رواية عمياء وسط الذئاب الفصل الثاني والتسعون 92 - بقلم محمد طه

_الظابط نوره _ما هو قولك فيما هو منسوب إليك؟ بأنك ترأس شبكة منافية للآداب. _سمير بصدمة _رئيس شبكة منافية للآداب؟ طب إزاي؟ _الظابط نوره _حضرتك بقي اللي هتقولنا إزاي. ومين أفراد الشبكة اللي شغالين معاك واحد واحد. _سمير يستجمع قواه _حضرتك أكيد فيه حاجة غلط. _نوره بنظرة ثقة _هو فعلاً فيه حاجة غلط. وحضرتك هنا عشان نوقف ونمنع الغلط اللي بيحصل. _سمير _يا أفندم أنا زي حضرتك بالظبط. عايز الغلط ده ينتهي ويخلص.

ولو حضرتك راجعتي قضية الآداب اللي حصلت في المستشفى، هتلاقيني كنت مشارك مع الدكتورة ونور وأصحابها في القبض على كتير من أفراد الشبكة. يبقى إزاي أبقى أنا رئيسهم؟ _الظابط نوره _تنكر إنك سوابق؟ _سمير _حضرتك هي سابقة واحدة. وملهاش أي علاقة بالآداب. ويعلم ربنا إني بريء منها. بس للأسف معرفتش أثبت براءتي. _نوره بابتسامة ساخرة _بريء. (وتبص له بجدية) تقدر تقولي إيه علاقتك بـ داليا الشهيرة بـ الغالية؟ _سمير _داليا تبقى أختي.

وأنا مليش أي دعوة بشغلها وتعاملاتها. _نوره بابتسامة _ملكش دعوة إزاي؟ ده أنته كنت تقريباً دراعها اليمين في كل شغلها. _سمير بغضب _يا أفندم حضرتك عايزة تلبسيني أي تهمة والسلام؟ _نوره بغضب وتحدي _آه، وأوعدك إني هلبسك بدل القضية اتنين وتلاتة. أولاً: رئيس شبكة منافية للآداب. ثانياً: خطف المدعوة نور ممدوح. وفيه احتمال إنك تكون قتلتها. ثالثاً... _سمير يقاطعها بغضب _ثالثاً إيه؟ مفيش حضرتك حاجة من اللي بتقوليها دي.

خطف إيه وقتل إيه؟ يا أفندم أنا كنت مخطوف. مع نور والدكتورة وشاكر هما اللي رجعوني. وتقدري تسأليهم. يا أفندم أنا من يومين بس. أنا كنت بين الحياة والموت. _الظابط نوره _وأنا بأكدلك إن كل ده كان جزء من خطتك. أولاً: إتواصلت مع الدكتورة على إنك دكتور عيون. وقدرت تقنعها إن العملية بسيطة وسهلة. بعد كده سافرت مع نور على ألمانيا. وأول ما وصلتوا، الحساب بتاع الدكتور اللي كنت بتكلم الدكتورة منه. إتقفل وإتقطعت أخباركم.

بعد كده لفيت شوية بنور في ألمانيا. وبعدين رجعتها على المطار ورجعتها على مصر. ولما رجعتها على مصر كنت حريص على إنك تدخلها في أماكن ما فيهاش كاميرات. عشان محدش يقدر يوصلها. أما بالنسبة لحضرتك، فخليت رجالتك يرموك في طريق غابة. وبالصدفة بنت تاخدك وتعتني بيك. وكل ده قدام الكاميرات عشان تسهل الوصول ليك. لحد ما فعلاً الدكتورة وشاكر قدروا يوصلولك ويرجعوك لمصر. وبالصدفة للمرة التانية اتنين يدخلوا المستشفى ويعطوك إبرة.

بعدها بنص ساعة تقوم وكأن مفيش فيك حاجة. ولما عرفت إني كشفت المقر بتاعك، قولت تروح هناك عشان تنفي أي شبهة تجاهك. وفجرت المقر بداية من الدور الأخير للدور الأرضي. مع إنك كنت ممكن تحط قنبلة في الدور الأرضي والمبنى كله كان هينزل على الأرض. _سمير بغضب _يا أفندم أنا بأكد لحضرتك إني بريء من كل اللي بتقوليه ده. وبأكد لحضرتك إن نور في خطر. وأنا لازم أخرج من هنا عشان أنا الوحيد اللي هقدر أرجعها. _الظابط نوره

_فعلاً أنت الوحيد اللي تقدر ترجعها. لأنك الوحيد اللي تعرف مكانها. بس ده لو كانت لسه عايشة وعلى قيد الحياة. _سمير _إن شاء الله عايشة. بس حضرتك لازم تساعديني عشان نقدر نساعدها ونرجعها قبل ما يأذوها. أنا مش عارف حضرتك ليه مصدقة ومقتنعة إن أنا اللي خاطفها. _الظابط نوره _عشان الأدلة كلها ضدك. وأنا متأكدة من كل كلمة قلتها. فمن مصلحتك تعترف. _سمير بغضب _يا أفندم أعترف بإيه بس. كل اللي حضرتك قولتي ده أنا ماليش أي علاقة بيه.

أقسم لك بالله أنا اتخطفت مع نور. وآخر حاجة فاكرها إن فيه بنتين استقبلونا في مطار ألمانيا وركبوا كل واحد فينا في عربية. وأنا فعلاً كنت قلقان وحاسس إن فيه حاجة هتحصل. والبنت اللي كانت معايا في العربية عطتني سيجارة وبعد ما شربتها بدأت أفقد الوعي. وفوقت لقيت نفسي في المستشفى. يعني من لحظة ما شربت السيجارة لحد ما فوقت في المستشفى كل ده مش فاكره. ولا فاكر إيه اللي حصلي. حضرتك لازم تصدقيني. _الظابط نوره _هصدقك.

بس تعال لي كده نكمل باقي التهم الموجهة ليك. أنت نفسك مش هتصدق، يبقى إزاي عايزني أصدقك يا سمير باشا؟ _سمير بغضب _يا أفندم أي تهمة تانية مش مهم. أنا المهم عندي دلوقتي رجوع نور. ساعديني نرجع نور. وبعد كده إتهمني بأي تهمة وأنا همضيلك وأبصملك عليها. بس نلحق نور ونرجعها قبل ما يأذوها. _الظابط نوره بعصبية وانفعال _هو ليه حضرتك محسسني إنك قاعد مع واحد صاحبك وبتطلب منه إنه يساعدك؟ يا أستاذ أنت متهم برئاسة شبكة منافية للآداب.

وقضية خطف و3 قتل. _سمير بصدمة _3 قتل؟ ودول بقى أنا قتلتهم إمتى وأنا فاقد الوعي؟ _الظابط نوره _أنت متهم بقتل أختك واثنين كمان. واحد اسمه عماد والتاني اسمه حامد الديب. _سمير _يا أفندم أختي متوفية بسكتة قلبية. وفيه تقرير طبي بيأكد كلامي وممضي من الدكتورة سناء. والاثنين التانيين كانوا دفاع عن النفس. والـ 3 قضايا خلصوا واتقفلوا. _الظابط نوره بابتسامة _لأ ما أنا فتحتهم تاني وطالبت بخروج الجثث وتشريحها من أول وجديد.

واتضح إن أختك متوفية بكسر في الرقبة مما أدى إلى الوفاة. والاثنين التانيين واحد بنفس الطريقة والتاني بطلق ناري. وتصحيح لمعلوماتك، التقرير الطبي مش الدكتورة سناء اللي ماضية عليه. اللي ماضي عليه شخص تاني خالص. واتحول للتحقيق. مبروك عليك البدلة الحمرا يا أستاذ سمير. _سمير بصدمة _يعني إيه مش الدكتورة اللي ماضية على التقرير؟ ده الدكتورة هي اللي كتباه بنفسها وماضية عليه. (وبعد تفكير)

بعد إذنك يا أفندم اسمحيلي أعمل مكالمة تلفون. _الظابط نوره _هو مش مسموح لك. _سمير يقاطعها _دقيقة واحدة، أرجوكي. _الظابط نوره _معاك دقيقة واحدة. _سمير _أيوه يا سمر، ابعتيلي محامي. ونور قدام الدكتورة. _الظابط نوره باستفهام _ابعتيلي محامي ومفهومة. يعني إيه نور قدام الدكتورة؟ _سمير بغضب _يعني الدكتورة هي رئيسة الشبكة المنافية للآداب...