وصيه أخي الفصل الرابع والعشرون 24 - بقلم فاطمه

ضرب الميز الي جان بصفنه وصاح : انتي شتهذين .. اطلكج شنو ؟

- علي هذا شرطي ما اسوي العمليه اذا ما تطلكني

- بويه انتي بيج شيء .. ضربتي راسج بمكان ، الطلاك شعليه

- علي طلكني اني ما افيدك بعد

- مو انتي الي تقررين هذا الشيء و طلاك ما طلك

كعدت ابجي واني حاطه رأسي بين رجليه وكل شوي اسحب الشال حتى ما يطلع رأسي ما احب يشوفه هيج

رغم صار ثلاث اشهر من خلصت كيمياوي ورجع شعري يطلع بس حاله من حال شعر علي .

كعد بصفي وحضني واني ابجي وكال : ليش هيج تحجين .. ليش تردين تعوفيني سويت شيء انه مو كافي علعلتي كلبي بيج

زدت بجي واني اكول :علي طلكني .. الله يخليك

- ليش بس فهميني ليش ؟؟!!!!

باوعتله وهو عصبي وكتله : لان ما اتحمل تتزوج غيري

عقد حواجبه وكال : شنو قصدج

- علي اني مستحيل اصير ام بعد .. وانت من حقك تتزوج و يصير عندك اطفال واولاد يشيلون اسمك من يكبرون بس اني ما اكدر .. اني مستحيل احققلك هذا الشيء ومستحيل اقبل تتزوج عليه لذلك طلكني ما اتحمل اشوف غيري تشاركك بيه

نزلت دموعي و ااااخ منهن شوكت يخلصن هالدموع .. باس رأسي وكال : شسوي بالاولاد و الاطفال اذا مو منج .. اذا مو انتي امهم من خرب بيهم

هزيت رأسي ما قابله على كلامه وكتله : علي اخذها بعقلك انت اول وتالي تحتاج الي تشد ظهرك بي من يمضي بيك الزمن و انـ ...

قاطعني وكال : أيه والخلقج و السماج أيه انه طلاك ما اطلك و زواج غيرج ما اتزوج و لـ ...

سديت حلكه بأايدي وكتله : و الخلقك و السماك علي ما اسوي العمليه لعد .. خليني اموت هيج و انت تخلص مني على الاقل

- اشششش شهل حجي .. انه اموت وراج اذا متي شلي بهالحياه الي من اجيت الها لهسه تعب بتعب انتي الراحه الوحيده الي شفتها بحياتي واذا راحت راحتي انه شلي بحياتي

- علي لا تعاند .. خلصني والله خلص صبري

باوع عليه لوقت طويل ونزل رأسه وكال : خلاص أيه الي تردي يجرالج

باوعت بصدمه وكتله : شنو يعني تطلكني

هز رأسه بـ اي واني رغم الي طلبت منه صارت دموعي تنزل .. مسحها وكال : اطلكج بس مو هسه .. بعد العمليه

هزيت رأسي وكتله : توعدني

- وعد

وعافني وطلع واني رجعت ابجي بحركه حتى لو جان طلبي بس ما تحملت حسيته بسهوله تخلى عني رغم اني طلبت هالشيء لخاطره .

مرن اسبوعين واجه وقت عمليتي بيومها جان كلبي موتني وجع من الخوف وكل شوي منفجره بجي حسيت على أي ساعه دموعي راح تخلص وميخلصن

بيومها بعد ما لبست ملابس العمليه شفت علي كاعد منتظرني وحاله هواي تعبان فكلت للممرضه تنطيني وقت وياه وقبلت

رحت يمه وسئلته : حبيبي بيك شيء

استغرب من سمع كلمه حبيبي بس ما كال شيء مجرد ابتسم وكال : لا يعمري شوي صداع لتخافين انتي

شفت الممرضه تأشرلي بأن ما اتاخر فبست رأسه وكتله : دير بالك على نفسك

قبل لا اتحرك لزم ايدي وكال : ارجعيلي بسرعه لا تتاخرين

هزيت رأسي ورحت ويه الممرضه لغرفه العمليات

حسيتها مثل الكبر مو غرفه هلكد ما تخوف .. رغم ان هنا الدكاترة و الممرضات هواي حبابين ويتشاقون ويه المريضه ويطمنونه حتى ميخاف بس ميفيد .

ضربوني مخدر واخر شي شفته عيون الدكتوره وهي تبتسملي .

▪▪▪▪▪

فتحت عيوني على صوت علي وهو يسألني: أيه تسمعيني

هزيت رأسي بخفه وكتله : شلون صرت

- انه شلون صرت لو انتي

- انت شلون صرت مو جان رأسك مصدع

باس رأسي وكال : اروحلج فدوه انه والعشيره .. انه زين دامج زينه انه زين

رجعت سديت عيوني حتى انام بس بده مفعول التخدير يروح و الوجع زاد عندي فطلبت من الممرضه تنطيني مسكن وما كالت لا

علي طلع يتصل بأامه يطمئنها ومن رجع سئلته : بعدك على الوعد

- هسه صيري زينه وبعدين نحجي

▪▪▪▪▪

مر شهرين على عمليتي وبعد فحوصات أتاكدنه ان السرطان خلاص راح بس بعديش بعد ما اخذ أمومتي وياه بعد ما اخذ بيت اطفالي

هالفتره نفسيتي جانت كلش تعبانه .. رجعنه للعراق و رجعنه اني و علي نكعد بغرفه احمد القديمه هاي الفتره لان منكدر نرجع للبيت منو ألي هناك

علي رجع للعياده و دوامه و ٢٤ ساعه مشغول تقريبا

اني عمتي فدوه لكلبها ما عافتني لا هي ولا سهى ونهى دارن بالهن عليه وعلى احتياجاتي و شكد ميحاولن يطلعني من نفسيتي التعبانه بس كل ما اشوف طفل ارجع ابجي واني افكر ان مستحيل اصير بيوم ام ولا اسمع كلمه ماما

علي بعد ما سئلته شوكت نتطلك ضحك بكل صوته وكال : بويه من كل عقلج تحجي .. انه اعوفن الجنه برجليه .. شنهي جا ما نتعلم من خطأ ابونه ادم
طلاك ما اطلك

بداخلي فرحت بتمسكه بس ما بينتله هالشيء وكتله : بس انت وعدتني و الرجال يربط من لسانه

- بويه وعدتج لان ما تفكين عنادج .. هاي هي اول كلمه واخر كلمه اكسرها لخاطرج و لو رجع بيه الوقت هم اوعدج وهم اكسر كلمتي لخاطر ما ينكسر كلبج

- كلبي اني ؟

ضحك وكال بغرور : عجل كلب منو .. بويه لا تحاولين تمشيهن عليه تراني ادري بيج عاشكتني

ابتسمت و قربت وبست شفته بخفه وكتله : عاشكتك صح .. بس يا علي اني ماافيدك بعد

- ول يابه راح تجلطني .. جا هو غير الكلب ميدك بدونج اكو اكثر من هالفايده

و سد الموضوع بعدها ما قبل احجي شيء .. بيوم من الايام جنت كاعده اساعد سهى ونهى بالتحضيرات لعرس احمد و سجى خطيه هم كل ما يردون يعرسون يصير شيء

بس اليوم الحمد لله عرسهم .. سجى جانت طايره بفرحتها و احمد ابتسامته ما نزلت من وجهه و عمتي محتاره وين تروح تفتر منا ومنا على الشغل والتحضيرات .. هيثم و نائل و حسن هم خطيه ملتهين بالتحضيرات والناس والكل هوسه بهوسه

وناس طابه وطالعه و نسوان ترسن البيت ترس واطفال ملوا البيت واني احاول الهي نفسي بكل شيء حتى ما افكر بالصارلي

بلقيس سمعت جايه من يومين للعراق بس ما اجت لبيت بيبي على الاساس مريضه بس من اجت اليوم واشوفها حامل وبطنها شكبرها وما يردوني اعرف خاف احسدها .. صح صارت روحي بالاطفال بس مااحسد احد

سلمت عليه وباركتلها وراحت كعدت يم بيبي ما تكدر تشتغل ويانه

بدأت الحفله والركص وكلشيء حلو جان و اجت الزفه و زفوا سجى من بيت جدتها ام امها للفندق وافتروا شوي وصور وهيج ... اني جنت ويه علي و بيبي وعمتي بسياره علي

والسيارات بصفنه ودك اغاني و نزلوا الولد يركصون بالشارع

واني نزلت ويه نهى واباوع عليهم ومبتسمه وعلي كلساع يخزرني حتى ارجع للسياره بس عاندت وليتني ما عاندت

واني واكفه واسمع وحده وراي تحجي ويه امها وتكلها : هي هاي مرت ابو نجم

- اي هيه

- غير حلوه .. جا حكه ما يريد غيرها

- شيفيد حلوه وماتكدر تخلفله .. انتي شدي حيلج وياه بلكت يدورون على مره حتى يذكرونج وكتها

واني اسمع حجيهن اختنكت ورجعت للسياره ابجي .. اجه علي يركض من شافني وكال : بويه بيج شيء

هزيت رأسي ب لا وكتله : خل احد من الولد يرجعني تعبانه

- تدللين .. يلا راجعين

- لا انت وين جاي .. عرس اخوك هذا ابقى وياه خل نائل يرجعني

- عرس اخوي عرس عمي انه شخصني أمشيء نرجع واسوي عرسي على الفلك الي سويتي اليوم

- يااا شسويت اني

- جا بعد شتسوين بس لزمي برنو وطكي كلبي بچيله .. كل هالجمال وتكلي شمسويه

ضحكت بس بداخلي احس كلبي يتكطع ..والله يستاهل يصير عنده طفل يشيل أسمه

رجعنه للبيت اني وهو وبيبي تعبت .. وصلنه وكال : انه ساعه زمان وارد .. روحي انتي ارتاحي

دخلت لغرفتي بعد ما انطيت لبيبي علاجها وشربت علاجي ورحت غيرت ملابسي واجيت انام وسمعت صوت طفل يبجي

استغفرت الله وكلت معقوله اتخيل .. بس لا صوته واضح

كمت من فراشي أدور بالبيت ماكو .. بس صوته يبجي

كعدت بيبي وصرت ادور ادور وبالاخير طلعت للحديقه واشوف طفل عمره بالاشهر مخلينه بكارتونه وبمكان ختله حاطي وفوكاه غطه وهو ميت من البجي .

●○●○●○
لا تنسون التصويت و كتابه رأيكم ☆

انتظروني في البارت الاخير اليوم ليلا