رواية ابتلائي الفصل التاسع 9 - بقلم حبيبة شداد

كان في إيدي أنسى ياحبيبة بس مقدرتش أخونك. أصل اللي بيحب بيبقى قلبه مع واحد بس وبيحافظ عليه حتى من نفسه. اللي بيحب بيغير. وأنا حبيتك ولازم أحافظ عليكي. دخلت أوضتي ورنيت على والد حبيبة وعرفته إني عاوز أقابله بكرة بس في مكان غير البيت، وهو وافق برغم إصراره يعرف السبب، بس مرضيتش أقوله. اتفقنا نتقابل بعد ما أخلص شغلي. خلصت شغلي وجهزت واتوجهت للكافيه اللي اتفقنا نتقابل فيها. اختارت كافيه هادي أعرفه عشان نعرف نتكلم.

= سلام عليكم ورحمة الله وبركاته. ازيك يا عمي. ^ وعليكم السلام ورحمة الله وبركاته. ازيك يا بني. عامل إيه. = الحمد لله يا عمي. في زحام من النعم. كنت عاوز أتكلم معاك في موضوع كده مهم. ^ خير يا بني إن شاء الله. = حضرتك شفت مني حاجة وحشة أو سمعت عني حاجة. ^ لا يا بني. أنا بعتبرك زي مالك ابني بالظبط. ولو أنا شفت منك حاجة غلط أو سوء أدب مكنتش هبقى معاك دلوقتي. = تسلم يا عمي. الآنسة حبيبة قررت تنهي الخطوبة. أقدر أعرف السبب.

^ هي عندها اعتقاد إنك أصغر منها وخايفة من عدم التوافق بينكم. = طيب انت إيه رأيك في عقليتي يا عمي. أنت قعدت معايا أكتر منها وتقدر تحكم. ^ والله يا بني أنا شايف إن فيك خير، بس ده قرارها وأنا مش عارف أقنعها بغير كده لأنها عنيدة شوية وكمان خايفة تتكرر التجربة. خطيبها الأول كان ظاهريًا ملتزم بس مفيش أي توافق ولا طاعة ولا أي حاجة. فاتقفلت. = طب ينفع أقنعها أنا. ثم إن الإنسان مش بيتعلم بسهولة، لازم نغلط عشان نتعلم.

^ أكيد. حقك تثبتلها. بس أنتم ملتزمين بالضوابط. عاوز تقنعها إزاي. = هو ده الموضوع اللي عاوز حضرتك فيه. لو حضرتك موافق ممكن نكتب الكتاب عشان أقدر أثبتلها إني هكون الخير وهكون قد الثقة. ^ والله يا بني هي فكرة حلوة، بس مش شايف إن لسه بدري على كتب الكتاب شوية. = صدقني يا عمي والله أنا شاريها وربنا يقدرني وأكون الخير ليها. ^ طيب يا بني سبني استخير وأفكر. واللي فيه الخير ربنا يقدمه. _حبيبة. = نعم يا أبي.

^ انتي طلبتي من أويس برضو تفركشي. = أه. ^ أنا مش موافقك على ده. وسبتك تعملي اللي يريحك، بس مش عشان حاجة. أنا كان في دماغي هدف معين. = هدف إيه يا أبي. ^ أشوف هو شاريكي فعلاً ولا كان حماس بدايات ومحاولات للحصول على حاجة صعب ياخدها بس. = مش فاهمة تقصد إيه برضو. ^ أويس كلمني النهاردة وطلب نتقابل. ولما قابلته طلب يكتب الكتاب عشان يثبتلك إنه شاريكي فعلاً. = والله!!! ^ بس أنا خايفة يا بابا.

= متخافيش. حد زي أويس متخافيش منه. هو مش زي اللي فات. لازم تخرجي من اللي انتي فيه. لازم تعرفي إن مش الكل زيه. = سكت. والدي عنده حق فعلاً. أنا عارفة إن أويس كويس. أنا عارفة إنه الخير. بس خايفة. ^ ها قولتي إيه. = حاضر يا والدي. هصلي استخارة وربنا يقدر الخير.

قمت دخلت اتوضيت ونويت أصلي الاستخارة. أنا عارفة إنه شاريني. أنا عارفة إنه بيحاول عشاني. عارفة من زمان بس خايفة. هو ميتخافش منه. خايفة أكسر قلبه وقلبي يتوجع معاه. أويس مبطلش يحاول لأجلي. تقريبا فيه كل حاجة طلبتها من ربنا. يارب سلمتك أمري فارزقني الخير حيثما كان وراضيني به.

_فات يوم واتنين وأنا بدعي ربنا يكون ده آخر بُعد بينا. يكون ده وقت العوض وربنا يقدرلي الخير ويراضي قلبي بيها. أهلي متوترين أوي خايفين قلبي يتكسر. الحقيقة أنا خايف ترفض وتصر على قرارها وقلبي يتوجع. صليت استخارة وتوكلت على الله وسلمته أمري وأنا عندي حسن ظن بيه. في نهاية اليوم لقيت والدها بيتصل. ^ الو. سلام عليكم ورحمة الله وبركاته. ازيك يا بني. = وعليكم السلام ورحمة الله وبركاته. ازيك يا عمي.

^ الله يسلمك يا بني. شرفنا إن شاء الله بكرة أنت وأهلك عشان نحدد معاد كتب الكتاب. مبارك يا بني. = بإذن الله يا عمي. الله يبارك لنا فيك يارب. قفلت المكالمة وأنا برقص حرفيًا. قلبي بينبض من كتر الفرحة والحياة بقى لونها بمبي على رأي الفنانة. ده الإنسان أبسط ما يكون. مجرد كلمة تعالى نتفق تقلب حالي كده.

روحت البيت وبلغت أهلي. فرحولي بطريقة غير طبيعية. بداية من عائشة أختي اللي كانت بتغنيلي وأبي اللي أخدني في حضنه وأمي اللي عيطت وقالتلي خلاص كبرت ياواد. ونعتبر ده تالت أسعد يوم في حياتي بعد يوم خطوبتنا ويوم لقاها. نمت وأنا كلي حماس لبكرة. صحيت على صوت زغروطة في ودني وهيصة. = إيه يا جدعان فيه إيه. & صباح الخير على أحلى عريس. قوم يا عم قوم. هو فيه عريس بينام الوقت ده كله.

= حبيبة قلبي والله مقدر فرحتك بيا بس سبيني أنام. الهي تنستري. وبعدين وقت إيه الساعة ٧ الصبح. & يا كسول قوم يا عم هات الورد والحاجة. = ورد إيه ها ورد إيه ده. احنا لسه رايحين نتفق على المعاد. إيه بقى الهيصة دي. & جرا إيه يا ولد. ده انت فرحتي الأولى والوحيدة. عاوزني مفرحش بيك ولا إيه. = انتي قلبتي على أمي الحاجة ليه كده. وبعدين افرحي بعيد عني ياستي سيبيني أنام. & عيل كسول.

قفلت الباب ومشيت وأنا ضحكت وكملت نوم. صحيت صليت الضحى وجهزت ونزلت فتحت الصيدلية. عدى الوقت ببطء شوية بس كنت مشغول جدا فمللتش من بطئه. صليت العشاء وروحت أنا وأهلي لبيت حبيبة والفرحة مالية قلوبنا والضحكة على وشوشنا.

كالعادة مالك وعمي استقبلونا أجمل وأكرم استقبال وقعدنا اتفقنا على كل حاجة واتفقنا إن المعاد هيكون يوم الجمعة بعد صلاة العصر. استأذنت من عمي إني عاوز أعمل كتب كتابي في جامع الأزهر وبعدها نتفسح شوية ونعمل سيشن وهو وافق على ده الحمد لله. أنا الكون كله لا يسع أجنحتي. مشينا وبدأت أجهز لليوم ده بكل حب ودفا. مش مصدق إن خلاص كلها يومين وتبقى حلالي وأثبتلها إني بحبها بجد. مش مصدق إن خلاص هتبقى ملكي.

طلبت من جاليري بيبيع شغل هاند ميد إنه يعمل منديل كتب الكتاب بأسامينا ويعمل تارة برضو فيها أسمينا ومكان للبصمة وتاج باسمها هي. كل حاجة كنت بخطط لها بكل حب. كنت متحمس بشكل محدش يتخيله. وأخيرًا جه يوم الجمعة ده. لقد هرمنا والله بجد. نزلت استلمت الأوردر اللي طلبته واللي كان مفاجأة ليها. وأوردر الورد والحاجة اللي طلبت تتعمل اتجهزت لصلاة الجمعة. صليت ونزلت وقفت في الصيدلية حوالي ساعة وطلعت أجهز.

= الله الله على الحلاوة. شو هالقمر وشو هالحلا. * أنتِ القمر يا عيوني والله. = هذا الشبل من ذاك الأسد. وبعدين انتي واخدة حلاوة الدنيا كلها ليكي يا أمي. * اللي حلى الدنيا وجودك أنت وأبوك وأختك. = بوست إيدها ورأسها وأنا بقولها يديمك ليا يا أحلى ما في الكون. غمضي عيونك بقى. طلعت تاج ورد ولبسته لأمي. بوست راسها وقولتلها. = هتخطفي الأنظار يا بطوطة يا مزة. * أنت بتعاكس مراتي يالا. ده انت ليلتك مش معدية.

= سلم قولاً من رب رحيم. إيه يا حجوج. رعبتني. أنت جيت إمتى. * أحسن جيت من وقت مزة يا بطوط. = انت بتعاكس مراتي في بيتي يااض. * ماهي اللي حلوة. يا حمزة. ده انت يومك مش معدي بجد بقى. جريت وأنا بقوله خلاص يا حموزي محدش قالك اتجوز واحدة حلوة كده. * برضو بتعاكسها برضو. هضربك يالا. = خرجت من الأوضة وأنا بقوله زعلان ليه يا حموزي بس. هي حلوة وأنت قمر وأنا الناتج من اجتماع القمر ونجمته الحلوة. * بتثبتني يا أويس.

= فشر. مين قالك ده. ده أنا بمدحك يا حموزي يا حلو. * طيب يا أخويا روح أجهز عشان منتأخرش. يلا. = طيارة. لبست بدلتي وخرجت لقيتهم مستنيني. عائشة حلوة أوي شكلها قمر أوي وأمي قمرين وحموزي حبيبي واخد الجمال كله ليه. ركبنا العربية واتوجهنا لبيت حبيبة عشان نكون يعني ماشيين كلنا مع بعض. خرجت من البيت وأنا بكبر وأسمي بسم الله ما شاء الله الله أكبر الله أكبر اللهم زد وبارك.

كانت جميلة أوي. فستان أبيض رقيق. نقاب وخمار موف درجته جميلة أوي كده عليها كاب أبيض مغطي وشها. شكلها قمراية أوي. قدمتلها بوكيه الورد. أخدته مني وركبت العربية مع والدها وأهلها وأنا ركبت مع أهلي. قرايبنا كانوا معانا برضو بس كانوا راكبين باص. كانوا عاملين هيصة في الباصات وبيدقوا على الدف وبيغنوا وحاجة آخر قمر. شغلت كاسيت العربية أغنية ياللي كنتي في بالي. غنت عائشة مع الأغنية وغنينا كلنا.

= دايما أنا بدعي بيكي ياللي كنتي في خيالي. انتي نصيبي مكتوب. & بسأل ربي في صلاتي إنه يعطرني فيكي. وربي عالم بحالي. جمع فرح قلوب. = والليلة جينا بالفرحة وعروسة في أحلى طرحة. نورها يملى المكان. ضحكتها فيها أخلاق ودين.

خلصت الأغنية وكلنا مندمجين وبنغني معاها. كل حاجة كان شكلها جميل. الباصات كانت متزينة بما إن الباصات لناس من عيلتنا فكانوا مزيننها بشكل بسيط وعربيتنا عليها ورد ومتزينة وكذلك عربية حبيبة. كل حاجة كانت مبهجة وشكلها جميل. وبعد ساعة ونص في الطريق وصلنا الحمد لله. كان باقي عشر دقايق على أذان العصر. دخلنا استعدينا للصلاة وقعدنا نذكر الله لحد ما الأذان أذن وأقيمت الصلاة. صلينا ومن جمال الجامع الأزهر الوافدين اللي فيه والشيوخ اللي بيصلوا بالقراءات. الشيخ صلى برواية خلف عن حمزة. الرواية المحببة لمعظم دارسين علم القراءات.

خلصنا صلاة واتوجهنا لركن في المسجد وجلس الشيخ وبدأ بالعقد. حطيت إيدي في إيد عمي وقلبي مش موقف نبض. يارب كرمك واسع أوي يارب. لطفك بيا كبير أوي. £ قول ورايا يا أستاذ. زوجتك ابنتي. = زوجتك ابنتي. £ موكلتي. = موكلتي. £ البكر الرشيد. = البكر الرشيد. £ زواجًا شرعيًا على سنة رسول الله. = زواجاً شرعياً على سنة رسول الله. £ وعلى مذهب أبي حنيفة النعمان. = وعلى مذهب أبي حنيفة النعمان. £ اتفضل يا دكتور قول ورايا. = قبلت زواجها.

£ قبلت زواجها. = زواجاً شرعياً على سنة رسول الله. £ زواجاً شرعياً على سنة رسول الله. = وعلى مذهب أبي حنيفة النعمان. £ وعلى مذهب أبي حنيفة النعمان. = بارك الله لكما وبارك عليكما وجمع بينكما في خير. بالرفاء والبنين إن شاء الله. كنت بردد الكلمات بقلبي مش بلساني. كنت بتنفض مع كل كلمة. كان قلبي بيرقص.

مضيت وبصمت ومالك أخد الدفتر عشان هي كمان تمضي وتبصم وخلصنا الإجراءات. الناس كلها بتشاركني. مصريين ووافدين حضروا العقد. بقيت بعد الوقت لأجل أشوفها. قلبي مشغول بيها. قعدنا مدة في الجامع وبعدين رنينا عليهم عشان نتصور. عملنا سيشن أنا وهي في الجامع. كلنا اتصورنا. استأذنت والدي وأخدتها معايا وأهلي في العربية. وهما في العربية التانية. روحنا ممشى أهل مصر وقفنا على النيل شوية اتصورنا وزقططنا. استأذنت منهم أخدها ونتمشى شوية لوحدنا وعمي وافق. وعرفتهم إني هنتأخر وهنبعد عن هنا شوية عشان زحمة.

فتحت باب العربية وهي ركبت وبدأت أسوق. شغلت الكاسيت على أغنية كتبوا كتابك يا نقاوة عيني وبدأت أغني مع الأغنية. مديت إيدي ليها وقولتلها هاتي إيدك لو تسمحي. كانت خايفة ومتوترة شوية بس مسكت إيدي. بوست إيدها وأنا بقولها كل سنين العمر وانتي معايا وجمبي وأجمل ما في الدنيا كلها. عاوز أوعدك إني عمري ما هسيب إيدك أبداً وهكون معاكي على الحلوة والمرة. ربنا ما يجعل فيه مر في حياتنا. بصتلي وقالتلي يا رب.

قولتلها لو حابة ممكن تنزلي النقاب عادي. إزاز العربية أسود ومش بيكشف. رفعت الكاب عن عيونها ونزلت النقاب. اتفاجأت بالبدر قاعد معايا. = وقفت العربية ولبستها التاج وبوست راسها وقولتلها اللهم بارك اللهم بارك. الله يحفظك من كل سوء يا حبيبتي ويديمك ليا. كانت خجولة أوي. حاولت ألطف الجو وقولتلها على فكرة أنا زعلان منك. = أويردت عليا بسرعة ولهفة حاولت تداريها. _ليه. إيه اللي حصل.

= مقولتليش رأيك في الورد ولا تارة الخطوبة ولا أي حاجة. = تنهدت براحة وقالتلي. _كانوا جُمال أوي وكانت كل حاجة جميلة أوي والنهاردة كل حاجة جميلة. = انتي أجمل من الكون كله. _اتكسفت وسكتت تاني. = غمضي عيونك بسرعة. طلعت التارة اللي عليها أسمينا والمنديل والدرع. _الله شكلهم جميل أوي بجد. تسلم إيدك. = أخيراً نطقتي. _يسلم قلبك ونبضه يارب. = بس مكان البصمة نشف. هنبصم إزاي. = ودي تفوتني برضو. معايا البصامة. _بسرعة بسرعة.

ضحكت وأنا بقولها حاضر يلا بينا. بصمنا كل واحد لوحده في الخانة تحت اسمه وبعدها احنا الاتنين في خانة أسمائنا سوا. اتصورنا بالمنديل والتارة اللي كان مكتوب عليها ((‏فتلاقت الأرواحُ بعد شتاتِها وحنَا علينا العُمرُ وابتسمَ القدَر :) ) ♥️ صَوّرتها بالورد والتاج والدرع. شكلها كان جميل أوي ويخطف. = غمضي عيونك تاني بقى. _تاني. اهو. طلعت تورتايه عليها أسمينا وتاريخ كتب كتابنا وطلبت منها تفتح عيونها.

_الله بجد إيه القمر ده. شكلها تحفة. أنا هستخسر أكلها. = نتصور معاها بس. _نتصور معاها. وفعلاً اتصورنا معاها بس. اتس اوك بعد كده أكلناها وطبعًا باقيها ركناها للحبايب. = قولتلها غمضي عينك تالت. _لا بقى إيه يا أويس فيه إيه. = يا عيون أويس. أول مرة أحس بحلاوة اسمي كده. اتكسفت ووشها أحمر وسكتت. = خلاص خلاص متقلبيش فراولة كدة. آخر مرة غمضي عينك بس. غمضت عيونها وطلعتلها الهدية. _الله دي هدية ليا. = أكيد. افتحيها يلا.

فتحتها وظهر على وشها علامات انبهار. الله بجد يا أويس. = طلعي وشوفي. بدأت تطلع أول بوكس واللي كان فيه مصاحف وكتب قراءات. أي كتاب أو مصحف ممكن تحتاجه خلال دراستها لعلم القراءات وكشاكيل ونوتات وأدوات شكلها جميلة ولطيفة تحفزها على طلب العلم. لقيت عيونها دمعت وبصتلي بفرحة وهي بتقرأ المسج اللي على البوكس ” أَعِدُكِ أن أكونَ لكِ عوناً في طلبِ العِلْم وأن نُجاهد سوياً لتربية أطفالنا تربية صالحة ”

فتحت البوكس التاني واللي كان فيه جميع أنواع الكاندي والشوكليت والسناكس. ابتسمت وهي بتقرأ المسج اللي على البوكس ” ودول ياست البنات عشان تنقنقي وانتي بتذاكري ” فتحت البوكس التالت واللي كان فيه إدنائين وملحفاه وفستان وبوكس خمارات وأنقبة. ابتسامتها زادت وهي بتقرأ ” كحورية أنتِ من الجنة. أَسرتني عند رؤيتك بلباس أمهات المؤمنين ”

فتحت البوكس الرابع واللي كان فيه كل الأدوات والمستحضرات اللي ممكن أي بنت تحتاجها. ودي مكتبتش مسج عشان معرفش حاجة لأن عائشة هي اللي كانت بتكلم الأونر وأنا بطلب البوكس. وحان وقت آخر بوكس كان مكتوب عليه مسج ” إنما نتزوج ليخرج الله من أصلابنا من يعبد الله حق عبادته” فتحت البوكس واللي كان أفضل الكتب اللي بتتكلم عن تربية الأطفال على الدين الصحيح وإزاي تتعاملي كأم. خلصت وبصتلي بفرحة وهي بتعيط وقالتلي.

_أنا مش عارفة ولا قادرة أعبر باللي أنا حاساه. أشكرك إزاي. = مفيش بينا شكر. انتي مراتي وحياتك حياتي وأنتي أنا. _لقيتها بتمد إيديها تمسك إيدي اللي اتخلت عنها من وقت مابدأت أطلعلها في المفاجآت وباستها وقالتلي. _الله يديم وجودك ويجعلنا أزواج صالحين.

آمنت على كلامها ودعاءها وقولتلها تعدل نقابها عشان ننزل نشم هوا النيل. واجهت صعوبة شوية فيها إنها تظبطه كما كان بس مش أوسو اللي حاجة تعطله. ظبطته معاها ومشينا حالنا ولبستها الكاب ونزلت فتحت الباب وأخدت إيديها حاوطتها بإيدي واتمشينا شوية على النيل. الهوا جميل ومنعش فيه نسبة سقعه بس الحقيقة إني ف دفا لإن محاوطاها ولإنها جمبي. اتمشينا كتير ودردشنا وبدأت تاخد عليا وتضحك معايا وتتفاعل. أخيراً استوعبت إني زوجها. كانت قعدة رومانسية مليئة بالصور والدرة المشوي وحمص الشام وايس كريم ولغبطة أكل بس فداها الدنيا. قولولي هيسفلتني لما أروح بس فداها برضو. هو أنا بتجوز كل يوم يعني!

بس الحلو ميكملش. لقينا أبي بيرن عليا عشان نروح ليهم. رجعنا لمكان العربية وركبنا وروحنا ليهم لقيناهم عاملين هيصة كبيرة وبيغنوا ويرقصوا وحاجة آخر قمر. قعدنا هيصنا معاهم شوية وبعدين لقينا مالك أخدني ع جنب وبيقولي. ¥ ما تيجي نخلي الفرح فرحين يا برو. = مش فاهم عاوز إيه برضو. ¥ أنا طالب إيد عائشة. = وأنا مش هلاقي أنسب منك لأختي بس الرأي رأي والدي ورأيها. ¥ ما أنا خايف أقول لعم حمزة. = تعالى وأنا معاك. خايف ليه أصلًا.

كلمت والدي ورحب بالموضوع بس الرأي في النهاية يرجع لعائشة. خلصنا كلامنا ورجعنا ليهم تاني نهيص ونفرح. لوقت اتأخر أوي ف قولنا نمشي بقى. وصلت أهلي البيت وبعدين وصلت حبيبة. أخدت رقمها وهي طالبت مني أكلمها لما أوصل بالسلامة وأنا طبعًا قولت سمعاً وطاعة يا مولاتي. = السلام عليكم ورحمة الله وبركاته. _وعليكم السلام ورحمة الله وبركاته. وصلت بالسلامة يا أويس. = وصلت يا عيوني. ها قوليلي عجبك اليوم.

_أوي أوي يا أويس بجد. كل حاجة جميلة. كل حاجة حلوة بوجودك ولمساتك فيها. ربنا يجمعنا عاجلاً غير آجل. = أول مرة أعرف إنك بتدعي ربنا يجمعنا. _أنا بدعي من زمان يا أويس. من أول مرة اتقدمتلي فيها بدعي إنك لو الخير ليا ربنا يجمعني بيك قريب أوي. = اومال كنتي عاوزة تسيبيني ليه. _مش بإيدي زي ماقولتلك خايفة وخايفة تتكرر نفس الحاجة. = قصدك خطيبك الأول. _مش مهم. مبحبش أفتكر. بس في نفس الوقت بحمد ربنا إنه عوضني بيك.

= يا فرحة قلبي يا فرحة قلبي. هموت منك كده. _بعيد الشر عنك. = يديمك ليا يا حبيبتي يارب. _ويديمك يارب. يلا روح نام عشان الشغل. = حاضر. _تصبح على خير سعادة. = وانتي من أهلي. قفلت الفون وأنا مش مصدق. أخيراً حلمي اتحقق. نمت بارتياح شديد وأنا متشوق لتاني يوم عشان أسمع صوتها.

_عدت الأيام وأويس أثبتلي حبه بجد. هو مش محتاج يثبت. أثبتلي إني اخترت صح وإني غلطت لما فكرت أسيبه. كل فعل كان بيعمله كان عاوز يراضيني بأي طريقة. مفتكرش إنه مرة زعلني منه أو سبني زعلانة أو مضايقة. أويس جميل بشكل يخطف القلب وحقيقي هو خطف قلبي أصلاً.

النهاردة فرحنا وكمان فرح مالك وعائشة. كان يوم جميل بوجود أويس جنبي وفرحتي بعائشة وأخويا. كان يوم بسيط وهادي وجميل. اتبسطنا جدًا وأنا اتبسطت بوجود حبيبي ونور العين اللي كانت العيون كلها عليه. ربنا يحفظه ويديمه ليا. سطور حكايتنا كتبت نهايتها وكانت أحلى نهاية باجتماعنا سوا وفرحة قلوبنا بقربنا.

# «فلما اجتمعنا قلتُ من فرحي بهِ من الشعر بيتًا، والدّموعُ سواقيا وقد يجمعُ اللهُ الشتيتينِ بعدما يظُنّانِ كل الظنَّ أن لا تَلاقِيَا♥️» تمت.