رواية عمياء وسط الذئاب الفصل الحادي والأربعون 41 - بقلم محمد طه

داليا بغضب: اللي ما تعرفهوش إنك مش أخويا.. أنته إبني.. وإبني لو عصاني.. أفعصه تحت رجليا.. تجيبلي البت.. وما شوفش وشك تاني. سمير وهوا بيحاول يشيل إيدها من على رقبته: إنتي مستحيل تكوني من جنس البني آدمين. في المستشفى. غرفه نور. نور ونهله. نور: بقولك إيه يا نهله خدي علي وامشو من هنا. نهله: حاضر يا نور.. بس قوليلي الأول.. بعد ما آخد علي ونمشي من هنا.. هنروح فين.. وهناكُل ونشرب إزاي. نور: يا نهله أنا خايفه عليكم.

نهله: ولما نمشي من هنا.. هتطمني.. دا المفروض تخافي علينا أكتر. نور: أنا متأكده إن المدير ده بيخطط لحاجه. نهله: خليه يخطط.. وإحنا هنمسحه هوه وخطوطه. نور: يا نهله الموضوع كبير وهما مش هيسكتو. نهله: الموضوع كبير.. الموضوع صغير.. مش دا المهم.. أنا اللي شاغلني موضوع أهم من دا كله.. ومش عارفه أتصرف إزاي. نور: موضوع إيه دا اللي أهم من دا كله.

نهله: دلوقتي علي لما هيشتغل في غرفه مراقبه الكاميرات.. هيدخل على كاميرات غرف البنات.. وهيقعد يتفرج على دي شويه.. وعلى دي شويه.. ويشوف دي وهيا بتغير هدومها.. ويشوف دي وهيا نايمة. نور: لله الأمر من قبل ومن بعد. مع دخول الدكتورة وتسمع نور وهي بتقول: لله الأمر من قبل ومن بعد. الدكتورة: خير يا نور.. فيه إيه. نور: أختنا نهله.. فيه عندها مشكلة كبيرة.. وأنا مش عارفه أحلها.. يا ريت حضرتك تساعديها.

الدكتورة باهتمام: خير يا نهله.. مشكلة إيه. نهله وهيا بتشاور على الكاميرا: قوللي يا دكتورة.. هوه علي شايفنا دلوقتي. الدكتورة: لأ. نهله: طيب مين اللي شايفنا دلوقتي. الدكتورة: اللي شايفنا دلوقتي هتبقي نسمه.. لأن هيا اللي ماسكه غرف الإناث كلها. نهله: الحمدلله.. خلاص كده المشكلة اتحلت. الدكتورة باستغراب: المشكلة اللي نور ما عرفتش تحلها.. خلاص كده اتحلت.. أنا مش فاهمه حاجة.

نور: والأفضل يا دكتورة إنك ما تركزيش مع البت دي.. المهم.. قوليلي عملتي اللي قولتلك عليه. الدكتورة: كله تمام يا نور.. هوه الواد شاكر شاطر.. وقد المهمه.. وأنا بثق فيه.. بس أنا عايزة أعرف.. هيا إيه المشكلة اللي أنا حليتها.. وأنا مش عارفه هيا إيه أساسا. نور: حضرتك طمنتي جوليت على روميو.. إنه مش هيقعد يتفرج على البنات في الكاميرات.

الدكتورة: هوه إحنا في إيه.. وهيا في إيه.. بقولك إيه يا نور.. أنا هوقف لها علاج تنشيط الذاكرة.. وهكتبلها على خروج.. إنتي عايزة حاجة. مع ابتسامة الجميع. نور: بقولك إيه يا دكتورة.. لو لاحظتي أي حاجة غريبة.. أو فيه أي حاجة جديدة في المستشفى.. أبقي عرفيني بيها. الدكتورة بتفكير: أي حاجة غريبة أو جديدة.. هوه عالعموم كل حاجة طبيعية.. مفيش بس غير أربع بنات جداد استلموا الشغل.. مكان البنات اللي كانو مع هبه.

نور: تقولي لأم محمد تخلي عينها عليهم من بعيد لبعيد. مع دخول أم محمد المفاجئ. أم محمد: الحقي يا دكتورة.. فيه حالتين طالعين. الدكتورة: وهوه ما فيش في الأدوار اللي تحت غرف فاضية. أم محمد: أكيد هيبقى فيه.. بس الأكيد.. إن هنا ما فيش غرف فاضية. نور: لأ فيه.. غرفة علي ونهله.. قومي يا دكتورة شوفي شغلك. الدكتورة تروح تدخل حالة غرفة علي. وتدخل حالة غرفة نهله. وتشوف التقرير الخاص بالحالة اللي في غرفة نهله.

مدام في أواخر التلاتينات.. تسمم.. وتم عمل اللازم لها. الدكتورة للمرافق اللي معاها: حضرتك أطمن.. هيا هتبقى كويسة.. هوا حضرتك جوزها. المرافق: أنا أخوها.. واسمي عماد. الدكتورة: أهلا بحضرتك يا أستاذ عماد. وتخرج الدكتورة وتروح للحالة اللي في غرفة علي. وتشوف التقرير الخاص بالحالة. غيبوبة سكر.. وتم عمل اللازم له.. وبدأ يفوق. الدكتورة عرفت اسمه من التقرير. الدكتورة: حمدلله ع السلامة يا سمير. في غرفة مراقبة الكاميرات.

علي يلاحظ دخول شخص غريب ومخيف.