رواية عمياء وسط الذئاب الفصل الرابع والثمانون 84 - بقلم محمد طه

_الدكتور تقريبا قطع النفس وفقد الوعي تماما وبالصدفة كانوا بالقرب من المستشفى اللي فيها أصحاب نور _لكن فهد رفض تماما إنه يدخل بالدكتور المستشفى دي بالذات لكن حالة الدكتور كانت خطيرة جدا وما بقاش قدامه غير حاجة من الاتنين يا إما يسيب الدكتور يموت يا إما يدخل المستشفى. وبعد تفكير قرر إنه يلجأ للباشا _فهد _أيوه يا باشا.. الدكتور تعب فجأة وقطع النفس _الباشا _مات ولا لسه عايش _فهد _لسه عايش بس إن ما اتلحقش هيموت _الباشا

_إنتو فين _فهد _إحنا قريبين من المستشفى اللي كان فيها نور _الباشا _خدوه ع المستشفى واعملوا اللازم وتدخلو المستشفى بأسامي وهمية وإن ما مات سيبوه واخرجوا في هدوء من غير ما أي حد ياخد باله (في المستشفى غرفة سمير) _سمير حالته بدأت تسوء وتتدهور أكتر والأجهزة بدأت تعطي إشارات مطمئنة وسمر بكل خوف وقلق تستدعي الدكتورة والدكتورة تستدعي أفضل دكاترة في المستشفى لكن خلاص مفيش حد في إيديه حاجة يعملها وسمير حرفيا بيموت _سمر بدموع

_أبوس إيدك يا دكتورة.. اعملي أي حاجة _الدكتورة بدموع _والله يا سمر إحنا عملنا كل حاجة ممكن تتعمل ولو بإيدي أديله من عمري.. ما هتأخر _سمر بوجع وصوت كله دموع _يعني إيه هنموت واحد ورا واحد علي مات وسمير بيموت مين فينا اللي عليه الدور _الدكتورة بوجع _أصعب شيء في الدنيا إننا نشوف اللي بنحبهم بيموتوا قدام عينينا وإحنا مش قادرين نعملهم حاجة إحنا لسه قلوبنا موجوعة على علي وقلوبنا مش حمل وجع تاني على سمير _سمر بوجع

_لأ.. سمير مش هيموت.. سمير مش هيموت أبوس إيدك يا دكتورة.. خدي أي عضو من جسمي خدي كل أعضاء جسمي وإديها لسمير.. عشان يعيش أبوس ايديكي _الدكتورة تاخدها في حضنها _خلاص يا سمر القدر قال كلمته وكلها ساعات أو دقايق وسمير يفارقنا (عند هبة) _هبة رجعت من زيارتها من السجن وراحت للباشا على الشركة السكرتيرة بلغتها باللي حصل للباشا _وقالتلها إنه اتحول للمستشفى وإنه بين الحياة والموت ومحدش عارف هو إيه اللي عنده

_هبة تلف وشها وتخرج من الشركة في هدوء _هبة في سرها _هو إيه اللي حصل للباشا أنا كنت سايباه ما فيهوش حاجة غريبة في لحظة كده يبقى بين الحياة والموت طب إيه.. أروح أشوفه وأطمن عليه ولا إيه لأ يا هبة تروحي فين.. دا إنتي تحمدي ربنا إنك مكونتيش معاه وقت اللي حصله وإلا كانوا هيتهموكي فيه وتشيلي إنتي الليلة أنا أحاول أعرف الأخبار من بعيد لبعيد ومظهرش في الصورة خالص _طيب هتعملي إيه دلوقتي يا هبة

دا إيه الحظ الزفت اللي ملازمني ده أنا لازم أختفي اليومين دول لحد ما أشوف إيه اللي هيحصل مع الباشا وإيه اللي هيحصل مع كوثر.. ما هي لما هتموت أكيد هيكشفوا عليها وهيعرفوا إنها مسمومة وهيدوروا على اللي جابتلها الأكل في الزيارة إختفي يا هبة لحد ما الدنيا تهدى وتروق (المقر الرئيسي للباشا الكبير) _ميري _المعلومات اللي طلبتها نور جاهزة _الباشا _سيبيهم عشان هبص عليهم قبل ما يوصلوا لنور وقوليلي عملتي إيه مع أختك _ميري

_أختي بريئة يا باشا.. واللي حصل من أختي كشف لنا مؤامرة كانت بتتعمل علينا _الباشا _وضحي كلامك يا ميري _ميري _يا باشا أصحاب نور بيدوروا عليها وإن ما وصلوش النهارده.. هيوصلوا بكرة وهيعملوا لنا صداع وشوشرة _الباشا _طبيعي يا ميري إنهم يدوروا على نور لكن اللي مش طبيعي وجود أختك عند النادي وقت لها لعلي ومش شوية عيال زي دول يا ميري اللي هيعملوا لي صداع وشوشرة _ميري _يا باشا المشكلة بتحصل من أهون سبب والدكتورة وسمر مش ساهلين

ولازم ناخد بالنا منهم _الباشا _بيتهيأ لي يا ميري كفاءتك تعدي كفاءة الاتنين دول بمراحل دول بالنسبالك تلاميذ.. وف حضانة كمان إيه يا ميري متخلنيش أقول إنك كبرتي ومش قد الشغلانة _ميري _ولما حضرتك شايف إني على مستوى عالي من الكفاءة.. ليه دخلت عيلة صغيرة في وسطنا وخليتني تحت أمرها _الباشا بحده _ميري.. إنتي ولاؤك للشغل ولا للمنصب _ميري _ولائي لحضرتك _الباشا _يبقي تنفذي اللي حضرتك تأمر بيه من غير نقاش (في المستشفى غرفة نهلة)

_نهلة بوجع ودموع _أم محمد أنا عايزة أشوف علي نفسي أشوفه.. نفسي أودعه _أم محمد _مش هينفع يا نهلة وبعدين أنا معرفش هو هيبقي فين دلوقتي ف المشرحة ولا ف التلاجة _نهلة _أبوس ايديكي يا أم محمد.. خليني أشوفه أنا عارفة وإنتي عارفة إنك ممكن تعرفي هو فين بكل سهولة وإنتي الوحيدة اللي تقدري توصلي لي وتخليني أشوفه والنبي يا أم محمد _أم محمد _إنتي كده هتتسببي لي في مشاكل يا نهلة ولو الدكتورة عرفت هتزعل مني _نهلة _الدكتورة مش هتعرف

أنا بس هشوفه دقيقة واحدة مستكتره عليا إني أشوفه دقيقة واحدة _أم محمد _خلاص يا نهلة هوديكي وربنا يستر بقي _نهلة وأم محمد وهما ماشيين في الطرقة كان جاي قدامهم ممرضة كانت سايقة قدامها ترابيزة عليها وجبات بتوزعها على العيانين وف نفس الوقت كان على الترابيزة طبق فيه غيارات شاش وقطن وبيتادين ومشرط وأول ما نهلة جات قصاد الترابيزة أخدت مشرط من غير ما حد يحس بيها (ف تلاجة الموتى) _أم محمد _أنا هراقب الطريق بره.. قدامك دقيقتين

مش دقيقة واحدة زي ما كنتي عايزة _نهلة بدموع وخوف من المكان _شكرا يا أم محمد.. وأنا مش هكمل الدقيقتين (أم محمد تخرج ونهلة تكلم جثة علي) _نهلة بوجع ودموع _هونت عليك يا علي تسيبني لوحدي فاكر لما قولت لي إني ما بقتش لوحدي أنا دلوقتي بقيت لوحدي بس أنا مش عايزة أبقى لوحدي يا علي أنا هاجيلك يا علي عشان إنت وحشتني أوي (وقطعت شرايينها بالمشرط) _أم محمد تدخل تلاقي نهلة ع الأرض وقاطعة شرايينها والدم مغرق المكان

تتصل بسرعة بالدكتورة _أم محمد بأنفاس محبوسة _الحقيني يا دكتورة نهلة انتحرت (الدكتورة وسمر كانوا عند سمير) _الدكتورة بصدمة _إنتي بتقولي إيه.. بتقولي إيه _سمر بقلق _فيه إيه يا دكتورة إيه اللي حصل _الدكتورة وهيا خارجة تجري من الغرفة _نهلة انتحرت _سمر خرجت تجري ورا الدكتورة عشان يلحقوا نهلة وف اللحظة دي دخل شخص غرفة سمير وضرب حقنة لسمير في الوريد.........