#رواية_أبي_والغزلان_الجزءالثاني
#للكاتبة___REEM___ريام_هادي
#البارت_السابع_عشر
شَنهي گلبك ؟
حتى عَ العافوك حّن
وشَنهي صبرك ؟
گاعد اتاني المَواعيد الجِزّن
روح عِيش
المَنتظرهم عايشين
وذني العِيون انسّن
ناس مَلتهيه بِـ فرحها
وناس مَلتهيه بِـ حزنها
وكُل الگلوب التهّن
روح ..
بَس تَنسه جرحهم
احسب جروحك گَـضّن
يا غريب ارضه بِـ قَسمتك
عِيش وحدك لا تَدورلك وطّن.
رشا : بس گتله منهم يشعلان موافقه وكف
شعلان : لا بربج
رشا : قابل اكذب
شعلان : يعني اتوكل لابوج
رشا : بكيفك تريد تإجلها عادي
شعلان : من كل عقلج أجلها يله طبي لمحاظراتج واني رايح
رشا : وين
شعلان : لابوج هسه بوجهي
رشا : بس اكو شغله قبل متروح
شعلان : ياستار ياربي مو اني اكول مستحيل تريحيني
رشا : منتزوج اله اتخرج
شعلان : شنو لا كعد تتشاقين
رشا : والله مااشاقه
شعلان : بابا اني اريد اتزوج على روحي اليوم اريد اخذج وانهزم وهاي جاي تإجلني سنتين
رشا : مو سنتين هاي السنه مبقى شى وتنتهي
شعلان : رشا احنا هسه شهر ١٢ بعد ٦ اشهر يله تكمل هاي السنه وانتظر سنه يله عود اتزوجج يعني سنه ونص من كل عقلج
رشا : مااتزوج واني بعدني طالبه
شعلان : ليش هواي بنات تزوجو وكملو دراستهم وحتى بيهن امهات ويدرسن
رشا : هذا شرطي الوحيد اذا تحب ننخطب وبس اتخرج اي يوم تريد نتزوج
شعلان : واني مموافق وهسه نتزوج
رشا : لعد اعتبر موافقتي انلغت ومن رخصتك عفته وكمت مشيت وحتى منداريت عليه جنت مقهوره اني وافقت عليه لان عندي مشاعر بگلبي تجاهه بس دراستي اهم رغم انطاني وعد اكملها بس خفت لا وره الزواج يخلف هواي سامعه حالات بلبدايه بس هو وبس وراها من تصير بيته يحط رجل على رجل ويلغي كولشي وعد بيه مكدرت اجازف بمستقبلي تفكيره وضعه تخليني دوم متخوفه منه گلت اذا اريد اضمن شهادتي لازم احط هذا الشرط
طبيت للقاعه واخذت المحاظره جنت ابد ممركزه بس مجبوره احظرها ومن طلعت ملكيته اكيد راح انقهرت حيل بس هذا الحل الوحيد الي بنظري حتى اضمن شهادتي يريدني ينتظرني
رجعت للبيت ومحجيت اي شى كلت شغله وانتهت ليش افتح مناقشات بيها
سليل : شبيج رشا ليش ساكته وصافنه مو من عوايدج
رشا : ماكو شى ليضل بالج
سليل : اكيد
رشا : مكدرت اسكت وحجيت كلشي الها
سليل : انتي مقتنعه بتصرفج وشرطج
رشا : اي حيل مقتنعه
سليل : هذا هو لتضوجين الي يريد يضحي وهو بكيفه بعد سكتت شوي وكلت رشاوي طلعتي تحبي مو كتلج
رشا : هااااا لا مو احبه بس
سليل : انجبي بله مااحبه لتخليني اصيحلج ريم تستلمج
رشا : لا دخيلج كله ولا ريم شيخلصني هسه
سليل : اذا قسمتج ميصير لغيرج واذا مو قسمتج ربج يدزلج الاحسن منه
رشا : احلى شى بيج تنصحين الكل ومتنصحين نفسج
سليل : سامعه باب النجار مخلع هاي اني
ريم : اني اجيت
رشا : لا هله شكوو
ريم : هاي شبيج فوك متكوفين وتهلهلين وتصفكين لان اني اجيت مع الاسف عليج
رشا : شكو رئيس الوزراء اجه
ريم : يااا يروحلي فدووه هو بشنو احسن مني اقلها اني عندي شعر هو ماعنده
سليل : هههههه والله وكت جان منو يكدر يحجي هيج على الريس اذا ميجرون اهله لسابع جد وهسه ريم بكيفها تكمز وتحجي
ريم : همزين مجنت جبيره بذاك الوكت جان من ورايه كلكم انسحلتو واولكم رشا اكولهم المساعد الاول الي
رشا : اريد انام عوفوني مااريد اتغدا
ريم : لعد ضايجه لان ماشاء الله وراثه بهاي العائله الي يضوج يحط راسه وينام الناس اطير النومه من يختنكون من يضوجون الا احنا انام الك بيها حكمه ربي عائله شاخطه من گلشي
رشا : فدووه سليل اخذي هاي الجريدي وطلعيها بره مابيه حيلها
ريم : احد گلج عندي ذيل لو ماكله اكلج
رشا : ريم ابوس ايدج اعتقيني اليوم
ريم : حاضر يارشا ابنت ابي شفلحه
سليل : هذا منو
ريم : مو تكول عتقيني رجعتي لزمن الجاهليه وتذكرت عادل امام
رشا : شلون وين انخمد بلشارع
ريم : انخمدي رايحه اروح لعمتو اشوف شمسوين اكل احط راسي بلجدريه احسن مااحط راسي وياج يارشا بنت حويزق
شمرت المخده وطلعت اركض
رشا : مر يومين هدوء گلت هذا هو ليش اتأمل بعد معناها مراح لبابا ونهى الموضوع بس ليش احس بكسره وقهر حيل مخنوكه واريد ابجي و متنزل دمعتي
صليت المغرب وبعدني على السجاده وهستوني اريد اسبح جان اطب ريم تركض وكعت فوكايه
رشا : استغفر الله استغفر الله ولج ثوله غير تنتبهين
ريم : كومي مو كملتي
رشا : بعدني اريد اسبح
ريم : عوفي التسبيح لا اخنكج بلسبحه
رشا : شكوو شصار
ريم : خبر يسوه كيكه بلكاكاو والجوز وباكيتين نستله وصندوك ببسي مجرش ولفتين كص
رشا : هذا مو خبر مطعم
ريم : لا ذني حفظيهن لان راح تجيبيهن اليه وره مااكول الخبر الج
رشا : لو تموتين ماعندي باقيه بس فلوس الملازم
ريم : غصب عنج تجيبيهن وفوكاها تبوسيني
رشا : فضينا شكوو ورجعت اسبح جان تجر السبحه
ريم : خيه مشعول الصفحه اجه حجه ويه بابا ورجع خطبج
رشا : طفرت من مكاني صدك
ريم : هااااا شوف الفرحه شون تنط من عينها
رشا : الله عليج بداعتي الحجي صحيح لو ناصبيه عليه
ريم : مبين نصبه حضرتج اكلها مشعول جااي لبابا للمطعم وكاعد ويااه وطلبج مره ثانيه ومبين هلمره حيل متمسك لان يكول بابا حسيته ذابح روحه
رشا : وشمدريج انتي
ريم : سي ان ان ريم متعرف مو بلحيف والله عيب كعد تشوهين سمعتي من شفت بابا وعمه كاعدين وحدهم معناها اكو كارثه لو اكو شغله ياخذ رأيها اجيت بكل احترافيه وسمعت كلشي واجيتج ركض
رشا : وهسه
ريم : طسه شمدريني اكيد بابا راح يصيحج موافقه مو
رشا : هااا لا افكر
ريم : تفكرين خوش لعد خلي اروح لسليل ولعمه واكول الهم رشا مموافقه
رشا : منو كال مموافقه بكيفج تحجين
ريم : باوعت وغمزت الها بتحبي يابت بتحبي كلوووش
رشا : اشششش عزه فضحتينا
ريم : عرس رشا هيل وطش بلولايه اوكفي خلي ادبج
سليل : شكوو شصار
ريم : اختج راح تتزوج
سليل : اجه خطبج
ريم : هاااا خيانه لزمتج معناها گلج شلون متكوليلي
رشا : موو
ريم : لا مو ولا مي ولا السلم الموسيقي مالتج جان نسمع بابا صاحها لرشا
روحي صحبتكي السلامه
سليل : هههههه راح تجاهد
ريم : هي اختج من الاول تحبه بس تبيع ثگل براسنا يوميه تحجي بيه عبالها ممنتبهه عليها بس عايفتها على ميها امشي
سليل : طلعتي مو هينه يريمو
ريم : شعبالكم غير انتم متحترمون مواهبي الدفينه
سليل : امشي ام المواهب ننزل وراها
رشا : سألني بابا وعمه
حجي طه : بنتي شعلان اجه مره ثانيه وطلبج واني گلت يجوز مغيره رأيج ليش احجي واظلمج گلت اجي اسألج احسن بعدج على رأيح القديم لو تغير
رشا : انت شتكول بابا شنو رأيك
نهر : ماطول كالت هيج بنتك موافقه طه
رشا : اوكفي عمه شگلت اني
نهر : تربات اديه ومااعرفج طه اخذها مني رشا موافقه
حجي طه : هاا بنتي اسمعها منج حتى احجي واني مرتاح
رشا : بكيفك بابا
ريم : كلللللوش زفيناه واخلصنا منه وبعد شهر الاصغر منه
حجي طه : هااا ريمو تردين تتزوجين
ريم : والله بابا احلامك حلووه حطها بالك كاعده على گلبك وگلب عمه مااتزوج ابد
نهر : ليش اسم الله
ريم : ماكو ارجل مني من الكه عود اتزوج
رشا : بهاي صدگتي انتي رجال حوك
ريم : خوش اضربين بسامير بعدج منخطبتي
حجي طه : ههههه بلخير بنتي باجر انطي الخبر لان مبين حيل مستعجل
رشا : عفيه بابا بس اشرط عليه منتزوج اله وره التخرج
ريم : حيييل تحمضون والله
رشا : مالج دخل
سليل : اي احسن حتى متلتهين وتعوفين شهادتج
حجي طه : الله كريم بنتي ابلغهم
رشا : صعدنا وهاي ريم بس تهوس وكوه نسكتها وغزل كاعده تصفك الها وتضحك
وبعد ٣ ايام البيت انگلب زلم وانقرت فاتحتي على شعلان وجاب سيد ويااه
سليل : اباوع وجهه ام شعلان ممرتاح واخته كاعده على اعصابها رشا جانت ممنتبهه اباوع على رشاوي الفستان الاحمر يخبل عليها وهي بشرتها حنطي وطويله وجسمها رشيق والشعر اسود طويل بس فاتحته كلشي ممسويه بس شسورت كذلتها ومكياج محاطه بس گحل ومسكاره وحمره خفيفه كالت بلنيشان اخلي طالعه تخبل متوقعتها هيج نازكه تطلع
بس رازقيه فرحانه وام سيف متباوع عليه من وره سالفه ابنها مهتميت لان عاذرتها
اخت شعلان هند (زوجة طالب ) : ردنا نخطبله من بيت خالي بس هو الله يسلمه مجلب هنا مدري شبيهم ولدنا تكول ذابين صرتهم هنا كل شويه واحد رايد منعدكم
رشا : مجان خطبتوله
سليل : خزرت رشا حتى تسكت ميصير تجاوب هي نفخت بقله صبر ودارت وجهه وسكتت
هند : والله ياعيني ماقبل لو قابل زينه البنات عدنا
ريم : وينهن مو شفتهن وحدتهن جنه خليل ابو المولده مالتنه وملبسي دشداشه كدري حتى مو كشمير
نهر : ريم روحي ساعدي غزل بلمطبخ
ريم : اي عمه صار تعالي رازقيه ويايه
لان اخاف اجيب الشربت واوكعه بحضن وحده وماادري
سليل : خواتي يفورن ومبين هند معاجبها شعلان يخطب رشا وكل شويه ذابه حجايه واجه عمو صاح ولجن هلهلن كطيعه كثره بلا نفع وعلت الهلاهل خالاته ورازقيه حركن الجو بلهلاهل وصاحوها وره الباب وكطعو سيد الها شويه وكالو العريس يلبسها حلقات ودخل شعلان جان لابس دشداشه وبشت وعكال طالع تكول شيخ عشيره واباوع رشا تباوع عليه بأعجاب وحب دمعت عيني واني اشوف اختي كبرت وصارت عروس واقرا ايات بگلبي
رشا : احس گلبي شگبره من گعد يمي الخجل سيطر عليه رغم مو اول مره اكعد يمه مديت ايدي ولبسني الحلقه وتفاجأت ويااه محبس جان يتقرب مني وهمس
شعلان : هذا اشتريته العام بنجاحج هديه خفت اقدمه الج وتنهدين بيه كلت بس اخطبها البسها ويه الحلقه
رشا : ضحكت ودنجت وريم تأشر من بعيد هاا شيكول
مدري اضحك على حركات ريم لو سوالف شعلان لبسته حلقته والفرحه طالعه من عيونه
وبدن يدبجن ويهلهلن حتى هند الجانت مبوزه طول ما هي كاعده كامت وياهن وريم وياهن تكمز على الهوسه
طلعو واجو البنات وعمه يباركون اليه شويه واندكت الباب وطب شعلان وبيده علاكه
ولو ازعجتكم هاي نسيت انطيها الج
رشا : شنو هاي
شعلان : افتحيها
رشا : فتحتها لكيتها موبايل
شعلان : استأذنت من ابوج واشتريته الج حتى اطمن عليج
ريم : اي عيني بعد شتردين
رشا : اشش انتي الثانيه مااريده شعلان شسوي بيه ومبين غالي
تقرب مني وكاال لتنسين اني رجلج هسه متكدرين ترفضين مني اي شى انطي الج وهذا الموبايل حتى اسمع صوتج براحتي ورقمي ورقم ابوج بيه وشوي شوي اعلمج عليه
رشا : شكراً
شعلان : ماكو شكر بين الرجال ومرته
رشا : نبض گلبي من كلامه وانتبهت عمه والبنات راحو وعافونا وحدنا
شعلان : شلون بيج لو قابله نتزوج مجان هذا الاسبوع منومج بحضني
رشا : عفيه لتفتح الموضوع
شعلان : ااخ يانار گلبي اتحمل امري لله تحملت ٣ سنوات وهسه سنه ونص بس لو اعرف ليش زاركتني دعوه معدله وخلتني ينشلع گلبي بيج
رشا : ههههه لتضوج اطب الاشهر بسرعه وتطلع
شعلان : المهم انتي اليه مالتي الي وحدي
رشا : اي الك وحدك جان يجرني حيل بسني من حلكي بقووه وطلع حتى منطاني مجال ارفض احجي اسوي اي شى حرگه سريعه وقويه طبيت وجهي نار اول مره رجال يلمسني وفوكاها يبوسني
ريم : شصار شو دايخه
رشا : هااا لا مصار اروح ابدل
ريم : اكص ايدي اذا مسوالها شى البنيه تكول سكرانه
سليل : حشريه مالج دخل بيها غير رجلها
ريم : واني اختها لازم اعرف
سليل : هههههه الله يكملج بعقلج
مرت الشهر بسرعه وعلى اساس نيشان رشا بلعيد الجبير راحو اهله اشترو الذهب حتى بدون ميكولون الها وشعلان من سمع تخبل وراد يرجعه بس رشا مدارت بال كالت عادي ميهمني المهم الحلقه والمحبس ذوقك الباقي شگلي وميهمني الذهب اصلاً وهو حيل حب موقفها وعدها يجيب الها أًاٌلاًحـلى احنا طبعنا منهتم لهاي الامور من الي شفناه ابسط شى عدنا حلوو عدنا قناعه والحمدلله
وبيوم مصباح العيد ٢٠٠٦/١٢/٣١ تم اعدام صدام بحيث صارت صدمه للكل بدون مقدمات ولا اي شى الناس من خوفها صار مثل ممنوع التجوال بس طوعي يعني كل واحد سد بابه وكعد من وحده لان توقعنا راح تصير مذابح بلشارع وكافي الطائفيه الي احنا بيها الكل حط ايده على گلبه لهذا انلغى نيشان رشا واكتفينا عزمناهم على غدا يمنا وانطوها النيشان وراحو وبيومها همزين اخته مأجت جنت خايفه لتجي وتسوي مشاكل لان مبينه حاقده ليش منعرف
سهرنا وضحك وسوالف شفت بعيون رشاوي فرحه غريبه واني فرحانه على فرحها وحتى بابا حسيته فرحان لان واخيراً شاف بناته كبرن وبدن يتزوجن
رجعنا للدوام وريمو ويانا اول كليه جانت تروح وتجي وبس تحجي فلان هيج سوه وصار هيج بلدوام ومن احاول اسألها صارو عندج صديقات تبتسم وتكول الي مثلي ينخاف منه مو يتصادق جنت احاول افهمها تره حالتج جداً طبيعيه واصلاً البهاق مو حيل عدها بس هي قافله تكول ابقى اتفرج عليهم وبس تعبت من كثر مااحاول وياها بس ميفيد
وبمرور الايام الاوضاع ساءت وبدخول ٢٠٠٧ زادت الطائفيه والقتل صار ماكو اسهل منه الجثث مطشره بكل مكان تهجير عنف قتل بكل بشاعه سيطرات وهميه الي يطلع لو يرجع لو لا عدا التفجيرات الي يوميه هازه بغداد مستمره تاكل بينا
رشا : جبتلكم خبر يخبل
ريم : والله ياست رشا ماجبتي يوم خبر بيه حظ بس هم نسمع
رشا : جنات حاامل
سليل : اووي ياعيني راح تصير ام والله خبر يجنن
ريم : اريده ولد بنيه اريده
رشا : ولج هو نستله وتردي
ريم : اريد العب بيه احب الجاهل من هو صغير يصير برئ تبوس تحظن تعض ماعنده غير بس يبجي حتى يدافع عن نفسه
رشا : مجرمه الاجرام يمشي بدمج
سمعنا صوت بجي اندارينا جانت عمه تبجي ركضنا عليها
سليل : شبيج ماما صار شى
نهر : فرحت لجنات گلت بس لا تصير مثل عمتها ماعدها حظ بلخلفه وتبقى بليه جهال
سليل : حبيبتي ماما لتحجين هيج الْحٍمَدٍ للـّہ الله رزقها ليش البجي بعد
نهر : والله جنت خايفه حيل لا تصير مثلي يوميه بلصلاه ادعيلها
ريم : لعد احنا مو بناتج شو خلصتيها ويانه يمه ما يمه طلعت گلها كلاوات
نهر : سكتوها لهاي لا اشبعها گتل
ريم : عمه انتي اخرج لو كفخه على الراس لو على الجتف ماخذه كأس العالم بلكفخات لو نعال طاير دوم يجي بصفي لا بيوم كطعتي ولا ملختي بعد عليمن تهددين
نهر : غير احبج ومااحب أذيج
ريم : ليش تحبيني
نهر : يااا هاي شحجي وياها بله غير بنيتي واحبها
ريم : لعد هسه مو تكولين ماعندي جهال ارسي على بر عمه احنه ناس جامعيين عدنا التزامات لا كل شويه لاعبه علينا مره عندج ومره لا
نهر : وخروها من يمي حتى الواحد يريد ينزله جم دمعه من وره هاي الزعبله ميبجي
ريم : حلوه هاي الزعبله جديده مسامعتها بأي لغه عمه الاغريقي وشنو معناها
نهر : والله طلعت مني شمدريني شنو معناها شو وخري اكوم اكمل الغدا احسن من سوالفج الغمه
ريم : والبجيه ما كملتيها بعد عيونج بيهم دمعتين
سليل : هههههه ولج جوزي من ماما
ريم : شمسويه اني
سليل : ابد ممسويه
ريم : صدك عمتو حبيبتي وكمت ابوس بخدها
نهر : ياستار شكو
ريم : هاي شبيج عمتي الغاليه
نهر : دلعج وراه مصيبه تعلميني بيج
ريم : اني ريمو الورده ريم الفله
رشا : البله قصدج
ريم : اسكتي ام مشعول
رشا : شوفي عمه شتكول
نهر : ولج بله صخام شلون بيج
ريم : عفيه بيت محد يكدر يمارس حريته بيه هسه خلني اكمل كلامي كل شويه وحده طافره
سليل : يله نسمعج اكيد وراج شى
ريم : يمه من فدوه للعاقله مالتنا
عمتو اريد موبايل
نهر : شسوين بيه عيني
ريم : انگلبت والله شوفن عيونها راح تاكلني وحضنتها وابوس بيها عمه والله كل البنات عدهن واني ماعندي مابيها شى اخذ واحد قابل شسوي بيه
نهر : مو خواتج ماعدهن هاي رشا خطيبها جابلها لو ما مخطوبه تحلم تشوفه
ريم : قابل هو قنبله ذريه ياعمه هو جهاز اصيح بيه الو وهذا هو
نهر : شسوين بيه مو عدنا واحد بلبيت
ريم : اريد واحد اتلوك بيه بلكليه لعد الشايلته احسن مني
سليل : اول تالي تباوعين على غيرج وتردين الي عدهم
ريم : والله مو قصه اباوع بس حبيت هيج ادكون عليه وين صرتي واجاوبكم اي شويه واجي عود فد شخصيه مهمه وتنتظروني
رشا : الف الْحٍمَدٍ للـّہ والشكر على نعمه العقل
ريم : هاي منو التحجي على العقل هاي شافت نفسها انخطبت عود كبرت اكص ايدي اذا متسوين مصايب بمشعول مااتسمى ريم
رشا : هم كالت مشعول عيب بابا اكبر منج وزوج اختج
ريم : عشتوو زوج اختي ومن حركتي مجان اكبر مني ومن لسانج شطوله وياه وكلمة بكلمة مافكرتي بعمره وعود من تصيرين بيته عود افكر اعدل الاسم يجوز اسمي شعولتي شعيلان شعشع شعشيعو
بس والله مشعول احلى ذني مابيهن حس موسيقي ونغمات وتريه مشعول تحسي يكمز على الگلب وحيل راهمه لجهرته
رشا : شبيهه يمه جهرته تخبل تغارين منه لان احلى منج
ريم : اوووع احلى مني من خشمه الي يوكف عليه الصگر
رشا : عمه شوفيها
نهر : ولج والله خشمه حلوو
رشا : اصلاً هو كله يخبل
ريم : عادي القرد بعين امه غزال
رشا : شو تعالي ياقرده اني الج واركض وراها لزمتها عضيتها وكطعت شعرها وهي تعيط من اشتعلت يامشعول ولج بعدج ما دخلتي لبيته وبعتي اختج من ادخلين شسوين تغيرين اسمج بلجنسيه
سليل : ههههههه رشاوي كافي متكدرين للسانها عوفيها
رشا : اليوم انعل يومها شوفيها شلون تحجي على شعلان
سليل : والله وكت تتذكرين من تكعدين انتي وياها وتستلمنه المكرود
ريم : يمه من فدوه لحلكج ذكريها نست عمي نست هاي التنخطب حتى اسمها تنساه تكول مو حط الحلقه بيدها لومسحت ذاكرتها شصار هو رجال لو مشتريه سياره شسووين
نهر : هم يجي يوم وتصيرين مثلها وادافعين عن خطيبج
ريم : اووع ياخطيب هذا خاف خطيب الجمعه بله متسكتين عمتوو ونرجع لموضوعنا الاصلي شوكت تشترولي موبايل
نهر : من تنخطبين
ريم : هاي هيه ضليت العمر كله بليه موبايل ااخ ياريم دومج مظلومه بهاي العائله وما ماخذه منهم لا حق ولا باطل ولا موبايل ربي كون حواسم ثاني حتى ابوك شكو محل موبايلات واترس البيت ترس عود خلي اشوف وحده بيجن تريد تلفون اله ابلغ عنها الامريكان واكو علاسه
سليل : ههههه تردين حواسم علمود الموبايل مو حرام يصير يرعنه
ريم : لا بلحرام راضين ولا بلحلال وهو منو يدخل النار اني لو انتم اطلعو منها عود بذاك الوكت عندي حسنات تشفعلي
رشا : انطيني حسنه وحده تشفع
ريم : باوع منو تحجي الي تقطر حسنات خليني ساكته ريه لو نسيتي مو سوالفج كلها يمي
نهر : اروح اكمل شغلي شكد تلغين
ريم : اريد موبايل لا اشهركم بلمنطقه واخزيكم
نهر : نشتري لاختج اولى الجبيره مو انتي
سليل : شسوي بيه ماما المن اخابر قابل ومن احتاج شى اخذ مال البيت
ريم : شفتي هي مرادت سليل عمه غسلت ايدي منها انتي اقنعي بابا
سليل : اني اكول اله ادللي
نهر : خلي تولي ماكو
ريم : حبابه عمه حبابه ان شاء الله يوم مترحين لبيت الله
نهر : اوي ولج گلبي انخمش يوم عيد واروح
ريم : هسه ادعيلج صبح وظهر وليل والسجاده افرشها بلسطح واصلي حتى يستجيب بس اشترولي موبايل
رشا : هاي هي عمه بعد متشوفين بيت الله بعمرج ماطول ريم تدعيلج
نهر : هي دعوه وربكم المسهل وخرن بله مو دمعه صارت عليه لعبتن بحالي
سليل : اباوع عليها خطيه اول مره تطلب شى من بابا رحت اله من اجت وكعدت يمه وطلبت منه الها بلبدايه رفض وقنعته
حجي طه : وانتي بنتي متردين واحد
سليل : لا بابا شسوي بيه
حجي طه : سليل
سليل : نعم بابا
حجي طه : بيش شى
سليل : استغربت سؤاله شبيه
حجي طه : عيونج طافيات مو بنتي الي عيونها تجدح وكلهن لمعه دومج ساكته ونادراً صايره متشاركين ومرات هوايه اشوفج صافنه وحتى من نلتم كلنا تكعدين ساعه واتصعدين ليش هيج بنيتي
سليل : ماكو شى والله بس ملتهيه دراسه وسنه اخيره
حجي طه : دومج صادقه ويايه وعمرج ماضميتي شى لتنسين اني طه الي لو تفترين الدنيا كلها متلكين مثله يحبج
سليل : حضنته لبابا وبسته اي والله ماكو مثلك ليضل بالك حبيبي مابيه شى
حجي طه : الله يحفظج بنيتي ويريح بالج
سليل : امين
حجي طه : باجر اجيب الها تلفون متعرفين شنو الموديلات الجديده
سليل : لا والله مااعرف
حجي طه : اسأل محسن هو يعرف
سليل : بسته وطلعت
ومثل كل مره من ماعنده شغل ولا قرايه اصعد للسطح اتنفس شويه ومرات اتقصد اعوف الغرفه لرشا حتى تحجي ويه خطيبها براحتها
سليل : جنت بلدوام وسمعت ضجه الكل يكول اطلعو ويتراكضون اجيت سألت بنات واكفات كالو
يكولون صار انفجار بلمستنصريه سيارات مفخخه وطابين عليهم احزمه ناسفه وحيل متأذايين الطلاب ويخافون ليدخلون علينا احنه هم
سليل : بادت ايدي وكامت شفتي ترجف من الخوف ريم اختي طلعت اركض اريد تكسي يوكفلي اروح الها المصيبه ماعندي تلفون واخابرها كمت اعض بأصبعي كال بابا اشتري الها ونسى تكول عبالك گلبها علم
لكيت تكسي وصعدت وطول الطريق ابجي
طلبت تلفون من ابو التكسي جنت حافظه رقم رشا والبيت دكيت على رشا
شالته تبجي اني سليل
رشا : سمعتي بلصار
سليل : اي ورايحه الها
رشا : اني منتظره شعلان خابرته هسه جااي
سليل : اني اقرب منج عليها
رشا : ياربي دخيلك
سليل : بقي التلفون بيدج اذا كدرت احصل تلفون هم اخابرج
رشا : مااشي فدوه طمنيني
سليل : سديته ورجعته للسايق وبوقتها مقبل ياخذ زياده مال رصيد خلف الله عليه
وصلنا قريب شارع فلسطين جانت الطرق مسدده
ابو التكسي : اختي كدامج سادين الطريق من وره التفجير
سليل : خلف الله عليك هنا انزل
نزلت اركض وبيدي جنطتي وابجي ومهامني الناس لان اكو الي مثلي اجه يركض على اخوه او اخته او ابنه او بنته مسافه جانت مو قليله واركض بيها مرتين الوت رجلي وكملت مشي وامسح بدموعي الي متوكف واتذكر ضحكتها سوالفها تكميزها واعيط بلشارع بلا وعي ريم جايتج ريم مااعوفج حسيت روحي الطفله الصغيره الي طبت بنص النار وطلعت خواتي تمنيت بذيج اللحظه بعدنا صغار واكدر اخذها بحضني وصلت قريب المكان والناس مگلوبه والشرطه والجيش تحاول توخر الناس يخافون لا اكو بعد مفخخات منظر الدم والجثث المتفحمه خلاني اتهستر كلت اختي راحت انمردت حالها حال الراحو
ريم : مثل كل يوم دوام كملت المحاضره باوعت الساعه مبقى شى ونطلع اكثر الطلاب بدو يطلعون والي ينتظر الخط والي يسولفون بره هوسه ودوام جان يوم ٢٠٠٧/١/١٦ الجو بارد شتا باوعت المن باقيه خلي اطلع شويه وتذكرت نسيت الملزمه بلقاعه طبيت ركض ورجعت طلعت وبطلعتي صار انفجار هز الجامعه كلها عياط الطالبات وهلعهم الكل يتراكض محد يعرف شكو بس كلها تصيح دير بالكم ركضت حالي حال الكل وخايفه ومرعوبه اباوع ناس تعيط وتكول لترحون منا هناك صار الانفجار وبركضتنا على الباب الثانيه وجان اطك سياره حسيت اذني انسدت اريد ابلع ريگي ماكو العصف شمرني بقوه وشغلات تطاير كمت اعيط وابجي واصيح بابا الحكلي جنت قريبه من الباب اباوع الطلاب ممروده والدم بكل مكان والنار الگابه مباشره كعدت بلكاع واعيط وابجي بهستريا ذكرت حرگتنا تذكرت النار من طبت سليل وتوقعت اكلتها هي وغزل الطلاب يركضون فصلت من الدنيا الهبطه جنت عايشتها واني وصغيره انعادت بس بصوره اقوى جثث الطالبات والطلاب اختلطت متعرف البنيه من الولد بكل مكان مطايره لحم وريحه حركهم تعط بلجو وسيارات تشتعل لان المفخخه طكت واكلت وياها السيارات الواكفه اباوع جثث متفحمه بكل مكان شنو ذنبهم طلاب بعمر الورد فرحانين كاعدين الصبح حتى يرحون للجامعه وياهم اساتذه ناس طلبه علم شنو الي سووه حتى يستحقون هيج موته بشعه حسيت شى يقطر على هدومي اباوع دم من راسي وجهت عيني على مكان يحرگني جتفي كله دم الطلاب الولد يتصارخون ويساعدون بلي وكعو اجو ولد يركضون ويحجون ويايه بس مااسمع شيكولون لحد موكعت ومحسيت بشئ
سليل : ركضت بين الناس اريد بس اوصل مكدرت بقيت واكفه ابجي اريد بس اوصل محد يقبل والناس تتصارخ مثلي جان اكو شاب طلبت التلفون منه وخابرت رشا وهم جايين مشي كتلهم بيا اتجاه واكفه واتشكرت من الولد
وركضت على رشا وشعلان وجانت رشا مو اقل مني متهستره ومن شافت من بعيد حجم الكارثه كعدت بلكاع وتلطم على وجهه ولج راحت اختنا راحت ريم
شعلان : على كيفكم كولو ياالله يجوز مابيه شى
رشا : شوف كدامك الطلاب مكطمه شلون النار شلون الكارثه اختي راحت وكمت املخ بوجهي ولان اضافيري طوال مباشره تجرح لزم ايدي شعلان حيل وعاط بيه
شعلان : كاافي تخبلتي خلي اندور عليها ليش تفاولون بلموزين
سليل : فدوه شعلان ابوس ايدك روح شوفها حتى لو اعرف اني اتوصل بلشرطه بس خلي اندور عليها
شعلان : على كيفج سليل هسه شوفي الناس شلون مخبوصه هسه راح اشوف بلكت اكدر اطب
سليل : حااول شعلان وحتى تعارك وياهم بس ميفيد لان مئات الناس مثلنا متعرف بناتهم واولادهم وين جانت كارثه بشريه لدرجه من شفنا وحده من سيارات الشرطه مليانه جثث أيسنا ورشا وكعت من طولها وسندها شعلان شكد منكون قويات والزمن علمنا نتحمل بس الصار بيومها يخلي الجبال ينهار اباوع وابجي ليش مكتوب عليه شكو كارثه تصير لو بيه لو بخواتي ولازم اصير بيها لازم اشوفها وتاخد حيل مني وصحه وعاافيه بقينا ٣ ساعات ما بيدنا شى لا احد يكدر يطب ولا نعرف شنو الديصير لحد ما دك التلفون مال رشا ماما عياطها هي وبابا مجانو يعرفون اني خفت على بابا ليصير بيه شى لان اسمع صوت عياطه والبجي
رشا : ابجي ويه عمه ودك مكالمه ثانيه رقم
جاوبت واسمع صوتها على كيفها تحجي بيه صوتها بحه ومطبك ومخنوك
ريم : فتحت عيوني اكو طبيب فوك راسي وسألني عن اسمي وانطيته جنا بطوارئ الكندي وطلبت تلفون وهمزين حافظه رقم رشا حفظته النا ذيج المره بلكوه بس نسيت اخر رقم لهذا دكيت مرتين مره غلط والمره الثانيه طلعت رشا
سليل : ركضنا للمستشفى مثل المخابيل وكوه وصلنا لان الطرق مسدده مصدكنا من طبينا ولكيناها حضناها ونبجي
ريم : هاا ي شبيكم تره مميته متخلصون مني
سليل : من عمري على عمرج
رشا : يومي گبل يومج
ريم : خوش والله ماطول هيج توزعن اعمار سون فضل من ارجع اريد دولمه
سليل : بيدي اسويها والله شنو الي مأذيج
ريم : ماادري راسي يوجعني مجروحه وايدي خيطوها
رشا : متأذايه شويه
شعلان : الْحٍمَدٍ للـّہ على سلامتج يمعوده والله خفنا عليج
ريم : لتخاف انت بلذات متخلص مني بعد هواي اشواط وعركات
شعلان : هههههه تعاركي بس المهم بخير راضي والله
ريم : همزين الاصابه بيدي اقلها شهر مااشر اهدوم
رشا : اضحك والدموع بعيني والله اني بعد اشرهن
ريم : سمعتي سليل كدامج مو بعدين اطيب وترجع بكلامها هاي وحده جذابه توعدني وتخلف
شويه وطب بابا وعمه يبجون شفت بعيونهم شلون الكل مرعوب عليه وبابا وعمه يبوسون بيدي حمدت الله عايشه حتى اشوف هاي المحبه الي بعيونهم
طلعوني بنفس اليوم لان حالتي مو خطره بس كل مااتذكر الصار الدنيا تفتر بيه وگلبي يأذيني رجعت للبيت وغزوله من البااب تحضن وتبوس بيه وتبجي نمت بلهول مردت اصعد ردت بينهم خفت ابقى بلغرفه الصار حيل أذاني كل مااتذكر منظر الطلاب شلون مطشرين افقد توازني وابجي وانت مغمضه حسيت واحد وكف فوك راسي جان يكول ولج قفاصه ريم عبالي متي وخلصت من سوالفج واخلي فلوسي على گلبي فتحت عيني لكيته عمو محسن ابتسمت بهدوء جنت تعبانه ونحلانه من تأثير العلاج وكتله لو ميته تنقهر عمو عليه مباشره غابت ابتسامته وعيونه دمعت ونزل باس راسي وكاال يمكن لو صاير بيج شى انجلط انتي مو بس بنت طه انتي بنتي الماخلفتها
مديت ايدي ومسحت دموعي الي اول مره اشوفهن وكتله لتخاف مااموت اله اخلص فلوسك كلها
محسن : فدوه الج كل فلوسي
ريم : انداريت على بابا سمعت بابا هو كال بعد مو تحجون
محسن : غير انقشمرج ياعيني حتى تكومين
ريم : هههه مابيه اضحك شلونك عموو
محسن : شلونج ياعمو واني بس سمعت الخبر من وراج كل شويه طاب للحمام
ريم : هههههه ليش
محسن : يمكن سكري صعد ااخ لو ميته اله اشبعج كتل بيه حيل انجلط واصير ماسحه اني ادور على مره اجدد شبابي بيها وتالي من وراج اخلصها بلفراش
ريم : هههههه شلون تشبعني كتل غير متت بعد
محسن : شمدريني المهم مااعوفج اله اخذ حقي منج
ريم : شجبتلي غير زياره المريض لازم شى وياها
محسن : جبتلج عوده اكسرها على راسج من الهبطه الاكلتها
ريم : لعد روح عمو زيارتك مرفوضه ماطول مجايب شى
محسن : اعرف بيج جوعيه وام بطن جبت الج اشكال النساتل حتى تكومين بسرعه مااحب اشوفج مريضة
ريم : اذا هيج مستعده اكوم اركصلك ومو بس اطيب
رشا : ههههه ام شى بطنها
سليل : اباوع على لمتنا واحمدالله مصار شى ويكسرنا الكل تعب من الهبطه خوفنا على ريم خلانا منندل دربنا والحمدلله عدت سلامات بس اكيد غيرنا ناس بهذا التوقيت تصرخ على فقدان اولادهم الله يعطيهم الصبر
مرت الايام والحياه رجعت طبيعيه تعلمنا احنا العراقيين يصير تفجير وكارثه منا نغسل الشارع منا وره كم ساعه تفوت السيارات والناس ولا كأن صار انفجار هيج خلصنا اشهرنا يوميه انفجار بلمكان الفلانيه راح ضحيته كذا عدد بحيث نسمع الاخبار الاسبوع المابيه انفجار نتعجب اما القتل والطائفيه صارت بأوجها للحد بغداد هواي ناس هاجرت من وره القتل والتصفيه الطائفيه نباوع مناطق كامله صارت فارغه بسبب التهجير ومحد يعرف ليش هيج ديصير بينا
طول هاي المده اخذتنا الحياه رشا ملتهيه ويه شعلان وبابا الْحٍمَدٍ للـّہ شغله احسن وريم وهوستها على حطتها وغزل وهدوئها مرات تبقى بلساعات بلغرفه تقرا ومنسمع صوت الها
صار التخرج مالتي محضرت اي حفله فقط صوره التخرج لان بابا وعمه توسلو بيه حتى اخذها ولخاطرهم بدلت قاط التخرج ورحت اخذت صوره ورجعت وعلكت الصوره بلهول وبابا يطب ويطلع يباوع عليها ويبتسم اعرف وهو وماما نهر فرحانين اكثر مني ولو جان سجاد موجود هم جان فرح اعرف اكيد جان فرح
بهاي الفتره ريم صار عدها تلفون ومكيفه بيه من وره الحادث بابا اشتره لكل وحده بينا جهاز خاف ليصير شى اقلها نتصل جنت ادوم اصفن عليه واكول شيصير هسه لو اسمع صوته اسمع انفاسه والله اشتاقيت اله
ريم تعرفت على صديقه بلكليه واخيراً صار عدها صديقه وره شهر كالت الها
زينه : ريمو تعرفين اخويه طبيب جلديه والله اكو حالات مشابهه خفف منها البهاق
ريم : خفف بس مراحت
زينه : هم تخفيف شبي امشي الله عليج خلي نروح اله متخسرين شى
ريم : تعرفين اضوج من هذا الموضوع بلذات
زينه : والله متندمين شوفي شكد حلوو شكلج ومرتبه وسمارج يخبل وهاي النقاط بسيطه
ريم : بس اكو بجسمي اكبر
زينه : المهم الي ظاهر منها هسه يم عيونج واذنج والي بخدج الايمن يله احجزلج
ريم : لا
سليل : حجت الي ريم على الي صار وكوه قنعناها بعد ما بابا توسل بيها وانطاها فلوس وراحت للطبيب واثناء الفحص سوالها حتى تحاليل مال هرمونات وكلشي وانطاها عصارات وخبطات وجنا اني ورشا نشرف على علاجها لان نعرف بيها تتهرب بدت البقع الصغار تختفي اول بقعه راحت مال الخد ومن شافتها ريم راحت كامت تكمز من الفرحه اول عامل كال الها الطبيب لنجاح العلاج هو النفسيه لهذا كمنا نحافظ على نفسيتها بس البقع الكبير مجاب العلاج نتيجه وبعد بالايام الجايه يحاول الطبيب بعد وياها
نجحنا والحمدلله كلنا واني تخرجت ورشا راحت مرحله رابعه وريم مرحله ثانيه وغزل ثالث متوسط
حياتنا والحمدلله زينه وهادئه
اني كعدت بلبيت بعد التخرج وصيت عمو محسن من معارفه على تعيين لان مع الاسف مهندسه بس تعيين ماكو سمعه وبس
جنات جابت ولد وحيل فرحنا الها وطول هاي المده بابا يلم بفلوسها وكال ماارتاح اله اكملهم كلهم
وبيوم لا على البال والخاطر حدود شهر التاسع اجه بابا وجهه مكلوب كاعدين وطب
نهر : شبيك طه
حجي طه : مابيه
نهر : لا بيك ومتأكده تعرفني بيك
حجي طه : امج رجعت
نهر : هاااا رجعت وين وشمدريك
حجي طه : اليوم شفت علي بلسوك يدور محل يشتري واجو جماعه كالو عندك اخ اسمه علي من سألتهم كالو اجه يشتري محل وبيه شبهه منك ومن الاسم الثلاثي عرفنا لان مشتري المحل منهم
نهر : لزمني گلبي مهما كان هي امي واكيد اتمنى اشوفها بس اعرف بيها مترحمني
حجي طه : كون تجوز من المشاكل متوقعت يرجعون
نهر : وعائلته ويااه
حجي طه : مااعرف اكيد وياه وين يرحون
ريم : حسيت روحي طلعت ورجعت من سمعت معقوله بعد هاي السنين اشوفه
بقيت اروح واجي اكول هم يجي ويدك الباب ويسأل وانتظرت يوم والثاني والثالث لحد ماكلت اكيد نساني
والعصر طلعت اغسل الكراج لازمه الصونده وادندن وارش ماكو احد هدوء وكف گبالي شاب حليوو طويل وشكله مرتب معاني رجوليه ولحيته مرتبه وملابسه راقيه حيل صفن عليه احس شايفته عيونه مو غريبه عليه
هو كال شلونج ريمتي لو جفلت
اريد اركض احضنه اريد ابجي من اشتياقي اله تقرب مني وشمرت الصونده
حسين : مستحيل معرفتيني
ريم : سحليه
حسين : هههههه اي سحليه بعدج تصيحيلي بهذا الاسم
ريم : تقربت ردت احضنه من شوقي الي اتذكرت احنا كبرنا وعيب بعد احضنه ميصير ورجعت لمكاني حس عليه اتقرب وجر راسي وباسه وكاال اشتاقيتلج كولش
ريم : ابتسمت بفرحه وكتله متغير معرفتك
وكبران
حسين : وانتي متغيرتي بعدج حلوه ودلوعه ولسان
ريم : تعاال طب اكيد البنات راح يفرحون بجيتك
دخل واني ممصدكه شفته شلون رزن وهادئ ويمشي بثكل بلحظه ردت اضربه جلاق واكوله والله اشتاقيت لسوالفك وادنج واضحك على تفكيري
زين هو وين جان وشلون عافنا كل هاي السنين
طب والكل استقبله بحب لان هو جان اخ النا وعمه طكت بجي من شافته ممصدكه
وكعدنا سوالف ويحجي تالي سألته
وبيبيتك شخبارها
حسين : زينه بخير
ريم : شعجب رجعتو
حسين : ليش متردين نرجع
ريم : لا بلعكس طولت الغيبه
رشا : والله شكد شايفه ناس تتغير من تكبر بس مثلك ماشفت صاير شاب وجنتل معرفتك والله
حسين : ريم معرفتني وانتي هم وسليل عرفتيني لو لا
سليل : شبهت عليك من صوتك لان مو حيل متغير الصوت
حسين : همزين احد عرفني
واحنا نسولف جان نسمع دكت الباب ركضت غزل تفتح الباب شوي ورجعت كالت
اكو وحده بره تريد ماما نهر
نهر : طلعت اشوف منو وجان اتفاجأ امي انعام بقيت باهته مهما سوت تبقى امي وجنت حيل مشتاقه الها ركضت فتحت الباب وشمرت نفسي بحضنها جان تدفعني وتدخل انصدمت من سوايتها وطبت لداخل البيت تعيط وينه الحرامي وينه
سليل : طبت واني شفتها وتذكرت شكو شغه غمه بحياتنا صارت
انعام : وينه ابن رازقيه الحرامي
نهر : شبيج يوم شجاج
انعام : ولج ماخذ فلوس جعفر وفاتح مطعم ويلعب بفلوس اخوه لعب فوك ماكتل ابني يريد ياخذ فلوس ابني الثاني والله اليوم اسويها دم
حسين : بيبي شجابج
انعام : انت شجابك هنا تخبلت اجيت تركض عليهن ذني الكح.. ذني بنات الحرامي والكاتل امشي ارجع للبيت لابوك عوف ذني امهات الوصخ تلكه هسه سمعتهن انكس من سمعت امهن
رشا : لهنا وبس مال اطعنين بشرفنا مااسمحلج ولو هم مااسمح الج تجيبين طاري ابويه
انعام : انتي ياهو منهن ياساقطه
رشا : مره جبيره اخاف امد ايدي وهسه اخنكج هنا واموتج بيدي واني ورايه عرس واريد اتزوج ليش اضيع عمري بيج
ريم : اني لا مخطوبه ولا اريد اعرس اني اخلصج منها رشاوي وجيتت عليها ولزمني حسين
حسين : شبيج اوكفي موعيب اكبر منج
ريم : انت تعلمني العيب شوف شلون لسانها تكول رشاش من طبت لهسه تعد وتصف حتى محترمت المكان الطابه بيه وتطعن بشرفنا
انعام : والله وكبرتن وطلعت الجن لسان هاي انتي البكعه مو عرفتج من بكعتج
ريم : تغارين لان احلى منج
نهر : يمه شتردين هسه
انعام : اريد فلوس جعفر الي اخذهن
نهر : طه مماخذ شى وانتي منو گلج ماخذهن
انعام : رحت لهاي الزماله جنات عرفت بيها متزوجه ابارك الها الله لايبارك بيها الادبسسز وسألتها عن حصتها بلمنحه لان اني اول ماوصلت اخذتها ردت اشوف وين ولت بلملايين الاخذتهم بعدني ممكمله جان يكول رجلها مو عمها طلع اله نصيب وهي اخذت ١٥ والباقي اله واني ياكاع انشكي وابلعيني ما ارتاحيت اله خليت رجلها يهطرها (يضربها) لان انطت لطه فلوس جعفر
سليل : يابه شگد مأذيه كبرت وبعدج تأذين الناس مو حرام البنيه بيتها وممسويه شى الج وادمرين حياتها
انعام : وبعد وبعد على سوايتها اذا مرجعت الفلوس واخذتهم من طه وروح ولدي النحرمت منهم اله اخليها تطلك عقاب الها شلون تساعد طه شلووون
ريم : عادي وتطلك تجي يمنا هنا بيتنا مفتوح الها
نهر : يمه لتدخلين حرام عليج ادمرين حياه البنيه
انعام : اسمعي لج اني گلبي غضبان عليج ليوم الدين ومااريد اشوف جهرتج بس كولي لاخوج السكط اذا مرجع الفلوس لا اندمه على الساعه الفكر يأخذ من جنات
رشا: لزمت التلفون وخابرت جنات
وكتلها على السريع بعدين نتخابر رجلج إذاج
جنات : ضربني وانقهر مني وكعدت واعتذرت منه وفهمته كلشي مضميت شى عليه وعدته الكاع من تطلع شكد يطلع الي منها اله
رشا : ولج هذا طمعان بيج
جنات : ميخالف المهم هسه امتص غضبه
رشا : هاي بيبيتج هنا گالبه الدنيا
جنات : افتحي المايك وصيري قريبه منها
فتحت وتقربت منها
بيبي لو شمسوين مااخذ الفلوس من عمي وحتى اذا طلكني عدي خلي يطلك ارجع بيت عمي جايه وتعيطين وتهوسين بيا عين مكافي شمرتيني بيت اهل امي ورحتي وعفتيني احسن مداعين بفلوس ابويه اكعدي ويه نفسج وحاسبيها وفكري شراح تكولين لابويه يوم متشوفي بالاخره ويسألج عليه وشلون شمرتي بنته اليتيمه بليه ام ولا اب بليله ظلمه ودرت وجهج ورحتي وصرت خدامه الهم وانذليت وعناد بيج مااخذ فلس من عمي
ريم : عااشو حيييل هيج احسلج
يتبع ....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!