رواية عشق الحور الفصل السابع والعشرون 27 - بقلم مروه شحاته

عزه ياحبيبتي لازم تنزلي ترحبي بالضيوف دول في بيتك. # جاسر بليز متضغطش عليا. هز كتفه وتنهد بارتياح. # لاء يازوزه أنا مقدرش أضغط عليكي. أنا نفسي زهقان بس أعمل إيه. أنا حجزت حاجة سوليتير هتعجبك أوي. هروح أجيبها بعد أسبوع. اعتدلت على الفراش وقالت بلهفة. # بجد يابيبي؟ # طبعًا يازوزه، هو أنا عندي أغلى منك. أنا نازل بقي ميصحش أسيبهم. سلام. # سلام ياجاسر. تحرك جاسر للخارج وزفر بقوة.

# أنا مش فاهم أنا كنت بحبك إزاي. صبرك عليا ياعزه إن ماطلعت القديم والجديد على جتتك مبقاش أنا. قال جملته ونزل لأسفل. وجد عائشه تنزل الدرج مسرعة. # تعالي هنا يابت أنتِ. أنتِ فين من الصبح؟ # كنت في الإسطبل ياابيه. # امممم، طب إيه الورق اللي في إيدك ده؟ # دي الأشعة والتحاليل بتاعة مرجان. هوريها لسليم، قصدي الدكتور سليم. ابتسم. # آه، قلتيلي سليم. طب هاتي ياأختي. أنا هديهاله وابعتي حد يصحّي غيث. أعطته الملف وقالت بإحباط.

# أنا كنت عايزة أعرف رأيه. # ليه؟ هو رأيه مهم أوي كده؟ # طبعًا ياابيه، دا معاه دكتوراه. # آه يعني دكتور مرتين؟ # لاء، يعني أستاذ دكتور. دا ليه أبحاث تحفة في الخيل وأمراضها النادرة. اتنشر في كذا مجلة أجنبية. # دا أنتي متابعة بقيع. عائشه بارتباك. # عادي يعني، دا مجال تخصصي. وووعشان هكمل دراسات. لدغ خدها الأحمر وقال. # ماشي ياست عيشة. عدي قدامي.

تحركت أمامه للداخل لتقابله عيون حوريته البندقيه. التي تمتلىء غيظًا جعلته يبتسم رغماً عنه. كانت تجلس وبجوارها بسمه وخلفها تتحدث خديجه إلى والدته. تقدم ناحية سليم وجلس بجواره لتجلس عائشه بجوار يونس. ناوله الملف وقال. # خد يادكتور مش عارف إحنا عازمينك على الغدا ولابنستغلك بصراحة. سليم باسمًا. # لاء، إزاي متقلش كده. يونس بإلحاح. # إيه دا ياأبلة عيشة؟

عيناها معلقة على الأوراق التي يقرأها بتركيز. ولابأس من خطف نظرة لعيناه الزيتية الداكنة برموشها الطويلة. المراقبة ورؤية بذور الحب شعور رائع يجعلك دومًا تتذكر ما يعنيه الحب بحياتك. ودون وعي يذهب بصرك حيث تكون لتصطدم النظرات. فيعرف أنها تراقب مثله. ترك سليم الأوراق وقال بجدية كاملة. # هي الأشعات دي كانت من قد إيه تقريبًا؟ عائشه بسرعة. # من حوالي سنة. سليم.

# هنبقى محتاجين أشعات وفحوصات جديدة. بس مبدئيًا رأيك صح. علاجه الوحيد في الجراحة. عائشه باختناق طفولي. # شوفت ياابيه. شوفت. جاسر موضحًا. # ياحبيبتي دا حصان غيث. وأنتِ عارفة كويس أوي غيث متعلق بيه قد إيه. مكنتش أقدر أتصرف فيه وهو مش موجود. القرار ده غيث اللي ياخده مش أنا. # وغيث موافق قرار إيه بقي؟ جاسر بلهفة. # غيث. اعتنقه جاسر في حين قال غيث بمرح وهو يشير إلى الطفل على ذراعه.

# معلش يايحيي. عمك جاسر عامل زي القطر. مبيعرفش يفرمل. تطلع جاسر للصغير على ذراعه وقال باسمًا. # معلش يايحيي. حقك عليا. قال جملته وطبع قبلة على رأسه. ليبتعد الصغير ويحتضن غيث. # تعالي أما أعرفك على الجماعة. الحج محمود والد حور. والحاجة خديجه والدتها. ودا الدكتور سليم أخو حور الكبير. ودي بسمه. قاطعه. # مامة يحيي؟ جاسر. # أنتوا اتعرفتوا؟ غيث مقبلاً يحيي. # أصل أستاذ يحيي جه صحاني من النوم. تقدمت خديجه منه وقالت.

# عنك ياابني معلش تعبناك. غيث. # مفيش تعب ولا حاجة. دا يحيي دا عسل. وإحنا أصحاب صح يايحيي؟ # غيت اوبح ديجه كخ. غيث. # سيبيه. أنا كمان مبسوط معاه. عادت خديجه مكانها. فاكمل جاسر. # ودا بقي يونس. غيث. # جهاز الإنذار. شارك الجميع في الضحك وقال يونس بتذمر. # كده برضه ياأبلة عيشة؟ فضحتيني. حور ضاحكة. # وأنا اللي بشغلها. حاط جاسر كتفها بذراعه وقال. # دي بقي حور. رمقها غيث بنظرة فضولية بحتة. همس جاسر بأذنه.

# نزل عينك بدل ما أخرمهالك. غيث. # الله أكبر. أبو الهول نطق. اقتربت عائشه وأمسكت يده وأجلسته وقالت برجاء. # أنت وفقت إن أنا أعالج مرجان صح ياغيث؟ غيث باهتمام. # مرجان ماله؟ جاسر وهو يجلس بجواره.

# من حوالي سنتين جتله حالة رمد عادية. كان البيطري اللي عندنا بيعالجه. بعد أسبوعين حسيت إن الحالة بتسوق. مرجان ديما هايج. بعت جبت أكبر بيطري في البلد. طلب أشعة وفحوصات. وللأسف مرجان اتعمى. وكل الدكاترة قالوا مفيش أمل. إلا عيشة قالت علاجه الوحيد في جراحة. بس طبعًا أنا مستحيل أعرضه لحاجة زي دي وأنت مش موجود. بس سليم دلوقتي بيقول نفس الكلام اللي قالته عيشة. سليم أستاذ دكتور ولسه راجع من بره.

نظر غيث إلى سليم التي تشتعل عيناه غضبًا لايفهمه. # يعني يا دكتور شايف إن ممكن العملية دي تخليه يشوف؟ سليم باقتضاب. # ده هيعتمد على التحاليل والفحوصات. لأن الحالة كان المفروض تتلحق على طول. عائشه بغيظ. # شوفت ياابيه. دي نتيجة عدم ثقتك فيه. بس غيث بيثق فيه. صح ياغيث؟ ربت على كتفها وقال. # طبعًا يا شوشو. بثق فيكي جدًا. بس مش في عينين مرجان ياحبيبتي. هبت عائشه واقفة وقالت بغيض. # حتى أنت ياغيث؟

ماشي. شوف مين بعد كده هيهتملك بيه. جاسر ضاحكًا. # طب خلاص ياعيشة. متزعليش. ابقي ساعدي الدكتور سليم في علاجه. دا لو وافق طبعًا. هو فقط يريد الرحيل من هذا المكان. قال بضيق. # ربنا يسهل الأمر إن شاء الله. عائشه بحماس. # من بكرة إن شاء الله هبدأ في التحاليل. وهجيبهم لحضرتك. سليم بعصبية. # إن شاء الله. مال غيث على أذن جاسر وهمس. # ماله دا؟ هو كده طبيعي؟ ابتسم جاسر وقال.

# لاء. هفهمك بعدين. معلش ياجماعة. أنا نسيت أعرفكم. غيث بن عمي. وأخويا. وكما توقع جاسر كان السؤال من نصيب سليم. # أخوك إزاي يعني؟ ثم وكأنه تدارك سؤاله قال. # أنا آسف. جاسر. # لاء. مفيش داعي. غيث أخونا من الرضاعة. غيث ضاحكًا. # اتحسبوا عليه أخوات أونطة. عائشه. # أونطة في عينك انت. تطول ولا بلاش تطول دي. أنت جايب السقف خلقة. غيث ناظرًا ليحيي. # عجبك كده يايحيي؟ عيشة. يحيي مزمجرًا. # عيته كخ. قبل رأسه وقال.

# شوف يابني. كل الناس أعدائك. مفيش غيري أنا نافع حبيبك. شارك الجميع بالضحك. جلسة عائلية مميزة. دافئة بدفء أصحابها وحبهم لبعضهم. اجتمعوا على مائدة الطعام لتقول زينب. # جاسر. هي عزة مش هتتغدى معانا؟ جاسر. # تعبانة شوية ياأمي. مالت حور على أذنه. # كداب ياحبيبي. همس في أذنها. # أنتي بس اللي بتفقسيني ياحبيبتي. بسمه. # هاتوه حضرتك عشان تعرف تاكل. غيث. # ياسيّدي هو أنا اشتكيتلك؟ أنا هاكله متخفيش. بسمه.

# هو مش هياكل. هو هيبهدل الدنيا. حور. # عادي يابسمه. دا طفل. وبعدين أبيه غيث واخد باله منه. غيث بحنق. # أبيه ليه كده ياحور؟ دا حتى جوزك أكبر مني بشهر. عائشه. # لاء هي حور كده. دي بتقول لعزة ياأبلة. ضحك الجميع ليقول غيث. # طب بلاش أبيه دي لحسن بتعملي حساسية. جاسر بغيض. # هتفضل ترغي؟ متبص قدامك بقي. علاء. # معلش ياجماعة. أنا مضطر أمشي. بس عشان ابني تعبان شوية. خديجه. # ربنا يطمنك عليه.

انسحب علاء ليتبادل غيث وجاسر النظرات. كان غيث يطعم الصغير بضوضاء عالية. والغريب أن الفتى المشاغب كان يأكل باستمتاع. يونس. # هو أنت مينفعش تبقى تيجي تاكله على طول؟ دا بيطلع عيني وعين أمه وأبويا عشان ياكل. قبل غيث رأسه وقال. # ليه بس؟ دا حتى يحيي شطور خالص وبيسمع الكلام. يونس باسمًا وهو ينظر لبسمه. # دا يحيي غير ابنك طبعًا.

ولكن بسمه كانت بعالم آخر. عالم لم يعد يدل عليه إلا ذلك الطفل الضاحك بين أحضان رجل غريب. يحيي لم يرى أباه. ولم يعلم أباه بوجوده. لم ترى فرحة عيناه بأول مولود. لم يحضر ولادته. تحملت فقط ذكرى لشهر واحد رحل قبل أن تعتاد عليه. رحل قبل أن تعرف معنى الزواج والحب. انتشلها من أفكارها صوت حور. # بسمه. أنتِ مش بتاكلي خالص. رفعت عيناها لحور. ابتسمت بفتور. # أنا أكلت ياحور. عن إذنك. وقالت جملتها لتخرج من غرفة الطعام. زينب.

# هي مالها ياخديجه؟ خديجه. # هي كده. متشغليش بالك. تنهد محمود بمرارة على حال ابنته. تبعتها عيون سليم وغيث. خديجه. # عن إذنك يابني. يحيي هينام عشان أغسله. رفعه غيث وقال باسمًا. # عنك ياأمي. ارتاحي أنتِ. كملي أكلك.

تحرك غيث للخارج. رغماً عنه عيناه تبحث عن الملتفحة بالسواد ذات العيون الخضراء الدامعة. رأى جانب وجهها وتلك الدموع المتلئلئة على خدها. إنها حزينة. يشعر بها. فهو يقاسي من نفس المرارة يتجرعها يوميًا يعيشها. لعل أكثر إنسان يستطيع أن يخفف عنك يكون غريب ولكن لديه نفس مأساتك. سماه رحلت عن عالمه بجنينها قبل أن يراه. وهي تلك البسمة الحزينة رحل عنها آخر. ولكن ترك ذكراه حية. ترك لها يحيي. لعلها لا تشعر بنفس وحدته القاتلة. ولكن شرودها ودموعها تثبت هذا. كان يتأملها بشرود. أخرجه منه جبراً صوت غراب أسود ينعق.

# إيه دا ياغيث؟ أنت اشتغلت بيبي سيتر ولا إيه؟ التفتت صاحبته العيون الدامعة واقتربت خطوة. فقال ببرود. # آه عقبال عندك ياعزه. أهو تتلاقي حاجة تشغلك بدل ما أنتي عمالة توزعي سمك على الناس. عزه بعصبية. # أنت إزاي تتكلم معايا بالطريقة دي؟ بغضب. # برد على كلامك ياست عزه. عزه بتافف. # أووووف. أنت إيه اللي رجعك؟ قاطعها. # قاعد في بيتي ياعزه هانم. وكلمة زيادة. الله في سماه الموضوع ما هعدي. # غيث إيه اللي حصل؟

التفت إلى جاسر الذي يقف بهيبته عاقد ذراعيه. غيث بعصبية. # لم مراتك ياجاسر. وخليها تتكلم بطريقة عدلة. عزه. # وأنا هتكلم معاك ليه أصلاً؟ جاسر. # عزه. اتكلمي عدل. أشاحت بيدها وتحركت للأعلى ليقول غيث. # دلالك فيها اللي عمل فينا كده ياجاسر. احتضن جاسر كتفه وقال. # خلاص بقي. أنا نفسي أفهم أنتوا مبطقوش بعض ليه. غيث. # وهى دي تطاق؟ دا انت ليك الجنة ياحبيبي. جاسر.

# خلاص بقي. أهدى شوية. روح نيم الواد ده وتعالى نلحق قبل ما عزه تضرب كرسي في الكلوب وتخليها دندرة. حدق غيث بوجهه وقال. # جاسر بن الناس الكويسين. يقول كرسي في الكلوب ودندرة. أنت أخلاقك فسدت ياجاسر. تنحنح محرجة جعلت الرجلان يلتفتان لها. بسمه بخجل وهي تنظر للأرض. # احم احم. معلش. أنا آسفة. بس كنت عايزة يحيي.

قرب بلمسة غير مقصودة وهو يناولها الفتى النائم. لتسحب يدها الصغيرة الناعمة بشدة. ويكاد الفتى يسقط منها. ويشتعل وجهها. لحظة مرتبكة متوترة جعلت شيء ما بداخله يتحرك. شيء ساكن بداخله منذ رحلت سماه التي تظله بالعشق. لم ينتبه إلا عندما نزعت الفتى وتحركت من أمامه هامسة بارتباك. # شكراً لحضرتك. التفت إلى جاسر الذي يرفع إحدى حاجبيه وعلى وجهه ابتسامة سخيفة. أشاح وجهه وقال. # إيه؟ في إيه؟ اقترب منه وقال. # في إيه؟ انتهز كتفيه.

# مفيش حاجة. هيكون في إيه يعني. ربت على كتفه. # قدمنا الليل طويل. بس يلا. إحنا سيبين الضيوف لوحدهم. هما خلصوا وطلعوا الجنينة. تحرك ليتحرك خلفه جاسر الذي توقفت عيناه على عيون حوريته الدامعة. وعزه تتحدث معها بعيدًا عن الجميع. اقترب ليستمع لجزء من الحوار. # لاء. متخديش راحتك أوي ياشاطرة. دا مش بيتك. أنتِ حتة واحدة جوزي اشتراها عشان تجيب بيبي مش أكتر. متتعديش حدودك. أنتِ وأهلك. اللوكل دول. # عزه.

التفتت إليه لتقترب منه. نفس الموقف يتكرر مرة أخرى. لقد حجمها وجود أهلها أن تتحدث. ولكن هذه المرة مختلفة. بالأمس القريب جاسر كان ملكها. أما الآن. تابعت اقترابها منه لترفع ذراعيها وتتعلق بعنقه. يمسك جاسر يديها وينزلها هامسًا في أذنها. ثم يبتعد. لتصعد هي إلى البيت. يقترب منها لينحني ويرفعها بين ذراعيه ويهمس. # أنتِ واقفة ليه هاه؟ # نزلني يامجنون. تحرك ليريحها على الأريكة بجوار والدتها ويقول.

# فهميها إن مينفعش واقفة ومجهود وحرق دم عشان بنتك مبتسمعش الكلام. خديجه. # جوزك بيتكلم صح ياحور. شدت حور يده ليسقط جالسًا بجوارها وقالت بغيض. # يعني أنا عملت إيه دلوقتي؟ شوفتني شوهت وشها؟ مسحت بشعرها النجيله؟ عضتها في ااااه. ولابلاش. أنا مؤدبة. صوت ضحكات غيث الواقف بالقرب منهم جعلتهم ينظروا إليه. # يخرب عقلك ياحور. أنا بقالي سنين ماضحكتش كده. اللي يشوفك ميقلش كده خالص. وقف جاسر بجواره ليوكزه بقوة.

# واللي يشوفها يقول إيه بقى؟ غيث متاوها. # يعني بنوتة كيوت وهادية. خديجه. # تصدق يابني مش أنا اللي مخلفاها. كنت فاكرة كده برضه. بسمه. # مين دي ياماما اللي هادية؟ أنتِ بتصدقي؟ دي الروح الشريرة لأولاد الدسوقي. حور. # بقي كده يابسبوسه بالطرشي؟ أنا روح شريرة؟ طب اختفي بقي بدل ما آكل ابنك ده. غيث ضاحكًا. # لاء. كله إلا يحيي. حور بمكر. # لاء بس أنت اتعلقت بيه أوي ياابيه. غيث. # بلاش أبيه دي. وبعدين يحيي أصلاً يتحب أوي.

حور باسمًا. # آه كيوت وطيوب وعنيه ملونه. غيث. # مش بالشكل ياحور. بس يحيي روحه طيبة. حور باسمًا. # زيي أنا ويونس بالظبط واحنا صغيرين. صح يابسمه؟ نظرت بسمه عليها ثم على الصغير النائم بين ذراعيها وقالت بسخرية. # لاء. أنت ويونس كنتوا ملايكة بأجنحة. هو كان فيه زيكوا؟ أعوذ بالله. سليم ضاحكًا.

# كانوا هادييييين بشااااااااكل فظيع. دي ماما كانت بتربطهم من رجليهم في الكنبة عشان ميعملوش كوارث. ولما ميتلقوش حاجة يعملوها يعقدوا يتخانقوا مع بعض. شاركوا جميعًا بالضحك. غيث. # أنا وجاسر كنا كده واحنا صغيرين. كنا بنعمل كوارث. جاسر بحنق. # اسمها كنت بعمل كوارث. غيث.

# صراحة اه. كنت أعمل الكارثة وهو اللي يتضرب. أصل أنا مكنتش بتضرب. أنا يتيم. كان بابا يضربه ويقوله أنت الكبير العاقل. مش عارف ليه مكنش مقتنع إنه أكبر مني بشهر واحد بس. بس الحق جاسر كان طول عمره هادي. محمود. # زي سليم. أنا محستش إني خلفت عيال. إلا ولد القرود دول. يونس بحنق. # طب هي قرده. أنا ذنبي إيه؟ عائشه. # دا أنتو نسخة كاربون يايونس. مقلتليش بقي. ناويين على إيه في الدراسة؟ يونس.

# أنا هدخل هندسة. مجموعي يجيبها مرتاح. نظرت عائشه لحور. # وأنتي ياحور؟ نظرت حور إلى جاسر بحيرة. جاسر. # إيه؟ مش عارفة تقري؟ حور بهمس. # هو ينفع أكمل يعني عشان الحمل؟ وجاسر. # إيه؟ مش هتقدري؟ وبعدين تقريبًا هتولدي في الإجازة. حور. # يعني أنت موافق؟ جاسر. # طبعًا. صفقت بيديها كالاطفال وخطفت قبلة من خده. # ربنا يخليك ليا. يبقى هندسة. يونس. # يووه. ورايا ورايا. جاسر.

# ودي حاجة كويسة عشان أبقى مطمن عليها جوه الكلية. يبقى هاخد الأوراق وأقدم لكوا انتوا الاتنين مع بعض. سليم. # لاء. خليك. أنا كده كده كل يوم في الجامعة. لما ينزل التنسيق هقدمهم الاتنين. جاسر. # تمام. كدا. أنا مش ناسي هدية النجاح يايونس. حور بحنق طفولي. # ياسلام. اشمعنى يونس بقى؟ أنا مجموعي أكتر منه. تأمل جاسر وجهها الطفولي الحانق. ممتعة تلك الصغيرة. يونس بغيض. # أنتِ مالك يارزلة؟

مش كفاية المرمطة اللي أنا فيها من يوم ما اتجوزت؟ أشاحت بيدها. # هو أنا جيت جنبك؟ غيث بتساؤل. # مرمطة إيه يايونس؟ يونس يونس بغيض. # يعني واحدة وبتحب جوزها. أنا مالي؟ تصحيني من أحلا نومة وأترزع قدام الباب خمس ساعات في الطل. وأتصل تكنسل. وتقول إيه؟ أصله مش بيرد على التليفون. وفي الآخر يبقى الباشا سايب تليفونه في المكتب. مرمطة دي ولا مش مرمطة؟ حور. # أنت اللي بتحشر نفسك. هو أنا كنت اشتكيتلك؟ يابارد. يونس.

# ياريت بتشتكي. كنت قفلت السكة في وشك ولاه. عبر سليم وجاسر. # بااااااااس. جاسر ضاحكًا. # خلاص بقي يايونس. يونس. # والله أنا مستحملك عشان خاطر الراجل ده. بس. حور. # يا شيخ اتلهي. هو أنت تعرف تعيش من غيري؟ يونس لخديجه. # يعني مكنتيش عارفة تجيبي كل واحد فينا لوحده؟ خديجه. # اعقل يالا. فضحتنا. بسمه. # لو عقل ميبقاش يونس. يونس بغيض.

# مجنون أنا. بشد في شعري. صح. ما في مليون تؤم في البلد وعايشين فل. اشمعنى أنا اللي مربوط بالبتاعة دي؟ تتخنق هي. أعياط أنا. أنام. محمود ضاحكًا. # دا وهما صغيرين كانوا أسوأ من كده. حور كانت مناعتها ضعيفة بس حمولة ومبتتكلمش. سليم ضاحكًا. # تبقي هي اللي تعبانة تقوم وتروح المدرسة. ودا مشتح في السرير. كان بيضرب ضرب ويحلف والله تعبان. بس أنا كويس. محدش كان فاهم الحكاية دي إلا أما حور دخلت تعمل اللوز. خديجه.

# آه يوميها أخدوا مني حور. وأول ما بدأت العملية راح دا مغمي عليه. الدكتور يقولي مفهوش حاجة. هو كويس. بس مش فاهم. مغمي عليه ليه؟ بسمه. # أحلي حاجة بقى لما فاقت حور. بقي يونس يصرخ من زوره. لاء وصوته مبحوح. جاسر. # طب وحور؟ حور. # كنت باتفرج عليه. مهو كان بيتوجع بدالي. غيث ضاحكًا. # أنت كارثة ياحور. حقيقي ياجماعة. أنا مبسوط جدًا. إني اتعرفت بيكوا. محمود.

# إحنا اللي زدنا شرف يابني. وبجد كان اليوم جميل. وربنا يجعله عامر بحسكم يارب. مش يلا بقى ياجماعة. حور لسه تعبانة ولازم ترتاح. يونس. # لاء دي زي القرده. اسألني أنا. غيث. # حلوة الحكاية دي ياجاسر. مراتك تتعب تسأل يونس؟ سليم. # فعلاً اليوم كان جميل. بس يدوبك بقى نلحق نروح عشان ورانا شغل كتير. غيث. # هو يحيي مش هيصحى عشان أسلم عليه؟ داعبت بسمه شعره الأشقر فقالت خديجه.

# طالما نام دلوقتي يبقى مش هيصحى إلا نص الليل. يومك طويل يابسمه. تقدم سليم وحمل الفتى النائم وتحركوا جميعًا للخارج. تابعهم عيون غيث وعائشه.