رواية راهب ابو غضب الفصل الخامس وخمسون 55 - بقلم Zahra_Alhussnawy

يگشاية بالراگ وچلبت بيك
يطين الجنه مدري شردت احاچيك
يراي المستحي وسالوفة اعيون
اندهلي بعد خل التفت ليك
يسنبل وانحصد بيدين فلاح
ماودة يبيعك وده يشريك
يلون الماي واصفئ،،ويخبط الماي
ماتخبط واعرفك ضايج اشبيك
اذا خلگك يضيگ شويه مرات
دصيح وشوف وجهي اشلون مااجيك
يدين المستحه بملوحة الهور
شايف طينتي شتريد اراويك
يروحي وكلشي بيه وكلشي مابيك
قارنتك بروحي وماساويك
يالحاسب احساب الشوفتك عود
اشبگنك واشمك من الاگيك
،،،،،،،،،

راهب ابو غضب ج2

////////بقلم زهراء الحسناوي////

،،،،،،

لارا،،ضيگ عيونه وسالني

همام،،م موافقه علئ شنو?

لارا،،ادري عرف قصدي بس يريد يتاكد
احس الكلام وگف بحنجرتي وصار اصعب
گتله بصوت متلعثم

ع علئ طلبك

بمجرد ماسمع كلامي لمعت عيونه ونهض من مكانه الفرحه ماسايعته
مسح وجها بثنين ادي ورفعهن رجع شعرة لورة

رجع كعد يمي مامصدگ ومبين من فرحته ضاع الكلام منه ومايعرف شنو يتصرف
عكسي تماما بمجرد مانطقت الكلمه اتملكني الشعور بالندم حسيت نفسي اتسرعت
بس خلص لازم اخطي خطوة لكدام
خطوة تغير من حياتي

همام،،لاراا احبج احبج  والله مامصدگ اتمنئ ارگص من فرحتي

لارا،،فقد يحجي بصوت عالي بدون وعي اتقربت منه سديت حلكه قبل لايفضحنه

بقه صافن بوجهي واني حسيت بروحي ابتعدت وهو ابتسم

كور ايدة وضرب صدرة مرتين يمكن هاي حركته المعتادة من يشوفني

همام،،الصبر ياربي
لارا الاسبوع الجاي يجوكم اهلي
ماضل شي للتخرج هسه خطوبه وعقد سيد وبعدين المحكمه والعرس

لارا،،همام  لتستعجل ترة حتئ اهلي ماعدهم علم
بس
سكتت ماگدرت اكمل

همام،،بس شنو?

لارا،،اهلك

همام،،اشبيهم اهلي

لارا،،متاكد موافقين?

همام،،لارا خلينه بفرحتنه لتحجين هيج مصيرهم يوافقون لان لو انتي لو ماكو زواج طول العمر والله لخليهم يملون مني ويزوجوج الي غصب عنهم

لارا،،اتصنعت الابتسامه وهو احتار شيسوي
صار وقت المحاضرة وهو گاعد الفرحه ماسايعته

تركته وتوجهت للقاعه العبرة خانگتني
بعدنه بالبدايه وحسيت نفسي وگعت روحي بمصيبه ثانيه بسبب استعجالي
ااخ ياراهب دمرتني خليتني اتصرف بدون وعي
بس غصب علئ گلبي اتمرد علي واعاندة يختار غيرك حتئ ينساك

ابتدت المحاضرة وانتهت واني بوادي ثاني هايمه
مااعرف الشي السويته صح لوغلط وشنو الراح يصير
استعجلت صلحت الغلط بغلط اكبر منة

مر اسبوع وتعبت نفسيتي الابعد الحدود معاندة روحي مااريد اتصل واسأال عنه
محمد جابلي خط جديد مارجعت من الارقام القديمه غير رقم سارة وسوالي صفحة جديدة غير ذيج لان حاضرة راهب منها

بليل مالگيت نفسي غير اتصلت بيها اسأل عن اخبارة
لان هذا حدي مااگدر مااسأل

ارتاحيت من گالت حالته الصحيه اتحسنت ورجله خف الورم بيها
من فرحتي وگعن دموعي ويه ضحكتي

شي بداخلي ارتاح وخف تانيب الضمير
نهيت المكالمه وياها
اتمددت وكالعادة ادخل علئ حسابه احجي ويه صورته
لگيته ناشر مقطع اغنيه قبل ساعه
وكاتب جواها بيت شعر

ولك ردناك بس النه
شكثر جينه وترجعنه
شكثر دگينه بالبيبان
لسه ولون بيبانك بااصابعنه

اقرة وانقهر كعدت ضربت علئ راسي مرتين
كاافي ماناوي تشيله من تفكيررك كاافي شليتني انته وگلبي ماناووين تنسون وتريحوني
اشلوون انسااه وعقلي يحثني ادخل لحسابه حتئ اشوف صورته وارتاح
اشلون انساه وگلبي يكلي تحبي وتضحكين علئ نفسج بالنسيان

لزمت رگبتي مختنگه دخييلك ربي
الف مرة اترجيتك تشيله من بالي
لعد ليش ماجاي انساا واكرهاا ليش?
يوميه اكتشف حبه بگلبي يززيد ماينقص
بس كرامتي كلشي ولاكرامتي هانها وداسها بدون رحمه لو اعرف اشلع گلبي واشمرة ولاارجعله واذل روحي

ثاني يوم داومت ومبين عليه التعب احسها اطول سنه بعمري خلصتها تعب وقهر حتئ اكثر من السنه الفاتت ويه راهب

ماصدگت تنتهي المحاضرات وارجع للبيت
طلعت من الجامعه رجعت للبيت تايها
هوسه داخل عقلي افكاري مخربطه مااعرف تصرفي صح لوغلط واستعجلت اتخذت قراري بسرعه

العصر جنت كلش مترددة منين ابدي وشحجي
امي تلف دولمه ومحمد عينه بموبايله
جليت صوتي گتلها ماما
عندي موضوع اريد احجي وياكم

محمد ترك موبايله عدل گعدته منتضر يسمع كلامي وامي   وهي تلف گالت شكو?

حجيتلهم موضوع همام انو اتقدملي
محمد ماحجه وامي گالت

سعاد،،لازم نسأل عليهم خو موانطيج ويطلع هلمرة ثارة اقوة يمكن يذبحنه

لارا،،ابتسمت بااستهزاء امي بعد فوات الاوان تريد تسأل من اتقدملي راهب ماقبلت واحد من اخواني يسأل عنه كل همها جان المنصب والفلوس
هسه صارت حريصه بعد ماضيعتني بسبب طمعها

محمد،،انتظري يمه

لارا،،التفتلي وكمل كلامه

محمد،،مو استعجلتي بقرارج ?

لارا،،دنگت ماعندي جواب

محمد،،لارا انتي حاليا مطلقه وماصارلج سنه من اطلگتي
وحالتج الصحيه تعبانه يعني انتي تشوفين هلشي مناسب الوضعج ?

لارا،،اكتفيت بالسكوت بس هزيت راسي بالموافقه

محمد،،هذا هو بعد اخوج اذا انتي تشوفين قرارج مناسب ومستعدة تخطين هيج خطوة اني وياج مااتركج دام انتي اتگولين عنه خوش زلمه ومؤدب
بس لازم اروح اسأل عنه اول شي
ماانريد نوگع بنفس الغلط مرتين

لارا،،وفعلا ثاني يوم محمد من غبشه راح للعمارة
بعد مااخذ المعلومات مني عن اهل همام اتصلت بي. وانطاني عنوان اهله واسم عشيرته وبيا مكان حتئ يسهل علئ محمد يندل مكانهم

اني رحت للجامعه گبل رحت للقاعه مالي خلگ حتئ النفسي
انتهت المحاضرة وطلعت للحديقه شويه واجه همام من شافني ابتسم
اجه گعد يمي جنت حيل مرتبكه وهو فرحان لان عندة علم محمد راحلهم للعمارة

جلئ صوته وحجه

همام،،لارا قبل كلشي عندي موضوع وياج
وانتي اول وحدة تعرفين واتمنئ يبقئ سر بيناتنه لان لوماعندي ثقه بيج جان ماامنتج علئ هذا السر

لارا،،ماادي ليش خفت بس كلامه صدمني

همام،،اني موطالب اهنا مثل ماتتوقعين

لاا،،هزيت راسي مافاهمه شي من كلامه
گتله لعد شنو انته?

همام،،اني الضابط همام علي بالاستخبارات

لارا،،فتحت حلگي مصدمه

همام،،ادري متفاجئه بس ماحبيت يكون بيناتنه اسرار ردت نبتدي كلشي بصفحه بيضه
والشغلة المهمة انو لازم مااكشف سري حتى لاقرب شخص الي بس انتي تختلفين اريد اكون كدامج كتاب مفتوح دائما لان متأكد راح تحفظين السر

لارا،،سالته باارتباك اشلون ضابط ?

همام،،صار سنه توصلنه اخبار بوجود ممنوعات مثل حب كبسله ومخدرات يداولوها كم طالب يبيعوها ع الشباب
دزينه ضابط وخلينا بالكليه حتئ يكتشف منو همه ذوله الشباب ومع منو يتعاملون حتئ نكدر نقبض علئ التاجر الي يزودهم بالممنوعات
بس للاسف الضابط فشل بالمهمه انتهت السنه وهو مايعرف غير بس الشباب الي ياخذون من هاي الحبوب
واحنه نريدة يعرف ويكتشف راس الافعئ مالتهم حتئ يسهل علينه عمليه القبض علي
من شافو فشل دزوني حتئ نتساعد اني وهو بالقبض عليهم
ولحسن الحض وجهج حلو علينه گدرنه نعرفهم ونندل مكانهم منتظرين بس الاشارة حتئ نلزمهم متلبسين

لارا،،اسمع ومصدومه ماجنت متوقعه همام يطلع ضابط استخبارات

قطع حديثنه نفس الشاب اليمشي وياه دائما اترخص همام وطلع من الجامعه
اما اني طول اليوم افكر بكلامه لان جانت صدمه بالنسبه الي

انتهئ الدوام ورجعت للبيت للمغرب رجع محمد
كلامه عن اهل همام كلش حلو گال

محمد،،رحت سالت عليهم ناس بالمنطقئ
گالولي شتريد جاي تسأل علئ ابن الشيخ علي?
گتلهم اطلبه افلوس وجاي اريدهن

سالني شگد المبلغ?

جاوبته 5مليون

شو هذا دخل للبيت ورة شويه طلع شايل فلوس بيدة سالته شنو ذني?

گال عمي منا وارجع وذني افلوسك اني ادفعهن بمكام شيخ همام لان ذوله ناس ولد حموله وشيوخ معروفين وافضالهم مغرگتني اني وكل اهل المنطقه
ف ذني فلوسك اخذهن وروح

ضليت صافن شنو من ناس ذوله حتئ اهل منطقتهم يشيدون بيهم وبااخلاقهم وكرمهم بحيث الرجال دفع الافلوس من جيبه

گتله عمي ذني افلوسك رجعهن اني اجيت بس اسأل عليهم لان ابنهم همام خطب اختي
وانته تدري بالعادات والتقاليد لازم نسأل ع. العالم قبل ماانطيهم اختي

جوابه جان كلش حلو
گال بويه اختك امها داعيتلها تاخذ شيخ همام لان مجرد انسابتهم ترفع الراس

انطيها ولاتسأل منا وارجع وهذا موبس كلامي روح اسأل كل اهل الولايه راح يجاوبوك نفس جوابي

لارا،،اسمع ومدنكه اصلا همام مبين من اسلوبه وتصرفاته مبين شيخ وانوب موبس شيخ وضابط هم بس سكتت لان اامن بيه

امي من سمعت كلام الناس عن اهل همام ارتاحت وگالت دامهم معروفين وزينين هذا هو خل يجون

ضحكت بداخلي حتئ ماسألتني
لوحجت وياي حالها حال اي ام تنصح بتها

بليل اتصل همام وحجيتله عن كلام محمد فرح كلش وگال هسه عدنه طلابه بين عشيرتين ويرادلها كم يوم ياالله تفض مااصدگ تنتهي واجيب اهلي وعمامي يخطبوج الي
يحجي والفرحه ماسايعته بس يضحك

مرت الايام وصار تقريبا عشر ايام علئ مرض راهب
وهمام حدد موعد جية اهله وعمامه حتئ يتقدملي
واختصرها هي مشيه وبنفس الوقت عقد سيد گال نجي ونجيب السيد ويانه حتئ يعقدلنه
كل مايمر يوم گلبي ينقبض اكثر خايفه استعجالي بااتخاذ هيج خطوة يكون غلط وراح يسببلي مشاكل من جديد
طول هاي الفترة اتصل علئ سارة اطمن علئ صحت راهب وجانت اطمني بكلامها وعرفت منها اتعدة مرحلة الخطر وصارت حالته كلش زينه ورجع يوگف علئ رجلة لان العلاج كان قوي بسرعه نهئ ع الخثرة
بس السكر ضل مشكل عندة فيوميه يضرب ابرة انسولين

اتبادلنه حديث عادي سالتها علئ وضعها وصار عدها طفل لوبعدها

سارة،،لاوالله بعد وماخليت دكتورة مارحت عليها حيصير فوگ السنه متزوجين وكلشي ماكو
اني عن نفسي عادي انتظر رزق الله شوكت ميجي هله بي بس عمتي گورعتني كل شويه وسالتني خومااجتج الشهريه?

والله صارت عندي حاله نفسيه بسبب كلامها عبالها بيدي ومااريد يصير عندي طفل

لارا،،وقاسم شنو يگول?

سارة،،قاسم يگول ميخالف اتحمليها امي مرة جبيرة وتريد تفرح بااطفالنه لتزعلين من كلامها

لارا،،سالتني عن وضعي مالگيت روحي غير
گتلها انخطبت وباجر المشيه مالتي هي مشيه وعقد بنفس اليوم
كلش ضاجت لان جان عدها امل ارجع الراهب

نهيت الاتصال ويه سارة اتمددت بفراشي
دخلت علئ حسابه هذا حالي يوميه اواسي روحي بصورته اتعجب علئ گلبي يحبه وبنفس الوكت يكرها لان مجروح منه

اتصل همام گال حضرو نفسكم لان ابوي انطه خبر لهواي عالم حتجي ويانه يعني اخذو احتياطاتكم
نزلت بدون روح انطيت خبر لمحمد حتئ  يحسب حسابه يجيب غراض للمشيه

امي اكثر واحد بينه فرحان
اما بالنسبه الي عبالك باجر اخر يوم الي واموت ولاجن باجر راح اتسجل بااسم شخص ثاني
ثاني مرة القدر يلعب لعبته وياي
واكون عروس بس بالاسم بدون لافرح ولامشاعر مجرد جثه تمشي بدون روح

امي اصرت تاخذني الصالون حجزتلي بدله  علئ ذوقها
لان امهاته واخواته يجن وياه

مااعرف ليش مامرتاحه يمكن بسبب اهل همام لان من خلال كلامه عرفت امه ماموافقه الا بعد اصرار همام ع الزواج بس ابو وافق وگاله بالاخير هاي حياتك وانته تتحمل نتيجة اختيارك
همام ماقبل يحجيلي هلكلام اله بعد ماحلفته يااله حجه لان گال اي كلمه تسمعيها من امي بيوم العقد غلسي عنها الخاطري وبالاخير من اجيبج يمي راح تتعرف عليج اكثر وساعتها تعرف رفضها الج غلط

،،،،،،،،

راهب

ايام مرت انازع وي الموت منازع بسبب تدهور صحتي
اعرف طبعي متسرع وقاسي وعصبي بس ذني كلهن يثورن من اغار
من اخذتها من الجامعه للشقه جنت مقرر خلص اخذها واهج واليصير خل يصير لو اعرف اتخلئ عن كلشي ماعندي مشكله في سبيل اكمل عمري وياها
احبها حب اكثر من المعقول
بس دمرتني من شفت رسائل الساقط وياها
نار نار دويت شبيت للسما وروحي تسعر
واني اشوفه يتغزل بعيونها ويعترفلها بحبه ويطلب ايدها صح شفت رفضها بس هذا موكافي يبرد نار گلبي
مالگيت روحي غير هجمت عليها غيرتي عمتني خلتني اتصرف بدون وعي لان لسه اعتبرها الي وحدي مرتي وبس

فقدت وياها ضربتها بس بالحقيقه روحي اخترقتها رصاصه من شفت كلامه وياها
اذا اني ضربتها فهي موتتني بكلامها وياه

رغم كل الصار نسيت كلشي شفته واتصلت بيها احس صوتها يردلي عافيتي الضايعه بدونها

عشر ايام واني ماطالع باب البيت مااگدر ولاالي خلگ
انطوني اجازة مفتوحه بين مااسترد صحتي من جديد

ثاني يوم الساعه بالعشرة الصبح طلعت من الاستقبال طلبت من فاطمه تحضرلي ملابسي اريد اسبح لان اتصلت بقاسم يجي يطلعني من البيت اختنگت مامتعود اگعد هاگد بدون طلعه

كملت سبح وطلعت استوقفني صوت يجي من غرفة امي
اتقربت يم الباب سمعت صوت ام قاسم ومرت قاسم

بس الصدمني كلام امي الجانت تحجي وياهن وتترجاهن بصوت ناصي
رغم كلامها بصوت دوب ينسمع بس احسه اخترق سمعي مثل سهم

الحجيه،،خيتي ام قاسم احلفج ب الزهرة ام الحسن هلكلام يبقئ بيناتنه وانتي يمه سارة گلي الرجلج لايحجي لراهب تراه ايموت مايتحمل
وانه ماصدگت يوگف علئ حيلة من جديد

دامها مااتريد ابني واليوم ملچتها الله يبعدها ويسعدها وان شاء الله ربي يعوضه الاحسن منها التقدرة وتقدر حبه

راهب،،استندت ع الباب احس الساني يبس ابلع بريگي ماينبلع نشف اديه نملت وجسمي خدر عرفت ارتفع عندي السكر بسرعه
لان صرت اعرف اعراضه
بقت كلمه وحدة تتردد براسي

اليوم عقدها?
اليوم تصير الواحد ثاني?

،،،،،

لارا،،گعدتني امي الصبح سحلتني سحل لان المشيه الساعه ب 2الظهر الجو بارد وشتئ اختارو هذا الوقت حتئ يرجعون من وقت لان وراهم طريق

الساعه ب 11اخذنه محمد للصالون
كاعدة فاصله عن كلشي
روحي تبجي علئ حالي ثاني مرة اگعد بنفس هذا المكان والمرتين برضاتي بس مااكو اي فرحه بداخلي عبالك عليه لعنه ممنوعه افرح بهيج يوم حالي حال اي بنيه

بدت الابنيه تحفلي شمرت حواجبي وحفت وجهي
واني صم بكم عمن لايتكلم ساكته بس صوت انفاسي تنسمع
اشوف البنات يجادلن ام الصالون يطلبن منها مكياج لوتسريحات علئ ذوقهن واني خرسه
ابد ماحجيت اليگلي شبيج ابجي

كملنه وامي اتصلت بمحمد يجي ياخذنه
شويه واتصل گال اني بالباب

لبستني امي الكبوس اجرته ويه البدله حتئ البسه من اطلع
غشتني وطلعنه للسيارة محمد طول الطريق مشغل اغاني ويضحك ادري مومن گلبه وضايج اكثر مني بس يريد يخليني افرح

وصلنه للبيت محمد كله اشتراه جاهز
من البارحه انطه خبر الرافد وطلب منه يحضر المشيه لان اخونه الجبير ومكانته مثل ابوي
رافد فرح ومااعترض بالعكس ايد قراري
گال انشاءالله ترتاح بقرارها

مر الوقت يركض واني ميته بخوفي
ساعه اگول هسه اتصل بي وارفض لان مامقتنعه وقراري هذا راح يدمر همام
وارجع اصحئ من جديد وانطي نفسي اسباب واعذار حتئ اكمل كلشي للاخير واترك الماضي وراي
وبالتالي اكو رب يشفي الجروح الي سببها راهب الي

سمعت اصوات السيارات تعلن عن وصولهم
محمد قبل فترة اشترة كامرات نصبهن بالباب وربطهن علئ بلازمه موجودة داخل الصاله

اباوع وگفت السيارات شگدها وحدة ورة الثانيه ونزلو كومه زلم معگلين دخلو للبيت وبعدها كم مرة نزلن من سيارة موجودة علئ صفحه اكيد ذني امه واخواته
زاد خوفي وارتباكي وقلقي
سمعت صوت سلام الزلم بالاستقبال
دخلت النسوان الوجوه مگلبه عبالك جايات يردن يتعاركن
امي اتلگتهن بسلامها الحار عبالك تعرفهن من اسنين
وهنه يسلمن بدون نفس يباوعن بطرف عيونهن الي
وصلن يمي بس المرة الجبيرة سلمت ابرود رديت السلام بصوت ناصي
والباقيات گعدن علئ صفحه يردن ياكلني بنضراتهن
اتذكرت كلام همام ماردت افشله گدام اهله بحجايه لو بشي ماردت يگلوله هذا اختيارك الكتلت نفسك عليها بدر منها شي غلط لذالك
اكتفيت اتصنع ابتسامه مزيفه واكتفي بالسكوت مجرد عيوني تتنقل بينهن

ساعه وسمعنه صوت رافد فتح باب الاستقبال الموجود بجهتنه ماسمعنه غير صوته يطلب مني اتقرب للباب لان اتفقو علئ كلشي وصار لازم يعقدلنه السيد گمت من مكاني وخطواتي احسهن اثگال علئ ساعه اوكع
گعدت ع الكرسي يم الباب
امي خلت علئ راسي شال ابيض

سمعت السيد گال هاا بويه نتوكل ?

جسمي كله صار يختض

فجاة فزيت من مكاني علئ صوت رمي حرگ الجو حرگ
رفعت راسي مفزوعه صارت گدامي البلازمه

واهنا جانت الصدمه من شفته راهب نزل من سيارته هو وقاسم
لازم بيدة رشاشه يرمي ابابنه بالجو
وقاسم لازمه يمنعه

يتتبع،،قرائه ممتعه

مساءالورد بنات
طبعا هذا البارت جمعت بي اهواي احداث المفروض كان لازم اسوي بارتين بس الخاطركم اختصرتهن ابارت واحد حتئ ماتگولون اتجرجر بالاحداث
وثانيا والنبي مريضه اسم الله عليكم تيفو والليل مانمتئ كانونه بيدي واكتب
وثاني شي اجتنه مصيبه جديدة
جيرانه رايحه لهلها ومرت اخوها بيها كورونا عاديتها اختها
ومن خوفها اجتنه شاردة
هسه حسيتي بروحج شاكه انتي مصابه اكعدي بالبيت لواله ادمرين العالم وياج
والله ماخايفه علئ نفسي بس عدنه ناس اكبار بالعمر مايتحملون
امانة الله اندعولنه كون لاالبنيه بيها شي ولااحنه
من البارحه نفسيتنه زفت القلق ذبحنه ذبح
الله يبعد عنه وعنكم شر هذا المرض بحق رسول الله
اذا اتاخرت كم يوم بالنشر البعد العيد التمس منكم تعذروني وتندعولي
اليگولون ادور تعليقات وتصعد براسنه
رحم الله والديكم وماجابرة احد يعلق لويصوت
لتنسون اختكم بالدعاء

قرائه ممتعه