رواية علي حافة الجنون الفصل الرابع والعشرون 24 - بقلم وئام محمد

فولج وليد بهيئة خفق لها قلبها، كان يرتدي ملابسًا جديدة قام بشرائها خصيصًا لتلك الليلة الفريدة، رحب به أهل البيت فجلس هو ووالدته وأخذوا يرحبون ببعضهما البعض. ثم قال وليد بحرج: _معلش يا عمي اعذرني على التأخير بس كان عندي فترة إضافية في المصنع ومقدرتش أعترض.. أزال محمد الحرج من عليه بنبرته الطيبة:. _ولا يهمك يابني، محدش يقول للشغل لأ ربنا يعينك

ثم بحث وليد بعينيه عن تلك المشاكسة ربما يجدها، فوقعت عينيه على الباب الذي يهتز فتأكد أنها واقفة خلفه، ابتسم بعذوبة أسرت قلبها وأخجلتها، عضت على شفاها وسرعان ما اختفت من خلف الباب. فاقتربت منها عليا وقالت: _أنا هخرج لهم.. تعلقت خلود في ذراعيها وهتفت متوسلة: _متسبنيش لوحدي، أنا متوترة أوي ابتسمت عليا بخفة وأردفت بعملية: _لازم أخرج عشان أساعد ماما في تقديم الحاجة، هبعت لك ليلى..

أماءت خلود بالقبول فلم يكن هناك حلًا آخر، خرجت عليا بينما وقفت هي تستشنق الهواء الذي شعرت أنه هرب من الغرفة. في الخارج؛ بدأت عزة حديثها قائلة: _إحنا مفيش بينا رسميات يا حج محمد، ووليد ابنك، وهو لما كلمني على خلود أنا فرحت أوي عشان إحنا أهل واخوات والنسب دا هيقوي علاقتنا..

_أكيد طبعًا يا أم وليد، وأنا قولتله قبل كدا مش هلاقي أحسن منه لبنتي، كفاية أخلاقه والأهم إنه بيصلي ومش بيسيب فرض، واللي بيخاف ربنا هيتقي ربنا في بنتي ويراعيها.. هتفها محمد بصوتٍ رخيم هادئ، ثم تحدثت عزة مؤكدة: _خلود في عنينا، هنشيلها على راسنا هي تؤمر بس وإحنا ننفذ.. بإبتسامة سعيدة أردف محمد: _الأمر لله يا أم وليد.. فتدخل وليد مُضيفًا على كلامهما:

_نتفق على ميعاد الخطوبة، وفترة الخطوبة هتكون قد إيه، أنا مش بحب فترة الخطوبة تطول، بس عشان خاطر خلود استنى معنديش مشكلة _يا حنين! علق زكريا ساخرًا، فتوعد له بنظراته وأبدى استيائه: _أخرج أنت منها يا خفيف.. ضحك زكريا وصمت، بينما ردّ محمد على حديث وليد: _والله يابني الخطوبة دي بتاعتكم شوفوا الوقت اللي يناسبكم وقرروا، إنما وقت الخطوبة.. تلك الأثناء قاطعت هناء زوجها وقالت:

_بعد إذنك يا محمد مش قصدي أقاطعك بس كنت حابة أقول حاجة.. سمح لها محمد بعينيه فتابعت ما تود قوله: _أنا برده مش بحب الخطوبة تطول، بس خلود لسه صغيرة، لسه قدامها ٣ سنين في الكلية ولو اتجوزت بدري مفتكرش إنها هتقدر توفق بين الدراسة ومسؤولية الجواز، فإحنا على الأقل نستنى تخلص سنتين من الكلية وفي السنة الأخيرة تتجوز والموضوع يكون سهل عليها شوية.. أيدها وليد قائلًا:

_مفيش أي مشكلة يا مرات عمي، حتى لو هي مش عايزة تتجوز غير بعد ما تخلص الكلية خالص أنا معنديش مشكلة.. أهم حاجة مصلحتها طبعًا شعرت هناء بالراحة تجتاح قلبها من خلف كلماته التي أيد بها رأيها، فعاودت الحديث قائلة: _وياريت الخطوبة تكون بعد فرح عليا، إحنا هنكون مشغولين فرش البيت.. وجهت هناء نظرها إلى عزة وأضافت: _أنتِ ست العارفين الوقت اللي قبل الفرح دا بيكون ضيق وملخبط إزاي أومأت عزة برأسها مُبدية عِلمها بالأمر وقالت:

_أيوة فعلا عندك حق.. ثم انتبه الجميع على إعتراض وليد حيث هتف: _لا دي مش هقدر أكون معاكي فيها يا مرات عمي، أنا عايز أدخل الفرح وهي خطيبتي في إيدي.. إحنا مش لازم نعمل حاجة كبيرة، تجمع عائلي بسيط نلبس الشبكة ونتصور صورتين وخلاص.. ضحك محمد وعلق مشاكسًا وليد: _شوف الواد مش قادر يصبر شهر، أومال هتستناها ٣ سنين إزاي؟ تملك الخجل من وليد الذي تلون وجنتيه بالحُمرة وابتسم بخفة وهو يردد: _استنى وهي خطيبتي مقبولة شوية..

_على بركة الله، نقرأ الفاتحة دلوقتي والخطوبة الجمعة الجاية إن شاء الله قالها محمد حاسمًا الأمر، فرفع الجميع أياديهم فاعترض وليد ما يفعلوه قائلًا: _هو فيه قراية فاتحة من غير عروسة؟ ولا أنتوا نيمتوها ولا إيه؟ قهقه الجميع ثم نظر محمد إلى عليا التي استشفت ما يرمي إليه، وتوجهت إلى الغرفة لتُخرج خلود: _يلا يا خلود بابا عايزك تراجعت خلود للخلف رافضة الخروج مُعللة: _مش هعرف أخرج، حاسة إني قلبي هيقف اقتربت منها عليا وأردفت:

_لا جمدي قلبك وتعالى يلا عيب نتأخر عليهم .. انضمت إليهن ليلى وحثت خلود على الخروج: _يلا يا خوخة، متوتريش نفسك كلنا جنبك بعد فترة؛ خرجت خلود من الغرفة برفقة عليا، وليلى التي تتبعهن، ابتهج وليد فور رؤياها وشعر بالسعادة لحظتها، توجهت خلود إلى زوجة عمها وصافحتها، مُتحاشية النظر عن وليد حتى لا يزداد خجلها أضعافًا.

جلس الجميع وبدأوا يقرأون سورة الفاتحة ليباركوا تلك العلاقة، ثم ارتفعت الزغاريد من قِبل عليا وليلى، عمت الفرحة قلوب الجميع بتلك العلاقة التي بدأت لتوها. *** اجواءٍ مشحونة بالتوتر والخوف، يخشى الطرفين إصابة الآخر، رجفت يدي صبا وهي تطلع على السلاح الموجه على قلب عبدالله ثم هتفت بنبرة مهزوزة: _أنت فارق لك في إيه أموت ولا لأ؟ إمشي يا عبدالله.. دون أن يكترث لكلامها أمرها: _نزلي السلاح ونتكلم..

_مش هنزله، لو مش قادر تتفرج إمشي.. هتفها بإصرارٍ فصاح الآخر: _سبق وعملتها يا صبا، بس المرة اللي فاتت خدش المرة دي هتبقى بجد، وأنا مش بتاع كلام.. قدامك ٣ ثواني لو منزلتيش السلاح هخليكي تندمي عمرك كله على الفرصة اللي اديتهالك... نظرت إليه بعيون دامعة، ترتجف بشدة، فبدأ عبدالله بالعد على إصبعه وقبل أن يصل إلى الرقم ٣ كانت ألقت صبا المسدس أرضًا، فزفر عبدالله أنفاسه براحة، ثم أبعد السلاح عنه وأعاد وضعه

في جيب بنطاله ثم أردف: _عايزة تموتي نفسك ليه؟ تشدق ساخرًا وواصل: _الباشمهندس أتأخر عليكي النهاردة ومقدرتيش على بُعده... رفعت صبا عينيها عليه ورمقته بنظراتٍ مستنكرة، أولته ظهرها لتغادر لكنها توقفت فجأةً وعادت إليه من جديد حتى باتت مقابله لا يفصلهما سوى الهواء الذي يمر بينهما وهتفت ببغضٍ كارهة سخريته وهي تضرب صدره بكل قوتها:

_أنت، أنت ملكش أي حق تتدخل في حياتي، ملكش دعوة بيا نهائي، أنت واحد بياع كلام ووقت الجد بعتني وملقتكش جنبي، فملكش أي حق تتكلم معايا بالطريقة دي.... انهمرت دموعها رغمًا عنها وهي تُتابع ضرب صدره الذي آلمه للغاية، لوهلة فقد توازنه لكنه وقف بثباتٍ وتركها تفعل ما تشاء فتابعت الأخرى صراخها: _أنا بكرهك يا عبدالله، أنا حياتي ادمرت بسببك، بكرهك.....

قالتها ثم هدأت نبرتها تدريجيًا عندما انخفض معدل ضغط دمها، خارت قواها وفقدت وعييها فجأة، فخفق قلب عبدالله مذعورًا وهرع إليها لاكتشاف ما حدث معها: _صبا... يا صبا تفقد نبضها فوجده بطيئًا للغاية، بالكاد شعر به، انحني بنصف جسده وقام بحملها بين ذراعيه ووقف يتفقد المكان من حوله، لا يدري أين يذهب بها، فسقط بصره على الغرفة الخارجية التي تتوسط الحديقة، فلم يتردد إلى التوجه نحوها.

قام بركل باب الغرفة بقدميه عدة مرات حتى فُتح، ثم ولج ووضعها برفق على الفراش، وقف ينظر إليها بقلة حيلة، جهل لحظتها التعامل مع الأمر، أغمض عينيه لثانية يحاول التفكير بعناية. أعاد فتح عينيه ثم خرج من الغرفة؛ ليأتي بشيءٍ يُعيد إليها صوابها، بعد قليل عاد إليها ثم وضع عطرًا على يده قبل أن يُقربها من أنفها، كرر فعلته عدة مرات حتى شعر باستجابتها إليه.

فتراجع للخلف ووقف ينتظر صحوتها، أخذت ثوانٍ حتى استعادت وعييها، تفقدت معالم الغرفة حتى وقعت عينيها على عبدالله الواقف يُراقبها في صمتٍ، فانتفضت من مكانها. ثم انتبهت على يد عبدالله التي تُعطيها شيئًا وأوضح: _خدي إلبسي، داري شعرك... صعقت صبا أنها بمظهرٍ لا يليق بها الظهور أمامه، أخذت منه قطعة القماش ثم أخفضت رأسها في حياء، فخرج عبدالله على الفور، أغلق الباب ووقف أمامه بعد الثواني بفروغ صبرٍ.

بعد مدة قصيرة انتبه على فتح الباب، فاستدار بجسده ومنع خروجها من الغرفة، حيث عاد إلى الداخل فاضطرت صبا إلى التراجع خُطوتين، فقام عبدالله بركل الباب بقدمه فأغلقه. وقفت أمامه تطالعه بمزيجٍ من المشاعر المتناقضة، حيث أنها تستحي من مظهرها التي ظهرت به أمامه منذ قليل، كما أنها تشعر بالغضب الشديد منه، لكن مالم يُراودها هو الشعور بالخوف.

لم تهاب هيئته المنتصبة، لم تكن كذلك من قبل ولن تفعل الأن، فقط شعور الطمأنينة لا يسكن قلبها سوى وهو أمامها، على الجانب المقابل كان الآخر يُطالعها بشوقٍ حار. يا ليت الزمن يسمح بضمها إلى صدره وأخذ عناقًا حار يروي ظمأه لفقدانها الشهور الماضية، ابتلع ريقه وحاول الثبات أمام عينيها التي تطلع به بوميضٍ مختلف لم يتعامل معه من قبل. أخذ نفسًا عميق ثم تساءل بصوتٍ هادئ: _إحنا إيه اللي وصلنا لكدا؟

قلبت صبا عينيها مستاءة من سؤاله وأجابته وعينيها تجوب من المكان من حولها: _هو أنت بجد بتسأل؟ صوبت بصرها عليه وتابعت: _هو أنت سيبت لي حل تاني أهرب له غير إني اتجوز!! ضاق عبدالله بعينه فهو لا يعي ما وراء كلماتها المبهمة وسألها بحنقٍ: _أنتِ بتتكلمي في إيه؟ أنا عملت لك إيه أصلًا عشان تتهميني إني السبب في جوازك! أنا من يوم ما عرفتك وأنا براعي ربنا فيكي وفي كلامي وتصرفاتي وحتى نظرتي ليكي عمرها ما كانت خارج حدود الإحترام..

أنتِ مشوفتيش مني غير الحلو وبس، كنت راجل وقد كلمتي وعمري ما خليت بوعد أخدته على نفسي معاكي.. تشدقت صبا ساخرة ثم سمحت لنفسها بالإقتراب منه فلم يُحرك عبدالله ساكنًا بل ظل ثابتًا مكانه، ارتفعت وتيرة أنفاسه بشدة من وراء تأثُره بِقُربها، حتى صاحت صبا في وجهه: _أنت حبتني وأنت ضامن إنك هتكون أول لمسة في حياتي، لكن أول ما غيرك لـ.... _شششش، اسكتي.. هتفها بتحذيرٍ، ثم صاح عاليًا:

_أنا عمري ما فكرت التفكير المريض دا، أنتِ وصلك كدا يبقى دي مشكلتك، استسهلتي وهربتي وروحتي اتجوزتي واحد معرفش ظهر امتى دا ولا تعرفيه منين! _اللي بتتكلم عنه وافق يتجوزني بعد ما عرف وضعي وساعدني اتعالج من حالتي اللي كنت فيها، في الوقت نفسه اللي كلمتك فيه وسألتك لسه عايزني وأنت سِكت، مردتش عليا وقفلت السكة في وشي، وبعدها قفلت الموبايل، استغنيت عني بكل سهولة! استغنيت عني بمكالمة تليفون! قالتها ثم انفجرت باكية وهي تُتابع

وتشير إلى ذاتها: _مكنتش أعرف إن قيمتي وداع بمكالمة حتى من غير كلام! إلى هنا وقد بلغ عبدالله ذروة تحمله على تلك الإتهامات البرئ منها، وخرج عن هدوئه وهدر بها بنبرةٍ اهتزت لها أرجاء الغرفة: _استغنيت عن مين؟ عنك أنتِ؟ ووداع إيه اللي بتتكلمي عنه؟ أنتِ متعرفيش أي حاجة، متعرفيش أنا اتعرضت لإيه؟ ولا حالتي كانت إزاي؟! مد ذراعه نحو الفراش وتابع بنبرة جهورية:

_أنا كنت قاعد هنا جنب السرير بعيط زي العيل الصغير في حضن أمه طول الليل، أنا اللي دموعي عمرها ما نزلت حتى في عز ما الدنيا جاية عليا نزلت عشانك! كلمتيني وأنا في عز خنقتي وصوتي مش قادر أخرجه ومقدرتش أرد عليكي.. أشار إلى نفسه وضرب صدره بعنفٍ وهو يتابع:

_أنا يومها كنت بايت في الحجز عشان اتهجمت على حمادة، كنت رايح أخد لك حقك منه، وأخرتها اترميت في زنزانة ومكنش معايا موبايل عشان أوصل لك، بعت لك أمي تطمنك وتقولك إني جنبك وعمري ما أسيبك مهما حصل بس حضرتك كنتي مشيتي.. هز رأسه مرارًا مستنكرًا تسرعُها وواصل استرساله: _مشيتي ودورتي على واحد واتجوزتيه!!

أنا كنت هموت عليكي، أنا عشت أيام كنت بتمنى الموت فيهم مليون مرة، أنا كنت بموت بالبطيء وأنا هتجنن وأعرف أنتِ فين، دورت عليكي في كل مكان أعرف لك فيه قريب ومحدش يعرف عنك حاجة، وبعد كل دا جاية تتهميني إني بيعتك؟ مش هسمح لك أبدًا ترمي اللوم عليا، مش هسمح لك يا دكتورة.. تشدق ساخرًا وبعقلاٍ يجن صاح: _مش قادر أتخيل إني كنت هموت عليكي وأنتِ في المقابل عيشتي حياتك واتجوزتي ولا فرق لك اللي كان بينا!! أنتِ إزاي كدا؟

إزاي أنانية ومفكرتيش غير في نفسك بس؟ إزاي هان عليكي إحنا؟ دا إحنا كنا.... صمت عبدالله حين هاجمته نوبة بكاء أرادت الخروج لكنه جاهد نفسه وحبسها قدر استطاعته ليُواصل حديثه فكان صوته مهزوزًا: _دا أنا لغاية دلوقتي بيعز عليا أقول كنا!!

انتهى عبدالله مما لديه، كانت مواجهة ساخنة، فوقف يلتقط أنفاسه تحت نظراتها المصدومة، كانت تُحدق به بعينين متسعتين لا تصدق ما قيل، تراجعت صبا للخلف وجلست على الفراش بإهمال مستندة براحتي يدها على الغطاء ورددت وهي تُطالع أمامها بذهولٍ: _يعني إيه؟ يعني كل اللي أنا عشته دا كان كدبة؟ كان وهم؟ دا أنا حياتي ادمرت، أنا بتعالج من اللي حصل ومن اللي كنت فكراه إنه حصل!! يعني إيه بجد؟ إزاي طيب؟

كان يُراقبها دون أن يستشف ماتقصده، إلتزم الصمت فأخذت صبا تقص ما عاشته وهي تنظر في عينيه: _أنا يومها كلمتك كتير أوي.. أنا كنت خايفة يا عبدالله ومكنتش محتاجة غير كلمة منك تطمني! وملقتهاش، أنت مردتش عليا، الخط قفل والموبايل اتقفل، رنيت كتير ونفس النتيجة مش بتتغير.. تساقطت عبراتها كالشلالٍ وهي تُواصل شرح ما تعرضت له بحسرة شديدة:

_أنا كنت هنتحر يا عبدالله، أنت فجأة اختفيت وأبويا اللي كنت فكراه ساندني ويحميني برموش عينه، كان كل هامه إنه يخلص من الفضيحة قبل ما تحصل.. أبويا بعد ما كان رافضك وحاسس إنك أقل مني فجأة سألني إذا كنت لسه عايزني ولا لأ!! أنت متخيل حسيت بإيه وقتها؟ حتى عاصم مكنش حد يعرف عنه حاجة، كان بيحاول يدخل حياتي وأنا برفضه طول الوقت أول ما شاف رقمه عندي طلب مني أرتبط بيه عشان الناس الأغنيا دي مش هتفرق معاهم حالتي!!

إزداد نحيبها بشدة واهتز جسدها وهي تتذكر ما مرت به: _متخيل أبويا أنا يقولي كدا، أنا فجأة لقيت نفسي لوحدي، لا حبيبي لقيته جنبي ولا أبويا طبطب عليا وأخد لي حقي، وأنا كنت مدمرة، أنا عشت أسوأ حاجة ممكن أي بنت تعيشها، فكرة إن حد ينتهك جسمك بالطريقة المؤذية دي صعبة أوي، والله صعبة أوي.. رفعت صبا يديها المرتجفتين ونظرت إليه وقالت بصوتٍ مهزوز مُتلعثم:

_مكنش في إيدي حاجة غير إني أقبل بعاصم في حياتي.. كنت فاكرة إني بكدا هعفيك من حِملي وهبعد عن أبويا الفضيحة اللي كان خايف منها! _للدرجة دي يا صبا مكنتيش عرفاني؟ مكنتيش عارفة إني لا يمكن استغنى عنك مهما حصل؟ وإني هفضل جنبك ولا أي حاجة تفرق لي غيرك أنتِ، يعني بعد كل دا وتطلعي مش عرفاني!! هتفها بتأثرٍ يُخالطه اللوم، فهتفت هي عاليًا: _هل أنا وقتها كان فيا عقل أفكر كويس؟

رد عليا وقولي لما أبويا اللي أنا من دمه يحسسني إني عبء هل ممكن عقلي يستوعب إنك هتكون غيره؟ مش بتفكر زيه؟ مسحت صبا دموعها بظهر يدها، ونهضت وقفت مقابله، وأردفت بثباتٍ قليل: _ومع ذلك كان عندي أمل إن كل دا يطلع كابوس، اتعلقت في قشاية يمكن هي طوق نجاتي.. عادت صبا بذاكرتها إلى تلك الليلة عندما أجابت عاصم وأخبرته بقبولها للزواج منه: _بس فيه حاجة الأول أنت لازم تعرفها...

أخذت نفسًا عميق ثم أخبرته بنبرة غير سوية عن حادثتها، كانت تبدو نبرتها جامدة لا تآبى ما تعرضت له، عكس باطنها التي تخفي به انهيارًا عظيمًا ودت لو تُظهره لكن لم تجد من تشاركه معه فالتزمت تلبس ثوب القوة أثناء مكالمتها مع عاصم الذي أخذ وقتًا يحاول استيعاب حقيقة ما أخبرته به ثم انتهى من تفكيره قائلًا: _أنتِ وافقتي على طلبي مضطرة ولا... قاطعته صبا مجيبة بجفاء:

_مضطرة.. أنا مش عندي حل تاني، لو أنت مش قابل مفيش مشكلة.. بس لازم تفهم إنك لو وافقت فأنا معنديش أي حاجة أديهالك، اللي بتتكلم دي مجرد صوت من غير روح! من غير قلب ومن غير مشاعر! أنا فاضية من جوا مش هقدر أديلك حاجة أنت عايزها! بعد تفكيرٍ ردّ عاصم بقراره الأخير الذي حسم فيه أمره: _وأنا موافق، حتى لو كنت ملجأ لهروبك، كفاية عليا إنك فكرتي فيا وقت محنتك، وأنا مش هخذلك.. _أنا محتاجة أمشي في أقرب وقت ممكن..

هتفت بها صبا وهي على وشك الإنهيار، فقال عاصم بجدية: _جهزي نفسك وأنا ساعة بالكتير هكون عندك... قالها فأنهت صبا الإتصال على الفور ثم أچهشت باكية بألم وحسرة على حياتها التي على وشك الإنتهاء، نفضت عنها أفكارها التي ليست في أوقاتها ثم نهضت وخرجت من الغرفة فوجدت والديها يجلسان في الخارج. أخذت نفسًا زفرته على مهلٍ وبثباتٍ قالت: _أنا هتجوز عاصم! نزل الخبر كالصاعقة على والدتها، فهبت واقفة واقتربت منها قائلة:

_إيه اللي بتقوليه دا؟ وجواز إيه وعاصم مين؟ ربتت إجلال على ذراع صبا وتحدثت برجاء: _استهدي بالله يا صبا، أنا عارفة إنك بتمري بفترة صعبة، بس بلاش قرارات دلوقتي يا حبيبتي هتندمي عليها بعدين.. وبعدين هو فين عبدالله؟ لمعت عيني صبا بالخزي والحسرة، فعاودت والدتها مُتحدثة بصرامة: _مفيش جواز من حد متعرفيهوش يا حبيبتي، مش هنصلح غلطة بغلطة تانية.. قاطعها محمود تلك الأثناء قائلًا: _إجلال.. سيبيها! بنتك هتعمل الصح..

كان محمود يفاجئهن كلما تحدث بكلمةٍ، رمقته صبا بخيبة أمل كبيرة شعرت بها تجاهه، أطالت به النظر وشفتيها مزمومتين، ثم عادت إلى الغرفة لتُحضر حقيبتها فلحقت بها والدتها وحاولت منعها مما تفعل متوسلة: _عشان خاطري بلاش قرارات مفاجئة أنتِ أكتر واحدة هتندمي عليها، اهدي وخلينا نفكر بالعقل، وسيبك من ابوكي، هو مصدوم وبيقول أي كلام، فين عبدالله يا صبا.. فين وأنا اعملكم أحسن فرح في البلد كلها!!

توقفت صبا عن جمع مختصاتها وتقوس ثغرها بٍبسمة باهتة قبل أن ترُد: _كل حاجة بانت على حقيقتها، عبدالله اتخلى عني.. وبابا زي ما أنتِ شايفة، أنا استحالة أقعد ثانية في البيت دا.. ثم تابعت لملمة أشيائها المُتبقية، حتى فرغت وقامت بارتداء ملابسٍ لها وجلست على الفراش في انتظار وصول عاصم بعيون متورمة من فرط البكاء. على جانب آخر؛ وقف عاصم أمام والديه داخل غرفتهما وهتف:

_أنا عارف إنه قرار مفاجئ ومش مفهوم بالنسبة ليكم، بس أنا محتاجكم جنبي وقت كتب الكتاب.. تبادلا والديه النظرات المذهولة؛ ثم بدأ عز الحديث: _هو أنت بتتكلم بجد ولا اختبار لينا ولا إيه، أنا مش فاهم حاجة؟ أسرع عاصم مجيبًا إياه بنبرةٍ متلهفة: _أنا بتكلم بجد.. فقاطعته نهال باندفاعٍ: _بجد إزاي؟ يعني إيه فجأة تقولنا هتجوز؟ مين دي وظهرت امتى وليه الجوازة السريعة دي؟ فيه حاجة غلط! أخذ عاصم نفسًا وبدأ يشرح لهم جدية الأمر متعمدًا

عدم ذكر السبب الحقيقي: _مين دي، دي الدكتور صبا اللي كانت بتعالجني في المستشفى، وظهرت من وقتها وأنا متعلق بيها وبحاول أقرب منها، وهي إدتني فرصة وأنا حابب أكتب الكتاب على طول.. ومفيش أي حاجة غلط في الموضوع، الموضوع طبيعي خالص بس هو سريع شوية! نظر عز إلى نهال ثم أمرها بنبرة رزينة: _نهال لو سمحتي سيبنا لوحدنا.. تناوبت نهال النظر بينهما قبل أن تنسحب من الغرفة، فقام عز بالإقتراب من عاصم وسأله بتوجسٍ:

_عاصم يا حبيبي، بكل هدوء كدا فهمني كل حاجة براحة، أنت والبنت دي غـ... لم يتقبل عاصم سماع اتهام كبير كهذا وقاطعه قائلًا: _مفيش أي حاجة من اللي حضرتك بتفكر فيها دي، دي مش أخلاقي، والبنت سُمعتها أحسن مافيها، ومحترمة ومش بتاعت الكلام دا.. خرج عز عن ثوب هدوئه الذي يتلبسه منذ سماعه بخبر زيجة ابنه واندفع به: _أومال في إيه؟ على رأي والدتك فيه حاجة غلط! شهيقًا وزفيرًا فعل عاصم ليكون في صدره متسع لمجاراة حوراهما وإقناع والده:

_يا بابا أنا بأكد لك إن مفيش أي حاجة مش طبيعية، صدقني لو سمحت، كل الحكاية إني عايزكم جنبي وقت كتب الكتاب تحضروه معايا وبعد كدا هتتعرفوا عليها وصدقني هتحبوها و... لم يتحمل عز سخافاتٍ أخرى، وصاح مندفعًا بنفاذ صبر: _إحنا في هنحبها ولا لأ؟ يابني لو متورط معاها في حاجة قول وأنا هعرف أخرجك منها، لكن متحاولش تقنعني أبدًا إن الجوازة المفاجئة دي طبيعية من غير أسباب كدا؟!

شعر عاصم بمُحاصرته من قِبل والده، أولاه ظهره بعد أن تملكه التوتر وظل يحك مؤخرة رأسه بقوة، يحاول جمع حلولًا تُخرِجه من مُحاصرة أبيه، وبعد وقتٍ استدار بجسده ونظر لوالده مُطولًا قبل أن يُردف: _البنت واقعة في مشكلة، ومتطلبش مني تعرف إيه هي عشان مش هقدر أقول، احتاجتني وأنا لازم أقف جنبها.. الأن اتضحت لعز بعض الأمور، تنفس بعض الهواء وقال:

_مفيش حاجة اسمها مش هقول، أنت ممكن تكون عايز تساعد بحسن نية وبعد كدا تلاقي نفسك اتورطت في مصيبة، أنا أبوك ولازم أعرف، أنا ليا نظرة غيرك وأفهم إذا كانت مساعدة ولا توريط في مصيبة.. نفذ صبر عاصم على الإلحاح، ولم يقف ثانية أخرى، توجه إلى الباب وهو يُردد عاليًا بتمردٍ: _خلاص مش عايز منكم حاجة، أنا هعرف أتمم كتب الكتاب لوحدي.. كاد يدير مقبض الباب فصاح عز مُحذرًا:

_أنا بمكالمة مني أخلي كل مأذون في مصر ميقدرش يكتب لك الكتاب اللي مُصر عليه دا! وأنت عارف إني أقدر أعمل كدا كويس.. أغمض عاصم عينيه بضيقٍ، فلقد غلف الإختناق صدره، التفت ونظر إلى والده عندما حاصره الآخر بتحذيره الأخير، ابتلع ريقه وتحدث: _الكلام اللي هقوله دا محدش يعرفه حتى ماما، ماما بالذات مينفعش تعرف أماء عز لِيُطمئنُه فقص عليه عاصم حقيقة الأمر، حتى انتهى من حديثه وقال:

_أنا عرّفتك مش عشان تقولي أه أو لأ، أنا في كل الأحوال هقف جنبها، بس أنا عرّفتك عشان تقف أنت جنبي ومكنش لوحدي في خطوة زي دي كان عز مذهولًا مما وقع على مسمعه، كان يُطالع الفراغ أمامه في محاولة استيعاب ما أخبره عنه عاصم، خرج عز حالة شروده متسائلًا بجدية: _وأنت ليه يابني تعمل كدا؟ ليه تحمل نفسك حاجة زي دي مش سهلة أبدًا وعواقبها كتيرة ومحسومة؟ دي خطوة جريئة منك ومش أي راجل يتقبلها؟ بحسمٍ صاح:

_عشان أنا حابب أعمل كدا، محدش ضغط عليا، أنا في كامل وعيي وأنا باخد قرار زي دا، وعارف إن قرار متهور بس أنا مش بفكر في أي عواقب غير إني أساعدها وبس! استطاع عاصم إقناع والده ببعض المفاهيم الأخلاقية ثم توجه برفقة والديه لاصطحاب صبا حتى يُتمِم عقد قرانهما.

في فندقٍ من أهم الفنادق الذي يتعامل معها عز وعائلته، جلس عاصم في غرفةٍ للمناسبات، ينتظر حضور صبا في الغرفة الذي قام بحجزها لهما، بينما وقفت صبا في منتصف الغرفة تبكي بشدة، غير راضية عن تلك الخُطوة المُقبلة عليها. نظرت إلى والدايها وقالت مُحاولة إيجاد حلًا آخر غير زواجها من عاصم: _أنا هكلم جلال، أكيد عنده حل غير إني اتجوز، ياخدني عنده أو يعمل أي حاجة تانية توجهت باحثة عن هاتفها فأسرع والدها في اللحاق بها ثم سرق منها

الهاتف فجأة وأردف بجدية: _متعرفيش اخوكي حاجة، مش لازم كله يعرف بلي حصل، وبعدين يا بنتي بصي حواليكي وشوفي إحنا واقفين فين وبنتعامل إزاي لمجرد إننا تبع الباشمهندس، دي فرصة متتعوضش، الشاب قِبل بوضع هو ملوش ذنب فيه وواضح إنه شكله بيحبك وإلا مكنش وافق على الشيلة دي.. هتعيشي معاه مرتاحة، بصي لمصلحتك يا صبا! فكري بعقلك مش بعواطفك!

وضعت صبا كِلتى يديها خافية وجهها بقلة حيلة، كانت في وضعٍ لا تُحسد عليه، يُحاصرها الإجبار من جميع الزوايا، اهتز جسدها ورفض عقلها الخضوع لتلك الزيجة وهتفت: _عبدالله لا يمكن يعمل فيا كدا، لا يمكن يتخلى عني بالسهولة دي.. أكيد فيه حاجة غلط! مدت يدها إلى أبيها وقالت من بكائها: _اعطيني الموبايل هكلم طنط أحلام..

تلك الأثناء اهتز هاتف صبا مُعلنًا عن وصول رسالةٍ، فتفقدها والدها الذي ما أن قرأها حتى أدار لها الهاتف ووضعه في وجهها، فأخذت صبا تقرأ محتواها تحت تأثير الصدمة من تلك الكلمات القاسية المدونة على الشاشة. وكأن الوقت قد وقف من حولها، ولم يعد هناك حياة لها تلك اللحظة، فلقد تبخرت كل آمالها الأن، جذبت الهاتف من يدي والدها وقامت بإغلاقه ثم توجهت بقامة منتصبة شامخة إلى الخارج دون أن تنبس حرفٍ.

وبعد دقائق، كان زواجها قد تُمِمَ، عادت صبا إلى الوقت الحالي تحت نظرات عبدالله المصدومة مما وقع على أذنيه، وبصعوبة بالغة خرج سؤاله بصوتٍ متحشرج: _رسالة إيه؟ نهضت صبا عن مكانها بعد أن جلست عليه مؤخرًا وهي تقص عليه ما حدث معها وقالت بجمودٍ: _زينب أختك بعتت لي إنك استغنيت عني ومش عايز تعرفني تاني وياريت مصعبش الموضوع أكتر وأشوف نفسي بعيد عنك!

ولو أنه قد تلقى خبر موت عزيزٍ أهون عنده من سماع ما قالته صبا للتو، أغمض عبدالله عينيه وظل يُمسد بِخُطوط طولية على رأسه في حالة تِيه لا يستوعب عقله ما تلقاه البتة. تملك من صدره الإختناق المفاجئ، حتى شعر أنه لم يعد يستطع التنفس، فقام بفك بعضًا من أزرار قميصه وأخذ يتنفس بصوتٍ مرتفع فخشت صبا حالته التي بات عليه وأسرعت نحوه قلِقة: _أنت حاسس بإيه؟ _مش حاسس..

همس بها فساعدته صبا على الجلوس ثم انتظرت قليلًا وعاودت سؤاله وهي تجسي على ركبتيها أمامه تتفقد ملامحه: _مش حاسس إنك أحسن؟ فتح عبدالله عينيه ببطءٍ وأخفض عينيه حيث تجسي وتحدث بخفوت: _أنا عمري ما استغنيت عنك يا صبا! أنتِ كنتي روحي، ومحدش يقدر يستغني عن روحه! قابلته بعيون دامعة وصوتٍ مهزوز وهي تُردد قوله: _كنت! هربت بعينيها بعيدًا عنه، ونهضت تُجمع شتات نفسها، ابتلعت ريقها وقالت وهي لا تستطع النظر في عينيه: _أنا همشي..

تساقط دمعها فأسرعت بتوليه ظهرها لتفر هاربة لكنها تريثت عندما وقعت كلماته على أذنيها: _من شوية.. نهض عبدالله وتوجه نحوها حتى بات مقابلها واستأنف: _سمعتك بتصرخي.. انتابه غصة في حلقه لم يقدر على التحدث، فجاهد نفسه ثم واصل بقية سؤاله: _هو عمل لك حاجة؟ بجفاءٍ قالت: _أنا كويسة، متقلقش عليا يا جاري!

تشدقت ساخرة مما وصلا إليه، ثم تابعت خروجها من الغرفة، فتَبِعها عبدالله ولم يخفض بصره عنها، فكان داخله سؤالًا لحوحًا يطوق لمعرفته، وبترددٍ بالغ قابله في البداية صاح: _صبا.. أكتفت بالنظر إليه فأخذ عبدالله وقته يُجمع سؤاله ثم أخرجه بحرجٍ شديد: _هو لمسك؟ اندهشت صبا من سؤاله الذي جدد مشاعرٍ قد اختفت داخلها، جدد لديها آمالاً بعودة الوصال بينهما، فاجتاحها الخجل الصريح واخفضت رأسها حياء شديد وأجابته بإيجاز:

_إجابة سؤالك دا نفسه إجابة سؤالك اللي قبل كدا.. ألقت عليه نظرة أخيرة ثم انسحبت عائدة إلى البيت بينما وقف عبدالله يجمع ما تقصده من خلف كلماتها، حتى وصل إلى إجابتي أسئلته في آن واحد، إذًا كان صراخها رفضًا قاطعها لاقترابه منها.

لم يدري بماذا شعر لحظتها، لكنه تعجب من ابتسامته الخفية التي تشكلت على شفتيه، استند بجسده على الباب يُتابع خُطواتها حتى اختفت من أمامه خلف باب البيت فعاد هو إلى الداخل، اعتلى الأريكة المجاورة للفراش وطالع أمامه يُعيد ما أخبرته به صبا ثانيةً حتى وصل بذاكرته إلى أمر الرسالة فتجهم وجهه وصر أسنانه بغضبٍ وتوعد أشر وعيد لزينب.

بينما في البيت المجاور، عادت صبا إلى غرفتها فوجدت عاصم ما زال هناك، بحثت سريعًا عن هاتفها القديم التي لم تستخدمه منذ حادثتها، وجدته في حقيبتها فأخذته وتوجهت إلى الغرفة المجاورة ثم أحكمت من توصيد الباب خلفها حتى لا يستطيع الوصول إليها ثانيةً. جلست على الفراش وقامت بإعادة فتح الهاتف، وماهي إلا ثوانٍ حتى جاءه رسائل عديدة عندما اتصل بالانترنت، لم تتفحص سوى رسائل عبدالله التي تفاجئت بذلك الكم الهائل من الرسائل منه.

كانت تبكي مع أحد الرسائل تارة وتضحك تارة، ثم تعيش مشاعرٍ حزينة وأخرى سعيدة وهي تسبح بين سطور رسائله، تندهش من حالاته التي وصل إليها في غيابها وتبكي تحسرًا لألامه التي جعلته يعيشها بفقدانها. ظلت تقرأ طوال الليل دون مللٍ، وكلما انتهت منهم تُعيد قرائتهم من البداية وتعيش المشاعر ذاتها كأنها تقرأهم للمرة الأولى. *** في الصباح الباكر، كان قاسم جالسًا في كافتيريا مرموقة، يرتشف قهوته وهو ينتظر وصول آدم، مرت مدة لا بأس بها

حتى ظهر آدم وجلس مقابله: _صباح الخير.. _صباح الخير يا حبيبي، نفطر سوا؟ رد قاسم التحية بمزاج صافٍ ثم تساءل باهتمامٍ فأماء آدم بالقبول: _تمام أشار قاسم إلى النادل وأمره بإحضار وجبة فطور تليق بهما، ثم تسامر مع آدم في شتى المجالات مُبديًا اهتمامه البالغ به، وصل الطعام وبدأَ كليهما يتناولان حتى امتلأت معدتهما. تراجع قاسم مستندًا على ظهر الكرسي وبدأ يُمهد للحديث الذي خصص تلك المقابلة من أجله، حمحم وأردف بصوتٍ رخيم:

_أنت عارف يا آدم إني كنت متجوز أم عبدالله قبل والدتك ولظروف صعبة اضطرينا ننفصل، ومن بعدها اتجوزت والدتك وحصلت الفجوة في العيلتين بسبب بُعدي عنكم. اعتدل في جلسته وتابع بهدوءٍ: _وأنا لما رجعت المرة الأخيرة كنت راجع ونيتي أجمع شمل العيلتين وأدوب الجليد اللي بينا، وأحاول أصلح اللي غلطت فيه زمان.. ضاق آدم بعينيه وهو يُتابع تمهيده للحديث وقال: _بابا أنت عايز تقول إيه؟ أخذ قاسم نفسًا عميقًا ليتسع صدره ثم أخبره:

_أنا هتجوز والدة عبدالله! كانت صدمة كبيرة بالنسبة لآدم الذي حدق بوالده لبرهة يستوعب ما سمعه، حرك رأسه يسترد صوابه، كما حرك لسانه بحركاتٍ دائرية على شفتيه وقال مختصرًا: _مبروك.. استشف قاسم ضيقه وحاول محي ما يشعر به بكلماته:

_أنا فاهم إن الموضوع حساس بالنسبة ليك جدًا، ومش سهل أنك تعرف إني هتجوز واحدة على والدتك، بس أنت مش صغير يا آدم ومهما خبينا عنك وحاولنا نتصنع إننا كويسين وعلاقتنا كويسة فأنت أكيد شايف الفجوة الكبيرة اللي بيني وبين حورية.. واختصارًا لأي كلام ملوش لزوم، أنا بحترمها وإحنا مع بعض عشانك أنت، عشان تتربى وسطينا حتى لو القرار متأخر شوية.. زفر أنفاسه المتوترة وابتسم ثم عاود الحديث:

_أنا محتاج ونس في العُمر دا، وأحلام الوحيدة اللي تقدر تسد الخانة دي وخصوصًا إنها مش جديدة هي من زمان موجودة جوايا، وأم ابني وزي ما أنا حابب إنك تتربى وسط أب وأم حابب عبدالله يعيش نفس الإحساس.. أخفض آدم رأسه محاولًا هضم قرار والده، فرك أصابعه وسأله بنبرة مختنقة وعينيه لا تُرفعان على قاسم: _أنت ليه محاولتش تحب أمي؟ تفاجئ قاسم بسؤاله، وما زاد ضيقه وانقباصه قلبه حالة آدم التي بدى عليها، فحاول قاسم انتقاء الكلمات

المناسبة حتى لا يجرح قلبه: _القلب ملوش سلطان، والحب والمشاعر بإيد ربنا مش بإيدنا، مش إحنا اللي بنختار نحب مين ومين يحبنا، سبحان الله.. حرك آدم رأسه بتفهمٍ وما زال مُنكس الرأس، فمد قاسم ذراعه ورفع رأسه ثم قال: _هنكتب الكتاب النهاردة، نفسي تكون معايا.. نظر إليه آدم نظرة مطولة قبل أن يُخبره بقراره: _ربنا يسعدك في حياتك يا بابا، بس أنا مش هقدر أعمل كدا في أمي، مش هقدر أوجع قلبها بحضوري كتب كتابك، اعذرني

إلتوى ثغر قاسم ببسمةٍ فخورة، ثم ربت على يد آدم الموضوعة أعلى الطاولة وأردف: _أنا مِحترم شعورك بوالدتك جدًا، وأنا مش زعلان بس أهم حاجة تكون أنت راضي عن قراري.. جاب آدم المكان بعينيه ثم عاود النظر إلى والده وردّ مختصرًا: _هتعود.. كلنا هنتعود على الوضع الجديد لم تختفي ابتسامة قاسم قط، فسحب آدم يده ثم نهض معللًا بعد أن تفقد ساعته: _أنا لازم أمشي، عندي شغل

ثم انصرف سريعًا وقد باغته وخزة قوية في صدره، بينما نهض قاسم وقام بالمغادرة ليبدأ يومه الفريد والمنتظر منذ زمنٍ. *** عاد قاسم إلى بيت المزرعة واختلس نظرةً إلى الحديقة التي أمر بتزينها خصيصًا لعقد قِرانه، كان المكان مُزينًا بالورود البيضاء، لقد أضاف رونقًا ساحرًا للحديقة. تابع سيره حتى وصل إلى أحلام التي تقف أمام الباب تُشاهد ما يحدث، تقوست شفتيها ببسمةٍ خجِلة وأردفت وهي تُشير إلى المكان: _إيه اللي بيحصل دا؟

جاورها قاسم ونظر حيث تنظر وهتف بحماسة: _أنتِ يتعملك الحلو يا أحلام، هو أنتِ يعني أقل من أي عروسة؟ ابتسمت بسعادةٍ وخجلٍ، وسرعان ما أخفضت رأسها بحياء، فابتسم قاسم بخفة لحالتها، ثم صاح: _وبعدين أنتِ واقفة هنا بتعملي إيه؟ أومال الوصيفات اللي جايبهم تحت أمرك دول لازمتهم إيه؟ أخذت أحلام نفسًا ثم قالت وهي تفرك أصابعها:

_بص بقى ياسي قاسم، أنا مش بتاعت الكلام دا، لا ذِواق ولا فساتين ولا جو الطبقات الاستقراطية دي، أنا ست بلدي على قد حالي، عاجبك على كدا عاجبك مش عاجبك.... قاطعها قاسم وهو يُهلل: _مش عاجبني إيه، هو أنا جابني ورا غير البلدي.. غمزها مشاكسًا واسترسل متغزلًا بها: _يا بطة بلدي أنت يا حلو اتسعت مقلتي أحلام بخجلٍ صريح، وفرت هاربة من أمامه فقهقه قاسم ثم ولج البيت ليُبدل ملابسه بأخرى.

بعد ما يقرُب الساعتين، كان قاسم واقفًا في الحديقة برفقة عبدالله وزينب وبعض الأصدقاء القليلون، ترجلت أحلام من درج البيت وظهرت بهيئة رقيقة ساحرة تُناسب عمرها وتليق بكونها زوجة قاسم القاضي. خفق قلبه وهو يراها تقدُم عليه، وتوجه بخُطاه إليها ثم مد لها يده فنظرت إليه مستاءة وقالت: _بعد كتب الكتاب يا قاسم.. _جدعة يا أحلام، دا الراجل شكله هيخيب ولا إيه قالها عبدالله مازحًا فتفاجئ قاسم وكذلك أحلام بتعليقه الوقح وعنفاه معًا:

_عبدالله! انفجر عبدالله ثم رفع يديه مستسلمًا وردد: _تمام ياعمنا.. توجه الجميع إلى الطاولة، جلس قاسم وأحلام على جانبي المأذون، ثم جلس عبدالله وأحد أصدقاء قاسم ليكونوا شهودًا على عقد القِران، كما وقف زكريا ووليد خلف عبدالله يُشاركاه تلك مناسبة. انتهى المأذون من مراسم عقد القِران وتَممَ حديثه: _بارك الله لكما وبارك عليكما وجمع بينكما في خير..

نهض الجميع وباركوا لقاسم وأحلام، نظر قاسم إلى أحلام بنظرة مُحارب انتصر في معركته للتو، ابتسمت هي بحياء وأخفضت عينيها عندما لاحظت عيون الجميع المُصوبة عليها. في الجوار، لكز زكريا ذراع عبدالله ومازحه ساخرًا: _مبروك جواز أمك وأبوك يا صاحبي رمقه عبدالله بطرف عينيه ثم نهره: _ما تتلم قهقه زكريا وهتف من بين ضحكه: _إيه يا عم هو أنا قولت حاجة غلط؟ تدخل وليد متابعًا لسخرية زكريا:

_ويجيبو لك أخ صغنن كدا تلعب بيه على لما ربنا يفرجها عليك وتتجوز.. _طب أقطم الكلام بقى منك ليه هتفها عبدالله بحنقٍ، ثم انتبه ثلاثتهم على دخول ڤاليا الذي خطف الأنظار، ابتسمت فور رؤياها عبدالله وتوجهت نحوه حتى وقفت مقابله وقالت بصوتٍ أنثوي رقيق: _هاي عبدالله.. كان زكريا ووليد متابعين لحديثها، وتفاجئوا بأسلوبها، فعلق زكريا مقلدًا نبرتها: _طب باي إحنا يا عبدالله غمزه وليد وهو يبتسم بخفة وهتف: _إحنا جنبك هنا هو

ابتعدا عنه قليلًا فصاح زكريا: _أيوة يا سيدي الله يسهلوا رمقهما عبدالله بنظراتٍ مستشاطة متوعدًا لهما، ثم عاد بنظره إلى ڤاليا التي قالت: _مبروك لاونكل.. _الله يبارك فيكي قالها مختصرًا فعاودت الحديث: _المكان حلو أوي بجد.. ذوقه يجنن اكتفى عبدالله بإيماءة من رأسه، لكنه تفاجئ بتغزلها به وهي تتفحص هيئته جيدًا: _وأنت كمان شكلك حلو، البدلة لايقة عليك أخذ عبدالله نفسًا وبإقتضابٍ ردّ: _شكرًا..

وقفت ڤاليا إلى جواره تُشاهد ما يحدث في الأرجاء، فراود عبدالله سؤالًا فسألها بجدية: _أنا آسف في سؤالي، بس أنا حاسس إنك المفروض متكونيش هنا.. حمحم وأوضح ما يقصده من وراء كلماته: _يعني عشان آدم، الموضوع حساس بالنسبة له، فطبيعي يكون حساس بالنسبة لك أنتِ كمان أخذت ڤاليا نفسًا وزفرته بقوة تمهيدًا لما ستُصرح به، استدارت بجسدها وقفت مقابله ثم أسبلت عينيها في عينيه وقالت: _أنا جاية عشانك أنت يا عبدالله..

تفاجئ عبدالله بكلماتها المبهمة بالنسبة له، ورمقها بطرف عينيها متسائلًا بجدية: _مش فاهم الجملة؟ بمعنى؟ أطالت النظر به قبل أن تبُوح بمشاعرها: بمعنى إني بحبك يا عبدالله!