وصيه أخي الفصل الخامس 5 - بقلم فاطمه

شفت باب السطح مفتوح فردت اروح اسده خاف تدخل بزونه بس سمعت صوت بالسطح فوكفت حتى اعرف شكو

جان علي موجود و بلقيس لازمه ايده وهي تكول : ليش هيج تسوي وياي انه مو بنت عمك

كان واضح كلش عصبي وكوه لازم اعصابه فسحب ايده منها و رفع اصبعه يهددها : هاي مره ومشيت صلافتج وانه اتخبل من المره الصلفه و الوكحه بس يا بلقيس و الخلقج اذا عدتي هذا الموضوع ما اعديها على خير

وخله واجه يطلع فطفرت لغرفتي حتى ميشوفني بس من الخوف سديت الباب بقوه

كعدت ارتب بغرفتي الى ان سمعت صوت باب الغرفه يندك فتحته وكانت شمس بنت عمو باقر كالت: عمو ابو نجم يريدج

-ليش؟

-مادري

-زين شنو جان يكول قبل لا يصيحني؟

-مادري

-لعد كوليلي جان عصبي لو لا ؟

-مادري

-اووو كلشيء متدرين ، يلا جايه

رحت وياها وجان كاعد بغرفه بيبتي ويكلب بفونه من دخلت سد الفون وكال : اكعدي ايه

بكلبي سميت بأاسم الله و كعدت احاول اعرف شنو الخطأ الي سويته قبل لا يحجي

-انه باجر رايح لبغداد عندي شغل وثاني يوم نروح لدهوك علمود النقل مالتج ونرجع فحضري نفسج تجين وياي

-ومنو يجي ويانه ؟

- محد يجي ويانه متشوفين الكل مشغول بسالفه بيت عمي

- اها لعد راح اروح احضر اغراضي

هز رأسه وكمت ومن وصلت يم الباب صاح عليه : وهاا بطلي فضولج هذا عيب تتسمعين على الوادم شتحجي

انه متت بهدمي وخليت وطفرت فوك يربي شكد عيب هسه عباله متقصده .. يعني ولو جنت متقصده بس مو كلش

رحت حضرت جنطتي خليت قطعتين ملابس بيت وملابس طلعه هم قطعتين و كم شغله وسديت الجنطه

نزلت حتى اتعشه فساعدت بتحضير العشه ورحت امد السفره فنسيت ودنكت و جان علي و هيثم و احمد كاعدين

من انتبهلي عاط بيه : بويه انتي ثوله لو اثولين بروحج امشي طلعي برا بسرعه وصيحيلي سهى

طلعت ابجي و ما صحت سهى لان من صوته العالي اكيد سمعته

غسلت وجهي وصعدت فوك وما اتعشيت

شوي واجت نهى صاحتني وكالت : ابو نجم يكول تعاي تعشي

-كليله نايمه ومتريد

ضحكت بأاستهزاء وكالت : لا تتدللين وتجيبن المصيبه لروحج

كتلها : نهى يرحم امج عوفيني وكوليله مااريد

-طبج طوب انتي الي ردتيها

عاد نزلت و شوي وصعدلي علي ودخل بدون ميدك الباب

-انه مو صحتج ليش متجين

عفت موبايلي الي جنت لازمته وكتله : ماريد ما جوعانه

-غصبا عليج تجين تاكلين

-اني مو طفله وتعاملني هيج كتلك مااريد و اريد انام

-اذا مو طفله فلا تتصرفين مثل الأطفال ونزلي تعشي

-اووو علي كتلك ماريد و اريد انام

-خوش تردين تنامين لعد جيبي موبايلج حتى لا يشغلج عن النوم

وسحب موبايلي وطلع

كمت وراه بعصبيه وكتله : محد سمحلك تاخذ موبايلي رجعه

- ما منتظر تسمحيلي خاتون ورجعي نامي يلا

وخله و نزل ردت انزل وراه بس كلت خل ما اكبر السالفه واتعارك وياه وبالنهايه اني الخسرانه لان خاف يغير رأيه وميخليني اكمل جامعه

رجعت نمت و دمعتي بعيني

للصبح سمعت صوت دك على الباب و صوت علي يكول : يلا بويه كعدي ورانه طريق

شفت الساعه بالخمسه كمت غسلت وتوضيت وصليت وبدلت واخذت جنطتي ونزلت

لكيت علي جاي يصلي ومنزل جنطته هم من خلص سألني : عندج مكان بالجنطه

فهزيت رأسي وكال : اخذي ذن الاغراض خليهن بجنطتج جنطتي متكفي

اخذت اغراضه وخليتهن بجنطتي وكف لبس حذائه وسلمنه على بيبي الي جانت تصلي و طلعنه .

بالسياره سئلني اذا جايبه اوراقي من جنسيه وغيرهن كتله اي و مشينه

طلعنه من البصره نوب طلع موبايلي وكال : هاج بويه شحني بالسياره

اخذته بدون مااحجي وشحنته

سئلني : جوعانه

هزيت رأسي ب لا

-يول شنهي بلعتي لسانج ما تحجين

ما جاوبته واستمريت مطنكره وهو هم بعد ما سئل

اني خليت وكملت نومتي الى ان صار موعد الصلاة وكفنه بمحطه

-يلا بويه نزلي صلي دخلي حمامات ومن تخلصين تعاي يم السياره حتى نوب نتغده بمطعم قريب ونكمل

هزيت رأسي ومشيت للحمامات وبعد ما خلصت صلاة رجعت وكفت يم السياره بس علي بعده ما جاي لان هو اساسا يطول بصلاته

فخليت ايدي على عيوني من الشمس وانتظرت

سمعت احد يصفر من وراي غلست وصرت ادعي الله يطلع علي بسرعه لان كولش اكرهه هيج مواقف

-اوووف يابه اليوم شنو اليوم كمر و شمس بنفس الوقت يا سبحان الله

سويت نفسي مو يمي الحجي وتحركت حتى اروح انتظر يم المصلى مال نساء بين ما يجي علي واني كلبي يدك من الخوف

مشيت بسرعه ومنزله راسي ومغطيه عيوني من الشمس واسمع ذاك مستمر بالحجي الرخيص

-لك اخ كلبي بس لو اكضها

صرت امشيء بسرعه وما حسيت الا وشخص لزم ايدي

سحبت ايدي بسرعه وعطت بي : شبيك ما تستحي

رفعت عيوني واشوفه علي يباوعلي بأاستغراب : شني يابه صارلي ساعه اصيح عليج ! صاير شيء شبيج تركضين

- لا لا ماكو شيء بس خل نروح دنيا حاره ودخت من الحر

باوع بكل مكان يحاول يعرف شكو بس ما شاف شيء ففتح السياره و صعدنه

شغل السياره ورجع سئلني : يول صاير شيء احد حاجاج بس كوليلي

هزيت رأسي ب لا وكلت : ماكو شيء

-عجل شمالج ترجفين ؟

-اباوع على ايديه ترجف فلزمت ايدي بقوه حتى اسيطر على نفسي وطلعت اول جذبه اجت ببالي : ماكو شيء بس خفت من لزمت ايدي فجأه

-بويه خافي من الكل ولا تخافين مني انه سندج و وياج ومحد يأذيج دامج مغلطانه بشيء اعتبريني اخوج ابوج ابن عمج الي تردينه

ابتسمت اله وكتله : تسلم متقصر

-عجل فرديها شوي وكافي طنكره واختاري يا مطعم تردين نروح

-لا ما مطنكره بس مو حلوه تسحب موبايلي مني عبالك طفله كدامك

-هسه عود انتي جبيره هو كلج ١٩ سنه

- اي حقك متشوفني طفله اذا انت عايش ٣٥ سنه .. شدعوه ما مليت

ضحك قوي وكال : ها بويه ترديني اموت

- لا اسم الله عليك اني اساسا الي راح اموت من الجوع

-ديلا لعد خل ننزل هنا هذا خوش مطعم

هزيت رأسي ونزلنه

دخلنه للمطعم فهمسلي : امشيء بسرعه ولا ترفعين رأسج المكان كله ولد

نزلت رأسي وصعدت لطابق العوائل و اجه هو سئلتي: شتطلبين

-مادري بكيفك

-شني بكيفي انه الي راح اكل لو انتي

-اممم... زين انته شتطلب

-انه احب الكباب

-امممم ... لعد اطلبلي تكه دجاج

ضحك وكال: استغفر الله مو صاحيه

خزرته عود داحاول اسوي نظرتي تخوف مثله اشو هذا خرب من الضحك وخله الناس تباوع علينه

غطيت رأسي من الخجل واكوله : علي كافي منا الناس

مسح دموعه واول مره اشوفه يضحك هيج وكال : بربج عيدي النظره عيديها

درت وجهي وكتله : رايحه للحمام

صار عندي فضول اعرف شنو جان شكلي من سويت هاي النظره حتى هيج ضحك

فرحت للحمام اباوع بالمرايه واعيد واسوي نفس النظره و اااه ... ليتني ما سويتها

ااخ كلبي طلعت جني قرد بايكين اكله من فشلتي ردت ابقى بالحمام لو ما بطني ظلت تقرقر من الجوع

طلعت وشفت الاكل واصل وهو منتظرني ما ماكل فكعدت وسميت بأاسم الرحمن وبدينه نتغده و هو كل شوي موبايله طن و طن ويجاوب الرسائل ويرجع ياكل

خلصنه غده وتحاسب وطلعنه للسياره صعدت فشفت اتصال من بيبيتي اتصلت عليها وطمنتها ورجعت الكرسي مالتي ليوره ونمت

وره فتره حسيت على صوته وهو يكعدني فتحت عيوني فكال : وصلنه لبغداد يلا تحضري وعدلي نفسج

انتبهت لحجابي نصه مفتوح وشعري طالع فعدلت ححابي وسئلته : وين رايحين هسه

-هسه يابويه راح نروح لشقه صديقي نبات بيها اليوم واكمل شغلي وباجر نطلع لدهوك

-شلون يعني نبات بيها

-يعني نبات بيها يعني ننام ونكعد الصبح شنو الي ما ينفهم

-هااا ... لا ماكو شيء بس ليش منروح فندق

-يول الفندق ما يدخلونه اذا ما متزوجين

هزيت رأسي وسديت الموضوع قبل لا أحرج نفسي اكثر ويكول عليه تفكيرها مو صافي

اتصل بصديقه واخذ العنوان وكاله : اي جاي انه وزوجتي ... لا باجر رايحين لدهوك ... متقصر خويه متقصر ... ان شاء الله ... مع السلامه

ذبحني الفضول وما كدرت ما اسئله : ليش كتله زوجتي

-يبويه جا شكله بنت عمي ما ترهم شيكول عليج

وكف السياره فكال انزلي .. نزلت ونزل ورايه اخذ الجنط و طلع المفتاح الي جان بالتراب بسندانه مال ورد وفتح الباب وكال صعدي انه اصعد الجنط

- لا عادي اني اصعد جنطتي

-صعدي بويه لا تعاندين مره وحده كولي حاضر بدون نقاش

ضحكت وكتله : حاضر

- ايي هيج فدوه لله شلون حلوه

-منو الحلوه ؟!!

ضحك وكال : منو قابل طبعا كلمه حاضر

صعدت واني ابتسم وهو صعد الجنط ودخلهن وكال :

دخلي بويه ارتاحي تمددي تعبتي اكو اكل بالثلاجه ومي دافي اذا تردين تسبحين انه رايح اجيب الاجهزه الي اجيت علمودهن ساعتين ثلاثه واجي اذا تحتاجبن شيء او يصير شيء اتصلي عليه

●○●○

لا تنسون التصويت ☆