رواية عشقت جبروت الفصل الأول 1 - بقلم سهيلة ياسر

بعد يوم طويل في الشغل فتحت موبايلي على صورته بصيت فيها واتأملت. قطع اندماجي مع ملامحه صوت رقيه صحبتي وهي بتقول: _يلا يا ست العشقانه هتباتي هنا ولا إيه؟ _بحبه يا رقيه بحبه. _الدنيا كلها عارفه يا قلب رقيه بس إحنا عمرنا ما نروح نقول. _طب هو ليه مش حاسس بيا؟ _عشان أخويا ده جبله مبيحسش ده لوح من التلج ولا عنده قلب ولا مشاعر. _ماتقوليش عليه كدا يا رقيه وإلا هزعل منك ده جميل ده أعظم رجال الكون.

_يوسف بطيخه بقى أعظم رجال الكون. امشي يا روز الله يرضى عليكي. لميت حاجاتي ونزلنا سوا من الشركة واستنينا الأوبر وبعد شويه كان وصل وركبنا سوا. _هتروحي على بيتك ولا هتيجي عندي؟ _يوسف أخوكي هيكون في البيت ولا لأ؟ _لأ زمانه راح شغله. _خلاص مش جايه. _يا واطيه كنت بختبرك هيكون في البيت يا أختي. _خلاص هاجي معاكي عشان أشوفه أصله واحشني أوي.

_أنا مش عارفه فيه إيه زيادة عن بقيت الناس عشان تحبيه أوي كدا هو أخويا آه بس أنا مش شايفه إنه يجنن زي مانتي شايفاه. _بحبه يا رقيه بحب شخصيته تقيل كدا وعاقل وراسي عارف هو عايز إيه مش تافه زي شباب اليومين دول ده مش شاب ده راجل. _امم باختصار يا روز يا حبيبتي إنتي بتحبي اللي يديكي على دماغك. _لو هاخد على دماغي منه هو مفيش مشكلة. بعد شويه وكنا وصلنا عند البيت حاسبنا سواق الأوبر ونزلنا طلعنا العماره.

وقفت رقيه ترن الجرس ودقايق وكانت مامتها فتحت. _أهلاً أهلاً إزيك يا روز. _إزيك انتي يا طنط عامله إيه. _مش قولنا بلاش طنط دي. _آه صح إزيك يا خالتي أخبارك إيه. _كويسه يا حبيبة خالتك خشي يلا عقبال ما أحضر الغدا ونتغدى سوا. دخلنا وأنا عيني على باب أوضته مظهرش ليه مش سامعه صوته ليه معقول رقيه تكون ضحكت عليا عشان أجي معاها وخلصت. لسه هسأل رقيه هو فين قطع سؤالي خروجه من الحمام بص لرقيه وقال:

_حضريلي قهوتي واكوي البدلة بتاعتي عشان هتأخر على الشغل. _أعمل إيه ولا إيه اختار حاجة واحدة أنا مش بمليون إيد يا يوسف. _اعملي الاتنين يا رقيه وتاني مرة تردي بأسلوب أحسن من كدا. قالها وسابنا ودخل أوضته. رقيه نفخت من طريقته الحادة. بصيت ليها وقولت: _روحي انتي اكوي البدلة وأنا هقف أعمل القهوة مع طنط جوه. _انتي حرة يكش تطلع مش مظبوطة ويزعقلك. _على قلبي زي العسل ملكيش دعوه.

قولتها ودخلت لطنط المطبخ وقفت أعمل القهوة بالطريقة السرية بتاعتي. فقط القليل من البن والحليب وقلبي. اختارت فنجان لذيذ لونه بينك وافتكرت إن معايا شوكولاتة كيندر في شنطتي جبتها وحطتها جنب فنجان القهوة وخرجت وأنا بتمنى من كل قلبي إنها تعجبه. _هو فين. _مشي قال إنه اتأخر على شغله وهيشرب قهوته في المكتب. _طب والقهوة اللي عملتها. _اشربيها يا أختي بعدين إيه الفنجان ده وإنتي بتقدميها لابن أختك ده يوسف يا روز يوسف.

_طب ينفع أشربها في أوضته. _هو ينفع بس متلمسيش حاجة عشان هيعرف. _طيب. فتحتلي باب أوضته ودخلت هي ل مامتها في المطبخ وډخلت أنا الأوضة وأنا بتأمل في كل حاجة فيها سريره مكتبه. الكتب اللي بيقرأها برفانه ويالهوي بقى من برفانه. حطيت فنجان القهوة على التسريحة ولسه همد إيدي آخد البرفيوم بتاعه أشمها زي كل مرة قطعني صوته وهو بيقول: _انتي بتعملي إيه هنا.

لفيت ليه وأنا متجمده في مكاني مش عارفه أنطق من خۏفي منه ومش عارفه أتشجع وأتكلم من جماله وهو بالبدلة الميري. _انطقي بتعملي إيه هنا. جت رقيه في الوقت المناسب وقالت: _هي عملت القهوة وكانت فاكرة إنك لسه موجود ودخلتها ليك يا يوسف. انت إيه رجعك مش قولت إنك مستعجل. _آه بس نسيت محافظتي. فتح الدرج خد محافظته وقفلوا تاني وكان هيمشي بس رجع مسك فنجان القهوة وشرب منه بوق وقال:

_قهوتك نيه المفروض تستني عليها أكتر من كدا وسكرها كتير تبقي تقللي السكر أكتر من كدا والقهوة مبيتاكلش معاها شوكولاتة ولا أي نوع من الحلويات بلا ش عك و يلا يا رقيه انتي وصحبتك من أوضتي من غير مطرود. قالها وخرجنا أنا ورقيه من أوضته. خدت القهوة شربتها في أوضة رقيه وأنا بعيط من طريقته الجافة. _خلاص يا روز أهدي مانتي عارفه إن دي طريقته من زمان ومع ذلك بتحبي. _هو فاكرني متهمه عنده يا رقيه إزاي يعاملني كدا.

_هو بيعاملنا كلنا كدا وأنا قولتلك مش هتعجبه وهيزعقلك قولتي على قلبي زي العسل. _بس ده عسل مر ده عسل ماسخ مش مسكر. _وإيه اللي رماكي على المر يا ست روز. _بحبه. _آه من الحب ووجع قلبه يا ناس هروح أشوف ماما وأهدي بقى.

سابني وخرجت شربت آخر بوق من القهوة اللي طلعلي فيها عيوب قد كدا وأنا بفكر هو ليه كدا ليه مش عادي مش يمكن اللي محببني فيه أصلًا إنه مش عادي غامض وعميق عمره ما سلم عليا على طول بيتجاهلني كأنه مش شايفني أصلًا مش يمكن ده المميز فيه. بعد ما قعدت مع طنط ورقيه عشان ميزعلوش روحت البيت وأنا بفكر فيه.