رواية عروسي الهاربة الفصل الثاني 2 - بقلم وتين الصافي

كنت واقفة مصدومة. أنا؟ أنا جيت للشخص اللي المفروض أهرب منه؟ اتكلم مراد بحدة: _أنت إزاي تدخل كدا بيوت الناس يا محمد باشا؟ إيه؟ مفيش احترام؟ بعدين بصلي بنفس الحدة: _وانتِ روحي شوفي شغلك، واقفة تعملي إيه؟ هزيت راسي بسرعة ورحت المطبخ، أقصد جريت على المطبخ. قعدت على الترابيزة وأنا حاطة إيدي على راسي بغلب. يارب، أعمل إيه؟ يارب، أنا إيه اللي بيحصل في حياتي ده؟ الاء، أنا لازم أكلم الاء.

كنت خارجة من المطبخ وخبطت في الست فاطمة. = إيه يا بنتي مستعجلة كدا ليه؟ -معلش يا دادة، أنا بس معايا مكالمة ضرورية. = لا يابنتي مش هينفع دلوقتي، أجليها. ورانا شغل كتير أوي. وضيوف انهاردة. واهه متخرجيش برا لأي سبب. -لـ لـيه؟ في إيه برا؟ = والله يابنتي معرفش، بس مراد بيه متعصب أوي وطالب محدش يخرج من الخدم برا خالص. -حاضر. ابتدينا نحضر الغدا أنا والست فاطمة. كنت سامعة مراد بيزعق برا، وعلي وبابا بيتكلموا بهدوء.

= متحطيش فلفل في الأكل، البيه عنده حساسية منه. -تمام. -لكن هما مين اللي برا ده يا ست فاطمة؟ = ده يبقى راجل أعمال كبير زي مراد بيه، بس شركته في الفترة الأخيرة خسرت. سهوم ولا إيه بيقولوا عليها دي. -أسهم؟ = أيوه هي دي. ومراد باشا عرض عليه إنه يعمل معاه صفقة مقابل إنه يجوزه بنته. -طب وليه يعني الباشا عاوز بنت الراجل ده؟ ما كان ممكن يساعده مقابل أي حاجة.

= اللي أعرفه إنه أبو الباشا قاله إنه لو متجوزش خلال الكام شهر دول هيختار له هو عروسة، يا إما هيطرده من الشركة بتاعته. -طب واشمعنى برضو البنت دي؟ ما في قدامه بنات تاني كتير. = ع... قاطع كلامنا مراد وهو بينادي على دادة فاطمة. خرجت ورجعت بسرعة. = يلا يلا يابنتي ساعديني أخرج الأكل ع السفرة. ساعدتها فعلاً في تقديم الأكل. بعدين هي دخلت المطبخ وأنا فضلت واقفة بعيد أسمع كلامهم.

= يعني أنت هتمم الصفقة يا مراد من غير ما تتجوز وتين؟ قالها علي باندهاش. ابتسم مراد بسخرية: _لا. ÷ إيه؟ ما أنت لسه قايل يابني إنك هتمم الصفقة... قاطعه مراد: _هتمم الصفقة دلوقتي أهه، لكن فلوس الأرباح هتبقى كلها معايا لحد ما تلاقي بنتك وأتجوزها. جريت على المطبخ وأنا بمسح دموعي. إيه ده؟ هما بيتعاملوا إني سلعة بيبيعوا ويشتروا فيها؟ ليه ميعملونيش على إني إنسانة ليها مشاعر، إنسانة ليها قرارات؟

فوقت من سرحاني على صوت الست فاطمة وهي بتطبطب عليا. = مالك يابنتي؟ فيكي حاجة؟ -هاه؟ لا، بس افتكرت أهلي. = متزعليش، تاخدي الإجازة قريب وتزوريهم. ابتسمت من تحت نقابي ومسحت دمعتي. -إن شاء الله. = طب يلا قومي اعملي القهوة للباشوات. أنا سمعت إن مراد بيه حب قهوتك جداً. -آه. = طب يلا يلا على شغلك يابت. قالتها بطيبة ومرح. كملت كلامي معاها وأنا بعمل قهوتي. -لكن هو الباشا متجوزش البنت دي ليه لحد دلوقتي؟ = عشان هربت ليلة الفرح.

-اممم. = يلا روحي ودي القهوة للباشا. أخدت الصنية وكنت خارجة، لكن جه حد من الحرس وقال إن مراد بعته ياخد القهوة عشان مش عايز حد من الخدم برا. بعد شوية بابا وعلي مشيوا. واقفه عندك بتعملي إيه؟ شهقت بعنف والتفت لي. واتكلمت بهدوء: -ابدا، أصل الجو جميل والميه شكلها لطيف. بصلي باستغراب. وبعدها جه وقف جنبي، فاتوترت وبعدت شوية. _بتعرفي تعومي؟ ابتسمت بسخرية من تحت النقاب: -لا. بحب شكل الميه من بعيد، لكن أخاف أنزل فيها.

ضحك بصوت عالي وأنا بصتله وتهت في ضحكته شوية. وبعدين انتبهت: ده، ده مراد يا وتين. فوقي! الشخص اللي عايز يشتريكي مقابل صفقة. -أحم، بعد إذنك يا بيه. جريت بسرعة من قدامه ودخلت أوضتي عشان أكلم الاء وأحكيلها. في الأوضة. -الو يا الاء. = وتين، ازيك عاملة إيه؟ -الحمد لله. الاء... قلتها بخوف حقيقي. = مالك؟ مالك يا وتين؟ حد ضايقك عندك؟ -الراجل اللي بشتغل عنده طلع هو هو نفس الراجل اللي أنا هربت عشان متجوزهوش. = إيييييهههه؟

اتكلمت بصوت باكي: -أنا مش عارفة أعمل إيه يا الاء. أنا أنا همشي من هنا. _ورددد!!!! سمعت صوت مراد ورايا.