رواية عانيت لاحبك الفصل الثالث عشر 13 - بقلم فاطمة محمود

آيه: هو إيه اللي حصل؟ نور: مفيش حاجة. شهد: مفيش حاجة إزاي؟ وإنتي عينيكي بتطلع قلوب. سلمي: هو الموضوع فيه قلوب كمان؟ ده الموضوع كبير. شهد: أمّال إيه؟ هتقولي ولا أقول اللي أنا شفته؟ نور: ياسلام! وإنتي عرفتي منين إنه قالي بحبك؟ آيه بضحك: متهزريش. نور بكسوف: ودي حاجة أهزر فيها يعني. سلمي بضحك: وإنتي مكسوفة ليه دلوقتي؟ إحنا مش فرس. نور: بطّلوا رخامة. شهد بضحك: إيه ده؟ فارس! نور بصت وراها، لقت فارس واقف مع يوسف.

نور بعصبية: شهد! البنات فضلوا يتضحكوا على نور. *** عند الشباب، مالك كان بيتكلم في الفون، وسيف واقف بيبص على آيه ويوسف. وفارس واقفين سوا. فارس: يوسف. يوسف بصله: إيه يا فارس؟ فارس سكت شوية، وبعدين قال: بصراحة كده، أنا بحب نور وعاوز أتجوزها. يوسف: تتجوزها؟ فارس: إيه يا عم؟ مش موافق ولا إيه؟ يوسف بضحك: لأ مش كده طبعاً. موافق بس اتفاجأت. فارس: وقعت قلبي يا عم. يوسف بضحك: لأ اطمن. أنا كمان عاوز أقولك حاجة.

فارس: قول يا حبيبي. يوسف حط إيده على رقبته: أنا بحب سلمي وعاوز أكمل حياتي معاها. كنت هقولك لما نرجع إسكندرية، بس إنت سبقتني. قولت أقول دلوقتي. فارس: سيبني أفكر. يوسف: تفكر؟ تبقى تنسى موضوع نور. فارس: أنسى إيه؟ موافق طبعاً يا عم. بس نرجع ويبقى تعالى إنت ونونا واطلبها من بابا. يوسف: أكيد طبعاً. سيف جي عليهم. سيف: بتكلموا في إيه؟ يوسف: وإنت مالك؟ سيف: هي بقت كده؟ ده أنا صاحبك. يوسف بضحك: ولا أعرفك.

سيف: أمّال أنا هنا معاك ليه؟ يوسف بضحك: واخد فيك ثواب. سيف: ماشي. أنا مش هرد عليك وهسأل فارس. سيف: كنتوا بتتكلموا في إيه يا فارس؟ فارس بضحك: أصلنا هنتجوز. سيف بضحك: ومين الضحايا؟ مالك: ضحايا إيه؟ سيف: ما إنت بقالك ساعة بتكلم في الفون ومش عارف بيحصل إيه. مالك: دي مكالمة ضرورية من الشغل. سيف: مفيش أهم من الموضوع ده دلوقتي. مالك: ما تقول الموضوع بدل الألغاز دي يا سيف. سيف بضحك: يوسف وفارس هيتجوزوا.

مالك بابتسامة: ألف مبروك. فارس: الله يبارك فيك يا مالك. يوسف: الله يبارك فيك يا حبيبي. عقبالكم. مالك بابتسامة: قريب إن شاء الله. سيف: إنت كمان هتفاجئنا. مالك بضحك: أمّال إيه؟ سيف بضحك: هي شكلها سنة المفاجآت كلها. مالك بضحك: بس مقولتوش مين؟ سيف بضحك: ودي محتاجة تفكير يا ابني؟ ما أكيد يوسف وسلمي وفارس ونور. فارس بضحك: ده إنت مركز أهو. سيف بضحك: مش أوي. يوسف بضحك: طيب وإنت مش ناوي تفاجئنا وتتقدم خطوة؟

سيف مشي خطوة وقال بضحك: أهو اتقدمت خطوة. مالك بضحك: مش عارف تفاهتك دي إمتى هتبطلها. يوسف بضحك: لو بطلها مش هيبقى سيف. *** سلمي بضحك: سيبك بس، إنت قولتي له إيه؟ نور: مقولتش حاجة. آيه: إزاي يعني؟ نور: بصتله بصدمة وهو ضحك وقالي أسيبك تفوقي من الصدمة دي، وبعدين نتكلم. شهد ضحكت بصوت عالي، والشباب بصوا عليها. شهد بضحك: معلش يا شباب، بس نور قالت حاجة ضحكتني. فارس بص على نور اللي كانت بصاله ومش فاهم في إيه.

سيف: طيب ما تضحكونا معاكم. نور بغيظ: عاجبك كده يا ست شهد؟ هتقولي لهم طبعاً. شهد بضحك: هقول لهم طبعاً. سلمي بضحك: ولّعي الدنيا. نور: شهد، متهزريش. شهد: يا بت خلاص، اهدي. شباب، تعالوا نقعد سوا. نور: نهار أسود. سلمي بضحك: والله إنتي اللي هتفضحي نفسك. نور: بس عشان أنا على أعصابي. آيه بضحك: بس طيب، الشباب جايين. مالك: إيه اللي ضحكك كده يا شهد؟ سلمي: زي ما عارفين، شهد بتضحك على أي حاجة. سيف: إيه هي الحاجة دي برضه؟

شهد غيرت الموضوع وقالت: هو مفيش أكل هنا يا يوسف؟ يوسف: لأ، في. انزلوا تحت آخر الطرقة هتلاقوا المطبخ. شهد: يلا يا بنات. البنات مشيوا. نور: انبسطتي كده يا ست شهد؟ شهد بضحك: آخر انبساط. نور: بت انتي، أنا مستحملاكي بالعافية. شهد: وتستحمليني ليه؟ سلمي بضحك: كل ما أفتكر شكلك وإنتي بتقولي نهار أسود، أموت من الضحك. نور: آه، ما أنا حفلة الليلة. اضحكوا وهزروا عليا. آيه بضحك: مالك يابت محمقة كده ليه؟

شهد: خلاص يا بنات، شكلنا زودناها. سلمي: الموضوع كان هزار وخلص. شهد: إنتي متخيلة إني ممكن أقول يا نور؟ آيه: كل الحكاية إن هي بتهزر. شهد عمرها ما تعمل حاجة كده. نور بصت لشهد: شهد، أنا مقصدش بس... شهد قاطعتها: تقصدي أو متقصديش، الموضوع خلاص يا نور. يلا يا بنات عشان نخرج. شهد مسكت أطباق الأكل وخرجت. نور: هو أنا قولت حاجة غلط؟ سلمي: لأ أبداً. يلا بينا نخرج. البنات خرجوا وأكلوا سوا هما والشباب.

يوسف: نور، لو مش هتعبك، اعمليلي قهوة. نور: طيب. سلمي: على فكرة العصير أحلى من القهوة، جربه. يوسف بابتسامة: حاضر. آيه بهمس لسلمي: ده إحنا مسيطرين من دلوقتي بقى. سلمي بابتسامة: هو عمل كده عشان ميحرجنيش، بس هو عاوز قهوة. آيه بضحك: يا واد يا اللي بتفهموا من نظرة انت. سلمي ضحكت، وبعدين شهد قامت ومشت شوية وفضلت تبص على البحر. فارس بص عليها ورجع بص على البنات: هي شهد كويسة؟ سلمي: آه كويسة. يوسف: أمّال ليه مشيت وقفت لوحدها؟

آيه: عادي يا جماعة، شهد بتحب البحر. مالك: بس دي مش طبيعتها. سيف: هو حد زعلها؟ نور: لأ يا جماعة، مفيش حد زعلها. أنا هروح أشوفها. بعدين نور راحت وقفت جنب شهد. نور: شهد. شهد وهي باصة على البحر: نعم يا نور. نور: إنتي زعلتي مني؟ شهد: لأ أبداً. أزعل ليه؟ نور: أنا آسفة والله، مكنتش أقصد. بس فكرة يوسف يعرف، قلبي كان هيقف. شهد بصتله: خليكي دايماً عارفة إني مستحيل أذيكي. نور حضنت شهد: طيب متزعليش. شهد

ضربت نور على راسها بخفة: إنتي مجنونة يابت انتي؟ أنا أزعل منك؟ وبعدين إنتي شكلك لسه متعودتيش على كلامي وطريقتي. نور بضحك: لأ اتعودت، بس أعصابي سابت منك. شهد بضحك: اتعودي على كده بقى. نور ضحكت، وسلمي وآيه راحوا ليهم. آيه: يعني حضرتكم بتحبوا في بعض، وإحنا هناك عمالين نستجوبونا. شهد بضحك: أوعوا تكونوا فضحتونا. آيه بضحك: إحنا بتوع كده. سلمي بضحك: طيب إيه؟ مش هنخلص من الحضن ده؟ نور بضحك وهي حاضنة شهد: لأ.

شهد بضحك: شكلكم وحشكم حضني إنتوا كمان، تعالوا. سلمي وآيه ضحكوا وحضنوا شهد، وبعد شوية بعدوا عنها. شهد: تيجوا نكلم الماميز؟ آيه: فكرة والله. تعالوا. سلمي: نكلمهم فيديو كول؟ نور: دي أحلى حاجة نشوف بعض كلنا. واهو نشوف مامت شهد. شهد: طيب تعالوا يلا. شهد: يوسف، بقولك مفيش هنا لاب توب؟ يوسف: لأ، موجود. ثواني أجبهولك. وبعد شوية يوسف جاب اللاب توب، وشهد أخدته وفتحت الفيسبوك ورنت فيديو كول على مامتها، وبعد شوية ردت عليها.

نجلاء: ده أنا قولت نسيتيني. شهد بضحك: أنا أقدر يا نوجا. استني بس خليكي معايا. وبعد شوية كانت هناء وزينب والفيديو. شهد: وحشتوني، وحشتوني أوي. هناء: إنتي أكتر يا شوشو. زينب: وإنتي كمان يا حبيبتي. نجلاء: عاملين إيه يا بنات؟ البنات: الحمد لله يا نوجا. إنتي عاملة إيه؟ نجلاء: بخير يا حبايبي. زينب: ده إحنا هنكلمك كل شوية. آيه بضحك: والله يا زوزا، من وقت ما وصلنا وإحنا في مغامرات. زينب بابتسامة: أهم حاجة مبسوطين يا حبيبتي.

سلمي بابتسامة: انبسطنا لما شوفناكي يا زوزا. هناء: عاملين إيه الشباب؟ نور: زي الفل يا نونا. سلمي: استني كده يا نونا. شباب، تعالوا كلموا نونا. سيف بضحك: نونا عاملة إيه من غيري؟ هناء بضحك: مش حلوة خالص. سيف بضحك: الليل يخلص بس وهتلاقيني عندك. هناء بابتسامة: تيجي بالسلامة يا حبيبي. مالك: إيه يا نونا؟ هناء: إيه يا حبيبي، عامل إيه؟ مالك: بخير يا حبيبتي، وحشاني. هناء: إنت كمان يا حبيبي. عامل إيه يا يوسف؟

يوسف بابتسامة: الحمد لله يا ماما. إنتي عاملة إيه؟ هناء: بخير يا حبيبي. عامل إيه يا فارس؟ فارس: بخير يا نونا. زينب: خدوا بالكم من نفسكم. سلمي: متقلقيش يا زوزا. شهد: طيب يلا باي. البنات والشباب وفضلوا يهزروا ويتكلموا كتير، وفضلوا سهرانين لحد الصبح. نور: كانوا أحلى أيام قضيناها. سلمي: البحر كان أحلى حاجة. شهد: مينفعش تسبوني هنا. آيه بضحك: ونوجا نقولها إيه؟ فارس بضحك: تاهت مننا. يوسف بضحك: هنيجي تاني إن شاء الله.

مالك بغمزة: المرة الجاية هتبقوا مع مراتتكم ها؟ سيف بضحك: بس يا فوضوي. يوسف بضحك: طيب يلا إنت وهو نخرج الشنط. سيف: مينفعش من غيري. يوسف: قدامي يلا. سيف بص على آيه اللي ضحكت عليه، وهو غمزلها، وبعدين مشي والشباب خرجوا كل الشنط، وبعدين خرجوا من اليخت. والبنات ركبوا، وكمان الشباب. ويوسف ساق. وبعد مدة طويلة وصلوا إسكندرية، ووصلوا قدام عمارة شهد. شهد: يلا يا بنات، أشوفكم بكرة. باي. كانت لسه هتمسك الشنطة.

يوسف: استني يا شهد. سيف طلع شنطة شهد لفوق. سيف: حاضر. سيف مسك الشنطة وطلع هو وشهد على السلم، ونزل الشنطة قدام باب شقتهم. شهد: منتحرمش يا كبير، نردهالك في الأفراح. سيف بضحك: هترديها إزاي بس؟ شهد بضحك: طيب ادخل اشرب حاجة. سيف: مرة تانية بقى، يلا ادخلي انتي. يلا سلام. شهد: سلام. سيف نزل. شهد فضلت تخبط على باب الشقة، وبعد شوية فتحتلها نجلاء. نجلاء: إيه يا بنتي؟ إنتي بتخبطي ولا عاملة فرح؟

وبعدين مش معاكي نسخة من مفتاح الشقة؟ شهد بضحك: اهو بعملك جو فرح لحد ما حد يتجوز. ولو فتحت بالمفتاح، مين يستقبلني يعني. نجلاء: طيب ادخلي. شهد دخلت وفضلت تبص على الشقة: ياااه، قد إيه اتغيرت الشقة يا نوجا. نجلاء: يابت، ده إنتي مالكيش غير أسبوع. اتغيرت إيه؟ شهد بضحك: أمّال بابا ومراد فين؟ نجلاء: أحمد نزل الشغل، ومراد في أوضته. شهد: مراحش الشركة ولا إيه؟ نجلاء: لأ، بيلبس ورايح.

شهد: طيب أنا هدخل أشوفه، وإنتي بقى اعمليلي أي حاجة آكلها يا نوجا. نجلاء راحت المطبخ، وشهد راحت أوضة مراد ودخلت على طول، ولقيته واقف في البلكونة وبيتكلم. راحت عنده وكانت هتتكلم. مراد: يا حبيبتي، هحاول أخلص النهارده وأشوفك. مراد: والله غصب عني، عندي ضغط شغل الفترة دي، بس وعد، هخلص وهشوفك النهارده. شهد: يا واد يا رومانسي. مراد بص على شهد وكمل كلامه وهو باصص عليها. مراد: طيب، هكلمك تاني. يلا سلام. قفل وبص على شهد.

مراد: هو الباب ده اتعمل ليه؟ شهد: ما أنا فتحت، وليا ساعة واقفة وإنت سرحان في بحر الغرام مع المزّة. مراد: مزّة إيه يابت؟ احترمي نفسك. شهد بغمزة: اتعرفتوا إزاي؟ وبرضه تخبي عليا حاجة زي كده؟ مراد بضحك: آخد إذنك يعني ولا إيه؟ مش فاهم. شهد بضحك: مقولتش كده، بس هي مين؟ مراد: مالكيش دعوة. شهد: واد يا مراد، هتقول ولا أقول لأمك. مراد بغيظ: إنتي بتمسكيني من الحاجة اللي بتوجعني، يعني. شهد بضحك: أنا أقدر يا ماما.

مراد: طيب مش هقولك بقى. شهد بصت على فون مراد وشدته منه فجأة وشافت. شهد: أووه، اسمها ملك. مراد: ارتحتي كده؟ شهد: لأ. مراد: نعم؟ شهد: ما إنت هتحكيلي، يعني هتحكيلي. مراد: لما يجي وقته. سلام بقى. مراد خرج من الأوضة، وشهد خرجت وراه. شهد: إيه يا ماما؟ نجلاء: تعالوا، جهزتلكم الفطار أهو. مراد: أنا ماشي يا ماما عشان متأخر. نجلاء: اقعد يا حبيبي، كل حاجة. شهد بضحك: ما هو فطر جوا. مراد بغيظ: سلام أنا ماشي.

نجلاء: مع السلامة يا حبيبي. شهد بضحك: خد بالك على نفسك يا ماما. مراد مشي. نجلاء كانت واقفة بتبص لشهد. شهد: اقعدي يا نوجا، افطري معايا. نجلاء: قصدك إيه بالكلام اللي قولتي من شوية ده؟ شهد بضحك: لأ، إنتي متأخديش على كلامي. *** وبعد شوية وصلوا قدام عمارة فارس. البنات وفارس نزلوا وطلعوا على السلم ووصلوا قدام الشقة، ولسه هيفتحوا الباب، لقوا الباب اتفتح، وكانت سوزان. فارس: عمتو. سوزان: آه يا قلب عمتو.

سلمي: بتعملي إيه هنا يا عمتو؟ قصدي يعني، إيه المفاجأة دي؟ سوزان: هو أنا لازم آخد إذن عشان أجي بيت أخويا؟ آيه: لأ طبعاً يا عمتو، تنوري أي وقت. سلمي مش قصدها كده. فارس: طيب ادخلوا يا بنات. سوزان: سمعت إنكم كنتوا في الساحل؟ فارس: آه يا عمتو. سوزان: طيب يا حبيبي، ارتاح دلوقتي عشان بعدين عاوزاك في موضوع مهم. فارس: حاضر يا عمتو. بس بابا وماما فين؟ سوزان: محمد راح الشركة، وزينب بتحضر الفطار. وزينب خرجت من المطبخ.

زينب: حمد الله على سلامتكم. البنات راحوا حضنوها. سلمي وآيه: الله يسلمك يا زوزا. فارس حضن زينب: عامل إيه يا ست الكل؟ زينب: بخير يا حبيبي. فارس: طيب أنا هدخل أنام يا ماما. بعد إذنك يا عمتو. سوزان: اتفضل يا حبيبي. زينب: روحوا ارتاحوا إنتوا يا بنات. سلمي: حاضر يا ماما. آيه: بعد إذنك يا عمتو. سوزان ابتسمت، والبنات مشيوا كل واحدة على أوضتها. *** يوسف كان وصلوا، ونزل هو وسيف ومالك، ومسكوا الشنط وطلعوا.

سيف: أنا هروح أنام. أشوفكم. مالك: بليل ولا بكرة؟ سيف: مش عارف والله، بس شكلي هنام كتير. يوسف: بعد بكرة هننزل الشغل. سيف: أبوس إيدك، سيبني أنام دلوقتي. نور بضحك: الواد هيعيط يا يوسف. مالك بضحك: شكله يوسف مروق عليه. يوسف بضحك: العادي بتاعي والله. سيف: طيب أشوفكم بعدين. سيف مشي ومالك بعديه، ويوسف ونور دخلوا شقتهم. نور: شكل نونا نايمة لسة. يوسف: الساعة 12، أكيد فاقت. ولقوا هناء خارجة من أوضتها، وسلمت عليهم وحضنتهم.

هناء: حمد الله على سلامتكم يا حبايبي. نور ويوسف: الله يسلمك يا ماما. هناء: تدخلوا ترتاحوا ولا أحضرلكم الفطار؟ يوسف: لأ يا حبيبتي، أنا هدخل أنام. نور: وأنا كمان. هناء: طيب يا حبايبي. *** بنروح لمكان، في بنوتة قاعدة في مطعم وفونها رن. سوزان: فينك يا ملك؟ ملك: في الكلية يا ماما. سوزان: كل ده في الكلية؟ ملك: أعمل إيه يعني؟ محضرش المحاضرة. سوزان: بعد ما تخلصي، تعالي على طول. فارس رجع. بضيق: حاضر يا ماما. ملك قفلت الفون.

ملك بعصبية: أوف! يعني كمان الأستاذ ده مش جاي. ولسه هتمشي، شاب جه عليها. الشاب: رايحة فين؟ ملك بضيق: كتر خيرك إنك جيت يا مراد بيه.