رواية عمياء وسط الذئاب الفصل التاسع والعشرون 29 - بقلم محمد طه

خرجت هبه من عند نور. ونهله واقفه في الطرقه مراقباها. وفضلت ماشيه وراها واتصدمت لما شافت هبه داخله غرفة مدير المستشفى. راحت نهله بسرعه عشان تبلغ نور. في غرفة نور. نور: مين اللي دخل؟ نهله: أنا نهله يا نور. هبه بعد ما خرجت من عندك دخلت عند المدير. قدرتي تعرفي منها حاجه؟ نور: عرفت منها كل حاجه. وكده يبقى المدير هوا اللي مشغلها هيا والبنات اللي معاها. نهله: وهنعمل إيه دلوقتي يا نور؟ نور: هنستنى ونشوف هبه هتعمل إيه.

علي ورجب. علي واخد رجب على غرفة الحساب. أول ما رجب دخل فردين الأمن مسكوه وكتفوه. وبعد كده علي مقدرش يمسك نفسه وفضل يضرب في رجب بالعكاز. ومفيش حد قادر يهدي علي. فضل يضرب في رجب لحد ما خلى وشه كله دم. الدكتوره: اهدى يا علي هيموت. ويجيب لك مصيبة ودا ميستاهلش. علي وهو باصص على رجب بحقد: خليه يموت يا دكتورة. اللي زي دا لازم يموت. لازم يموت. اتفضلي يا دكتورة التسجيل أهوه. عليه كل القرف بتاع الزبالة ده.

الدكتوره تاخد منه التسجيل: برافو عليك يا علي. سيد ورجب مربوطين وباصين لبعض. ولسان حالهم بيقول: إيه اللي بيحصل ده؟ الدكتوره توجه كلامها لفردين الأمن: خلوا بالكم منهم. الكلبين دول مش عايز نفسهم يخرج برا الغرفة. يلا يا علي يلا يا أم محمد نشوف نور عملت إيه. في غرفة مدير المستشفى. المدير: خير يا هبه فيه إيه؟ هبه: البت العميا اللي في غرفة 7 محتاجينها معانا. المدير: ودي محتاجينها في إيه؟ أنتي لسه قايله عميا.

هبه: يا باشا الزبون هيعمل إيه بعنيها؟ الزبون أهم حاجة عنده الجسم. والبت جسمها نار. وكمان إنها عميا فدي ميزة. لأن فيه زباين بيخلونا نغمي لهم عينين البنات عشان وشهم ما يتشافش. دي بقي عميا. وكمان صغيرة وجسمها هيخلينا نطلب من الزبون أضعاف اللي بنطلبه. المدير: هيا البت حلوة للدرجادي؟ هبه: مافيهاش غير عيب واحد. المدير: عيب إيه؟ هبه: البت ناصحة وذكية يعني التعامل معاها يبقى بحرص. عشان نستفاد منها على قد ما نقدر.

المدير: حضري لي معاها مقابلة. وما تعرفيهاش أنا مين. خليها بعماها. ولسه هبه هتخرج ينادي عليها المدير. المدير: هبه في غرفتي الخاصة والليلة. هبه بابتسامة: صباحية مباركة يا عريس. في غرفة نور. الدكتوره: ها يا نور عرفتي حاجة من هبه؟ نور: هبه مش لوحدها يا دكتورة. علي: معاها أربع بنات رجب قايل على أساميهم في التسجيل اللي معاكي يا دكتورة.

الدكتوره: أنا بجد يا جماعة مش عارفة أشكركم إزاي على إنكم ساعدتوني في التخلص من المقرفين دول. نور: المكان ده ماينفعش يبقى فيه ناس زي دول. أم محمد: دول مكانهم في الزبالة في المجاري والبلاعات. الدكتوره: أو بمعنى أصح يا أم محمد مكانهم تحت التراب. دول لازم يتعدموا. نور: المهم دلوقتي مش عايزين هبه تحس بأي حاجة. ولا تلاحظ اختفاء سيد ورجب.

الدكتوره: نور الموضوع خلص خلاص. إحنا معانا تصوير وتسجيلات ليهم. يعني إحنا خلاص كشفناهم. مش فاضل غير إننا نبلغ الشرطة تيجي تاخدهم. نور: لسه يا دكتورة. فيه حد هنا في المستشفى هوا اللي مشغلهم. الدكتوره: حد مشغلهم؟ مين يا نور؟ نور: مدير المستشفى. الدكتوره بصدمة: بابا............