وصيه أخي الفصل الخامس والعشرون 25 - بقلم فاطمه

اخذته من الصندوك واديه ترجف و الجو اساسا بارد خليته على كلبي وركضت بي لبيبي

- جده .. شوفي هذا ابن منو ؟؟

- كربي يوم خل اشوفنه

قربت الها وباوعت للطفل وكالت : والله مدري يا جده اول مره اشوفه لهل وليد

غطيته و خليته بحضن بيبي وركضت لبست عبايه عمه ورحت للاسواق جبتله حليب وحفاضات ورجعت اشوفه ميت من البجي وبييي ما تكدر تسكته .

ركضت بسرعه سويتله حليب واخذته بحضني ارضعه وبس شاف الحليب سكت .. حسبي الله موتينه جوع

صرت اباوعله ودموعي تنزل .. ناس تذب اطفالها وناس تبجي من الحرمان .

رفعته لوجهي واشم بي وابوس برأسه وايده واكول لبيبي : شوفي جده شوفي ايديه شلون صغار .. فدوه رحتلك حبيبي

حسيت بيبي لزمت ايدي وكالت : لا تسوين هيج يمه

باوعتلها بأاستغراب وسئلتها : شنو شمسويه اني

ما جاوبت وابتسمتلي بس .. دقايق ودخل علي طلعت بيبي متصله عليه من رحت اجيب حليب وكايلتله

اجه علي وسهى ونهى وعمه وبيت عمو باقر واولاده وكلهم واكفين يباوعولي و للطفل

سئل عمي : ابو نجم .. نخبر الشرطه لو شلون

- اي عمي لازم نخبرهم

اخذت الطفل لحضني وكتله : ليش تخبروهم اذا هم اهله ذبوه الشرطه شيسون بعد يرجعونه الهم غصب

اتقربت عمتي ام علي وكالت : يمه ايه انطيني الطفل

اخذته بحضني اكثر وكتلها : لا اني أدير بالي عليه

علي يباوعلي بأاستغراب وأشر لهيثم ونائل يجون وياه وطلع بره

خلص الطفل رضاعته و نومته بحضني وابوس بي وعمه ومنقهره عليه وتكولي : يمه أيو لا تتعلكين بي هيج تراها كم ساعه ويرد لاهله

حسيت كلامها مثل المي البارد الي نزل على واحد صافن وجفله .. باوعتلها وكتلها: واذا ما رادوه

بيبي: يمه شنو مايردونه اكو ام ما تريد بزرها

- اي بيبي .. لعد شكو عايفته بالحديقه تتشاقه وياه قابل

ظليت ساعات لازمه الطفل وهو نايم ابوس بي الى ان اجه علي وكال : شفنه الكامرات بس ما كدرنه نعرف منو الي مخلي هنا و جانت هوسه وهواي وادم ما فهمنه شيء

- اي شنو الما تفهمونه اهله ما يردونه والله دزه الي

كعد يمي وكال : أيوشه دخليج لا تتعلقين بي الطفل مو الج ولا راح يصير الج .. الطفل اله اهل واكيد يردونه سيطري على مشاعرج شوي وانطي لبيبي تهتم بي

هزيت رأسي ب لا ودموعي تنزل وكتله : خليني عايشه احساس الامومه وياه شوي على الاقل

ما حجه شيء وكال لعمي : ابو هيثم احنه خلينه نروح للمركز ننطي خبر .

هز عمي رأسه وطلعوا للمركز .. و لان اتاخروا اني اخذت الطفل ورحت لغرفتي

حظرتله حليب خاف يريد وخليته بصفي على الچربايه و اشتم بريحته مره واخذله صور مره وابوس بي مره .. احتاريت شسوي حسيت هاي اخر مره ممكن اكون ام فذبيت كل واهسي بالطفل

الى ان تعبت وغفيت واني حاضنته .. حسيت علي دخل للغرفه واني نص نايمه

اتقرب باوع علينه وباس رأسي ودخل يسبح .

فتحت عيوني الصبح على صوت الطفل يتحرك ويأكل بملابسي خطيه

كمت سويتله حليب ورجعت لكيت علي حاضنه ونايم ابتسمت من كل كلبي على شكلهم بس عقلي ذكرني ان هذا الطفل مو الي و مستحيل يصير عندي مثله .

نزلت دمعتي ومسحتها ورحت للطفل شربته حليبه ونام بسرعه .. دخلت اسبح واتاخرت شوي فـ من طلعت اباوع الجربايه فارغه لا علي ولا الطفل

ركضت بسرعه جوه و شعري ينكط مي .. شفت علي كاعد يم بيبي و الطفل بحضنها

اول ما شفته ركضت اخذته بحضني ابوس بي بخوف

تقرب علي عليه وكال : يول بيج شيء

صحت بي : شلون تاخذه ومتكلي

- أااااايه حسكج كصري .. وبعدين شفتج ماكو والطفل يحوس نزلته لجده بين ما يجون ياخذونه

سئلته بدموع : يـ ... ياخذونه ؟!

- اي ياخذونه البارحه من كلنه للمركز كالوا نبحث ونردلكم خبر والطفل طلع مخطوف والي خاطفه متخلص منه وذابه ببيتنه بنص الهوسه

- يعني .. يعني اهله يردونه

- يول طبعا يردونه

حضنته وصرت ابجي بقوه واني اكللهم : بس اني اريد اصير أمه .. الله دزلياه ليش ياخذونه مني

تقرب علي واخذ الطفل لحضن بيبي وردت ارفض الا ان هو حضني بقوه وصار يسكت بيه ويهدأني واني بس ابجي ومن كلامه كله ما سمعت الا كلمه وحده چانت : لا تهتمين اذا الله راد ينطينه طفل فـ لو مو رحم شايله هم ينطينه .

وقتها حسيت كلامه مجرد مؤاساة و هالشي مستحيل يصير

بس بعد ما مرت سنتين و خلال عام 2015 انتشرت اخبار عن زراعه رحم للنساء الي فاقدات رحمهم .. و جربوا العمليه على ثلاثه نساء وجانت ناجحه و صار عدهم اطفال

وقتها حسيت باب جديد انفتح بوجهي .. فحاجيت علي بالموضوع و ايام واشهر اني اقنع بي وهو رافض لان يخاف عليه

بس بعد ما شاف اصراري واعرف رغبته بطفل كبرت من بعد هالسنين من زواجنه فقبل و رحنه للسويد حتى نسوي العمليه

وبعد فحوصات وإجراءات طولت اشهر اجانه الرفض بسبب ان ما لكو متبرعه مناسبه الي

جانت اغلب المتبرعات هن من النساء الفقيرات الي عدهم ٤ او ٥ اطفال وماعدهن فلوس يعيشنهن فـ شنو يسون يجن يبيعن رحمهن

اما اني فما لكوا متبرعه مناسبه .. وقتها رجعت حالتي النفسيه تتعب اكثر من قبل لان جان اكو أمل رفعني لسابع سما والرفض نزلني لسابع ارض .

علي هم تعب وياي هواي .. جسديا ونفسيا وماديا تعبنه .. هواي خسرنه وبالنهايه ما فاد

رجعنه للعراق واشهر اني معتزله الكل .. لان اشوف سجى حامل بطفل وبلقيس جابت طفلها الثالث و نهى انخطبت و سهى تزوجت والكل عايش حياته الا اني .

بيوم من الايام بالغلط سمعت علي وعمه يحجون بخصوصي فجانت تكله :

يمه انه اريد اشوفن وليداتك قبل لا اموت .. يعني لا تقبل تتزوج ولا تقبل بالحل الوحيد

- يمه حبيبتي اروحلج فدوه هذا الي تكولين عليه حل تدرين شكد خطير .. وانه ماكدر اوافق عليه واذبج انتي ومرتي بالخطر

- يمه انه مره جبيره وافتخر بأن بطني هي الي شالت زلم حوك مثلك ومثل اخيك و نسوان معدله مثل خواتك خليني اكمل فرحتي و خلي بطني تشيل ابنك

ما جنت مفتهمه قصدها ابد الى ان كالت : انه اخذت احمد وسويت تحليل وطلع النسيج متطابق انه الوحيده الي اكدر اتبرعلها فدوه رحتلك اقتنع وخلصني

دخلت لغرفتي ابجي مدري من الصدمه مدري من الخوف او القهر مادري المهم خلصت دموعي بذيج الليله .

الى ان اجه اليوم الي وافق بي علي على ان امه تتبرعلي برحمها و صار الوقت يقنعوني .. صح جنت رايده متبرع بس مو عمتي اخاف عليها فأاحتاج اقناعي ايام هم

بعدها رحنه للسويد وجنت اني تاسع مريه تسوي هذه العمليه

قبل العمليه بيوم جنت حاضنه عمتي واتشكر منها وابوس بيها و ثاني يوم دخلنه أيد بأايد لغرفه العمليات وما طلعنه الا بعد ١٨ ساعه من العمليه

الايام الي بعدها جانت صعبه و موجعه النه أثنينه

اخذنه سبع اشهر بالسويد الى ان تعافينه بالكامل وبعد هاي السبع اشهر بدأت محاولاتنه بأان احمل

واجه اليوم الي اكتشفت بي حملي وجانت فرحتي ما تنوصف ما خليت احد ما حضنته بيومها ودموع الفرح ملت عيون الكل

واجهت صعوبات بحملي .. وجان كلش صعب بس بعد اشهر شرف أبني نجم للدنيا واخيرا

جانت ولادته صعبه وبشهر السابع بس الحمد لله حالته زينه .

نجم صار روحي من الدنيا و ما اعوفه لحظه وحده وكلش مهتمتله اني وعمه

وعلي طاير بي وين ميطلع ياخذه وياه الى ان عرفت روحي حامل مره ثانيه وهاي المره بتوأم بنت و ولد

احس الله رحمني واخيرا و خلصت من اختبارات الدنيا بعد ما صبرت بفضل الله والي حواليه و بفضل زوجي هم .

حاليا اني حامل بالشهر السادس بالتوام وحالتي شوي خطره مكضيتها ابر مثبتات و نايمه و علاجات .

بس الحمد لله على كل حال الله رزقني بنهايه صبري بنجم وابو نجم و ان شاء الله كلها كم شهر واصير ام لثلاثه اطفال

جنت اكول مستحيل اصير ام بس هسه اني ام لثلاثه لا والله اربعه ثلاثه اطفال و الرابع ابوهم .

●○●○●○

النهايه

وخلصت القصه و طبعا اني تعرفت على البطله من جانت تجي تضرب أبر مثبت بعياده ماما ومن خلال الحجي عرفت جزء من قصتها و الباقي كملته مخيلتي ونشرت هاي القصه

ان شاء الله تكون عجبتكم واتمنى اعرف ارائكم بكل شيء كتبته هنا

و ان شاء الله اذا الله راد بعد فتره انزل قصه جديده وهاي المره تكون مختلفه عن كل القصص وابطالها يختلفون عن باقي ابطال القصص ... في امان الله