رواية ابي والغزلان للكاتبة ريام هادي (REEM) الفصل الثاني والعشرون 22 - بقلم الناشر آدم العربي

#رواية_أبي_والغزلان
#للكاتبة_Reem_ريام_هادي
#الجزء_الأول
#البارت_الثاني_والعشرون
#مدونة_نور_قلبي

ما ميت كبل بس شايف التابوت
لان كل ما انام احلم بنعشي
انه مبلل رموش بدمعة المعتاز
انه دموع الفرح ما وصلت الرمشي
وكت الخير عشنه وما شفت بي خير
صاحولي ملك بس ما شفت عرشي
عندي عيون بس محسوب عل عميان
انه مفتح ولكن ما شفت كلشي
احلم بالفرح واترس الضلمه احجار
ضل هواي ليش نكول ما ضل شي"

سليل : لحظات واحس دم عمو سلام مله المكان وحتى علية كام يطفر  بقيت جامده واشوف بابا شون يضرب بقوه بلكرك مال حديقه على راسه رغم وكع بقى يضرب ويه كل ضربه عيطه ويصيح ليش اني جامده رمش ما ارمش رعب لو خوف لو هذا كله حلم وخيال ومصار كولشي و هسه راح تكعدني ماما لو ايد ريم مثل يوميه حتى اكوم اروح للمدرسه
بس استمر دقيقه اي هذا بابا شفته شون كتله ونزلت عيني اشوف سلام راسه ملخ والدم تكول نافوره وبابا ايده ترجف والكرك بيده كله دم ولحم من راسه جان يضربه بلطرف الحاد من الكرك جفلت بحركة من ايد بابا وهو يسحبني خارج الغرفه ويهز بيه

حجي طه : سليل بابا باعي علية سليل
سليل : رغم واكفه كبال بابا بس فاقده انداريت اشوف صدك سلام مات وهذا دمه لو خيال انداريت بدون مااجاوب بابا رجع راسي بيده ولزمه وحط عيوني بعيونه
حجي طه : اسمعيني تركضين هسه للبيت تبدلين ملابسج وترحين للمدرسه والي يسألج ليش تأخرتي كوليلهم راحت علية نومه او اي عذر مااريدج بلبيت تسمعيني

سليل : اريد افتح  حلكي مااكدر ريكي ناشف ومخروعه وشبه عقلي شخط بنيه عمرها ١٣ سنه تشوف كل هذا ب ٥ دقايق بين تحرش عمها بيها وبين كتل ابوها لهذا العم لهذا عقلي مكعد يستوعب الصار جان احس ايد ضربت وجهي بقوه الظاهر بابا عجز يخليني اركز وياه ضربني راشدي حتى اصحى وبلحظة مصحيت واستوعبت الصار حضنته حييييل واشهك
بابا مات مو مات
حجي طه : طبه مرض اسمعيني باباتي شويه والكل راح يعرف مااريد بشر تعرفين شنو بشر يعرف بلي صار اني تعاركت وياه وكتلته اسمج ميصير يجي بلشغله
سليل : شراح يسوون بيك راح ياخذوك مو
حجي طه : مالج دخل بيه المهم انتي زينه اريدج شون الصبح جنتي سباعيه واجيتي سولفتي الموضوع كله هسه هم ترحين للبيت وتصيرين سباعيه تغسلين وترحين للمدرسه واي واحد يسأل ماادري ومشفت بابا من الصبح كعد فهميني مشفت بابا من الصبح
سليل : رجعت حضنته حيل شراح يصير بابا
حجي طه : مالج دخل المهم محد يطخ غزالتي
اباوع ابتسم بس ابتسامته تحاول اطمن الرعب  البداخلي  بس هو ميدري هاي الابتسامه كسرتني اكثر مما اني مكسوره حسيت بلحظه اني ضيعت ابويه مني ومن خواتي زين منو النا منوو اذا اخذوه المن نروح منو بعد يحمينا بلحظتها عرفت خسرت الامان بحياتي ودمرت كولشي رغم مالي ذنب بس حسيت دمرت حتى خواتي

بقيت واكفه واشهك تالي سحبني من ايدي وطلعني من الباب جانت من مميزات البيت الجبير الصبح زوجة عمو تكعد تحضر ابنها وجنات للدوام ادزهم وترجع تنام واصلاً بيبي انعام متكعد اله بعد ساعه ٩ وعمو علي يطلع من ساعه ٦ الصبح للشغل يعني بس هو مثل الغراب يفتر بلبيت محد يدري شصار مصار لهذا هو جان يختار الصبح حتى محد يشوف سوالفه القذره سحبني من ايدي بابا ودفعني لذاك البيت طبيت اركض
وبظهري جنطتي الي بقت بظهري منزعتها شمرتها بلهول وطبيت لغرفه النوم اباوع بلمرايه واشوف قميصي الابيض شون ملطخ وعلية نقاط من الدم حتى وجهي بيه بلحظتها طبيت ركض للحمام وفتحت المي وطبيت اني وملابسي فاقده جوه الدوش وافرك بيهم افرك بجسمي واتخيل لمساته القذره واتذكر بابا شون گتله

وابجي لحد ما حسيت روحي طلعت تأخرت بلحمام طلعت والمي ينكط من كل جهه جان شهر ١٢ والجو بارد كولش يضرب الهوا بيه يكسر عظامي لان كلها مي بس دمي حار لدرجة محاسه ببروده الجو
نزعت ملابسي وبدلت باوعت صارت ساعه ٩ تأخرت بعد يامدرسه اروح الها نشفت شعري وجسمي وبدلت بجامه وكعد امشط شعري ودموعي تنزل واني اباوع بلمرايه شراح يصير وبابا هسه شسوه اريده اريد ابويه دقيقه واسمع صوت سيارات الشرطه ترست الشارع نبض گلبي برعب اكيد على بابا دقايق بسيطه وگب العياط بذاك البيت طفرت على الجربايه وحطيت راسي بين رجلي وحصرتهم بجسمي وتمنيت اختفى من الدنيا لو ارجع بطن ماما ما اريد هاي الدنيا محلوة وظالمه واخذت كولشي حلو مني
كمت ماارفع راسي حتى لا اشوف شيصير وطول هذا الوكت العياط بذاك البيت موكف شويه واسمع ماما تلطم وتعيط وبيبي امها تحاول تهدي بيها هي لهسه متدري بيه بلغرفه عبالها بلمدرسه اسمعها تعيط وتلطم على رجلها وجهه
سندس : انهجم بيتج يسندس ولك ليش طه ضيعتني وضيعت جهالك لك انت الطينه الساكت هيج يطلع منك تكتل اخوك

ام سندس : والله مفهمت شى هو ليش گتل اخوه
سندس : يوم اني جنت يم انوار وسمعنا صوت سيارات شرطه وعياط قريب مدينا راسنا لكيته بذاك البيت طفرت حتى افهم واشوف انعام تلطم مثل المخبله بلشارع وتصيح يمه سلام راح وليدي اله احركك ياطه من سمعت اسمه تخبلت طه شعليه ركضت عليها اريد افهم جيتت علية تريد تكطعني لزموها الناس وتفشر وتعيط حتى الربطه ذبتها وشكت ملابسها وتصيح طه كتل وليدي وعلى صفحة واكفه نوريه عفت انعام ورحت الها لان اريد احد يفهمني والشرطه تدفع بناس كالت مندري نايمين وجيتت الشرطه علينا كالو عدكم قتيل وفتشو البيت واحنا وياهم ولكينا سلام غركان بدمه بلغرفه مال المخزن الي بلحديقه والضابط ايگول اجه القاتل سلم نفسه وحسب افادته اجينا يابه منو القاتل جان يكول اخو المغدور منو كال اسمه طه ياسين حسين

واني تخبلت اريد اصدك طه يگتل ولج يمه هذا اذا ذبح دجاجه يكعد يبجي گبالها يگتل عقلي ميشيلها ومنو يگتل اخوه اني انعام رغم سكاطتها وشسوت بيه هي وعلي حتى راد يوصل للموت من وراهم ومبلغ عليهم وحتى ميقبل احجي عليها مو عاد سلام
يبوووووو راح رجلي يمه ضاع وهجم هذا البيت على راسنا
ام سندس : والله رجلج دره مال الله وذهب صافي والعيبه ماتطلع منه ويخاف الله شون گتله زين اخوه مات
سندس : اي يمه مات وهو مسلم نفسه
سليل : ابجي بهدوء اخاف اطلع صوت لتعرف ماما

سليل : دقايق واسمع عياط عمه نهر وهم تلطم واسمعها تكول ولكم ابجي والطم على الگاتل لو المكتول اثنينهم اخوتي ياربي ردت اطلع واكولها بابا من ورايه گتله بس تذكرت كلام بابا ما اكول لأحد من الخوف نزلت جوه الجربايه اريد احد يحميني اريد احد ياخذني بحضنه ويكول لتخافين كلها كم ساعه ويطب ابوج بعربانه اللبلبي وهو تعبان وجهه يضحك النا وياخذنا بلحضن وحده وحده ويكول وينهن غزلاني
غمضت عيني وبعدها بس وشه وهوسه وحجي مفهوم ونصه لا وعياط وبجي حطيت ايدي على اذني وغمضت عيوني حيل لحد ماحسيت رجع الهدوءللبيت طلعت من جوه الجربايه اشوف شصار لكيت البيت فارغ يمكن طلعو يشوفون بابا

اول مره امد راسي من شباك الي يربط بيتنا وذاك البيت اسنين اشوف امي مگابلته وكاعده ومااتقرب منه لأول مره امد راسي حتى اشوف شصار
جان عياط بيبي انعام مسمع الدنيا كلها واسمعها شون تتحلف بأبويه وتكول اله احرك گلبه مثل محرك گلبي وتغلط وتصيح ابن رازقيه زين هو مو ابنها ليش هيج تكرهه احنا نعرف هي امه وهذا البيت بيت جدو وعمامي بس متزاعلين بس ليش هي امه تكرهه لبابا
كل كلمة جانت تكولها اتكطع من وراها
مر وقت وطويل ودمعتي منشفت بس اكول هسه يرجع لحد مسمعت هوسه جوه نزلت اركض لكيت رشا وريم جايات من المدرسه يكمزن وريم فرحانه شافت شرطه يم بابنه وتكمز عمو الشرطي متدري جاي على ابونه
تعالو انزعو
ريم : ماا اريد اروح العب يم عمو الشرطي
سليل : ريم مو وكتج تعالي عطت بيها عيطه هي جفلت مني وبجت حضنتها وكمت ابجي وياها جان تمد ايدها الصغيره تمسح عيوني
ريم : ثلل لتبجين راح ابدل وراها العب ويه عمو الشرطي
سليل : ماكو طلعة بابا ميقبل كال التطلع اعاقبها
رشا : شكو بذاك البيت
سليل : مااعرف يله روحو بدلو واكلو
تعاملت ويه خواتي وكأن كولشي ماكو بس اني مبقى حيل بيه جسمي كل يرجف والمي الاشربه اذبه

للعصر وماما ماكو وذني اكلن راسي ماما وين عفتهم وبقيت حاضنه روحي وابجي وهنه خافن مني وحتى حسام متقرب مني عفتهم وكعدت على جربايتي  وكل شويه اكول هسه يجي بابا ونتعشى سوه وساعه 7 بليل انفتحت الباب ركضت اكيد بابا وياهم واشوف ماما وعمه نهر وزوجها عمو سامي وبيبي ام ماما كلهم طبو وبابا ماكو والوجوه متتفسر وعمة نهر مكطعه روحها
كعدت قريب منهم اسمع كلامهم
سندس : يعني الرجال ضاع يعني بعد منشوفه
نهر : اخويه مايكتل بسبب شى تافهه اعرفه نفسه عزيزه وعمره ماقبل ياخذ فلس من احد
سندس : ولج تقشمرين نفسج لو تقشمرينا سمعتي المحامي شگال القضيه محسومه طب ساعه وحده واجه كال مااستلم القضيه لان خسرانه معترف على نفسه متجادل ويه اخوه علمود الورث وكاتله
نهر : انتي من كل عقلج صدگتي هو ياورث حتى يتجادل ويه سلام صار سنين شغلت الورث راحت وبعز ما اكلو حقه هو جان سودة علية يكول اذا الي حق يم الله اخذه انام مظلوم ولا انام ظالم ولج طه اطيب منه ماكو لو ما انتي مرته وصار سنين عايشه وياه شبسرعه صدكتي هذا الشى لازم سلام سوه شى جبير وطه گتله
سندس :  اريد افتهم هو مو المكتول اخوج ولا محروك گلبج علية
نهر : الله يعلم شحس هسه وشون ظهري انكسر بس طه ميكتل لخاطر فلوس اخويه هذا وابويه واعرفه اكثر من روحي

سامي : هسه باجر من الصبح اطلع اشوفلي غير محامي لازم نسوي شى اذا بقى هذا

اذا بقى هذا وضعه راح ينحكم اعدام لا محاله
سندس : صخام بوجهي شنو اعدام
سامي اكيد اعدام اذا هو برجله رايح وكايل الهم اني كتلت اخويه وتلكون الجثه بلبيت وشنو سبب العركه علمود ورث وتجاوز علية وفقدت اعصابي وكتلته يعني جريمه كامله والدافع كلها تافهه يعني اعدام مابيها مجال
سندس : كامت تلطم على وجهه ليش طه ليش اول تالي تتعارك علمود فلوس ويافلوس تريدها من سلام وهو لا يهش ولا ينش لو گاتل انعام جان گلت من وره ورث لان الورث كلها يمها بس سلام
والله رجلي فقير وماعنده هاي الشغلات ياناس
سامي : تعلميني ب طه هو اكو اطيب وافقر منه بس هذا كلامه واعترافه
نهر : البنات وينهن
سليل : رجعت للغرفه ابجي واخرمش بوجهي ضاع ابويه ضاع ومن ورايه جان تنفتح الباب شمرت نفسي بحضن عمه نهر اعرفه اكثر وحده يحبها بلدنيا
نهر :اوي سودة علية عرفت بيج راح تعرفين كولشي انتي جبيره مو صغيره ومتفوتج هيج شغلات
جنت ابجي بحضن عمة بحركة وهي ويايه ابد محجت شى بس تكولي ادعيله انتي طفله وبريئه والله يستجاب دعائج

خواتي حسو اكو شى غريب بلبيت والكل ترك اللعب وبس صافن بلوجوه ريم ورشا كاعدات على الدرج بس يباوعن شون ماما تبجي وتلطم وشون عمه نهر منهاره وريم كل متسأل عن بابا يبجون ومحد يجاوبها
حسيت بوجع بصدري متحملت كل الديصير صعدت للسطح وكعت على طابوكاتي بس ابجي واتذكر قبل ساعات شون حجيتله
وبقيت للفجر على نفس الكعد مره اباوع للسما وادعي بكلمات بسيطه مااعرف حتى ادعي بس اكول يارب رجعلي بابا والله هو حباب ويحبني وسوه هيج علمودي وابجي واتوسل لله بقيت للفجر هذا حالي
وخلص اليوم واليوم الي بعده بديت اتعب وادخل بحاله من الانهيار ماما مقبلت نروح للمدرسه وحتى ممنوع احد يطلع بره البيت ولا يوصل الباب
وره يومين نسمع قران فتحت البرده واشوف منصوب جادر فاتحة عمو سلام زين وبابا شراح يصير بيه

نسمع عياط انعام ليل نهار ودعاويها على بابا وعلينا جانت ماما خايفه علينا ليصير شى وامها بقت يمنا متكدر تعوفنا وعمه نهر مكدرت تروح لذاك البيت لان تعرف امها مراح ترحمها بقت بس من تشوفنا تحضن وتبوس بينا وتكول ذني من ريحة الغالي وشبه مقيمة يمنا
الفلوس تشتري الذمم وتعجل حتى بلموت وهذا الصار انعام وعلي بفلوسهم عجلو بلحكم
وخلال شهر واحد وبعد عطلة ١/١ لسنه ١٩٩٦ يعني يوم ٢ بلشهر تم اصدار الحكم انحكم على بابا بالاعدام وخاصه هو معترف والشغله كلها منتهيه وبوجود الدافع والاعتراف وفلوس انعام والرشاوي مالتها والي ساعدهم سكوت بابا كل ميسألوه اي اني كتلته كلها سهلت النطق بلحكم ماانسى شون جان العياط يهز بيتنا والخوف الخيم على روحنا بلوقت الي اسمع هلاهل انعام شون فرحانه لان ابويه راح ينعدم

بلحظتها عرفت اني ضيعت بابا كولشي مسويت غير نمت بلفراش وفقدت النطق تماما مردت احجي ويه كل احد
نهر : طه ااااااه ياخويه محد يعرفك بكدي وراك سر جبير انت ابو گلب الحنين تگتل لا مستحيل انت تخاف الله حتى بلي يأذيك تجي تگتل اخوك وفوكاها ماحسيت بعيونك الندم من رحت شفته بلمواجهه صح مكدرت احجي كلشي وياه لان سندس خبصت الدنيا ليش كتلته وليش وسامي يحجي بجهه وهو باله يم البنات ويوصي بينا وخاصه سليل بس من باوعت بعيون اخويه ماشفت الندم بيهم معناه اكو شى سلام مسوي وطه ضامه مو مات سلام واخذ گلبي بس نار بصدري مشتعله على طه عندي الدنيا بجفه وهو بجفه لو كلها تموت ولا هو
اباوع على سليل وردة وذبلت كدام عيوني لا اكل ولا شرب وبس ساكته حتى مكامت تبجي مثل الاول وذني الصغار يباوعن بلوجوه ومتيهات كولشي والدوام تركوه وهاي سندس بس تندب وتلطم ومتعرف شتتصرف وهم حقها ما الومها برگبتها ٥ جهال منو الهم والعيشه صعبه وحصار والناس كوه مدبره عيشتها واني هم مابيه حظ لا عندي فلوس واساعد ولا رجلي متمكن واخذ منه يعني وضعي على كد العيشه بس لازم اسوي حل خوما اعوف بناته هيج

سليل : كوه عمة نهر تكعدني توكلني وارجع انام فات اسبوعين وعمو سامي يدور على محامي يلزم قضيه بابا علمود الاستأناف بلكت يعدلون الحكم بس كلهم اما مبالغ قويه واحنا ماعدنا اويكولون قضية خسرانه ومحد يقبل يستلمها
وصافنه وعيوني بلسما جان وقت مغرب وبس ماما وبيبي موجودين وسمعت صوته اي هذا صوته والله ممتوهمه ركضت حافيه فتحت الباب وشفته كدامي ركضت مثل الغركان وتعلك بگشايه كدامي شفته وبلبدله العسكرية وحضنته بقوه وابجي بصوت صار اسبوعين لا باجيه ولا صوتي طالع وهو مثل الجمد لان حضنته ليش هيج مو گلت اني يمج مو گلت احميج
سجاد : اششش على كيفج سليل لتبجين
سليل : عمو شفت بابا راح من عدنا وكله من ورايه والله كله من ورايه وانت هم ماكو عفتني ورحت
سجاد : كافي لتبجين ويطبطب على كتفها
جان تجرني ماما حيل من حضنه

سندس : تعالي لج شنو من وراج
سجاد : مو وكتها ام حسام كعد تشوفين حالها
سندس : رحمة لوالديك اسكت احجي لج شنو من وراج
جان يجرني من ايدها ويعيط بماما بصوت عالي وبقوه يريد ياكلها واول مره واحد يكدر يسكت سندس
سجاد : شبيج تخبلتي مو كتلج مو وكتها شوفي حالها البنيه مو طبيعيه اني افهم منها واجي ابلغج مكافي تشوف ابوها راح يموت وانتي تزيدين عليها فوك متحطيها بحضنج
تعالي ويايه
سندس : وين ماخذها
سجاد : مراح اكلها بس احجي وياها
سحبني من ايدي واخذني للمطبخ كعدني على الكرسي وجابلي كلاص مي
اشربي
اهز براسي مااريد
سجاد : اشربي ولتعاندين
سليل : شربت شويه وكعد گبالي وگلي بهدوء احجيلي شصار
سليل :
بديت اسولف بهدوء واشهك وابجي كولشي سولفت لحد ما دخلني بابا للبيت وهو مركز بكل كلمة اكولها وعاكد حاجبه
سجاد : استغفر الله من اشتعلت لشتك ياسلام العار
جان اطب ماما تعيط مبين سمعت كولشي جرتني من شعري حيل
سندس : ولج كله من وراج ضيعتي الرجال ضيعتي خواتج
سليل : ااخ ماما وابجي
جان يدفع ماما حيل وعاط بيها
سجاد : اياج تمدين ايدج عليها كل الصار من وراج انتي
سندس : انت اطلع بره وخليني اذب حرگت گلبي بيها ضيعت ابوها الادبسسز
سجاد : والله ماكو غيرج الادبسسز

جان ترفع ايدها امي تريد تضربه اني رجعت ليوره من الخوف جان يلزم ايدها وعصرها حيل
سجاد : وروح ابويه لو ما خاطر طه وغلاوته عندي جان علمتج شنو ترفعين ايدج علية اله اكسرها الج
سندس : عوفني انت مثل عمتك طايح حظ واكيد هي دزتك علينا
سجاد : هد ايدها حيل ويحجي بأعصاب مااجاوبج لان اعرفج ناقصه عقل لو مره وبيج خير جان عرفت شون اجاوبج شايفه الصار كله من وراج انتي اكو ام تجي بتها تكول الها عمي تحارش بيه وتسكتين لو بيومها حاميه بتج وموكفته عند حده جان هسه طه بينكم انتي وحده مهمله حايره بروحها وبنفسها كعد تشوفين بتج الصغيره وضعها مو طبيعي واجت وفتحت گلبها الج شون تصدكين ذاكه
سندس : مو هو گلي
سجاد : شگلج لو شميكول المفروض تصدكين بتج او على الاقل تحميها منه بس انتي وين حايره بغير دنيا ونسيتي من واجباتج مو بس الخلفه تحافظين عليهم

سندس : بله لتصير براسي ابو العريف وتعلمني
سجاد : هو هذا الكادره علية غير ام تحضن بتها وتخليها بحضنها وتشوف شنو الكاسرها واداوي جرحها شفتي طه صدك بيها وكتل اخوه لان اعتده على عرضه وانتي تردين تضربيها لان حجت لأبوها هي لو عدها ام بيها حظ متعب نفسها وتحجي لأبوها
سندس : ولك ضيعت ابوها وهجمت بيتنا وخواتها راح مستقبلهن هذا عدا انعام الله اعلم شراح تسوي

سجاد : لعد شتردين تشوف عمها يتحارش بيها وتسكت انتي مو صاحيه والله اكلها البنيه طفله وتشوف عمها يمد ايده عليها وانتي حايره هجمت البيت وطبه مرض خلي ينهجم لعد يتحارشون بيها عادي
سليل : ابجي واباوع عليهم شون يحجون وحاصره روحي بصف الثلاجة واخاف اتحرك لتضربني ماما
شوفي ام حسام اذا مديتي ايدج عليها والخلقج واني ممسويها بحياتي وماد ايدي لا اكسر عظامج عظمة عظمة
سندس : وانت منو يمه وتمد ايدك علية غير اشتكي عليك واذبك تخيس بلسجن
سجاد : يله خلي نشوف جربي وضربيها وتراب ابويه اشوفج الي مشفتي من طه
اخاف هذا فقير وطيب وعايفج صوتج شعلاته وتضربين بكيفج اذا شخطيتها شخط احرك هذا البيت عليج
سندس : وانت منو وتدخل بيني وبين بتي بأي صلة
سجاد : هسه يله تذكرتي هاي بتج لو صدك بتج جان صدكتيها مو تشمريها بحضن عمها علمود جم فلس
سندس : احترم نفسك شنو قصدك

سجاد : قصدي فهمتي صحيح اني حذرتج سليل اذا اجيت وسألتها وكالت ضربتني راح تشوفين العجب مني مو طه يضيع عمره وحياتي ويموت لخاطر يحافظ على بته وانتي حضرت جنابج تحاسبيها لان منعت عمها يتحارش بيها
وانتي واندار على سليل اطبين بغرفتج وامسحي دموعج وصيري قويه انتي بنت طه ابوج العلم المقبل بلغلط وضحة بنفسه لخاطرج مااريدج هيج افتهمتي صيري سباعيه وامج بس تلمس شعره منج بلغيني وهاي كدامها احجي افتهمتي لو اعيد
سليل : حركت براسي اي جان يعيط
سجاد : سمعيني صوتج شنو اخرسيتي كولي اي
سليل : شهكت بدموع وگلت اي
سجاد : هااااج
سندس : شنو هاي
سجاد : مصرف لكم يوم مشي بيها وضعكم بين ما الله يفرجها وباجر من الصبح اطلع لولد صديقي عمه محامي جبير بلكت يشوفنا حل بهاي المصيبه

سندس : مااريد شى منك بس لتشوفنا وجهك
سجاد : راح تشوفين وجهي اكثر من وجهه امج هاي مو الج للجهال واي شى تحتاجي بس اكتبي بورقه وانطينياه اني اجيبه
سندس : وانت شنو مجبوريتك تسوي هيج وخاصه المات اقرب عليك من طه
سجاد : غلطانه طه اقرب واحب لگلبي ومثل اخويه الجبير
انتي طبي لغرفتج يله وصيري اقوى
سليل : ركضت طبيت والخنكة بصدري بس حسيت بالامان لان اجه وخفت لا ماما اطب وتضربني بس هي مضربتني بس حاربتني نفسياً لا تحجي ويايه ولا تباوع بوجهي

سجاد : طبيت واشوف عمتي اجت تركض وتعيط وتبجي
انعام : يمه سجاد راح ابن عمتك راح حبيب گلبي گتله الناقص ابن الحرام الله لا يوفقه شفت هاي تاليها سودة بوجهي مدمه كاتله بكل دم بارد ولك يمه سلام يمه اروح فدوة للتراب النمت بيه يمه اله اخذ بدمك واحرك گلبه مثل محرك گلبي بيك
سجاد : ماله داعي هذا الحجي عمه بعد مات الله يرحمة
انعام : انت منين عرفت
سجاد : موعد نزولي البارحه ورحت لولد صديقي ومن اجيتكم بلطريق شفت نهر وكالت
انعام : ختولي الساقطه لا اجت بعزه اخوها ولا وصلت حايره بأبن رازقيه
سجاد : اصعد ابدل تعبان

عفتها واسمعها تكول ولك يمه سلام والله اله اريحك بكبرك اله اخلي يبجي دم لان سوه بيك هيج شى
هزيت ايدي وصعدت لهسه ممصدك بلصار تأخرت هلمره بلنزول اخذت مكان ولد صديقي عريس صرت بديل اله والامر كال ابقى بمكانه واني اعوضك من ساعه السوده من بقيت يمكن مجان صار هذا كله كمت اضرب بلكنتور وصاير نار وحاير شسوي لازم طه ميموت حرامات هيج واحد ينعدم

الليل كله منمت احسب الوقت حتى يطلع الصبح واروح لصديقي ورحت اله ويومين يله حصلت عمه هم محامي وهم حزبي جبير حصلي زياره بوقتها اضطريت افهم المحامي القصه الحقيقيه حتى بس يقبل بلقضيه لان من سمع بيها مثل ما هي رفض مباشره تعتبر قضية خسرانه بس من حجيت كولشي اله بعد مستأذنت من صديقي مكدرت احجي كدامه لان مهما كان اعتبر سليل او طه من عرضي رغم عدم القرابه بس سنين اني اعرف بيه هو ابن عمتي وبقى راسخ هذا الشى بالي رغم معرفتي الحقيقه

حصلت مقابله ورحتله اول مشافني حضني حيل ويبجي
كافي كول ياالله ان شاء الله تنحل
حجي طه : مسحت دموعي وكعدت عادي حتى لو متنحل
سجاد : حجتلي سليل كولشي
حجي طه : واني هم وكالت على سوايتك عرفت شون دافعت عن بنتي وهي متقربلك شى وعمها العار اخويه اااااااااااخ تحارش بعرضي
سجاد : عتبي عليك بشى واحد شون تگتله كدام عينها شايف وضعها هسه

حجي طه : من اجتي سليل وسولفتلي والله ياسجاد وروح ابويه لو كايله امي تخونك اهون علية مما تكول عمي يتحارش بيه تدري شصار اخرسيت لان بيه اعيط لا بيه الطم لا بيه عقل من الهبطة كعدت بلكاع واباوع لله واكوله شمسوي بدنياي حتى يصير بيه هيج
وروح ابوك وابويه شكد أذوني بصحتي برزقي بكولشي گلت الله موجود هو ياخذلي حقي بس من سمعت اخويه تعرف شنو معنى اخويه يتحارش بتي من هول الصدمه انقسمت اثنين جزء مصدكها لان اعرفها بتي ومربيها على ايدي وصغيره متعرف تكذب ونصي الثاني رافض اصدك واكول لو شكد متوصل الدنائه مو مال يتحارش بت اخوه المفروض انوم بنتي بحضنه واني مإمن هاي بته مثل ماهي بتي مو يدور وياها محارم

كتلها روحي حتى بس اشوف او اسمع بأذني والله خفت (وكام يبجي ) خفت لا اكتله واشيل ذنبه وتطلع بنتي تكذب او اكول احتمال لمسها بلغلط وهي طفله ومتميز يعني اقشمر روحي واقنعها اخويه ميسويها لهذا دزيتها حتى من اكتله واموت لام اعرف ورايه اعدام ما اموت وشايل ذنبه او يإنبني ضميري وسمعته شون يكول الها تصلخي ويلزم وسكت ودنج
سجاد : اعرف كولشي كالو ضاربه بلكرك
حجي طه : اي عندي كرك حاد بلطرف الحاد فقدت اضرب واعيط وشكد مااضرب بيه احس بعده عايش اريده يموت يموت هيج نكس حرام يعيش

سجاد : اي والله ردت اكتله ذيج المره بس اكو شى متعرفه
حجي طه : شنو
سجاد : تره سلام فاقد رجولته
حجي طه : شون يعني
سجاد : من اذيته ذيج المره الضرب والشغلات السويتها بيه خلته يفقد رجولته وهاي السنتين شكد تعالج مفاد وياه وهذا الحجي جنت اجر لسان عمتي واعرفه لهذا امنت على سليل ورحت وكمت حتى ماانزل لان اعرف بيه صار رجل كرسي لا يقدم ولا يأخر بس الي متوقعته كميه الحقاره والسفاله الي يملكها
حجي طه : يعني شنو
سجاد : يعني ميكدر يتقرب منها بس راد يعيشها برهبة وخوف وايام سودة ينتقم منها وجان يتلمسها هيج بس حتى يعذبها ويشوف الخوف بعيونها راد يعاقبها على حالته اسوأ عقاب وراها يتفرغلي ويأذيني لان جنا سبب علته وبدا بسليل ينتقم منها
حجي طه : شنو مريض نفسي
سجاد : اي مريض نفسي وحقير بس انت لازم تحجي حتى تطلع يصير دفاع عن العرض واني شاهد وهي هم تحجي الصار تطلع بسهوله طه

حجي طه : لو اعرف انعدم مكان المره عشره ماادخل بنتي مراكز ومحاكم ومااخليها توكف كدام اليسوه والميسوه وتشرح شون جان يتحرش بيها شون تقبلها سجاد هاي طفله وتدمر مستقبلها ومستقبل خواتها
سجاد : بس بدونك هم يدمرون
حجي طه : ربك موجود هو ارحم بعباده اني كل السويته حتى احافظ عليها وعلى سمعتها وعلى نفسها الي انكسرت وعلى روحها الي انجرحت وقدمي نفسي فداء الها حتى تعيش مرتاحه تريد بعد هذا التعب كلة افضح بتي مستحيل
سجاد : وتموت

حجي طه : الاعمار بيد ربك العظيم واذا كاتبلي هيج اموت هاي قسمتي من يوم منولدت واني ماعندي حظ مبقت على هاي المهم عندي والشاغل عقلي وماخذ حيلي بناتي سجاد اعرف مالي حق اطلب هيج شى منك او احملك فوق طاقتك مشكور والي سويته لهسه يسوه اخويه واهلي كلهم
بس عينك على بنتي بس الله يعلم شديصير بحالي من وراهن وبالاخص  سليل هاي جبانه وتخاف وخايف تضيع روحها راح تحمل نفسها سبب الصار كله
سجاد : مع الاسف هذا الصار
حجي طه : بتي واعرفها عينك عليها امانه
سجاد : لتخاف مااخليك تموت لو اعرل انطي العندي والماعندي الي مثلك حرام ينعدم بسبب هيج واحد حقير

حجي طه :  الْحٍمَدٍ للـّہ على كل حال خلصت الزياره مااوصيك عينك على عائلتي
سجاد
سجاد : لتخاف بعيوني جبتلك اكل وجكاير وملابس
حجي طه : كولشي بعد لتجيب مااريد اذا الي معزة بگلبك عينك عليهم
سجاد : الله كريم
طلعت منه دايخ ورجعت فهمت المحامي والمحامي حيل تعاطف ويه طه وخاصه عنده بنات بكد سليل استغليت الجانب الانساني وحاولت اثير بداخله الموقف لو يصير بيه شنو ردت فعله
وبوقتها انهار وكتله لعد الله يساعد طه
رجعت للبيت وفتحت القاصه مالتي وشلت نص الفلوس ورجعت للمحامي جان هذا ورثي من ابويه اخذت نصه مهتميت ورحت للمحامي وعدني يدخل من جوه لجوه بالاستأناف وصلنا للقاضي اسبوع اركض بدون توقف حتى مرات انسى اكل وبعد شهر بلرشاوي والواسطات ومن ناس لناس وعن طريق حزبي جبير صديق المحامي كدرنا نوصل للقاضي انقبل الاستأناف

كاعده بلسطح صار ملاذي ومهربي والجو بارد شباط ودنيا ليل تحط اللحم بره يجمد واني كاعده اباوع للسما اختنكت من البيت ومن الدنيا كلها سمعت صوت نبرت صوته الرجوليه المميزه
سجاد : مبردانه
سليل : باوعت علية وعيوني كلهن حزن وجواهن سواد من قله النوم والتفكير لا مبردانه
سجاد : وضعج معاجبني
سليل : عمو
سجاد : هااا
سليل : اريد اموت
جان يطفر من الحايط وكعد بصفي
بقيت على كعدتي منتجيه على الحايط ومرجعه راسي ليوره واباوع للسما حسيت ورث جكاره وينفخ دخانها ليفوك ويحجي بهدوء
سجاد : مثل شعوري من امي عافتني حسيت الدنيا ضيگه بعيني وگلت المن عايش بس من كبرت عرفت حرامات الواحد يضيع عمره وميعيشه
سليل : بس اني ضيعت بابا وخواتي
سجاد : ماكو شى اسمه ضيعت بابا ابوج هو اختار يدافع عن غزالته واي رجال غيور وعنده شرف وغيره يسوي مثله محد يقبل بلغلط والي جان يصير مو بس غلط اجرام وحرام تنهزله السموات اله
سليل : بجيت وشون اكدر اعيش بدون بابا وشون اذا عدموه
سجاد : ان شاء الله ميعدموه بس انتي صيري قويه وادعيله وعينج على خواتج ترت وكحات وامج حالياً مو بعقلها
سليل : قابل جديده على امي
سجاد : مرات احسج اكبر من عمرج ومرات اصغر بعمر ريم
سليل : اني هسه لا اريد اكبر ولا اصغر اريد ابويه وبس
سجاد : لتخافين يجي يوم وتنجمعين بيه بس كولي يارب
سليل : يارب
سجاد : عيونج صايرات زروف جفجير

سليل : شون يعني
سجاد : من البجي شكدوتهن
سليل : شسوي لو يصير انطي روحي لبابا المهم يطلع
سجاد : كومي انزلي شوفي خشمج صار دم من البرد
سليل : خليني شويه كاعده
سجاد : ماكو تتمرضين يله بدون عناد
سليل : كمت وتمشيت شويه وانداريت علية
عموو سجاد
سجاد : هااا
سليل : شكراً على كولشي
سجاد : تصبحين على خير
سليل : وانت من اهله
نزلت واني افكر شراح يصير بحالنا بعد

سليل : محبوسين بلبيت وامي بس تعيط وكل شويه ضاربه احد عداي اني ابد ماوصلت يمي
وصار اسبوعين  من اخر مره شفت سجاد اريد اعرف شسوه بالي يم بابا
كاعده على الدرج واجت رشا من الكراج تشهك من البجي طفرت شبيج
رشا .. بيبي انعام ضربتني ولازمه ريم تضرب بيها
سليل : شوداكم الها مو كتلكم لطلعون
رشا .. كله من ريم تريد تلعب ويه حسين
سليل : وهسه وين ريم
رشا .. بذاك البيت
صحت ماما ماما
سندس : وجعت امي شكوو
الحكي لريم بذاك البيت وطفرنا نركض وماما جان تفتح الباب واطب لكينا ريم فاحطه من البجي وانعام تضرب بيها بلعوده جان ماما تجر العوده من ايدها
سندس : شون تمدين ايدج على بتي
انعام :بت النعال بت الفكر دازتلي بناتج مكافي العار رجلج دمرلي حياتي وكتل ابني هلمره دازتلي هاي القذاره لبيتي حتى تأذي جهال ابني
سندس : والله ماكو غيرك القذاره وهذا المات نعله على لشته وين ما دفنتي النكس يستاهل الف مره يكتله وميبرد گلبنا
سليل : اني حاضنه ريم ورشا ورايه
وجان تجيت انعام تضرب ماما بلبدايه خفنا رجعنا ليوره وماما وكعت دك لبيبي وشويه وطلعت عمه اشواق بلعوده وتضرب بظهر ماما وصارو اثنين عليها

ركضت ادفع بعمه اشواق حتى لتضرب ماما وناس تضرب ناس وعياطنا بلشارع حسيت بحجاره اجت بظهري انداريت واشوف ريم لازمه حجار وتضرب ولان ايدها صغيره ومتنوش تركع بيه
ريم : وخري ثلل خلي افشخهن
سليل : ولج اكعدي لتتأذين
ريم : بيبي نعااال اله اعنجر راسها
وجان تشمر نعالها وزرك براسي عطت بيها ولج كافي اني ضرب صار بيه
وجان تركض وهي ناعمه واطب بلنص اني گلت انمردت وجان اسمع عيطه انعام دنجت واشوف ريم لازمه رجل انعام وعاضتها عضه شيغت روحها بحيث لازمه الرجل بأثنين ايدها وتعض من كل گلبها

كوه سحبتها گلت راح تنمرد وجان تنضرب الباب حيل ويطب سجاد يعيط
سجاد : متستحن مو عيب سويتونا فرجه للعالم
انعام : ولك يمه الحكني ذني الكح.. لعبن فلك بيه
سندس : اذا تقربتي من بناتي اله اطيح حظج
انعام : بت المجدي تردين تصير براسي خلي افرح بعدام ذاك الناقص وافرغلج اذا مااخليج مثل البزون يوميه بيت وصايعه مثل الدايحات ما اتسمى انعام

سجاد : مراح ينعدم طه انعادت المحاكمه
وصارت مؤبد مو اعدام
انعام : لطمت على صدرها ولك شون

يتبع ...