رواية عمياء وسط الذئاب الفصل التاسع والثلاثون 39 - بقلم محمد طه

محمد بفرحة: دكتوره الحمدلله الحمدلله. نور بعدم استيعاب: دكتوره مين يا أم محمد؟ محمد وهي حاضنة الدكتورة: الدكتوره سناء يا نور. نهلة بعصبية: أومال مين اللي اتخطف يا وليه أنتي؟ نشفتي دمنا الله يسامحك. الدكتورة بعدم استيعاب: اتخطف؟ نور: اقفلي الباب يا أم محمد، وأنتي يا نهلة قعديني. الدكتورة: إيه اللي بيحصل يا جماعة؟ انتو كنتو رايحين فين؟ ومين اللي اتخطف؟ وعلي متنكر ليه؟ إيه اللي بيحصل؟

نور: قبل ما نقولك على أي حاجة، أم محمد تسويلها معاش مبكر وتمشيها من هنا. أم محمد بثقة وفرحة: مش هيهون عليكم كلكم. علي: أم محمد قالت لنا إنها شافت ناس وهما بيخطفوكي. الدكتورة باستغراب: بيخطفوني؟ طب إمتى وإزاي؟ أنا كنت في العمليات، كان عندي عملية. أم محمد: والله يا دكتورة شيفاهم وهما بيخطفوكي بعنيه. الدكتورة: والله يا أم محمد، قسم الرمد في الدور التاني، روحي اكشفي وعلى حسابي كمان.

أم محمد: أنا آسفة يا جماعة، والله أنا مش عارفة أقولكم إيه. الدكتورة: طب هنفرض إن أنا كنت اتخطفت، انتو كنتو رايحين فين؟ شكلكم كده كنتوا هتهربوا، وأنا اللي كنت فاكرة ورايا رجالة. نور: إحنا فعلاً يا دكتورة كنا هنهرب، بس عشان نساعدك والله. علي: أنا بردو لسه عند رأيي، إحنا لازم نمشي من هنا. الدكتورة: تمشوا؟ هتمشوا تروحوا فين يا علي؟ وأنت اللي بتقول كده؟ دا أنا مطمنة بيكم، وبيك لإنك الراجل الوحيد اللي معانا.

نور تستفزها: لأ مش الوحيد اللي معانا، شكل كده شاكر اللي في غرفة الكاميرات، هيطلع أجدع منه. نهلة توطي على نور وبصوت واطي: لأ يا نور، مفيش حد أجدع من علي. نور بصوت واطي: يا بت اتقلي متبقيش مدلوقة كده. نهلة بصوت واطي: وأسيب ندي تاخده مني. نور بعدم فهم وبصوت واطي: ندي؟ ندي مين؟ نهلة بغباء وصوت واطي: ندي دا اسمي، قبل ما أعرفك وأعرف إن اسمي نهلة.

نور: وربنا هبلة، والذاكرة بدأت ترجع لها. والنبي يا رب ما ترجع لها الذاكرة، عشان هتتعبني أكتر. يا بت ما أنتو الاتنين واحد. نهلة بغباء أكتر وبصوت واطي: واحد إزاي؟ هيا اسمها ندي وأنا اسمي نهلة. الدكتورة: هو أنتو موطيين صوتكم ليه؟ إحنا كلنا سامعينكم على فكرة. نور بصوت واطي: الله يكسفك. وتعلي صوتها: إحنا كنا بنقول إيه؟ آه شوف يا علي.

الدكتورة تقاطعها: بعد إذنك يا نور، علي من بكرة هيستلم شغله مع شاكر، في غرفة مراقبة الكاميرات. أما بالنسبة ليكي يا نور، ف أنا بدأت أتواصل مع دكتور كبير خارج البلاد، وبعتله تقرير عن حالتك، وهو طمني بنسبة كبيرة. نهلة: طيب وأنا يا دكتورة؟ ولا نسيتيني؟ الدكتورة: وأنتي يا نهلة، أنا من رأي نور، يا ريت الذاكرة ما ترجعلكيش، عشان ما تتعبناش أكتر. (خارج المستشفى) (في بيت داليا) (داليا وسمير)

داليا باشياق: تعالا في حضني، وحشتني وحشتني وحشتني. سمير: والله إنتي كمان وحشتيني أوي. داليا: يا ريت تكون اتعلمت. سمير: الواحد لازم يغلط عشان يتعلم، وأوعدك إن الغلط مش هيتكرر تاني. داليا: نبرة صوتك مش عجباني، أتمنى يكون الطبيعي بتاع أي حد خارج من السجن. سمير: أنا هقوم آخد دش وأرتاح شوية. داليا: ارتاح شويتين، عشان محضرالك عروسة، إنما إيه خاااااام، قطة عميا...