وصيه أخي الفصل الرابع 4 - بقلم فاطمه

اجه يريد يطلع فسمع هوسه بغرفه خواته و واضح بعدهم جاي يتعاركن

دك الباب ودخل عليهن : شصاير شكو معليات حسجن

سهى: ابو نجم انه مدخلني هي ما تلتزم بالجدول

نهى: لا خويه انه ملتزمه بس لان انسه هي تزغلط عليه

- يا جدول يابه شدتحجن بنص الليل؟

نهى : انه مااريد اكعد وياهه بنفس الغرفه بعد لان لو انه اعدل الغرفه وانظفها لو تبقه الغرفه وسخه وهي ما تشيل ايدها

سهى: انه اساسا مااريد اكعد وياج ما تخليني انام الليل كله تلعب بالموبايل

هي كالت هيج وعلي باوع بعصبيه لنهى وسألها : شتسوين بالمبايل الليل كله

نهى : أ..أ..ابو نجم والله مااسوي شيء يخويه بس بالليل النت قوي فأانزل مسلسلات .. وبعدين انه اريد غرفه وحده هاي مو ايه اخذت غرفه اول مااجت عبالك بيتها جا وانه ليش ما تنـ ....

ما خلاها تكمل ولزمها من شعرها بعصبيه : لا تغيرين الموضوع وجيبي الموبايل بسررررعه

البنيه صارت ترجف بأايده وانطته الموبايل الي جان بدون رمز لان ما نعهن يخلن رمز فصار يدور بي يدور ومن مالكه شيء هددها وكال : بالله تالله يا نهى ان رديتي لسوالفج القديمه مو بس تنحرمين الدراسه هالمره لا تنحرمين حتى من العيشه هنا اذبحج واخلص منج
و كلمه ايه عبالك كاعده ببيتها ما تنعاد غصباً على راسج هذا بيتها مثل ما هو بيتج

وباوع الهن ثنينهن وصاح : حسجن مااسمعه والا مااخلي وحده منجن صاحيه فاهمات

هزن رأسهن ثنينهن بسرعه وكعدن

جاي يطلع فسويت نفسي ماره بالصدفه ولا كأني صارلي ساعه اسمع

باوعلي و دخل لغرفته

▪▪▪▪▪

ثاني يوم الصبح كعدتني سهى وكالت : ابو نجم راح يودينه مطعم و للمول كعدي حضري روحج ولا تلبسين شيء ميقبل عليه احسن ميبطل ياخذنه

سئلتها : يصير ما اروح ما عندي مزاج طلعه

هزت رأسها بـ لا بكل بساطه وكالت : كومي لا تسوين مشكله من الصبح

هزيت رأسي وكعدت اطلع بالملابس والله سالفه بالليل تعارك وياهن والصبح وفه بكلامه وراح يطلعنه مثل ما كال

لبست ملابسي السود ونزلت يم بيبي

-صباح الخير بيبي

-صباح الخير يمه

-شنو بيبي ما ترحين ويانه اشو ما لابسه

- لا بيبي اروح بس خل يخلصن البنات ذن يتاخرن بلبسهن وانه شعندي هو بس البس جواريبي وعباتي والفوطه لافتها

كتلها : منو يجي ويانه

- ابو نجم واحمد وأخواته وامه و بلقيس و سجى هم يجن

-هاا اي زين

نزل علي و صاح على اخواته و باوعلي من فوك لجوه نوب سأل : شمخليه لوجهج شدعوه هلكد يضوي مسحي المكياج

- يا مكياج ما مخليه غير اني حزينه شنو نسيت

بيبي جاوبته : لا يمه ما مخليه هي هيج وجهه حليوه و يضوي

غلس ما حجه ورجع يصيح على خواته يستعجلهن

واتصل على عمه حتى يخلي بلقيس و سجى هم يستعجلن

خمس دقايق وصعد الكل بالسيارات

اني و بيبي و عمه شيماء صعدنه بسياره علي و شوي واجت بلقيس هم صعدت ويانه بحجه سياره احمد متكفي

سياره احمد صعد بيها سجى و سهى و نهى يحبن يصعدن وياه لان يضحك ويتشاقى عكس علي

وصلنه المطعم وكعدنه جاي نطلب غده واجه اتصال لعلي

-شنووو ؟ شلون ؟ خوما احد تأذه ، يلا جايين

بيبيتي سألته : خير يمه شصاير

-بيت عمي باقر احترك بسرعه كوموا

ركضت بلقيس ولزمت ايده كدامنه والدموع عشره عشره : فدوه ابو نجم احد متأذي

- لا لا محد صايرله شيء امشوا

وطلعنه بسرعه للسيارات وكله تسكت ببلقيس و سجى الي سون فاتحه بالسياره

طبعا بيت عمو باقر هو بصف بيت جدي وحتى اكو باب مشترك بالاساس هو جان من ضمن بيت جدي بس قسموا وطلعوا همه

وصلنه للبيت و نشوف الاطفائيه والناس كلها واكفه بره و عمي واولاده كلها بره

و لان الشارع جان كله سيارات فوكف السياره بعيد عن البيت شوي فكالي علي : تنزلين رأسج وكبل للبيت فهمتي

هزيت رأسي و طلعت من السياره بسرعه ومن الاستعجال وكعت جنطتي بنص الشارع

دنكت حتى اخذها فلزم ايدي بعصبيه وهمس من بين اسنانه : عفيه بالشاطره دنكي كدام الوادم دنكي خل يمتعون نظرهم

نزل هو جاب جنطتي وجرني للبيت بسرعه واني امشيء واريد اوكع لو ما هو لازمني

دخلت للبيت وغيرت ملابسي بعصبيه من وراه ونزلت بسرعه

اسمع مرت عمو باقر تبجي وتكول : كله من وراهن ذن البـ***

عايفات الكهرباء مال غرفهن مشتعله و طاكات ومحتركه البردات واحترك الطابق الفوك

طبعا الي صاير ان البيت محترك بي بس الطابق الثاني و الطابق الاول يرادله ترميم فبهاي الحاله علي كال لعمي باقر يجون يسكنون ويانه بين ما يصلحون البيت

و بهاي الحاله صارت سجى و شمس ينامن وياي بالغرفه و بلقيس بغرفه نهى و سهى و عمي و اولاده بالاستقبال ومرت عمي و عمتي شيماء ويه بيبيتي

اما علي فهو المحظوظ الوحيد الي بقه وحده مرتاح لان اساسا محد يتحمل ينام وياه بسبب حبه للهدوء بالغرفه

خلال فتره تواجد بيت عمي ويانه انتبهت لشغلات وهن ان سجى تحب احمد اخ علي وطبعا نظراتهم و حركاتهم فاضحتهم وهم ميدرون

و بلقيس تحب علي و لازكتله لابعد درجه

و هيثم من يشوف علي بالشغل يضل يدور حجح حتى يسولف وياي

فبيوم جنت جاي احجي بموبايلي ويه صديقتي و سولفت الها ان راح انقل ان شاء الله و دكيناها سولف

فدخلوا هيثم و احمد يمي بغرفه بيبي ويسولفون شوي وكام احمد وبقيت بس اني و هيثم

سديت المكالمه بعد ما ودعت صديقتي وجاي اكوم فسألني هيثم : ايوشه عندج فيس

-اي عندي ليش

-عود كلت اضيفج

-هااا ... مو اني ما ضايفه بس بنات

ضحك وكال : اي عادي مو مشكله زين انطيني رقمج لو هم بس بنات

ضحكت مجامله داريد اعرف وين يوصل فكتله : ليش شتسوي بي

-شنهو يابه بت عمي واحفظ رقمها خاف تحتاجين شيء يصير شيء

دخل احمد الي طلع سامع نص حجينه وكال : هيثم ابو نجم يريدك

كام هيثم وكعد احمد يمي وكال : ايه يابه هذا ابتعدي منه ولا تنطي عين ولا رقم ولا شيء تره مشاكله وسوالفه مال بناات كثيرات وميبطلهن متشوفين ابو نجم يضوج منه

- تره انه ما منطيته عين ولا مجال هو الي يحجي وياي ويسولف وانجبر اجاوبه قابل ابقه ساكته

- لا بويه مو هيج قصدي بس انبهج

وكام وطلع بره فكمت اني وصعدت فوك شفت باب السطح مفتوح فردت اروح اسده خاف تدخل بزونه بس سمعت صوت بالسطح فوكفت حتى اعرف شكو ....

●○●○

لا تنسون التصويت ♡