رواية عوضي الفصل التاسع عشر 19 - بقلم دنيا فادي

ريم باستغراب وضحك: هنا؟ مين ده وهو فين؟ ملك: في قلبي. ريم بابتسامة: ده شيئ أكيد وهو جوزك حبيبك. لي مش بيسأل عنك؟ يعني مشوفتهوش جه يطمن عليكي؟ ملك بإحراج: احم، مشغول الفترة دي. ريم: ااه، ربنا معاه ومتزعليش. أنا وأدهم موجودين لو احتاجتي أي حاجة لحد ما ربنا يقومك بالسلامة. ملك بغيظ: عقبالك. ريم بابتسامة خفية للحزن: أنا هسيبك ترتاحي دلوقتي وهبقى أجي أطمن عليكي بعد شوية. *** سما بدموع: لي كل ده يحصلي يا أدهم؟

أنا بجد مصدومة من اللي شفته بعيني وكل الكلام اللي سمعته بوداني. معقول دي حياتي بجد اللي اتشقلبت 180 درجة؟ وتكمل بخبية أمل: مبقتش عارفة أحط الحق على مين، على أمي ولا أبويا. بنظرة كلها حزن: ألوم مين فيهم؟ لي عملوا كده؟ ليي فرقونا عن بعض بالشكل المؤذي ده؟ وتكمل بضحك محزن: وأنا أقول لي أبويا الحقيقي كان بيزعق ويشخط في أبويا اللي رباني لما كان بيقول لي إننا لايقين على بعض. وتكمل بزعيق: أتاري إننا أصلاً إخوات.

أدهم: التحليل هي اللي هتثبت لو إحنا فعلاً إخوات. سما وبتمسح دموعها: هي هتظهر امتى؟ أدهم: بعد يومين. *** ملك: بقولكو إيه، أنا بحاول على قد ما بقدر أخليه يرجع يصدقني ويحبني عشاني أنا واللي في باطني، مش عشان مصلحتكم. ملك بعصبية: خلاص ماشي، هعملكوا اللي انتوا عايزينه، بس أدهم لو حصل له حاجة صدقوني هفضحكم. ملك: طب اقفل دلوقتي عشان في حد بيخبط. أم مالك بتوتر: الغدا يا فندم. ملك: ماشي، حطيه عندك. أم مالك: تؤمري بحاجة؟

ملك: لا. *** ريم بصدمة: إيييه؟ بتحب أدهم؟ أنا كنت حاسة من تصرفاتها بس استبعدت الفكرة دي من دماغي. وتكمل بسخرية: هي لدرجادي رخيصة عشان تحب راجل متجوز؟ أنا مشوفتش كده بجد. أم مالك: ريم، ده جوزك. انتي متسمحيش يا بنتي لحد يوقع بينكم، وأنتي زي بنتي وأكتر. قلتلك عشان خايفة عليكي. ريم: مش هسمحلها تعمل اللي هي عايزاه. *** أدهم: قولت لسما على كل حاجة وعملنا تحليل. سامر: هي اللي قتلته؟ أدهم بخيبة أمل: ااه.

سامر بحزن مكتوم: ربنا يسامحها ويرحمه. أدهم: أنت عايز حاجة مني؟ سامر: لا يبني، روح أنت. *** ريم: وحشتني. أدهم: لحقتي؟ ريم بتكشيرة: ده بدل ما تقولي وأنتي كمان. أدهم ويجذبها له: انتي بتوحشيني حتى وإنتي معايا. ريم بضحك: ده إزاي؟ أدهم يقبلها بحب: كده. ريم: طيب ادخل خد دش لحد ما أجيبلك الغدا. أدهم: وإيه سر التغيير ده؟ ريم تقبله ممثلة: أهو كده. أدهم بضحك: لا يبقى نتغير على طول. ريم

بخجل بتزقه ناحية الحمام: بسرعة على ما أجيب الغدا. *** 10:00 PM بليل أدهم: عاملة إيه دلوقتي؟ ملك: الحمد لله. أدهم باستغراب: انتي كنتي بتعيطي؟ ملك: لا لا، مفيش حاجة. أدهم بزهق: اخلصي، حد زعلك؟ ملك بتمثيل: أنا عارفة إن وجودي هنا عمل لكوا مشاكل. أدهم: خليكي دغري يا سما، مش فاهم عايزة تقولي إيه. ملك: ريم جاتلي وفضلت تسألني هو فين جوزك ومش بيسأل عليكي لي، وأسئلة كتير معرفتش أجاوبها، وكانت بتكلمني بطريقة وحشة.

أدهم: وإنتي قولتي لها حاجة؟ ملك بجدية: طبعاً لا. أدهم: خلاص متعيطيش. ويقعد جنبها يطبطب عليها. أدهم: اهدي خ... ريم بعدم فهم: إيه ده؟ أدهم بيشيل إيده من عليها ويبص لملك بندم ويمسك إيد ريم ويشدها وراه ويدخل الأوضة. *** ريم وهو لسه ماسك إيدها: إيه اللي أنا شفته ده بقا؟ أدهم بضحك ويسيب إيدها: بتغيري ولا إيه؟ ريم: مش بهزر يا أدهم، انت كنت بتطبطب عليها لي؟ أدهم: عشان زعلتيها.

ريم بثقة: كدابة. وبعدين أي حد أزعله هطبطب عليه يعني؟ ودي دموع تماسيح عشان تصعب عليكي. أدهم: وتصدق؟ ريم: عشان تصعب عليك وبس. أدهم وقاعد على السرير: طب قولي لي، إنتي كلمتيها النهاردة في أي؟ ريم: مكلمتهاش في حاجة، أنا كنت بطمن عليها بس، شكلي غلطت إن اتطمنت عليها. وترفع صباعها قصاد وشه بتهديد: وبعدين متغيرش الموضوع يا أدهم. أدهم: أنا بتهدد بقا. ريم: ااه. أدهم: طب انتي عايزة إيه دلوقتي؟

ريم ببراءة: متكلمهاش ومتدخلش أوضتها تاني. أدهم بخبث: مقابل؟ ريم بعدم فهم: مش فاهمه. أدهم يجذبها له: أنا هفهمك. *** 2:00 AM بليل خالد: أنا هسافر، همشي دلوقتي. فكري تاني وتعالي معايا، خلاص مابقاش لينا حد بعد وفاة ماما وبابا، وإنتي خلاص خدتي حق ماما اللي معرفتش أنا آخده. هنستنى إيه تاني؟ سما بدموع: اعمل اللي يريحك، وملكش دعوة بيا.

خالد بحزن بيحضنها: هسيبك براحتك، ومش خايف عليكي لأني عارف إنك تعتمدي عليكي يا سما. همشي أنا، عايزة حاجة؟ سما: لا. خالد: سلام. *** سما: الو. حازم: إيه اللي مصحيكي لحد دلوقتي؟ سما: أنت متصل عشان تقولي كده؟ حازم: لا، أنا مجاليش نوم، جيتي على بالي، قولت أتصل. سما: وأنا؟ حازم: جيتي على بالك؟ سما بزفير: هييح، لا مجاليش نوم. حازم: تصدقي إنك باردة. سما بضحك: والله. حازم: يعني مجتش على بالك خالص؟

سما بخجل: بصراحة، جيت على بالي من شوية. حازم بضحك: طب ما إحنا حلوين أهو. سما: طب خلاص عشان بتكسف. حازم: بتكسفي؟ ويتأكد من الرقم: أيوا هي، يعني مش بتصل بحد بالغلط. سما: هقفل في وشك والله. حازم: بذمتك بقا القمر ده يتكسف؟ حازم: الو الو. *** بعد تلات أيام 8:00 AM الصبح سما: أخوات ولا!! وريني كده. أدهم: استنيي. سما: اخلصص. أدهم بخيبة أمل: أخوات. سما: ومالك بتقولها كده لي؟

عموماً الخبر ده مأثرش عليا في حاجة، ومش هطلب منك ورث والحاجات دي. أنا هسافر بعد أسبوع بالكتير، يعني مش هتشوفني تاني في حياتك. فمتشيلش هم وجودي. أدهم بحزن: إيه اللي انتي بتقوليه ده؟ أنا مش كده يا سما، مش بفكر بالطريقة دي. سما: بتفكر أو مش بتفكر كده، أنا مش عايزة حاجة منك. سلام. *** حازم: بقا بتقفلي في وشي؟ سما بتفتكر وتضحك: تستاهل. حازم: والله. سما: مبحبش الكلام الملزق ده، متقولوش تاني. حازم: ولا أنا.

سما بضحك: طب بتقولوا لي ليه؟ حازم: سيبك، أنا عرفت إن انتي وأدهم طلعتوا إخوات. أدهم قال لي. سما: امم. طب أنا هروح عشان مش قادرة. حازم بقلق: لي؟ مالك؟ سما: مصدعة شوية. حازم: طب أوصلك؟ سما: لا لا، خليك أنت. *** 10 minutes later أدهم بصدمة: إيييي؟ مستشفى؟ إزاي؟ حصل إيه ده؟ قولي العنوان بسرعة.