رواية احببت قاصرا الفصل الثالث 3 - بقلم شيماء الديب

بعدها بلحظات رجع أسعد من الشغل. جهزت هالة الأكل و نادت على سمر و على ساجد أخوها التوأم. اتجمعوا على الأكل إلا سيف كان نايم في أوضته. أسعد باستغراب: "أومال سيف لسه بره ولا إيه؟ هالة: "لأ يا أبو سيف، هو رجع من بدري بس قال إنه مصدع شوية و هينام. و لما يصحي هياكل." أسعد: "امم، طب تمام." و عدى أسبوع على دا الحال و سيف بيحاول يبعد عن أي تجمعات عائلية و عن أي مكان ملك موجودة فيه.

عشان محدش يلاحظ ملامح وشه اللي بتتغير تلقائياً لما بيشوف ملك و حد من العيلة يحس بيه. قرر سيف يخرج من أوضته و يروح الجامعة و يقابل أصحابه عشان ينسى الهبل اللي في دماغه و يفوق لنفسه. في الجامعة. يوسف بفرحة: "أبو السيوووف حبيبي! عاش من شافك يا شق. إيه يا جدع، كنت فين؟ غطسان كده؟ سيف: "اديك شوفتني يا عم، اتهد بقى." يوسف بضحكة: "و نبي شكلك يا صاحبي لقيت لك حتة طرية و غطسان معاها الأسبوع ده كله."

سيف بابتسامة خفيفة: "هو أنت دايماً تفكيرك شمال يا بني كده؟ يوسف: "آه، بنسبة لتفكيري الشمال افتكرت. أصل البت منه بقالها فترة وجعالي دماغي من السؤال عليك يا عم." سيف: "يا عم فكك منها، أنت عارف إني مبطيقهاش. يا جوبص، بقولك إيه، مفيش خروجة حلوة انهاردة، أحسن أخوك قرفان و نفسيته تعبانة و عايز أغير جو." يوسف بضحك: "مادا نفسيتك تعبانة، تبقى بتحب يا صاحبي." سيف بصوت واطي: "والله شكلي كده." يوسف: "بتقول إيه؟ على صوتك يا جدع."

سيف: "لأ، ولا حاجة. متركزش معايا يا جو." يوسف: "خلاص يا حبيب أخوك، هندخل للواد تامر. نحضر المحاضرة معاه و نطلع بعدها نخربها." سيف: "اشطا يا صاحبي، يلا بينا." و أول ما دخلوا على المدرج و تامر شافهم و بصوت عالي: "أبو السيووف وصل يا جدعان! " و جري عليه و حضنه و رحب بيه. منه انتبهت للكلام و بتلف شافت سيف داخل المدرج، راحت جري عليه و بلهفة نادت عليه قدام الكل. منه: "سيف ياسيف." سيف بقرف: "خير يا منه، في حاجة؟

منه بإحراج: "لأ ابداً، بس كنت عايزة أطمن عليك. بقالي كتير مشوفتكش." سيف بزهق: "و خلاص اتطمنتي؟ منه بخنقة بانت على ملامحها و صوتها: "ليه كده يا سيف؟ كل ما أحاول أقرب منك تكسر بخاطري." يوسف حس بالموقف بقى درامي و حب يغير الجو لأن سيف طريقته جارحة أوي مع منه. يوسف: "متزعليش من طريقته يا منه، بس سيف عنده صداع جامد و ميقصدش يزعل." منه بزعل: "آه، طب ألف سلامة عليه. بعد إذنك." و تامر بعصبية: "مالك يا عم سيف؟

شايف نفسك على البت ليه؟ يوسف: "ليه يا جدع تحرجها كده؟ هي غلطت في إيه؟ دي بتطمن عليك." سيف بعصبية: "أنا مش عايز حد يتطمن عليا. ولا أقولكم أنا هريحكم مني. و الله ما أنا حاضر المحاضرة. سلام." يوسف حاول كتير يهديه و يمسكه بس للأسف بدون فايدة. و سابهم و مشي. تامر بغيظ و بيبص ليوسف: "دا ماله ده؟ شايف نفسه علينا ليه؟