وصيه أخي الفصل الاول 1 - بقلم فاطمه

بنفس هذا مكاني الي هسه كاعده بي بالضبط و قبل ثلاث ايام جنت اني و ماما وبابا و اخوي كلنه كاعدين نتغده ونسولف و عين النبي ترعانه

بس ليش هسه كلهم تركوني وراحوا ليش عافوا مدللتهم وبنتهم الوحيده هنا وراحوا ... اعرف مو بيدهم و اعرف مو اختيارهم بس صعبه عليه فجأه الكه روحي يتيمه و ...

نقطع تفكيري على صوت شيء قوي وكع صرت ارجف واني اسد اذاناتي واصيح : لاااا ... لااااا .. ماماااا ..باباا

شبكتني بيبيتي وهي تسمي بأاسم الرحمن وتهدي بيه وتكول : اشش ماما حبيبتي ايوته ماكو شيء لا تخافين ماعون انكسر بس استهدي بالرحمن بنتي

ضميت رأسي بحضنها واني ادور حضن أمي بيها الي اخر مره شفتها كانت قبل ثلاث ايام من جنت شبهه نايمه واجت ماما انطتني علاجي لان جنت مصخنه من الفلاونزه سألتني : ايوش ماما شلون صرتي ماكدر اروح واعوفج هيج

- الحمد لله ماما روحي حبيبتي ما بيه شيء بس انام واصير زينه لا تديرين بال روحي لدوامج .. انتي اليوم ترجعين من وكت اساسا مو ؟

- اي ماما راجعه من وكت وانتي هم اذا صرتي زينه كومي رتبي البيت عيب يجي ابو نجم و عمج والبيت هوسه

باوعت يمنى ويسره وكتلها : ماما بربج وين الهوسه .. وبعدين علي و عمو باقر كل اسبوع يمنه شنو ما تعودتي

-لج امي لا تكولين علي بكدج هو

- اوووي ماما هو شنو ابو نجم وينه نجم واصيحله ابو نجم

فات اخوي محمد وهو يلبس بحذائه كال وهو يتشاقه ويانه : يمعوده عوفيها مابيها شيء هاي تتفيك حتى متداوم اليوم

ضحكت واني اتذكر من جنت بالمدرسه جنت دائما امرض نفسي حتى مااداوم فصارت هاي سمعه عليه بصعوبه يصدكون ان اني مريضه من صدك

عدلت كعدتي واباوع عليهم بأابتسامه ماما جانت تسوي جاي لبابا و محمد يكوي بجاكيته وبابا جان يم ماما بالمطبخ يسولفون

من فتره وهم سوالفهم مبهمه عليه ويحاولون يخلوني مااعرف شنو الموضوع حتى لا يخوفوني بس عرفت ان اكو شخص بابا مسويله عمليه ومتوفي بالعمليه و اهله و إخوانه مهددين بابا وهو ما مهتم بس ماما جانت خايفه وتكوله خل نروح للبصره فتره الى ان يهدأ الموضوع

بس جان رافض بحجه عنده التزامات وعمليات و لان اني و محمد عدنه دوام و بعد فتره امتحانات نصف السنه

استمرت ماما تحاول ويه بابا وهي تصبله الجاي اله و لمحمد و هي تقنع بمحمد يحاجي عمو و علي حتى يقنعون بابا يروح فتره للبصره حتى لو بدونه

جابتلي كوب جاي وكالت: اشربي يمه يدفي امعائج

ابتسمت الها وهزيت رأسي واني اخذه منها

راحت هي تحضر بجنطتها بسرعه لان بابا اليوم يوصلها هي ومحمد لدوامهم فميقبل احد يتاخر

سمعت صوت بابا يدك هورن فطلعت ماما بسرعه بعد ما وصتني اشرب علاجي وبوستني وراحت وهي تصيح بمحمد يستعجل

ركض محمد الي حتى اربطله رباطه وباوعت عليه وصليت على محمد وال محمد على وسامته

من سمعني اصلي على محمد وال محمد غمزلي وكال: هاا شلونه اخوج الصاك بربج

ضحكتله : هههههه تجنن يابه يلا روح بابا راح يضل يحجي

طلع بسرعه ... و جانت بس عشرين ثانيه وسمعت صوت انفجار كلش قوي

البيت اهتز كله والجام تكسر

وكع كوب الجاي من ايدي واني ارجف احاول اوكف بس رجليه ما يحملني

صرت ازحف واني ابجي احاول اوصل للباب حتى اشوف اهلي خاف صار بيهم شيء

فتحت باب البيت الداخلي و شفت محمد مشمور بالكاع و الدم ماليه ملي و وحده من رجليه جانت ماكو

جان هذا اول اصعب منظر اشوفه صرت ابجي بهستريا واصيح على ماما وبابا واني اكعد بمحمد بس ما يكعد

وكفت بصعوبه وركضت للشارع و شفت سياره بابا مشتعله بنار و الناس تحاول تطفي بيها

ركضت للسياره واني ادفع بالناس حتى احاول اشوف ماما وبابا

ما جنت منتبهه ان اني طلعت بس بتراكسود البيت و مااعرف منو الي حط شال على راسي ما جنت حاسه بشيء بس جنت احاول اوصل للسياره الي ما بقى بيها شيء بس انقاض

جوارينه جانن لازماتني حتى مااتقرب للسياره ويهدن بيه ويكولن : لا تسوين بروحج هيج يمه راحوا لدار حقهم

باوعتلها بغضب واني ادفعها واصرخ بيها : لااااا ما راحوا ما راحووووا ماما متعوفني وتروح لاااا ما يموتون و يتموني حرررام عليج خاله عوفيني اروحلهم خاااله

جانت المريه شابكتني وتبجي وياي وماحسيت بنفسي الا وكعت واغمى عليه وهذه جانت اخر مره اشوف بيها اهلي .

▪▪▪▪

فتحت عيوني وشفت نفسي غافيه بحضن بيبيتي ام ابوي من شافتني كعدت سئلتني : بيبي جوعانه اجيبلج شيء

ما جاوبت وضليت بس اباوع بالوجوه ، شوي وسمعت صوت عمي يدخل

كمت من حضن بيبيتي وركضت اله : عموو فدوه كولي شلون صار محمد

وخرني وكعد وهو تعبان جاوب: مو زين يا بعد عمج مو زين

كعدت بالكاع ابجي واكوله ياخذني للمستشفى اشوفه بس ما قبل : الولد ساعت الساعه يجيبون خبر موته ماكو داعي ترحين

حجاها وضليت بس ابجي واضرب بي حتى يوديني اله

صرخت بيهم : حرررام عليكم حرررام حتى جثه امي وابوي ما شفتها وتردون تحرموني هسه من اخوي شنو من بشر انتوا

جنت منهار واضرب بأي شخص يحاول يلزمني

حسيت بشخص وكف وراي ولزم معصمي وكال : كومي بدلي خل اخذج

باوعتله جان علي ابن عمي ، مسحت دموعي بسرعه وكمت لبست صايه جانت معلكه وره الباب ولفيت شالي الاسود وركضت اله كتله : خلصت

طلع كدامي وصعد بالسياره جنت خايفه اصعد بالسياره لان منظر سيارة بابا بعدها ببالي ظليت واكفه واباوع على السياره الى ان صاح بيه علي: يلا يمعوده اتاخرنه

هزيت رأسي بسرعه وتعوذت من الشيطان ودخلت السياره

ظل علي طول الطريق يوصيني : لا تبجين كدامه وتقهرينه و صيري قويه و المستشفى كلها زلم لا ترفعين راسج و تستري زين ووووووو.....

يحجي يحجي واني مخليه راسي على الجام وساكته الى ان وكفت السياره كدام المستشفى نزلت بسرعه ووكفت بباب المستشفى بين ميجي علي لان ما اندل

اجه بعد ما طبك سيارته وكال : امشي ونزلي راسج

مشيت وياه الى ان وصلنه لغرفه محمد وشفته نايم و الاجهزه داير مدايره

جانوا يمه زلم مااعرفهن من دخلت طلعوا ويه علي وعافوني ويه اخويه ..."اخويه" شكد حلوه هاي الكلمه من تنكال احس نفسي كلي ثقه و قوه وكأن اكو قوه عجيبه ساندتني واني اكول اخويه بس شلون اذا راح مني ...

مجرد جنت افكر ونزلت دموعي رغم ان علي نبهني ماابجي كدامه حتى لا اتعبه بس ماكدرت

بجيت وبجيت وشهكت من البجي واني واكفه واشوفه هيج نايم وتعبان و رجله ماكو و الجروح تارسه جسمه و وجهه

اتقربت يمه وكعدت بالكاع واني لازمه ايده واهمسله: لا تعوفني لا تكسرني خويه ماعندي غيرك بعد

ضحك رغم وجعه من سمعني وكالي : ولج يحلوه شوكت كبرتي وصرتي تحجين حجي مرتب

مسحت دموعي من سمعته كعد وباوعتله بدموعي واني ابوس ايده واكوله : محمد بروح امي وابوي لا تعوفني ماعندي غيرك وماكدر اعيش اكثر اذا عفتني كافي الي شفته ليهسه لا تعوفني يتيمه و بوحدي

جان يحاول ان ما يبجي كدامي بس دموعه نزلت وهو يكولي : وصيت عليج زلمه ينشد بي الظهر لا تخافين ياروحي

هزيت رأسي حيل واني اكوله: ماريد اشد ظهري بغيرك .. اروحلك فدوه لا تخليني وحدي

سمعت صوت خطوات ورانه فعرفت علي دخل ما رفعت رأسي من على ايد محمد وظليت اكوله : لا تعوفني

مسح محمد على رأسي وكال لعلي : ابو نجم خويه هاي البنت وصيتي لا تهزون عظامي بكبري من القلق عليها

جاوبه علي : لا تخاف عليها وثق بيه بعيوني اخليها

محمد: واثق بيك والنعم منك و هالله هالله بهاليتيمه وصيه ام و اب و اخ كلهن بهاي الوحيده دير بالك عليها ماالها احد

ما جنت قابله بحجيه يمكن لان مااريد اصدك ان هو ديموت كبال عيوني واني ما بيدي شيء اسوي فصرت ابجي اكثر واكوله : لا توصي احد عليه انت راح تطيب وتهتم بأاختك

باس ايدي الي لازمته بيها وكال : اريد تقريلي قرآن بصوتج لاخر مره

صرت اقرأله سورة المؤمنين لان حافظتها ودموعي ما وكفت للحظه وحده حتى

خلاص حتى المجرمين الي سوو هذا الشيء مأاكو أي دليل عليهم ومحمد الدكاتره كلها مأايسه من وضعه ومخلين احتمال موته اكبر احتمال

واني مندمجه بالتلاوه اسمع نفسه هدأ بس صوت جهاز القلب صار مزعج وهو يصفر بأان قلبه توقف

بصوته هذا عرفت مو بس قلب اخوي توقف لا الحياة توقفت عندي

باوعت لوجهه وجانت عيونه مفتوحه صرت اهز بأايده واكوله: تسمعني مو بعدك تسمعني محمد ؟

ما جاوب صرت اضرب بي اكثر واكوله : متعوفني وحدي ارجع اررررجع

دخلوا الممرضين والدكتور حتى ياخذونه فسحبني علي بس جنت رافضه اعوف اخويه

صرت ادفع بي واتوسله يعوفني : عليك بروح ابوك عوفني

-بويه حرام لا تسوين هيج راح لدار حقه عوفي يرتاح

ماسمعت منه وضليت اصرخ واعيط بكل صوتي

لزمني بأاثنين اديه وحضني حاول يهدأ بيه بس جنت اضربه و احاول ابعد نفسي حتى اروح وره اخويه

شافته الممرضه ميكدر يهدئني فسحبت ايدي وضربتني ابره مهدئه .

○●○●

سلام ... احب اوضح كم شغله الي هي اولا: القصه سمعتها بلسان البطله بس طبعا مو بالتفصيل مجرد رؤس اقلام

يعني القصه نكدر نكول مقتبسه من قصه حقيقيه

ثانيا / صور شبيهه للابطال تكدرون تشوفوهن بالغلاف

ثالثا / ايه شكلها هواي يشبه صوره الغلاف اما علي فقليل يشبهه هو اقرب شبيه اله

رابعا / نشرت القصه بيوم 21\3 لان يوم مميز بالنسبه الي لان يوم ميلادي + عيد الام + عيد نيروز + اريد اعرف بعد سنه من هذا اليوم وين ممكن توصل هذه القصه

وبالنهايه لا تنسون التصويت و كتابه رأيكم وشكرا♡