هو قاسي متملك لايعرف الرحمه
هي بريئه لازالت طفله رغم عامها العشرون
اوقعها قدرها في براثنه لينتقم منها ضلما
لتصبح اسيرة لانتقامه القاسي
فهل لها مفر من عرين الاسد ?
،،،،،،،،،،،،،،،،
قصة راهب ابو غضب
للكاتبه زهراء الحسناوي
،،،،،،،،،،،،،
بسم الله الرحمن الرحيم
راهب،راح اعرفكم عن نفسي
اسمي راهب ضياء الدين ملازم اول بالجيش العراقي عمري 30سنه
والدي متوفي من اسنين بس كان اكو سبب وراح اتعرفون شنو السبب
شغلي الشاغل كان اوصل الهذا المركز وانتقم من الي كان سبب بموت ابوي وخراب عائلتي
عندي ثلاث اخوات كلهن اكبر مني اثنين منهن متزوجات اوحده منهن بعدها رافضه فكرة الزواج رغم عمرها 33 واهواي اجوها خطابه بس ماتقبل ومصرة ع الرفض وهم راح اتعرفون ليش
والدي كان اكبر تاجر ذهب بالسوگ والكل يحلف بي وبصيته رجال طيب ومحترم والناس تقدرة
بيوم وليله ابوي خسر الوراه والگدامه بسبب عمي جلال وصرنه ع الحديدة
خل نرجع اني وياكم للماضي الاليم الي ابتدت بي معانات عائلتي قبل 30سنه
ام احلام،،يمه احلام روحي جيبي اخواتج يلعبن بالحديقه غسلي وغسليلهن راح اصب الغدة
احلام،،يووو والله تعبت منهن كل شويه جيبيهن غسليلهن لو الزميهن لو اركضي وراهن ابتليت صرت الجبيرة خو ماابتليت
ام احلام، ،عمت عينج شبر طولج والسانج شطوله امشي ولج جيبي اخواتج بس خل يجي ابوج واني اعلمج
وعلئ ذكر ابوج اسمع الجرس روحي افتحيله الباب
احلام، ،رحت رحت امري لله
ابو احلام،،اشلونهن بنات ابوهن ومدللاته ??
ام احلام،هله بشمعة بيتنه الله يساعدك
ابو احلام، ،ويساعدج بويه
اشلونج اليوم خو مااذتج كلياتج?
ام احلام،،والله بعدهن احسهن وارمات من الزلال مااصدگ شوكت الله يسهل واجيب انشلع گلبي
ابو احلام، ،گولي ياالله كلهن كم شهر والله يسهل
ام احلام،،خايفه لاتطلع هم ابنيه وانه اريدلك وليد تفرح بي
ابو احلام، ،كلشي ولااسمع منج هلحجي هاي عود انتي الخيرة المتدينه هيج تحجين
بويه كله رزق من الله وكل اليجي من الله هله بي وليد ابنيه المهم اتمامة الخلقه
ام احلام، ،ونعم بالله
ابو احلام،،اگلج اخوي راح يجي يتغدة اهنا هو ومرته واولاده احسبي احسابهم
ام احلام، ،هله بي والاكل خير من الله يكفي وزايد
ابو احلام،،يمكن اجه رايح افتح الباب
ام احلام،،احلام يمه اخذي السفرة افرشيها انتي وزهره بالصاله
شويه ودخل ضياء واخو جلال هو ومرته واولادة يمشون وراه
جلال، ،اشلونج ام احلام اليوم انتعبج ويانه
ام احلام،،تعبك راحه خويه والبيت بيتكم شوكت متجون احطكم علئ راسي
جلال،،يسلم راسج بنت اصول ودومج معدله
ابو احلام،،استريح خويه وانتي ام رافد البيت بيتج اخذي راحتج
ام احلام،،واگفه بالمطبخ اصب الغدة ودخلت مرة جلال اعرف طبعها عينها فارغه كلش ودوم تشكي وتتبجبج ماعدنه وماعدنه رجلها عندة قطعة ارض حيل جبيرة ورث من عمي وابو احلام هم كذالك حصل مثلها بس ضياء باعها وفتح محل ذهب صغير وشويه شويه الرزق اتوسع وصار خير من الله بس جلال رافض يبيع گاعه يگول خوش وراد بيها وحاط بيها فلاليح عليش ابيعها
صبيت الغدة اني وسعاد مرة جلال ماصدكت اكمل الصب صرعتني بشكاويها وماصار كم يوم شلتلها زوج ابتوت وانطيتها وغير مصرف ضياء الهم
جلال عندة ثلث ولد ومرته رغم اني زينه وياها دوم اتسمعني كلام لان خلفتي بس بنات وهي بس ولد وكل ماتجي اتگلي خاف البطنج هم ابنيه الله يساعدج
گتلها البنات حمامات الدار وكل وحدة تجي يجي خيرها وياها واني لاخالقه ايد ولارجل المهم بناتي صاحيات وعدهن عافيه كلشي ماريد
والبطن التجيب الابنيه اتجيب الاوليد واملي ب الله جبير
كملنه صب وبناتي فدوة الهن مدن السفرة اولاد جلال وبناتي الكبار اثنينهن ينگلن بالمواعين
وفطومه وياهن هاي بنتي اخر العنگود عمرها 3سنوات
گعدنه ناكل كملنه وشلنه السفرة حطيت القوري ع النار سويتلهم جاي
صبيته ورحت يمهم سمعت حديث بين ضياء وجلال علئ بيع الارض وسلفه ومااعرف شنو
بطبعي هادئه مااحجي ولاادخل بعدين عود افهم من ضياء
وصدگ من راحو استفسرت من عندة گال جلال داخل بمشروع يجيب سيارات من الخارج ويريد يدين من المصرف واني الكفيل
سالته شگد المبلغ گال المبلغ ضخم ومو بس من المصرف ربعهن من المصرف ونص من عندي وربع من تاجر بالسوگ
گتله ضياءوالله لازمه گلبي خاف يصير شي وتوگع براسنه
ضياء،،شيصير يمعودة وبعدين جلال عارض الارض للبيع وقيمتها اتسد الدين وبس تنباع يرجع افلوسي وافلوس العالم
ام احلام،،مادام گتلي گلبي بعد مايرتاح منا لمن تخلص سالفة جلال
وفعلا بعد يومين اداين جلال الافلوس وضياء اخذ سلفه من صاحبه بنص المبلغ وگاله فترة وارجعه لان اشتريت بضاعه جديدة وماكو جوه ايدي افلوس
صارت سالفه جلال كلها دين بدين والكفيل ضياء
استلمو الفلوس جان مبلغ كلش صخم شاله ضياء وانطاء ل اخو
والمفروض اسبوع وتنباع الگاع وترجع افلوس العالم
انتهئ الاسبوع وصار وقت التسديد
جنت خاله فاطمه وامشطلها اندگ الباب راحت زهرة اتفتحه
اجه ضياء والوجه اصفر شاحب عبالك ذابين علئ وجها صم اتراب
گمت گوة وبگلبي خوفه سالته اشبيك وليش هيج وضعك
ضياء،،مصيبه مصيبه اوگعت علئ راسنه
ام احلام،،كعدت يم رجلي احس الطفل صار يضرب بقوة كتله احجيلي مو وگعت گلبي
ضياء،،وللج اخووي قشمرني اخوي ابن امي وابوي ضحك عليه اخذ الفلوس وانهزززم
ام احلام، ،ضربت علئ وجهي گتله هذاا الخفت منه
بقيت گاعدة ساعه اضرب علئ خدي وساعه اضرب علئ رجلي
شويه واندگت الباب والاجه واحد من الداينه يطالب بفلوسه لان جزة الموعد
ضياء ضل مثل المخبل يروح منا ويرجع منا ويصفگ ايد ب ايد مصدوم من ابن امه يستغله وياخذ الفلوس وينهزم
لليل كل شويه واحد جاي يريد افلوسه بس المصرف من البدايه اتفقو شهر ع التسديد
اباوع الضياء وجها اتغيرت اعلومه وصار گوة يجر النفس والعرفته جلال ماخذ عياله ومسافر صارله يومين بس المصيبه طلع بايع الارض من زمان وصارف افلوسها على مشاريع وهمية فاشلة بس ضياء ماجان عندة علم بسوالف اخو لان مخلصها دوم علئ باب الله
من سمع الارض مبيوعه وگع من طوله ركضت علي فتحت دگم دشداشته بناتي اتسودنن من البواجي لان انخبصت مااعرف شسوي
تالي فتحت باب الحوش وصحت بصوت واحد يبوووووو
بلحظه الجيران اجت تتراكض گعدت بالگاع الطم وجيرانه شالو ضياء للمستشفئ جارتي ام قاسم جابت عباتي خلتها علئ راسي
لحگناهم بغير سيارة وصلنه للمستشفئ ونزلو ضياء
نزلت واني لازمه بطني الطفل يرفس واني توني بالسابع وعلئ ساعه اجيب من القهر
دخلو للطوارئ شويه وانخبصت الاطباء فوگ راسه شگو دشداشته وصارو يسوله رجات كهربايه
رفعت عيوني لله سبحانه وتعالئ گتله يارب وحقك وحق اسمك وحملة عرشك هذا اخر طلب اطلبه بس انقذلي زلمتي وگومه بسلامه وبعد كلشي مااريد
الدكتور گال انضرب جلطتين براسه
احس الگاع افترت بيه اخذو الدكاترة لغرفه الانعاش
والضغط صاعد فول عندة
انطو ابر بالمغذي يحاولون ينزلون الضغط
ساعه كامله والدكاترة واگفين علئ راسه والاجهزة ترست جسمه
جنت گاعدة بالگاع لان مااگدر اوگف بس اعصابي كلها ترجف علئ ابو بيتي وشريك دربي
شويه وجان اشوف ضياء لزمته مثل حالة الصرع
طفرت من مكاني اتقربت منه الدكاترة بعدوني صرت مااشوفه كلش لان يحاولون يسعفو
باوعت وهنا جانت الصدمه من شفت وجها كله دم
عيونه مفتوحه بصورة مرعبه طالعه لگدام وتجري دم
واذاناته وخشمه كلهن يجرن دم
هي دقايق وسمعنه الجهاز يصفر الدكتور انطه وقت الوفاه لان سمعته گال انضرب الجلطه الرابعه وصار انفجار براسعه مسببتله ذوبان المخيخ
وگعت من طولي مااعرف بذيج الساعه شسويت وشلطمت وشصرخت بس كل الحسيته روحي راحت ويه ضياء وانهجم بيتنه
ضياء ماعندة غير اخو واحد وهو سبب مصيبتنه وامه وابو متوفين واني بس امي عايشه وگاعدة عد اخوي احنه اثنين اخوات اولد واحد اخوي طبعه صعب نحس بشكل لايحب ينطي ولاياخذ ولايريد واحد يجي ولايجينه لذالك من زمان التقي بي بس باالاعياد وامي عايشه بيناتنه ساعه يمي وساعه يمه وساعه يم اختي
جوارينه اتصلو بعمامه اجو حتئ يكملون اجرائات الدفن
ابتدت الفاتحه ابيتنه وجلال مابين واني وبناتي حالتنه حاله ماوگف ويانه غير جيرانه الله ينطيهم
لان عمامه من سمعو بسالفة الدين كلمن انهزم بروحه خاف يدفعون الدين همه
حتئ اخوي وحيدي اجه وگف بالفاتحه مثل الغريب حتئ ماسألني شمحتاجه مامحتاجه
جنت گاطعه الاكل وحالتي بالنزلان غير فاطمه اكثر وحدة ب اخواتها تعبتني هاي مدللة ابوها ومتعلمه مااتنام اذا موبحضنه ومن يجي تتلگاه يشيلها يحطها علئ متونه
جانت تخلص الليل تبجي تريد ابوها وكل محاولاتي وياها حتئ اقنعها تفشل عمرها صغير ماتفهم كلامي كلش ومن اگلها مسافر تبجي تريدة مايرهم عدها ماتشوفه
انتهت الفاتحه ولزمت عدة بقيت ابيتي لااطلع ولاامشي بس يوميه تجي جيرانه انطيها افلوس تتسوگ النه ومحل ضياء مقفول من يوم المات
اني مااعرف شي بشغله لا اعرف يطلب منو ولا منو اليطلبه
خلص شهر واجانه خبر من البنگ يردون القرض وماجان عندي حل غير لبست بوشيه وعبايه ورحت للمحل فتحته كلشي باقي علئ حطته
اجه رجال محله بصف محل ضياء عرض خدماته وبشنو يساعدني گتله خيي اني لازمه عدة وماعندي غير هلحل ولازم يتسدد قرض المصرف
گال انطيني السجل خل اشوف بلكت نجمع دين ضياء الله يرحمه لان اهواي يطلب عالم بلكت يوفون حتئ نسد قسم من المبلغ
وفعلا طلع اكو اهواي ناس مادافعه وارقامهم مسجله گعدت والرجال بدة يتصل عليهم من التليفون الارضي مال المحل بس قليلين كلش الگالو انسدد والاكثريه اتحججو ماعدهم
وفعلا يومين ونجمع مبلغ كلش قليل ورجع اجاني بلاغ من البنگ لان ضياء الكفيل اكيد من مالگو جلال اجو علئ ضياء
يومين وهم اتبوشت ورحت للمحل اخذت الفلوس والرجال گال اذامتوازيه اني اشتري قسم من الذهب العدج بالمحل
ماجان عندي غير هذا الحل لان خفت يحجزون بيتي وتالي ننشمر اني وبناتي بالشارع
بعت نص الذهب للصايغ الثاني وحطيت الفلوس فوگ افلوس الدين مال العالم وسددت القرض يله جريت نفس براحه
يومين واجه رجال حجيت وياه من وره الباب وكان تاجر ويطالب بفلوسه والعرفته هذا نفسه الاخذو منه بقية الفلوس
بقيت اسبوعين اماطل وياه يوميه اتحجج بشي والمحل مايشتغل حتئ ادفع فلوسه لان اني لازمه عدة مااگدر اوگف بمكان رجلي
وهذا التاجر ضل يلح تالي گال اشتكي عليج اذا ماتسدد ديني
بقيت حاطه ابنياتي بحضني وابجي علئ حياتنه الانگلبت بين يوم وليله جنت مدلله بجال ضياء مااهتم بشي لابدين ولابفلوس بس اكل وانام
وتالي صرت حال الضيم حالي
بسبب ملحته اضطريت ابيع كل الموجود بالمحل وسددته بقه عندي ربع المبلغ والمحل
وجان لازم اسدد بيهن اخر واحد من الديانه بس الفلوس ماكفت اضطريت ابيعله المحل
ومنا وابتدت معاناتي من صفيت لاشغل ولاعمل ولازلمه ولااي شي
وصرت اني المعيله العائلتي والمسؤؤله عن ثلاث بنات وحامل بالطفل الرابع الي مااعرف ولد لو بنت لحد الان
مر علئ وفاة ضياء ثلاث شهور دخلت بشهري والزلال صعد عندي فد مرة صرت مثل النفاخه جسمي كله وارم ورجليه تكرمون حتئ النعال مايصير بيهن من گد الورم تعبت حيييل لازلمه ولااخ ولااب اليدگ بابي ويسالني شبيج مابيج شمحتاجه مامحتاجه
شويه شويه الناس الاطلبهم اجو فكو الدين بس جان الطلب شي بسيط دوب يكفينه مصرف
جلال مابين ابد وانگطعت اخبارة هجم بيت اخو وانهزم
جارتي ام قاسم دوم تساعدني المرة احسها اختي الماجابتها امي
دوم تجي تسأل عن احوالي وتساعدني بتنظيف البيت والطبخ لان تعرف وضعي واحبالتي صعبه
احلام بنتي بصف سادس ابتدائي والسنه بكلوريا لازم تشد حيلها وتنجح
لذالك مااصخرها اهواي
زهرة بصف رابع وهم شاطرة بس مستواها اتراجع من مات ابوها
وفطومه اخر العنگود عمرها 3سنوات
وهاي شيبت گلبي قبل راسي متعلقه ب ابوها كلش
جنت گاعدة المغرب بالمطبخ اقلم بانيه للعشه
دخلت فطومه تركض وتبجي وتصيح
بابااا باااباا
طفرت من گعدتي جريتها من ايدها غسلتلها وجها
اريد افتهم شبيها وعليمن تبجي
حجت بصوت گوة فهمته گالت
فاطمه،،ب بابا ب بابا اجه يمشي ب الشارع
اجه با باسني و وراح
ام احلام،،احس ردت اوگع حطيتها بحضني
وابجي علئ بجيها
دخلت ام قاسم شافتنه
ام قاسم،،،يمه اسم الله الرحمان ولج خيتي اشبييج
ام احلام،،الحگيني ام قاسم فاطمه جانت واگفه بالباب واجت تركض اتگول اجه بابا وباسني
ام قاسم،،عمت عيني اي والله الله يصبرها طفله متعلمه علئ ابوها الله لاينطي الجان السبب
جيبيها اقرة علئ راسها بلكي اتنام
الطفل يشوف كلشي ويمكن لان مشتاقتله الله دزة الها
ام احلام،،اخذتها المرة حطتها علئ رجلها وتقرالها ايات تالي نامت بنيتي وهي تناشغ
جبتلها مخدة وبطانيه نيمتها وغطيتها يمي خاف تفز وترجع تبجي
ردت اگوم فجأة حسيت بطني نزلت والطفل عبالك يريد يطلع
لزمت بطني والالم ذبحني
گتلها ااام قاسم دخييلج راااح اجيببب
ام قاسم،،اهدي بعد اختج لاتخافين بس خل اروح اصيح ابو قاسم واجيب افلوس واجي ركض
ام احلام،،راحت ام قاسم دقايق واجت المرة واجواريبها بيدها لازمتهن مالحگت تلبسهن
رجلها صف السيارة بالباب
اجت اختها مسيرة يمها جانت خلتها يم بناتي بلكت الله يسهلي وارجع من وكت
اكو قابله مرة جبيرة هي الجيبتني بناتي كلهن
اخذوني الها
دخلتني نيمتني واني الطلگات صارن يجن وحدة ورة الثانيه وام قاسم يمي ماعافتني
بگلبي ادعي الله يطلعني طيبه اني والابطني
مو الخاطري بس الخاطر اليتيمات العندي لان اذا متت يصفن بالشارع محد الهن لاعدهن عم بي حض ولاعدهن خال يلمهن
نص ساعه من المعاناة والم الطلوگ حسيت براحه من سمعت صوت الطفل يبجي
ام قاسم،،اللهم صل علئ محمد وال محمد
الحمدالله علئ سلامتج ام حلومه
ام احلام،،جنت نايمه والطفل عد ام شهاب القابله لازمته فضح الدنيه بالبواجي
ام شهاب،،بالخير عليج ام احلام اجاج ولد يتربه بعزج
ام احلام،،من الفرحه عبالك گالتلي ضياء بعدة عايش
ردت انهض نسيت كل الالم
حطته علئ صدري وهو يلگع من البجي مامصدگه صار عندي سند بالدنيه يحميني ويحمي اخواته
ام شهاب،،خلصها علينه بجي فضحتنه ولك
انطينه مجال انگمطك ونلبسك
ام احلام،،اخذته القابله تلبسه واني اجتني ام قاسم نزعتني دشداشتي لان كلها دم لبستني ملابس نضيفه
گومتني حتئ ارتاح علئ غير سديه
گالت ام اشهاب
ام شهاب، ،شراح تسمي الهذا الوكح والله لوتسمي الوكح احسن اريد اگمطه مايخليني ماينطي ادي حتئ الفه جسمه يرعش من العصبيه من هسه مبين دمه حار
ام احلام،،وهو هذا الاريدة لذالك راح اسمي راهب
حتئ بس اسمه يرهب عدوانه وينتقم من الي ظلم امه واخواته
يتتتتتتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!