افتقدك بشكل موجع يشبه انين الموت
لارا،،ردت ابتعد حكم قبضة ايدة بقوة على ايدي
راهب،،شوكت تسامحيني والله تعبان بدونج
لارا،،يحجي بصوت تعبان ويه كل كلمه يطبع قبلة خفيفه تخليني ارتعد من الخوف
لمساته اتجرأت اكثر كل مااحاول ابتعد افشل صرت اشهگ بالبجي بصوت مكتوم
صحئ علئ نفسه من شاف الخوف بعيوني
راهب،،لارا لاراا اهدي شو باوعيلي
لاراا فتحي عيونج اعتذر والله بس باوعيلي
لارا،، مجرد لمساته خوفتني موبيدي بس احس نفس ذاك اليوم ينعاد فقدت اعصابي من خوفي غمضت عيوني احس سنوني مسطكات من الرهبه
اسمعه يحجي وياي ويلعن بحضه بس جنت مغمضه مااگدر افتح جسمي يرعش
راهب،،لارا بس باوعيلي حبيبتي والله بطلت توبه اتقربلج شو فتحي عيونج ريحي گلبي
لارا،،فتحت عيوني اباوعله وجها عرگان مبين علي القلق والخوف
مااكدر اسيطر علئ انفاسي السريعه لزم ايدي گعدني عدلت كعدتي رفعت ايدي ابعد بشعري ورة اذني عركانة ومرتبكه دموعي تنزل
جر راسي باسه وضمه الصدرة
راهب،،اسف يروح وگلب راهب والله اعتذر موبيدي
لارا،،بقيت مدنگه ودموعي تجري بعدني عن صدرة لزم وجهي بيدة
راهب،،وغلاتج احبج وغلاة هاي ادموعج احبج اعذريني لان من اشوفج يمي مرتي وحلالي وممنوع عنج انتي هم اعذريني
لارا،،رفع ايدي باسها
راهب،،وهاي ايدج وراسج ابوسهن بس سامحيني وداعتج وداعة هاي العيون ابقه انتظرج اتسامحيني
لوااعرف انتظاري يكلفني عمر هم ماراح اتعب ولاراح امل وشتفصلين اني البس بس كون ترضين
لارا،،رفعت وجهي مسحت دموعي گتله انته بس بطل تچفت چفت واني اسامحك
ضل يباوع بوجهي مبتسم عض شفته بهدوئ وغمض عيونه علئ كيف وفتحهن
راهب،،والله منظرج مايتفوت والشيطان شاطر
لارا،،دفعته شاردة منه وهو خربان ضحك مسح وجها بثنين ادي جر نفس ونهض
دنگ المستواي وهو كاتم ضحكته اباوع التفاحة ادم تصعد وتنزل يبلع بريگه
راهب،،هي بوسه وذبيتي طن دموع عليها
لارا،،خزرته
تركته وطلعت ادردم اسمع صوته يضحك بصوت عالي
نزلت خليت الاكل بالصينيه وهو نزل بيدة ملابسه والخاولي دخل سبح وطلع اجه يمشي علئ كيف وعينه مني
گعد كبالي وغمز
الحجيه،،عيونك اوليدي لاتضل تغامز
راهب،،شسالفه حجيه عايفه الدنيه وگاعدلتي ركبه ونص ترة بس عيوني يشوفن كلشي مامحصل الله وكيلج
لارا،،غصيت بالاكل وهو يصيح اسم الله اسم الله باوعتله خزرته وهو مدنگ ياكل ولايمه يشمر الحجي ويغلس
كملنه شلت الاكل وصعدت نزلت ملابس ودخلت للحمام احب اسبح وانام
من صعدت صار بوجهي بالممر وكف كدامي يمنعني اكمل طريقي
راهب،،اليشوفنه يگول اكو انه بالموضوع
مايدرون مخلصيها نتباجة من البوسه
لارا،،رفعت وجهي اله فتحت عيوني
ضحك. بصوت عالي گام يگح حنئ نفسه وايدة علئ وجها يگح من الضحك تالي عدل وگفته اتحمحم وگال اللهم اني صائم
بقيت فاتحه عيوني اشلون بدل الموجه راد يفوت غرفته فتح الباب دخل ورجع مد راسه منتجي ع الحايط
راهب،،فوتي بويه وبعد لاتتحارشين بأبن العالم گوة
ترة اگول ل امي عليج
لارا،،زم شفايفه مايريد يضحك دخل وسد الباب
خررب والله اكبر مرتكب شفته بحياتي
تركته ودخلت للغرفه مانمت انتظرت ياذن توضيت وصليت نمت ماگعدت غير بالوحدة الظهر نزلت
لگيت الحجيه اتصلي هي وفاطمه وضرغام متمدد يمهن بالصاله
بقيت ادور علي بعيوني تالي اتذكرت اليوم يلتحق ماادري ليش ضجت لان ماراح اشوفه اسبوع
بليل اجاني مسج ع الماسنجر
راهب،،اشتاقيتلج شيصبرني اسبوع
لارا،،اممم كون اكثر تبقئ
راهب،،ليش ولج?
لارا، ،احسن
راهب،،لازم مرتاحه بدوني
لارا،،كلش
راهب،،ترة هسه اضرب الدوام واجي
لارا،،حبيت استفزة گتله ماتگدر
راهب،،اهاا
لارا،،ماتگدر ليش تعاند
راهب،،والله جاي اشم ريحة اشتياق ليش تكابرين
لارا،،احس فضحت روحي بدون ماانتبه اني فعلا جاي استفزة حتئ يرجع
راهب،،خوينسة راهب
لارا،،امم
راهب،،بويه لاتسووين امم وا امممم ترة لازم روحي بالقدرة بدون اممممات
لارا،،تفكيرك منحرف اني شكو
راهب،،والله بس وياج ينحرف وينزل ع الترابي
لارا،،مااعرف ليش اتذكرت غزل گتله ليش وغزل نسيتها?
راهب،،غزل شنو?
الف وحدة مثل غزل يرحن فدوة لعيونج
لارا،،عرف اشلون يخليني ابتسم
راهب،،تدرين نايم بغرفتي وقاسم فوگ راسي مشغل التبريد والغرفه ثلج مال اطرد المطي النايم يمي والفج بحضيني للصبح وانعل ابو الاجه لابو الراح
حتئ الصبح مااگعد واحتمال ارمي العميد اذا دگ الباب
لارا،،صدك ضحكت گتله احضن قاسم ونام
راهب،،طاحض تفكيرج حتئ اذا شافونه الصبح عبالهم صدگ منحرف
لارا،،نعست گمت كلمه اسمعها وكلمه اعبرها تالي گال روحي نامي واقفلي بابج ترة ماعندي مانع هسه انزل للبيت وعود خلصيها بجي حتئ اسمط ابوج
لارا،،راااهب لتغلط علئ بابا
راهب،،دروحي باباتي هو الساني مكوك ع الغلط علئ سيد الوالد حتئ اذا مااغلط الساني ماخذ الشمرة
لارا،،تالي عفته ونمت هذا طبعه
ثاني يوم العصر اتصلت بساندرا واتفاجئت من گالت اتعرفت علئ ولد بالقداس وبينهم نظرات اعجاب
بقت تحجيلي عن المواقف التجمعهم والصدف استنتجت الولد معجب بيها
وهي هم مبينه اتبادله الاعجاب
بقينه اني وياها يوميه وحدة تتصل ع الثانيه ومن احجيلها علئ سارة تزعل لان اتغار اتگول عرفتج مصادقه غيري من صرتي تغلسين عني
اضحك عليها وگوة اراضيها من زمان اتغار ماتقبل اصادق غيرها واني هم اضوج صداقتنه حلوة اتحسنه تؤام بروح وحدة
بليل كاعدين ورة الفطور اندگ الباب اجت ام قاسم وسارة والعرفته من ام قاسم اخوها الصبح يسافر حتئ يرجع يشوف نتيجة الزرع مال الغدد لم سارة
وعافها يم اخته لان ماعندة غيرها
اخذت سارة وصعدت للغرفه مبينه من وجها ضايجه
دخلنه سديت الباب كعدتها كتلها ياالله احجيلي اشبيج?
شو هاي طگتها بجيه حضنتها واني قلقه علئ وضعها مايلوگلها البجي
بعدتها عن حضني سالتها احجيلي وكعتي گلبي
سارة،،شحجيلج لارا صار اسبوع من علنو النتائج وخايفه مارحت استلمت النتيجة بس صديقتي ماخذه صورة الها ودزتها الي حتئ اتگلي شگد معدلي ادري ناجحه بس المعدل مصيبه
لارا،،شگد معدلج?
سارة،،57
لارا،،يمعودة عبالي راسبه الحمدالله من نجحتي
نحجي واتصل قاسم
موبايلها سماعته عاطله يعني ماتسمع اذا ماتفتح اسبيكر
قاسم،،ها سويرتي شو اليوم لامكالمه لامسج لاختيبي كلشي ماكو
سارة،،ماگدرت اتحمل بجيت
قاسم،،بوويه بوويه الخبله تبجي لازم صايرة مصيبه احجيلي اشبيج يروحي
سارة،،نجحت
قاسم،،الله يطيح حضج عبالي امج بيها شي
اكو واحد يبجي لان ناجح
سارة،، اي اني
قاسم،،لازم مصخمه وملطمه شگد معدلج??
سارة،،57 حجيتها وطگيت بجي
قاسم،،ادري يابويه موناجحه عليش البجي ?
سارة،،جان حلمي اطلع صيدله
قاسم،،انهجم كوخج ام الصيدله تريد تطلع صيدله ومعدلها درجة الحرارة اعلئ منه
سارا،،قاااااسم هاي بدل ماترفع معنوياتي
قاسم،،ياالله حبي لاتبجين انشوفلج واسطه وندخلج بشخصية عگروگ يشرحو للطلاب
لارا،،عضيت حجابي اريد انفجر من الضحك وهاي مبوزة
سارة،،والله موصوجك صوجي احجي وياك
قاسم،،ياالله حبيبتي ترة والله ضجت بس غير ارفع معنوياتج عدنه اهواي حلول لتضوجين مثلا اذا طلعتي بدل متحطين عطر رشي دوة گحة عود صيدلانيه وكذا
سارة،،ترة راح ابجي
قاسم،،لتضوجين حبيبتي
سارة،،اشلون مااضوج هذا مستقبلي
قاسم،،اني مستقبلج حبي
سارة،،متت باجر عگبه منو ينفعني غير شهادتي
قاسم،،لابارك الله بيج يالبومه ابيش طالبتني ?
سارة،،لعد بطل انتقاداتك
قاسم،،مامنتقدج حبي بس لو شادة حيلج شويه جان طلعتي معدل زين بدل هذا معدلج اليكطع الواهس والله احس ضربتيني مدفع 57من كلتي معدلج 57
سارة،،والله حروح وزعلت منك وعتبني اذا اتصلت بيك لوجاوبتك
قاسم،،تعاي يالخبله بويه حقج عليه خسرنه الدراسه خومانخسر الدراسه والحب بيوم واحد
ياالله احجيلي وين انتي?
سارة،،يم بيت خاله ام راهب كاعدة يم لارا
قاسم،،واكيد فاتحه سبيكر وسمعتني
سارة،،اي
قاسم،،همزين ماجفصت جدامها بويه من اجي اجيبلج جهاز لاننفضح بعموم العراق
سارة،،ايفون
قاسم،،والله عندي بس هايفون اهفج بي
ام الايفون هو اني شايل جهاز دينه كامز
سارة،،اي اي اطرد عيون همزين جهازك احدث موديل
قاسم،،سجينه وملح سجينه وملح. عوذة منج خررب بحضي اذا عطل احسبي احسابج تنكتلين
سارة،،بطلت مااريد لتشتري
قاسم،،اي موهو بكيفج ترة راح اشتريلج حتئ نستر علئ رواحتنه خاف نلگة اوباما مشترك ويانه ع الخط لان سرج بگهوة
لارا،،سارة معطبه من العصبيه وهو صنفها تصنيف
قاسم،،ياالله زعطوطتي روحي لان نعسان اريد انام
ولتضوجين علئ معدلج بلكت تنقبلين كلية رياضه بهذا معدلج وعقلج المخيب للامال
سارة،،قااااسم
قاسم،،ههههههههه رايح رايح
لارا،،هههههههه ترة مبين ضاج عليج لان تبجين
سارة،،اي كلش بسيطه اني اله
لارا،،شويه واجت فاطمه گالتلها عمتج تصيحلج
نزلنه ام قاسم تعدل بعبايتها تريد تروح
اخذت سارة وراحت
مرن يومين عمتي اتصلت براهب تساله شوكت ينزل مجاز گالها بعده مامعلوم شوكت انزل
بليل نايمه بغرفتي حسيت شي علئ شايفي فتحت عيوني صارت بعيونه مدنگ يبوسني طفرت مخترعه
رااهب ش شوكت اجيت?
راهب،،توني دخلت بعدني مامبدل
لارا،،اش اشجنت اتسوي
راهب،،ازيح التعب ابوسه منج
لارا،،خجلت دنگت گعد يمي لازم البيريه بيدة
جر راسي الصدر باسني بكصتي
راهب،،ميت جوع اذا بيج حيل انزلي سويلي لگمه بين مااسبح
لارا،،تركني وطلع راح الغرفته گمت نزلت سويت ماعون كباب وطرشي وزلاطه حضرتهن بالصينيه اخذتهن خليتهن گدام المبردة بالصاله
طلع ينشف بشعرة باوعتله ابتسم اجه گعد قرب الاكل يمه
راهب،،اكعدي يمي حتئ تنفتح نفسي
لارا،،ابتسمت اتقربت بس مااكلت شبعانه وبعد ساعتين ع السحور
بدة ياكل وعينه مني كمل شلت الصينيه وسويتله جاي اخذته يمه شفته يشرب جكارة طفاها واخذ الكوب مني بقيت گاعدة بمسافه عنه موكلش بعيدة
طلعت الحجيه شافته
ام احلام،،هله بشمعة داري هله وليدي اشوكت اجيت?
راهب،،هله يمه ماصار ساعه من اجيت
ام احلام،،جا مواتصلت بيك كلت مامعلوم شوكت انزل
راهب،،ادري بيج تضلين قلقه وكل شويه تتصلين وين صرت اوين وصلت اجيت بدون مااكلج حتئ ماتضلين سهرانه
لارا،،عفتهم وصعدت الغرفتي مددت
نص ساعه وانفتح الباب دخل باوعلي وابتسم وهو يسد الباب بهدوئ
ارتبكت وعدلت گعدتي ادري يحاول يكسبني بس مااگدر احسها صعبه اسامحه
راهب،،راح انام اهنا بالگاع اخاف انام وحدي
لارا،،حجاها وهو كاتم ضحكته گتله عادي هسه اصيحلك الحجيه واني انزل انام يم فاطمه
ردت اعبر لزمني جرني الصدرة حضني بكل قوته واگفين واصلة الصدرة هو طويل مدري اني كصيرة
راهب،،ااافيش ياريحتج تردلي العافيه
لارا،،ردت ابتعد عصرني حيل احسه يريد يدخلني الگلبة
بعد عني وهو يباوعلي
راهب،،ماالله سهل وسامحتيني ترة مييت امشي بدون روح
لارا،،اتلعثمت والدمعه انجمعت بعيني
گتله بصوت مختنگ اتركني براحتي الصار موشويه
راهب،،هذا هو يروحي شوكت ماتسامحيني راح تلگيني فاتحلج ذرعاني وگلبي
بس حني لتقسين كلبج ترة ماراح تنسين خلينه نبدي بدايه حلوة ونترك الماضي ورانه
لارا،،هزيت راسي كتله انشاءالله
راهب،،مالله هداج اتنيميني يمج بالغرفة ترة صدگ اخاف
لارا،،حجاها وضحك عود لوتي
گتله هسه اصيحلك عمتي
راهب،،دخيل ربج ورب عمتج وحدة اضرب من الثانيه عمي رايح امري لله
لارا،،تركني راد يطلع وكف بالباب جر حسرة غمض بتعب وطلع
مانمت انتظرت السحور نزلت حضرت الاكل ماكعدته اكيد ماياكل لان قبل شويه اكل
مرت الايام وباجر عيد قبل يومين اني وفاطمه گلبنه البيت ع الابطانه
وغير كلشي راهب صرت اني اهتم بي وبلبسه وبااصغر تفاصيله
كل مايحاول يقترب مني ابتعد عنه موبيدي مااگدر اسامحه صح علاقتنه اتحسنت بس من توصل السالفه خلص لازم ننجمع بغرفه اخاف وارتبك ينعاد كلشي براسي مثل الشريط يخليني انفر من وجودة يمي
المغرب دخل للبيت گال حضرن نفسجن انروح نزور ابو الحسن علي
جنت صدگ محتاجه ازور بدلنه اني وفاطمه والحجيه اربعه وعشرين ساعه تنگرط كرط الشيله تلمع والثوب يخبل اتگول اني مايعطلني بالطلعه غير جواريبي وفعلا اذا عدها طلعه مرات تاخذهن بيدها تلبسهن بالسيارة
كملنه لبسنه عباياتنه ونزلنه لگينا لابس وكاشخ والعطر يهف تارس البيت
لابس دشداشه بيضه بيدة السبحه
الحجيه،،ماحجيت من وكت عاد ناخذ فطورنه ويانه
اگلك يمه عود انطاها السيد باجر عيد لوعگبه?
راهب،،حجية اليوم المتمم ل ايام رمضان انشاءالله باجر عيد
وبالنسبه للفطور عليش متعبات نفسجن والمطاعم تارسة النجف نفطر بمطعم
لارا،،وصلنه قريب الامام ماقبلو تفوت السيارة طلعلهم الباج والهويه يالله دخلونه ذبينه السيارة بالكراج قريب كلش من الامام
نزلنه هو وضرغام يمشون گدامنه واحنه وراهم
وصلنه للتفتيش راحو واحنه دخلنه للتفتيش النسائي
عمتي اول وحدة كملت وطلعت واني اهواي نسوان كدامي بلگوة وصلني السرة
طلعت اباوع بالوجوه كلشي مااندل لاعمتي ولافاطمه موجودات
ردت ابجي انزلمت ايدي التفتت بسرعه شفته بصفي
راهب،،ادري طفله وتايها موذيج امي گدامج
لارا،،باوعت عمتي وفاطمه واكفات يم بوابة الدخول للحضرة هد ايدي مشه كدامي واني وراه
راحو يزورون واحنه دخلنه من جهة دخولية النساء زرنه وصلينه بس بجيت اهواي مااعرف علئ شنو بس حسيت مختنكه اريد ابجي
كملت التفت علئ عمتي گالت ياالله كومن نفطر
طلعنه لكيناهم ينتظرون برة
ضرغام،،وين راح نكعد?
راهب،،هسه اخذكم المطعم اكله فد شي
لارا،،فتنه المطعم فطرنه وطلعنه
وصلنه للسوگ نتمشه وگف التفتلي
راهب،،تعاي نمشي سوة
الحجيه،،اخذ مرتك خل تشتري خاف محتاجة شي
واحنه رايحين ويه ضرغام من نكمل نسبقك للسيارة
لارا،،راحو كدامنه واني وياه سوة دخلني المول
راهب،،شيعجبج اشتري
لارا،،دنكت گتله شكرا بس مامحتاجه شي
راهب،،بويه اشتري
لارا،،مااعرف اختار وهو موجود
حس بيه اشر للرجال علئ دشاديش كلش حلوات
باوعلي وهمس ذني قياسج
اخذت العلامه قريتها هزيت راسي ب اي
اباوعله صار يختار ويخلي يم الرجال
ابو المحل مخلي سيتات نوم ملبسهن للمانيكان
باوعلي جر حسرة بدون ماواحد يشوفه
اباوع اشكال والوان اشترة حطهن الرجال بالعلاليگ هو شال نص واني نص حاسبه وطلعنه
مشيت خطوتين
راهب،،انتظري اهنا دقايق مااتاخر
لارا،،حط الغراض يم رجلي بالگاع ورجع
وصدگ مااتاخر اجه شايل علاكه سودة بيدة
وصل يمي شال الغراض
راهب،،يالله بويه امشي هسه الجماعه منتظرينه
وصلنه للسيارة لكيناهم كاعدين ع الرصيف بالكاع ينتظرونه
رجعنه للبيت فاطمه نزلت وياي الغراض بسطنه بيهن بالصاله كومناهن تعبانين من الفرة
الحجيه،،يمه فاطمه اكتبي اليوم والتاريخ والسنه ع الحايط وگولي في مثل هذا اليوم راهب طلعنه انزور
البخت بلارا المفروض نندعيلها
لارا،،صدك ضحكت وراهب ايگلها اكره طلعت النسوان ايضلن يجرجرن بس اليوم انقهرت عليجن لان برمضان ماطلعتن
اخذت الغراض وصعدت للغرفه صرت اكدر بيهن كلش حلوات وذواق ذوقه حلو بلبس
عفتهن ونزلت يم الحجيه ماصعدت غير ل 12بليل
فتحت الباب اتفاجئت
العلاكه الجابها مخليها ع الجربايه ويمها سيت احمر ناري شكله فضيحه
انفتح الباب ودخل سدة وانتجه ع الباب
گلبي صار يركض سريع اباوعله اجه يمشي بكل هدوئ اتجاهي صار مايفصلنه شي
اديه ورجليه صارن يرعشن رفع وجهي بيدة دنگ المستواي ضليت صافنه بعيونه احس مثل السحر بيهن اضعف گدامهن بدون وعي غمضت
حسيت بدفو انفاسه قريبة من وجهي رجف جسمي
وبسرعه دفعته كل مايقترب مني اذكر الصار وامنعه عكد حواجبه
راهب،،ماخلص عقابي ترة گلبي خلص
لارا،،دنكت مااعرف شحجي
قرب شفايفه يم اذني وهمس
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!