رواية عمياء وسط الذئاب الفصل الحادي والتسعون 91 - بقلم محمد طه

الدكتوره بتوتر وقلق: هبه.. إنتي دخلتي هنا إزاي؟ هبه والدموع بدأت تتجمع في عينها: أبوس إيدك يا دكتوره.. أنا من يوم ما خرجت من السجن وأنا مش عارفه أروح فين ولا أعمل إيه.. أبوس إيدك يا دكتوره شغليني في المستشفى.. لو هتخليني حتى أنضف الحمامات.. أبوس إيدك مفيش حد راضي يشغلني. الدكتوره تبلع ريقها وتبدأ تطمن لها: وبالنسبة كبيرة هبه صعبت عليها وهتحاول تساعدها. الدكتوره: أيوه يا شاكر أقفل دلوقتي وهرجع أكلمك تاني.

وتقفل الدكتوره مع شاكر. وتبص لهبه من فوق لتحت وحالة هبه تصعب عليها. الدكتوره: أيوه يا هبه بس المستشفى مش بتاعتي.. ومش أنا اللي أقول مين اللي يشتغل.. ومين اللي ما يشتغلش. هبه بدموع: أبوس إيدك يا دكتوره أنا ما بقاش ليا حد.. وجوزي طلقني.. أرجوكي أعملي أي حاجة.. وشغليني في أي حاجة.. أنا مستعدة أمسح وأنضف إن شاء الله الحمامات. الدكتوره: هبه.. هو إنتي مش واخدة بالك.. إنتي كنتي بتعملي إيه واتمسكتي في إيه؟ هبه بدموع وتقرب من

الدكتوره عشان تبوس إيدها: غلطت ومعترفة بغلطي.. وأخدت جزائي واتعاقبت.. وندمت ومستقبلي ضاع وبيتي اتخرب.. أبوس إيدك ساعديني.. عشان ما أرجعش أمشي في الطريق ده تاني. الدكتوره بعد تفكير: وإيه اللي يضمن لي يا هبه.. إنك اتغيرتي وبقيتي كويسة.. ومش هتعملي لي مشاكل في المستشفى تاني؟ هبه: حضرتك خليني تحت عنيكي الـ 24 ساعة.. لو شفتي مني أي حاجة غلط.. اعملي فيا اللي إنتي عايزاه. الدكتوره بعد تفكير تتصل بأم محمد:

أم محمد تعالي المكتب بسرعة. وتقفل مع أم محمد وتبص لهبه: أنا هخليكي تحت الملاحظة شهر.. ولو اتأكدت إنك اتغيرتي هتنزلي شغلك.. وأكن مفيش حاجة حصلت.. وأتمنى إنك تكوني فعلاً اتغيرتي واتعلمتي الدرس. هبه تنشف دموعها: وأنا أوعدك إنك هتشوفي هبه تاني خالص.. واحدة غير اللي كنتي تعرفيها. أم محمد تدخل وتتفاجئ بوجود هبه: إنتي إيه اللي جابك هنا يا بت ودخلتي هنا إزاي.. أنا هطلبلها الأمن ييجوا يرموها بره. الدكتوره:

أم محمد.. هبه هتشتغل مساعدة ليكي.. وتخليها تحت عنيكي الـ 24 ساعة.. لما نشوف هي فعلاً اتغيرت.. ولا لسه هبه بتاعة زمان. (المقر البديل للباشا الكبير) الباشا: اتفضلي يا نور دي المعلومات اللي طلبتيها.. وخدي بالك أنا لحد دلوقتي.. ما استفدتش منك بحاجة. نور: هتستفاد يا باشا ما تستعجلش.. المهم بس المعلومات دي أنا هقرأها إزاي.. إنت مش واخد بالك إني عمياء ولا إيه؟ الباشا: يبقى خلي الدكتور يقرأها لك. (مع دخول فهد) الباشا:

ها يا فهد وصلت لإيه؟ فهد: فيه بنت برتبة ملازم أول.. هي اللي بتدور ورانا. الباشا بغضب: ودي سمعت عننا فين عشان تدور ورانا؟ فهد: من قضية هبه سعادتك.. حضرة الظابط دي كانت في السجن.. اللي كانت فيه هبه وكانت قريبة جداً من هبه.. وبعد ما هبه خرجت من السجن.. حضرة الظابط راحت المستشفى.. وقابلت الدكتوره وأصحاب نور.. ووعدتهم إنها هتدور على نور وترجعها لهم. الباشا: سامعة يا نور.. أصحابك هما اللي بيدوروا ورانا..

عشان لما يتأذي حد منهم ما تلومنينيش. نور: لأ يا باشا.. ما اسمهاش بيدوروا وراك.. اسمها بيدوروا عليا.. وده شيء طبيعي ومتوقع.. وبعدين هو حضرتك مش واخد بالك من الكلام.. بيقولك ظابط اللي بيدور وراك. الباشا: فهد.. تشوف لي إيه حكاية البنت الظابط دي.. وتعرف لي عنها أي نقطة ضعف.. ولو ملهاش نقطة ضعف.. تخلق لها نقطة ضعف. نور في سرها: فرصتك يا نور تكبري العداوة بينه وبين الحكومة.. إنتي مش هتقدري عليه لوحدك يا نور..

لازم تخلي الحكومة تساعدك.. يبقى إنتي من جوه والحكومة من بره. (وتعلي صوتها) أسمع يا فهد لو ملهاش نقطة ضعف.. أنا هقولك إزاي تخلق لها نقطة ضعف.. ده مفيش أسهل من إنك تخلق نقطة ضعف لبنت.. مهما إن كانت قوية. (الباشا يهز رأسه لفهد بالموافقة) فهد: طيب يا باشا بالنسبة لسهيلة؟ الباشا: سهيلة كفاية عليها الخوف.. اللي عاشته الفترة اللي فاتت.. وهي دلوقتي في مهمة هي وميري.. ويلا كل واحد على شغله.. عشان فيه ضيوف مهمين على وصول.

الدكتور ياخذ نور ويروحوا غرفة فاضية.. عشان يقرأ لها التقرير. وفهد يخرج عشان يعمل تحريات عن الظابط نوره. والباشا يستعد لمقابلة ضيوفه. (في النادي) سمر بتحط خطة تهريب سمير من القسم. سمر: اسمعوا يا بنات.. سمير دلوقتي محجوز في القسم.. فيه بنت ظابط حجزاه بتهمة باطلة.. وإحنا لازم نهربه بأي طريقة.. ولو سمحت لنا الفرصة وإحنا بنهربه.. إننا نخطف البنت الظابط دي.. ما نترددش لحظة ونخطفها.. ودلوقتي هقولكم هنعمل إيه بالظبط..

أولاً من حسن حظنا إن القسم مش كبير.. ومتطرف بعيد عن المدينة.. والخطة كالتالي.. إحنا هنقسم نفسنا لمجموعتين.. مجموعة هتبقى بره ومجموعة هتبقى جوه.. المجموعة اللي هتبقى جوه.. هيدخلوا كأنهم مواطنين عاديين.. اللي داخلة تعمل محضر بسرقة.. واللي داخلة تسأل عن جوزها المسجون جوه.. واللي داخلة تعمل محضر عن اختفاء جوزها.. وتلاتة أربعة يعملوا خناقة قدام القسم.. والعساكر هيقوموا بالواجب ويدخلوهم جوه..

وبعد ما نصنا بالظبط يبقى جوه القسم.. تبدأوا تنتشروا جوه القسم.. عشان وقت الهجوم تسيطروا عليهم من جوه.. وتسهلوا لنا مهمة الدخول.. ها فيه أي استفسار عن أي حاجة؟ البنات في صوت واحد: كله تمام. سمر: على بركة الله.. أول ما سمير يبعت لي الإشارة هتبدأ مهمتنا. (في القسم.. مكتب الظابط نوره) الظابط نوره: اسمك وسنك وعنوانك؟ سمير: اتفضلي البطاقة. الظابط نوره: ما هو قولك فيما هو منسوب إليك.. بأنك ترأس شبكة منافية للآداب......