبة والدموع تجري

خالة حسنة البارحة جت ودعتنا اخذت فيروز الحضنها وتبجي

حسنة... امانة الله ورسولة ديربالج عليها واذا صار عندج جهال لاتفرقين بينها وبينهم ولو ادري بيج احن مني عليها
وامانة لاتحرموني منها وجيبوها أشوفها
واني هم اجيها ما اكطع بيها

... لاتوصين حريص فيروز اغلى من روحي والله لو ما هي فلا اتجوز ابوها

.  ادري بنيتي مايحتاج تكولين

.... خالة ودعتنا وراحت للرمادي بنفس اليوم

امنة.. يولي ماطول بعد وگت خلي اروح اجيبلج بدلة لاتطلعين هجذان بعدج بنية من حگج تلبسيها وتفرحين

... خيتي الفرح مو بالبدلة اذا الگلب مقهور ما راح يتقشمر بدلة وعرس

... اذا هالكثر مقهورة عليش وافقتني يولي

... لأجل عيون فيروز يهون كلشي
خلي اتهير ماظل وگت

... لبست ثوب مناسبات عادي وبالگوة خليتهن يحطنلي شوية مكياج جدام الناس لأزم ابين اني عروس

عمت عين التأخذ مكانج لمياء وتفرح بزفة وعرس

اجة نافع واخوانو بدون زفة وهوسة اخذوني
فيروز بقت يم اقبال وامنة

احلام وابتسام وعمتي جوي وياي
دخلت للبيت اهجس روحي انقبضت

نافع حالوا مو احسن من حالي
اااخ من العادات والتقاليد الگشرة

زفونا للغرفة وظلن خواتي وعمتي ينتظرون برا

جاعدة على الجرباية ومدنجة راسي
جة نافع كعد مسافة عني

نافع... اصيل اعرف بيج قبلتي الخاطر فيروز وصعب تتقبليني
بعدج صغيرة وجنتي تستاهلين قسمة احسن من هاي مو رجال ارمل وعنده بنية

اجذب عليج اذا اكلج راضي بهالزواجة ونسيت لمياء حتى لو جانت عشرتي وياها قصيرة بس الجمعنا حب قوي وجانت ثمرتة فيروز

هسه بگلبج اتكولين ليش اخذتني اذا بعدك تفكر بالمرحومة

الي خلاني ازوج الظروف اريد بنتي تربى بحضني اريد استقر وياها بيت واحد
سنة واني محروم منها
للأسف ماعندي اليهتم بيها وهي هم تعلقت بيكم

والله لوما عاداتكم لأزم اهلج يشوفون النيشان ولأ اوصل يمج اعوفج براحتج الحد ماتتعودين عليه وأتعود عليج

اذا متوضية كومي نصلي وندعي الله يخلي بينا مودة وألفة 

... ماعندي جواب ألو بقيت على نفس هدوئي جنت متوضية

مديت السجادة وصليت وراه
دعيت من گلبي اتقبلوا وتعدي هالليلة على خير
لان طيف لمياء يطاردني واهجس روحي مستحية منها

كملنا صلاة
اخذني للجرباية تقرب مني مابينا اي مشاعر لا اني ادحج بوجهو ولا هو
كمل لبس دشداشتو وطلع فاتن خواتي وعمتي هلهلن وباركولي كرهت هالعادات العدنا رجال ينجبر يتقرب، من مرتو حتى البرا يتاكدون من شرفها 

راحن خواتي ظلينا وحدنا

...كومي تعشي
... مو جوعانة اريد انام

   براحتج  انجضعت وتغطيت
راح جاب غطة ثاني ونجضع غاد مني

الحمدلله بعد ما جة بسدي 

ثاني يوم اهلي جابوا الريوك
كوتلت الأبتسام عليش ماجبتوا فيروز وياكم

.... انطي صبر بعدج عروس التهي بزلمتج بعدين اخذي فيروز

...توسلت بيها تجيبها كالت باجر ان شاء الله

اني ونافع مثل الغربة حتى من يريد شي هو بسوي النفسو مايطلبو مني

ثاني يوم جابولي فيروز مشتاگتلها وهي هم مشتاگة
بشوفتها نسيت كل همومي نافع كيف بيها يلعب وياها

للعصر كامت تبجي تريد نجوى وشاهر بالگوة سكتتها ونيمتها

رجع نافع الشغلوا ظلينا اني فيروز وحدنا ادور حجة حتى تبجي شلعت گلبي

اندكت الباب صحت منو
.. اني خيتي

... فتحت الباب بسرعة
هلا خوية فوت
حبني من راسي

... شلونج بعد اخوج يولو البيت فرغ بدون طولكم وحسكم

... البيت متروس بوجودك ووجود امي

... وين الملعونة گلبي مفرفح عليها

... من البارحة تبجي وتتزعل تريدكم قبل شوية من البجي جتلتني تريد افتحلها الباب وتطلع

... هههههههه وينها

... بالكوة نيمتها
عليش مكلف نفسك البيت بي خير من الله

.  ولا كلمة هاي مو الج لبنيتي

... ابتسمت جايب كومة مسواك وفواكه وحلويات حتى الخبز جايبوا

فيروز نايمة على الدوشك الغصة بصدرها حتى وهي غافية تشهك

كعد بسدها يلعب بشعرها

... يبعد شاهر شكثر مزعلينج المايخافون الله

... حركت راسها اول مافتحت عينها بجت شاهر تخبل شالها يحب بيها ويحجي وياها
وهي طلعت كل الزعل الخازنتوا بگلبها لوين يلا سكتت بقت مجلبة بياخة شاهر ماتقبل تعوفوا

شاهر...هساع شسوي لا اكدر اخذج وياي بدون علم زلمتج ولا اكدر اكدر اخذ فيروز واعوفج الحالج

.... ماعلية شي لاتخاف اقفل الباب بين مايجي نافع

... عجل خوش  من يجي نافع اجيبها

... راح شاهر واخذها ويا المغرب قبل لا يجي نافع جابها

استمرينا على هالحال والحمد لله فيروز بدت تتقبل ابوها

مرات اروح الاهلي وقبل رجعت نافع ارجع للبيت
احضرلوا ماي حار يسبح واطبخ العشا
ووكت النومة كل واحد بينا ينام بصوب ( بطرف) من ليلة العرس بعد ماتگرب مني

اشكثر جنت ضايجة من هالزيجة (الزواجة) بس ارتاحيت بيها خلصت من معاملة امي الموزينة وهساع من اروح معززة مكرمة حالي حال الخطار

وضعي تخربط الدوخة لازمتني ولعبان النفس مايفارگني شكيت بروحي حبلة لان اعرف من خواتي اعرض الحمل
جذبت روحي خما من اول مرة تصير

جاعدة ويا اقبال ابيت اهلي

اقبال.. وضعج مو عاجبني وجهج مصوفر وذبلان

   ما اعرف شبية

... خاف حبلة

. هااا شلون

. شني شلون مو تگرب منج اول يوم

  اي بس هذيج النوبة (مرة)

... عجل خلص الظاهر حملتي من ساعتها  جثبر يحبلن من اول نوبة
باجر ناخذ البنوات للمستوصف نلقحهن وعود سوي تحليل تا نتأكد

... رديت للبيت محتارة اذا طلعت حبلة نافع شنو ردت فعلوا يفرح لو يضوج
قررت اتأكد يلا أكولو

ثاني يوم اني واقبال اخذنا البنوات للقاح
سويت تحليل طلعت حامل

رغم علاقتي بنافع بس فرحت
ردينا للبيت امي عرفت ظلت توصيني  ديربالج على روحج ولاتشيلين  ثگل واكلي زين
امي عجيبة نوبة زينة ونوبة لا

رجعت للبيت شلت هم شلون راح ابلغ نافع

أجة المغرب سبح ورتاح صبيتلوا العشا

كعدت جدامو بالكوة آكل

.... شبيج مو على بعضج اليوم صاير شي

... هاااا لا  يعني اريد اگولك شي

... اي گولي ليش مستحية

... اليوم من اخذت فيروز للمستوصف سويت تحليل
احجي وادحج على عيونو
من گولت تحليل زت اللكمة من ايدو

... كملي تحليل مال شنو

.  اني حبلة

... متأكدة
.. هزيت راسي اي
عاف الاكل كال الحمدلله وكام
خفت من ردت فعلو مبين ضاج ومايريد جهال مني

انقهرت شلت الأكل غسلت المواعين
طبيت الغرفة
لكيتوا مرجي ظهروا على الجرباية.وصافن

جريت الغطة غطيت حتى راسي دموعي جرن 
هجستوا  صار بسدي خلة ايدو على بطني تشنجت من الخوف والخجل

... لاتبجين انتي بالذات ما اريد تنزل دمعة وحدة من عيونج بسببي  لوما انتي جان اني لهسة متبهذل وحالي يصعب على الكافر
خايف علبج اصبل الحمل صار مثل الكابوس بالنسبة الي

.. فهمت وعرفت من شنو خايف
صديت عليه
انت رجال مؤمن ترى الاعمار بيد الله شبل هالوسواس من راسك

.... الله يحفظج النه ويگومج بسلامة
حضني ونام وهاي اول مرة يكون بهالقرب مني 

من عرف بحملي بدت علاقتي تقوى بي تعودت. علية وتعود عليه

اقبال هم حبلت وهالمرة الحمل خبلها

زادت بغيرتها ومشاكلها ويا شاهر
طلعتلو بسالفة جديدة اتكولوا عندك علاقة ويا بنت عمك خضير

خيرتوا بينها وبين طبتوا البيت عمي
شاهر تخبل حتى ضرب ضاربها

جامعة  ملابسها وشايلة نجوى
داكة رجل هساع تاخذني البيت اهلي 

شاهر موديها الهم گايل الابوها عقلوا بنتكم ترى تعبت من غيرتها ومشاكلها

صارلها اسبوع يم اهلها
جاعدة ويا امي جتي احلام ومرة عمي خضير احلام تصير جنتها

مرة عمي كالت امشو نرجع اقبال البنت حبلة لاتكبرون السالفة

مرة عمي ماتدري شنو ساس المشكلة

راحن هي وامي واحلام
وره ساعة رجعن امي واحلام غادبات نار،

تلكيتهم شبلاكم (شبيكم)

احلام... اقبال الثولة جفصت جدام مرة عمي
گالت ادري بشاهر عندو شي ويا وسن وهي مجلبتلوا

.... فان حظها اي وتالي

.... يولي يا تالي هي حجت بحالة عصبية نست وجود عمة من حست بروحها وجها خبط الوان ومرة عمي انجنت وحلفت اتكول العمي واخوانها شلون اقبال تتهم بنتها

... حگها والله بنوات عمي مربايات احسن تربية ماعدهم هالسوالف

   الله يستر من تاليها

... جة شاهر غادي نار

نعيمة.. اهدي يمه شبيك فايت والنار بطافر منك

.... من البلوة الي الله بلاني بيها عمي وولده جوي يعتبون عليه
ولازمين وسن المسكينة جاتلينها عبالهم صدك عدها شي وياي

حلفتلهم الف يمين البنت ماشايف طرف ثوبها حتى بحياة بنتي حلفت واخذتهم ورحت البيت عمي واجهتم باقبال سالوها شلون عرفتي شاهر عندوا شي ويا وسن
ظلت تتراجف وتبجي اتكولهم

لان يجيكم جثير شكيت بي

ابوها واخوانها لزموها غدوها جنازة اني وعمي، خضير بالگوة فكيناها من ايدهم لوما حبلة
انعل ساس اهلها ولا عليه بيها

عمي ابو اقبال والولد اعتذروا من عمي خضير وحبو على راسو

.... الحمدلله عدت السالفة على خير عمك خضير فقير. لو غيروا جان سووها گعدة وفصول

قبل لا ارجع البيتي طب قادر يركض ويصيح على شاهر
ما اعرف شكالوا
حفز شاهر من مكانوا وطلعوا يتراكضون........

يتبع