#رواية_أبي_والغزلان_الجزءالثاني
#للكاتبة___REEM___ريام_هادي
#البارت_الثامن_عشر
اشكد مشتاك اضمك للكلب ساعات
واشم عطر الأمان بروحك الترفه
حتى أكعد عمر بعيونك الحلوات
ومن لمست حنانك عمر ثاني اغفه
يل حتى من اشوفك هم أرد اشتاك
ولوأشوفك عمر ماتبرد اللهفه.
ريم : عااشو حيييل هيج احسلج
سليل : اششش اسكتي
جنات : بيبي اطلعي من حياتي بروح ابنج جعفر مااكولج بس بروحه عوفيني ابتليت صرت بت ابنج وخالتي هم ام حسين لتخابر ولا توصل طيحتو حظي وشمرتوني وهسه ادورون ورايه وتردون تهجمون بيتي
انعام : خفت والله قليله اصل وتربايه طلعتي
هاي تاليها ياجنه هيج تسوين بلي ربوج
جنات : ربيتوني وطيحتو حظي وشمرتوني على بيت جدي وتعرفين جم مره خابرتج وكتلج كعد تضربني مرت خالي ومره خالي جواني وجم مره كتلج على ابنه يريد يتحارش بيه وانهزم واسد الباب تعالو اخذوني خلوني خدامه يمكم بس لتعوفوني يمهم تكولين البسي عريض واسمعي الكلام محد يتعرضلج واني راح ادز فلوس لخالج حتى ميأذيج انعل ابو الفلوس الي تخليني ماانام الليل لان خايفه
انعام : لو حاركتهن ولا منطتهن اله مالكيتي غير هذا المهجوم الكاتل عمج تنطي فلوسج
جنات : بكيفي انطي احركهن ماعندج شى يمي ورجاءً لتوصلين بعد لبيتي كافي اليوم من وراج جان اطلكت وجهي هسه مورم لان ضربني
انعام : يطبج طوب عساج بأبو زايد لو رجلج بيه خير جان سگطج
نهر : اي ليش خطيه يعني بس اريد افهم لشوكت تحبين اذيتنا متعبتي ما مليتي
انعام : انتي بلذات تسكتين لو اشرب من دمج مايفوخ گلبي من سوالفج خلصتي عمرج ثوله وتبقين ثوله وتاليها صفيتي خدامه لطه وبناته
سليل : ماما نهر امنا وعمرها مجانت خدامه
انعام : ههه ماما نهر خوش مقشمريها وذاك الاغم ابوج تاليها قشمر جنات واخذ فلوسها
جنات : اروح اني عدي يصيحني
رشا : الله وياج
انعام : الله ياخذج حرگتي گلبي
حسين : كاافي حجيه امشي تره ميصير هيج
ريم : ههههههه حجيه هههههه والله ضحكتني هو بقى بيت الله لهيج نماذج تعبانه ويصيرون حجاج
جان يعيط بقوه حسين
حسين : ريم احترمي نفسج مو عيب
ريم : تقدمت عليه ورفعت اصبعي بوجهه واحجي بقووه بس داخلي نار وكتله
اياك مره ثانيه ترفع صوتك بوجهي واذا معاجبك نحجي على بيبيتك اخذها واطلع بره ولتخلينا نشوف وجهك مره ثانيه اخاف هلمره راح اسكت الك تقديراً لعشرتنا القديمه مره ثانيه مااسكت
نهر : جريت ريم تعالي ماما وطببتها بغرفه طه
سليل : هسه اجيتي وسويتي مشكله هذا هو
رحمه لاهلك حسين اخذها
حسين : امشي بيبي
انعام : اوكف خلي يجي طه ماشفته اريد اليوم اطلع القضى والمضى على راسه وراس الخلفته
حسين : كتلج امشي وجرها من ايدها وطلعو
نهر : كعدت بلكاع ابجي رجعت بلاويها ومصايبها يعني الله اكبر لا گبل كعدت راحه ولا من گبرت
رشا : على كيفج عمه ليصير بيج شى
نهر : شلون ميصير متكوليلي هاج حتى اليتيمه لاحكتها بعربانه والله اعلم شراح يسوي رجلها بيها
سليل : اني بالي يم بابا هاي مراح تجوز منه زين بس اريد افتهم مو عمو علي بعثي شرجعه
رشا : والله مال واحد يبلغ عنا وخلي يطكوه
نهر :اني گلي طه سائل وتدرن شمسوي المزيون
رشا : شسوه
نهر : مو دخل السجن اختلاس مدري بوكه المعزه مسجل نفسه باعث سياسي عود لان جعفر اخذوه وعدنا معدوم هو عود من وره جعفر دخلوه السجن وتبلو عليه
رشا : هااا شنو شلون يصير هيج
نهر : يمه بلد خربان ضلت للعاريه شتحجين انتي الحرامي والكاتل والمرتشي والزاني كلها صارت سياسيين وضاع الصدك الضحى وجاهد من الي خلصوها سجون من سوالفهم التعبانه كلها كالت جنت احارب صدام وعلي منهم وخاصه سالفه جعفر فادته من السما للكاع ورجع بزودها
رشا : مثل اخو سندس رجع ورجعها وياه على طاريها بهاي العركه بس هي ناقصتنا جان كملت
نهر : الله لايريحها دنيا واخره اخذت هلواحد وطفرت وعافت اخويه يضرب اخماس بأسداس لا عبالجن ابوجن ناسي الله يعلم بحاله وحال گلبه
رشا : اكولكم ريم وين
نهر : دخلتها بغرفه طه شو صنطه مطلعت
سليل : اكوم اشوفها
رشا : اخذيني وياج
طبينا بلغرفه لكيتها فاتحه الشباك مال الغرفه وتفرح بلبرده وتباوع على وره البيت
ريموً بيج شى
ريم : لا
رشا : مبين من هيج راح اطكين احجي
ريم : شفتو جاي وره خمس سنوات ويدافع عن بيبيته
سليل : اكيد يدافع غير بيبيته وخاصه هاي السنوات اكيد دوم هي وياه وتعلق بيها
ريم : يطبه طوب هو وياها بس ميعيط عليه اشتغل عنده لو عند انعام
رشا : لتنسين انتي هم مكعدتي راحه ويجوز ردت فعل عاديه منه
ريم : هو خلص طفولته ويانه شنو نسه شسوت بينا لو السفر والخارج غيره
سليل : هسه انتي ليش محروك گلبج
ريم : انقهرت منه لان عيط عليه
سليل : ميخالف على كيفج لتضوجين كلشي يتصلح ولو ماطول انعام رجعت اكص رجلي وايدي اذا تصلح شى
رشا : امشي اطلعي من الغرفه ليجي بابا وهم تعالي غسلي وجهج وراح علاج تحطي
ريم : مااحط تعبت لعبت روحي
سليل : ريم بله دلع وامشي واسمعي الكلام
ريم : اهوووو رحت غسلت واذب مي على وجهي من حراره جسمي احس المي يتبخر جنت حيل مقهوره منه لان عاط عليه جنت مشتاقه اله لدرجه متوقعتها بس وضعه وكفته ويه انعام صدمتني وخلتني اعيد حساباتي كلها بطبعي من اضوج ماابجي اله نادراً من احس الالم يكطع بيه يله تنزل دموعي وبسبب هذا الشى اتأذه لان اكتم بگلبي
اجه بابا وحجوله كلشي وهو تعصب اني دخلت للغرفه وكعدت العب بلتلفون اقضي وكت اذا انزل انهد على انعال واضل اخربط بلحجي من حركت گلبي
حجي طه : بعد من تجي لتفتحون الباب الها
سليل : متوقعناها تجي وفوكاها تتعارك
حجي طه : الله يهديها اني بكل الاحوال الم شوي شوي بفلوس جنات والحمدلله شغل المحل خير من الله بس خايف
نهر : من شنو
حجي طه : سمعت علي راح يفتح مطعم بلجهه المقابيلي ونفس مطعمي نفس الاكلات وهذا الشى راح يخفف الرجل عليه
رشا : يعني خلصت الاماكن اله يمك
حجي طه : شسوي اتعارك وياه هم يكولون الناس انت شعليك بيه هو الرزق على الله
سليل : هذا حسد عيشه ميصير هيج
حجي طه : والله يابنتي من سمعت اجو انقبض گلبي
نهر : وين نولي منهم صار سنين خلصانين وهاي تاليها يرجعون وفوكاها يحاربوك برزقك
حجي طه : خلي نشوف الايام الجايه شيصير ومحسن كال لازم بعد نهتم بالاكل حتى ميكدر يكسرنا
رشا : عيشتيش هاي ياربي يعني هذا اخ لو عدو
حجي طه : يابنتي مع الاسف ابن ابويه عدو الي هذا هو الْحٍمَدٍ للـّہ على كل حال الاريده منكم مالكم دخل بيهم تجي انعام تهوس بلباب لحد يفتح الها وجنات بلكت اروح باجر لرجلها وافهمه الموضوع
نهر : لتروح ولا توصل بس تروح يگبر راسه ويتشمخر عليها ويجوز يإذيها منعرف شنو الي كالته لرجلها وسكتته منريد يصير التباس بين حجيها وحجي مالتك هي اذا اكو شى او سوالها شى راح تجي تبلغنا
حجي طه : والله بالي يمها هلبنيه مالها ذنب وانداست بلرجلين
نهر : ان شاء الله انت موجود وماعليها شى لتخاف بس خلي هي تتصرف
حجي طه : الله كريم ريم وغزل وين
رشا : فوك بلغرفه
حجي طه : اطب ارتاح مااريد عشا راح اصلي وانام
نهر : ليش ياعيني اكل ويانه شويه
حجي طه : مجوعان اكلو انتم بلعافيه
سليل : بيومها محد تعشى الكل مخنوك رجعه انعام المزعجه عكرت حياتنا
وريم الي تاكل بأضافيرها ٢٤ ساعه ومتوتره ورشا دوم ويه شعلان ومره عسل ومره بصل متمالخين ودوم هو الي يسكت ويعدي الوضع
ريم : بقيت متوتره لثاني يوم كعدت الصبح وطلعت بلحديقه الم الورق مال الاشجار واكطع بلحشيش
رشا : شسوين
ريم : طلي ويكطع بلحشيش شسوي مو كدامج داانظفها وشبيج هيج عصبيه ومن البارحه لليوم صوتج ماسمعناه
ريم : مابيه روحي لشعشوعي مالتج وجوزي مني
رشا : ههههه هسه جنت احجي وياه وتعاركت وسديته
ريم : مخابيل شلون راح تتزوجون مااعرف شبيج وياه
رشا : هاي هند اخته فد حقيره حاطه كورها وكوري واني ولا يمها
ريم : اكرصيها كرصه زينه حتى اتوب وشبيهه رجلج يسمع الها بعدنا بسم الله
رشا : لا هو بلعكس كعد يكول اخاف تحجي شى لتجاوبيها اسكتي واني اخذلج حقج واني مقبلت شنو ناقصه لسان
ريم : ميدري متزوج ام اربع واربعين لسان
رشا : وانتي خطيه فقيره
اوكفي هاي منو اجه تقربت من الباب شفته حسين
هلوو حسوني
حسين : صباح الخير
رشا : صباح النور تعال تفضل
ريم : شكوو مبين نسيت تعيط بعد اجيت تكمل عيطتك وتروح درت وجهي منه واكطع بلورق مال شجره الرارنج
رشا : اني عمه تريدني شويه واجي طفرت وعفتهم مبين جاي على ريم
ريم : حسيته ورايه وجان يكول
حسين : شسوين
ريم : الم الورق
حسين : تره الورق بلكاع انتي كطعتي الشجره
ريم : انداريت عليه واريد اكطعه شتريد
حسين : هاااج
ريم : باوعت علاكه مال هدايه احجي ومتعصبه هاي شنو
حسين : هديتج جبتها ويايه من اجيت من السفر
ريم : شكراً خليها الك
حسين : اول مره تردين ايدي
ريم : لان انت مو سحليه القديم
حسين : ليش شنو التغير
ريم : سحليه القديم جان ميقبل احد يرفع صوته عليه ولا يضوجني ولا يسمعني شى موزين
حسين : انتي تجاوزتي ولتنسين كبرتي مو ريم الصغيره المتعرف تحجي او العصبيه حتى الواحد يسكت على سوالفها المفروض انتي طالبه جامعيه وتكونين اهدأ واعقل وكلامج موزون ريم انتي كبرتي
ريم : متكول هذا الشى لبيبيتك لو الكبر والصغر بس من يم ريم
حسين : مهما كان تبقى مره جبيره وعيب تجاوزين عليها
ريم : مو انت الي تعرفني العيب اسمع حسين اخاف شفت نفسك تغيرت وكبرت وكمت تحبها وتتقرب منها ومتقبل احد يتجاوز عليها لان هي ام ابوك احنا وبلذات اني ابقى اكرهه واموت منها لاخر يوم بعمري وهي متقربلي بشى واهم نقطه انت تغاضيت عنها تره مو احنا الدكينا بابها واتعدينا عليها بيتها هي الاجت وتجاوزت وحتى طعنتنا بشرفنا وانت شسويت ساكت عود كل شويه تكول الها اسكتي بيبي ومن حجيت اني عطت بيه
حسين : شسوي يعني مره جبيره ومريضة ومااكدر أذيها لازم الواحد يتحملها وكدامج اخر شى اخذتها من ايدها وطلعتها مجبورين نتحملها
ريم : انت مجبور تتحمل مو احنا هي لا تقرب النا ولا تقرب لبابا غير مرت ابوه وانت اكثر واحد عاش ويانه معاناة القهر من انعام وحتى من انهزمنا من بغداد لان انت بنفسك اجيت وگلت لبابا اخذهن وروح لتأذيكم شنو نسيت اذا نسيت اذكرك
حسين : متوقعت بعد هاي السنين تبقين هيج حاقده
ريم : واكثر والله الي بگلبي على هاي المره جبال من الحقد والكرهه واذا فكرت بيوم تصير بيني وبينها راح اكرهك وياها
صفن بوجهي شبيك صفنت سكت مجاوب عدتها عليه شبيك صفنت اكو شى
حسين : اشتاقيت لعصبيتج
ريم : شنو
حسين : اشتاقيت لنبره التهديد بكلامج اشتاقيت لايدج من تحجين وانتي عصبيه تهتز وتأشرين بيها
ريم : هنا مثل مي بارد وذب عليه مباشره اختفى صوتي وسكتت
حسين : اني حسين ريم لتنسين هذا الشى
ريم : دمعت عيني وكتله انت نسيت ورحت حتى مسألت شصار مصار ميته عايشه
حسين : الله يعلم بحالي شلون جنت واني اتمنى خبر ولو صغير عنكم وماعندي احد ادزه حتى يسأل ومكدرت انزل لبغداد ابويه جان مانعني اتصوري حتى الجواز اخذه لان اكثر من مره ردت اجي
ريم : وشعجب هسه اجيتو
حسين : رتب اموره وكدرنا نرجع
وطول الطريق واني بس افكر من اشوفج شراح اسوي
ريم : خوش سويت عيطت عليه وبرطمت
حسين : ولا تكبرين بعدج نفس السوالف والهوسه ونفس من تزعلين الشفايف تبرطم والعين تدمع ومتنزل دموع هاااج ريمتي اخذي
ريم : اخذت من ايده وفتحت العلاكه لكيتها لوحه من قماش طلعتها جانت صورتي حياكه جانت بمنتهى البداعه والجمال
بس الصوره واني وصغيره
هاي صورتي من صغيره
حسين : تمنيت يكون عندي صوره وانتي جبيره بس تعرفين شى محلوه
ريم : لا بالله
حسين : ولو انتي من الاول حلووه
ريم : ابتسمت وباوعت على الصوره وكتله بيها خلل
حسين : شنو
ريم : البكع مالتي ماكو
حسين : اني من طلبت يشتغلون بيها يشوفج بعيوني مو بصوره
ريم : يعني شلون
حسين : يعني اني اشوف ماكو بكع وكتلهم تسوها مثل مااني اشوفج
ريم : بس اني كعد اتعالج
حسين : حتى لو متعالجتي تبقين حلووه
ريم : باوعت عليه هدوئه وركازه كلامه واناقته تخليني اهدأ واسمع اله و اشوف نظرته الي نفس نظرته القديمه اني من جنت صغيره اعتبره صديقي الصدوق وابن عمي بس هسه شراح اعتبره يبقى داخلي هم بس صديقي
حسين : اتريكتي
ريم : لا
حسين : يله جوعان امشي نتريك سوه
ريم : يله مشينا شويه وكال
حسين : لتزعلين ريمتي مني تره ميهون عليه زعلج
ريم : ماازعل بس بعد لتعيط
حسين : وانتي هم لتهددين
ريم : امممم اشوف
حسين : يله ناكل جعت تره
ريم : والله مو بكدي
طبيت مكيفه وطايره من الفرح بكم كلمة منه كدر يغير حالي كله وكعد ويانه وعمه كيفت لان اجه ومذكرنا ابد شصار ولا جبنا طاري انعام
وره اسبوع جان موعد طبيبي وهو موجود يمنا وكال اني اوديج وبوكتها رشا كيفت لان تريد تطلع ويه شعلان
نهر : عينك على بنت عمك حسوني
حسين : شنو جاهل كدامج ياعمه
نهر : يمه رجال والنعم منك بس تشوف الوضع والمفخخات يخوف الشارع من الطبيب وتجيبها لتتأخرون
حسين : مااشي
ريم : نزلت لابسه بنطرون جينز وقميص طويل سمائي وربطه وجنطه صفح وترانشوز اني مااحط مكياج بس كحل ومسكارا واصلاً ممنوع احط اي شى على وجهي علمود العلاج بس احط ذني لان بدونهن عيوني تصير ميت طالع من الكبر بگفاله كملت ونزلت
طبيعتي من انزل الدرج اكمز
نزلت صار بوجهي
حسين : لتوكعين يمعوده ليش تكمزين
ريم : احب اكمز يله كملت
طلعت وياه وكفت بلباب
حسين : يله اصعدي
ريم : هاي سياره منو
حسين : سيارتي قبل يومين اشتريتها
ريم : طكوك ومنيلك فلوسها بله من بابا السياسي
حسين : ريم لسانج شويه
ريم : سكتنا يله خلي اجربها شعليه اني ماعسى فلوسها من انعام المهم توصلني للطبيب
صعدت وياه وجانت السياره موديل ٢٠٠٧ حديثه ومبينه غاليه بجيسها بعدها
ريم : شغل اغنيه شى وين رايحين للمكبره
حسين : صار ست ريم
شغل وطلعت اغنيه
لتسولف علينة من يسألون
عيون الناس لاتحسد عشكنة
واذا طلعت شمس فوت انة للبيت
لان شمسين معناها احتركنا
من احضنك احضن الدنيا بدية
حبيبي وغالية عيونك علية
بسرعة الوكت صاير يخلص وياك
الهوا انتة واذا رحت اختنكنة
واذا طلعت شمس فوت انة للبيت
لان شمسين معناها احتركنا احتركنا
ريم : حلووه هاي الاغنيه مال منو
حسين : محمد عبد الجبار
ريم : حبيتها بقيت اسمع ويااه بس حسين جان يغني بهدوء وياها ومره يباوع عليه ومره على الشارع عطت بيه يمعود لتدعمنا
حسين : فززتيني ابد متسوين واهس لواحد يسمع اغنيه
ريم : عود من نندعم وينقلونا للمستشفى اغنيلك سلامتك من الااااااه وخوش اسويلك جوو استعجل ليروح علينا الطبيب
حسين : صار
ريم : وصلنا لعياده الطبيب وكعدنا بالانتظار شويه وصل السره النه
هااا راح تدخل ويايه
حسين : لعد ادخلج وحدج
ريم : اوك تعال ادخل شبيك گلبت وجهك
دخلنا للعياده واستقبلنا الطبيب
دكتور سامر : هلو بست ريم
ريم : اهلاً دكتور
سامر : تفضلو اخوج الاخ
حسين : لا ابن عمها
سامر : هااا اهلاً وسهلاً
طمنيني شلونه العلاج وياج
ريم : دكتور مرات يحرگني والمناطق الجبيره ماكو اي تغيير
سامر : ميخالف من الاول كتلج مرحله العلاج ويايه راح تصير طويله تفضلي خلي اشوفهن
كعدني مثل كل مره وجهه الضوه وبده يتلمس منطق العلاج طبعاً بس بوجهي وافتح الربطه اكو كم وحده برقبتي يشوفهن والي بجسمي اوصفهن اله شفت حسين طفر وانزعج وبقى يلوب حس عليه الطبيب
سامر : اخذ راحتك اخي بين مااكمل الفحص
حسين : ميحتاج باقي وياها
سامر : مو شفتك كمت كلت اذا تريد اخذ راحتك شوي ونكمل
حسين : ميحتاج باقي
ريم : منداريت على حسين لان مبين من نبره صوته صاير نار كمل الفحص وكتب على عصاره جديده
شكراً دكتور تعبتك سلملي على زينه
سامر : هذا واجبي عود تعالي زورينا زينه اكيد راح تفرح بجيتج
ريم : ان شاء الله شكراً مره ثانيه
سامر : لتنسين موعدج تره انتظرج منريد نغلط بلعلاج
ريم : ان شاء الله ما اتأخر
طلعنا وحسين يمشي كدامي وعصبي حيل من اجه اول مره اشوفه هيج
صعدنا بلسياره ركع الباب حيل وصعدت وشخط السياره من السرعه گلت والله ولانوصل للبيت گبل لشعبه الكسور بقيت ساكته وصلنا لنص الطريق جان احجي بهدوء
شبيك ليش احسك ضايج
محجه شى وبس عيوونه على الطريق
شبيك سحليه
جان يعيط اسمي حسين مو سحليه افتهمتي واحنا كبرنا ومااحب هيج ادلعيني جانت عيطه قويه لدرجه انخمش گلبي ورجفت منه مدري خوف مدري ممتعلمه عليه هيج يتصرف ويايه
اني مااكدر اسكت مباشره كتله ماشي بعد مااكول سحليه وانت هم متكول ريمتي اني مو ريمتك اني ريم وبس
جان يطبك ويوكف السياره واندار عليه
حسين : شكو بينج وبين الطبيب
ريم : هاااا
حسين : وجعا شكو بينكم
ريم : ههههههه هههههه
حسين : مو احجي وياج شنو السفاهه الي انتي بيها
ريم :هههههه والله شكلك يضحك ياطبيب بابا الدكتور سامر
حسين : لتنطقين اسمه لهذا الطايح الحظ بعد شويه وافلش وجهه
ريم : غابت ضحكتي واستغربت تصرفه ليش شكوو حتى هيج تسوي شنو البدر منه
حسين : جان عيونه عليك ويدقق بجسمج ويتلمس بشرتج
ريم : تره اني لطبيب جلديه تعرف شنو جلديه يعني وظيفته الجلد مالتي بشرتي يلمسها ويفحصها
حسين : وتفتحين الربطه اله ويتلمس رگبتج
ريم : انت صدك تحجي غير دكتور واني مريضه ولازم يشرف على حالتي ويشوف لوين وصل علاجه شتريد يلزم عوده الماسحه ويطخ الجلد مالتي حتى لتتضايق حضرتك وثانياً لا حياء بلعلم والطب وممسويه شى غلط
حسين : كل مره منو يجي وياج وادخلين وحدج اله
ريم : كل مره لو سليل لو رشا وتعال كولي انت بيا حق تحاسبني
حسين : ليش نسيتي اني ابن عمج
ريم : انت النسيت صارلك ٥ سنوات عايفني ومتعرف شى عني طبيت طلعت سويت شى مسويت لا عبالك مفهمت حركاتك تره مو ريم الي تقبل على الغلط ولو حاسه لمسته بيها تجاوز انزع الي برجلي واحطه براسه بس ادري بيه من صميم عمله والرجال ثكيل ومحترم لاتبقى تتعصب وتعيط وتسوي نفسك المحافظ عليه تره خلصت مراهقتي وحدي وماسويت العيبه وهسه صار سنتين بلكليه وحدي لا احد تعرضلي ولا اسمح احد يتعرض بدون ماارده
جر نفس وطلع من السياره وبقى يتمشى يروح ويجي واني اباوع عليه والله شكله حلوو من يتعصب هم بيه بله توقعته هادئ
نزلت الجامه وكتله استاذ حسين المحترم ممكن ترجعني لان تأخرنا
اجه صعد وشغل السياره وكام يمشي على كيفه باوعت كتله اوكف
حسين : شكوو
ريم : كتلك اوكف وهو طبك السياره
حسين : شبيج
ريم : انزل جيب لفات جعت غير ابن عم كرميده
حسين : كرميده شنوو
ريم : يعني بخيل
حسين : اني بخيل
ريم : اي انت هسه طلعنا وراح نرجع وانت مموكلني شنو معناها
حسين : صار شتاكلين
ريم : لفه كص ولفه همبركر وقوطيتين ببسي الحجم الجبير لتصفن بوجهي اي وحدي اكلهم
حسين : وين يروحن وانتي رشيقه
ريم : يرحن لمصرف الدم شلك دخل وين يرحن المهم اكل جعت يله
نزل وراح جابهم وجاب اله همبركر وكعدنا ناكل هو كمل قبلي
ريم : جوعان بعدك
حسين : لا شبعت
ريم : تره ماانطيك مني اني قصدت اجيب لفه وتاكل ويايه احسن ماتحط عينك على لفتي واغص بيها
باوع عليه وابتسم
ريم : واخيراً بينت سنونه والله حلوات ليش مطلعهم
حسين : اكلي وامشي ارجعج وبعد مترحين لهذا الطبيب اله رجلي فوك رجلج
ريم : معناها اوكع على وجهي امشي بصفي احسن
حسين : رييييم
ريم : ينعم
حسين : لتستفزيني كولي اي وانتهى
ريم : اي وانتهى
حسين : وتالي وياج
ريم : حاضر يفندم ارتاحيت
جر نفس وكال اي
يله رجعني واللفه بعدين اكلها لوحدي اخاف تريد عضه منها واتسمم بيها
حسين : ام بطن ااخ منج
رجعنا وصلني للبيت ودخلت جان اكو احساس غريب بس اغالط نفسي اكول شنو معنى تصرفه لحسين واعصابه معقوله يحبني وارجع انفض راسي لا لا اني اخته وبنت عمه مااتوقع وارجع اكول ليش مااتوقع وتصرفه وجنونه اليوم جان دعمنا من الاعصاب خلي اراقب تحركاته والله كريم
سليل : مرت الايام واليوم مجتمعين كلنا ويانا حسين وعمو محسن والكل يعيط جانت لعبه السعوديه والعراق نهائي كأس اسيا والكل مشدوده اعصابه وريم رافعه البجامه وشاده شعرها بعصابه وتكمز وكل شويه تكفش شعر حسين من ميكولون
ومن اجه الهدف على السعوديه اشتغل العياط والهلاهل حتى ماما نهر نذرت خبز العباس المستعجل بس يفوزون رغم احنا اكثرنا منحب الطوبه بس هذا اليوم وهاي اللعبه بلذات اجت بوقت العراق كله ينزف دم ومحتاج ولو فرحه بسيطه وبس فازو اشتغلت الطلقات والهلاهل واجه مباشره شعلان استأذن من بابا اخذها وطلعو وريم تكمز حسين اخذهم هي وغزل وعمو محسن الي يهز جتف كل شويه وفرحان
بقيت اني وماما نسوي الخبز ونوزع شكد الشعب امنياته بسيطه يريد بس يفرح مطالب شى جبير
رغم بوقتها جانت الطائفيه بأوجها لكن الناس كلها طلعت تهوس وتوزع جكليت محد يكول للثاني انت سني لو انت شيعي لو مسيحي لو صابئي بس عراقي وبس
يمكن هاي اللعبه البسيطه بينت للناس شكد الشعب عراقي گلب على گلب بس الميخافون من الله هم الي زرعو الطائفيه وخلو الگلوب تتلون دم
مرت ايام واشهر اني كاعده بلبيت تعلمت ورشا سنه اخيره تخرج وريم مرحله ثانيه اداوم وغزوله بكلوريا حياتنا عاديه بس بابا حبيبي يعاني من علي فتح مطعمه وكام ينافس بابا برزقه بس الناس اكثرها تحب اكل مطعم بابا وتعامله الطيب ويه الناس والعمال وهذا الشى خله عنده معاميل دوم يترددون عليه
وبدايه السنه شهر الواحد تحديداً اندك التلفون على عمه شالته وسمعت عيطتها وتصيح سوده بوجهي ولج يمه تعزيتي وتصخمتي ركضت شكوو ماما
نهر : عدي رجل جنات گتلوه
سليل : عطت شنووو
نهر : ولج بايكين سيارته وذابحي وشامري بلشارع وجنات تلطم تعزت وتصخمت يبوو على حظج يمكروده
سليل : خابرت رشا وريم وبابا لازم كنا نروح الها الله يعينها ومباشره لبست اني وماما ومرينا على غزل للمدرسه اخذناها وبتكسي گبل لبيت جنات ورانا اجوي الباقين
وصلنا للمنطقه بابهم هوسه طبينا ركض ونشوفها تملخ بشعرها وتعيط ركضت ماما حضنتها واني وياها وابجي على حالها
جنات : عمه ذبحوه عمه ضليت بليه سند ابني تيتم مثلي
نهر : سوده عليه يمه على كيفج راح تموتين
جنات : عمه راح راعي بيتي انهديت وراه منو اليه طلع من الصبح يبوس براسي جنا متعاركين صالحني وراح تكول گلبه حااس
سليل : جان حاال جنات يكطع الگلب وكل شويه تملخ بروحها وشعرها متهستره وابنها يبجي اخذته غزل تسكت بيه واجوي اهله وجابوه جان يوم مأساوي اباوع عليها شلون فاقده الله يعينها شراح يصير بيها
اخذتها رشا بحضنها ونومتها بعد منطتها مسكنات ومنوم خفنا حيل عليها حالها وحال اهله يكطع الروح اباوع عليها المسكينه وهي نايمه تنزل دمعتها ماتهنت ويه رجلها شافت منه وهذا ابنها العمره سنه منو اله شنو ذنبه يتيتم اخذو سيارته المن گتلتوه
وثاني يوم الفاتحه طبت انعام وام حسين ونورس اخت حسين الي هسه يله شفناها واصلاً معرفناها اله من اجت سلمت على جنات متغيره وصايره شابه وحلووه بس شايله خشمها سبحان الله ولا تغيرت نفس الطبع النكس مغروره وعبالك كل الناس اقل منها احنا ولا وحده سلمت عليها بقينا كاعدات يم جنات وبعدين اني وريم نشتغل وغزل حايره بلطفل
شويه وتقربت انعام منها
انعام : شفتي يمه حركت الگلب العزيز حتى لا تلوميني من احجي عليج من انطيتي الفلوس لطه
نهر : كعد تشوفين احنا وين احنا بفاتحه يوم تعرفين شنو فاتحه
رشا : والله گويه حتى الموت متخافين منه
انعام : انجبي بنت طه مسمومه على امج
رشا : مااجاوبج احتراماً للعزه وللميت
جنات : كوميني رشا وديني للغرفه مااريد اشوف احد
رشا : كومي حبيبتي حقج ناس متخاف الله تتشمت بلميت واهله شيسوي الله بعد بيج وتتعضين والله مااعرف شيسوي
نهر : كومي رشا اخذي جنات وطبي
انداريت على امي تره والله حرام عليج متشوفين كسرتها يعني فوك متاخذيها بحضنج هاي بت جعفر بنته نسيتي لجعفر توقعت اجيتي توكفين وياها مو تأذيها
انعام : شحجيت بت الگلب استلمتيني حاصل فاصل غير ردت احسسها شنو الصار بيه من عرفت سوايتها
نهر : انتي ما ميته عليها ميته على الفلوس هو من زمان هيج انتي هو منو وقع ابويه وهو على فراش الموت مو انتي
انعام : نهر اسكتي تره اگلب العزه هسه على راسج
نهر : اكوم اشوف البنات احسلي
سليل : كملنا الفاتحه وجانت جنات فاصله من القهر واخر يوم بليل وره ماراحت الناس وبقو بس اهله وامه الي مكسوره وكاعده طب بابا بعد مستأذن منهم حتى يشوفها اول مدخل ركضت بحضنه تبجي
جنات : مات عمو عافني وراح وابني تيتم مثلي شفت حضي مامكتوبلي افرح
حجي طه : اشش بنتي قل لن يصيبنا الا ماكتب الله لنا
جنات : شراح اسوي عمو ضليت وحدي
حجي طه : واني وين اروح بنتي تره بعدني ما متت وبيتي هو بيتج من رخصت ام عدي بنتي جنات بس يخلص السابع اخذها ويايه
ام عدي : اخذها المن ضاله بعد ابني ومات
نهر : هي اصلاً مجانت تحب جنات بس هذا حفيدها ناس والله عجيبه لا موت يهزها لا مصاب
حجي طه : بنتي خلصي السابع جيبي غراضج وتعالي يمنا وابنج بعيوني لتخافين
نزلت باست ايد طه
جنات : الله لايحرمني منك عمو
حجي طه : طول ما اني عايش مااخلي بشر يلمس شعره منج وحالج من حال البنات وابنج اربي الج احسن تربيه والتردي يجرالج كله قسمه بنتي وارضي بنصيبج
سليل : حسيتها ارتاحت وخاصه ام عدي كوه تباوع بوجهه يعني غير وحده اقلها ايام الفاتحه تحن على مرته على ابنه هاي ولا يمها وكمنا نروح ونجي وثامن يوم جبنه كل غراضها للبيت الكبار بقيناها وبس الملابس والفلوس وذهبها وكالت ابيع الاثاث ونهايه الشهر نسلم البيت لابو الملك لان ايجار
رجعت جنات النا بعد منزفت من هذا البيت وهلمره رجعت وياه طفل جانت مكسوره وحزينه نحاول نخفف عنها بس هي جانت من الكسره اكل متاكل
ولزمت عده بلبيت وطول مده العده معفناها نحاول نخفف عنها وصارت صديقه رشا حييل ودوم سوه وريم تكمز بينهم
اما غزوله هي صارت الراعي للطفل روحها بيه حتى تنومه يمها وتتونس عليه
وبمرور الاشهر گبت العيطه بين رشا وشعلان
شعلان : اني شنو ذنبي انتظر بعد معودت تتخرجين
رشا : غير زوج بنت عمي يعني شلون انزف وهي حزينه والسنه بعدها مطالعه
شعلان : قابل مسوين حفله وقاعه هي زفه عاديه
رشا : مااكدر شعلان اذا متعبر السنه منتزوج
شعلان : گلتي سنه ونص علمود شهادتي وافتهمت هسه مال انتظر اكثر من ٦ اشهر ثانيه اعذريني
رشا : واني مااتزوج
شعلان : مو بكيفج انتي مرتي والله اكدر هسه اخذج كوه
نهر : شبيكم ياستار صوتكم لوين واصل
شعلان : تعالي يعمتها واحكمي تريد الخاتون انتظر للسنه الجايه بشهر الثاني يله نتزوج علمود والله شنو زوج بنت عمها مات هسه هو صار ٥ اشهر من مات الله يرحمه اني شنو ذنبي انتظر للسنه الجايه واني خاطب صار سنه ونص
نهر : انت حقك والله بس انت هم قدر موقفها
شعلان : لا اقدر ولا شى عندج منا لشهر اذا مصار الزواج
رشا : اي شسوي بله
شعلان : اخذج غصب وبهدوم البيت والله
رشا : عمه كعد تسمعين كلامه
نهر : تهدو بلرحمن وخلي يجي طه ونشوف
شعلان : العندي كلته ودزولي خبر حتى ابدي احظر كلشي
رشا : كتلج مااتزوج هسه
شعلان : ماامشي بكيفج يجي ابوج ونشوف
سليل : اجه بابا وكلنا كاعدين وناس تجر طول وناس عرض جان تنزل جنات
جنات : رشا اتزوجي ميصير تأجلين عرسج شنو ذنبه ينتظر خطيه
رشا : والله هذا الموجود ميصير
جنات : اذا عليه اني اهلهل الج مو بس افرح قابل تإجيلج للعرس راح يرجع الراح توكلي بالله وخلي عمو والبنات يفرحون كافي ذيج الايام انكسرتو وحزنتو ويايه
بداعتي بغلاتي اذا عندي معزه عندج توكلي بالله عمه فدووه اريد رشا تطلع احلى عروس
نهر : يمه الله يكملج بعقلج
ريم : كلللللووووش زوجناها واخلصنا منها
رشا : هااا خلصتي مني
ريم : اي خلصت سبع حجارات وراج
سليل : وصلنا الخبر لشعلان واجه طاير ممصدك واخيراً انحلت رشا راح تكعد بمشتمل ايجار بعد بيتين عنا ونروح ونجي نحظر المشتمل وقبل العرس بكم يوم تتفاجأ رشا بخبر هزها وخرب فرحتها
رشا : شنو نعيش بلكوت
شعلان : مااكدر بعد ابقى بغداد وضع كاعنا ادهور والعمال تشربت بلشغل وكومه خساير
رشا : اني مااعيش بلكوت
شعلان : تره اني مراح اعيشج بقفص مال دجاج بيتي شكبره ومقفول تجين على مزاجج تأثثي اسوي قصر الج
رشا : مو شغله صغير او جبير اني مااكدر ابتعد عن بابا وعمه والبنات
شعلان : ماعندي غير حل لازم رشا نروح نعيش هناك لو اخسر كل حلالي
رشا : انت مكتلي هيج وكمت ابجي فكرة اتخيل اروح بعيد عنهم تموتني زين مو الامريكان يدورون عليك
شعلان : هاي شغله قديمه وانسدت وهسه وضعي امان وماكو اي خطر عليه رشاوي بداعتي لتبجين والله اعيشج احسن عيشه هناك ومااقصر عليج واهلج كل شهر اجيبج يمهم ساعديني بقائي هنا يدمر كل حلالي وفلوسي
رشا : مااروح للكوت لو اموت واذا متكدر الغي كل شى
صعدت اركض للغرفه ابجي
سليل : شبيج الرحمن
رشا : يريد ياخذني للكوت
سليل : ليش
رشا : نعيش هناك
سليل : بس هذا مو اتفاقكم
رشا : مااروح ومااتزوج وخلي يجي بابا ننهي
سليل : اوكفي واصبري
رشا : لا اصبر ولا شى مااروح يعني مااروح
سليل : نزلت على عمه الجانت تحجي ويه شعلان وهو طلع اباوع عليه مقهور كلش خطيه فرحتهم مكملت وبعد اسبوع للعرس
نهر : تعالي بنتي شبيج
رشا : شفتي شلون قشمر عليه كال نتزوج هنا بغداد وتالي ياخذني للكوت
نهر : وشبيهه الكوت مو ناس عايشه بيها وحلوة واشكال المناطق المرتبه بيها
رشا : مو على المنطقه ولا البيت عمه اني مااكدر بدونكم اني بعد بيتين متخبله مو عاد للكوت
نهر : شوفي بنتي البنيه من تجي للدنيا تبقى بحضن ابوها وامها وبين خواتها ومن تكبر وتتزوج تودع هذا الحضن وتروح لحضن رجلها لازم المره المعدله تتبع رجلها وين ميكون وتساعده وتكون عون اله شعلان محتاج مساعدتج الي يحب يضحي ومهما هسه بقيتي بينا مرجعج لحضن شعلان وشفتي شلون يحبج ويتمنى الرضا منج لتكسرين فرحتج وفرحته يابنتي واذا علينا شو تلفونات وموجوده يوميه نسمع صوتج وتسمعين صوتنا وهو وعدنا شوكت متردين يجيبج النا بنتي المره مالها مكان غير بيتها ورجلها كولي ياالله وكومي غسلي وجهج عروس وتبجين فال محلوو
رشا : بس اني مااريد اعوفكم
نهر : انتي عفتينا يايمه يوم مراح اطلعين بدلت العرس راح تودعين حياتج يمنا وترحين تبنين حياة ثانيه لا تبنيها من اولها على زعل ومشاكل وعناد خليج عاقله شعلان خوش شعلان ويموت عليج كسبتي محبته لا تخسريها حبيبتي وكافي بيتج وحدج ومحد يأذيج لا عيال ولا فلان ولا علان وهو كال حتى مدرسه هناك اعينها واخليها اداوم كومي حبيبتي ورانا عرس نريد نفرح بيج
طبت ريم تبجي
ريم : راح ياخذج للكوت وحضنتها ليش مترحين
نهر : اشش انتي الثانيه معودت قنعتها
ريم : راح تعوفنا عمنا اموت اذا راحت وبعد مااشوفها
نهر : اسم الله عليج بنتي غير تتزوج وتروح وره رجلها
ريم : لا متروح لو اني لو شعلان
رشا : حضنت ريم الجانت تشهك انتي اكيد هذا هو عفته
ريم : وخرت من حضنها يعني راح تعوفي
رشا : لخاطرج اعوف الدنيا مو بس شعلان
ريم : مسحت دموعي وكلت لا خطيه هو يحبج مشعول هم انقهر عليه
رشا : مااروح ولا اتزوج اله انتي توافقين
ريم : موافقه بس يوميه تخابريني
رشا : وعد والله يومياً وحضنتها وابجي جنت حاسه روحي راح تطلع شلون اعوف خواتي واروح بس هاي سنه الحياه واجت سليل لازمه الصينيه هي وغزل ويدكن ويهلهلن وجنات واكفه تبتسم وتصفك لخاطري
عروستنا چكليته وحامض حلوو باكيته كللللووووش
واجه يوم العرس
ولبست البدله اول غزلان حجي طه
جانت رشا طالعه تجنن بدلتها نازكه وتسريحه بسيطه وتاج وطلب شعلان تلبس كبوس فوك راسها مقبل شعرايه تطلع منها رغم عناد رشا بس بالاخير قبلت بعد محلف يلغي صور الاستديو اذا طلعت شعره منها وهي خافت لينفذ كلامه
ولبست الكبسور
قبل ليجون نزلت بدله العرس واحنا وراها مندري نفرح الها لو نبجي تنزل بايه بايه وبابا واكف منتظرها اول موصلت ليمه نزلت باست ايده
اشوف بابا دموعه تارسه وجهه جان يفتح علبه ولبسها كلاده جبيره قران وزنجيل و٦ بتوت (سوارات) وعمه محبس وترجيه صارت سيت كامل
حجي طه : الله يجعل ايامج كلها فرح
وباس راسها بابا مااوصيج على نفسج ورجلج اريدج ترفعين راسي
رشا : ان شاء الله بابا
حجي طه : اعرفج سباعيه وام بيت الله يحفظج بنتي ولتنسين اني يمج شوكت مترديني على كد الطريق تلكيني گبالج
رشا : الله يحفظك النا ورجعت حضنته
وحضنت عمه وبستها وكتلها انتي امي والله امي حتى لو بيوم ما نطقتها انتي امي وبست ايدها شكراً على كلشي والله يحفظج الي يااحلى واحن ام بلدنيا
نهر : كمت اشهك وابوس بيها اليوم ازوجت اول بناتي احس قطعه من گلبي انشلعت
رشا : اشرت لريم توأمي ونصي الثاني بكل شى بلخباثه بلخطط بلمصايب هاي سكينه مالتي حضنتها وهي تشهك وابوس بيها
امانتج البيت وخواتج تره ذني فقيرات وفاهيات عايفتج حمايه الهن
ريم : ابجي واشهك واكول الها من عيووني بس ديري بالج على نفسج واذا سوالج شى موزين بس خابري اخلي سحليه يجيبني هلمره احرك اهله مو بس هو
رشا : هههههه لتخافين اختج سباعيه
رحت تمشيت مسافه واني اشوف اختي الجبيره الي مابيوم حسيتها اخت بكثر ما حسيتها ام حضنتها وبست ايدها رغم مو هواي فرق بأعمارنا بس سليل منبع الحنان اخت وام وصديقه النا
سليل : راح اشتاقلج
رشا : متخلصين مني يوميه اخابركم
سليل : ديري بالج على نفسج وبيتج ولتسوين مشاكل رشاوي وديري بالج على شعلان
رشا : هو يدير باله لو اني
سليل : لا والله انتي لان اعرف سوالفج والله يساعده عليج
رشا : هههههه ويساعدني على خباله تعاالي غزوله وهم حضنتها جان البيت كله يبجي وجنات مقبلت تنزل لان حزينه بس بستها قبل ماانزل
شوي وسمعنا صوت الهورنات مال السيارات همه گبالنا بس جابو سيارات لان راح يزفوني للكوت طلعت زفتنا ساعه ١٢ الظهر بسبب الاوضاع والفنادق تخوف واكثرها مسدوده
قررنا مباشره نروح لبيتنا الي خلال اسبوع جهزه شعلان
وطب بهيبته وزيه العربي دشداشه وبشت وعگال وعطره التارس المكان واهله يهلهلون ويدبجون وكولات گلبو الدنيا
شعلان : صرتي الي
رشا : اي الك
شعلان : البسي الكبوس
رشا : صار
شعلان : اروح فدوه للصار مالتج
رشا : دنجت خجلانه واخذني بيده وصعدني للسياره بعد مبوست الكل ورحت لبيتي بلكوت وبديت حياتي ويه شعلان
يتبع ...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!