رواية عاشق مجهول الهويه الفصل السادس 6 - بقلم روما جمعه

عمر دخل من باب البيت وهو معاه أسر. عمر بابتسامة: "ادخل يا أسر، البيت بيتك." أسر كسر بحرج وهو داخل: "تسلم يا عمر." عمر بصوت عالي: "يا أمي تعالي معايا ضيف." كوثر طلعت من المطبخ بابتسامة جميلة وقربت عليهم. قرب منها عمر وباس راسها. عمر بابتسامة: "ده أسر يا أمي، صاحبي." وبص لأسر: "ودي بقا أمي يا أسر، ست الحبايب." أسر بص لهم بابتسامته الجميلة: "اتشرفت بمعرفتك يا طنط." كوثر بابتسامة بشوشة: "الله يخليك يا ابني، نورتنا."

أسر بص لها بحزن وابتسامة مهزوزة: "البيت منور بأهله." عمر فهم حزن أسر وغير الموضوع. أسر بمرح: "ادخل يا أسر، تعال... وبص لأمه: "عاملة أكل إيه النهارده يا ست الكل؟ كوثر بضحك: "محشي ورق عنب وبشاميل، وفي دكر بط إنما إيه في الفرن... " وبصت لـ أسر. كوثر بابتسامة: "حماتك بتحبك، جيت في الوقت المناسب، يلا ادخلوا." أسر بص لها بابتسامة ودخل الصالون وقعد هو وعمر. كوثر بصت لهم بتذمر: "انتوا هتقعدوا ولا إيه؟

فزز منكوا ليه، ساعدوني في المطبخ." بصوا لها الاتنين بصدمة وسكتوا. كوثر بضحكة مكتومة: "هتفضلوا مبلمين كده؟ قوموا يلا، انت وهو." وبصت لـ أسر: "انت بقا ياحليوة يابو عيون خضر، انت هتجهز السفره." ورجعت بصت لعمر اللي بيبص لها بغباء: "وانت ياعين أمك ورايا على المطبخ لحد البغل التاني ما يجي." وسابتهم ودخلت المطبخ. أسر وعمر بصوا لبعض وضحكوا على تصرفاتها. عمر وهو بيقوم

وبيحاول يتحكم في ضحكته: "معلش بقا يا أسر ياخويا، الست دي أمي، لازم نسمع كلامها، لاحسن تجري ورانا بالشبشب أنا وانت." أسر بص له بضحك وقام معاه يجهز السفره. دخل المطبخ واقفة عمالة تدندن. أسر اتكلم بهدوء وابتسامة: "عاوزاني أعمل إيه يا طنط؟ كوثر بصت له بابتسامة: "بص يا بو عيون خضر، عندك الأطباق أهي." وشورت على كام طبق محطوطين على بعض: "جهز السفره وتعالى ساعدنا في المطبخ."

هز راسه بالموافقة وبص لها بابتسامة وطلع يجهز السفره. *** عند حازم في كلية الهندسة واقف مع أصحابه بيهزروا ويتكلموا مع بعض. في داخله واحدة عليهم. شخص: "حازم بص وراك كده، البت مايا جت." حازم بقرف: "كانت ناقصاها هي. طيب أهرب يعني ولا أعمل إيه يا محمد؟ دخلت عليهم بنوتة جميلة بيضة وعنيها زرقا وشعرها بني. مايا بدلع: "إزيك يا حازم؟ حازم بقرف وهو بيبص لها من فوق لتحت: "أهلا يا أختي." محمد بضحكة مكتومة: "نورتي يا مايا."

مايا ببسمة: "بنورك يا محمد." وبصت لحازم بابتسامة حالمة. حازم وهو ملاحظ نظراتها ليه: "خير يا أختي؟ هتأكليني بعنيكي؟ مايا بحرج: "احم، أنا آسفة." محمد بتغيير الموضوع وتلطيف الجو: "أمال كنت مختفية فين يا مايا؟ محدش كان بيشوفك." حازم ببرطمة: "ولا حد كان عاوز يشوفها أصلاً." مايا بدلع: "أصلي كنت بجهز لعيد ميلادي، وطبعاً إنت معزوم يا محمد." وبصت لحازم: "زوومي أكيد هتيجي عيد ميلادي." حازم ببرود: "لا مش جاي، ماليش في الجو ده."

مايا بحزن: "بس انت لازم تيجي." محمد بابتسامة: "إن شاء الله هنيجي يا مايا." حازم بسخط وهو بيبص لـ محمد بغيظ: "أنا ماشي." حازم مشي وركب تاكسي لحد البيت. *** في شركات العمري قاعد سليم بتعب على مكتب أوس. سليم رفع تليفونه: "ألغوا كل المواعيد النهاردة." وتنهد ورن على أوس يطمئن عليه. بعد شوية جاله الرد. سليم بهدوء: "عامل إيه؟ أوس بهدوء: "كويس." سليم: "أخدت علاجك؟ أوس ببرود: "مش قولت محدش يقلق عليا وإني كويس."

سليم بتعب وهدوء: "بطمن عليك يا أوس، إنت أخويا يا ابني، ليه مش عاوز تفهم؟ أوس بتنهيدة: "أنا كويس يا سليم، وأخدت علاجي." سليم بابتسامة: "هترجع إمتى؟ أوس بهدوء: "لسه مش عارف." سليم: "ناوي على إيه يا أوس؟ أوس بغموض: "كل خير." سليم بشك: "مش مرتاح." أوس بضحك: "من إمتى وأنت بترتاح لي؟ سليم ضحك على صاحبه: "يا عم مش لدرجة دي، عيب عليك، بس إنت غامض." أوس بهدوء: "هقفل يا سليم." وقفل من غير ما يستنى رد. سليم

وهو بيبص للتليفون بغيظ: "أسف، خسارة معرفتك يا أخي." تنهد وقام طلع من المكتب ركب الأسانسير ونزل، ركب عربيته واتحرك على بيته. *** حازم وهو بيفتح الباب وبيدخل: "أمااااااااي أنا جعااااان." فجأة سكت لما شاف واحد واقف عند السفره. حازم بولولة: "يختااااااي حرامي الحقوووونا." طلعوا من المطبخ يجروا يشوفوا إيه اللي بيحصل. حازم بصوت عالي بعد الشخص ده ما قرب منه: "حراااامي في بيتنا، وفي العز النهار، لأ وبعيون خضر."

حازم قرب من أسر بهدوء: "يعني حرامي وعيونك حلوة؟ أسر بص له باستغراب. كوثر بعد ما طلعت من المطبخ وهي بتبص له بقرف: "كانت خلفة هباب، أنا عارفة." اتحركت ودخلت المطبخ تاني. عمر بضحكة مكتومة وهو بيبص لـ أسر: "معلش يا أسر على اللي حصل، أقدم لك يا سيدي أخويا حازم، في كلية هندسة وجنون شوية." أسر بسخرية: "واضح إنه مجنون." حازم بغباء: "يعني إنت مش حرامي؟ أسر بابتسامة: "لا مش حرامي، عفريت."

عمر بضحك: "ده أسر صاحبي يا حازم، مش حرامي ولا عفريت." حازم بابتسامة ومرح وهو بيقرب من أسر وبيسلم عليه: "أنا آسف على اللي حصل، اتشرفت بيك يا أسوور." أسر بابتسامة: "الشرف ليا يا زوومي." حازم وهو بيحط إيده على كتف أسر وداخل أوضة السفره: "عيونك دي ولا لنسز بقا؟ أسر بص له بضحكة مكتومة: "لا عيوني." حازم بمرح: "وراثة يعني... معنديش أخت بنفس العيون الحلوة دي، نفسي أجدد نسل العيلة دي من العيون الرمادي."

أسر بص له بابتسامة وحزن: "لا معنديش." عمر بتغيير الموضوع: "يلا الأكل جهز." قعدوا كلهم على طاولة السفره وبدأوا أكل بين ضحك وهزار وجنون حازم. *** حل الليل على أبطالنا. في مكان ما على طريق الغردقة. مجهول: "نفذ حالا." .... : "أمرك يا بيه." وعلى الناحية التانية كان الباص ماشي وفي عربيات ماشية. داخل الباص كانوا بيغنوا مع بعض وضحكهم بيرن في الباص. روقيه وهي بتغني: "رو رووق صحح لينا." روز بغناء: "ده اليوم ده بتاعنا لوحدينا."

سلمي: "هنقضيها بالطول والعرض مهما أتوبيسنا يودينا." اللي في الباص كانوا بيغنوا ويردوا على بعض. وفي أول الباص قاعد رعد بيتفرج عليهم بهدوء. وفجأة الباص وقف والكل خاف. وفهد طلع مسدسه ووجه كلامه للسواق: "إيه؟ وقفت ليه؟ السواق بخوف: "في عربيات واقفة قدام الأتوبيس يا بيه." وقبل ما يفتح رعد باب الأتوبيس، الباب اتفتح ودخل عليهم ناس ملثمين والبنات بدأوا يصرخوا. والملثمين ضربوا رعد بالنار. شخص ملثم بحدة: "ببسسسس...

مسمعش صوت حد فيكم بدل ما أخلص على اللي في الأتوبيس كلهم." قعد يدور بعنيه على هدفه لحد ما لقاها قاعدة تبص له برعب. راح مسكها من دراعها وقومها. الملثم: "يلا قدام." سلمي بخوف: "سيبها، إنت خدتها فين؟ روز بخوف وعياط: "سبني، أنا معملتش حاجة." روقيه وهي بتهاجم عليه وبتضربه: "سيبها، إنت خدتها فين بقولك، سيبها." الملثم خبط روقيه بالمسدس في دماغها، وقعت على الأرض. سلمي طلعت تجري عليها.

طلع منديل من جيبه وخدر روز وشالها ونزل، وباقي الرجالة نزلوا وراه. حطها في عربية من اللي كانوا واقفين واتحرك بعيد عن الباص وباقي العربيات وراه. وعمل تليفون للملثم بهدوء: "كله تمام يا باشا، الأمانة معانا." ... : "عفارم عليك، اطلع على المكان اللي اتفقنا عليه." وقفل. ابتسم الشخص بشر: "كده دخلنا في الجد."