رواية راهب ابو غضب الفصل الثالث 3 - بقلم Zahra_Alhussnawy

علمني اشبگه شبگ
ولو مااشبگه اختنگ
وبالعشگ انه اختلف
حتئ بصلاتي عشگ
مابين فرض وفرض
اخذلي شفه وحلگ

،،،،،،،،،،،،،،،،،،،،
وهذا البارت تعويض لعيونكم

بس ياريت ادوسون هاي 👈⭐
حتئ اذا ادوسوها بدون نت
من يجي النت تطلع يمي تصويت 😂😂

قصة راهب ابو غضب

للكاتبه زهراء الحسناوي

،،،،،،،،،،،،،،،،،،،،،،

ام احلام،،دخل مثل الاعصار مايشوف گدامه

گتله بخوف اسم الله يمه اشبيك ?
دفع ايدي وگال

راهب،،سالتج يمه وجاوبيني احنه بيت الخبازة وام الروبه ?

ام احلام،،نزلن دموعي وانه اشوفه يحجي ويرجف من العصبيه گتله واني امثل الكبريأء والقوة

اي يمه احنه والشغل موعيب طول عمري موكلتكم مال حلال بتعبي وتعب اختك وتعبك

اني ماتهمني المظاهر المهم مااقصر عنكم بشي لو اعرف اشتغل خدامه بالبيوت

راهب،،قسما بمحمددد اذا سمعت بيجن خابزات الواحد احرگ البيتتتت سمعتنننن

ام احلام تركنه وراح وهو روحه شايطه لليل وهو ماكو اتصلت بقاسم من التليفون الارضي گال نايم بالاستقبال يمي لتخافين من يهدئ يرجع

عفته براحته من يعرف الجاي اسوي المصلحته راح يبرد گلبه

بعدها ابتدت الامتحانات سادس وزاري ماخليت واحد مانخيته دائما ادعي الله واهل بيته ينجح وليدي وياخذ الشهادة بيدة

رغم كلامه وياي قليل بعدة ضايج مني لان ضميت عنه سالفة الخبز بس هو گدام عيني كلشي مااريد خلي زعلان بس المهم مگابلني وگاعد

انتهت الامتحانات وراهب صفه جلد وعظم من الدراسه بس الله عوضه من نجح وجاب معدل عالي

من فرحتي ركضت ل ابو الاسواق اشتريت جكليت صرت امشي وانثر بالشارع ناذرة نذر الوجه الله

معدله عالي اتمنيت يطلع مهندس لو صيدلاني
بس فاجئني من گال

راهب،،يمه راح اقدم علئ كليه الضباط لان هذا حلمي من زمان

ام احلام،،وليدي منين اجتك الفكرة هاي واني واختك منو النه ??

راهب،،ليش اني وين رحت ?

ام احلام،،يمه دورة وتدريب ويادوب نصير نشوفك

راهب،،كلها كم شهر وتنتهي الدورة وبعدها اداوم كليه ضباط
ماتكيفين ابنج يصير ضابط وتفتخرين بي?

ام احلام،،يووم المنئ وليدي بس گلب والده واخاف اعليك

راهب،،لاتخافين يالغاليه الله الحافظ

عودة للحاضر، ،،،،،،،،،،،،،،،،،،

راهب،،فزيت من صفنتي علئ صوت قاسم دخل بيدة گلاص جاي
اخذته منه

ااايي تسلم ابو الشباب اجه بوكته

قاسم،،واشبيك لكيتك صافن اليشوفك يگول غرگت السفن مالته وانباگن البعران

راهب،، لاولك بس اتذكرت ايام گبل

قاسم،،تذكر من جنت تفشخ الزعاطيط واني انكتل بمكانك

راهب،،انته مطي جا شسويلك مشكلتك هاي

قاسم،،هو هذا تاليتي بالاخير صرت مطي

راهب،،حشه المونكي

قاسم،،ولك المونكي قرد

راهب،،دگوم ياقرد ياابن القرد شوفلنه شي ناكله حمستني حمس بالجاي

قاسم،،اگلك ترة اني وانته نفس الرتبه لارتبتك اعلئ مني ولارتبتي اعله. منك وكاضيها تخدم براسي
وفوگ الضيم ولك انه اكبر منك حيوان

راهب،، اليشوفنه سوة عبالهم انه ابوك

قاسم، ،غير الله مبارك بيك مخليك شكبرك عبالك ملاكم
اكلك بس اريد اسالك سؤال
انه وانته دوم سوة وناكل نفس الاكل

شو انه شكلي بالنزلان ورگبتي برفع المحبس وانته رگبتك اليريد يذبحك لازم يذبحك بالكوسرة لان السچينه تنعمي

راهب،،دگوووم لابارك الله بيك اگول منو حاسدني طلعت انته

قاسم،،عوفك من هذا الحجي اليوم معزومين يم الشله باجر اجازة خلينه اليوم نسهر للصبح

راهب،،نسهر ليش لا

قاسم،،بس بروح ابوك فك الجبسه شويه واضحك ترة ماماخذك الفاتحه كل مااخذك الوجه معقوج عبالك عندك طلابه وتريد تتعارك اضحك بابا اضحك ترة الضحك بلاش موبفلوس

راهب،،اضحك من اسوي البالي ويهدئ ضميري ساعتها اشبعك ضحك

قاسم،،سويتلي واهس اروح اذبح جلال عاد نشوف ضحكتك حتئ نگول عندة اسنون

راهب،،ابتسمت علئ كلامه

طلع قاسم ورجعت ظهري ع الكرسي رفعت رجليه ع الميز الكدامي خليت اديه جوة راسي

عجيب اشلون خلصت ذيج السنين الي دائما اسميهن سنين القحط والعوز دائما جانت امي تگول يجي يوم ويخلصن سنين العجاف ويحل محلهن سنين الراحه والخير
بعد مادخلت كليه ضباط وبعدها اترفعت ملازم وانوب ملازم اول بس بعدة طموحي اريد اكثر

بهاي السنين حديت اسنوني علئ عمي اكثر اتمنيت اشوفه كدامي يمكن اكله ومايبرد گلبي

عرفت بي سافر ال سوريه سنتين ورجع وحاليا مستقر ابغداد
بعد ماجان بيته قريب علئ بيتنه بالنجف

قبل فترة عرفت اخبارة وعرفت وين گاعد وشنو شغله وشسوه ماسوة بهاي السنين

ماشايفه ولامرة بس جانت اكو صورة اله ويه ابوي
گصيتها لان كاره وكفته يم ابوي وهو چتاله

حلفت ادفعه الثمن ولازم يكون غالي بغلاة روح ابوي

فتحت المجر وطلعت صورة هو وعائلته كل واحد ملف وحدة

جلال صاير تاجر بالاراضي الزراعيه وبنفس الوقت دلال مال بيوت

رافد الابن الاكبر خريج ادارة واقتصاد گاعد بدون وظيفه عندة محل انشائيات

محمد،،الابن الوسطاني وهذا شغلته معلم متعين بمدرسه اهليه

حاليا جاي اجمع معلومات عنهم عن طريق واحد يعرفه قاسم
قاسم رفيق دربي واخوي واحزام ظهري يعرف كلشي عني لذالك سلمته المهمه حتئ يعرف اخبارهم

گال بعد اثنين من العائله غير الام باجر الولد يجيبلك معلوماتهم

صارت الساعه ب 5العصر طلعت من المركز
رحت للشقه مالتنه ماجريها انه وقاسم بس كل واحد بينه ينزل بفترة تختلف نادرا مانلتحق سوه

نزعت ملابسي ودخلت للحمام سبحت
وارتاحيت بعدها اخذت نقالي اتصلت بالوالده حيل مشتاقلها صار اسبوع ماشايفها

ام احلام،،يمه اوليدي يبعد امك والله گلبي خلصان عليك صار اسبوع مانازل للبيت

راهب،،سلامتج يالغاليه انشاءالله يومين وانزل لايضل بالج
بشريني اشلونها صحتج وفطومه اشلونها
ولتنسين خل تكتبلي شنو محتاجين حتئ من اجي اجيبهن وياي

ام احلام،،مامحتاجين غير سلامتك اوليدي يحفظك الله واهل بيته بحفظهم

راهب،،سديته واتمددت نعسان ماادري بروحي شوكت غفيت گعدت علئ صوت قاسم

قاسم،،صحي النوووم مو يوم العلم السهرة صباحي?

راهب،،ولك طايح الحظ تريدنه نسهر من المغرب
غير نروح ب 12
والساعه توها ب 10

قاسم،،اتصلت بيه سعديه واتگول اشلون جايبه بنات بعدهن بالباكيت لعيون ابو غضب

راهب،،مادام هيج الحجي سويتلي واهس اروح وياك

وفعلا بدلت ورحنه انه وقاسم واثنين ضباط ويانه من نفس الشله التعبانه مالتنه

اجت سعديه وجها يطرد النعمه اليشوف وجها يگول هاي جانت اطارد ويه خيل الحمزة
مرة جبيرة وجها ضايعه ملامحه

سعديه،،هله ب ابو غضب توها نورت الكعده

راهب،،منورة بيج سعديه خانم

جنت احجي بدون مااباوعلها تلعب نفسي منها بس مشكلتي مااگدر امنع نفسي من هيج گعدات شرب وبنات اونسه
طبعا امي عدها علم واهواي حاولت بس جنت قافل واكثر شي من اذكر ايام الجوع المرينه بيهن احاول انساهن بالشرب وكل يوم يمر احقد علئ عمي وعائلته اكثر واكثر
اول مالتحقت بالكليه العسكريه جنت اتعب حيل تدريبات قاسيه وعقوبات اقسئ يطلعولك گلب غير گلبك بالبدايه جنت اطلع ويه جماعتي بس اگعد وياهم مااشرب بعدين
أصدقاء السوء گدرو يسحبوني وياهم ويخلوني اصير مثلهم وامشي بدرب الحرام

اذكر مرة ماادري ورجعت من بغداد للنجف سكران بس بطبعي ماافقد كلش حتئ لو اشرب اهواي
بس للحد المعقول
رجعت للبيت وامي بيومها حلفت ماتغسل ملابسي ولاتنطيني اكل اتگول انته نگس وحرام نخدمك

تالي بعد ماعدتها صارت سوالفي وهوستي كلها ابغداد
ومن ارجع للنجف يومين ابقئ عطشان ع المشروب

ندسني قاسم لان گاعد واتصفن
دخلت بنات كلش جميلات

وحدة منهن كانت الأجمل بينهن
طول ووجمال گعدت يمي لزمت ايدي وسحبتني اخذتني وياها

بعد العلاقة كرهت نفسي وحسيت بغثيان فضيع
هذا حالي كل مااقترب للحرام اتندم بعدها

راهب،لزمت راسي احسه يريد ينفجر وين كنت؟؟
اووين صرت بالحضيض

تركتها وطلعت كاره روحي مااعرف ليش جاي اسوي هيج كل مرة انطي وعد النفسي اترك هاي السوالف
بس بعدها الگه نفسي بهذا المكان

بقيت اجر جگارة وره الثانيه انتظر قاسم نص ساعه وطلع يدردم لان دزيتله رساله گتله راح ارجع اذا ترجع وياي انه منتضرك بالسيارة

فتح الباب ودخل وهو شايط

قاسم،ولك حيوان ليش اتخليني اقسملك واغرد بنص الليل موعلئ اساس نسهر للصبح تالي ساعه ماخليتنه نكعد متوازي ع الطلعه

راهب،،كافي ماشبعت لزگت جوة وانه راسي صار طبل من الهوسه

رجعنه للشقه دخلت سبحت وذبيت من راسي معدتي صايرة تحرگني من اشرب

انتظرت للساعه 3جوعان طلعت قوطيه باگله سويت منگوعه باگلا وبيض

اكلت وگمت غسلت وذبيت روحي نمت ماگعدت غير لمن دگ المنبه الساعه ب 6ونص

گعدت سبحت وبدلت طلعت بدون ريوگ
للدوام

،،،،،،،،،،،،،،،،،،،،،،،،،

لارا،،گعدت علئ صوت المنبه طفيته ورجعت نمت بعدني نعسانه ماشبعت نوم

اخذتني الغفوة فزيت علئ صوت امي

ام رافد،،ولج ماما اكعدي الساعه 7ونص الخط ينتظرج بالباب وانتي بعدج نايمه

لارا،،طفرت من نومي لمن عثرت باللحاف اوگعت
وهاي عادتي يوميه اتاخر

ام رافد،،انتي لو تعوفين الموبايل واتنامين من وقت جان گعدتي بنشاط

لارا،،گمت اردم ردم بالغراض بسرعه غسلت ولبست زي الجامعه تنورة طويله وقميص ابيض وسترة قصيرة

لفيت حجابي بسرعه عود بالسيارة اعدله
اصلا ماخذة احتياطي بالجنطه حاطه حمرة بناتي وكحله وعطر وكم شغله

نزلت اركض طلعت بدون ريوگ اتلگاني ابو منذر صاحب الخط

ابو منذر،،بنيتي مايصير هيج ترة وراي فرة وبنات غيرج اذا بس يمج اتاخر نص ساعه شنو ذنب الباقين ياريت تضبطين الوقت مرة الثانية

لارا،،اشلون فشله فشلني گدام البنات
كتله صار عمو تدلل بعد مااتاخر عليك

وصلنه للجامعه نزلت الكليتي كلية الهندسه المعمارية مرحله ثانيه
اتلگتني ساندرا وهاي ضلعتي وصديقتي مسيحيه اليشوفنه عبالك تؤام بس الفرق بيناتنه اختلاف الديانه

ساندرة،،صباحو لارتي ولج شوكت تجين قبلي واتفرحيني دومج متاخرة

لارا،،ههههه والله موبيدي ابقئ اراجع المحاضرات
لمن امل بعدها اتابع مسلسل لان طگ گلبي لعبت نفسي لومختارة غير الهندسه اشرلفلي راح نشيب واحنه صغار

ساندرا،،ههههه اي فعلا بس النتيجه حلوة من ينذكر اسمج ويگولون المهندسه لارا جلال ياسر

لارا،،اوووو حلم مامصدگه يتحقق

ساندرة،،ياالله گومي ندخل للمحاضرة

لارا بس بعدها تاخذيني للنادي تريگيني علئ احسابج

ساندرة، ،هههههه صار تدللين وبعد الكليه اخذج عدنه قداس بالكنيسه اريد العذراء تفتح دماغج وتنور دربج

لارا،،دخلنه للمحاضرة بدة دكتور عمار يشرح بس نظره مسلط عليه مااهتميت ادري بي وملاحظة هذا الشي من زمان حتئ ساندرا والبنات منتبهات علئ نظراته

دكتور عمار وسيم جدا طويل بشرته حنطيه شعرة اسود رافعه بترتيب ولحيته محددة هم بترتيب عيونه لونهن اخضر اكثر انتقائه للملابس هو اللون الاسود دائما يجي لابس اسود مرة سالته طالبه گالتله استاذ ليش دائما نشوفك لابس اسود
جوابه كان مختصر گالها لان الاسود سيد الالوان الراقيه

انتهت المحاضرة ردت اطلع سمعت صوته گال

دكتور عمار،،لارا من رخصتج ممكن اخذ من وقتج ثواني

لارا،،وگفت كدامه منزله نظري للگاع گتله اتفضل استاذ

دكتور عمار،،لارا عندي موضوع وياج ممكن تشرفين المكتبي

لارا،،صار استاذ تدلل

اخذ جنطته وطلع انتظرته بين مايوصل للمكتب لحگته دگيت الباب اجاني صوته ياذنلي بالدخول

دخلت لگيته يرتب بالاوراق شافني حطهن علئ صفحه واشرلي ع الكرسي الگدامه

گعدت منتظرته يحجي شنو الموضوع بس الصدمني كلامه

دكتور عمار،،لارا بدون لف ودوران اني معجب بيج وبااخلاقج من زمان وحاب ادخل البيت من بابه
لذالك اريد اتقدملج

يييييييييتبع