رواية راهب ابو غضب الفصل الثاني 2 - بقلم Zahra_Alhussnawy

هو الشيء الوحيد الذي لم يكن من اختياري

ولكنني امنت به وأمنت بأن الحب لعنة

وامنت بأن لعنة الحب قد اصابتني

وامنت بانه قدري

كنت وقتها ساذجه في فهمي للحب وللحياة وللناس

للأسف لم يكن محبوبي سوئ شبه انسان استباح قلبي وسرق مني شبابي وحبي للحياة

سلب مني كل شي حتئ قلبي سلبه وسيطر عليه

لم يعد بمقدوري فعل شي انه لعنتي الابدية

،،،،،،،،،،،،،،،،،،،
قصة راهب ابو غضب

للكاتبه زهراء الحسناوي

،،،،،،،،،،،،،،،،،،،،،،،

،،،،،،،،،،،،،،،،،،،،،،،

ام احلام،،بقيت اربع ساعات يم القابله بين ماارتاحيت والطفل بس يبجي بالبدايه خفت لان مايقبل يسكت بس ام شهاب گالت البجي يفيد الطفل حديث الولادة لان يفتح الشرايين المسدودة عندة وينظم الدم بالجسم

لذالك تركته يبجي ماخفت بعد

رجعنه ابو قاسم للبيت والمرة هم ابتلت بيه وهي عمر ابنها قاسم سنه عافته يم اختها العفناها يم بناتي

رجعنه للبيت الطفل جوة عباتها مخليته واني امشي علئ كيف لازمه بطني والكانونه بيدي

دخلت والتمن عليه بناتي مثل الحمامات هاي التبوسني وهاي التاخذ عباتي
وفطومه توها گاعدة مبينه من عيونها بس صافنه ماتعرف شكو

احلام فرشتلي بالگاع اتمددت وام قاسم راحت جابتلي سله احط بيها الطفل خاصه للاطفال

طبگت البطانيه وحطتها بالسله مثل الدوشگ
خلت عليها ملحف الطفل والمخدة نيمته ودثرته بالبطانيه
گالت خلنه دافي لان طفل انفاس يريد دفو مثل ماجان ابطن امه

خليت المخدة سندتها علئ الحايط وانتجيت عليها طلعت صدري رضعته

سبحان الله بعدة عمرة ساعات بس ملامحه حادة
گصته مطرگه
باوعتله ونزلت دمعه من عيني
گتله اجيت للدنيه حاد اسنونك علئ الي اخذو حگ ابوك وضيعو تعبه

مااتحملت صرت امسح دمعه تنزل الثانيه

مرة السنين وراهب كبر صار عمرة 15سنه بس اتحسه عمرة 100بسبب عقله

صار هو ابو بيتي والعايل عائلته
كلساع ادزة بمكان ساعه جيب مسواگ ساعه صمون ساعه ودي هاي وجيب ذيج وهو مايحجي رغم دراسته وهو هم السنه بكلوريا صف ثالث متوسط

بناتي كبرن احلام عمرها 22 تركت المدرسه من جانت ب الثالث متوسط لان ماتحب الدراسه اجوها خطابه عن طريق ام قاسم وصارت القسمه اتزوجت بالبصرة

وزهرة رسبت سنتين بالسادس اعدادي وتالي بطلت
وهم اجواها خطابه حما احلام يعني انطيتهن اثنينهن للاخوة عايشات ابيت واحد

بقت بس فطومه من جان عمرها 18سنه نجحت للسادس وبطلت ماقبلت اتكمل لان المصرف والعيشه صارت كلش صعبه يادوب انوفر لگمة الخبز

اني اتعلمت الخياطه وعلمت فاطمه هم حتئ تساعدني

بس رغم هلشي الوارد قليل مايكفي وراهب طالب مااريد ابخل علي بشي مااريدة يباوع للطلاب الوياه ويحس بالنقص

لذالك صرت اخبز للناس بدون علمه

وهو عمت عيني ماقبل يبقئ گاعد راح الخاله وطلب منه يشتغل بمحل مالته مال غسل السيارات حتئ يساعدني بالمصرف
ماقبلت دگيت ولطمت بس هو دوم يسوي البراسه مايسمع مني وراح اشتغل ويه خاله
اخوي واعرفه طبعه قاسي

جان يرجع راهب وجها احمر دم اريد اعرف السبب بس مايحجي
عرفت اخوي ياذي وحاولت افهم منه السالفه بس جان ساكت

ومستمر بالشغل وياه من يرجع من المدرسه يروح للمحل

يجيني نگعان ماي بعز الشته والجو بارد احس ابني كبر قبل اوانه وصار زلمه يعتمد علي رغم صغر عمرة

المواقف والحياة والظروف كفيله تقسي گلب ابنادم واني ابني انجمعن علي كلهن وخلنه من زغرة يتجرع الحقد والقسوة

گعدنه من غبشه لان اليوم عيد والوادم هذا اليعزم اهله وذاك اليعزم ناسه

ف يجيولي العجين اني اخبزة وفاطمه تساعدني
جنه نركض ركض حتئ مايشوفنه راهب ويحس بينه

امنت مايرجع هسه لان بالمحل
كملت خبز معجانتين وبقن اثنين
لميت الخبز وخليت فطومه تشنگ المعجانه الثانيه

اندگ الباب واجو اصحاب العجين اخذو خبزاتهم انطوني افلوسهن بستهن وخليتهن علئ راسي لان عايشين عيشه حلال حتئ لوجانت بتعب بس خبزتنه حلال

كملنه البقيه واجو اصحابهن خذوهن للمغرب رجع راهب
وهم وجها احمر وعيونه دم مبين باجي بس مايحجي ولايشكي

ومن اساله يگول كلشي ماكو

مرة الايام واني اخبز بالسر للعالم بدون علم ابني خوفا من عصبيته لان مايتفاهم واكيد راح يفشلني گدام العالم ويطردهم وساعتها بشنو نعيش ?

ضفت القائمه اعمالي غير الخياطه والخبز صرت ابيع روبه اشتري حليب واخثرة وابيع طوس للعالم

وفطومه تشتغل وياي بحلگ مسدود وخلگ طويل
ماتشكي ابد تساعدني وهي ساكته

بنيتي انحرمت اتعيش حالها حال البنات فتحت عيونها ع القهر والتعب
هي شاطرة بس بطلت لان سادس يرادله افلوس وصرف للملازم والكتب وصارت تسمع كلام من البنات لان ملابسها مال سنتين ترجع عليهن ماعندي اشتريلها

راهب يشتغل بس ماهامل دروسه وشاطر احسه عندة هدف ودوم يگلي يمه بس اكبر واتخرج واتعين راح اعوض تعبج وياي واخليج ملكه والخدم تخدمج

مرات اضحك علئ احلام ابني البعيدة الي احسها صعب تتحقق

گعدت الصبح من وكت اليوم جمعه گعدت راهب وفطومه حتئ يتريگون
سويت طماطه وخدرت الجاي حطيته بالصينيه اجو يتكافشون ولاجنهم توهم گاعدين واحد يدمغ الثاني
راهب نافخ روحه علئ اخواته محسسهم من تصرفاته هو الجبير ولاجنه ازغر منهن كلهن

سمعنه الباب يدگ

راهب، ،گايم افتح اكيد هذا قاسم

ام احلام،،كومي يمه سوي جاي لخوج وصديقه
خل يكعدون يقرون كلمتين الاسبوع الجاي امتحاناتهم بلكت الله ينجح ويفرح گلبي

قاسم اكبر من راهب بسنه بس قاسم عاد السنه بالثالث وابني لحگ بي
همه اصدقاء من الصغر مايتفارگون ابد دومهم كعدتهم ومشيتهم سوة حتئ من واحد منهم يسوي مصيبه الثاني يشيل التهمه ويگول اني
افرح من اشوف صداقتهم احسهم اخوة وراهب مووحيد عنده اخو واحزام ظهر مثل قاسم

بهذا الاسبوع ماخليته يروح للشغل ويه خاله لان اريدة يقرة
وفعلا ذب روحه ع الدراسه سادة علي باب الاستقبال هو وقاسم واثنينهم يقرون بس قاسم مستهان بالوضع مو مثل راهب شاد حيله

اجت الامتحانات ولزمت گلبي وكل مايرجع اسأله شنو الاسأله واشلون جان جوابك

ماصدگت تخلص الامتحانات اله واني ريگي ناشف من القلق

واول يوم العطله اتصل عدنان اخوي وگال اذا يبقئ بعد يوم بدون مايجي للمحل اعتبري مطرود

وفعلا خطيه اوليدي لبس وراح للشغل وهم كالعادة يجيني وجها احمر ومن اساله ينتر ايدي ويشتم خاله

گلت والله اله اروح واشوف شنو الوضع شو گلبي يلعب ابني الشهر الفات شمحلاته شو بس رجع للمحل اتغير وضعه

وصدگ ثاني يوم لبست عباتي ورحت للمحل من بعيد شفت هوسه وصايح وناس ملتمه انخمش گلبي
تمنيت اطير واوصل يمهم احس المسافه صارت شطولها ولاجنها خطوتين

لمن وصلت يمهم وجان اشوف وحيدي خشمه يجري دم واخوي راسه مفشوخ وحاط خاولي يسد النزيف والوادم ملتمه لازمته وهو يهد يريد يضرب راهب بيدة اسبانه يريد يفشخه بيها وراهب بيدة بوري حديد

ركضت واني شايطه من شافني ابني اتسعت عيونه نتر الزلمه الازمه واجه يمي

راهب،،شعندججج جايه بنص الزللم?

ام احلام،،ولك يممه سودة بوجهيي عزاا العزااني منوو طگااك وخالك منو طاگههه ?

راهب،،يمممه رحمه لبوي ردي للحوش جاي وياج وافهمج

ام احلام،،ولك وليدي ارفع راسك خشمك يجري دم خل اغسللك

راهب،،رفعت تيشيرتي مسحت الدم غسلت وخشمي ماينسد النزف مالته

خالي وگف راد يرجع يضربني بس العمال لزمو

عدنان،،اااخذي ابنج العااار بعد ماله شغل يمميي لو اعرفف تاكلوون احجاررر هم مااشغله بعد

راهب،،الله لايعوزني الشغلك ترة خااف عبالك ساكتلك كل ذيج الفترة وانته مخليني مصگعه الك ترة سكوتي لان انته خالي ومحترمك الخاطر امي وبس لهنا وكافي اتعديت بما فيه الكفايه واتجاوزت واني ماامجاوز عليك ومرة الثانيه اذا مديت ايدك اكسرها واعلكها الك برگبتك

ام احلام،،لازمته وهو يهد وينفلت مدرعم يريد يرجع يضرب خاله ماقبلت علئ تصرفه مهما يكون يبقئ اخوي مالازم ابني يسوي بي هيج

رجعنه للبيت واني الوب وابني وجها وارم وخشمه ماسكت

سحبته من ايدة گتله بس خل اشوفك للممرض البصيدليه

وفعلا لمن شافه گال عندة كسر بسيط بعظمة الخشم ولازم ينكوي حتئ يبطل النزف

بقيت الطم واتعذرت من الرجال لان ماشايله افلوس گتله العصر اجيبهن الك والرجال ماحجه گال فدوتج الفلوس خاله شنو قدرهن وتحجين بيهن

الحمدالله الدنيه بعد بيها ناس طييه توگف الك بوكت الضيج

دخلنه للبيت جبتله دوشك گوة قبل يتمدد احسه اعصابه نار يريد يتعارك ابني وكح من زغرة اعرفه من يتعصب مايشوف كدامه

جبت وصله وماي وكعدت امسح بوجها

راهب،،يمه عوفيني رحمه الدينج مابيه شي

ام احلام،،احجيلي وليدي احلفك بالزهرة ام الحسن تحجيلي شنو صار ريح گلبي

راهب،،يمه اله اگلج اخوج كل ذيج الفترة كل مايشوفني يضربني علابي احس عيوني تطلع من ضربته لو يفشلني وايصيح ابن الفگر
لو كل شويه يسمعني حجايه

تالي اليوم اتهمني بايگ فلوس من الدخل وهو ناسي ماخذهن دافع بيهن فاتورة الكهرباء
فوگ مالازم يعتذر اجه يصيح ويهد
گتله انته هم محسوب ع الخوال
شو هذا اجه وانطاني لطمه علئ خشمي
واني من حلاة روحي مالگيت نفسي غير جريت البوري وفشخته براسه خليت دمه بطوله

ام احلام،،سود الله وجهي يمه صخام الصخمني كل هذا يصير بيك وانه مااددررري ومن اسالك اتگول كلشي ماكووو
منين اتلگاهاا ومنييين ربيييييي

لابشر يرحم بحاالي ولااخوو يرحم بحاالي
شمسويه عندك وهيج معاقبني رببببي

لالبست مثل النسوان ولافرحت مثلهن ولااتغاويت ولا اتكبرت ولابگت ولازنيت جاااا ليش هيج غاضب عليه يااالله

بقيت گاعدة وابجي وفاطمه تبجي وياي
اوليدي وجها وارم ثاني يوم اخذته للدكتور بالمستشفئ لان ماعندي افلوس اخذئ دكتور ع الخاص

الدكتور من شاف وضعي قرر يكوله بالمستشفئ
ردت ادخل ماخلاني ادري يخاف اتخربط من اشوفه

نص ساعه وطلع دايخ لزمته وهو گوة يمشي
رجعنه للبيت لگيت احلام وزهرة جايات
طبعا احلام صار عدها ولد وابنيه عمر ابنها ضرغام اربع سنوات وبتها اسمها ريحانة عمرها سنتين
بس زهرة بعدها ماصار عدها صارلها سنتين من اتزوجت وجاي اتراجع علئ طفل

اتلگاني ضرغام بيبي مابيبي شلته ابوس بي افرح من اشوف بناتي يلتمن ابيت ابوهن

هنه هم تعبن وشبعن قهر وضيم ومن العوز اختارن يتزوجن باارادتهن شگد حاولت بس جانن مقتنعات والحمدالله قسمتهن طلعت خوش قسمه يم ناس خوش ناس ويخافون الله

احلام،،وعلي كون هسه اروح الهذا اخوج الي اسمه خالي اله انيمه ب الانعاش عود خالي خلاله اتنام ابراسه كون

ام احلام،،عيب ماما مايصير تحجين هيج گدامي علئ اخوي

احلام،،خوه الخوته كون وبعدج اتسمي اخوي المفروض تتبرين منه وتگطعين علاقتج بي
عود خالنه
همزين ماجدينه منه ولاعيشتنه عندة شو راهب يشتغل بتعبه ماطالب من عندة حتئ يمن علينه

زهرة،،هو خالج من گاعه بخيل يموت ع الفلس ونحس مايحب غير نفسه

فاطمه،،ماما ليش هيج يكرهنه??

احلام،،قبل بوقت النظام اجه ل ابوج وگاله اكو بستان اريد اشتري واريدك تساعدني ادفع افلوسه
ابوج قبل بس گاله ادخل شريك وياك ولازم اروح اشوف البستان وين موقعه وشنو وضعه
عدنان اتخبل ع البستان وماعندة المبلغ كامل حتئ يشتري كان لازم يدخل وياه شريك

وفعلا راح يشوفه واتفاجئ من سمع واحد من الناس گال جوه البستان اكو مقبرة جماعيه والكل يعرف بهذا الشي لذالك محد يشتري شعندك اجيت لهنا ترة منحوس لليشتري

وابوج ماصدگ الرجال راد يشوف بعينه راح جاب حفارة وحفر وفعلا طلع اكو عظام وناس مدفونه بملابسهم

قبل جانت الوادم اتخاف تحجي لذالك ابوج سحب ايدة وبطل وخالج اتخبل اشلون يبطل ومايشاركه وهو من البدايه طلب من ابوج يداينه نص المبلغ والنص الثاني ابوج يدخل بي شريك

وخالج جانت فكرته يزيح النخل والشجر ويبني بمكانهن محلات ومن يومها وهو حاقد

احلام،،اهنا مربط الفرس واگول هذا الزلمه ليش هيج حاقد

راهب،،والله شفيت گلبي بي بس لو مالازميني جان دخلته قسم الكسور والله لخليهم يجبرونه من ساسه الراسه

احلام،،يمه دخيلك اذا دخلت للسجن مافكرت شيصير بيه ابوس ايدك اوليدي استر علينه ماعدنه زلمه غيرك

بعد فترة طلعت النتائج وراهب ناجح بمعدل كلش زين رفع راسي گدام الكل وثبتلي ماراح تعبي بالخالي بلاش حتئ قاسم نجح بس معدله خمسينات المهم نجح وخلص من الثالث

مرة الايام والسنين وصار عمر راهب 18سنه
وهاي السنه هو سادس شگد حاول حتئ اقبل يشتغل بعد الدوام بس ماقبلت اني ماصدگ ينجح ويطلع من السادس وهو يدور شغل

صح العيشه صارت اصعب وفاطمه رغم الخطابه كثرة عليها لان ياهي التجي تخبز وتشوفها تتعجب بشكلها وهدوئها بس هي رافضه ماتقبل

اعرف شنو سبب رفضها لان ماتريد اتعوفني اخبز للناس وحدي واخيط واتعب

گعدنه الصبح مثل كل يوم راهب رايح للدوام
واني وبنيتي وحدة تخبز والثانيه تخيط
اني عيوني تعبت من الخياطه صار نظري موكلش صاحي
وفاطمه اديها مگسبه من الخبز وحرارة التنور

من تخلص وجها ينطعن احمر
اني متفقه ويه الجيران بوقت المدرسه الصبح يجيبون العجين والعصر اعتذر منهم

صارت الساعه ب 1وابني ماجاي من المدرسه

وجزت الساعه وصارت ب3وهو بعدة ماجاي
لزمت گلبي وافتر منا وارجع منا وام قاسم وياي لان ابنها هم بعد مارجع

للساعه اربعه دخل وشكله مخربط وملابسه مطگعه ماي
سالته بخوف ولللك يمه وگعت گلبي وين جنت لا انته ولاقاسم رحت سالت امه وكالت بعدة مااجه
وين جنت انته ويااه

راهب،،علئ كيفج يمه انطيني مجال اخذ نفس

ام حلام، ،شوف البطران اني دمي فاير وهو يريد يرتاح

مد ايده للمحفظة طلع منها افلوس بس مبينات اهواي انخمش گلبي لان مااريد ياكل حرام وذني مبينات اهواي افلوس مومال واحد يشتغل عامل وينطو هيج مبلغ

لطمت علئ وجهي گتله ولللك منين جبتهن بايگهن موووة

راهب،،مامقبوله منج يم راهب انتي ماعلمتيني امد ايدي ع الحرام ولتخافين ذني حلال جبتهن بتعبي

ام احلام،،ااحجي منين جبتهن لاااشگ ثووبي هسسه

راهب،،راح احجيلج بس اسكتي فصحتينه
من رجعت من الدوام سمعت اكو حملة تنظيف للشطوط عن الشنبلان(نوع من انواع الطحالب يطفو فوق الماء)

قليلين المثل حالتي محتاجين افلوس والمبلغ الانعرض مغري ماگدرت ارفض
لذالك نزلت نظفت وياهم الشط وانطوني القاسمه الله

ام احلام،،صرت الطم علئ وجهي بالزايد
اللله ياخذني اللله يخلصني ويريحني من هلعيشه
واللك يمه ااانته هلوحيد الي لوووغرگان ومييت وين انطي وجهي انيييي
اذا رحت مرة ثانيه الله شاهد اعوفلكم البيت واهج

راهب،،كاافي يممه الخاطر ربج ترة صرت زلمه وبعدج اتخافين عليه عبالج زعطوط گدامج
ترة كبرت وصرت شاب وكلشي بنفسي

وفوگ كلشي طالب اريد القلم واريد الكتاب والملزمه وانتي مگضيه ليلج ونهارج گدام المكينه
كافي عوفيني اني اعتمد علئ نفسي واطلع مصرفي

وخلي شغله ابالج محد يموت ناقص عمر كل واحد يموت بيومه اكو ورقه النه عند اله من تخلص ورقتي وتيبس ذيج الساعه اموت ويكون هذا الكاتبه الله

ام احلام،،اعرفه راسه يابس مايسمع كلامي
امنته يم رب العالمين يحفظة بروحته وجيته لان ماعندي غيرة بعد الله سبحانه وتعالئ

الصبح هو راح للدوام واني اخذت العجين بمكان فاطمه اساعدها
كملت خبز اندگ الباب عبالي جيرانه اجو ياخذون خبزهم بس اتفاجئت من شفته راهب

بقيت امتمت مااعرف شحجي لان صار اسنين اخبز بدون علمه ادري مايقبل وادري اذا عرف راح يستصغر نفسه لان امه واخته عايشات برحمة العالم من الخبز والروبه

راهب،،شبيج يمه صافنه خلينه افوت ليش سادة الدرب?

ام احلام،،هاا لا مو سادة الدرب بس ليش رجعت من وكت?

راهب،، الكهرباء ضاربه فيوز واخر ثلاث دروس مادخلنه الاساتذة وطلعونه

بس شنو هذا الخبز المن خابزة هلگد عبالك عندج عزيمه

ام احلام،،ها ااا م مو احنه نخبز كل اسبوع نجمدة بالمجمدة

مااعرف اشلون جذبت هلجذبه گدامه

راهب،،شنو السالفه يمه ومتعبه نفسج هو احنه ثلاث نفرات لو كل يومين تخبزين عشر اگرص هم اهواي وزايدات بدل هذا تعبج

ام احلام،،ااي يمه انشاءالله

بقيت گاعدة علئ اعصابي وادعي الله كون اليوم محد تجي تخبز ولاوحدة تريد روبه

راهب سبح ولبس اتراك وراح البيت قاسم

نص ساعه واندفر الباب ودخل ابني فاقد اعصابه والوجه مطعون احمر

راهب،،اننتي ام احلام الخبازة موووو?

يتتتتتتبع