رواية عمياء وسط الذئاب الفصل الثالث عشر 13 - بقلم محمد طه

_هبه... غشيم منك ليه.. والبت جسمها... ركن عقولكم.. الأوضة دي فيها كاميرا.. يعني مش هتقدروا تلمسوها.. وأنا الوحيدة اللي أقدر أخرجها من الأوضة دي.. وأدخلها في أوضة ما فيهاش كاميرا، ها قولتوا إيه؟ فجأة تدخل الدكتورة سناء عشان تكشف على الحالة وتفحصها.. وهيا لسه هتكشف تبص لسيد ورجب. _الدكتورة: اطلعوا برااا. سيد ورجب يطلعوا برا وهبه لسه واقفة. _الدكتورة: إيه هما طلعوا وأنا زيي زيكم.. وبعدين يمكن حضرتك تحتاجي حاجة.

_الدكتورة: لأ.. انتي مش زيك زينا.. اطلعي سليهم برا.. عشان ما يزهقوش.. اتفضلي. الدكتورة تكشف على الحالة وتفحصها.. وبعدين تخرج وتقفل الباب وراها.. وتنادي على ممرضة كويسة.. ومحل ثقة.. وهيا بتثق فيها جداً. _الدكتورة: ام محمد تعالي هنا. _ام محمد: خير يا بنتي. _الدكتورة: أنا قولت كام مرة حالات الإناث.. ما يدخلش عندها ممرضين رجالة. _ام محمد: يا دكتورة النهاردة جا حالات كتير.. والمستشفى كلها واقفة على رجل من الصبح.

_الدكتورة: يا ام محمد عشان خاطر النبي.. انتي الوحيدة هنا اللي بثق فيها.. هعيدلك كلامي تاني.. ويا ريت كلامي يتنفذ.. حتى لو فيه في المستشفى ألف حالة.. ركزي يا ام محمد.. حالات الإناث يكونوا في الغرف اللي فيها كاميرات.. حالات الرجالة يكونوا في الغرف اللي ما فيهاش كاميرات.. حالات الإناث ممنوع ممنوع ممنوع.. يدخل عندهم ممرضين رجالة.. وممنوع حالة تخرج من الغرفة إلا بإذن.. مني أنا شخصياً. كلامي واضح. _ام محمد: واضح يا دكتورة.

صوت ميكروفون المستشفى: الدكتورة سناء.. التواجد عند مدير المستشفى للأهمية. _الدكتورة لأم محمد: عينك على الغرفتين دول. في غرفة من غرف المستشفى.. سيد ورجب وهبه. _هبه: بقولكم إيه الدكتورة بدأت تشك فيا.. وكله بسببكم. رجب يقرب منها أوي ويحط إيديه على أكتافها. _رجب: وهو مين في المستشفى ما بيشكش فيكي يا هبه. _هبه: احترم نفسك يا رجب وابعد عني لحد يدخل. _سيد: اسمعي يا هبه انتي عايزة ألف جنيه.. أنا هديكي اتنين تلاته..

بس البت دي أنا عايزها الليلة. هبه تبص لرجب. _هبه: شايف.. شايف الجزار اللي بيقدر اللحمة. وتبص لسيد. بس أنا ليا شرط آخد الفلوس مقدم.. آه أنا بخاطر بشغلي.. يعني جهز الفلوس.. البت أجبهالك تحت رجليك. سيد يقرب منها. _سيد: موافق. في غرفة مدير المستشفى. _المدير: قوللي يا دكتورة تقرير شفوي كده.. عن الحالات اللي وصلت النهاردة. _الدكتورة: حضرتك وصل النهاردة في توقيت واحد.. 9 حالات، 6 حالات وفاة و 3 على قيد الحياة..

بس فيه حاجة غريبة يا أفندم. المدير يشاور لها أن تكمل كلامها. _الدكتورة: الـ 9 حالات ما فيش حالة واحدة.. كان معاها مرافق.. وبالتالي لما الحالات.. دخلوا في وقت واحد.. اتلخبطوا في بعض.. مبقناش عارفين مين جاي مع مين. _المدير: تقرير سريع عن الـ 3 اللي عايشين. _الدكتورة: شاب عنده حوالي 25 سنة.. تم بتر قدمه اليسرى.. مع كدمات في الوجه واليدين.. بنتين تحت الـ 20 سنة.. (الأولى فقدان في الذاكرة) (والتانية فقدان للبصر)