وصيه أخي الفصل السابع 7 - بقلم فاطمه

•°•°•أيه•°•°•°•

استمرت فقره السلام الطويله والمزعجه بين علي و بيت خاله المتكون من جعفر وزوجته وابنهم سعد مراهق
و خال علي و مرت خاله

دخلت سلمت وجانوا ناس كلش حبابين وحسيت معشرهم لطيف يعني يحسسونك ان هم يحبونك وهم ما يعرفونك

صار سلام وكلام ماله داعي للذكر و صار وقت العشه فأاضطريت اكعد يم علي بما ان هو كاللهم خطيبتي

يعني لو كانو ناس متشددين مثل ما كال ما كان سولنه مكان حتى اكعد يم علي كان حتى فصلوا السفرتين وسوو وحده للنسوان ووحده للزلم مثل ما خوالي و عائله ماما يسون

بس هنا بالعكس حسيتهم ناس متفتحه وعادي نضحك سوه ونحجي سوه وحتى من علي كال الهم ان اني خطيبته الكل صار يضحك ويلمحون لاشياء ما فهمتها

وكل شيء جان تمام الى ان وقعت المصيبه من سئلني سعد ابن جعفر وهو يضحك ويغمزلي وكال : أيوشه شنو رأيج بعمو ابو نجم ؟

ضحك الكل و علي كاله وهو يضربه بالشقه: ها يول تغمز لخطيبتي كدامي

اني هنا تمنيت يغمى عليه ولا اكمل الكعده هنا حاولت امثل اني أنغمى عليه بس اعرف بنفسي احرج روحي بالزايد وماادبرها

رجع سعد بكل صلافه ويسأل : شو غلستي وبلعتي لسانج دجاوبي

ورجعوا يضحكون ومتونسين وانه ميته خجل وكتله : الله يحفظه لاهله

- يمعوده قابل سئلتج على رأيج بأابوي رايد رأيج بخطيبج وين الرومانسيه تره بالكعبه مااتزوج اذا هيج طلعت بالحقيقه الرومانسيه معدومه بين المخطوبين

ضحكت بخفه وضربت علي بخفه حتى يطلعني من الموقف عاد هو الله ينطي العافيه فضحني بزياده ويكول : لا تتحارشين يول منا الوادم

ضربته بقوه على رجله وسويت نفسي داضحك بس جد ضحكت من سمعته يكول : خرب مو ايد تكول طابوكه

اجه سعد يريد يعيد كلامه وصاح بي خال علي والحمد لله انقذني من كاله : يبويه بعدك بزر عوف الرومانسيه للكبار من تكبر ترومنس براحتك عود

وكملت ام جعفر وكالت : يبيبي متشوف البنت صارت طماطيه من الخجل وانت ما تسكت شتريدها تكول مثلا عن ابو نجم ليش هو ومواقفه ينوصف

جاوبها علي وهو يبتسم : مشكور يأام جعفر والله انج عزيزه ومره اصيله ومعزتج جبيره عندي

ضربه خاله بالكوشه ويكوله : يول تحارش بخطيبتك عوف مرتي

صار الكل يضحك ومرت جعفر خطيه المي طلع من خشمها من الضحك .

تأخر الوقت ففرشوا لعلي بالاستقبال و يه جعفر و سعد واني ويه مرت جعفر

وجعفر يشيل بالفراش ويكولي وهو يضحك: هالمعروف طول عمرج لا تنسي عفت مرتي وراح اكابل خطيبج اليوم بدال مرتي الحلوه

- اي والله الله يساعدك ههههههههههههههه

ضحكنه و نزل هو جوه واجيت انام سئلتني ام سعد : شلونه وياج ابو نجم

ماعرفت شكوللها وشلون اخلص نفسي فكلت : الحمد لله زين ... بس عفيه اريد بندول رأسي يأذيني

كامت جابتلي بندول ومي سويت نفسي اشرب الحبايه وبالحقيقه ضميتها لان ما متوجعه بس ردت انطي ايحاء بأان ماكدر احجي

عاد طفت الضوه وكالت : تصبحين على خير حبيبتي يلا ارتاحي وراج تعب بالطريق

- اجمعين حبيبتي

ثاني يوم حسيت على ساره تندهني حتى اكوم فكالت : صح النوم يحلوه يلا ابو نجم منتظرج على الريوك حتى ترحون للجامعه

تمغطت شوي و صفنت بوجها وبعيوني النعاس وسئلتها : انتي ليش حبابه

عاد هي كعدت بالكاع من الضحك وكالت : اروحلج فدوه لا تصحصحين ونزلي يم ابو نجم هيج كوليله

اني جنت ما مستوعبه شديصير ففركت عيوني وحتى ابتسامه ماكو بوجهي وهي خربانه ضحك عاد غسلت وجهي يلا صحيت شوي ونزلت تريكت ويه علي لان بيت خاله يكولون همه ما يتريكون هيج وكت ما يشتهون

رحت بعدها لبست ملابسي وطلعت ويه علي للجامعه

دخلنه الجامعه ورحنه للاداره بس جنت حاسه ان الكل يباوع علينه ماعرف السبب يعني اني مو اجتماعيه بالجامعه ولا معروفه مثلا حتى يفتقدوني وهسه كلها تباوعلي

توترت و اتقربت اكثر شوي يم علي وكأني ادور أماني يمه حركه ما فهمت ليش سويتها بس سويتها

باوعلي وكال : بيج شيء

هزيت رأسي ب لا وكملنه طريقنه للاداره

دخلنه تقريبا ساعتين سوالف وجرجره واخذنه النقل
وطبعا راح ارجع اعيد سنه اولى لان ما امتحنت بنصف السنه بسبب الصار

فعلى السنه الجايه اني اداوم بالبصره سنه اولى

اجينه نطلع من الاداره وكالي علي : نزلي رأسج وامشي بويه

هزيت رأسي وكملنه طريقنه الى ان صاح عليه احد : أييييه ولج أيو هاي انتي ؟!!

•°•°•علي•°•°•

اتقدم يمنه شاب و وكف وسلم عليها : البقيه بحياتج يمعوده وين جنتي اختفيتي فجأه دورنه عليج و كالوا الجوارين ببغداد راحت بس ما عندج احد ببغداد وين صرتي

جانت ايه متضايقه وتباوع علي كل شوي وكأن تريد تعرف ردت فعلي ، حسيت الشخص هذا من اقربائها لان ينطيها لمحه شبهه

جاوبته بعد مده من السكوت : وحياتك الباقيه زين والله وتذكرتوني عبالي نسيتوا بنت اختكم

جاوبها : لج شتحجين انتي ما تعرفين الصار

تعاي نروح للكافتيريا وخل اتصل بأامي ميته عليج تريد تطمن علي

هزت رأسها وكالت: ماكو داعي احنه مستعجلين

من كالت احنه انتبه الشاب لوجودي وكال : منو حضرتك

جاوبته ايه قبل ما اجاوب وكالت : ابن عمي وخطيبي علي

مد ايده وسلم عليه وكال : اني كرار ابن خاله أيه اتشرفت بمعرفتك

جاوبته : الي الشرف

ورجع يحجي وياها : أيه بس اسمعي لامي شويه بس انتظريها خمس دقايق وتجي وتفهمج الصار

تنرفزت من كلامه وعاطت بي : الصار لا ماكو داعي تفهمني الصار وخل تنساني مثل ما نست اختها و مااجت حتى بفاتحتها

لزمت ايدها لان بدت ما تنتبه لنفسها وكتلها : صوتج الوادم تدحك علينه

ثواني وسمعنه صوت مريه صاحت عليها : أيو يمه

و سرعت المره بمشيتها وحضنت أيه وتشمها وهي تكول : اوف يا يمه بيج ريحه اخيتي

أيه جانت ما متفاعله وياها ولا بادلتها الحضن وكاللتهة ببرود : هسه من ماتت صرتوا تدورون ريحتها بيه وين جنتوا من جانت عايشه محد دك بابها ولا وصلها

-مو هيج يا يمه والله مو هيج السالفه وروحها لامي مو هيج السالفه ... انتي ما تدرين بس انه و ألمرحومه امج من خمس اشهر واحنه كل يوم نتشاوف لو هي تجينيه من الدوام لو انه اروحلها من انتوا مو بالبيت

انتبهت لأيه عقدت حواجبها و داخت شوي فلزمتهة وكتلها : خل نكعد الشمس ضربتج لا يصير بيج شيء

اندارتلي خالتها وكالت : انت منو يمه

كلت : انه ابو نجم ابن عمها لأيه

وزيدت أيه فوك كلامي وكالت : وخطيبي هم

هزيت رأسي مؤيد لكلامها و سحبتها حتى نكعد بالكافتريا بدل ما واكفين بنص الجامعه والجاي والرايح يدحك بينه

كعدنه و كرار ابن خالتها راح يطلب شيء و سئلت أيه خالتها : شنو قصدج فهميني

- يمه اني وامج من خمس شهور متصالحين ودائما نلتقي بكل فرصه بس اني كتلها ما تكول لاحد خاف يوصل الحجي لخالج ابو فرات و يسود عيشتي

ضربت أيه الطاوله واول مره اشوف جانبها هذا وكالت : اولا هذا الرجال مو خالي ولا اعرفه ولا يعرفني وثانيا اذا هيج تكولين وينج بالفاتحه ما نورتي

- والله يا يمه يا أيوشه و روح امج و امي قبل لا اسمع الخبر وقبل لا يوصلني اجه ابو فرات وكال عازمج على الغده رحت وياع ولكيت خالاتج كلهن هناك طلع مجمعنه حتى يكوللنه بوفاة امج و حتى ما يخلينه نجي للفاتحه و الي خلقج يا يمه ما خلانه نطلع من البيت ثلاث ايام الفاتحه تعرفينه شكد رجال صعب

ابتسمت أيه بأاستهزاء وكالت : لا مو رجال صعب
رجال حقير وما يهمه احد غير نفسه و كلمته الي لازم متنكسر

اجه كرار وجاب عصير بارد وكاللها : اشربي بردي كلبج

باوعت للكلاص ولزمت ايدي وكالت : ماكو داعي واحنه نترخص اتاخرنه ورانه طريق للبصره

و مشت وهي تضغط على ايدي حتى ما تبجي

●○●○

لا تنسون التصويت ☆