وصيه أخي الفصل الثاني 2 - بقلم فاطمه

مرت ثلاث ايام الفاتحه مال محمد واني مجرد جثه مو بشر كاعده بنص الفاتحه و احس بنسوان يجن يعزني ويرحن بس مااركز شنو يكولن او شنو ديصير نقطعت عن الاكل و مجرد لو كاعده وصافنه لو نايمه حتى ماابجي صرت

بعد هاي الثلاث ايام كومتني عمه شيماء ام علي حتى اغير ملابسي لان راح نترك دهوك و اروح اسكن بالبصره ويه بيت بيبي يبقى ببيت والدي بس عمي باقر وابنه هيثم حتى يتصرفون بالبيت وبعدها يجون

غيرت ملابسي و اخذت نفس عميق واني اباوع بكل زوايا البيت الي ذكره شلون اروح واعوف الشيء الوحيد الي بقالي هنا الي هن ذكريات اهلي

باوعت الكل ديتحضر ويستعد حتى نطلع بس مااتحملت اطلع

كعدت بالكاع و بجيت طلعت كل الدموع الي جانن رافضات يطلعن من ثلاث ايام بجيت وبجيت وصرت اشهك ومااكدر اتنفس الى ان فقدت وعيي .

▪▪▪▪▪▪

ما حسيت الا بريحه قويه اشتميتها فتحت عيوني وشفت روحي بسياره علي ويه بيبيتي و عمتي وعلي جان يشممني العطر حتى اكعد .

انطتني بيبيتي مي و غسلت وجهي وانطلقنه بطريق طويل من دهوك للبصره .

وصلنه لبغداد واخذنه استراحه واكلنه و دخلوا جامع صلوا واني بقيت بالسياره شبه نايمه .. جانت احداث حياتي كلها تمر كدام عيوني من اول يوم درأسي الي وشلون جنت فرحانه الى ثاني يوم ما رحت الا من انكتلت من بابا

الى ان تمرضت بسبب المدرسه وكرهي الها .. الى ان صرت ثالث متوسط وبدأ بابا بمشروع ويه عمي و ابن عمي هيثم و ابن عمي الثاني علي

بعدها صارت زيارات علي و عمي تكثر .. جنت سطحيه وياهم خصوصا علي لان دائما نضراته تزعجني و هواي يصيح ويضوجني على كل شيء

بعدها اجت فتره بقه عدنه ثلاث ايام خلالها سكنت بغرفتي وما نزلت اشوفه ابد

ماعرف السبب بس جنت اكرهه او اكره شخصيته او جموده او بروده مااعرف

عكس اولا عمي الثاني جانوا دائما يضحكون و يسولفون و يحششون واني فطيره احب الاشخاص الي يضحكوني بس هو جان كل ما ضحكت وياهم وعاط بيه و يخلي محمد يرزلني

بعدها بدت فتره السادس والضغوطات النفسيه وخوفي من ان مااحقق حلمي بالهندسه بس الحمد لله حققته و وكتها جانت سعادتي ما تنوصف حسيت روحي مو بشر ساعتها حسيت روحي طير وعندي جناح واريد اطير بفرحه

والي زيد فرحتي بابا الي انطاني هديه سياره و محمد اخوي سوالنه سفره لتركيا على حسابه

وصدمتي جانت بعلي الي انطاني سوار وكلاده ذهب بأاسمي وبيهن لؤلؤ كلش ناعم وحلو

ساعتها اول مره اسمعه يحجي وياي بطريقه مو حاده وكال : مبروك على تحقيق الحلم والا هي الهندسه مو فدشيء

نعم!!! شايفين هذا الكلام من عنده يعتبر كلام لطيف ومو حاد لهاي الدرجه هو شخص بارد المشاعر ومكروهه

بعدها بدأت فتره الجامعه و من ثاني يوم صخمت رأسي ودعمت السياره وبالف يا الله طلعت من الموت بسبب الحادث ومن عدها اكلت رزاله غسل و لبس من الكل و راحت سيارتي بدون ما اتهنه بيها

بعدها استمرت حياتي بهدوء اساسا اني حياتي هادئه الى ان اجه هذا اليوم المشؤم اليوم الي فقدت بي نفسي و اهلي - سندي الي بالدنيا .

▪▪▪▪

كملنه طريق ١١ ساعه تقريبا يلا وصلنه البصره بطلاع الروح واني شلون اكرهه الطريق الطويل ردت اموت .

نزلت للبيت الي يعيش بي جدتي ومرت عمي شيماء ام علي هي ارمله وعدها علي الجبير و احمد و سهى و نهى اما عمي باقر و زوجته و اولاده الاثنين و بناته الثلاثه يعيشون ببيت بصف هذا البيت بس تقريبا اغلب الوقت همه هنا كاعدين

يعني بأاختصار عائله جبيره و هوسه ... اساسا هم بس صوتهم يهز هز حتى من يحجون بصوت عادي احسهم ديتصايحون لاني متعوده على الهدوء

اخذت بيبي ايدي وحاولت تخفف عليه لان شافتني بس صافنه على البيت

دخلت برجلي اليمنى لبيت جديد عليه وحياة جديده

سلمت على مرت عمي باقر و اولادها وبناتها و بعد كعده نص ساعه فرشولي بصف بيبتي ونمت.

▪▪▪▪▪▪

فزيت من نومتي ساعه ٣ حاولت ارجع انام و ماكدرت فطلعت بالحديقه لان جنت مختنكه .

هنا عدهم حديقه كلش جبيره بيها مرجوحه و طاوله جبيره بنص الحديقه و انواع الورد و الشجر

طلعت وكعدت على المرجوحه وصرت اباوع للقمر

حسيت بشخص كعد بصفي باوعت شفته علي

لبست حجابي و كعدت ساكته وهو هم طلع جكاره وكام يدخن بعصبيه و متنرفز بس ليش مااعرف

طبعا علي هو المعيل مال بيت .. لان عمي يعتبر عازل عن البيت فهو يصرف على امه و اخوانه واخواته و جدتي

عمره ٣٥ و يشتغل دكتور عيون بمستشفى وعنده عياده

ما مختلطه بي هواي لان احسه انسان معقد وعصبي كلش وكت عصبيته ايده والضرب ميسيطر على نفسه وهذا اكثر شيء اكرهه بالرجال

ما متزوج بس مره خطب و فسخ و حسب الي سمعته من ماما ان خطيبته صارحته بأن هي تحب واحد واهلها جبروها عليه فتركها

اما شكله فهو طويل كلش طوله ١٩٠ اعتقد و اسمر شعره اسود ومو كلش طويل عيونه بنيه و بأاختصار شكل مثل أي شاب عادي ومرتب

اما اني فعمري ١٩ مرحله اولى بالهندسه

جنت انسانه متفائله و شاطره بدراستي وشغل البيت

حبيت شخص قبل سنه بس ما صارت النه قسمه

كشكل فأاني طولي ١٧٢ و جسمي مرتب يعني سمينه بأاماكن وضعيفه بأاماكن ، شعري بني و عيوني ملونه و شفايفي وسط و هواي انطي شبه لماما الله يرحمها

قطع افكاري صوت علي وهو يجاوب على اتصال بعصبيه ويكول : يعني شنهو هسه هاي هي انسد الموضوع .. خوش رحم الله والديك ما قصرت .. لا ماكو داعي جان من البدايه كتلي انه كلب واذا ما انطيتني رشوه ما أنبح .. يلا يلا مع السلامه تنه اعرف شنو علاجك

سكت بعد الاتصال واني توترت من يمي بسبب كلامه فتحركت حتى اكوم بس وقفني بسؤاله

: ليش ما نايمه

جاوبته واني اكح حتى بلكت يحس ويطفي جكارته : كحح حح .. نمت وكعدت ماكدرت انام ما نعسانه فطلعت اشتم هوه بس مادري ليش الهوه يخنك

ضحك بعد ما فهم قصدي فطفه الجكاره وكال : روحي نامي

-كتلك ما نعسانه شعليك بيه انت روح نـ ...

قبل لا اكمل لزم ايدي بعصبيه وكال : لا تعيدينها مره ثانيه

ما فهمت قصده وليش عصبي اساسا فسحبت ايدي وكتله : ليش اني شكلت

-شعليك بيه مووو !! منا و غاد اني ولي امرج وهاي الكلمه مااسمعها مره ثانيه تجنبي اعصابي لراحتح

خلص كلامه وعافني ودخل

هزيت ايدي ماعاجبني حجيه ولا عصبيته وكلت : والله بطران

شوي ورجعت كملت نومتي للتسعه كمت تريكت وياهم وساعدت بشغل البيت

ورحت كعدت ويه بيبيتي اباوع تلفزيون حتى اشغل نفسي

شوي ودخلت مرت عمي باقر هي وبناتها وصارت سوالف وحجي الى ان اجت بنت عمي الصغيره وكعدت بصفي و سئلتني بسكوت من امها : ايو انتي مرتبطه

باوعتله وكوه ضامه ضحكتي هي كلها عمره ١٢ سنه فكتلها : مو بعدج زغيره على هاي السوالف

فسكتت شوي نوب كالت : هو بس جاي اسئلج قابل شمسويه

كتلها : لا ما مرتبطه ليش ؟

ضحكت وكامت من عندي استغربت تصرفها بس شفتها طلعت للحديقه يم اخوها الجبير هيثم شاورته وهو انطاها خمسه وراحت

فهمت الصار بس غلست على الموضوع

كمت شلت كلاصات الجاي للمطبخ و المطبخ جان يم الحديقه فشافني هيثم و دخل على اساس ان هو يشرب مي

-شلونج ايوشه

كتله : الحمد لله وانته

-بخير دامج بخير بنت عمي الغاليه

ابتسمتله مجامله وكمت اغسل بالكلاصات فسألني :

اي .. اكلج سنه الجايه ترجعين تداومين مو

- اي ان شاء الله بيبي كالت علي ياخذني لدهوك علمود النقل و اداوم السنه الجايه

-هااا يعني انتوا كلتوا لابو نجم

-لا بعدني ما كايلته بعد وكت الله كريم

-اي الله كريم ، لا تهتمين انه اخذج

بنفس اللحظه دخل علي وكال : وين تاخذها ؟

هيثم:لدهوك ان شاء الله علمود نقلها مال جامعه

علي: وانه ليش مالي علم بالموضوع

ايه: لان بعد وكت كلت بعدين اكلك

علي : اي ما شاء الله مخططه ومكمله وبعدين تكليلي

لهذا السبب اكرهه شكد انسان حقنه ، ابتسمتله وكتله : ماكو داعي للاعصاب شغله بعد اشهر تصير ومن تقرب كلت انطيك خبر

ما جاوب و سئل هيثم : انته شعندك هنا

هيثم : هااا ... ما متغدي اجيت اكل لايوشه تصبلي غده

ايه : تتدلل هسه اصبلك

علي: هه ... ايوشه شهل سوالف مال مزعطه

هيثم : هاا ابو نجم هسه انه صرت زعطوط خلف الله عليك

علي : انت اعرف بنفسك ماكو داعي اذكرك انت منو

وتقرب منه وهمسله بس صوته وصلني : لو مو زعطوط ما تسوي مصايبك وانه احتار بنص اليالي الملم وراك

هيثم زعل وطلع بره مااعرف شنو سر حجيهم الحاد هذا بس لازم اكو شيء لان الي اعرفه علي صح كلها تخافه وتحترمه وحتى ميصيحوله بأاسمه كله بأابو نجم بس بنفس الوقت هو محترم ويه الكل الا ويه الي يغلط تصير تصرفاته ثانيه

ما علقت شيء بس بما ان هيثم راح واني حميت الاكل فسألته : متغدي ؟

- لا صبيلي

صبيتله ودنكت حتى احطله الاكل على الميز فسمعته يهمس : استغفرالله

رفع صوته وكال: ستري نفسج بويه

انتبهت لروحي ان شالي ما مغطي صدري واني دنكت كدامه

شكدد عييب غطيت نفسي وطلعت بعد ما صرت حمره من الخجل .

●○●○

لا تنسون التصويت ♡

و رأيكم بشخصيه علي وهل اكو سبب وراء هاي الشخصيه العدائيه؟