رواية عمياء وسط الذئاب الفصل التاسع 9 - بقلم محمد طه

ممدوح.. أمي قالتلي على تفسير الحلم. اللي بتحلموه نور.. وسبب إحنا ليه.. مش بنرد على نور في الحلم. نرجس بقلق وخوف: قالتلك إيه يا أبو نور. ممدوح: قالتلي الحلم ده بنسبة كبيرة جدًا. هيتحقق ولو اتحقق.. إحنا مش هنبقى موجودين. عشان كده ما بنردش على نور في الحلم. نرجس بخوف وانفعال: لأ.. لأ.. أمك كبرت وخرفت. أمك اتجننت يا ممدوح.. بنتي مش هيحصلها حاجة. بنتي مش هيحصلها حاجة يا ممدوح.

ممدوح يهدئها: اهدي يا نرجس البنات جوه يسمعوكي. وينظر للسماء.. المكتوب مفيش منه هروب. لله الأمر من قبل ومن بعد. مع طلوع نور ونهلة من الأوضة. نور: إحنا جاهزين يا بابا.. بس بعد إذنك أنا هاخد الدب معايا. ممدوح: ماشي يا نور خديه. عند جدة نور. ممدوح: إزيك يا أمي عاملة إيه. الجده: الله يسلمك يا حبيبي. نور: إيه رأيك يا جدتي في الدب ده. الجده: على قد ما هيفرحك.. على قد ما هيخوفك. نور: هوه فعلاً يا جدتي خوفني مرة.

نرجس بانفعال: خوفك.. خوفك إزاي يعني. نور تطمئنها: اهدي يا ماما مفيش حاجة. نهلة: مفيش حاجة ده إيه.. لأ ده فيه وفيه. أنا هقولك يا مرات خالي.. نور نامت كده حوالي ساعة. وكانت منيمة الدب جنبها.. صحيت شافت الدب. قاعد قدامها على الكرسي وفي إيده سيجارة.. وكانت هتقول سيجارة.. بس جدتها وخالها قاعدين. لحقت نفسها وقالت.. سيفن آب بيشربها. نور: يا ماما أهدي ما تخافيش.. هو كل ده حصل. بس هي اللي عملت كل ده. هبلة بقى ونعذرها.

الجده: نور خدي الهبلة دي.. وادخلي جوه. عايزة أبوكي وأمك في كلمتين. نور: حاضر يا جدتي قومي يا هبلة.. سيفن آب. الجده: مالك يا نرجس.. فيه إيه. ده انتي حتى ما سلمتيش عليا. ممدوح: معلش يا أمي.. نرجس متوترة بس من. الحلم اللي بتحلموه نور.. واتوترت أكتر. لما قولتلها على تفسير الحلم.. اللي انتي قولتيلي عليه. الجده: وطبعًا قولتي عليا إني كبرت وخرفت واتجننت. نرجس بدموع: إيه اللي هيحصل لبنتي يا أمه.

الجده: اللي هيحصلها هيبقى كله خير إن شاء الله. ممدوح: شوفي يا أمه لو انتي شايفة. إن المشكلة في الشقة.. أنا من بكرة الصبح. هدور على شقة تانية. الجده: الشقة الخطر اللي فيها وحواليها زاد. نرجس بخوف: خطر.. إحنا عملنا إيه. عشان يحصلنا دا كله. ممدوح: اهدي يا نرجس.. مش عايزين نور تحس بحاجة. الجده: قوم يا ممدوح.. خد مراتك وادخلوا ناموا. وابعتيلي نور تنام معايا الليلة. الجده ونور. نور وهيا نايمة في حضن جدتها والدب نايم جنبها.

الجده: حلو الدب ده يا نور. نور: أنا حبيته أوي يا جدتي.. واتعلقت بيه بسرعة. مع إنه رعبني.. بس أنا ما خوفتش منه. أول ما شوفته قاعد قدامي على الكرسي. قولت أكيد ده حلم أو كابوس. أول مرة أستفيد من الحلم بتاعي. اللي طالعلي في البخت ده. كل ما أشوف حاجة وحشة أو حاجة تخوف. أقول ده أكيد حلم أو كابوس. الجده: انتي طيبة يا نور.. وان شاء الله. ربنا هيحميكي.. من الذيابة المسعورة. قدرك إنك اتولدتي في وسط غابة.

قدرك إنك تكوني طيبة وتبقي بالبراءة دي. وتبص عليها الجده تلاقيها راحت في النوم. بعدين تبص للدب حوالي خمس دقايق. وتقوله.. هتقدر تحميها. الدب: هقدر.. ..