رواية ابي والغزلان للكاتبة ريام هادي (REEM) الفصل العشرون 20 - بقلم الناشر آدم العربي

#رواية_أبي_والغزلان
#للكاتبة_Reem_ريام_هادي
#الجزء_الأول #البارت_العشرون
#مدونة_نور_قلبي

صار سنين صابر والكلب موجوع
اضحك بالجذب وبرؤحي احزاني
اكول تهون ولازم كل مصيبه تهون
اشؤ عند المصايب ثبت عنواني
عشت عمري غريب بس اداؤي جرؤح
ولا اذكر بشر فد يؤم داواني
شسولفلك وشكلك عالجرة بدنياي
خلص كل الحجي وما خلصت احزاني

غزل اختي النورت الدنيا وامها مطيق تباوع بوجهه اتعاقبت بذنب مالها دخل بيه بس لان هي بنيه مو ولد
اول ايام ولادة غزل جان البيت نار بس مشاكل وعياط لان بابا جان يوميه يتعارك وياها يله ترضعها وحتى من ترضعها شويه وتشمرها اباوع عليها صغيرونه حيل حتى اخاف اشيلها بس من كثر متبجي وماكو احد يمها اضطر على كيفي اشيلها بيبي تروح وتجي على بيتها هم المسكينه ابتلت بينا بس اكثر الاوقات تروح ماما بعدها عصبيه حتى علينا تكول عبالك احنا السبب لان غزل اجت بنيه مو ولد

يوم بعد يوم وغزوله تستوطن روحي جنت اروح للمدرسه ابقى بس افكر بيها رضعت بجت نامت واتخيل ماما تضربها وادمع واكول لا ما شفتها ضربتها هي خطيه بعدها صغيره بس ماما ضايجه منها الجو بارد شهر الثاني ومطر جانت رشا بلفرصه تجي تركض علية حتى نكعد ناكل سوه لان الخاتون تاكل لفتها وترجع تاكل من لفتي مرات اضحك عليها لان تحب الاكل وانطيها بقيت انتظرها بلساحه بهاي الفتره من خوفي حتى من صديقاتي ابتعدت كمت اخاف حتى من صديقاتي واكعد بس ويه رشا بلمدرسه كعدت على المصطبه اباوع اجت من بعيد عباره عن كنتور ويمشي كله ملابس حتى كلاو وجفوف لابسه تستبرد متتحمل
رشا .. هلو اخذت ١٠ عيني بلرياضيات
سليل : عفيه بلسباعيه تعالي اكعدي خلي ناكل
جان رشا اطلع نص نستله باوعت عليها مبينه غاليه
هااي منيلج
رشا .. صديقتي انطتني ياها كتلها لتشمريها بلزباله اني اكلها
سليل : نزلت من المصطبه وكفت گبالها شون تقبلين تاخذين من غيرج مو عيب
رشا .. شكو بيها مو احسن متذبها اني اكلها
سليل : رشاوي ميصير تقبلين هسه الجهال يضحكون عليج ويكولون ام نفس الدنيا ومشايفه
رشا .. اكتله اليحجي
سليل : وليش تكتلي انتي صوجج الي عينه على حاجة غيره هذا عيونه ضيكه تذكرين بابا شيكول كولشي بيدنا نعمة من الله ميصير نباوع على شغلات الي بيد غيرنا لازم يصير عدنا عزه نفس
رشا : شنو عزة نفس
سليل : بابا يكول يعني نحمدالله على كولشي ونرضى بلقليل حتى الله يبارك بلي عدنا ونعيش مرفوعين الراس ومحد يحجي علينا بلموزين ولازم نقتنع كلمن ورزقه اذا بابا عرف راح يزعل
رشا .. لا راح اذبها
سليل : مو تذبيها رجعيها لصديقتج حتى لتكول عليج جوعيه ومشايفه
رشا .. هسه ارجعها
سليل : حضنتها وكتلها اني اجمعلج من مصرفي واشتريها الج بس لتاكلين من غيرج
رشا .. هذا هو ثلل ما اكل من غيري
سليل : شويه ورجعت بيدها الكلاو وشعرها مكفوش
هاا شبيج
رشا .. رجعت لهاي الزماله نور النستله تكول للبنات جوعيه اخذتها من الزباله والله ما اخذتها ثلل هي انطتنياها قبل متذبها
سليل : وليش هيج مكفوشه
رشا .. دفعتها على الرحله وجريت شعرها حيل وهي هم جرت الكلاو وشعري بس اني هم عضيتها من ايدها سويتلها ساعه هلكبرها وكامت تبجي وتأشر وتضحك

سليل : لتسوين وكاحه بعد كل يوميه ضاربه احد
رشا .. اني شعليه همه يضربرني قابل اسكت
سليل : تعالي اعدل شعرج راح يدك الجرس نرجع للصفوف واذا الست حجت عليج اسكتي مو مثل كل مره حتى على الست تعيطين
رشا .. حطت ايدها على حلكها وتإشر براسها
سليل : احجي شكو
رشا .. ما احجي ويه الست حتى لتكول لماما وتكتلني
سليل : يله حبابه روحي للصف بستها وراحت تركض حتى لفتها مإكلتها ادري بيها هسه بنص الدرس واطلعها هاي متتحمل تجوع

خلص اليوم ورجعنا نتمشى اشوف بنيه تمشي قريب من عدنا اعرفها ودوم اشوفها وحتى اعرف اسمها بس اخاف احجي وياها وتضوج صحتها حسيتها تخاف تمشي وحدها وكعد تتقصد تمشي قريب من عدنا
تعالي
اجت مدنجه ومستحيه
امشي ويانا نرجع سوه
بيبي اليوم كالت ارجعي وحدج واخاف ارجع
رشا .. تاكل الجهال تره ديري بالج
لا بيبي حبابه
رشا .. ماما كالت بيبي تاكل الجهال وهسه تاكلج
سليل : كافي رشا اباوع عليها تريد تبجي تعالي مو اسمج جنات
جنات : اي وانتي سليل وهاي رشا اعرفكم بس اخاف احجي وياكم بيبي متقبل
رشا .. بيبي مالتج تخوف اذا اكلتج اني معلية
سليل : ولج رشا كافي
رشا .. جعت امشي نرجع للبيت يله ثلل
سليل : امشي جنات يوميه نروح سوه انتي ياصف
جنات : ثاني
رشا .. بس اني اطول منج شوفي
سليل : بس اكبر بلعمر
رشا .. ماااا اني اكبر
جنات : لا اني اكبر
رشا .. مااا اني تره والله اضربج بطابوكه
سليل : يمعوده كافي اثنينكم نفس الشى بس امشو نرجع اباوع وحده ادفع بلثاني بنص الشارع لزمت وحده بأيدي اليمنى والثانيه بليسره ونتمشى وصلنا للبيت تذكرت من طبيتله دمعت
جنات : يله باي سليل
رشا .. واني ماكو باي بس ترجعين باجر ويانه اله اشك كتبج
جنات : يله لتزعلين انتي هم باي
سليل : سحبت رشا من ايدها وطبينا واسمع صوت غزل تناشغ من البجي ركضت من الخوف عليها طبيت لكيت بيبي تسبحها ذبينا جنطنا وركض كعدنا يم بيبي نشوف شون يسبحوها خطيه زركت من البرد
رشا .. بيبي صارت حمره لالا صارت زركه ليش ترجف انطيها قمردين تسكت
سليل : والله كتلتينا بلقمردين مالتج كومي انزعي ملابسج هسه تجي ماما تكتلج
ام سندس : كومن يبنيات غسلن حتى تاكلن
سليل : وماما وين
ام سندس : امجن نايمه لا تسوون حس

رشا .. بس تنام هسه اني جوعانه
ام سندس : ذاك الاكل على الطباخ كومي يمه سليل صبي لخواتج
سليل : ريم وين
ام سندس : نايمه بجت لمن فحطت
سليل : ليش
ام سندس : امها ضربتها عبن تسوي وكاحه وكورها وكور الصغيره تريد تلعب بيها تكول لعابه
سليل : ماشي عفت بيبي ودخلت للغرفه شفت ريم نايمه بمكاني ومبين الدمعه بعيونها اصلاً شهكة البجي بعده بيها تقربت بستها جان تفز وحضنتني
كومي ناكل شلتها رغم كبرت بس احب اشيلها عمر ريم هسه ٤ الا كم شهر ذكيه وكحه بس تنحط بنص الگلب وروحها بابا
اخذت خواتي وحسام هم كاعد صبيت ما اعرف اصب مثل ماما كل شويه انجوي بس اقلها منبقى جوعانين
بابا بهاي الفتره تعب حاير بلعيشه ويطلع من الصبح لليل وميكفي الحياه صارت اصعب وبدايه حصار والناس بدا يبين عليها ناس صعدت فوك وناس نزلت بس دوم بابا جان يكعدنا ويسولف ويانا ويعلمنا شون نرضى بلقليل وماما كالمعتاد تهز بيدها ومعاجبها الوضع

عمو الوحش كمت مااشوفه حتى من اصعد السطح احسن اخاف منه بعدين عرفت راح للعسكريه مثل بابا قبل عبالي يحارب وسألت بابا كال لازم يروح طلبو مواليده مفهمت شنو معناها بذاك الوكت بس اتذكر من صعدت ولكيت علاكة سوده على طابوكاتي فتحتها لكيت بيها البسكت والحلقوم ونستله توتو وحامض حلو وقمردين وبعد هواي شغلات عرفتها من عنده اخذتهم ونزلت وزعتهم على اخوتي ومن يومها بعد مشفته  ومرت الاشهر حاولت انسى كولشي الصار بس احلامي ااخ منها دوم يجي بيها ويأذيني ومن ينذكر اسم عمو سلام الدمعه تصير بعيني
صارت جنات صديقتنا تروح وتجي ويانا بس دوم رشا وجنات يتعاركن بلشارع بس شسوي اضطر الزم كل وحده على صفحه
رشا وكحه وجنات عنوديه واني واكعه بيها
ايام تمر من عمري بس حسيت روحي مذبوحه دوم اكو غصه بگلبي واخاف من الجاي من عمري طفله وكل همي جان اللعب والاكل هسه همي مااحلم بعمو سلام وشكعد يسوي بيه

سنتين مرت على حادثتي هسه احنا سنه ١٩٩٥ بهاي السنتين كولشي ماكو غير بابا مكسور ظهره بلشغل وامي تقبلت اختي غزل بس صارت دوم تعيط علينا وتندب حظها اني صف سادس ابتدائي تغير شگلي بسرعه اني اصلاً طويله يكولون على طول عمي جعفر الله يرحمه لان بابا مو حيل طويل مربوع بس اني طلعت على عمي همزين طلعت على جعفر مو على سلام حنطية شعري تمري معاني وجهي ناعمه بدت تظهر علية علامات البلوغ امي دوم تكول شوكت تكبرين وتشيلين الحمل ويايه متدري ضاعت طفولتي من سنتين وكبرت قبل وگتي

صارت عدنا عصابه متكونه من رشا صف ثالث ابتدائي وجنات رابع وريم اول يابه الي يندك بيهن يكطعنه حتى جنات الفقيره وكحنها بس المتوقعته كميه الوكاحه عند ريم فديوم بلمدرسه صارت الفرصه ومأجت تاكل ويانه ادور عليها ماكو رحت للصف مديت راسي لان الباب مسدود وهدوء توقعت عدهم امتحان او شى فتحت الباب على كيفي ودخلت واتفاجأ ريم لازمه عوده اطول منها وموكفه جم بنيه وجم ولد على السبوره وباقي الصف كاعد ساكت كلها عقال وتروح وتجلي وتكول الاسمع صوته اكسر العوده بأيده ورجله
فتحت عيني وطبيت ركض
ولج شنو هاي شمسويه 
ريم : ست فائزة كالت صيري مراقبه الصف والي يسوي وكاحه سجلي اسمه
سليل : تسجلين اسمه مو توكفي على السبوره وخالسه الصف كله
ريم : مو اني سجلت ثلل بس الورقه مكفت كلهم وكح وكفت المتسجل اسمهم على السبوره حتى الست تخليلهم صفر لان وكحين

سليل : مسحت وجهي بقله صبر ولج مو صارت الفرصه وخطيه خلي يطلعون ياكلون ويرحون للحمام
ريم : مياكلون ليش وكحين وميسمعون كلامي الست فائزة كالت اذا مسمعو كلامج عاقبيهم
سليل : وانتي كطعتي الفرصه عليهم ولج من اشتعلتي على هاي الوكاحه
ريم : ثلل تره اكول للست عليج متسمعين كلامي
سليل : باوعت على الطلاب وخطيه كلهم صف اول وخايفين وبيهم حتى الدمعه بعيونهم  كتلهم يله للفرصه وكلها صاحت هييييي  وطلعو يركضون عبالك سجناء وحررتهم  وهاي ريم اوكعيلهم دك بلعوده جريتها منها ولج ليش
ريم : ثلل والله هسه الست تحجي علية ليش طلعتيهم
سليل : ولج انتهى درس ست فائزة وانت حابستهم المديره لو تدري تعلكج من اذانج
جان تلزم اذانها
لا لا اذاني صغار بس هم من تجي الست اكولها اختي ثلل طلعتهم
سليل : اني الاعرفه ابو الصف الاول يخاف يبجي اله انتي ولج متخافين الطلاب تتجمع عليك وتكتلج
ريم : الي يگتلني اصيح رشا وجنات يكتلوه
سليل : واني ليش متصيحيني
ريم : انتي جبانه تخافين
سليل : والله صدك اكبر منكم واخاف اله انتن ولا تخافن مو بنات شياطين
ريم : انحصرت اروح للحمام وتكمز
سليل : والله كون احبسج مثل الطلاب حتى تشوفين شسويتي بيهم
دفعتي وركضت ماادري اضحك على سوالفها لو اخاف منها

رجعنا للبيت وبراس شارعنا وذني ويايه يكمزن لمحنا ولد حوالي ٤ كامشين طفل ودك ضرب ركزت زين واشوفه حسين ابن عمو علي هو ويانه بلمدرسه بس نادراً مااشوفه لان سياره تودي وسياره تجيبه جان مرحله ثاني ابتدائي بعدني واكفه ومااشوف غير جنط تنشمر بلكاع وركض اباوع البنات ركضن علمودة واصيح ولكم تعالو وهنه ولا يمهن ويتضاربن ويه الولد صح جنات ورشا اكبر من الولد بس ريم اصغر منهم وضربه بضربه وياهم اني خفت عليهن ركضت همه شافوني طفرو
من خوفي عليهن عطت بيهن بله هاي سوايه شون تشمرن الجنط وادخلن عركة
رشا .. لعد نشوفهم يكتلوه دشوفي شحاله مهلس جنه بيبي انعام من تكعد من النوم وذني يضحكن
سليل : وجع كافي مااسمع صوت الكم
حسين : وكف وعاط بيهن انتن شعليجن موعيب بنص الولد تتعاركن
ريم : غير كتلوك
حسين : مالكم دخل
ريم : طبك مرض
حسين : مرض الي يمرضج
وبثواني جان تشيل ريم طابوكه من الكاع واركعيها براسه وطفر الدم اني متت رعب يعني اربع جهال مأذوه لحسين وهاي ريم بطابوكه فتحت راسه وكام يكمز الدم خوفهن كلهن واني لزمت راسه حيل وكام يبجي وريم من شافت الدم ختلت وره رشا
سليل : بس ارجع اذا ما اكول لبابا
اطلع لسانها وتعيب على حسين الغركان بدمه ركضنا للبيت وهنه ورايه وصلت للباب رجعت الرهبه بگلبي
جنات : تعالو ادخلو
رشا .. بابا ميقبل
ريم : بيبي تضربنا
جنات : بيبي حبابه يله سليل
حسين : اريد امي ويبجي
ريم : تعيب واطلع لسانها وتغمه وتكوله يبجي ويريد امه ضربتها حيل على جتفها هسه غير تكعد راحه وبسبب عياط حسين طلعت بيبي وامه وذني لطمن من شافنه

انعام : يمه حسوني ولجن شبيه
كلها سكتت وهو يبجي
انعام : ولجن بنات طه شسويتن بلولد والله الي طخته منجن اله ازين شعرها صفر مباشره عاطت ريم ولزمت شعرها مااا شعري وجان تلزمها من كصيبتها حيل هاي انتي مو
ريم : عوفيني كامت تبجي من الخوف
سليل : بيبي عوفيها وسحبتها من ايدها
انعام : بنات الگلب مخلصنا من ابوجن هلمره انتن
سليل : حزت بنفسي تسب ابويه كتلها لتغلطين علية
انعام : خوش والله بكد القنادر وتوكف بوجهي اي عيني بنات سندس شترجى منجن
ختلت ريم ورايه وتصيح خلي نروح للبيت
انعام : تعاي انتي يزركه مثل امج جلحه ملحه ليش ضربتي
سليل : مضربته
انعام : بيبي حسوني هاي الزركة ضربتك مو
تباوع ريم بحقد علية وكأنه تتحلف اله
حسين : لا بيبي مو هيه ولد ضربوني
انعام : ولك لتخاف هسه اكسر عودة الماسحه على راسهن بس احجي
رشا .. مو كلج مو احنا لو بس تردين تضربينا
انعام : ولج انتي ياهو منهن خوش والله سندس مربيه حيايه وحدتهن لسانها اطول منها
سليل : امشو
انعام : اوكفن ولجن الي توصل يم حسين اعلكها بلشباك واكطع شكو صونده عليها
رشا .. فوك مدافعنه اله بعد لو يموت مالنه علاقه بيه الجبان
انعام : اسكتن بنات سندس وحده ترفع وحده تكبس وانتي جان تلزم جنات من اذنها جم مره كتلج مالج دخل بيهن لتمشين وياهن ليش متسمعين الكلام

جنات : اااخ بيبي اذني
رشا .. عوفيها
سليل : جريت ريم ورشا وخليتهن ورايه جان اسمع صوته شبيج يمه تعيطين صوتج للشارع واصل
جسمي ثلج واريد ابلع الريك من الخوف مكدرت اجه يتمشى صار سنتين مشايفته بيده كلاص الجاي يشرب ويتمشى
انعام : تعال يمه سلام شوف بنات سندس الحقيرات لازمات ابن اخوك وضارباته
سليل : بقيت فاتحه عيني واني ويه كل نفس يطلع منه احس شويه واخرب من الخوف طلع جان يشوفني باوعلي هم متفاجأ وهم بنظره استغراب على كره معرفت شون يباوع من فوك ليجوه صوت انعام فززني وهي تضرب جنات على ايدها وتجر بأذنها لان تمشي ويانا عيونه متت رعب منهن حتى مكدرت ابقى واكفه سحبت رشا وريم وطلعت اركض 

دخلنا للبيت بلكراج ذبيت الجنطة وكعدت بلكاع
رشا .. شبيج ثلل كومي
سليل : حطيت ايدي على وجهي واشهك
ريم : اله اكول لبابا عليها ثلل لتبجين
سليل : مسحت دموعي كولشي لتحجون اياكم وبعد مااريد وكاحه وخاصه انتي ريم كافي مشاكل شفتي من وراج دخلتينا لذاك البيت
ريم : ما اسوي شى بعد بس لتبجين
وشمرت ريم نفسها بحضني وتبوس بيه كمت وهم شايلتها شكبرها وتحب اشيلها
دخلنا للبيت جانت ماما يم انوار هاي الفتره تروح هوايه يمها وتعوفنا نرجع نلكه الاكل جاهز اصب واغدي اخوتي
بيومها حتى اكل مأكلت من الخوف تذكرت شسوه بية قبل سنتين وبقيت ابجي الليل كله
وساعه ١٠ سمعت عياط بابا وماما طلعت اشوف شكو وذني يركضن ورايه انداريت عليهن التطلع منجن والله اطيح حظها
ريم : بس نشوف حبابه
سليل : كعدن اقرن يله عطت بيهن طبن وسديت الباب وطلعت بأتجاه الهول اسمع ليش يتعاركون

حجي طه : انتي من كل عقلج كل فتره طالعه النا بشغله شكل هلمره تمتحنين سادس
سندس : اريد اكمل دراسه من حقي اني مخلصه ثالث متوسط اريد امتحن خارجي
حجي طه : وشسوين بيها
سندس :اكمل كلية واشتغل
حجي طه : وجهالج ولج اصغر طفله عندج عمرها سنتين هسه بدت تمشي حتى بعدها ممعتمده على نفسها وين توديها ومنو الها زين وجهالج كلهم مدارس منو الهم
سندس :قابل اني مسافره شو مكابلتك وكاعده وين اولي بس اكعد اقرا وياهم حالي حالهم هو جم يوم امتحن واخذ شهاده السادس
حجي طه : واخذتيها وبعدين
سندس : هسه خلي اخذها وراها شتريد اني حاظره
حجي طه :مو هسه گلتي اكمل كلية واشتغل هو وينه الشغل بهاي الرواتب التعبانه
سندس : فدوة طه اقبل ومااقصر ابد
حجي طه : بيتج اولى بيج ماكو اكعدي واسكتي
سندس : هو انت دومك هيج فوك ممعيشني بلضيم متريد يصير براسي خير حتى لا اصير احسن منك
حجي طه : يعني هذا الهامج تصيرين احسن مني 

سندس : مو هامني بس اني من حقي احقق نفسي مو بس مخلصتها طبخ ونفخ وشغل تكول خدامه حتى الطلعه والشارع لحد امي وارجع اريد اشوف ناس اوادم خلصت عمري مكابله انعام ومصايبها ومشاكلكم
حجي طه : محد گلج گابلي انعام انتي دومج ماده راسج يمها وتردين تعرفين كولشي
سندس : طه بداعت بناتك بروح ابوك اقبل
حجي طه : كتلج لا ماكو
سليل : بيومها بقو فوك الساعتين وبقى بابا على رأيه بس ماما مستسلمت ويومين خلت البيت جحيم حتى غزل الصغير مخلصت من ايدها وضربتها عيشتنا بحرب مو طبيعيه لحد ما بابا بنفسه كال الها امتحني بس شرط عليها اذا شاف قصور منها يبطلها
استغربت تصرفات امي بذاك الوكت يعني احنا وضعنا تعبان وحالنا كوه مشي شتسوي بشهادة السادس

وره كم يوم طبت ريم وبيدها علاكة والايد الثانيه تاكل شى مثل دعابل صغار
شنو هذا البيدج
ريم : ضروك الفار طيب تاكلين
سليل : منيلج
ريم : عمو اشترالي
سليل : لزمت گلبي وركضت عليها ياعمو ولزمتها حيل وهي خافت وارجف واحجي ولج ياعمو
ريم : عمو سجاد
سليل : هديتها وكعدت بلكاع من الرجفه تذكرت حالتي
ريم : شبيج ثلل متاكلين والله طيب وهاي العلاكه كال الج والنا بس بيها نفاخه مالتي جبيره
سليل : كولشي مااريد جنت خايفه لدرجة حتى عيوني سديتهم
ريم : نمتي
سليل : ولج روحي اكلي بعيد عني لتكرطين يم اذني
ريم : طيب والله هاج
سليل : كتلج مااريد صدك وين شفتي عمو الوحش
ريم : يمه ياعمو وحش
سليل : قصدي عمو سجاد
ريم : بلشارع وطالع شرطي كتله احبس ذوله الولد ضوجوني
سليل : مو شرطي عسكري ياثوله
ريم : اجه ابو الموطا اشتريلي ثلل حبابه
سليل : كل هذا البيدج وتردين بعد
ريم : موطا حبابه وكامت تكمز
سليل : ماعندي فلوس خلصت
طلعت تركض وركضت وراها بوكتها فايت ابو الموطا تبدل نعال او شحاطه او حذاء اي شى نايلون بموطا وريم تركض على نعالاتنا جريتهم من ايدها ولج شسوين
ريم : اريد موطا
سليل : ولج واحنا شنلبس
ريم : البسي مالتي وجان تنزعه
سليل : سحبتها من ايدها كوه ودخلتها وهي تعيط اريد موطا اسمعي لج اذا ماما عرفت والنبي تشبعج كتل هاج العلاكه كلها حلويات اكلي التردي بس موطا ماكو

عفتها وصعدت للسطح اختنكت من وكاحتها وكاحه رشا واني اخاف عليهن وجان اشوفه واكف ولازم طيره بيده وشواربه وشعره ماكو مزين  ردت ارجع انزل جان يكولي
سجاد : ماعندج لسان تسلمين لو كبرتي وخرسيتي
سليل : انداريت علية شونك عمو
سجاد : زين وانتي شونج
سليل :  الْحٍمَدٍ للـّہ
سجاد : وصلتج العلاكه لو الزيبك الصغيره اكلتهن كلهن
سليل : لا وصلت شكراً
سجاد : شونج بلدراسه هلسنه بكلوريا
سليل : اي
سجاد : زينه درجاتج
سليل : اي  الْحٍمَدٍ للـّہ زينه كله ميات بس درسين ٩٨
سجاد : عفيه بلسباعيه ادرسي زين حتى اجيبلج هديه
سليل : ما اريد شكراً
سجاد : شبيج وضعج شو مو طبيعي
سليل : لا مابيه كالو بلعسكريه صار شكد
سجاد : اي بس انزل جنت بين فتره وفتره
سليل : ما اشوفك
سجاد : ايي بس اني اشوفج
سليل : هااا اروح انزل
سجاد : انزلي ودري بالج على نفسج
سليل : وصلت لباب البيتونه ورجعت كتله عمو
سجاد : هاا كولي
سليل : شفت عمو سلام وخايفه منه
سجاد : لتخافين ميوصلج بعد مو كتلج
سليل : صار هوايه مشايفته
سجاد : لتخافين منه واذا صار شى اني موجود
سليل : شكراً ونزلت ركض

سجاد : طول فتره التحاقي وبالي يمها بس الي طمني من جنت اخابر عمتي مناك وتشكيلي حال سلام التعبان ضامن ميسوي شى طول هاي السنتين بلعسكريه من انزل امر للمدرسه اشوفها من بعيد همزين البنات وياها بس احسها دوم مهزوزه وتعبانه بس اكيد افضل من قبل كبرت قبل اوانها حتى خجلها زايد اكثر من قبل مردت اتقرب منها حتى لتتعب اكثر ما هي تعبانه
بس اليوم تقصدت ادز بيد ريم واشوفها كولش ارتاح من احجي وياها وخاصه صار سنتين هي مشايفتني بس عيونها دوم حزينه

ثاني يوم جمعه والكل متواجد بلبيت وكاعده وفات ابو الموطا كلت اهو راح تبدي ريم سوالفها بس استغربت مإجت اول تالي
وجان اشوفها خاتله وره البيت وبصفها حسين وياكلون موطا عطت بيهم ولكم شسون حسين ذبها وانهزم وهاي تاكل ولا يمها لزمتها من كصيبتها منيلج فلوس
ريم : ااااااخ ثلل اذيتيني
سليل : اذا محجيتي اكول لبابا خلي اروح اصيحه خافت وبطلت تاكل
ريم : اجه ابو الموطا ردت اخذ نعالاتكم خفت لا ماما تكتلني
سليل : اي
ريم : تذكرت بيبي انعال
سليل : عيب كولي انعام
ريم : ماااا انعال
سليل : عيب ريم والله اذا سمعوج يطيحون حظج
ريم : مااا اكرهه من تشوفني تجرني من اذني ومن شعري وتكولي زركه ملحة
سليل : منين اشتريتي الموطا لتغيرين الموضوع
ريم : شفت الباب مفتوح ودخلت على كيفي لكيت باب المطبخ نعالات وشحاطه بيبي شلتهم كلهم بحضني وركضت لأبو الموطا وانطاني اثنين موطات وتضحك
سليل : لطمت على وجهي عزه العزاج
ريم : بس هذا الزمال حسين شافني واخذ وحده مني وكال اذا منطيتيني اكول لبيبي واخذ الموطا الحمره واني الصفره هاج ضوكي

سليل : لا انتي حيل تخبلتي جريتها من ايدها لبابا
حجي طه : شبيج سليل ويه اختج
سليل : تقبل بابا ريم هيج تسوي وسولفت شسوت وبيومها بابا ضربها على ايدها وعاقبها متشتري اسبوع كامل وكلها هسه الله يذبج بلنار لان بگتي برطمت وبجت وحتى بوجهي متباوع
سندس : هي الجنة لأنعامو مكافي باكت ورثك قابل ريم شماخذه
حجي طه : ولج مكان متعاقبيها تشجعيها
سندس : مالي دخل انت وبناتك اني ورايه قرايه عافتنا وطبت للغرفه

ريم : بعد ما احبج ثلل
سليل : لتحبيني عيب السويتي
ريم : زاعلتج وحطت اصبعها الصغير بحلكها واعلنت الزعل
سليل : احسن حتى ارتاح من مشاكلج
رشا .. ولج ريم شون متاكلين وتذكريني
سليل : باع الثانيه تعرفين اختج باكت حتى تاكل
رشا .. هنه نعالات وفوكاها مال بيبي انعام يصير حلال
سليل : منو كال هيج يمه
رشا .. ماما
سليل : اروح اقرا ورايه امتحان
ريم : مااحبج ثلل زاعلتج
سليل : والله افتهمت زاعلتيني تالي بليل اجت نامت بحضني حيل اخاف عليهن حتى من وراهن ما اغيب من المدرسه اخاف احد يسوي وياهن مثلي

وره كم شهر استلمنا النتائج والحلو ماما ويانا ناجحه جانت تمشي واطك اصبعتين وفرحانه اكثر من عدنا
بابا مكال شى بلعكس حسيته فرح الها وحتى بيومها طلعنا تعشينا بلزوراء صار سنين مطالعين گال ماطول كلكم ناجحين بس احس ماما بالها مو يمنا حتى من تضحك احسها هيج بس حتى منحس

رحت للاول متوسط واخيراً خلصت الابتدائيه بس بالي يم ذني منو بعد يبقى وياهن جنات بقت رغم الكتل التاكله من بيبي بس باقيه ويه رشا وريم داومت اباوع للصدريه جديده وجنطة جديده وقميص جديد اول مره البس كولشي جديد جان بابا عنده صندوك يلم بيه وشرط على ماما اني اول وحده تشتريلي
وداومت بس متعرفت على اي صديقه بقيت منعزله مدرستي بعيده عن مدرسة البنات ومن ارجع طول الطريق مدنجه واخاف من خيالي طبيت للبيت اصيح على ماما دخلت وشفته كاعد على القنفه رجعت ليوره من الخوف والجنطة وكعت من ايدي
سلام : هلا بعمو سليل شونج
سليل : باوعت خفت لا ماكو احد بلبيت طلعت ماما من المطبخ
سندس : شبيج ولج وجهج اصفر
سليل : هااا مابيه شى وركضت جان يصيح
سلام : متسلمين على عمج
سندس : ولج ادبسسز غير تسلمين علية
سليل : ركضت وطبيت للغرفه ارجف وابجي
سندس : لتضوج منها تعرف تستحي وكبرت مو مثل قبل
سلام : عادي اعرف هاج فلوس هذا الشهر
سندس : والله مااعرف شون اشكرك صار ٣ اشهر المصرف الي تنطينياه فايدني كولش
سلام : اهم شى طه ميعرف
سندس : اكيد شون اگلة شيخلصني
سلام : اي احسن مااريد يتحسس تدرين بيه
سندس : تعلمني ب طه موتنا
سلام : بناتج الباقيات وين
سندس : شويه ويرجعون
سلام : خلي اني اطب اسلم عليها خطيه تستحي
سندس : صدك كذب البيت كله كدامك غير عمها انت واني اروح اكمل الغدا
سلام : دقايق واطلع
سندس : يابه براحتك

سليل : كاعده وحاطه وجهي بين رجليه وابجي وانفتحت الباب مرفعت راسي كل اعتقادي لو وحده من البنات لو ماما بس حسيت انمدت ايد جبيره طفرت لكيته كاعد بصفي خفت كمزت جان يسد حلكي
سلام : اششش كلمة وحده اطيح حظ حظج راح اشيل ايدي صوت واحد اسمعه حتى خواتج أذيهن
سليل : أشر براسي لا لا يعني مااطلع صوت
رفع ايده من حلكي ورجعت ليوره
عبالج تفلتين بسوايتج شون تكولين لسجاد ع الصار
سليل : مااكدر حتى انطق من الخوف بس عيوني تصب دموع
سلام : حسابج مخلص ويايه الا اطيح حظج وحظ ذاك العااار اني هيج تسوون بيه بعيني
سليل : فدوة عمو لتسوي شى
سلام : اني يخليني سنه كامله من مستشفى لمستشفى حتى بس اعالج نفسي ورجولتي
سليل : شنو رجولتك
سلام : بعدين اكولج شنو رجولتي عندج باجر الصبح مترحين للدوام تجين لذاك البيت ادخلين للحديقه گبل وتذكرين ذيج الغرفه اريدج هناك ساعه ٨ الصبح وره ميطلعون الجهال تجين

سليل : كمت طفرت من الجربايه عفيه عمو عوفني ابوس رجلك
سلام : اششش صوتج وجع اسمعيني زين لو انتي لو رشا لو ريم اختاري واعرف شون اجيبهن لو نسيتي
سليل : اكول لبابا عليك
سلام : يله روحي كوليله وتره سجاد ماكو يحميج مني
سليل : شتريد مني وكمت الطم على وجهي
سلام : لتخافين بس اسولف وياج
سليل : ماا اجي
كام وكف وكال براحتج لتجين خواتج موجودات عافني وطلع كمت ارجف وين اروح عمو سجاد وينك تعال فدوة

الليل كله ابجي وبطني تلويني من الخوف خاتله جوه البطانيه وريم ورشا بس يباوعون صاحو ماما حتى تفتهم شصاير بيه هي مدارت بال وكالت تلكوها ماخذه درجه قليله بلدرس وتبجي متدري بتها كعد ينتهك عرضها ومن منو من عمها صار الصبح واني عيني مغمضت لبست صدريتي واني عيوني تصب دموع والبنات صافنات علية بوقتها حالي حال الميت شون اروح برجلي واخاف ما اروح يأذي خواتي وخاصه ريم بجگليته تروح تركض
طلعت من البيت امشي بلا وعي يحجون مااجاوب لكيت باب بيتهم مفتوح بقيت واكفه بلباب حوالي خمس دقايق تمنيت انعام تشوفني او اي احد من البيت بس بهذا الوقت بلذات ماكو احد

طبيت رجل تقدم ورجل تأخر  وصلت لنص الحديقه وكفت اباوع نفس المرجوحه نفس الصار عبالك البارحه بس الفرق هسه افتهم شنو السواه عمي بذاك الوقت صح مو كولشي اعرف بس اعرف سواه حرام وعيب
كم متر بيني وبين ذيج الغرفه الي اكيد عمي بيها وراح يستغل كولشي ويجوز هلمره يأذيني اكثر لمحني من بعيد ويأشر تعالي ردت اذب من راسي من اللعبان النفس والقهر البيه باوعت هيج ورچلي جامده وكل مسامه بيه ترجف من الخوف وجان اركض اطلع من البيت مثل المخبله

يتبع ..