رواية عمياء وسط الذئاب الفصل الخامس والعشرون 25 - بقلم محمد طه

سيد بصوت واطي: تعالي ندخل جوه. وأنا أقولك أنا عايز إيه. وبالصدفة الدكتورة تشوف أم محمد وهي واقفة مع سيد في الطرقة. وسيد وأم محمد ما ياخدوش بالهم منها. أم محمد وشها جاب ألوان: لأ يا سيد.. أنا مستحيل أعمل كده.. أنته فاكرني إيه. سيد: أنتي اللي افتكرتي إيه.. أنا قصدي ندخل جوه.. عشان ناخد راحتنا في الكلام.. بدل ما إحنا واقفين في الطرقة كده.. للي رايح واللي جاي يبص علينا. أم محمد ترتبك: يبص علينا بعد إذنك يا سيد. وتسيبه

وتمشي وتقول في سرها: أنتي نسيتي نفسك ولا إيه يا سيدة. في غرفة علي (علي ورجب) علي: شوف بقى يا رجب أنا عايزك تصدعني. رجب: أول مرة أقابل حد عايز الصداع لنفسه. علي: يا عم أنته بس صدعني.. واحكيلي مغامراتك.. من بدايتها لنهايتها. رجب: بس أنا عندي شغل ومش فاضي أحكي حكايات.. أوعدك أي وقت هبقى فاضي فيه هبقى آجي أحكيلك.. بس يا حظك يا عم غرفتك جنب مزتين. علي يجاريه

بس من جواه بيغلي من الغضب: أسكت دول مزتين جامدين أوي.. وخصوصا البت العميا. رجب باهتمام: عندك حق يا علي.. البت دي صاروخ.. ما تحكيلي عنها شوية. علي بغضب من جواه بس بيمثل على رجب إنه مندمج معاه، بس يهرب بالطريقة: هوه أنته مش كنت مش فاضي وعندك شغل.. أول ما تفضى تعالا.. أنته تحكيلي عن مغامراتك مع هبه.. وأنا أحكيلك عن البت العميا. في غرفة نور (نور ونهلة) نهلة: نور أنتي صاحية. نور: أيوه يا نهلة صاحية.

نهلة بخوف: أنا خايفة.. خايفة العنوان يبقى صح.. وكلام الدكتورة يبقى صح. نور بهدوء: وأنا مش خايفة يا نهلة.. ونفسي العنوان وكلام الدكتورة يكونوا صح.. لأن ساعتها هتأكد إني بحلم.. وفي أي لحظة هصحى ألاقي نفسي بشوف.. وبابا وماما جنبي.. أنا بتمنى.. إن كل اللي بيحصل دا يكون حلم. نهلة: بقولك إيه يا نور.. لما الدكتورة تيجي.. أنا هطلب منها إني أروح معاها.

نور: لأ يا نهلة.. عشان ما تحسيش إننا شاكين فيها.. ومش مصدقينها.. إحنا كده كده هنخرج من هنا.. وهنروح نتأكد بنفسنا. نهلة بخوف: ولما نخرج ونروح ومنلاقيش جدتنا.. ومنلاقيش الشقة هنعمل إيه يا نور. نور بتنهيدة قلق: العمل عمل ربنا وربنا بقى يتولانا. في غرفة من غرف المستشفى (هبه وسيد) هبه: ها يا سيد عملت إيه. سيد: بسويها على نار هادية. هبه: وهيا جايه معاك ولا بتصدك.

سيد بثقة: بتصدني.. دا الود ودها تقولي.. سويني ودلعني يا سيد على كيفك وبراحتك. هبه: كنت متأكدة إنها مش هتقدر تقاوم.. دي محرومة بقالها كتير. سيد: لأ وعلى رأيك مع إنها أكبر مني.. بس جامدة وعجبتني. هبه: ما تتقل يا سيد.. لتكون هيا اللي بتلعب بيك.. مش أنته اللي بتلعب بيها. سيد يلف إيده على رقبة هبه: مفيش حد يقدر يلعب بسيد.

هبه تنزل إيده: عارفة.. بس بردو تاخد بالك.. وتنجز شوية مش هنقضيها معاكسات وتسبيل.. بكرة بالكتير تنام معاها وتصورها.. ولا أنته نسيت البت الصغيرة ومش عايزها. سيد: نسيت إيه.. هوا أنا بعمل كل دا عشان إيه. هبه وهيا خارجة من الغرفة: يبقى تنجز وتلخص. نهلة خارجة من غرفة نور.. ورايحة لأم محمد.. وهبه جايه عليهم. أم محمد بصوت واطي: بقولك إيه يا نهلة.. هبه اللي جايه علينا دي.. ادخلي بسرعة عرفي نور واخرجي.

نهلة تدخل بسرعة تبلغ نور وتخرج. هبه: إزيك يا خالتي. وتبص لنهلة: إزيك يا عروسة. نهلة: الله يسلمك. أم محمد: ادخلي يا هبه شوفي غرفة 7 لو محتاجة حاجة. هبه: أمرك يا خالتي. وتدخل هبه غرفة نور وتقفل الباب وراها.