_وشاء الحب_
( بقلم بسمة البياتي)
_البارت الخامس _
قبل لا ارجع البيتي طب قادر يركض ويصيح على شاهر
ما اعرف شكالوا
حفز شاهر من مكانوا وطلعوا يتراكضون
نعيمة... يولي اصيل ناوشيني ( انطيني) عباتي اطلع افهم شصاير
.... جبتلها العباية لبستها وطلعت ادورهم
اريد امد راسي من الباب ما اكد نافع منبه عليه ما اصل باب الحوش.
رجعت امي
ها يمه شصاير وشبيهم الولد يتراكضون
... ما ادري طلعت ادور ماكو رايحين بالسيارة
... جان رحتي الاحلام يمكن السالفة تخص المشكلة الصارت ورجعوا تكاونو بيت عمي واهل اقبال
.. اي صدك خلي اروح بلجي افهم شي
... كعدت وخليت ايدي جوة خدي
تاخر الوكت هساع نافع على جية واني مامحضرتلو شي
ما اكدر ارجع للبيت وحدي
فاتن امي واحلام
تلكيتهن بشروا وينهم الولد
احلام... ما ادري وبيت عمي سنطة
و قادر من العصر طالع وما اعرف وينو
... لازم ارجع البيتي ول محمد تعال وصلني واذا عرفتوا شي گولولي لاتخلون بالي يمكم
وصلت للباب صار نافع جدامي شكلو ضايج
نافع.. اشو بعدج لهسة مراجعة للبيت
... هااا شاهر طلع يركض هو وقادر ولهساع مانعرف شصاير ووين راح
نافع....هسه اطلع اسأل ولد عمة وجماعتة بلكي يعرفون مكانهم
نعيمة... ياريت گلبي غدة نار عليهم
... من عيوني فوتوا جوة واني ادورهم
.... انقهرت على نافع جاي تعبان وطلع يدور
ربع ساعة جة نافع ويا ابن عمي وجوهم ماتبشر بخير
امي تلگة وين وليدي ما عرفت شي عنو
نافع.... والله مدري شكلكم
يمة احجي لاتهبطني شبي شاهر
... شاهر وقادر بخير لاتخافين
... عجل شصاير؟
مثنى...اقبال عالگة ( حارگة) روحها وهساع هي بالمستشفى
.... من سمعت الخبر جيت اكع من طولي بسرعة نافع سندني
امي واحلام انخبصن البسن عبيهن وطلعن ويا مثنى
نافع.. اكعدي ارتاحي خلي اجيبلج مي
.... بروح اهلك اقبال عايشة لو ماتت
... اهدي يابة ليش ترجفين مو زين عليج
الشباب كالوا بعدها عايشة مطفيها وموديها للمستشفى
.... بجيت بصوت عالي شبيها تخبلت شششلون تسوي هجذان
لا أله الا الله اذا تبقين بهاي حالتج انتي هم تنذبين مستشفى
.... شلون اهدي نافع اقبال حبلة بالشهر الرابع
.... بدل البجي ادعيلها الله يغفرلها ويگومها بسلامة الخاطر بنتها والطفل البطنها
... يارب لاتيتم بنيتها لساعها زغيرة وماشبعانة من حضن امها
الخبر طش بالمنطقة لليل البيت انترس بگرابتنا الكل يسآل ويستفسر عليش اقبال علگت روحها
والكل يحلل ويفتي بالموضوع بكيفوا
ردن امي واحلام يتباجن
احلام...يولو ادعولها حالتها خطرة
ابتسام... شفتيها
... لا ممنوع احد يفوت عليها
اهلها مجابلين المستشفى وكاعدين وشاهر وياهم.
جايين الشرطة يحققون
رايدين ياخذون شاهر ابوها مامخليهم كايللهم
زلمتها مايدري شي بنتنا بيتا احترگت هي حامل ومتكأبة
من تصحى عود حققوا وياها
... هم زين ما زتها برگبة شاهر
... مايكدر هو السبب بالصار
.. شلون
... جنتهم حجتلي من طالع شاهر وعمي خضير من عدهم
ابوها. مهددها
كايل مثل مافشلتينا اني واخوانج وخليتنا نتوسل بخضير الا اني بنفسي اجوز شاهر بنتوا
.... فان حظو اكو اب يجيب ضرة البنتوا
... يولي خما صدك رايد يخوفها حتى تبطل مشاكل
اقبال مصدگة كلاموا وتدرون حبلة وبسرعة تتاثر
مغافلة امها وخواتها ماخذة جليكان النفط. صاعدة للسطح وارة ( شاعلة) النار بجسمها
على صوت صريخها اهلها راكضين عليها لاكين النار شابة بيها من فوك ليجوة
جايبين بطانية مطفينها وماخذينها للمستشفى
.. شلون كدرت تسوي هجذان مافكرت بجوى بالجاهل البطنها
... الغيرة مخبلتها وعامية عينها
.. عجل نجوى وين
... ظالة يم جناينهم بالبيت
... سودة عليه الزغيرة متعلقة بأمها ولساعها ترضع من صدرها
... الله يرحم بحالها الخاطر نجوى ان شاء الله
..امين يارب
.... للصبح مانايمين وندعيلها
ابتسام... كوموا تريگوا
احلام... ومنو الو نفس يأكل
.... كوموا الخاطر امي سوولها واهس حتى تاخذ علاجها
وانتي لازم تاكلين الخاطر البطنج وبطلي بجي الدموع ما تسوي شي
... يولي نار بگلبي اقبال فقيرة لساع مو كادرة اصدك السوتوا
... غيرتها عمت عليها
....طب شاهر الوجه ذبلان والظهر منحني
نعيمة... هاا وليدي شلونها اقبال
.... تحت رحمتو نفس حالها منومينها بالمسكنات حتى لا تحس بالوجع
.... الله يگومها بسلامة
الجاهل البطنها شنو وضعوا
...نبضوا ضعيف الدكاترة مأيسين منو ومن امو
.... كلشي بيدي الله ارمي حمولك عليه
... ونعم بالله
رايح اسبح وابدل وارد للمستشفى
... اكلك لكمة تقوي نفسك بيها خما تظل بدون اكل
..... ومنو اليشتهي عوفيني بضيمي يمه
.... شاهر حالتو تكسر الخاطر شال فيروز حبها ورجع ناوشنيها صعد يسبح
سبح وبدل ورد للمستشفى ويا نافع وولد عمي
للمغرب ونفجعنا بخبر موتها
خسرت الدنيا والاخرة بحزة شيطان
تركت بنية بعمر السنة الله اليعلم شنو راح يكون حالها
موتها هي والبطنها كسر اخوي الجبل وهد حيلوا
من جابوها حتى غسل مايكدرون يغسلوها من الحرك البجسمها
نصبوا فاتحتها ابيت اهلها اكثر الناس ما جو للفاتحة واعترضوا يكولون ماتت منتحرة ماتجوزلها فاتحة
امها وخواتها من شافونا تهجمن علينا يكولون اقبال ماتت بسبب ابنكم
امي زعلت كالت امشوا مو مال نبقى هين
ردنا ناخذ نجوى اخت اقبال طلعت لسانها متر
.. بنت اختي باب الحوش ماتعتب ومن اليوم تنسوها مثل ما اخوكم حرمنا من اقبال الا نحرمكم منها
طلعنا زعلانين الحجي واصال الشاهر وابوها
فايت عليهم بالحزام هو ولدوا
والسووا مو حب بينا بس يريدون يسكتون حلوك الناس
لان جاعد يالفون سوالف عليها
واحنا اذا ماحضرنا الفاتحة راح يزيدون بالكلام
ويكولون شوف زلمتها اشاف عليها وطردها ومن خوفها انتحرت
خلصت الفاتحة ونجوى لساعها عدهم ماينطوها
شاهر من عرف امها واختها مجلبات بنجوى عيونو صعدن الكصتو
رايح عليهم ماخذها بالقوى
كايللهم حتى لو اموت بنتي ماتربى هين يمكم
من تشتاگولها اجيبها تشوفوها غير هالشي ماعدكم يمي
اخوها كايل بنتك ومن حگك تاخذها محد يلومك
جابها شاهر سودة عليه العيون مورمة من البجي ومربضة تريد امها
اخذتها من ايد شاهر جيتت الحضني لان تعرفني
اني وامي وخواتي حرنة شلون نسكتها
تظل تبجي الحد ماتتعب
اخ يا اقبال شفينتي بروحج
بقيت بيت اهلي اداريها ماتريد احد غيري
تعبت منا حامل بالشهر السادس ومنا نجوى وفيروز
نافع الله ينطي الصحة مقدر الوضع ومايگلي رجعي للبيت
ابتسام... شلونها نجوى
.... لساعها ادور امها وبالكوة تقبل تأكل
و حليب الممه ماتريدوا
... بلجي تتعود اشوفها شوية احسن من گبل
اي أرحم من اول ايام
احلام... وشاهر شلونوا
... نفسو وضعوا بالگوة يخلي الگمة بحلگوا
ليل نهار جگارتو بيدو مايزتها
... حگو فوك مصيبتوا حجي الناس المايخافون الله
. يا حجي
. يولي اشكال والون الحجي جاعد يالفون على المرحومة
ناس اتكول اهلها هما جتلوها لان خانت زلمتها.
وناس اتكول شاهر عارف بيها عدها علاقة وزاتها عند اهلها ومن خوفها جتلت روحها
وغيروا من الكلام الي يشيب الراس
نعيمة. الله اكبر عليهم حتى الميت ماخلصان منهم
.... جة نافع يتعشى ويانة
شاهر عازل روحوا ومايقبل يأكل
اني وامي عجزنا شلون نقنعوا
خليت لفة بيد فيروز كتلها روحي وكلي شاهر جوعان
ادري بيها نبيها وفطنة راحت وخلت اللفة جدام ثمو
شاهر... يبعد شاهر أكليها انتي بالعافية عليج
ول يابة والله ما جاعد افهم شتسولفين
... كلامها مافهوم نفهم كلمة وعشرة لا
ماتركتوا الحد ما خلتوا ياكل اللفة
شاهر... ادري هاي تعلومج
.... ههه لا شعلي هي تحب تشاركك بكلشي
من اليوم استخدمت فيروز حتى تاثر عليه والحمدلله ما يكسر خاطرها شتنطي ياخذ من ايدها
هي وقادر جثير هونوا عليه مصيبتوا
شاهر. ثگلت عليج جثير وتعبتح وياي وويا بنيتي فوك تعب الحمل وتعب فيروز
... وروح ابوي اذا عدت هذا الحجي مرة اخرى اطلع من هين وبعد ما تشوفني
والله لو بيدي اشيل الهم من گلبك واخلي بگلبي
... الله يبعد عنج الهم والغم يبعد اخوج
اصيلة اسم على مسمى
قادر... ول شاهر شوكت تطلع للمحلات خما تبقى جاعد هين وتحش بالجگاير
... وبيا عين أشوف وجهي للناس واجابلهم
شلون اتحمل اسمعهم وهما ينهشون بعرضي
قادر.... شحدوا اليحجي والله ادفنوا بأرضوا
.. تسكت منو واحد اثنين اذا هي المنطقة كلها جاعد تحجي
عملت اقبال خلتني مثل البالع موس لا اكدر اردهم ولا اكدر اسكت
عندي بنية باجر عگبة اذا كبرت وعرفت امها جتلت روحها شراح يصير بيها
اذا اطلع المخزون بگلبي مثل النار تحرك الأول والتالي حتى سمعت نجوى راح تتاثر بسبب الكلام الطلعوا على امها
قادر... انت مكبر السالفة ترى الموضوع فترة وينسي لاتظل تاكل بروحك
... اذا ينسي عليش بيت اهلها شالوا من المنطقة
بهاي عملتهم اكدوا الحجي وثبتوا على بنتهم
نعيمة... عمك خضير ينتظرك بالحوش گال عندي حجاية ويا شاهر
... عليش واكف برا ماخليتي يفوت
... كتلوا ما قبل شسويلوا
... طلع شاهر يشوفوا
ورها فاتوا للربعة امي وقادر گعدوا وياهم
سويتلهم جاي وجبتوا الهم
خضير... اعرف الوكت مو مناسب بس الجاعد يصير ببنيتي الله مايرضا من يوم الحرمتك جتلت روحها واخوانها شادين وياها يگولون اقبال لو ما متأكدة بينكم شي ما علگت روحها
وليدي انت زلمة ينشد بيك الظهر ومو عيب لو اجي بنفسي وانطيك بنيتي
... دحجنا على عمي مسنغربين هذا شگاعد يحجي
اقبال ماصارلها شهر من ماتت وجاي ينطي الشاهر مرة
شاهر... عمي العفو منك بس الگاعد تحجي مايدخل العقل حرمتي ماصارلها شهر من توفت وتريدني اتجوز
... احجزها والجواز بعدين
... اذا خايف على بنيتك اني احجي ويا اخوانها واخذهم الابو المرحومة يحجيلهم سبب موت اقبال
بنتك ماتنعاب والف من يتمناها نسبك ياعمي يشرف ديرة بحالها
لكن اني ما افيدها بعد تجربتي ويا اقبال ما اظن اكدر اتجوز
تعقدت من هالسيرة كلام الناس وطعنهم بعرضي جاعد يأكل بية لاتظلم بنيتك وياي
.... كام شاهر حب ( باس) راس عمي وايدوا وتعذر منو
والحمدلله عمي رجال واعي ما زعل من رفضوا وعذروا
ثاني يوم راح شاهر الاخوان وسن حجة وياهم وفهمهم سبب موت اقبال وانسدت السالفة
شاهر زت روحوا على الشغل يطلع الصبح يرجع المغرب
نجوى بدت تتعود على فراگ امها
طبيت بشهري احتاريت شراح اسوي اذا جبت منو يداري البنوات
الحمدلله
الله ما يگطع جت امنة من الرمادي علمودي
امنة...عمر قبل ابقى هين شهر
.... يولي جنت حايرة بزماني هم زين جيتي
...ادري ماكو احد يساعدج امي جبيرة والبنوات وكحات ماتكدرلهن
...نجوى فقيرة الوكاحة والعرامة عد فيروز وبس
هي وامي صايرات عداوة
اذا تصيح عليها تنتظر جيت شاهر وتشكيلوا وهذاك يتخبل ويبقى يعاتب بأمي
.... ههههههه فدوة العمرها يولي جثير محبوبة وسوالفها المامفهومات يخبلن
... هي مخبلة شاهر ونافع بسوالفها
بنص شهري صارت عندي ولادة
جبت بالمستشفى نافع واهلي صار عدهم خوف من الجدة
صار عندي وليد نافع سماه حسن
امي كيفت بي لان ولد
ونافع هم الفرحة ماسيعتوا
امنة وخواتي ماقصرن وياي دارني ودارن بناتي
خلص الشهر امنة رجعت للرمادي
واني هم صار لأزم ارجع البيتي
نعيمة. نجوى تعلقت بيج شلون تعوفيها
.. من يجي شاهر احجي ويا بلجي يقبل اخذها وياي
... ليش ماتجون تعيشون وهين
البيت واسع ويكفي من الحبايب الف
.. هاي امي لو غيرها سبحان الغيرها
ولو ادري بيها تعلقت بحسن ماتريد تتركوا
... هااا شو سكتي
... اكول النافع بلجي يرضى
... اي اذا ماقبل اني وشاهر نحجي ويا ونقنعوا
... رديت البيتي ونجوى وياي
نافع... هسه بلا نور البيت
.... منور بيك عفتوا وطبيت للغرفة بعدني الهساع اخجل منو
جة للغرفة وحضني
.. مشتاگلج بعد ما اقبل تعوفيني هلكد
.. اليوم الصدمات وحدة وره الاخرى
امي ونافع
... نومي حسن والبنات وتعالي الحضني
.. هااا شنو
.. ههههههه يابة شبيج ترى اني رجلج مو حرام اذا جيتي الحضني
... من الخجل غديت ماي عفتوا وجيت انوم فيروز ونجوى متعلمات بهالحزة يجابلن شاهر
اثنينهم مبوزات ويتزعلن يريدنو بين ما نامن فجرن حوصلتي
جيت لفراشي هم زين نافع نايم
انجضعت اريد اغمض صد عليه
وحضني
تاخرتي
.. هااا اي هساع يلا نامن
.. ليش بعدج لهسه مستحية مني ترى حتى طفل صار عدنا
هااا لا مامستحية
.. لعد تقربي اكثر وبادليني الحضن
... تقربت منو وحضنتوا
دنج راسو وباسني من شفايفي
وهاي اول مرة يبوسني من يوم التجوزنا
الله زرع بينا المحبة والتفاهم نافع رجال ونعم منو حنين وگلبوا طيب مراعيني ومراعي جهالوا
اخوانو مرتين شايفتهم اول نوبة بيوم زواجي والثانية من ولدت حسن جو باركولي
شايفين حالهم جثير، ومايتحاجون من نقدملهم شي مايشربوا نافع يتفشل منهم وما يكدر يحجي شي
عبالك بس هما نظيفين واحنا لا
الله يشهد بيوتنة تلمع من النظافة
گولت النافع نروح نعيش يم امي وشاهر رفض وگال حتى مناقشة لاتناقشيني بالموضوع
سكتت وعفتوا براحتوا
شاهر وامي هم حجوا ويا وماقبل
ظلن نجوى وفيروز بيني وبينهم يوم هين ويوم هين ظلينا سنة على هالوضع
امي تحاول تجوز شاهر مايقبل يكول اسم اي حرمة لاتجيبينوا جدامي
نعيمة.. وليدي خما تظل العمر كله بدون جواز
اني تعبت اريد تجي وحدة تعيني وتعينك
خواتك عدهن جهال ومسؤولية خما يظلن العمر كولو رايحات جايات يول فكر بنجوى لأزم تعيش هين
صارت اصيح النافع بابا
... وال يرحم اهلج كافي سدي السيرة
اصيل... باليل جو شاهر وقادر يتعللون يمنا
شاهر... ابو حسن لساعك ميبس راسك وماتريد تجي تعيش ويانة
.... هههههه هاي بعدك على نفس السالفة خوية والله زحمة الناس شراح تكول عليه گاعد بيت اهل مرتة گعيدي
... ينگص لسانوا اليگولها
قادر... خوية الكعيدي تنگال لليكعد عطال بطال واهل مرتوا يعيشونوا انت الحمد لله عندك شغل وتكسب رزقك من عرگ جبينك وتصرف على اهل بيتك
نافع... هم اشوفها صعبة
... موصعبة توكل على الله ووافق
فيروز ونجوى تجون تبقون يمي ويم جدة لو تظلون هين
.. شاهل وياك
قادر.. انا اخوك صرت شاهل عجل بس گادر عليه وتعترض شلون اصيحك باسمك
... انجعم
اصيل...يولن عيب تصيحولو باسمو
... معليج بيهن شيطلع من ثمهن عسل
نافع... الخاطر نجوى راح اوافق ما اريدها تتربى لعيد عنك
جربت اللوعة قبل من بقت بعيدة عني وادري باحساسك
... هذا الحجي الحلو من باجر ان شاء الله تجون
انتقالنا البيت اهلي
امي وشاهر مكيفين بينا
امي ويا حسن وشاهر ويا فيروز ونجوى مخبلاتو بدلعهن ودلالهن
نافع بالبداية جان. يستحي ويتحسس من الوضع وبمرور الوكت تعود وتقبل عيشتنا اهناك
كبرن بنياتي
فيروز صارت صف اول ابتدائي ونجوى تتسجل على السنة التجي
فيروز... شاهل
... يبعد شاهر
... أليد (اريد) بدلة وحملة (وحمرة) وتحل (كحل) وحداء، تعب (وحذاء، كعب)
. .شسوين بيهن يولي
البسهن بالمدلسة
عجل ماتريد اجيبلج عريس بدربي ظلت عليه
... اي اذوج قادر
قادر... ول يابة فيروزة الوكحة حاطة عينها عليه
شنو ما رايد روحي واخذج غير تهججيني من الدنيا باليلة سودة
شاهر... انجعم هو منو الينطيها الك هاي، الاميرة فيروز الي يتقدملها لأزم يجيبلها مشية من الصوب للصوب ويتوسل حتى اوافق انطيها الو
.... ادري مأخذمن هوليا التركية
... واحلى منها بعد شو ما عاجبك الحجي يول
... عمي سكتت هو منو يگدر يجيب طاريها جدامك
... ول يابة خلي يولي قادر من تكبرين اني الگيلج احلى منو
. نجوى. واني
قادر.... هههههههه الظاهر من بكبرن شغلتك ادورلهن عرسان
... لعرسان هما يجوني
هذهن بنيات شاهر مو حي، الله
.. والنعم من شاهر يابة
اصيل. اليوم گلبي لاسبني ما ادري شبيه اطب واطلع عيني على الباب فات المغرب ونافع الهساع ماكو القلق أكلني
شاهر....شبيج خيتي عليش كاعدة بالحوش
... نافع تاخر وبالي يمو مو من عوايدوا يتاخر هالكثر
... ذكري الله يمكن عندوا شغل وتاخر
منا النص ساعة اذا ما جة اطلع اشوفوا وين ظل........
يتبع
مساء العافية حبايبي
فضلاً وليس أمراً
ادعوا الخالتي بالشفاء،
حتى لو بقلبكم ربي يجعلها بميزان حسناتكم ان شاء الله.....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!