رواية عريس الغفلة الفصل الأول 1 - بقلم الاء فرج

اطلعي يا بنتي عيب كده العريس قاعد برا. مش عايزه اتجوز، أنا مش عايزه اتجوز. أمي روحي قوليله ما عندناش بنات للجواز. انت اتجننتي؟ انت بقا عندك 30 سنة، بطلي ترفدي عرسان كده هتعنسي. ما فيش حاجة اسمها هتعنسي، أنا اتجوز وقت ما أحب وربنا شايل لي نصيبي وخلاص. بقا أنا مش عايزه اتجوز، سهلة. يا بنتي حرام عليكي ده عاشر عريس ترفديه في نفس الشهر. حرام عليكي وكلهم بيمشوا من البيت من غير سبب، انت بتهببي إيه؟

ابتسمت بخبث: أنا، أنا غلبانة خالص، هما اللي بيمشوا من غير سبب. طب يا بنتي اطلعي اقعدي معاه ومش هغصبك على الجواز. اطلعي بس وقابلي العريس الجديد ده غيرهم كلهم. أنا مش هعيش لك العمر كله، يلا يا بنتي ربنا يهديكي. بعيد الشر عنك يا ماما، أنا ماليش غيرك أنت وخالي بعد وفاة بابا. خلاص يا ماما هطلع أهو. ربنا يجعله من نصيبك يارب يا بنتي. طلعت من أوضتي ودخلت الصالون لقيته قاعد مع خالي. أول ما دخلت قام وقف وابتسم وكان ماسك ورد.

خالي: اقعدي يا حبيبتي وأنا هدخل المطبخ مع مامتك. خرج خالي من الصالون وكل ده والعريس مادد إيده. روحت قعدت بكل كبرياء وحطيت رجل على رجل. لقيته بص لي بصدمة وراح نزل إيده بإحراج وقعد على الكرسي اللي قدامي. العريس: احم، أنا حازم عندي 35 سنة بشتغل في... أنا: سألتك؟ العريس: أي. أنا: أنا ما سألتش انت مين عشان تجاوب. العريس: انت بتتكلمي كده ليه؟ ما تلمي نفسك. أنا: لأ، صوتك يبقى واطي، انت في بيتي وأنا ممكن أطردك عادي.

العريس: لأ والله، إيه قلة الأدب والذوق دي. أنا: قولت صوتك يبقى واطي. العريس: لأ بقا انت بتستعبطي، انت متكبرة على إيه يا بت؟ ده انت معفنة. قمت من على الكرسي بكل عصبية واتكلمت بصوت عالي: معفنة في عينك يا حيوان انت. عشان عينك خضرا هتتريق عليا ولا إيه؟ دي شكلها لينسز يا معفن. اتكلم بكل برود وقال: اعتذري. أنا: نعمممم؟ لأ، ده انت اتجننت فعلاً. قام وقف من مكانه

واتكلم بكل ثقة وبرود: لو فاكرة إنك بالصوت العالي والزعق والشتيمة وحبة المقالب اللي بتعمليهم في أي عريس يجي، أنا لأ. وفري مقالبك وخططك عشان أنا كده كده هتجوزك برضاكي أو غصب عنك. أنا: انت عرفت المقالب دي منين؟ العريس: أيوه، اقعدي بكل هدوء واتكلمي باحترام. أنا: مش هقعد ومش هتكلم ويلا خد بعضك وامشي، ما عندناش بنات للجواز. قعد على الكرسي بكل برود وقال: كنت عارف إنك عاقلة وهتسمعي الكلام. كملت بعصبية: انت مش بتفهم ولا إيه؟

بقولك مش عايزة أتجوزك. العريس: هشش، بصي يا بنت الناس، أنا هسافر تركيا بعد بكرة وبكرة أنا وانت هنكتب كتب الكتاب ونسافر تركيا ونعيش هناك لأن شغلي كله هناك. أنا: الطموح حلو. العريس: إيه؟ أنا: هو كل شوية تقول إيه؟ انت وقعت على ودنك وانت صغير؟ العريس: اتكلمي بأدب، صدقيني هزعلك. أنا بس حبيت أعرفك إن كتب الكتاب بكرة. أنا: لأ بجد؟ كتر ألف خيرك. ترى في طموح عندك تاني عايز تقولها؟ العريس: بطلي هزار، أنا بتكلم جد.

أنا: انت مجنون واحد مش عارفة هو مين وجاي يتقدم ليا وفي أول قعدة بيقول عايز أتجوزك بكرة وبعد بكرة نسافر والمفروض إن أنا أوافق صح؟ مش انت بتقول كده. العريس: أيوه بقول كده. قمت من مكاني بعصبية: امشي اطلع برا، مش هتجوزك أنا، إيه التخلف ده. خالي وماما جم على صوتي العالي. خالي: في إيه؟ العريس قام وقف وبص لي بتحدي: ما فيش، ده حتى العروسة موافقة وهنكتب كتب الكتاب بكرة.

ماما: لولولولولوي مبروك يا حبيبتي، مبروك يا حازم يا ابني، أنا فرحتلك أوي. خالي: ألف مبروك يا بنت اختي، ألف مبروك يا بشمهندس حازم. بصيت على ماما وخالي بصدمة وكانوا هيطيروا من الفرحة وماما عمالة تزغرط. بصيت على حازم اللي هو العريس لقيته بيبتسم بخبث.