رواية عيشه تانيه الفصل السادس والثلاثون 36 - بقلم خديجه احمد

خالد بصلها بصدمه وحط إيده على مكان الضربة وقال بدموع: دي النهاية. وخرج من الأوضة وراح يلم هدومه. مريم بقلق: أنا شفتك وأنت خارج متعصب من الأوضة، في حاجة؟ وليه بتلم هدومك؟ خالد: معلش يا مريم، اخرجي دلوقتي. أنا متعصب ومش قادر أتكلم. مريم: بس... خالد بغضب: مريم، قولتلك اخرجي لو سمحت. مريم بدموع: طب أرجوك متسبنيش... متسبنيش زي ما ماما وبابا ما سابوني. أرجوك، مبقاش ليا حد غيرك. خالد:

شش، بس يا مريوم. خلاص، مقدرش أسيبك أصلاً. مريم بدموع أكتر: طب متمشيش، متلمش هدومك. خالد بحزن: مش هينفع والله، مش هقدر أقعد هنا أكتر من كده. مريم بتنهيدة: طب طب، خدني معاك. خدني معاك وأنا والله مش هضايقك، بس متسبنيش. خالد: طب ومروان؟ مريم: خالتو هتاخد بالها منه. خالد بتنهيدة: مش عارف يا مريم. مريم بتوسل: عشان خاطري، أنا مش هقدر أقعد من غيرك. خالد بابتسامة: طب يلا روحي جهزي شنطتك، عقبال ما أطلع أقول لأمي إننا هنسافر.

مريم بفرحة: ماشي. *** في المطبخ. إيمان: في إيه يا خالد؟ خالد: كنت عايز أغير جو كدا، ومريم شبطت فيا، هاخدها معايا. إيمان وهي بتقطع الأكل: لأ طبعًا مينفعش. خالد: ليه بس يا ست الكل، دي هتبقى في عيني. إيمان بعد تفكير: لو عايز تروح، خد مروان معاكم. يعني معندوش صحاب؟ خده يتفسح معاكم. خالد: بس... إيمان: ولا بس ولا مبسش، هتخدوه معاكم أهلاً وسهلاً، مش هتاخدوه يبقى روح أنت لوحدك وسيب مريم. خالد بقلة حيلة:

اللي تأمري بيه يا ست الكل. ونزل. خالد: جهز شنطتك يا مارو عشان هنسافر. مروان بفرحة: إيه ده بجد! يسسس. مريم: هيجي؟ أنت مش هتضايق؟ خالد بهمس: لو عليا والله كنت عايزك أنت بس اللي تبقي معايا، بس نقول إيه بقا، خالتك موافقتش وقالت لازم ناخده معانا. مريم بابتسامة: خلاص، هروح أحضر شنطته هو كمان. *** عند داليدا. داليدا: اتفضلي يا ستي. سلمى بكسوف: السلام عليكم. داليدا بهمس: إيه الأدب ده. سلمى بصوت منخفض: اسكتي يا بت. نبيلة بحب:

وعليكم السلام ورحمة الله وبركاته... اتفضلي يا حبيبتي في أوضة داليدا، عقبال ما أعملكم حاجة تشربوها. سلمى: تسلمي يا طنط. سلمى: مامتك لطيفة أوي. داليدا: يا بت، دا أنت لسه عارفاها مبقالكيش دقيقتين. سلمى: بتكلم بجد، شكلها ملامحها هادية كدا وتحسيها طيبة. داليدا: عندك حق بجد، هي شخص طيب أوي، ربنا عوضني بيها. سلمى: عوضك بيها إزاي يعني؟ قطعهم دخول نبيلة بالعصير. نبيلة: اتفضلوا يا حبايبي، اشربوا ولو عايزين أي حاجة...