رواية ابي والغزلان للكاتبة ريام هادي (REEM) الفصل الحادي والعشرون 21 - بقلم الناشر آدم العربي

#رواية_أبي_والغزلان
#للكاتبة_Reem_ريام_هادي
#الجزء_الأول
#البارت_الواحد_والعشرون
#مدونة_نور_قلبي

شجاني وما حضنتك قبل متروح
عفتني وغيبتك صارت طوويله
شجاني وما كلتلك الله وياك
وبقيت اتانيك ليله بأثر ليله
رحت بس من رحت خلصت الدموع
وشلت الروح بيدي فرد شيله
ونسيت الابتسامه وفرحت العيد
لان ضحكاتي بغيبتك صارت قليله
بعد هم عيني تفرح يوم ملكاك
لو جمعتنه صارت مستحيله

سليل : طلعت اركض من البيت ودموعي عشره عشره امشي وامسح بيهم بطرف البلوز اللابسته لهسه اتذكر جان شهر ١١ سنه ١٩٩٥ الجو بارد بس مال بلوزات ابو الرگبه رغم بيها بروده وصبح بس اني من الخوف احس جسمي نار گابه بي خفت ارجع ادخل للبيت ليطب ورايه وخاصه بهيج وقت او ماما طالعه لبيت بيبي وتاخذ غزل وياها لو تلتهي بلشغل لو تخلصها يم خاله انوار گلت اروح للمدرسه احسن امشي وحدي الشارع يصوصي ولا الطير لان الكل طبت للمدرسه وصلت ولكيت باب المدرسه مقفول والحارس بلباب
عمو فدوة افتحلي الباب
بتي اتأخرتي وممنوع المديره وره ساعه ٨ محد يطب وهسه ساعه ٨ ونص الاخمسه شون ادخلج
سليل : فدوة عمو امي جانت مريضة وتخربطت وبس صارت زينه اجيت اول مره اضطر اكذب بس حتى ادخل للمدرسه حسيت المدرسه بوقتها المكان الوحيد الامن من عمي حتى بيتنا الي مفروض امن مكان بلدنيا فقدت الامان بيه

بقيت ابجي اصلاً هنه دموعي منشفن وهو انقهر علية وخاصه مبينه مو من البنات الي يدورن تأخير واول مره اصلاً اتإخر اخذني وداني للمديره
ليش متأخرة
سليل : ست امي تخربطت وبس صارت زينه اجيت
انتي صف الاول الف
سليل : اي ست
اخذت ايدي وضربتهم عودتين قويات شكد جانت قويه الضربه والجو بارد محسيت بقوتهن لان البيه اعظم خوف ممكن البنيه تمر بيه اكيد عوده او عودتين بالايد متسوي شى ولا تأثر مقارنه بأحساسي هسه
اخذت جنطتي ورحت للصف دخلت والدرس الاول بادي بقت الست تشرح واني بالي مو يمها بس عندي شعورين الاول كم ساعه راح ابقى بأمان من عمي والشعور الثاني شراح يسوي بيه لان عفته وانهزمت
والله لو اعرف اذب نفسي من السطح ومااخلي يطخني بس خايفه حيل احس الخوفه مو بس بگلبي وروحي احسها حتى بعظامي

طلعت بلفرصه فتحت الجنطه اريد اكل لفتي باوعت عليها مكدرت احس حتى نفسي تلعب من الخوف رجعت لفيتها وخليتها بلجنطه وكعدت على الدجه مال الساحه وحاطه ايدي جوه خدي واباوع على البنات شون يكمزن ومرتاحات ومتونسات واهم شى يحسون بالامان الي اني فاقدته محسيت غير وحده بصفي باوعت عليها اعرفها بمرحلتي بس حتى سلام ماكو بينا
جان تكولي
انتي ليش كاعده وحدج

سليل : انداريت عليها عادي احب اكعد وحدي
بس عيونج مدمعه وحمره بيج شى ليش جنتي تبجين
سليل : عفيه عوفيني وكومي
اني اسمي بتول وانتي سليل مو
سليل : انتي مو تعرفين اسمي
بتول : مو قصدي اضوجج بس والله احب اكون صديقتج مرات اشوفج كاعده وحدج وماعندج صديقات
سليل : ما احب يصير عندي صديقات
بتول : ليش متحبين والله جربي متخسرين شى تردين اعرفج على صديقاتي والله راح تحبيهم وتحبيني لتبقين هيج وحدج اتعبين
سليل : صفنت عليها وكتله والله مااريد صديقات لتضوجين مني بس احب ابقى وحدي
بتول : على راحتج بس شوكت متحتاجين شى اني موجوده وبيتنا گبال المدرسه ذاك تشوفي العالي بيتنا اخاف تغيبين تحتاجين دروس اني انطيج الواجب عدكم تلفون
سليل : لا ماعدنا
بتول : مو مشكله من تحتاجين دليتج بيتي اعوفج وحدج
كامت وعافتني رغم لطافتها وحجيها الحلو الهادئ بس اني ما اريد صديقات ولا اريد احد صرت حتى ما اتقبل الناس

دك جرس الطلعه ويه دكته احس روحي راحت ساعه وحده بس بقيت بدون تفكير وبدون خوف قبل اخر درس لان امتحان عندي مفكرت بشى بس بالامتحان وبعدها رجعلي الخوف وخاصة من كالو للبيوت تكول عبالكم كالو للموت رجعت امشي على كيفي وكل خطوه احسها نار وتلسع برجلي مدنجه وامشي واكول كون هسه اموت حتى ينتهي كل الصار وصلت قريب البيت وارفع راسي واشوفه واكف بلباب وحاط تك ايد بجيبه والثانيه يشرب جكاره بيها ويباوع على الرايح وجاي واني لازم امر من يمه حتى ادخل بيتنا بقيت واكفه حوالي دقيقتين واباوع شون اوصل لبيتنا وجان اشوف البنات جايات ريم وجنات ورشا هنه مو اصغر مني بس والله بلحظتها حسيتهن هنه حمايتي واماني
ريم : هلو ثلل ليش واكفه
سليل : هااااا مو شفتكم من بعيد وگلت خلي انتظركم
رشا ..بيج شى
سليل : لا مابيه
رشا .. يله امشي للبيت
سليل : لزمت ايدهن واني امشي وعينه علية بعد ما لمحني ويه البنات اكيد راح يسكت وصلنا لبيتنا فاتت جنات حتى بدون متسلم علية طخت بالي گلت بس لا هم يسوي شى موزين وياها ليش مسلمت علية
جان يكول
سلام : هله بلحلوات شونكم اني ساكته وارجف اخاف اطب واعوف البنات وحدهن مااضمن شيسوي بيهن
ريم : هلو عمو
رشا .. هلو عمو
سلام : وانتي سليل شو مسلمين
سليل : هلو عمو كوه طلعت من حلكي عيوني علية
يله بنات خلي انطب
سلام : وين خلي اسلم على بنات اخويه ليش تركضين
ريم : عمو كول لحسين بس تشوفك ريم اله تكسر راسك بلعوده شون ياخذ الطباشير الملون مالتي
دنج سلام لمستوى طولها
ياطباشير
ريم : كوه لكيت اللون البسفسجي
سلام : يالون
رشا .. قصدها البنفسجي
سلام : هاا اي كملي
ريم : وهذا الزمال حسين كال بس اشوفه واني صدكتة واخذه وانهزم دورت المدرسه عليه كلها بس هو ختل بحمام الولد ادري بيه جبان
سلام : ههههه وانتي سباعيه وراح تگتليه
ريم : خلي بس الزمه اله اكتب براسه واسوي طباشير بسفسجي

سليل : امشو ندخل وسحبت البنات من ايدهم احس بعد لحظات اذا بقيت واكفه يمه اخرب من الخوف
رشا .. اااخ ايدي ثلل شبيج
سليل : دفعتهن للبيت وطبيت ركض للغرفه حتى بدون مااسلم وبدون ما ابوس غزل المتعلمه ابوسها بلطبه والطلعه
ريم : شبيهه ثلل
رشا .. مااعرف اخاف ممجاوبه بالامتحان هي البارحة مقرت
ريم : خلي اروح الها ابوسها وانطيهه الحب الي اشتريته شكد طيب ومالح اخذته من ام سعد العميه
رشا .. ولج مو كتلج الحب مالتها بيه دود شون تاكلي
ريم : شبيه طيب ومالح وكولشي مابيه خطيه متشوف الدود ويمعوده من تگلي على الجوله حتى الدود يطير
رشا .. هسه يصير دود بطنج من وراها
ريم : يمه دود بطني وركضت تشرب مي هوايه
رشا .. شكعد تسوين
ريم : اغرك الدود حتى يموت
رشا .. ولج ميغرك يبقى بطنج
ريم : لا هسه يغرك شوفي وتضرب على بطنها
رشا : هاي شسوين
ريم : اخاف وحده خاتله حتى يوصل المي الها وتغرك
اي غركي بس بعد لتشترين من هذا الحب
ريم : اذا دود يغرك ويموت ليش ما اشتري
رشا .. ااااخ من راسج اليابس
ريم : تحط على راسها مي
رشا .. ولج شكعد تسوين
ريم : انكع راسي حتى يصير لين
رشا .. ولج ثوله قصدي عنوديه هسه ماما تكتلج نكعتي شعرج
ريم : اني شعليه انتي كلتي يابس اخليها تكتلج الج
رشا .. امشي ولي خلي اروح ابدل جعت
ريم : ام كرش بس تاكل
جان تلزمها من شعرها
رشا .. اني مو كتلج لتكولين علية ام كرش
ريم : العفو العفو اني ام كرش
رشا .. اذا عدتيها اكول لماما عليج
ريم : سكتت

سليل : كافي تتعاركون شبيكم ركضت ريم بحضني
ريم : ثلل هاي نكعتني شوفي
سليل : ليش رشا مو الجو بارد وهسه تتمرض
رشا .. والله جذابه هي ذبت المي على راسها ولج ليش تجذبين
سليل : ريم احجي الصدوك منو نكعد راسج
ريم : هي كالت راسج يابس وذبيت المي على راسي
سليل : اني مو كتلج بعد لتكذبين خلي اشوف ماما وين واذا سألتج شتكولين الها
ريم : رشا نكعتني وركضت للطابق الثاني ورشا تركض وراها
عفتهن مالي خلك احس راسي راح يطك وذني من الوكاحه ميملن لا شقه ولا عركات

دورت للبيت على ماما ماكو شنو سالفتها هاي الفتره هوايه تروح يم انوار وحتى كامت متنتظرنا مثل قبل صح الاكل جاهز بس على الاقل جنا نكعد ناكل سوه هسه ناكل اني وخواتي وحدنا
اجه بابا اسمع صوته وصوت البنات شون حاضناته ومكيفات برجوعه مكدرت اطلع لان عيوني تعبانه واخاف يشوفني شويه وسمعت صوته
وين حبيبة ابوها
مسحت عيوني زين واخذت نفس وطلعت
حجي طه : تعالي ولج اول تالي متجيني
سليل : حضنته حيل عندي امتحان واقرا
حجي طه : شو باعي شبيج حبيبتي
سليل : مابيه
حجي طه : على ابوج تكذبين
سليل : لا بابا مابيه
حجي طه : اخاف امج ضاربتج شى
سليل : لا اصلاً مشفتها لماما
حجي طه : ليش وين جانت امج
سليل : اكيد يم خاله انوار جانت
حجي طه : سندس وينج
سندس : هااا طه

حجي طه : شنو سالفتج هاي الفتره مكابله انوار وكاعده
سندس : الله اكبر حتى هاي ممنوع شمسويه هي يمها وكاعدين نسولف
حجي طه : والبنات عايفتهم
سندس : كبرن شكو عليهن والصغيره ويايه والاكل جاهز شرايدين مني
حجي طه : انتي من كل عقلج تحجين شنو شرايدين منج غير انتي ام البيت ومن يجون الجهال تكونين موجوده
سندس : اعتبرني موظفه طالبه ومن يجون ميلكوني
حجي طه : وراج موال جديد مو هاي سالفتج مو خاليه
سندس : اريد اكمل كلية
حجي طه : ياكليه
سندس : اي كليه المهم اكمل مااريد ابقى بس شهاده سادس اني عندي طموح واريد اكمل
حجي طه : سليل بابا اخذي خواتج وطبي جوه
سليل : صار بابا سحبت البنات الي صافنات على الكلام مثل العاب ولا يرمشن اعتقد ورثن صفة الفضول من ماما لان يموتن على هاي السوالف

بس اني هم گتلني الفضول رغم ما احب اتسمع على الكلام بس حاسه ماما وراها شى واني من الخوف مااريد مشاكل
سندس : لعد مو اخذت شهاده السادس شسوي بيها انكعها واشرب مي مالتها
حجي طه : اني مكتلج كملي سادس ومن الاول كتلج متحتاجين السادس بشى
سندس : وهسه احتاجيته
حجي طه : سندس من الاخير لوين تردين توصلين
سندس : اني اريد اكمل كلية وراها اتعين
حجي طه : وين تتعينين وهي وينها الرواتب الي تستاهل الدراسه والتعين
سندس : مو ما اتعين على الحكومه
حجي طه : لعد وين
سندس : بشركه اهليه شافتلي انوار شغله هناك وشرط الدراسه

حجي طه : وهيج ضامنه انوار بعد اربع سنوات وره التخرج مكانج موجود
سندس : لا مو من هسه اتعين وادرس
حجي طه : والجهال والبيت
سندس : شكو عليهم واني مااقصر والبنات كلمن تشيل مسؤوليه نفسها
حجي طه : يعني الصبح دوام كليه والعصر الشركه مووو
سندس : وافق طه والله خوش فرصه اطور نفسي بيها
طه : عوفج من البيت الي اكيد راح تهملي ومن البنات الصغار الي اصلاً مهاماتج ولا غزل الي بعدها ترضع ولا اني رجال الي حقوقي الي اكيد راح تضربيها عرض الحايط عوفج من هذا كله مفكرتي منين مصرف دوامج اذا اني مدارس كوه موفر الهم واكثر الاوقات ميكفي ويرادلج فلوس لبس وملازم وكتب وكراوي ذوله منين اجيبهم واني فلوس قميص الي ممشتري
سندس : مااخذ كلشي منك
حجي طه : ومنين تجيبين
سندس : مالك دخل انت بس وافق
حجي طه : شايفتني كرن مو رجال حتى اخلي مرتي هم تشتغل بشركه اهليه وهم مااعرف منين تصرف وهم تريد اطب وتطلع طول اليوم ولازم مااحاسب انتي من كل عقلج اوافق على هاي المهزله

سندس : لعد تريد العمر كله اصير خدامه الك ولجهالك
حجي طه : ليش المره الي تربي جهالها وتراعي الله بيتها ورجلها صارت خدامه
سندس : شوف طه لتضل تحاول اطببني بشغلات مالي خلك نقاش بيها اني مرايده شى منك بس توافق على دراستي

حجي طه : دراسه ماكو وشغل وماكو وغصب عنج تكعدين خدامه على كولتج لبيتج وجهالج واريد اشوف يامره تكسر كلامي
سندس : يعني انت هم معيشني بلضيم وهم مترضى يصير براسي خير
حجي طه : اي اني واحد مااخاف الله عندي ملايين وضامهن عليج ومعيشج بجوع وقهر ارتاحيتي واريد اذلج وما اريحج يله شتردين بعد
سندس : بله استهزاء اعرف ماعندك والي تشتغله تنطي اليه
حجي طه : اذا تعرفين هيج ليش متنجبين وتسكتين من يوم متزوجتج وانتي تندبين حظج اذا اشوف يوم حلو وياج مقابيله سنه مر لا يوم سمعتج حمدتي الله وشكرتي دومج معترضه على قسمتج وعلى الرزق وحتى على الخلفه الي غيرج يتمنى اضفرها
سندس : اهوووووو وين طببتنا اني وين احجي وانت وين
حجي طه : من الاخير ماكو دوام اني واحد حقير واناني ومااقبل اداومين انجبي واكعدط اني اعرف ساس البله انوار اذا شفتج يمها وروح ابويه اكتلج كدامها واخزيج

سندس : وانوار شعليها يعني هم حبسه وهم ماكو. دوام وهم انوار ماكو
حجي طه : ايي وهذا اخر كلامي وخلي اشوف يامره تكسره
سليل : طبيت للغرفه بعد مسمعت كلامهم بوقتها انطيت الحق الهم اثنينهم لان بابا يخاف علينا اخاف ماما تهملنا وانطيت الحق لماما لان تريد تساعده بس الظاهر بابا كان يعرف ماما اكثر من الكل ورفض هذا الشى

وراها بقت ماما تحاول وتتعارك وهو بقى مصر على الرفض بقيت ادرس بس بنص عقل لان بعدني مناسيه سالفه عمو سلام
ثاني يوم طلعت ويه البنات خفت اطلع وحدي وهو ماكو حمدت الله مموجود ورجعت اقرا واركز واكول بلكت الله نساني وبعد ميتقرب مني ورابع يوم بلضبط اني بطبعي من ارجع من المدرسه اكل وانام اقل شى ساعه ساعتين وراها اكعد اقرا دخلت مثل باقي الايام اانام وطردت رشا وريم لان مينامون بس يتناكرون يم راسي
غفيت بعمق لان تعبانه جان عدنا امتحانين واني قبلها مجنت انام زين من وره الاحلام والكوابيس الي تجيني

محسيت غير ايد تنمد وترفع دشداشتي بلبدايه توقعت حلم بس من وصلت الايد لمنطقه حساسه طفرت ولميت نفسي بطرف الجربايه واتنفس سريع فتحت عين شفت عمو سلام كاعد يمي على الجربايه
سليل : شجابك هنا
سلام : عبالج اطفرين مني اني شكتلج قبل كم يوم هيج صايره متخافين
سليل : نزلت دموعي من الخوف عمو فدوة شتريد مني
سلام : اريد اشوفج عقوبه الي ميسمع الكلام كتلج متحجين شى رحتي كلتي لسجاد عبالج ناسيها الج
سليل : والله عمو هو گلي وعرف من جنطتي المشموره بلحديقه وراد يكول لبابا ومنعته
سلام : بعد الله ميخلصج مني وذاك الساقط المنحط سجاد اله اسوي بيه مثل مسوه بيه
سليل : ابوس ايدك عمو لتسوي شى بيه والله حرام وعيب
جان يمد ايده على صدري حيل كرصني وعطت وحط ايده على حلكي وجان يتقرب وانفاسه بوجهي اريد اتقيأ منه ومن الخوف الاحسه اريد اعيط واصيح ماما بس اخاف يسوي شى

سلام : شفتي شون اكدر اوصلج ولغرفتج
سليل : دموعي تنزل وهو يقرب انفاسه مني سمع صوت ابتعد انفتحت الباب ريم هو رجع لكعدته
ريم : هااا عمو مو كلت نشتري يله
سليل : يباوع عليه مثل الواحد يكول شوفي راح اخذ اختج طفرت من الجربايه من حلات روحي للكاع وركضت على ريم حضنتها وهي فتحت عينها مستغربه واشر براسي كله ولا خواتي وابجي
ريم : شبيج ثلل والله اشتريلج ويايه لتبجين
سليل : عمو فدوة بس هيج جنت اكول وهو افتهم جان يكولي
سلام : ماشي بس اتسمعين الكلام افتهمتي
سليل : اشرت براسي ايي اسمع
سلام : تعالي ورايه
سليل : لزمت ريم وطلعت وراه لكيت امي كاعده على التلفزيون تتفرج وبصفها حسام وغزل ورشا تقرا بلكاع

سلام : كعدتها خطيه شون نايمه نومه
سندس : مو كتلك تنام هيج وكت وراها تكعد تقرا عمج كال اكعدها حتى اشتريلها
سليل : اباوع على امي تكرز حب ولا دايره بال مفكرت شون يدخل علية واذا عمي بله مرفوعه ملابسي واني نايمه او كاعده وداابدل ولا يمها
سلام : باجر اخذ سليل بلسياره اشتريلها شغلات خوما تضوجين
سندس : لا عيني سلام ليش اضوج هي غير بت اخوك وحسبت بتك بس لو تاخذ البنات كلهن تسويلي فضل وهم اخلص من دوختهن
سلام : هاااا لا غير مره البنات وحده وحده صعب اخذهن كلهن واشتريلهن
سندس : بس مو تنسوني اشترولي شى
سلام : انتي الخير والبركه شون انساج تعالي عندي شغله وياج
اخذ امي وطلع للكراج فتحت البرده شفته انطاها فلوس ردت اطلع اخذهم من ايدها واكولها هذني الفلوس ثمن دخوله علية الغرفه وثمن تحرشه بيه واعيط واطرده بس اني اجبن من هيج

دقايق وطبت امي والفرحه شاكه وجهه والفلوس حطتهم بصدرها باوعت عليها وكتلها مااطلع ويه عمو
سندس : ولج بت الفكر غير عمج ويريد يفرحج فوكاها هذا لو عمي احير شاخذ منه غراض وفلوس
ريم : بعد مااحب عمو سلام عافني وطلع مشترالي
سليل : اشش انتي الثانيه وعوفي الشرايه وكتلج ماما مااطلع وياه لو اموت عفتها تعيط وطبيت ركض لليل بس ابجي اتردد اروح اكول لبابا لان سجاد ماكو
من كثر مخايفه صعدت بلسطح بليل ادور على سجاد تمنيت اشوفه موجود واكوله تعال انقذني انت مو كلت اني موجود لتخافين وينك

كعدت على طابوكاتي ابجي ابجي واباوع للسما الي بيها النجوم واضحه كولش وشون باجر وين انطي وجهي المن احجي
قررت الصبح اروح لعمه نهر لازم اكول الها ماما مستحيل تصدكني بس عمه نهر حبابه وتحبني وراح تصدكني
نمت والليل بس افكر شكول الها رحت للمدرسه واني فگري كله يم عمه رجعت للبيت وبطريق الرجعه مريت على بيتها دكيت الباب اسمع صوت جان باب المطبخ مفتوح واسمع شون عمتها تتعارك وياها على الشغل وخطيه عمه تبجي وتكولها والله غسلته وعمتها تعيط عليها وتكولها فوك ما عاكر هلمره وصخه
ايدي وكفت ومدكيت الباب هي بيا حال هسه خليت ورجعت امشي مدنجه راسي والقهر ياكل بروحي المن انطي وجهي وجان اشوفه گبالي

سلام : لتنسين اليوم ساعه ٥ اجيج
سليل : طبيت ركض للبيت وماما تصيح ومااجاوب
شويه وكبت العيطه طلعت اركض واشوف ماما لازمه ريم تريد تجويها بيدها
ريم : والله ماما هو شك شهادتي
سندس : شون تشكين شهاده اخوج
سليل : لزمت ايد ماما فدووة لتجويها بعد متسويها
سندس : ولج وخري لا اجويج الج وروح ابويه هاي وحده صلفه وكحه جم مره كتلج مالج دخل بغراضه
سليل : انداريت على حسام وشون واكف مسيطر وفرحان لان ماما لازمه سجينه وتحميها على النار
لك شنو هاي الحقاره انت تتحارش بيها ومن ادافع عن نفسها تروح تشتكي لماما
حسام : خلي تولي اخذت غراضي كسرتهم وشكت شهادتي
ريم : تبجي وتشهك وخايفه وتك ايدها بأيد سندس انت شكيت شهادتي لان اولى وانت كسول
سندس : تجين تكوليلي مو تشكيها شو تعالي

سليل : من شفت ماما تريد تجويها على ايدها كمت وضربت حسام حيل حتى يعيط وتحير ماما بيه وتعوفها
جان اضربه وادفع وصدك ثواني وگلب البيت عياط ماما مباشره تركت ريم ولزمتني من شعري وعت بكل قوتها ملختني تملخ كعدت بلكاع ابجي اني اصلاً بيه حسره وخوفه من عمو تكول لكيتها حجة حتى ابجي براحتي بدون محد يسأل شبيج
سندس : حقيره ولج مو هذا اخوج هلوحيد شعندكم عشره كل شويه وحده مبجيته كل شويه وحده حارگه گلبه طايحات الحظ اليوم اربيجن من جديد وخلي اشوف ياوحده منجن تمد ايدها علية لو على غراضة لا اكطع الصونده على ظهرها

ركضت للغرفه وخطيه البنات من الخوف ورايه كعدن بحضني ميخالف حتى لو أذتني المهم منجوت ريم
ريم : تبوس بخدودي وكامت جابت مشط وتمشط شعري على كيفها الي نصه تكطع بيد امي كاعده بلكاع ورشا گبالي تبجي ويايه وريم تمشطلي حتى تروح الكفشه
اااخ على كيفج ريم
ريم : هو مكفوش
سليل : عوفي اني امشطه واخذت المشط منها وكوه نزل اباوع خصل بلمشط مهتميت كمت من الكاع وتمددت على الجربايه وكورت نفسي وغطتني رشا وغفيت
حتى بدون غدا

شكد نمت مااعرف يمكن ساعه ساعتين مااعرف بس حسيت على صوت ماما العالي والقوي وهي تكولي كومي عمج اجه ياخذج
والله بلحظتها لو كايله كومي اندفنج عايشه اهون عندي مباشره دمعت وكتلها ما اروح
سندس : شو ترحين ورجلج فوك راسج
سليل : حبابه ماما مااريد اروح اخاف
سندس : من شنو صخام بوجهج
سليل : من عمو
سندس : خوش حجه ولج كومي عيب منه فوك مجاي يفرج ويشتريلج يله كومي
شكول الها بله يمد ايده علية شكول ياربي

بدلت بنطرون وبلوز وشعري مظفور مال الصبح ونزلت شفته شون كاعد بحقاره ينتظر صيدته طلعت وياه تمنيت بابا بهاي اللحظه اشمر نفسي بحضنه بس هو سودة علية بلشغل ميدري بته تنتهك طفولتها من اخوه
صعدت السياره كعدت بصفه بعد ماهو اشر اكعد يمه حتى السياره الي جنت امنيتي اصعدها حسيتها مثل مفرامه اللحم تفرم بيه وانطلق ودقايق ومد ايده على رجلي حصرت روحي بلباب ابجي بهدوء وخايفه وين رايح يوديني
بيومها كولشي مسوه بس جنت حاسته مستمتع بنظره الخوف والقلق المرعب العايشته وخاصه من يمد شويه ايده على رجلي او جتفي واطفر كل طفره مني جانت تخلي مستمتع لدرجه الابتسامه ساعه كامله واني ابجي واكمز من كل حركة لحد مشفت نفسي باب بيتنا ليش هيج سوه وشنو الستفاده ماادري نزلت ركض واريد اوكع على وجهي وصارت ماما بوجهي مستغربه من رجوعي من وكت وهم من حالتي

سندس : هاا عيني شو رجعتو وكولشي ممشترين
سلام : مقبلت بس تبجي رجعني ورجعتها
سندس : يااااا خرب ببليسج سليل مو وجهه خير على ابوها خوما ضوجتك
سلام : لا بس خطيه تبجي هوايه يله اروح وامر الكم غير مره
شويه وطبت ماما تعيط
ولج شجاج اني گلت هسه تحير شتشتري
سليل : طفرت من مكاني وسديت الباب حتى ليسمعون خواتي ولزمت ماما كلت لازم احجي
يوم عمو يمد ايده علية
سندس : شون يعني
سليل : كوه طلعت مني وبشهكه
يتحارش بيه
سندس : لطمت على صدرها صخام ولج شكعد تحجين
سليل : كعدت بلكاع وحطيت ايدي على وجهي وابجي وطلعت ماما تركض گلت واخيراً حجيت لازم تسويلي حل بعد مااكدر اعيش بهذا الرعب بس الصار وره نص ساعه خلاني جامده بمكاني

اجتي ماما تضرب بخبال بيه وتكول ولج ويامن جنتي اريد افتهم منها ماكو ضلت وجر شعر كوه طفرت من ايدها
سندس : ولج رحت صحت عمج وكتله صدك هيج تسوي تخبل من سمع وكال هو لاكفج ويه ولد واليوم بلذات طلع وياج حتى يفهمج الي سويتيه غلط وعيب وبعدج صغيره وكام يدك على راسه لان ذبيتي هيج تهمه علية وكال اله اكول لأبوها فوك ما رادت تضيع سمعتنا وسكتت الها بعدها بكد القندره ومراهقه وتمشي ويه الولد من تكبر شسوي وهاي تاليتها اتذب تهمه على عمها
ولج خزيتيني وراح تخليني علج بحلك انعامو كمت ابوس بيده حتى ميحجي لأحد صخام بوجهك سليل اليوم اله اذبحج

سليل : اريد افهم ماما كلامه كذب اريد اكولها هذا واحد حقير اسألي سجاد منطتني مجال نزعت النعال ودك على راسي على رجلي وظهري وخطيه اسمع بجي البنات بره

اريد اكولها هذا واحد ميخاف الله بس اسمعيني بس مع الاسف امي دومها بعيده عني وتصدك بلكل اله بيه استسلمت لضرباتها هي مقتنعه اني وحده ادبسسز وحقيره وضيعت سمعه ابوها وكل عمري ١٣ سنه لو يصير ١٨ شسوي متدري اني رجل دجاجه مااحل واخاف من خيالي المفروض امي لو الناس كلها تحجي علية تكذبهم وتصدكني
اسبوع مر عيشتني ماما بجحيم كل متشوفني تتفل علية كل متشوفني وصاحت اذا عرفتي عينج من الكاع احركلج وجهج مكالت لبابا حتى لتكبر وهم لتخسر عمو سلام والمصرف الي ينطي الها الي شفتها بعيني تنطي لأنوار تكول الها ضميهن فوك ذنيج معناها عدها بعد وضامتهن
اما بابا كل ميشوفني وسأل شبيج بابا ذبلانه وامي تجاوبه من الدراسه لو متاكل زين واني أكد على كلامها لان حذرتني احجي لبابا فد شى وسلام من يومها مشفته اما سجاد طولت غيبته جنت محتاجته بأكثر وقت من حياتي

اول ايام شهر ١٢ سنه ١٩٩٥ اليوم الي غير حياتي وحياة خواتي صبحت الصبح اروح للمدرسه بدلت ومديت راسي شفته ينتظرني صاحني تمشيت ليمه
سلام : هااا يحلووه انكتلتي خوش كتله اسمعي لج لتلعبين ويايه اتعبين بعدج صغيره مو بكد قندرتي وتحطين راسج براسي اليوم روحي للمدرسه باجر مثل ذيج المره تعرفين شنو مثل ذيج المره تجيني ساعه ٨ للبيت انتظرج بلحديقه افتهمتي ومتنهزمين
سليل : مناقشته بس حركت راسي بأي وداومت ورجعت عادي وهادئة بقيت كاعده للصبح سمعت طكطكه عرفت بابا كعد للصلاه وهم يروح لشغله طلعت شافني تفاجأ

حجي طه : هااا حبيبة ابوها شو كاعده
سليل : لزمته من ايده وبستها واخذته ويايه فوك السطح جان مستغرب من تصرفي بس يمشي ويايه صعدنا السطح وجان الشروق بعده
كعدت على الطابوكات وهو واكف صافن شبيه
شبيج بنتي صاير شى
بجيت ودنجت وكمت احجي كولشي بهدوء حسيت روحي اذا اروح لعمو الصبح معناها لو اموت نفسي لو راح اموت جوه ايده واذا مصدكني بابا اشمر روحي من السطح
شفت بابا كعد بلكاع من الصدمه وبس صافن وميرمش واني شويه باوعت علية لان اذا ابقى اباوع مااحجي رجعت دنجت وعيوني بلكاع الي انترست دموع مني واحجي واشهك لحد مكتله وهو منتظرني اليوم ساعه ٨
اباوع علية دنج وبقينا ساكتين بلربع ساعه واني بس دموعي تنزل خفت لا ميصدك جان يكولي روحي مثل مراد ومالج دخل

سليل :فتحت عيني بخوف شون اروح
حجي طه : روحي بتي اني موجود ميلمس شعره منج بس لازم ترحين
سليل : شمرت نفسي بحضنه وحضنته حيل كتله مصدكني بابا
حجي طه : كومي بتي اغسلي وجهج ومثل مكتلج روحي ساعه ٨ ولتحجين لبشر اي شى حتى امج اني راح اطلع كدامهم وكأن كولشي ماكو وراح تلكيني يمج
سليل : وماما شون
حجي طه : امج الصبح اصلاً ماكو اطلعي ٨ وتوجهي لذاك البيت وعوفي الباقي يمي

لحظات مرعبه وعقل طفله ممستوعب الي ديصير بس گلها أيمان بأبوها بأن راح ينقذها منه
نزلت وعفت بابا فوك ماانسى عيونه الي اختفت بيها كل معاني الحب والحنان والطيبه مجرد بركان خامد على لحظة وينفجر

لبست ملابسي واني كل جسمي يرجف وروحي مايعه بعز البرد وعركانه مشطت شعري وحطيت جنطتي على ظهري وطلعت بعد متأكدت من طلعه خواتي للمدرسه وفتحت باب ذاك البيت اخطو خطوات تغير حياتي وحياة خواتي وصلت للحديقه شفته كاعد على المرجوحه وبوجهه ابتسامه السم الغادره وهو يأشر براسه تعالي ورايه طبيت واني رجل تقدم ورجل تأخر وكل شويه تغوش عيوني من الدمع امسح وترجع تنزل  وصلت يمه
جان يكولي انزعي كولشي اريدج مصلخه كدامي ايدي ورجلي ثلجو واصيح بداخلي

بابا تعالي اني غزالتك سليل بنتك حبيبتك اول فرحتك تعالي بابا

وهو يتلمس كتفي وانفاسه برگبتي وبوجهي وتنزل ايده على صدري
ثواني والله مو اكثر ومااحس غير بابا يضرب عمو سلام ودمه يترس المكان

يتبع .....