رواية عمياء وسط الذئاب الفصل الثامن 8 - بقلم محمد طه

نور ونهله فاجئوهم كلهم. وخرجوا وهما متنكرين في زي بهلوانات ولابسين أقنعة. مفيش حد من اللي قاعد قادر يفرق بين نور ونهله. منعم قاعد بيغلي لأن تخطيطه كله فشل، إنما سالم لسا مطمئن على ترتيبه. نور ونهله عملوا جو لطيف وشغلوا أغاني وفرحوا وانبسطوا. وبدأ سالم ينفذ خطته وطلب من أبو نور الدخول للحمام. قام أبو نور بكل حسن نية وصلوا لباب الحمام.

دخل سالم وحط الكاميرا في مكان يكشف الحمام كله، وبعدين خرج عادي ياكل ويشرب في بيت الراجل اللي بينهش في حرمة بيته. خلصت السهرة والضيوف استأذنوا. واحد خرج مهزوم، والتاني قدر إنه يزرع كاميرتين لنور في البيت، واحدة في علبة المكياج والتانية في الحمام. بعد الضيوف ما خرجوا قعدوا يتكلموا شوية. ممدوح: اسمعي يا نور، انتي خلاص كبرتي ومبقتيش صغيرة. نور: يا بابا لا كبرت ولا حاجة، ده هيا كلها سنة. نهله: وهيا سنة دي شوية؟

دي 12 شهر، والشهر فيه 4 أسابيع، والأسبوع فيه 7 أيام. اسكتي بس انتي مش عارفة حاجة. شكل أبوكي كده جايب لك عريس. بقولك إيه يا خالو، العريس اللي انت جايبه ده لو معجبهاش يلزمني. خالها لسا هيرد تقاطعه مرات خالتها. نرجس: معلش يا أبو نور بنت أختك بقى، ونستحملها نطردها يعني. نهله: على فكرة يا مرات خالي، أنا باردة ودرجة البرودة عندي 100 تحت الصفر. كمل يا خالي، مابقاش نهله إن ما جوزتك على الولية دي.

ممدوح: والله يا نهله أنا مطمئن على نور عشان انتي جنبها. نهله: والله يا خال أنا بعتبرها زي بنتي، مش صاحبتي أو بنت خالي. أدخل بقى على مواصفات العريس. ممدوح: اسمعي يا نور أنا قررت إني أكتب الشقة دي باسمك، بس بعد ما اتصلت بجدتك عشان آخد رأيها قالت لي على فكرة تانية أفضل. نور: قالت لك إيه جدتي؟ ممدوح: قالت لي أبيع الشقة دي خالص وناخد شقة تانية في مكان تاني. نهله: ما دام مفيش عريس، أنا هقوم أعمل لكم شاي.

نور: بابا انت ليه عايز تكتب الشقة باسمي؟ ممدوح: عشان أبقى مطمئن عليكي أكتر. يلا قومي خدي نهله واجهزوا عشان هنروح نبات عند جدتك الليلة. نور بقلق: حاضر يا بابا، بس أنا حاسة إنك مخبي عليا حاجة. بعد دخول نور ونهله الأوضة. نرجس بخوف: مخبي علينا إيه يا أبو نور؟ ممدوح: مفيش حاجة يا نرجس، قومي انتي كمان اجهزي. نرجس بإصرار: مش هقوم ولا هتحرك من مكاني إلا لما أعرف فيه إيه. عند نور ونهله في الأوضة.

نهله: هو مال خالي قالبها دراما ليه كده؟ نور: أنا متأكدة إن بابا مخبي عليا حاجة ومش عايز يقولها. نهله: هيخبي إيه يعني؟ كل ده عشان عايز يكتب الشقة باسمك. نور: اللي قالقني رأي جدتي. نهله: ده أحلى رأي قالته، مفيش أحلى من التغيير، شقة تانية ناس تانية مكان تاني. نور: رأي جدتي ده له علاقة بالحلم اللي أنا بحلمه؟

نهله: بقولك إيه يا نور، انتي لما بتجيبي لي سيرة الحلم ده أنا بتعفرت وبتضايق، أنسي بقى كل ده وتعالي نشوف الهديتين دول عشان أنا مش مرتحالهم. وتبدأ بهدية منعم. أوبااااا إيه الطقم الجامد ده، ده لسا فيه تاني، أوبااااا إيه الراجل الزبالة ده جايب لك قميص نوم، دا لسا فيه تاني، أوبااااا أوبااااا، أقسم بالله ده ما عنده ريحة الدم. الحاجات دي الواحد يتكسف يجيبها لمراته، إيه رأيك يا نور في الوساخة دي؟ نور وهيا سرحانة

وبتفكر في رأي جدتها: نهله الهديتين لو لازمينك خديهم، مش لازمينك ارميهم في الزبالة. نهله: أقسم بالله دول لو اترموا في الزبالة هيوسخوا الزبالة. ممدوح ونرجس. نرجس بإصرار: ماتتكلم يا ممدوح مخبي علينا إيه؟ ممدوح بصوت واطي: أمي قالت لي على تفسير الحلم اللي بتحلموه نور وسبب إحنا ليه مش بنرد على نور في الحلم.