رواية راهب ابو غضب الفصل الرابع وخمسون 54 - بقلم Zahra_Alhussnawy

شجاني وماحضنتك قبل متروح ?
عفتني وغيبتك صارت طويله
شجاني وماگلتلك الله وياك
وبقيت اتانيك ليله بااثر ليله
رحت بس من رحت خلصت الدموع
وشلت الروح بيدي فرد شيله
ونسيت الابتسامه وفرحة العيد
لان ضحكاتي بغيبتك صارت قليله
بعد هم عيني تفرح يوم ملگاك
لوجمعتنه صارت مستحيله ?

حال راهب ☝️

حاولت اكرهك بس صعب

اني الله باليني بگلب

لايكره ولاينسئ 💔

حال لارا
الاشعار اهداء من متابعات للاابطال

،،،،،،،،،،،

اولا اقدم تعازي الحارة لكل المتابعات بوفاة صاحبة القلم الراقي الكاتب الاء احمد ام غايب الي اتلقينه خبر وفاتها البارحه وكانت صدمه بالنسبه الي ولكل متابعاتها الي يحبوها
الله يرحمها برحمته الواسعه ويسكنها فسيح جناته يارب

اما بالنسبه لراهب ولارا
كلكم تشوفون تصرفات لارا وراهب المتناقضه
من همه ابعاد واحد يتمنئ يرجع للثاني بدون مشاكل
بس من يقتربون يصيرون مثل النار والبانزين بمجرد قربهم اتگب العركه والمشاكل بينهم
زين ماگلتو شنو السبب?
نسيتو سحر غزل?
ترة ثلثين المقابر من السحر والحسد
ناس اهواي راحت ضحيه بسبب اعمال المايخافن من الله
ثقو باالله اني وحدة من الناس ادمرت حياتي صح اتعالجت بس بعديش ?
بعد مادمرني الله لايوفقهن دنيه واخرة
قبل جنت ماامن بهاي السوالف بس من صارن وياي اتاكدت منها وبعدين السحر مذكور بالقران
فلتتفاجئون بتصرفاتهم
لارا من البدايه حجتلي وشرحتلي كمية التناقض بعلاقتهم

وشغله ثانيه وداعة ابوي ونضر عينه اهواي ناس من الجيش يتابعون ف اتمنئ اتراعون كلامكم بالتعليقات ادري مشدودة اعصابكم بس هله انهاالله بالشتايم
😅

لاياخذونه كلنه للتوقيف 😂
اني مجرمه واهواي حجيت عليكم بروح جدكم اسجنوني 😂

،،،،،،،،

راهب ابو غضب ج2

///////بقلم زهراء الحسناوي///////

،،،،،،،،،،،،،،

لارا،،الساني نعگد واختنگت لزمت صدري النار اشتعلت بي

فاطمه،،لارا ابوس ايدج اذا تعزيني
ادري مالج نيه ترجعين لخوي ابد
وهو من يشوفج بعدج عباله منتظرته وجاي تعاقبي وبس

اتزوجي

لارا،،غمضت عيوني بتعب گتلها برايج هذا حل?

فاطمه،،اي احسن حل هذا لان هاي ثاني مرة راهب يوگع بسبب اعنادج
الله يخليج ابتعدي عنه والله ماالنه غيرة

لاانتي راضيه ترجعين وتبدين وياه صفحه جديدة
ولاانتي المتزوجه وساعتها غصب عنه ينساج ويشيلج من باله
خلي يلتفت الحياته راهب جاي يضيع نفسه الخاطر حب انتي مامقدرته

لارا،،اسمع ودموعي تنزل محمليني الذنب بكلشي صار
ردت اكلها بعدهن اثار اصابع اخوج طابعه علئ وجهي وجسمي بس سكتت خليها تحجي

سدته وراحت تركت بداخلي نار
اني سامعه بالحب معقد بس موالهاي الدرجه
انو شخص من گد حبه ياذي حبيبه مثل ماجاي يسوي راهب وياي يتفنن بااذيتي رغم حبه الي

سمعت بيوم يكولون الحب حلو
لكن ماشفت منه غير بشاعته
راهب كسر گلبي بكل طريقه ممكنه تجي اباله

دمرني ودمر نفسه ودمر عائلته وياه
نهضت گوة نزلت غسلت واتوضيت ورجعت الغرفتي مديت السجادة وگعدت
دعيتله من كل گلبي يشفي ل امه واخواته لان فعلا بدونه يضيعن

كملت صلاة وبقيت نايمه علئ سجادتي ابجي بحركه
دموعي وحدهن ينزلن
وعدت روحي ماابجي وبجيت
وعدت روحي انساه ومانسيت
وعدت روحي اكمل حياتي بدونه وماوفيت بشي من وعودي

اني وراهب مثل الاظفر باللحم مااگدر اقتلعه ولاهو يسمح بهذا الشي

مانمت للصبح بقيت اتذكر واسترجع الماضي وياه
لحظة بلحظة
قارنت الايام الفرحت بيهن وياه
طلعن لاشي مقارنتا باايام التعب والقهر والضرب

شنو الشفته غير يوم واحد حلو
تالي لطمني علئ عيوني وكسرني

وفوگ كلشي الحجيه وفاطمه محملاتني ذنب وكعته

صار الصبح واني علئ فرد گعدة ماخليت امام مانخيته وطلبت منه يشفي

الساعه ب 10نزلت راسي صاير شكبرة من السهر والقلق
سويت كوب جاي وكلت وياه كيكه لان بس اخذ علاج الراسي بدون اكل تاذيني معدتي

گعدت امي من شافتني اتفاجئت لان دوام ماداومت غبت وعلئ يوم انفصل بسبب كثرة غياباتي

سعاد،،ولج يمه شبيج ?
عيونج دومهن وارمات من البجي

لارا،،مااتحملت انهضمت بلعت الغصه
گتلها يمه راهب ضربه السكر وحالته خطرة احتمال يبترون رجله

سعاد،،ياااللله من حلگج الباب السما بلكت يبتروهن اثنينهن ويجفينه شرة وشر اهله
يممممه نذر عليه ذبيحه بس يبتروهن
عسسسنه بشلاع الگلب وبالموت كووون

لارا،،نترت بيها بدون وعي
كاافي يمه تررة عندج ولد خاافي عليهم
ولتنسين ثلثين الدعاوي ترجع الصاحبها
خافي ربج يووم

تركتها وطلعت اسمعها تغلط عليه وترزلني لان ماقبلت تدعي علي

صعدت الغرفتي الوب اريد بس خبر يطمني علي
اتمنيت اطلع گلبي واشمرة
لان كل هاي الاذيه وبعدة يحبه
مر اليوم والقلق ذابحني اخاف اتصل بواحد من اهله
اخاف اسمع خبر موزين وساعتها يمكن اموت

للساعه 10ونص بليل ماعدت اتحمل
مالگيت نفسي غير اتصلت بسارة

مرتين يالله جاوبت حتئ بدون سلام سالتها عن وضعه

سارة،،وضعه حيل تعبان لارا
كتبله الدكتور دخول مستشفئ اسبوع
والحمدالله اكو بعثه مال اطباء جايين من فرنسا
كتبوله ابر الابرة الوحدة بالمبلغ الفلاني
يضربهن برجلة حتئ ينهون ع الخثرة

يوميه ابرة تحت اشراف الاطباء

لارا،،جريت نفس براحه الحمدالله لهنا وماگصو رجله
سالتها عن الحجيه
سارة،،والله عمتي ام راهب كل شويه اوگعت يرتفعن عدها السكر والضغط
حالتها تبجي الكافر وحيدها وسندها اشلون ماتفقد الخاطرة?

لارا،،مااعرف شحجي بس صوت المناشغ تسمعه

سارة،،ليش هيج سويتي لارا?
هي هاي الردتيها ?
بنادم مامعصوم عن الغلط
صح راهب غلط وياج بس اتندم واتغير وحاول وياج وانتي رفضتي
لومن البدايه منطيته فرصه جان ماصار الصار

لارا،،مختنگه وصوتي كوة يطلع ماجاوبتها علئ سؤالها لان حاالتي اوضعي مايسمحلي احجي اي شي

گتلها فدوة مالي غيرج اذا اتحسنت صحته طمنيني

نهيت الاتصال ويه سارة
جريت الموبايل دخلت علئ حسابه اباوع الصورته
اكو صورة لابس قاط نيلي وقميص ابيض فاتح اول دگمتين رگبته مبينه بيها تفاحة ادم
مبتسم يباوع القاسم

نزلت دموعي امرر اصابعي علئ وجها
احجي وياه ودموعي تجري امسح وحدة ينزلن عشرة بمكانها
گتله ليش مجاي اطلعك من گلبي?
ليش ماجاي اگدر اكرهك ?
ليش ماجاي اگدر انساك واكمل حياتي?
رغم كل اذيتك وضربك ماگدرت اكرهك
ولك والله حتئ كلبي ماينطيني اجرحك وااذيك
جاوبني ليش احبك جاااوب
الله يخليك خلي جوابك مقنع
خليني اعرف سر تعلقي بيك الهاي الدرجه

عيوني اتشكلت علئ رگبته
اتمنيت احضنه وادفن خشمي بيها اشم عطرة واسمع صوت انفاسه
اتمنيت ننسئ كلشي ونعيش حالنه حال. اي زوجين

خليت التلفون كدامي وصورته كدام عيوني
اناشغ مثل طفله منو يحس بيه?
ردتك تحتويني تالي ضعت وضيعتني وياك

قربت الموبايل  بسته
رجفن شفايفي

هذا هو يبن گلبي هذا حدنه
روح الله وياك ومن هذا اليوم كل واحد يمشي بطريق يختلف عن طريق الثاني
هذا حدنه راح ابقئ وحدي بدونك
علئ الله العوض بحبي وبدموعي
صح اتندمت بس بشنو يفيد ندمك وانته كسرتني الف مرة
بشنو يفيد ندمك وانته ماخليت شي بكرامتي
عبالك الحب بالضرب والاهانه?
اعرف ربيت ع القسوة
بس للاسف طبقت قسوتك كلها بالشخص الغلط
بالشخص السلمك گلبه وروحه بدون مقابل بدون مايريد منك اي شي

ماادري شوكت غفيت من التعب
ماگعدت غير علئ صوت المنبه
سحلت روحي وگمت نزلت غسلت ورجعت بدلت

صارت الساعه 7وربع اجه الخط طلعت للسيارة صعدت وسلمت ع البنات كلها تباوع بوجهي
ادري منتبهات علئ عيوني اشلون وارمات گوة مفتحتهن

وصلنه للجامعه اتلگتني بسمه
اتفاجئت من شافتني
جرتني من ايدي بمكان مابي احد
بمجرد ماسالتني شبيج
اختنكت وبجيت اريد اسيطر علئ دموعي مااگدر
جرتني الحضنها خايفه من منظري تريد تفهم علئ شنو ابجي ماانطيتها مجال دموعي تمنعني احجي

گعدنه علئ صفحه ورجعت سالتني حجيت من بين دموعي گتلها راهب كلش مريض وحالته حيل تعبانه

بسمه،،اذا هيج اتحبي ليش تركتو بعض

لارا،،بسمه ماتعرف اي شي سكتت ماجاوبتها
بقت اتهدي بيه
لحد مابدت المحاضرة
وجانت من سوء حضي ل استاذ عمار

وهو هم من شافني بقئ مركز بوجهي ابد ماشال عينه يشرح وباله يمي
احاول مااباوعله بس بدون ماانتبه عيوني يمه اخاف يفشلني من يشوفني مامنتبها بس الحقيقه بالي يم راهب

كملت المحاضرة ردت اطلع استوقفني صوته

عمار،،انتظري لارا

لارا،،الطلاب كلها طلعت بس اني وياه بالقاعه
گتله واني مدنكه اتفضل استاذ

عمار،،عليش باجيه?
عيونج وارمه

لارا،،هزيت راسي مختنكه كتله مابيه شي
جر حسرة واخذ الكتاب من الميز

عمار،،خلص تكدرين تتفضلين

لارا،،تركته وطلعت اتمنيت انهزم من كلشي
اتمنيت اروح المكان مابي غيري
اريد اهج اني وجروحي لمكان مابي بشر

ماصدگت تنتهي المحاضرات واطلع للبيت
همام ماشفته اليوم وحتئ ماانتبهت الوجودة غير لمن رجعت للبيت
وانعاد عليه شريط اول البارحه من راهب شاف محادثه همام

بدلت وسبحت جسمي حار مصخنه وحتئ حلگي انمله فرگاس من حرگة روحي الخبزة مااگدر اخليها بحلگي اتاذيني
اخذتلي شويه خبزة نكعتها بالتشريب ياالله كدرت اكل

كملت غسلت وصعدت الغرفتي
مابيه حتئ اقرة لواانام
عيني ع الموبايل مااعرف شنو منتظرة

نفسي ثگل وگلبي صار يدگ سريع
كانه حاس راح يتصل وفعلا ثواني وضهر رقمه علئ شاشه الموبايل
ايدي رجفت مااعرف اذا جاوبت شنو راح اجاوب

فتحت خط وخليت الموبايل علئ اذني سمعت صوته
سرت رجفه بكل جسمي
گوة يحجي

راهب،، لارا

لارا،،مسحت دموعي وهمست امم

راهب،،ااوف

لارا،،اشلون صرت?

راهب،،ليش اني شوكت صرت زين حتئ هسه اكلج اشلون صرت?

لارا،،رراهب،،

راهب،،يروحه وعافيته انتي

لارا،،اطلب منك طلب

جر نفس طويل وهمس

راهب،،عيوني فدوتج مو بس اطلبين

لارا،،انهضمت وغصب عني سمع صوت شهگتي
گتله امانه الله ورسوله تخلي بالك من نفسك
ترة مااستاهلك ولااستاهل تتعب بسببي
همس بصوت تعبان

راهب،،اششش كافي لتحجين
تدرين بالي يمج مايحتاج احجي

لارا،،اسكت لتحجي لاتتعب

راهب،،توني ارتاحيت من سمعت صوتج

لارا،،بسلامه راهب

سديته قبل مااسمع جوابه
طلعت الخط كسرته وشمرته

شمرت روحي بفراشي اتغطيت وخليت المخدة علئ راسي اكتم صوت صرختي

كااافي انسسسي طلعي من گلبج كااافي

مسحت وجهي والنار اشتعلت بصدري علاج ماعندي
اختنگت وراسي صار شكبرة من الالم

بقيت بفراشي ابجي واواسي روحي
ليش من كلشي ماعندي حض
حتئ ام مثل الامهات اشكيلها همي ماعندي
لو امي تاخذني الحضنها واتواسيني جان شالت نص الوجع وياي

عدلت كعدتي وصررت امسح بوجهي ورگبتي مثل حبل ملفوف عليها يخنگني

صرت اندب ابو فاضل گتله دخيلك يااخو زينب ياكفيلها ماعندي غير الله وغيرك ساعدوني وطلعو من گلبي خلوني ارتاح وانسا

خاايفه خاايفه
ارجع اسلمه ثقتي ومن جديد ابني امال واحلام تالي يصبح كلشي رماد

صعبه حيل صعبه
تحب شخص الدرجه لويطلب روحك اتقدمها اله بدون تردد حلو من تشوفه يبادلك حبك
بس الصدمه من يطلع كلشي تمثيل وانو كان معيشك بحلم وردي حلم صحاك منه علئ صفعه هدمتك هدم

اشلون اكدر اثق بي مرة ثانيه ?
راهب صدمني الدرجة كل الجاي يسوي حتئ يكسبني وكل محاولاته لرجوعي احس كلشي تمثيل لان ماعدت اثق بهذا الشخص

اي وحدة مكاني راح تتصرف مثلي واكثر

منو جربت طعم الخيانه?

منو جربت تنطعن من الشخص الي تشوفه احسن واحد بالكون ?

منو مثلي تحلم احلام بسيطه
احلام تتمنئ تعيشها ويه الشخص الاختارة گلبها
وفجاه يحدث ماليس بالحسبان
كلشي ينگلب ضدها
والانسان الجانت تشوف منه كل الحب
راح تشوفه خلع قناعه.وكشر عن انيابه
صار يتفنن باافتراسها وتعذيبها

تعبت من التفكير والقلق الدرجة احس راسي راح ينفجر اريد انام مااگدر

وكالعادة يمر الليل مرور الكرام وعيوني مامغمضات
صرت يادوب انام كم ساعه نفسيتي وحالتي تعبت
الشي اليمنعني ارجعله ضربه واهاناته مايتفاهم ايدة والضرب
المرة عدها اهم شي كرامتها اذا انهانت خلص يصير عند الرجال عادي يگدر يهينها شوكت ميحب
مامهتم المشاعرها ناسي هي من دم ولحم حالها حاله

الصبح گعدت گوة اشيل راسي بمجرد مانهضت دخت ردت اوكع

لميت شعري ونزلت اسحل بروحي سحل
دخلت للحمام غسلت رفعت راسي انصدمت
دخيلك ربي شنوو هااي?

جان اكو داير مداير عيوني بقع مثل چويات الجگارة لونهن اسود غامق عبالك مطفر عليه دهن وحارگني

متت خوف قربت وجهي من المرايه فركتهن بااظافيري عبالي فوگ الجلد
بس ماكو ومبين تحت الجلد

طلعت لمحمد جان يتريگ هو وامي
وكفت كدامه كتله محمد بس باوعلي شنو ذني بوجهي?

محمد،،شو باالله?
والله ماادري مبين دم

حضري نفسج العصر ارجعج الدكتورج من زمان مامراجعه

لارا،،واني هم ردت اگلك من زمان لان ماجاي اگدر انام من الم صدري

محمد،،ولج اكو وحدة عمرها 21عدها ذبحه?

لارا،،دنگت ماحجيت كعدت اتريكت
للعصر اخذني محمد للدكتور
فاجئني بكلامه من كشف

الدكتور،،بابا ليش مامنتبها علئ صحتج?

يعني انتي حابه تنجلطين ?

لارا،،خفت كتله ليش دكتور اني شبيه?

الدكتور،،هسه مابيج شي بس اذا ضل هذا وضعج راح تسوء حالتج
بنتي الدم المتجمع تحت الجلد الجوة منطقت العين
هذا نزف بسبب انفجار شرايين عبارة عن شعيرات من الاوردة تنفجر بسبب الضغط من كثر شد الاعصاب والقلق والتفكير والحاله النفسيه

حاولي تنتبهين علئ صحتج لان اذا استمر انفجار ذني الشعيرات راح يسبب جلطه دماغيه

لارا،،جريت نفس ومحمد ضل يشكيله لان مااخذ علاج
تالي انطاني علاجات اوصاني انتبه علئ صحتي ورجعنه للبيت

يومين مرن واني هدومي احسهن اثگال علئ جسمي
بس كان لازم اتخذ قراري وانهي كلشي
مستحيل ارجع الراهب الرجال اذا مد ايدة علئ مرته مرة تصير سهله عندة يضل دوم يكفخ بيها
يعني اذا رجعتله بعد مستحيل اگدر اطلگ منه مرة ثانيه وبنفس الوقت راح يستمر بااهناتي

لازم ادوس علئ كلبي وانسا
احسن الي واله اخطي هاي الخطوة

گعدت الصبح سبحت وبدلت لبس الزي
وانتظرت ابو الخط شويه وسمعت هورن يعلن عن وصوله
باوعت النفسي بالمرايه خفيت ملامحي التعبانه واثر السواد جوة عيوني خفيتهن بالمكياج بس اشلون اگدر اخفي كسرة روحي?

وصلنه للجامعه واول مادخلت شفت همام عبالك ينتظرني
جريت نفس ادعي القوة كملت طريقي بااتجاها
ابتسم من شافني بادلته الابتسامه
حسيت بروحي هلمرة اني الامثل
وگف كدامي مايفصلنه غير مسافه بسيطه

همام،،اشلونج?

لارا،،الحمدالله
حجيتها ودنكت رجعت رفعت راسي كتله ممكن احجي وياك?

همام،،اني الاريد احجي وياج

لارا،،گال تعاي نروح للنادي قبل ماتبدي المحاضرة

رحنه يمشي كدامي واني وراه اتعثر بخطواتي
سحب الكرسي كعد واشرلي اكعد

ارتبكت مااعرف منين ابدي شابكه اديه واعصر بيهن
متوترة ومترددة مااعرف شحجي وشنو اريد
همام مراقب توتري جلئ صوته وحجه

همام،،احجي اسمعج

لارا،،ه همام ردت ا اگول

همام،،قبل لتحجين شي
ثقي باالله احبج ومتمسك بيج ل اخر نفس
لتضنين طليقج يگدر يسويلي شي او يخليني اتراجع
بالعكس بعد السواه خلاني اتمسك بيج اكثر
لان حرام ترجعين تكملين حياتج وياه تعيشين تحت رحمته

انتي بس ريحي گلبي وگولي موافقه وعد اخذج ونروح منا لو اعرف اطلع خارج العراق هم ماعندي مانع دام انتي مرتاحه

لارا،،العبرة انجمعت بحنجرتي
دنگت والدمعه بعيني
جان لازم اخطي هيج خطوة احسن للكل

همست بصوت گوة يسمعه

ااني موافقه

يتتبع، ،قرائه ممتعه

صرت ماضي ونسيته
ردت بس تصفه نيته
انه برجلي اجيته
ماكو بگلبه رحمه 😥💔

اليقدر تعبي يدوسها 👈⭐