رواية عز القمر الفصل الأول 1 - بقلم دنيا فادي

قمر بتوتر: انت بتعمل إيه يا عز؟ عز: إيه!!! قمر: هو إحنا مش متفقين إنك مش هلمسني إلا برضايا؟ عز بزهق: أنا كنت بعدلك المخدة بس، عشان كده شديتك. قمر: فهمتك غلط. عز: أنا جوزك على فكرة، إيه فهمتك غلط دي؟ قمر: يا عز، بقا ملوش لازمة الكلام ده، أنا عايزة أنام، يالا رجع المخدة بينا ونام. عز: طيب. عز بإستغراب: ما تنامي؟ قمر: نام انت الأول. عز بضيق خلق: أنا مش عيل عشان أرجع في كلامي، قولتلك مش هعمل حاجة غصب عنك.

قمر بإبتسامة خفيفة: ماشي، بس نام الأول برضه. عز: يا حول الله. قمر برقة طفولية: معلش. عز: اتخمدت أهو. قمر تتأكد إنه نام وتروح في النوم باطمئنان. *** الساعة 11:26 صباحًا. هايدي: معزومين عند قمر وعز؟ زينب: آه، جهزي. هايدي بإبتسامة وفي ذهنها: وحشتني أوي يا عز. زينب: يالا مش عايزين نتأخر عشان أهل قمر جايين. هايدي بضحك: إيه التناحة دي؟ جايين ليه؟ زينب: بت، عيب، هو إيه اللي جايين ليه، أهلها ومعزومين زيهم زينا.

هايدي بضحك: يا عمتو، مقصدتش، كنت فاكرة عازمنا إحنا بس. زينب: لا، واجهزي يالا عشان منتأخرش. هايدي: حاضر. *** قمر: أهلك بيحبوا الأكل اللي أنا عاملاه، مش كده؟ عز: امم، بس بابا بيحب الرز أبيض. قمر: طيب كويس، قولت قبل ما أعمله. عز: عايزة حاجة أنزل أجيبها؟ قمر: لا، فيه كل حاجة. عز: طيب أساعدك؟ قمر: لا، أنا بعرف أعمل كل حاجة لوحدي، اص... آآآه. عز بخضة: إيه؟ قمر وترفع صباعها بـ"ريأكشن" زعل.

عز بضحك: عورتي نفسك، ما أنا بقولك أساعدك، وإنتي اللي بتكابري. قمر: بعد إذنك، متكلمنيش وأنا بعمل حاجة تاني. عز: يعني أنا السبب؟ قمر بلوي بوظ: آآه. عز: وأنا مالي، وريني إيديك. قمر وتخبي إيديها: خلاص خفت. عز بإستعجاب: وريني، مش هاكلها. قمر: وتطلع إيديها من ورا ضهرها. عز: دي خفت؟ بطلي عندّك ده. ماشية؟ قمر: ماشي، ها خلاص. عز: خلاص. قمر: أكمل الأكل بقى. عز بنفاذ صبر: كملي يا قمر. قمر بفرحة: دي أكيد ماما، افتح بسرعة. ***

عز بإبتسامة: إزيك يا حماتي؟ حياة: بخير يا قلب حماتك، عاملين إيه إنتو؟ عز: كويسين على حسك. قمر بلهفة: ماما وحشتيني أوي. حياة: الواد عز عامل معاكي إيه؟ أوعى يكون مزعلك؟ عز: أنا أقدر برضو. أدهم بحده: عامل إيه يا عز؟ عز بضيق خلق: أحسن منك. حياة بملاحظة: عز يا حبيبي، تعالي عايزك. ويدخلوا الأوضة.

حياة: أنا عارفة يا حبيبي إنك مضايق من وجوده، بس هو زارنا فجأة، ولما عرف إننا جايين صمم ييجي معانا، ومعرفتش أقوله إيه، ما هو ابن خالها برضو. عز: فاهم موقفك يا حماتي، عادي، هو فين عم عبدو؟ واحشني الراجل ده. حياة بضحك: عمك عبدو لقى محل عامل عروض، قال ده لقطة، وقال أسبقوني إنتو. عز: والله عمو ده غلبان. حياة: أهو شكله جه. *** زينب: إيه ده، إيه ده، إحنا فاتنا حاجة ولا إيه؟ حياة بضحك: يا أختي، أنا لسه جايه.

زينب: وحشتيني يا خباصة، بقالي كتير مشوفتكيش. حياة: شوفي أمك يا عز، بتقول عليا إيه. زينب بضحك: مش بقولك خباصة. حياة بضحك: وحشتيني يا فقرية. هايدي بإبتسامة خجل: احم، عامل إيه يا عز؟ عز بضحك: يا سلام، من إمتي وإنتي بتتكسفي يا زقرده إنتي؟ هايدي: متقوليش زقرده، أنا كبرت على فكرة. عز: تكبري عليهم، أومال عليا أنا لا. هايدي بإبتسامة: طيب، اللي تشوفه. بعد ساعات. عز ويلاحظ أدهم بيتكلم مع قمر. عز: قمر. قمر: إيه؟

عز: تعالي عايزك. قمر: طيب. ولسه هتقعد جنبه، هايدي تلحقها وتقعد. هايدي بإبتسامة: اقعدي إنتي جنبي. قمر بإستغراب: ماشي. هايدي: معلش، أنا مبشوفهوش خالص، أومال إنتي معاه على طول؟ قمر وتبتسم ليها: ممم. هايدي: عز، إيه رأيك في شعري؟ مخدتش بالك منه إنت؟ عز: حلو. هايدي: بجد؟ طيب إيه اللي اتغير فيه؟ عز: مش واخد بالي يا هايدي، أي حاجة حلوة عليكي. هايدي بخجل: بجد يا عز؟ يعني أنا حلوة؟

زينب: إيه يا قمر، بقي مش ناوين تفرحونا بنونو صغنن؟ هايدي بتسرع: لا. وتكمل بتردد: قصدي، هما لحقوا عشان يخلفوا؟ عبدو: لا، بقولكو إيه، أنا عايز حد يقولي يا جدو. حياة: بقالكم كام شهر متجوزين، عايزين نشيل عيالكم. أدهم: عادي، مش ممكن يكونوا لسه مخدوش على بعض، متستعجلوش. قمر وهي بتسمع كلامهم بإحراج. أدهم بتلقيح وعينه على عز: أو يكون في مشكلة ولا حاجة. حياة: عيب اللي انت بتقوله ده يا أدهم.

عز بغيظ ويقوم يقف بثقة: أنا عندي ليكم خبر حلو، قمر حامل. قمر بصدمة وتقوم تقف: إيييييه؟