رواية راهب ابو غضب الفصل الستون 60 - بقلم Zahra_Alhussnawy

مكابر گوة اجيب الراس ع الراس
واعاند دنيتي اعناد المجانين
وانه شما اطيح اگل للروح لاباس
علئ جروحي توچي ولاتصيحين
شربني الزمان اهموم من كاس
اقسئ وامر من سم الثعابين
تجرعته بصبر ماسمعت ناس
لجن ياحيف فضحني النياشين
انه الروحي جيل يهدمها يافاس
وانه المرمر التنحد بي سچاچين
لخلي جفوني ع الدمعات حراس
واگل للعين فنج بعد تبچين
اذا وصلت منيتي لگطع الانفاس
واجب من يمر شامت تضحكين
مرمر سگف روحي واصلب الساس
ولامن جام بيتي وساسي من طين
وطبع بالروح يشبه ورقة الياس
يتكاثر عطرها بفرك الايدين

،،،،،،،،،،

راهب ابو غضب ج2

/////بقلم زهراء الحسناوي//

،،،،،،،،،،،،،،

راهب،،شهور مرت واني ماشايفها
احس روحي تفطرت من گد ماعطشان علئ شوفتها
رغم كلمتها بااخر اتصال بينه تاكل وتشرب وياي
من گالت اصير بت شارع ولاارجعلك
كلماتها حفرن راسي حفر انطبعن بگلبي قبل عقلي

ثاني يوم من التحاقي اكو احساس بداخلي غريب
اتصلت العصر ب امي گالت كلشي ماكو واحنه زينين
رغم اطمنت علئ وضعهم بس بعدني مامرتاح

للساعه 12تقريبا رجعت اتصلت بفاطمه واني ادري يوميه مثل هيج وقت امي وفاطمه ينامن بس ماادري ليش ردت اتصل

وفعلا من اتصلت وفاطمه حجتلي جيت مرت عمي البيتنه اوضعها التعبان
صح اهواي اذتنه بس اجه الوقت الي لازم ننسه كلشي
لان شگد ردت انتقم منهم بس بالاخير اني الدفعت الثمن غالي
الله يمهل ولايهمل مرت عمي هذا كان عقابها بسبب سوء اعمالها دمرتنه ودمرت عائلتها بسبب عينها الفارغه
بس شحصلت ?
الفلوس الباكتهن يگدرن يرجعن ابنها?
كلشي ماتسوي الفلوس ولاتگدر تشتري بيهن راحة بالها وعافيتها من جديد

جيتها النه جانت صدمه بالنسبه الي
سالتها علئ لارا گالت اجت وياهم

سديته منها بس احس روحي بصراع بين گلبي وعقلي
عقلي الي يستذكر كلماتها ويحاول يكرها
وگلبي الي يحثني اروح واشوفها واشبع شوف منها
حاولت امنع نفسي واشيل الفكرة من راسي

شغلت اغنيه كل ضني تنسيني
خليت الهيتفون ب اذني ورجيت راسي ع السرير استمع الكلماتها

قهرني البسمك حچه
طاريك لمن اجه
ع الضلع گلبي انتچه
وصاح مشتاااگ

مالگيت نفسي غير جريت السويج وطلعت بوجهي للنجف
وصلت تقريبا ب 3ونص الفجر
عندي نسخه ثانيه المفاتيح البيت
طفيت سيارتي ونزلت گلبي من لهفته يريد يركض قبلي يشوفها

فتحت باب البيت علئ كيف وصعدت بوجهي للغرفه بدون محد يدري
دخلت الغرفة فاطمه بكل هدوئ
ندست فاطمه فزت خايفه لان مامتوقعه اجي

اشرتلها بمعنئ اسكتي طلعت وطلعت وراي
گتلها روحي نامي بغرفتي ساعه بس اشوفها واروح

فاطمه ماحجت شي بس وجها مبين علي القلق
راحت الغرفتي واني دخلت علئ مصيبتي
الشلعت افادي بعنادها
سديت الباب علئ كيف
جريت الكرسي بدون صوت گعدت كبالها اراقبها
متلفلفه بالبطانيه
خصلات شعرها الناعمه واكعه علئ عيونها تمنيت ابعدهن وابوس عيونها الميت علئ شوفت نظرة منهن

من كل گلبي اتمنيت ارفع الغطه وامد طولي ويه طولها احضنها وانام
اريد ابجي بحضنها اريد اطلع ضيم گلبي وقهر روحي بفراگها

اهواي بقيت اراقبها لحظات شيطاني يستفزني
اصخم الدنيه وياها واليصير خل يصير
المهم ارتوي منها

اكثر من ساعه اراقبها واحرگ بروحي حرگ
نار  غدت روحي وهي گدامي

شفتها فتحت ذبت بعيونها ولونهن
رجف گلبي من ابتسمت
بلحظه اتذكرت كلماتها
گتلها تصيرين بنت شارع ولاترجعيلي ?

عگدت حواجبها يمكن عبالها حلمانه
عدلت گعدتها فركت عيونها واني گوة كاتم ضحكتي عنها
اكثر من مرة ترمش بعيونها مامصدكه اني موجود

اخر شي طفرت من فراشها رادت تعثر لزمتها
من زندها الاخذ گلبي واني اشوف بياضه المحروم منه

وگعت بحضني طوقت خصرها بيدي مقربها الصدري
رافعه وجها تباوعلي
شعلتني شعل وهي تهمس بااسمي من خوفها

لارا،،ر راهب

راهب،،بدون وعي ولاتفكير مني جريت راسها بستها بگصتها جريت نفس ترس روحي
خبلتني من حسيتها ترجف صارت اعصابي ترجف عليها
متت عليها اتمنئ اضمها بگلبي يمكن ادفنها بروحي وهم مااشبع منها

لارا ،،مامصدگه هو گدامي يعني ماجاي احلم
جسمي ارتعد من الخوف بمجرد شوفته گدامي تسببلي رهبه ورعب

ردت افتح الباب واطلع بس حضي فگر عثرت لزمني لمست ايده الايدي خلتني اختض
اباوعله گصته عرگت صارت تنضح عرگ
انفاسه اتخربطت  سحبني باسني براسي

لفحتني حرارة انفاسه قشعر جسمي وارتبكت
بعد وجهي عن وجها وهمس بصوت ناصي وجهي مقابيل وجها مايفصلنه شي

راهب،،ولج مامصدگ
والله گلبي فزعني نص الليل وجابني حتئ يشوفج

لارا،،لزمت ايدة حتئ ابعدها عن وجهي
گتله وخر راهب

راهب،،منين جايبه كل هاي القسوة فهميني?
ولج كل مرة احلف ابتعد وماالگه روحي غير ضعيف كدامج
فهميني ليش اضعف گدام عيونج?

لارا،،ر راهب. الله ي يخليك ا اطلع

راهب،،موقبل ماااخلي حد الكلشي
وهلمرة لو تگولين اي ونترك كلشي ورانه
لو اتكليلي خلص ماكو امل بيناتنه

لارا،،جسمي يرجف احس راح يغمئ عليه
گتله انته كلتها ماكو امل بيناتنه
انته مواتگول مااريدج بس اريد اكسر خشمج ?

راهب،،باوعتلها مااعرف شحجي وياها

هذا كلامج النهائي ?
يعني اايس واگطع الضن مانرجع سوه?

لارا،،هزيت راسي بمعنئ اي

راهب،،اهواي طعنتني الدرجه اتمنيت اشلع گلبي اليحبها واشمرة
گتلها خلص يجرالج التردي وهلمرة وعد مالي شغل بيج

تركتها وطلعت روحي شايطه شنو من بشر ماادري
اتلكتني فاطمه واگفه بالباب گتلها راجع البغداد
لتجيبين طاري لحد بجيتي
هزت راسها وطلعت من البيت مختنگ

ماادري اشلون وصلت البغداد تعبان
دخلت الغرفتي بالدوام اتلگاني قاسم الساعه 7ونص الصبح

گتله اريد بس انام لتگعدني ابد لويحترگ المركز لاتكعدني

وفعلا نمت بس لمن تعبت من التفكير واني استرجع كلامها بذاكرتي

لارا،،راح وبعدني مامسيطره علئ سرعه دگات گلبي الي احسهن يركضن
گعدت بمكاني رجليه مايعينني اختنگت وانهضمت
شهور واني احلم بشوفته
احبه اي احبه لعد ليش من يكون قريب اتمنئ اصدة واصير اتفنن بااذيته من اشوفه متعذب?

انفتح الباب دخلت فاطمه گعدت يمي
محتاجه ابجي
خليت راسي علئ رجلها واطلقت العنان لدموعي

فاطمه تريد تعرف شسوالي حتئ هيج ابجي بس جنت مختنگه وصدري رجع يحرگني
اتذكرت كلام غزل
مالگيت نفسي غير حجيتلها كلشي بخصوص الشال اللي اختفه بيوم العقد مالتنه
وكلام المرة عن السحر واعتراف غزل انو هي ورة سالفه السحر
احجي وفاطمه مصدومه وتضرب علئ خدها بخفه

فاطمه،،توج حجيتي?
ليش سكتي ماحجيتي من زماان?

لارا،،عدلت كعدتي گتلها ليش هنه المصايب انطني مجال?
شو وحدة ورة الثانيه يوگعن علئ راسي وكل وحدة اقوة من القبلها

فاطمه،،اذا ضليتو اليوم اهنا حتئ تاخذج امي واخوج للعلويه اكو سادة بالحله
مضروب بيهم المثل
جدهم عندة شارة ومستورثيها احفادةايدهم بفضل الله عافيه

لارا،،مااعرف فاطمه اتركي الموضوع هلفترة لان البيه مكفيني وبعدين اخوج راد مني جواب وگطعت امله هلمرة فد نوب

فاطمه رادت تقنعني احجي ل امي بس رفضت لان احس نفسي خلص نهيت كلشي هلمرة ومن كلامه مبين تعب وياي ومستحيل يتنازل مرة ثانيه
لان ذل نفسه الي بما فيه الكفايه

الساعه ب9گعدت امي ومحمد لگينه فاطمه مجهزة الريوگ
دخلت للحمام غسلت وبدلت حتئ نرجع البغداد
محمد گال امرركم تزورون السيدة شريفه بنت الحسن عليها السلام دامها بطريقنه

عمتي شگد لحت حتئ نبقئ يوم ثاني وحتئ امي كيفت تريد تضل
بس محمد رفض گالها دام طابت النفوس انشاءالله الزيارات تكثر بيناتنه

ودعناهم وانطلقنه متوجهين للسيدة شريفه عليها السلام
اني جايبه عبايه وياي لبستها ونزلت اليندسني ابجي مهضومه

محمد گدامي يمشي يدفع ب امي بالعربانه واني وراهم عيوني غوشن دموعي تنزل

دخلنه للشباك بجيت من كل گلبي
اتمنيت يرتاح بالي وارتاح اريد اعرف اني شنو اريد بالضبط
ليش كلامي وتصرفاتي متناقضه من يوم عقدنه اني وراهب ولحد هذا اليوم
گتلها ياسيدتي ومولاتي اذا كانت تصرفاتي ناتجه بسبب السحر واعمال الشيطان والمايخافن الله
ف اريد منج تخلصيني من هذا الشي
لان نيتي يمج اطلب من الله ومنج تشفيني
تعبت يامولاتي والله وتعبت لااعرف شنو اريد
ولااعرف شتصرف
اريد ارتاح وراسي يصفه واصفالي على رأي بدل التناقض الي اني بي

ساعه كامله احنه بالزيارة امي مااسمع غير صوت شهكاتها بالبجي
سحبتها وهي بالعربانه لان اهواي نسوان يدافعن وخاف يوكعنها

طلعنه برة محمد ينتظرنه عيونه حمر وهذا حاله من يوم وفاة مهند اخوي اتغير مربي لحيته وعايش بحزنه وحدة لان هو ومهند قبل ميسافر جانو موبس اخوة عبالك اصدقاء
اكثر واحد متاثر بينه محمد

رجعنه البغداد بس شي بينه مرتاح يمكن لان تصالحنه ويه بيت عمي لان امي گضت النهار بس تضحك مرتاحه نفسيتها كلش
بس تبقئ الغصه بداخلها علئ اولاد اخوي الاربعه

يوميه تتصل بندئ تطمن عليهم بالبدايه امهم حيل تعبت لان متعلمين علئ ابوهم
جانت ندئ تشكي دائما بسبب دلال مهند لبناته التؤام اتگول طلع عينهن وهنه صغار حتئ من يغلطن مايحاسبهن كلش يحبهن
اما بالنسبه للتؤام الثاني اثنين ولد سماهم رافد ومحمد علئ اسماء اخواني

مرت الايام وامي ومرت عمي يوميه يتخابرن وحدة تحجي للثانيه ابسط الاشياء
امي ماتگدر تلزم الموبايل لذالك افتح سبيكر واخلي يمها

بيوم كاعدين كلنه وامي عينها علئ محمد ومبتسمه

محمد،،خير حجيه اليوم ناصبه عليه من الصبح لسه شكو?

سعاد،،ي ييمه ا اريد افرح ب بيك قبل ماالله ي ياخذ ا امانته

محمد،،هم رجعنه الهاي السالفه

سعاد،،ا اريد اشوف ويلادك قبل مااموت

محمد،،اسم الله عليج حجيه شعندج ويه الموت اليوم?
وبعدين عمري تناوش ال38منو تقبل تاخذلها شايب?

لارا،،ههههه سهمك الراحه اصلا اكو بعدهن اصغار بالعمر يتمنن ياخذن واحد بعمرك لان يشوفنه واعي وفاهم

سعاد،،اني ش شفتلك بنيه تنحط بالگلب
حبابه و حلوة

محمد،،ومنو هاي بالله?

سعاد،،فطومه بنت عمك

لارا،،بقيت صافنه يمكن اذا واحد يجي قبل ويكلي فاطمه ياخذها محمد اگله انته مخبل ومستحيل يصير هيج شي
بس سبحان الله القادر علئ كل شي
الي قلب حالنه من حال الئ حال بعد العداوة زرع المحبه بيناتنه

محمد،،ابتسم لوتي اصلا هو من اول ماشافها يوميه يسال عنها سؤال شكل
بس يمكن جان خايف من الفكرة لان مثل حالتي مامصدگين واخيرا اتراضينه ويه بيت عمي

امي طارت من الفرح تتمنئ هسه تروح تخطبها
اجت سجئ مبوزة

سجئ،،هاا عمه مبين من هسه راح تحبيها اكثر مني

سعاد،،ا انتي ب بنيتي المداريتني
ابنيتي ا الي ض ضلمتها ب بحقدي

لارا،،امي بسرعه بجت وسجئ گامت حضنتها

سجئ،،كافي عمه ترة والله نسيت وشي راح من زمان
بس حبيت اتشاقه وياج

لارا،،صرت اشك انو الله سبحانه وتعالئ اخذ مهند حتئ تبرد نار الحقد والانتقام عند امي

اتفقنه انو ثاني يوم نروح كلنه سيارتين البيت عمي نخطب فاطمه انطيناهم خبر
بجيتنه بس ماجبنه طاري للسالفه

محمد،،مبين من شكله فرحان
وصلنه للنجف ويه صلاة الظهر

بعدنه بالباب مال بيت عمي ومحمد جاي ينزل بعربانة امي
انفتح الباب وطلع راهب

ردت اوگع من الهبطه گلت هسه يطردنه من الباب
بس الفاجئني بادر بالسلام ويه محمد بس امي سلم عليها من بعيد
ادري مايحبها بس حاله حالنه يريد يتم الصلح
بعد ماجان مصمم ع الانتقام وفعلا اني الوحيدة الانتقم مني

سلم ع الكل بسلام عادي حال اي شخص يجي ضيف ومن واجبه يحترم ضيفه حتئ لوكان عدوة

ماسلم عليه ابد ولاكأن شافني
دخل واحنه وراه وعمتي اتلگتنه بسلامها الحلو
فطومه طلعت بعبايتها سلمت علينه بس رفعت عيني اجت بعينه بسرعه دار وجها ودخل للبيت

كلنه گعدنه بالاستقبال وفاطمه جابت ماي انطته الراهب وزع للكل وصل يمي حط الدوله والكلاص ع الميز ماانطاني
اشلون فشلني يتعامل وياي بكل برود صدگ انقهرت

بعدها راح جاب سمج شوي ومحمد راح وياه
احس روحي بحلم مامصدكه والحلو بالموضوع الكل فرحانين ويضحكون ولاجن قبل بيناتنه عداوه
محمد من اجينه راد يعتذر من راهب لان رمه علي وصوبه بيدة
بس راهب كاله لاتفتح دفاتر قديمه خلي كلشي ورة ظهرنه واحنه ولد اليوم

وفعلا راهب ورافد ومحمد مخلصيها ضحك وسوالف
واني وامي وسجئ يم الحجيه گاعدات
تالي عمتي گالت

الحجيه،،يمه انتن موخطار گومن ويه فطومه حضرن الاكل

لارا،،مرت رافد تستحي بس من حجت الحجيه نهضت الابنيه رحنه اني وياها للمطبخ ساعدنه فاطمه كلشي جاهز بس رتبنه بالمواعين

بعدها كعدنه نتغدة وراهب الينقل بالصواني والمواعين
ردت بس يباوعلي بنظرة وحدة بس ولاكأن يشوفني

احس احترگت روحي بسببه حسيت بعد مايحبني مثل قبل

كملنه الغدة ونقلنه المواعين للمطبخ
الولد ضلو بالاستقبال واحنه رحنه الغرفه الحجيه لان تعبانين من الطريق كالت تعالن مددن بالغرفه اخذن راحتجن

ماجنت ادري فاطمه حاجيه العمتي علئ موضوع السحر

الحجيه،،ام رافد اكو سيد بالحله قريب عن الامام زيد ابن علي عليه السلام اسمه سيد علي
سامعه بي من زمان اريد اخذج اله انتي ولارا

ام رافد،،خيتي اني مابيه حيل عود اخذي لارا وهي تجيبلي وياها بيرغ لو بخور

الحجيه،،هذا هو چا اليوم انتم اتباتون اهنا لان السيد يگعد الصبح ياخذ خيرة  حتئ اخذله لارا

ام رافد، ،والله اني اكيف بس شوفي الولد خاف عدهم شغل ومايگدرون يضلون

لارا،،عمتي طلبت من رافد ومحمد انبات بس رافد كالها مااكدر بعد ملحت عمتي ياالله وافق

بليل راهب اخذ محمد ورافد عزمهم ع شط الكوفه  من راحو امي فاتحت عمتي بموضوع خطوبه فاطمه
عمتي اتفاجئت بس ماحجت شي گالت خل اسال اخوها وبعدين ارجعلكم الخبر

للساعه 11بليل ياالله رجعو گاعدين بالصاله منجمعين ضحك وسوالف وهو ولاحتئ معبرني
گاعد گدامي عينه بموبايله
اني عيني علي ماشلتها ابد
عيوني وحدهن مركزات بي
رفع عينه باوعلي ارتبكت ابتسم بطرف شفته ورفع حاجبه
احس فشلني لان جنت اباوعله وابتسامته مبين يستهزء

شويه وفاطمه فرشت لخواني وحدهم
واني وسجئ وفاطمه فوگ بغرفة فطومه
وامي بغرفة الحجيه

قهرني بتصرفاته متت قهر مالگيت روحي غير جريت موبايلي من شفتهن نامن بالبدايه اترددت بس بعدين كتبتله ترة بددون ماانتبه باوعتلك لتاخذ نظرتي بغير فكرة

ثواني وطلع مرئي دزلي

راهب،،نظرة مثل شنو ست لارا?

لارا،،ارتبكت والموبايل بيدي يختض
كتبتله خاف عبالك جنت اباوعلك لان عندي شي
ترة ماميته عليك بس بدون ماانتبه باوعتلك واصلا بالي مويمك

راهب،،چا يمن بالج?

لارا،،اذا مايزل الساني ماارتاح لان غبببيه مااعرف اجمع كلمتين واحجيهن اله بصورة صحيحه لان ارتبك واگوم اردم العلوة بالنصه اتيه حتئ الساني
كتبلي

راهب،،ماتجوزين ابد

لارا،،بلعت ريگي عرفته ضاج
بعد لااني كتبت ولاهوه
خمس دقايق واجتني رساله منه

بمجرد مافتحتها فتحت عيوني علئ وسعهن
واني اشوف صوري دازهن
يعني من كنه گاعدين كلنه سوة وعينه بموبايله

كان ياخذلي لقطات صور بدون محد يحس بي

مااعرف شجاوبه واني اشوف عيوني علي بالصورة

راهب،،كلش مامنتبها عليه
تصبحين علئ خير

يتتبع،،قرائه ممتعه

بنات فدوة اكو كثير منكم مامصوتين المقدمه الروايه
رجائا اهم شي عندي مقدمه الروايه صوتولها